Toho ta mpamia olimu ayɛ

LAMAKAKOKE etena ka Yeso ntoma ambeki ande oko esambisha wa Diolelo, nde akawatɛ ate: “Dinela diekɔ woke, koko ekambi mbele yema tshitshɛ.” Olimu wa nkamba waki efula, diakɔ diakandakotsha ate: “Nyɔlɔmbɛ Owandji wa dinela dia nde ntoma ekambi lo dinela diande.” (Mat. 9:37, 38) Yeso akatɛ ambeki ande woho wa nkamba olimu awɔ. Nde akɛnya di’olimu ɔsɔ wakahombe kambema la shamanya lo mbuta ate: “La ntondo ka nyu nshidiya nkindjakindja lo esomba wa lo Isariyɛlɛ, Ɔna onto ayoya.”​—Mat. 10:23.

² Ndo ɛlɔ kɛnɛ, olimu wa nkamba wekɔ efula l’esambishelo. Lokumu l’ɔlɔlɔ lɔnɛ la Diolelo pombaka sambishama la ntondo k’ekomelo ndja ndo nshi yekɔ lo tete esadi esadi! (Makɔ 13:10) Lam’ele andja mbele ekambɔ, tekɔ oko woho waki Yeso nde l’ambeki ande, koko lo yoho yoleki tshɛ. Tekɔ yema tshitshɛ lo mbɛdika la miliyara y’anto wa l’andja w’otondo, koko sho koka monga l’eshikikelo dia Jehowa ayotokimanyiya. Lokumu l’ɔlɔlɔ la Diolelo layosambishama lo nkɛtɛ k’otondo ndo l’etena kakashikikɛ Jehowa, ekomelo kayoya. Onde tayetɛ Diolelo diaki Nzambi lo dihole dia ntondo lo lɔsɛnɔ laso dia sho nkamba olimu aso dimɛna dimɛna? Eyango akɔna wa teokrasi wakokaso mbesa dia nkotsha olimu akɔ?

³ Lo mɛnya kɛnɛ kalɔmba Jehowa ekambi Ande wakayakimɔ, Yeso akate ate: “Langa Jehowa Nzambi kayɛ l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.” (Makɔ 12:30) Sho nɔmbamaka dia kambɛ Nzambi l’anima aso tshɛ. Kɛsɔ nembetshiyaka dia sho mɛnya woke woke w’omamemelo aso ndo woho wakatayakimɔ l’otema ɔtɔi lo nsala kɛnɛ tshɛ kakokaso nsala l’olimu wa Jehowa. (2 Tim. 2:15) Tekɔ la waaso efula wa nkamba olimu ɔsɔ lo ndjela awui ndo akoka wele l’onto l’onto. Tɔsɛdingole waaso amɔtshi ndo toshikikɛ eyango wa teokrasi wayotowesa dia nkotsha olimu aso.

NKAMBA OKO OPANDJUDI L’ETSHUMANELO

⁴ Onto tshɛ leka akambo wa mɛtɛ ekɔ la diɛsɛ dia mpandjola lokumu l’ɔlɔlɔ. Ɔsɔ mbele olimu woleki ohomba wakasha Yeso ambeki ande. (Mat. 24:14; 28:19, 20) Mbala efula, ombeki wa Yeso Kristo tatɛka mbewoya anto akina lokumu l’ɔlɔlɔ kam’alokande. Kɛsɔ mbakasale Andɛlɛ, Filipɛ, Kɔnɛliyo ndo anto akina. (Jni. 1:40, 41, 43-45; Ets. 10:1, 2, 24; 16:14, 15, 25-34) Onde kɛsɔ nembetshiyaka di’onto koka ntatɛ mbewoya anto akina lokumu l’ɔlɔlɔ kaanga la ntondo ka nde batizama? Eelo! Kam’akotsha onto kɛnɛ kalɔmbama dia monga opandjudi wahatabatizama l’etshumanelo, kete nde ambokoka ntomba l’esambishelo ka lo luudu la luudu. Ndo nto, naka awui ndo akoka ande mboshaka diaaso, kete nde koka tombaka lo toho tokina t’esambishelo.

