La Jɛrusalɛma lo Fɛtɛ ka Tabɛrnaklɛ

Yeso akakome onto leyama efula l’ɛnɔnyi wa l’ɔkɔngɔ wa batisimu kande. Nunu di’ase Juda wakɛnyi ahindo ande ndo nkumu yendana l’akambo wakandasalaka yakadiangana lo wodja w’otondo. Kakianɛ lo Fɛtɛ ka Tabɛrnaklɛ, (kana ka Totombotombo) la Jɛrusalɛma anto efula wekɔ lo mboyanga.

Anto waki la tokanyi totshikitanyi efula lo dikambo dia Yeso. Amɔtshi wakataka vate: “Nde ekɔ onto ɔlɔlɔ.” Akina wakataka vate: “Nde keema onto ɔlɔlɔ. Nde minganyiyaka olui w’anto.” (Joani 7:12) Efula k’asawo wa lo tɔhɔtɛhɔtɛ asɔ wakasalemaka lo nshi ya etatelo ka fɛtɛ. Koko, ndooko onto laki la dihonga dia swɛlɛ Yeso lo sɛkɛ nɛ dia wɔma wa kɛnɛ kayosala ewandji w’ɔtɛmwɛlɔ wakadiangana l’ahole tshɛ.

L’atei atei wa fɛtɛ, Yeso akɛnama lo tɛmpɛlɔ. Anto efula wakambe lo dikoka dia diambo diaki lande dia mbetsha. Ndooko lushi lakandɔtɔ kalasa y’ewandji w’ɔtɛmwɛlɔ, diakɔ diakayambolaka ase Juda ɔnɛ: “Ngande weya onto ɔnɛ mbadia Afundelo lam’ele nde kɔmbɔtɔ kalasa?”​—Joani 7:15.

Yeso akalembetshiya ate: “Kɛnɛ ketshami haye oma le mi, koko ndja oma le Ɔnɛ lakantome. Naka onto nangaka nsala lolango laki Nzambi, kete nde ayeya kana wetshelo akɔ ndja oma le Nzambi ko kana dimi lekɔ lo ntɛkɛta akambo ami hita.” (Joani 7:16, 17) Wetshelo wa Yeso mbɔtɔnɛka l’Ɛlɛmbɛ wa Nzambi, diakɔ diele akɛnama lo sɛkɛ dia nde akayangaka l’otombo laki Nzambi koko aha lande hita.

Ko Yeso akate ate: “Shi Mɔsɛ akanyosha Ɛlɛmbɛ? Koko ndooko onto l’atei anyu lakitanyiya Ɛlɛmbɛ akɔ. Lande na kayanganyu dia ndjakami?” Anto amɔtshi wa l’olui w’anto, ondo angɛndangɛnda wakaye oma l’ahole akina kombeyaka dikambo sɔ. Le wɔ, kokoka mbokɛma di’onto nyanga dia ndjaka ombetsha wa ngasɔ. Ɔnkɔnɛ, vɔ wakɔshi dia ɔtɛ wa Yeso hayokamba dimɛna lo woho watande awui wa ngasɔ. Vɔ wakate vate: “Wɛ ekɔ la ɔdiɛngɛ. Onto akɔna ayanga dia kodiaka?”​—Joani 7:19, 20.

Ambeta ɔnɔnyi l’etenyi, ewandji w’ase Juda wakalange ndjaka Yeso l’ɔkɔngɔ wa nde nkɔnɔla pami kɛmɔtshi lushi la Sabato. Kakianɛ Yeso ambokamba l’ekanelo katshutshuya dia nkana yimba ndo kɛnya lo sɛkɛ woho wewɔ bu l’ekanelo k’ɔlɔlɔ. Nde ambokotola yambalo lo kɛnɛ kakatama l’Ɛlɛmbɛ di’ɔna pami minyɛma mpota lushi l’enanɛi oyadi kaanga ekɔ lushi la Sabato. Ko nde akambola ate: “Naka vɔ minya onto mpota lushi la Sabato diaha Ɛlɛmbɛ wa Mɔsɛ mɔnyɔma, ko amomalɛnyu nkɛlɛ ka wolo l’ɔtɛ wamomɔkɔnɔla onto lushi la sabato? Nyotshike nombosha lo ndjela kɛnɛ kɛnama, koko nyolomboshake la losembwe.”​—Joani 7:23, 24.

Ase Jɛrusalɛma wakeyaka kɛnɛ kaketaka wakambola vate: “Shi pami kɛnɛ kayangawɔ dia ndjaka? Ko enda nde ɔnɛ atɛkɛta lo sɛkɛ ko vɔ hawowotɛ ndooko dikambo! Onde emboledi wamboshikikɛ mɛtɛ dia nde kele Kristo?” Ko lande na kahetawɔ anto dia Yeso ekɔ Kristo? Vɔ wakate vate: “Sho mbeyaka oma lɛnɛ oye pami kɛnɛ, koko lam’ayoya Kristo, ndooko onto layeya oma lɛnɛ ayondoya.”​—Joani 7:25-27.

Lo tɛmpɛlɔ, Yeso akakadimola ate: “Nyu mbeyakami ndo nyu mbeyaka oma lɛnɛ akamaye. Ndo dimi kondja lo lolango lami hita, koko Ɔnɛ lakantome ekɔ onto la mɛtɛ ndo nyu hanyoweye. Dimi mbeeyaka, nɛ dia dimi lekɔ onyimpala w’oma le nde ndo Nde mbakantome.” (Joani 7:28, 29) Kɛnɛ kakawasale oma l’ɛtɛkɛta ande wokɛma hwe ɛsɔ, ele wakayange dia minda Yeso dia mbodja lo lokanu kana mbodiaka. Koko, vɔ kotondoya nɛ dia etena ka Yeso ndjakema katakoke.

Koko, anto efula waki la mbetawɔ le Yeso l’ɔtɛ w’akambo wa diambo wakandasalaka. Nde akakɛndakɛnda laadiko dia ashi, akɔladia mpɛpɛ ya wolo, akalesha nunu di’anto lo dihindo la mapa ndo la tosese tongana toto, akakɔnɔla ase hemɔ, akakɛndjakɛndja akanga wa tshumbe, akasɛnya washo w’akanga wa totshungu, akakɔnɔla akanga wa sudi ndo akoolola ndo anto wakavu. Eelo, vɔ waki l’ɛkɔkɔ w’eshika wa mimbola ɔnɛ: “Onde lam’ayoya Kristo, nde ayosala tolembetelo toleki tɔnɛ tasala pami kɛnɛ?”​—Joani 7:31.

Lam’akoke Afarisɛ olui w’anto wata awui asɔ, vɔ la owandji w’ɛlɔmbɛdi wakatome apulushi dia tonda Yeso.