Ekadimwelo lo ambola anyu

◼ La ntondo k’opandjudi wahatabatizama mbetawɔma dia batizama, polo lo yɛdikɔ yakɔna yahombande mbɔtɔka lo nsanganya ndo ndjasha l’olimu w’esambishelo?

Yɛdikɔ ya batizama ekɔ yɛdikɔ yoleki ohomba yahomba onto mbɔsa. Diakɔ diele la ntondo k’onto mbetawɔma dia batizama, nde pombaka mbeya kɛnɛ kɔɔlɔmba Nzambi lo yɛdikɔ yakoka. Laadiko dia laasɔ, nde pombaka monga onto lambooshilaka mɛnya dia nde ekɔ lo nsɛna lo ndjela ɛlɛmbɛ waki Nzambi.

Lam’ele Akristo nɔmbamaka dia sanganaka kaamɛ, opandjudi wahatabatizama pombaka monga onto lambooshilaka mɛnya ohetoheto wele la nde lo wɔtwɛlɔ wa nsanganya ya l’etshumanelo. (Hɛb. 10:24, 25) Ndo nto, nde pombaka mbishaka kɔmatɛrɛ lo nsanganya. Kaanga mbediɔ bu ɔlɛmbɛ, ekɔ dimɛna nde mfundja lokombo lo Kalasa k’olimu wa teokrasi.

Ndo nto, lam’ele Akristo wakalongola ɔkɛndɛ wa nsambisha lokumu l’ɔlɔlɔ ndo wa mbetɛ anto ambeki, opandjudi wahatabatizama pombaka nsambisha mbala la mbala la ntondo ka nde ndjobatizama. (Mat. 24:14; 28:19, 20) Ko ngɔndɔ ngana yahombande nsambisha la ntondo ka nde ndjobatizama? Lo yɛdikɔ yakoka, nde pombaka mbetsha etena k’otale dia nde mɛnya ɔnɛ nde amboyashikikɛ dia sambishaka mbala la mbala ndo l’ohetoheto ngɔndɔ la ngɔndɔ. (Osam. 78:37) Koko bu ohomba nde ndeka mbetsha etena kamboleka otale ntatɛ lam’ayondotatɛ nsambisha polo l’etena kayondokotsha kɛnɛ kalɔmbama dia nde batizama, ondo dui sɔ koka salema l’edja ka ngɔndɔ ngana tsho. Lofulo la wenya la ngande lahombande kimɔka la ntondo ka nde batizama? Ndooko lofulo la wenya shikaa lahombande kimɔka. Dikumanyi pombaka nsɛdingola akambo wele l’opandjudi l’opandjudi ndo monga l’ekanelo ka dimɛna ndo la wɛdimo.—Luka 21:1-4.

Dikumanyi (kana ekambi wakimanyiya lo tshumanelo diele bu la dikumanyi efula) wayotshɔ dia tɔkɛtshanya l’opandjudi walanga batizama pombaka mbohɔ ɔnɛ akoka wele l’onto l’onto ntshikitana, ndo vɔ pombaka nkamba l’ekanelo ka yimba k’ɔlɔlɔ dia menda kana nde ambokotsha kɛnɛ kalɔmbama dia batizama. Vɔ pombaka ndjashishikikɛ ɔnɛ nde ekɔ la nsaki ka mɛtɛ ka nkoma Ɔmɛnyi wa Jehowa ndo mbɔsaka la nɛmɔ diɛsɛ dia monga l’atei w’okongamelo waki Jehowa ndo dia nsambisha. Naka aha ngasɔ, kete dikumanyi wayoshihodia dia nde atahame dimɛna lo nyuma, kana eke l’ohomba w’ekimanyielo dia nde ndjobatizama. Naka dikumanyi wambɛna ɔnɛ onto akɔ atakotsha kɛnɛ kalɔmbama dia nde batizama, kete vɔ pombaka mbotɛ la lɔsɛngɔ tshɛ ɛkɔkɔ wa l’Afundelo waatshutshuyisha dia nsala ngasɔ ndo mbokimanyiya dia nde nongola ekimanyielo ka lo nyuma kahombama.