⁵ L’ɔkɔngɔ w’opandjudi batizama, aha la taamu, nde ayosala tshɛ kakokande nsala dia nkimanyiya anto akina dia mboka lokumu l’ɔlɔlɔ. Oyadi apami kana wamato wekɔ la diɛsɛ dia nkamba olimu w’esambishelo. Tekɔ l’ɔngɛnɔngɛnɔ dia mbisha lonya kaanga lo yɛdikɔ ya tshitshɛ dia ntɔla wahɔ wa Diolelo diaki Nzambi otsha la ntondo. Onto tshɛ lakoka mpamia olimu ande lo ndjasha lo toho tokina t’olimu ayonga mɛtɛ l’ɔngɛnɔngɛnɔ.

NKAMBA LƐNƐ ELE OHOMBA EFULA

⁶ Ondo wɛ ekɔ l’etshumanelo kele la ɛtshi ka nkɛtɛ kakambema mbala la mbala ndo kasambishama dimɛna. Naka ngasɔ, kete ondo wɛ mbeyaka mɛna dia wɛ koka mpamia olimu ayɛ lo monɔ lɛnɛ ele ohomba efula w’ekimanyielo. (Ets. 16:9) Naka nshi nyɛ wɛ ekɔ lo nkamba oko ekumanyi kana okambi wakimanyiya, kete ondo ekɔ etshumanelo kekina kayɔngɛnangɛna ekimanyielo kayɛ. Omendji anyu w’otshimbedi mbeyaka monga l’alako wa woho wakokayɛ nkimanyiya etshumanelo kekina ka l’otshimbedi. Naka wɛ nangaka tokamba lo dihole dikina dia lo wodja anyu, filialɛ koka kewoya awui wele ohomba.

⁷ Onde wɛ nangaka tokamba lo wodja okina? Naka eelo, kete wɛ pombaka nsɛdingola wonwelo ɔsɔ dimɛna dimɛna. Lande na kahayakɛtshanya la dikumanyi dia l’etshumanelo kayɛ? Aha la taamu wonwelo ɔsɔ ayonga la shɛngiya le yɛ ndo le wanɛ tshɛ wayonɔ la yɛ. (Luka 14:28) Koko naka wɛ hasangoya dia totshikala edja, kete ondo ndeka dimɛna wɛ nyanga dia nkamba l’ɛtshi kɛmɔtshi ka nkɛtɛ ka lo wodja anyu.

⁸ Lo wedja ɛmɔtshi, anangɛso wakambawɔ la wɔ dia mɛmba ɛkɛndɛ w’emendji weke eyoyo l’akambo wa mɛtɛ. Anangɛso wele l’okitshakitsha wa l’ahole asɔ mbetawɔka dia dikumanyi diambohokɔ akambo dionɔ l’etshumanelo nɔmbɔla. Naka wɛ ekɔ ekumanyi ndo wɛ nangaka monɔ lo wodja wa ngasɔ, kete ohɔka dia oyango ayɛ bu dia tokamba lo dihole dia anangɛso wa lɛkɔ. Koko dia tokamba kaamɛ la wɔ. Keketshawɔ dia vɔ nkombola dia mbetawɔ ɛkɛndɛ l’etshumanelo. (1 Tim. 3:1) Onga la solo dia lotutsha naka awui amɔtshi hawosalema woho wasalemawɔ lo wodja ayɛ. Kamba la diewo diele la yɛ oko ekumanyi dia wɛ monga ekimanyielo k’oshika le anangɛso. Oma laasɔ, naka ayoyonga ohomba dia wɛ nkalola lo wodja ayɛ, dikumanyi dia lɛkɔ diayonga l’akoka wa nkokɛ etshumanelo.

