TSHAPITA 32

Woho Wakakondja Yeso Ekokelo

TENA dimɔtshi Jehowa salaka akambo lo yoho ya diambo efula dia kokɛ akɛnda ndo wanɛ wele bu l’akoka wa ndjakokɛ vɔamɛ. Naka wɛ ntshɔ otsha lo ngelo kɛmɔtshi kanganyi la vilɛ, kete wɛ koka mɛna yoho mɔtshi yasala Jehowa dikambo sɔ. Koko ntondotondo ondo wɛ hatokoka shihodia mɛtɛ kɛnɛ keta.

Wɛ mbeyaka mɛna fudu mɔtshi lo nkɛtɛ suke la yɛ. Wɛ mbeyaka mɛna di’oko fudu yakɔ yambohomɔ. Yɔ yekɔ lo nɛndjalɛndja dihafu diayɔ dimɔtshi koko lam’akomayɛ suke la fudu yakɔ, yɔ sɛmɛka otsha lo dihole dikina. Lam’atayayele fudu shɔ, mbatatetemala fudu yakɔ la ndawɔ la ntondo kayɛ. Oma lâsɔ, ɛnyiyɛ ko fudu yakɔ yambofumbɔ la shashimoya. Fudu yakayafɔnyisha wate yambɔkɔ dihafu shɔ hɔkwɛ dihafu! Onde wɛ mbeyaka kɛnɛ kakasalaki fudu shɔ?. . .

Ana wa fudu yakɔ wakɔlami l’adiyo suke la yɛ. Ndo fudu shɔ yaki la wɔma dia wɛ koka mbishola anayɔ ko wɛ manda. Ɔnkɔnɛ, fudu shɔ yakasadi oko yɔ yambohomɔ woho wa yɔ konya oma lanɛ wele anayɔ. Onde wɛ mbeyaka onto lakoka tokokɛ woho wakokɛ mama ka fudu anayɔ?. . . Bible mbɛdikaka Jehowa la fudu kelɛwɔ pongo kakimanyiya anatɔ.​—⁠Euhwelu k’Elembe 32:​11, 12.

Ɔnaki Jehowa loleki nɛmɔ tshɛ ko Ɔnande la ngandji Yeso. Lam’aki Yeso l’olongo, nde aki onto la lo nyuma laki la nkudu efula oko She. Nde akakoke ndjakokɛ ndamɛ. Koko lam’akotɔ Yeso oko ɔn’ashashi lanɛ la nkɛtɛ, nde komonga l’ekokelo. Nde aki l’ohomba w’ekokelo.

Dia kotsha lolango laki Nzambi lanɛ la nkɛtɛ lo kɛnɛ kendana la nde, Yeso akahombe mbola ndo koma pami k’opalanga ka kokele. Koko Satana akone dia ndjaka Yeso la ntondo ka Yeso kotsha lolango laki Nzambi. Woho wakone Satana dia ndjaka Yeso lam’akinde eke dikɛnda ndo yoho yakokokɛ Jehowa ekɔ ɔkɔndɔ wa diambo efula. Onde wɛ nangaka mboka ɔkɔndɔ ɔsɔ?. . .

Kombeta edja l’ɔkɔngɔ wa Yeso mbotɔ, Satana akatondja yɔtɔ mɔtshi yakahɛtɛ l’olongo oma lo Ɛstɛ. Apami welɛwɔ wetshi wa tɔɔtɔ, mbut’ate wanɛ weka awui wa tɔɔtɔ wakayele yɔɔtɔ shɔ lo nkama ya kilɔmɛtɛlɛ otsha la Jerusalɛma. Lam’akawakome la Jerusalɛma, vɔ wakambola dihole diakahombe mbotɔ onto lakahombe monga nkumekanga k’ase Juda. Lam’akawambola apami wakeyaka kɛnɛ kata Bible lo dikambo sɔ, apami akɔ wakakadimola ɔnɛ: “La Betelehema.”​—⁠Mateu 2:​1-6.

L’ɔkɔngɔ wa Hɛrɔdɛ, nkumekanga ka kɔlɔ ka la Jerusalɛma mboka dikambo dia nkumekanga k’oyoyo keke ka mbotɔ l’osomba waki suke la Jerusalɛma wakawelɛka Bɛtɛlɛhɛma, nde akatɛ wetshi wa tɔɔtɔ ɛsɔ ate: ‘Nyotoyange ɔn’ɔsɔ, naka nyambotowɛna ko nyu kawola dia ndjombutɛ.’ Onde wɛ mbeyaka lande na kakalange Hɛrɔdɛ mbeya dihole diaki Yeso?. . . Aki nɛ dia Hɛrɔdɛ aki la kandjema ndo nde akalange dia ndjaka Yeso!

