WEKELO 23
Daka otsha le Jehowa
Ngɔndɔ oko hiende l’ɔkɔngɔ wa vɔ ntomba oma l’Edjibito, ase Isariyɛlɛ wakakome lo Dikona dia Sinayi ko wakahange laawɔ. Jehowa akelɛ Mɔsɛ dia mbidɛ lo dikona ndo akawotɛ ate: ‘Dimi lamboshimbɛ ase Isariyɛlɛ. Naka vɔ kitanyiyami ndo ntetemala nkitanyiya ɛlɛmbɛ ami, kete vɔ wayonga wodja ami wa laande.’ Mɔsɛ akaholɔ oma lo dikona ndo akatɛ ase Isariyɛlɛ kɛnɛ kakate Jehowa. Kakɔna kakawasale? Vɔ wakakadimola ɔnɛ: ‘Tayosala kɛnɛ tshɛ katotɛ Jehowa dia nsala.’
Mɔsɛ akadɛ nto lo dikona. Lɛkɔ, Jehowa akate ate: ‘L’ɔkɔngɔ wa nshi shato, dimi layɔtɛkɛta la yɛ. Ewola anto diaha nyanga dia mbidɛ lo Dikona dia Sinayi.’ Mɔsɛ akaholɔ ndo akatɛ ase Isariyɛlɛ dia vɔ ndjalɔngɔsɔla dia mpokamɛ kɛnɛ kayowatɛ Jehowa.
L’ɔkɔngɔ wa nshi shato, ase Isariyɛlɛ wakɛnyi angadimu ndo dinge di’odima lo dikona. Vɔ wakoke nto akungola wa wolo ndo wondjo wa dimama. Ko Jehowa akaholɔ lo dikona lo dja. Ase Isariyɛlɛ wakandama la wɔma w’efula ko wakasake lokomba. Dikona di’otondo diakadidima wolo ndo diakakombama l’edinga. Wondjo wa dimama wakatalekaka monga wolo. Ko Nzambi akate ate: ‘Dimi kele Jehowa. Hanyohombe ntɛmɔla tonzambizambi tokina.’
Mɔsɛ akadɛ nto lo dikona ko Jehowa akawosha ɛlɛmbɛ dikambo di’anto ndo woho wakawahombe mbɔtɛmɔla ndo lɔkɛwɔ lakawahombe monga la lɔ. Mɔsɛ akafunde ɛlɛmbɛ akɔ ko oma laasɔ akawawadiyɛ ase Isariyɛlɛ. Vɔ wakalake ɔnɛ: ‘Tayosala kɛnɛ tshɛ katotɛ Jehowa dia nsala.’ Eelo, vɔ wakatshike dɔkɔlɔkɔ otsha le Nzambi. Ko onde vɔ wakadikitanyiya?
“Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ.”—Mateo 22:37