⁹ La ntondo ka filialɛ kosha nkombo ya tshumanelo diayokoka nkondja wahɔ oma l’ekimanyielo kayɛ, Kɔmite k’olimu k’etshumanelo kayɛ pombaka ntoma mukanda w’olowelo. Mukanda ɔsɔ wekɔ ohomba oyadi wɛ ekɔ lo nkamba oko ekumanyi, okambi wakimanyiya, ombatshi mboka kana opandjudi. Kɔmite k’olimu ayotoma mukanda w’olowelo kaamɛ la dɛmandɛ diayɛ mbala kakɔ ɔtɔi lo filialɛ ka wodja wakombolayɛ tokamba.

NSAMBISHA L’ƆTƐKƐTA OKINA

¹⁰ Dia mpamia olimu ayɛ, wɛ mbeyaka mɛna ɔlɔlɔ mbeka ɔtɛkɛta okina, mbidja ndo ɔtɛkɛta w’akanga a mpoke. Naka wɛ ekɔ l’oyango wa mbeka woho wa nsambisha l’ɔtɛkɛta okina, lande na kahayatɛkɛta la dikumanyi ndo l’omendji w’otshimbedi? Vɔ koka kosha alako ndo ekeketshelo kahombama. L’ɛlɔmbwɛlɔ ka filialɛ, etshimbedi ɛmɔtshi wakakongɛ kalasa dia mbetsha apandjudi wele l’akoka kana ambatshi mboka dia nsambisha l’ɔtɛkɛta okina.

OLIMU W’OMBATSHI MBOKA

¹¹ Apandjudi tshɛ pombaka mbeya kɛnɛ kalɔmbama dia nkamba olimu w’ombatshi mboka wa tshanda, wa pondjo, wa laande ndo dia nkamba weho ekina w’elimu wa lo tena tshɛ. Ombatshi mboka tshɛ pombaka monga Okristo wambobatizama washa ɛnyɛlɔ k’ɔlɔlɔ wele l’akoka wa mbetsha lofulo lɔmɔtshi la wenya shikaa l’esambishelo ka lokumu l’ɔlɔlɔ. Kɔmite k’olimu ka l’etshumanelo mbeetawɔ adɛmandɛ w’olimu w’ombatshi mboka wa tshanda ndo wa pondjo, koko filialɛ mbasɔna ambatshi mboka wa laande.

¹² Ambatshi mboka wa tshanda mbeyaka sɔnama dia nkamba l’edja ka ngɔndɔ ɔtɔi, ka lofulo lɔmɔtshi la ngɔndɔ, kana k’oseka ngɔndɔ tshɛ aha la mpembola lo ndjela akoka wele la wɔ. Apandjudi wa Diolelo efula ngɛnangɛnaka nkamba oko ambatshi mboka wa tshanda lo tena dimɔtshi dia laande, ɛnyɛlɔ lo tena dia Eohwelo kana lo ngɔndɔ ka wembwelo w’omendji w’otshimbedi. Amɔtshi sɔnaka ngɔndɔ yewɔ lo vakashi. Apandjudi wambobatizama wɔtɔ kalasa mbeyaka mɛna ɔlɔlɔ dia nkamba oko ambatshi mboka wa tshanda lo ngɔndɔ yawashawɔ vakashi la kalasa. Apandjudi koka nsɔna dia nkamba oko ambatshi mboka wa tshanda lo ndjela lofulo la wenya lokitshikitshi Ngɔndɔ ka sato la Ngɔndɔ ka nɛi tshɛ ndo lo ngɔndɔ ka wembwelo w’omendji w’otshimbedi. Oyadi awui wele la yɛ, naka wɛ ekɔ la lɔkɛwɔ la pudipudi ndo naka wɛ koka ndjalɔngɔsɔla dia nkotsha lofulo la wenya lalɔmbama l’esambishelo ndo naka wɛ mɛnaka dia wɛ koka nkamba ngɔndɔ ɔtɔi kana ndekana oko ombatshi mboka wa tshanda, kete dikumanyi dia l’etshumanelo wayɔngɛnangɛna dia mbetawɔ dɛmandɛ diayɛ dia wɛ nkondja diɛsɛ sɔ di’olimu.

