Jehowa ambosha Ɛlɛmbɛ ande — BIBLIƆTƐKƐ WA LO ƐTƐRNƐTƐ wa Watchtower

ƆKƆNDƆ 35

Jehowa ambosha Ɛlɛmbɛ ande

NGƆNDƆ hiende yambeta lâmbotomba Ase Isariyɛlɛ oma l’Edjibito, vɔ wambokoma lo Dikona dia Sinai, dielɛwɔ nto ɔnɛ: Hɔrɛba. Lo dihole diakɔ mbakatɛkɛta Jehowa la Mɔsɛ lo dikombo dia dja. Anto wakahange lâwɔ.

Mɔsɛ akadɛ lo dikona ko anto wakôkongɛka l’ɛse. Lengo la shɔdi ya dikona, mbakatɛ Jehowa Mɔsɛ ɔnɛ: Nde nangaka anto kitanyiya aui ande ndo ndjâla wodja Ande wa lânde. Lam’akaholɔ Mɔsɛ, nde akatɛ Ase Isariyɛlɛ kɛnɛ kakate Jehowa. Ko anto wakate ɔnɛ vɔ wayokitanyiya awui wa Jehowa, nɛ dia vɔ nangaka ndjâla wodja ande.

Ko Jehowa akasale dikambo dia mamba l’etena kakɔ. Nde akatondja edinga oma la shɔdi ya dikona, ndo ndjadi yakawalɛwalɛ wolo. Ko nde akatɛ wodja ate: ‘Dimi kele Jehowa Nzambi kanyu lakanyotondja oma l’Edjibito.’ Ko nde akadje ɔlɛmbɛ ɔnɛ ate: ‘Aha nyu tɛmɔla nzambi kina paka dimi.’

Nzambi akasha Ase Isariyɛlɛ ɛlɛmbɛ ekina divua. Anto waki la wɔma efula. Vɔ wakatɛ Mɔsɛ vate: ‘Ototɛke, nɛ dia tekɔ la wɔma efula etena katotɛ Nzambi, sho tatokoyovɔ.’

L’ɔkɔngɔ Jehowa akatɛ Mɔsɛ ate: ‘Dɛ oya le mi lo dikona. Dimi layokosha pase pende di’ave, lɔkɔ mbakamafunde ɛlɛmbɛ walangami dia anto ndjela.’ Ɔnkɔnɛ Mɔsɛ akadɛ nto lo dikona. Nde akasale nshi 40 l’etsho 40 lɛkɔ.

Nzambi aki l’ɛlɛmbɛ efula wambidjɛ anto ande. Mɔsɛ aki lo funda ɛlɛmbɛ akɔ. Ko Nzambi akasha Mɔsɛ pase diakɔ pende di’ave. Nzambi ndamɛmɛ akashile la funda ɛlɛmbɛ 10 lɔkɔ dia mbutɛ anto tshɛ. Vɔ mbakawelɛka ɔnɛ Ɛlɛmbɛ Dikumi.

Ɛlɛmbɛ Dikumi waki ɛlɛmbɛ w’ohomba efula. Koko ndo ɛlɛmbɛ ekina efula nto wakadjɛ Nzambi Ase Isariyɛlɛ mbaki ohomba. Ɔlɛmbɛ ɔmɔtshi ɔnɛ: ‘Wɛ pombaka nanga Jehowa Nzambi kayɛ l’otema ayɛ tshɛ, la lomba layɛ tshɛ, la lumu layɛ tshɛ ndo la wolo ayɛ tshɛ.’ Ndo okina ɔnɛ: ‘Wɛ pombaka nanga onyayɛ oko ayalangɛ.’ Yeso Kristo, Ɔna Nzambi akate ɔnɛ ɛlɛmbɛ ɛsɔ ehende mbele ɛlɛmbɛ woleki weke wakadjɛ Jehowa wodja ande w’Isariyɛlɛ. L’ɔkɔngɔ tayeka akambo efula w’endana l’Ɔna Nzambi ndo la wetshelo ande.

Etumbelu 19:1-25; 20:1-21; 24:12-18; 31:18; Euhwelu k’elembe 6:4-6; Akambu w’Asi Lewi 19:18; Mateu 22:36-40.