Woho wasukɛso Diolelo​—Olimu wa wokelo ndo wa nkimanyiya wanɛ wambohomɔ mpokoso

OHƆSA dia wɛ ekɔ lo tatshu otsha lo Mbalasa kanyu ka Diolelo, ndo wɛ aya la wengengo lo menda woho wayatɔ. Wɛ okongaka nshi tshɛ l’ofunu lo menda woho wakakama Mbalasa kɛsɔ ndo wɛ mbohɔka woho wakayasha lonya lo wokelo atɔ ambeta ɛnɔnyi ɛmɔtshi. Koko, wɛ amboleka monga l’ɔngɛnɔngɛnɔ lo menda woho waya Mbalasa ka Diolelo kɛsɔ lo tshanda mɔtshi dihole di’ekimanyielo. L’ɔkɔngɔ wa lɔpɛpɛ ndo mvula ngembe ndanya ɛtshi kanyu ka nkɛtɛ, Bɛtɛlɛ ambɔsa tɛdikɔ esadi eto dia wanɛ tshɛ wakahomɔ mpokoso kɛsɔ nkondja mbo ya ndɛ, ahɔndɔ, ashi w’amɛna ndo diangɔ dikina. Diangɔ sɔ diekɔ lo kahanyema aha la lofunge. Anangɛso l’akadiyɛso wekɔ l’ɔngɛnɔngɛnɔ w’efula lo woho wambowokondja kɛnɛ kewɔ l’ohomba ndo wekɔ lo ntondja asɔi w’ɔngɛnɔngɛnɔ.

Yeso akate dia djembetelo yoleki woke yayeyama ambeki ande ele ya mbokana ngandji lam’asawɔ. (Jni. 13:34, 35) Lo etenyi ka samalo kɛnɛ, tayɔsɛdingola woho wɛnya Ɛmɛnyi wa Jehowa ngandji k’Okristo kɛsɔ l’etsha lo olimu wa wokelo ndo w’ekimanyielo. Awui asɔ wekɔ djembetelo ya shikaa yɛnya dia tekɔ lo nsɛna l’ɛse k’ɛlɔmbwɛlɔ ka Diolelo diele Yeso mbele ɔnɔmbɔdi adiɔ.