¹³ Dia nkotsha kɛnɛ kalɔmbama dia sɔnama oko ombatshi mboka wa pondjo, wɛ pombaka monga l’akoka wa kotshaka lofulo la wenya walɔmbama l’ɔnɔnyi. Oko weyɛ ombatshi mboka wa pondjo, wɛ pombaka kambaka kaamɛ l’etshumanelo keyɛ. Ambatshi mboka wele l’ohetoheto wekɔ mɛtɛ tshondo y’ɔtshɔkɔ l’etshumanelo nɛ dia vɔ tshutshuyaka asekawɔ dia monga la wangasanu l’olimu w’esambishelo ndo keketshaka anto akina dia vɔ la wɔ nkamba olimu w’ombatshi mboka. Koko, la ntondo ka wɛ ndodia dɛmandɛ di’ombatshi mboka wa pondjo, wɛ pombaka monga opandjudi washa ɛnyɛlɔ k’ɔlɔlɔ wambobatizama ngɔndɔ shamalo kana ndekana.

¹⁴ Ambatshi mboka wa laande sɔnamaka mbala efula oma l’atei w’ambatshi mboka wa pondjo wambɛnya dia vɔ kondjaka etombelo w’ɛlɔlɔ l’esambishelo. Vɔ pombaka monga l’akoka wa tokamba dihole tshɛ diawatoma filialɛ. Mbala efula, vɔ mbatomaka l’ahole wa tale wakokawɔ totana anto wɛnya nsaki ndo mbata tshumanelo di’eyoyo. Tena dimɔtshi, vɔ tomaka ambatshi mboka wa laande lo tshumanelo diele l’ohomba w’ekimanyielo dia nkindjakindja ɛtshi kawɔ ka nkɛtɛ. Ambatshi mboka amɔtshi wa laande wele dikumanyi tomamaka dia tokimanyiya tshumanelo dia totshitshɛ kaanga l’ahole wele bu l’ohomba wa laande w’ekambi efula l’esambishelo. Ambatshi mboka wa laande nongolaka yema ya dikuta tshitshɛ dia nkotsha tohombahomba tawɔ. Ambatshi mboka wa laande amɔtshi sɔnamaka dia tokamba lo tshanda mɔtshi tsho.

OLIMU WA MISIƆNƐRƐ

¹⁵ Kɔmite k’olimu ka lo Olui-walɔmbɔla sɔnaka waa misiɔnɛrɛ watomawɔ le Kɔmite ya filialɛ ya lo wodja la wodja dia tosambisha l’ahole wele anto efula. Vɔ wekɔ lo nkamba olimu wa dimɛna efula dia shikikadia ndo nkeketsha olimu w’esambishelo kana awui wa l’etshumanelo. Mbala efula wanɛ watomawɔ dia tokamba olimu wa misiɔnɛrɛ nongolaka wetshelo lo Kalasa k’esambisha wa Diolelo. Vɔ mbashaka luudu ndo yema ya dikuta tshitshɛ dia nkotsha tohombahomba tawɔ.

OLIMU W’OTSHIMBEDI

¹⁶ Wanɛ wasɔnama oko emendji w’etshimbedi oma le Olui-walɔmbɔla nongolaka wetshelo ndo ndowanyemaka lo nkamba ntondo oko ɛhɛna w’emendji w’etshimbedi. Apami asɔ nangaka olimu w’esambishelo ndo anangɛwɔ l’akadiyɛwɔ. Vɔ wekɔ ambatshi mboka wele l’ohetoheto, ambeki wa Bible w’etete, atɛkɛtshi ndo embetsha wa tomanamana. Vɔ kɛnɛmɔlaka olowa wa nyuma lo yoho yɛnama hwe ndo vɔ wekɔ la wɛdimo, ekanelo ka yimba ka dimɛna ndo la shɛnɔdi. Naka ɔnangɛso ambotshuka, kete wadɛnde lele ombatshi mboka pombaka mbisha ɛnyɛlɔ k’ɔlɔlɔ lo lɔkɛwɔ lande ndo lo dionga diande otsha le anto akina. Nde ekɔ osambisha wa manamana. Nde shihodiaka nto ɔkɛndɛ ande oko wende womoto l’Okristo layakitshakitsha; nde hɔshi tɛdikɔ lo dihole di’omɛnde ndo nde bu onto lahamɛnya anto akina lɔsɔyi. Emendji w’etshimbedi ndo wadɛwɔ wekɔ l’ekongelo kele l’awui efula wa nsala, diakɔ diele wanɛ wakombola olimu ɔsɔ pombaka monga l’alemba w’amɛna. Ambatshi mboka hawolodia adɛmandɛ dia nkamba oko emendji w’etshimbedi. Koko vɔ mbewoyaka omendji awɔ w’otshimbedi nsaki kawɔ ka nkamba olimu w’otshimbedi ndo nde mbashaka alako wahombama.