Ngande wakakokɛ Nzambi Ɔnande na?. . . Lam’akakome wetshi wa tɔɔtɔ lo dihole diaki Yeso, vɔ wakasha Yeso weshasha. Oma lâsɔ, Nzambi akewola wetshi wa tɔɔtɔ ɛsɔ lo dɔ di’aha vɔ kalola otsha le Hɛrɔdɛ. Ɔnkɔnɛ, vɔ wakakawola otsha lo ngelo kawɔ oma lo mboka kekina aha la vɔ mbeta oma la Jerusalɛma. Lam’akɛnyi Hɛrɔdɛ dia wetshi wa tɔɔtɔ ɛsɔ hawokawudi oya le nde, nde akomala efula. L’oyango wa ndjaka Yeso, Hɛrɔdɛ akadjanga dia vɔ ndjaka ana w’apami tshɛ waki l’ɛse k’ɛnɔnyi ehende la Bɛtɛlɛhɛma! Koko, l’etena kɛsɔ ko wakashile ndawɔ la Yeso.

Onde wɛ mbeyaka woho wakahandɔ Yeso?. . . L’ɔkɔngɔ wa waa wetshi wa tɔɔtɔ kawola otsha lakawɔ, Jehowa akewola Yɔsɛfu y’omi aki Mariya dia vɔ ndawɔ otsha l’Edjibito. Lɛsɔ, Yeso kokoka ndjakema nto oma le Hɛrɔdɛ laki nkumekanga ka kɔlɔ. Ɛnɔnyi efula l’ɔkɔngɔ wa lâsɔ, lam’akakawola Mariya nde la Yɔsɛfu oma l’Edjibito vɔ la Yeso, Nzambi akewola Yɔsɛfu nto. Nde akawotɛ lo dɔ dia vɔ ntshɔ otsha la Nazarɛta, lɛnɛ akahombe Yeso kondja ekokelo.​—⁠Mateu 2:​7-23.

Shi wɛ ambɛna woho wakakokɛ Jehowa Ɔnande?. . . Onto akɔna akokayɛ mbuta dia nde mbele oko ana wa tofudu wakɔlama l’adiyo l’ɔkɔngɔ wa nyangɛwɔ, kana onto akɔna ele oko Yeso lam’akinde eke dikɛnda dia tshitshɛ na? Kema wɛ ekɔ oko vɔ?. . . Ekɔ anto amɔtshi walanga kotshelɛ kɔlɔ wɛ lawɔ. Onde wɛ mbeyaka anto akɔ?. . .

Bible mbutaka dia Satana ekɔ oko kimbwe kadikita ndo kayanga dia tɔlɛ. Ndo oko wele mbala efula kimbwe sɔmanaka la nyama yeke totshitshɛ, mbele Satana nde l’ɛdiɛngɛ ande sɔmanaka mbala efula l’ana w’akɛnda. (1 Petero 5:⁠8) Koko, Jehowa ndeka Satana wolo. Jehowa koka kokɛ anande kana mbitola dikambo tshɛ dia kɔlɔ dialanga Satana mbasalɛ.

Onde wɛ mbohɔka awui w’oma lo Tshapita 10 ya dibuku nɛ wɛnya kɛnɛ katotshutshuya Satana nde l’ɛdiɛngɛ ande dia sho sala?. . . Eelo, vɔ totshutshuyaka dia sho ndjasha lo weho w’awui wa dieyanelo wahalange Nzambi. Ko anto akɔna wele paka vɔ anto mbahomba sala dieyanelo na?. . . Eelo, paka pami la womoto waya epalanga ndo wambotshukana mbakoka sala dikambo sɔ.

Dikambo dia lonyangu ko epalanga ɛmɔtshi nangaka dia sala dieyanelo l’ana w’akɛnda. Lam’asalawɔ dikambo sɔ, akɛnda w’apami la wa wamato koka tatɛ sala awui wa kɔlɔ wakaweke oma le epalanga ɛsɔ. Vɔ tatɛka nto kamba la tenyi diawɔ dia demba dia dieyanelo lo yoho ya kɔlɔ. Kɛsɔ mbakete aya edja efula l’osomba wa Sɔdɔma. Bible mbutaka di’anto wa lɛkɔ, ‘tatɛ oma le dikɛnda polo le opalanga wa pami,’ vɔ tshɛ wakone dia mbeyana l’apami wakaye dia ndjenda Lɔta.​—⁠Etatelu 19:​4, 5.

