Olimu wa wokelo wasalema lo filialɛ kaso ekɔ yoho mɔtshi y’ohomba y’olimu w’ekila
1. Kakɔna kambosalema l’olimu wa wokelo wa Mbalasa ya Diolelo ndo mvudu nkina yakama lo filialɛ kaso, ko ohomba akɔna wekekɔ?
1 Lo ɛnɔnyi etanu wetshi, Mbalasa ya Diolelo 564 yakakama kana nɔngɔswama lo ɛtshi ka nkɛtɛ ka filialɛ kaso. Ɔnkɔnɛ, sho mɛtɛ mandolaka olimu wa wolo wakasale anangɛso la akadiyɛso wa lo tshumanelo dia lo ɛtshi kaso ka nkɛtɛ, wanɛ wakakimanyiya ekambi wa lo tena tshɛ wakatomama oma le filialɛ. Kânga mbele olimu wa woke wambosalema, olimu weke efula lo dikambo dia wokelo wa Mbalasa ya Diolelo, ndo mvudu nkina yakama, ɛnyɛlɔ oko Mbalasa ya nsanganya ya weke lo commune ka Limete la Kinshasa, la Kisangani lo Province Orientale, ndo lo Congo-Brazzaville. Ngande wakokaso sukɛ yoho nyɛ y’ohomba y’olimu aso w’ekila wakambɛso Jehowa?—Eny. 7:15.
2. Ngande wakokaso sukɛ olimu wa wokelo wasalema lo filialɛ kaso?
2 Yakimɔ la lolango: Naka wɛ ekɔ opandjudi wambobatizama, kete sho kɔlɔmbaka dia wɛ ndjakimɔ la lolango dia kamba lo wokelo wa mvudu yotshikitanyi shɔ, djekoleko etena kakawɔ kana kalɔngɔsɔlawɔ Mbalasa kanyu ka Diolelo. (Osam. 110:3) Wanɛ tshɛ wayakimɔ la lolango pombaka monga ekambi wakamba la lolango ndo wele la yimba ya kamba kâmɛ. (Osam. 133:1) Oyadi kânga wɛ bu la diewo dialɔmbama lo awui wa wokelo, wɛ kokaka mbisha lonya dia olimu wa wokelo ntshɔ otsha la ntondo. Wɛ mbeyaka ndjolongola ndo wetshelo wayokokimanyiya dia vɔ nyomoyoleka kamba la yɛ lo nshi yayaye.
3. Lo toho takɔna tokina takokaso mɛnya dia sho sukɛka olimu wa wokelo wasalema lo filialɛ kaso?
3 Naka wɛ bu l’akoka wa ndjakimɔ la lolango, kete wɛ kokaka sukɛ wanɛ wele l’akoka wa mbisha lonya lo yɛdikɔ nyɛ lo mbakeketsha. Wɛ kokaka mbisha ekimanyielo lo kotshaka ɛkɛndɛ wawashawɔ l’etshumanelo etena kewɔ bu lawɔ. Lo kongɛ awui la ntondo, dikumanyi kokaka ndjashikikɛ dia ehomba tshɛ wa l’etshumanelo wekɔ lo kotshama dimɛna oyadi kânga anto amɔtshi wekɔ lo mbisha lonya l’olimu wa wokelo wa Mbalasa ya Diolelo kana wekɔ lo kamba l’ahole akina wakama mvudu lo filialɛ kaso. Aha la tâmu, Jehowa ngɛnangɛnaka etena kakambaso kâmɛ dia tɔla wahɔ wa Diolelo otsha la ntondo.—Heb. 13:16.
4. Ngande wakokaso keketsha wanɛ washa lonya l’olimu wa wokelo?
4 Tonge anto wakeketsha: Olimu wa wokelo w’ahole w’ɔtɛmwɛlɔ ndo mvudu nkina yendana la olimu wa Diolelo ekɔ lotumu la wolo ndo nɔmbaka wenya efula. Mbokɛmaka lâsɔ dia, wanɛ welɛwɔ dia tosha lonya l’olimu wa wokelo wayotshikaka tshumanelo diawɔ tena efula. Tongake suke dia mandolaka ndo keketshaka wanɛ wayakimɔ la lolango dia kamba olimu wa wokelo ndo wayahombia dia kamba ‘olimu w’ohomba ɔsɔ.’—Etsha 6:3; Romo 14:19.
5. Ngande wakoka wanɛ wayakimɔ la lolango mɛnya dia wekɔ la wɛdimo?
5 Tonge la wɛdimo: Sambisha Diolelo diaki Nzambi ekɔ olimu wa ntondo wendana la ɔtɛmwɛlɔ aso. (Mako 13:10) Aha la mbohɛ dui sɔ, biro kendana l’awui wa wokelo salaka la wolo dia kongɛ elimu lo woho ɔnɛ wayosha wanɛ wayakimɔ la lolango diaaso dia vɔ mongaka lo tshumanelo diawɔ. Woho akɔ wâmɛ mbele, wanɛ wayakimɔ la lolango dikambo dia olimu wa wokelo pombaka monga la wɛdimo lo woho wakotshawɔ ɛkɛndɛ awɔ wotshikitanyi. Vɔ mbɔsaka tɛdikɔ tahombama dia ndjashikikɛ di’anto akina wayokotsha ɛkɛndɛ wawashawɔ l’etshumanelo etena kahawatonga lawɔ. Wanɛ wambɔsɔnama oko ambatshi mboka pombaka ndjasha l’olimu awɔ, mbuta ate olimu w’esambishelo wa lo tena tshɛ. Koko, vɔ kokaka mbisha lonya lo ndjatshungwɛka yema y’etena ka kamba la anto akina lo olimu wa wokelo.
6. Kakɔna kasalema etena kakamba anto tshɛ wa l’etshumanelo kâmɛ dia tɔla ɔtɛmwɛlɔ wa mɛtɛ otsha la ntondo?
6 Ɔpɔstɔlɔ Paulo akɛnya di’anto wa l’etshumanelo wekɔ lo kamba kâmɛ dia “mbudia dimba, dia dio mpikama lu ngandji.” (Ef. 4:16) Ngandji kokaso Jehowa ndo ɔtɛmwɛlɔ wa mɛtɛ totshutshuyaka dia sho kamba kâmɛ dia sukɛ olimu w’esambishelo ndo wa wokelo wa mvudu yendana la awui wa Diolelo.