KALASA YA TEOKRASI

¹⁷ Kalasa k’esambisha wa Diolelo: Ohomba wa esambisha wa Diolelo wekɔ efula dia nkindjakindja lo bɛtshi dia nkɛtɛ diahaleke sambishama ndo mbisha tshumanelo osukɔ wa lo nyuma. Diakɔ diele, anangɛso l’akadiyɛso w’enyemba ndo atshukanyi koka ndodia adɛmandɛ dia tetshama lo yoho ya laande lo Kalasa k’esambisha wa Diolelo. L’ɔkɔngɔ wa mbɔtɔ kalasa, wanɛ washidiya tomamaka dia tokamba oko ambatshi mboka wa pondjo lɛnɛ ele ohomba efula lo wodja awɔ. Koko, wanɛ wele suke mbeyaka nongola ɛkɛndɛ ekina lo wodja awɔ kana lo wodja okina. Amɔtshi koka tomama oko ambatshi mboka wa laande wa lo tshanda mɔtshi kana ambatshi mboka wa laande wa pondjo. Ambatshi mboka walanga mbɔtɔ kalasa kɛsɔ mbeyaka mbeya kɛnɛ kalɔmbama lo losanganya lakalɔngɔsɔma dia dikambo sɔ lo losanganya la rɛjɔ.

¹⁸ Kalasa ka Bible ka Ngiliyadɛ k’Ɛmɛnyi wa Jehowa: Anangɛso w’enyemba, akadiyɛso w’enyemba ndo atshukanyi wasɔnama dia tɔtɔ lo kalasa kɛsɔ tɛkɛtaka Angɛlɛ ndo wekɔ ekambi wa lo tena tshɛ. Vɔ wekɔ l’akoka wa nkeketsha ndo nshikikɛ olimu w’esambishelo kana woho wakongɛma akambo lo filialɛ. Vɔ wekɔ anto wamboshilaka mɛnya dia vɔ ngɛnangɛnaka kambɛ anangɛwɔ ndo vɔ koka nkimanyiya anto akina la ngandji tshɛ dia mbeka ndo dia mbetawɔ ɛlɔmbwɛlɔ k’oma l’Afundelo ndo ka teokrasi. Kɔmite ka filialɛ ka lo wodja mbasha wanɛ wakoka mbɔtɔ lo kalasa kɛsɔ adɛmandɛ wa ndodia. Wanɛ washidiya kalasa kɛsɔ tomamaka l’esambishelo kana dia tokamba lo filialɛ lo wodja okina kana lo wodja awɔ hita.

