Ambetsha etena katandatshu la Jɛrusalɛma

Aya tshanda mɔtshi yele Yeso akakambaka olimu ande paka la Ngalileya lɛnɛ akandɛnyi di’anto waketawɔka esambishelo kande dimɛna ndeka la Judeya. Ndo nto, etena kakinde la Jɛrusalɛma ndo kakandakɔnɔla pami kɛmɔtshi lushi la Sabato, “ase Juda wakayangaka dia mbodiaka.”​—Joani 5:18; 7:1.

Taya kakianɛ lo eleko kamɔnga akatshi, ka lo 32 T.D., ndo fɛtɛ ka Tabɛrnaklɛ, (kana ka Totombotombo) kaya suke. Fɛtɛ kɛsɔ kakasalemaka nshi esambele ndo kakayelanaka la losanganya l’ekila lushi l’enanɛi. Fɛtɛ kɛsɔ kakɛnyaka ekomelo k’ɔnɔnyi w’elimu wa dikambɔ ndo aki etena k’ɔngɛnɔngɛnɔ wa mamba ndo ka eokelo ka losaka.

Akose waki Yeso Jakɔba, Simɔna, Jɔsɛfu ndo Judasɛ wakawotɛ vate: “Mɔ oma lanɛ, tshɔka la Judeya.” La Jɛrusalɛma mbakalɔmbɔmaka awui w’ɔtɛmwɛlɔ. Osomba ɔsɔ wakalolanɛka la anto lo fɛtɛ shato ya l’ɔnɔnyi. Anango Yeso wakakanyiyaka ɔnɛ: “Ndooko onto lalanga mbeyama le anto tshɛ latosalaka akambo lo woshɛshɛ. Lam’ele wɛ salaka akambo asɔ, yaɛnya le andja.”​—Joani 7:3, 4.

Mɛtɛ, anango Yeso anɛi asɔ “komonga la mbetawɔ le nde” oko Mɛsiya. Koko vɔ wakalangaka dia wanɛ wakaye lo fɛtɛ mbɛna asala akambo amɔtshi wa diambo. Oko wakandeyaka waale wakokongɛka, Yeso akawatɛ ate: “Andja ndooko l’ɔkɔkɔ wa nyohetsha, koko vɔ wekɔ lo petshami, nɛ dia dimi mbutaka lo dikambo diawɔ dia etsha awɔ wekɔ kɔlɔ. Nyu nyotshu lo fɛtɛ, dimi hantotshɔ lo fɛtɛ kakɔ, nɛ dia etena kami katakoke tshɛ lo tshɛ.”​—Joani 7:5-8.

Nshi mɔtshi l’ɔkɔngɔ w’anango Yeso ntshɔ kamɛ la wanɛ wakatatshɔka, Yeso l’ambeki ande wakatshu lo woshɛshɛ aha anto efula mbaɛna. Vɔ wakete lo mboka ka hiembola keta oma la Samariya lo dihole dia mbeta lo mboka kaketaka anto efula suke l’Ɔkɛdi wa Jɔrɔdana. Yeso l’ambeki ande wayonga l’ohomba wa mpango la Samariya, diakɔ diakandatome akɛndji la ntondo dia tɔlɔngɔsɔla mpango. Anto wa lo ngelo kɛmɔtshi wakatone mbalongola kana mbasalɛ kɛnɛ katowosalɛka angɛndangɛnda nɛ dia Yeso akatatshɔka otsha la Jɛrusalɛma lo fɛtɛ k’ase Juda. Jakɔba la Joani wakomala ndo wakambola vate: “Nkumadiɔndjɔ, onde wɛ nangaka sho mbelɛ dja oma l’olongo dia yɔ mbashila oshiki?” (Luka 9:54) Ko Yeso akaahangwɛ l’ɔtɛ wakiwɔ la kanyi shɔ ko wakatshu lo ngelo kekina.

Lam’akiwɔ lo mboka, ofundji ɔmɔtshi akatɛ Yeso ate: “Ombetsha, dimi layokoyela dihole tshɛ diayoyotshɔ.” Yeso akakadimola ate: “Ɛkɛngɛ wekɔ la weoko ndo tofudu ta l’olongo tekɔ la tokefu, koko Ɔna onto keema la dihole dia mbishɛ ɔtɛ ande.” (Mateo 8:19, 20) Nde akɛnya dia ofundji ɔsɔ ayohomana l’ekakatanu naka nde nkoma ombeki wa Yeso. Ndo mɛnamaka dia ofundji ɔsɔ aki la lotamanya efula dia nde mbetawɔ yoho ya lɔsɛnɔ shɔ. Laasɔ, sho tshɛ koka ndjambola ɔnɛ: ‘Kakɔna kayometawɔ shisha dia ndjela Yeso?’

Yeso akatɛ pami kekina ate: “Ondjele.” Pami kɛsɔ akakadimola ate: “Nkumadiɔndjɔ, etawɔ dia dimi ntshɔ takunde papa.” Oko wakandeyaka awui waki la pami kɛsɔ, Yeso akate ate: “Tshika edo wakundɛ edo awɔ, koko wɛ, tshɔka tosambisha Diolelo dia Nzambi.” (Luka 9:59, 60) Mɛnamaka dia laasɔ ko she pami kɛsɔ atavu. Naka she akavwe, tshike ondo ɔnande totondotanema lo dihole sɔ dia ntɛkɛta la Yeso. Ɔna ɔsɔ kɔnɔngɔsɔma dia mbetɛ Diolelo dia Nzambi lo dihole dia ntondo lo lɔsɛnɔ lande.

Lam’akawatetemala la lɔkɛndɔ lawɔ otsha la Jɛrusalɛma, pami kɛmɔtshi akatɛ Yeso ate: “Nkumadiɔndjɔ, layokoyela, koko toketawɔ dimi talakanyi l’ase luudu lami.” Yeso akokadimola ate: “Ndooko onto lambodja lonya lande lo longo lakotola ngɔmbɛ ndo lakawoya washo lo diangɔ diele l’ɔkɔngɔ lakoka mbɔtɔ lo Diolelo dia Nzambi.”​—Luka 9:61, 62.

Wanɛ walanga monga ambeki wa mɛtɛ waki Yeso, pombaka mbika washo awɔ l’olimu wa Diolelo. Naka onto latafuse hatetemadi menda la ntondo, kete omunda ande koka ndjɛngama. Naka nde kitsha longo lande dia menda diangɔ diele l’ɔkɔngɔ, kete olimu w’ekambɔ wayotshila. Woho akɔ wamɛ mbele, onto tshɛ lenda l’ɔkɔngɔ lo dikongɛ diakambo di’omusu nɛ mbeyaka ntakɔ mboka kakonya lo lɔsɛnɔ la pondjo.