Woho wa mbisha ekimanyielo oma l’ɔkɔngɔ wa mpokoso kɛmɔtshi

Mpokoso y’oma lo diangɔ diakatongama yambonyomoleka ntomba nshi nyɛ. Etena katomba mpokoso kɛmɔtshi, ekɔ ohomba mbisha ekimanyielo kele ohomba, dui sɔ nɔmbaka okongelo ndo ɔlɔngɛlɔ w’akambo lo yoho ya dimɛna. Dia nkotsha oyango ɔsɔ, Olui-walɔmbɔla akakongɛ lo waa bɛtɛlɛ tshɛ departɛma diasha ekimanyielo etena katomba mpokoso.

Etena keya anangɛso wa lo departɛma diakɔ dia mpokoso kɛmɔtshi kambotomba, vɔ sawolaka aha la ntshimbatshimba la dikumanyi dia lɛnɛ otombi mpokoso kakɔ dia mbeya ekimanyielo kele l’apandjudi ohomba. Naka mpokoso kakɔ kakalanya diangɔ di’apandjudi polo lo yɛdikɔ yahawakoke vɔamɛ dilɔngɔsɔla, kete bɛtɛlɛ ayɔsɔna anangɛso wambohokɔ akambo dia nɔmbɔla elimu ɛsɔ. Anangɛso asɔ koka nɔmba wanɛ wayakimɔ la lolango kana nyanga weshasha wendana la dui shikaa kana nsomba diangɔ ndo nkahɛ anangɛso wakahomana la mpokoso kɛsɔ.

Sala akambo lo yoho shɔ, mongaka la wahɔ efula. Kɛsɔ kimanyiyaka dia mbewɔ nsala elimu wele bu ohomba, monga l’ohokohoko ndo mbewɔ nkamba la weshasha ndo diangɔ diakoka anangɛso vɔamɛ ndjakondjɛ.

Anangɛso wakasɔnama oma le bɛtɛlɛ asɔ koka nshikikɛ lofulo la falanga ndo l’anangɛso shikaa wayakimɔ la lolango wayonga lawɔ ohomba dia tosha ekimanyielo kɛsɔ. Anangɛso koka nkɛtshanya nto l’ewandji wa lo ngelo kɛsɔ lo woho wakokawɔ nsala dia ekimanyielo kɛsɔ komaka esadi esadi. Ɔnkɔnɛ, ndooko onto lahomba mbɔsa yɛdikɔ ya nkɔngɔla weshasha, ntoma ekimanyielo kana ntshɔ lo dihole diotombi mpokoso kakɔ, naka hawɔlɔmbi dia nsala dui sɔ.

Lo mɛtɛ, etena katomba mpokoso, sho kombolaka mbisha ekimanyielo. (Hɛb 13:16) Sho mbokaka anangɛso ngandji! Kakɔna kakokaso nsala? Dui dioleki ohomba ele, sho koka nɔmba lo dikambo di’anangɛso wambohomana la mpokoso kakɔ ndo lo dikambo dia wanɛ wayotshɔ tosha ekimanyielo. Sho koka nto nkimɔ weshasha wendana l’olimu wa l’andja w’otondo. L’ɛlɔmbwɛlɔ k’Olui-walɔmbɔla, waa bɛtɛlɛ mbashikikɛ dihole dioleki ohomba diakoka weshasha ɛsɔ kambema. Ndo naka sho kombolaka tosha lonya l’olimu ɔsɔ, kete sho koka ndodia dɛmandɛ dia mbetawɔma oko onto layasha la lolango l’olimu wa wokelo wa lo wodja (DC-50).

NYENDE VIDƐO YELE L’ƆTƐ A DUI ƆNƐ: MPOKOSO YA DOLA LA BRESIL, NDO OMA LAASƆ NYOKADIMOLE LO DIMBOLA DIAYELA NƐ:

Kakɔna kakaambiya lo ekimanyielo kakasha Ɛmɛnyi wa Jehowa l’ɔkɔngɔ w’elola kakatombe la Bresil l’ɔnɔnyi wa 2020?