OLIMU WA LO BƐTƐLƐ

¹⁹ Nkamba lo Bɛtɛlɛ ekɔ diɛsɛ dia laande. Lokombo Bɛtɛlɛ nembetshiyaka “Luudu la Nzambi” ndo lokombo lɔsɔ kokaka mɛtɛ l’ahole asɔ walɔmbɔma olimu wa teokrasi. Anangɛso l’akadiyɛso wakamba lo Bɛtɛlɛ kambaka olimu w’ohomba efula wendana la otondjelo, okadimwelo ndo okahanyelo w’ekanda walembetshiya Bible. Olimu awɔ mbɔsamaka la nɛmɔ efula le Olui-walɔmbɔla, wenda ndo walɔmbɔla tshumanelo dia lo nkɛtɛ k’otondo. Efula ka wanɛ wakamba lo Bɛtɛlɛ l’okadimwelo wekɔ lo mbidjasɛ ndo wekɔ lo nkamba l’ɛtshi ka nkɛtɛ ka lo filialɛ lɛnɛ atɛkɛtama ɔtɛkɛta wakadimolawɔ. Kɛsɔ mbakimanyiyaka dia vɔ mboka woho watɛkɛta anto lushi la lushi. Vɔ koka nto mɛna vɔamɛ dia kana anto wekɔ lo mboka tɔtɛkɛta takamba la wɔ l’ekanda wakadimɔma.

²⁰ Elimu efula wakambema lo Bɛtɛlɛ ekɔ elimu wa wolo walɛndja demba. Diakɔ diele, efula ka wanɛ welɛwɔ lo Bɛtɛlɛ wekɔ djekoleko anangɛso wakayakimɔ ndo wakabatizama weke ɛlɔngɔlɔngɔ, wele la yonge ya dimɛna ndo la wolo wa demba. Naka ohomba wekɔ lo filialɛ kenda wodja anyu ndo naka wɛ nangaka tokamba lo Bɛtɛlɛ, kete wɛ koka mbeya akambo efula walɔmbama oma le dikumanyi dia l’etshumanelo kayɛ.

OLIMU WA WOKELO

²¹ Wokelo wa mvudu ya teokrasi ekɔ yoho mɔtshi y’olimu w’ekila, wele oko olimu wa wokelo wa tɛmpɛlɔ ka Sɔlɔmɔna. (1 Ku. 8:13-18) Anangɛso l’akadiyɛso efula mɛnyaka ohetoheto wa laande lo nkimɔ la lolango wenya ndo diangɔ diawɔ dia nsukɛ ndo dia mbisha lonya l’olimu ɔsɔ.

²² Onde wɛ ekɔ l’akoka wa mbisha lonya l’olimu ɔsɔ? Naka wɛ ekɔ opandjudi wambobatizama ndo nangaka dia nkamba olimu ɔsɔ, kete anangɛso wenda olimu wa wokelo l’ɛtshi kanyu ka nkɛtɛ wayɔngɛnangɛna ekimanyielo kayɛ ndo wayetawɔ kolowanya oyadi kaanga wɛ bu la diewo efula l’olimu ɔsɔ. Lande na kahayewoya dikumanyi dia wɛ ekɔ suke? Apandjudi amɔtshi wambobatizama wakotsha kɛnɛ kalɔmbama wakakome polo ndo lo ndjakimɔ la lolango dia tokamba olimu wa wokelo wa mvudu ya teokrasi lo wedja ekina.

²³ Waaso wekɔ efula dia mbisha lonya l’olimu wa wokelo. Apandjudi wambobatizama washa ɛnyɛlɔ k’ɔlɔlɔ wele la yema ya diewo wakoka nsukɛ olimu wa wokelo suke la ngelo kawɔ mbeyaka nkamba oko Anto wayakimɔ la lolango lo wokelo lo ngelo yawɔ (Volontaire locaux développement/construction). Akina wele l’akoka watosukɛ olimu wa wokelo l’ahole wa tale lo tshanda ya tshitshɛ, sɔnamaka oma le filialɛ dia nkamba oko ambiki wayakimɔ la lolango oma lo mingu hiende polo lo ngɔndɔ shato. Wanɛ wasɔnama dia nkamba edja mbelamɛka ekambi wa lo wokelo. Okambi wa lo wokelo watomawɔ dia tokamba lo wodja okina mbelamɛka okambi wa lo wokelo wa lo wodja okina. Olui w’ambiki wokengami l’ekambi wa lo wokelo la ambiki wayakimɔ la lolango nɔmbɔlaka ekongelo ka wokelo tshɛ ndo vɔ kimanyiyamaka oma le anto wayakimɔ la lolango lo ngelo yawɔ lo wokelo la anto wayakimɔ la lolango oma lo tshumanelo diendana la wokelo ɔsɔ. Elui w’ambiki toonɔka oma lo dihole diakawɔ otsha lo dihole dikina l’ɛtshi ka nkɛtɛ ka filialɛ.