Ɔnkɔnɛ, oko waki Yeso l’ohomba w’ekokelo, wɛ lawɔ ekɔ l’ohomba wa kokamɛ oma le epalanga ndo oma le ana akina wakoka mona dia mbeyana la yɛ oko wadi l’omi. Mbala efula, anto asɔ koka kotɛ ɔnɛ vɔ wekɔ angɛnyi ayɛ. Vɔ mbeyaka kosha ɛngɔ kɛmɔtshi naka wɛ mbatɛ ɔnɛ wɛ hatotɛ anto akina kɛnɛ kalangawɔ sala la yɛ. Koko anto asɔ wekɔ anto wa kɔlɔ oko Satana nde l’ɛdiɛngɛ ande ndo vɔ nangaka paka dia ndjangɛnyangɛnya vɔamɛ. Ndo vɔ monaka dia ndjangɛnyangɛnya lo sala dieyanelo l’ana w’akɛnda oko wadi l’omi. Dikambo sɔ diekɔ kɔlɔ efula!

Onde wɛ mbeyaka kɛnɛ kakokawɔ sala nto dia vɔ ngɛnangɛna?. . . Vɔ mbeyaka munanda tenyi diayɛ dia demba dia dieyanelo. Kana vɔ mbeyaka sanganya tenyi diawɔ dia demba dia dieyanelo la diakiyɛ. Koko tetawɔke pondjo di’onto kɛnya la tenyi diayɛ dia demba dia dieyanelo. Oyadi ɔnanyɔ kana kadiyɛ kana mama la papa kayɛ, ndoko lahomba sala dikambo sɔ. Tenyi dia demba sɔ diekɔ paka dikambo diayɛ wɛmɛ.

Ngande wakokayɛ kokɛ demba diayɛ oma le anto wasala awui wa kɔlɔ wa ngasɔ na?. . . Ntondotondo, tetawɔke di’onto kɛnya la tenyi diayɛ dia demba dia dieyanelo. Naka onto ɔmɔtshi ambohemba dia sala dikambo sɔ, kete wɛ la dia tona ndo mbuta la dui dia wolo ɔnɛ: “Halange! Lotsha tokofunda!” Ndo naka onto ɔsɔ ambokotɛ ɔnɛ naka wɛ tofunda, kete wɛ mbayowosha onongo, tetawɔke. Ɔsɔ ekɔ kashi. Tshɔka tofunde onto ɔsɔ oyadi woho akɔna w’onto wende! Wɛ pombaka tôfunda oyadi nde kotaka ate kɛnɛ kasalanyu ekɔ sheke yele paka lam’asayɛ wɛ la nde ato. Oyadi nde ambokolaka dia kosha diangɔ di’amɛna efula kana ambokanɛ dia kɔkɔmɔla, wɛ pombaka ndawɔ ndo tofunda onto ɔsɔ.

Wɛ hahombe mboka wɔma, koko wɛ pombaka monga la yewo. Naka ambutshi ayɛ wambokewola lo dikambo di’anto kana di’ahole amɔtshi wakoka monga wâle le yɛ, kete wɛ pombaka mboka kɛnɛ katawɔ. Naka wɛ mboka kɛnɛ kakotɛwɔ, kete wɛ ayewɔ di’onto la kɔlɔ kosalɛ kɔlɔ.

Adia awui wendana la woho wa wɛ ndjakokɛ wɛmɛ oma l’awui wa dieyanelo wa kɔlɔ lo Etatelu 39:​7-12; Tukedi 4:​14-16; 14:​15, 16; 1 Koreto 6:18; ndo 2 Petero 2:⁠14.

[Osato wa lo lɛkɛ 167]

Ngande wakokɛ fudu anayɔ wa totshitshɛ?

[Osato wa lo lɛkɛ 168]

L’ɔkɔngɔ wa wetshi wa tɔɔtɔ ntshɔ dia tenda Yeso, ngande wakewola Nzambi anto asɔ dia kokɛ Yeso?

[Osato wa lo lɛkɛ 169]

Ngande wakakondja Yeso ekokelo nto lo dikɛnda?

[Osato wa lo lɛkɛ 171]

Ahombayɛ mbuta ndo sala naka onto ona dia konanda lo yoho ya kɔlɔ?