NAA EYANGO AYƐ WA LO NYUMA?

²⁴ Naka wɛ ambokimɔka lɔsɛnɔ layɛ le Jehowa, kete nsaki kayɛ ele ka kambɛ Jehowa pondjo pondjo. Ko naa eyango wa lo nyuma wayadjɛyɛ la ntondo ka nkotsha nsaki kɛsɔ na? Monga l’eyango wa lo nyuma ayokokimanyiya dia nkamba la welo ndo la diangɔ diayɛ dikina la lomba. (1 Kɔr. 9:26) Ndjadjɛ eyango wa ngasɔ ayokokimanyiya dia mpama lo nyuma ndo dia ndjasha paka lo awui woleki ohomba ndo dia nkombola waɛsɛ akina w’olimu.​—Flpɛ. 1:10; 1 Tim. 4:15, 16.

²⁵ Ɔpɔstɔlɔ Pɔɔlɔ akatotshikɛ ɛnyɛlɔ ka dimɛna ka sho ndjela l’olimu wa Nzambi. (1 Kɔr. 11:1) Pɔɔlɔ akakambe la wolo ande tshɛ l’olimu wa Jehowa. Nde akasuya di’olimu wa Jehowa akawosha waaso efula. Pɔɔlɔ akafundɛ anango wa la Kɔrɛtɔ ate: “Lokuke la soko dia woke diasha diaaso dia nkamba olimu lambondjihwamɛ.” Shi ngasɔ mbediɔ ndo le so? Eelo, tekɔ la waaso efula wa kambɛ Jehowa kaamɛ l’etshumanelo, djekoleko l’esambishelo ka lokumu l’ɔlɔlɔ la Diolelo. Koko oko wakidiɔ lo dikambo dia Pɔɔlɔ, dia mbɔtɔ lo “soko dia woke” sɔ, sho pombaka ndɔshana la ‘atunyi efula.’ (1 Kɔr. 16:9) Pɔɔlɔ aki nsuke dia ndjahombia. Tolembete kɛnɛ kakandate ɔnɛ: “Dimi mbahemɛka demba diami ndo dietɛka oko mfumbe.” (1 Kɔr. 9:24-27) Onde tekɔ la yimba ya ngasɔ?

²⁶ Onto tshɛ keketshamaka dia ndjadjɛ eyango wa teokrasi lo ndjela awui wele la nde lo lɔsɛnɔ. Anto efula wekɔ ɛlɔ kɛnɛ lo yoho mɔtshi y’olimu wa lo tena tshɛ nɛ dia vɔ wakayadjɛ eyango wa teokrasi etena kakiwɔ akɛnda. Kaanga etena kakiwɔ weke ana w’akɛnda, ambutshi awɔ ndo anto akina wakaakeketsha dia nsala dui sɔ. Lo nsala ngasɔ, vɔ wambonga l’ɔngɛnɔngɛnɔ efula l’olimu wakambɛwɔ Jehowa ndo vɔ bu la lonyangu. (Tok. 10:22) Eyango ɛmɔtshi w’amɛna wakokaso ndjadjɛ ele dia sambishaka lomingu tshɛ, ntatɛ ndo nɔmbɔla wekelo wa Bible kana nyomoleka mbɔsa wenya wa nɔngɔsɔla nsanganya. Dui di’ohomba ele dia sho ntshikala nge ndo nkamba olimu aso dimɛna dimɛna. Naka sho nsala ngasɔ, tayosha Jehowa kɛnɛmɔ ndo tayokotsha oyango aso woleki tshɛ mbuta ate mbokambɛka pondjo pondjo.​—Luka 13:24; 1 Tim. 4:7b, 8.