Jehowa akalwɛlɛ Jɛhɔshafata ta

Jɛhɔshafata nkumekanga ka Juda akalanya dilambwelo dia Baala ndo dikishi dia lo wodja. Nde akalangaka di’anto mbeya ɛlɛmbɛ wa Jehowa. Diakɔ diakandatome ewandji ndo ase Lɛwi lo Juda y’otondo dia tetsha anto ɛlɛmbɛ waki Jehowa.

Wedja wakasukana la wɔ wakokaka wɔma dia ndɔsha Juda nɛ dia vɔ wakeyaka dia Jehowa ekɔ kaamɛ la wodja ande. Vɔ wakela ndo nkumekanga Jɛhɔshafata weshasha. Koko oma laasɔ, ase Mɔaba, ase Amɔna ndo anto w’oma l’ɛtshi ka nkɛtɛ ka Seirɛ wakaye dia ndjɔlɔsha ase Juda. Jɛhɔshafata akeyaka dia nde ekɔ l’ohomba wa ekimanyielo ka Jehowa. Nde aki l’apami, wamato ndo ana wanɛ wakaye la Jɛrusalɛma. La ntondo kawɔ vɔ tshɛ, nde akalɔmbɛ ate: ‘Jehowa le, naka aha l’ekimanyielo kayɛ, kete hatotɔlɛndja. Lam’alangayɛ otote kɛnɛ kahombaso nsala.’

Jehowa akakadimola dɔmbɛlɔ sɔ lo mbuta ɔnɛ: ‘Tanyokake wɔma. Layonyokimanyiya. Nyemale lo ahole anyu, nyotshikale ki kele nyende woho wayangami nyokokɛ.’ Ko ngande wakaakokɛ Jehowa?

La wedi a pindju, Jɛhɔshafata akasɔnɛ amembi ndo akawatɛ dia vɔ monga la ntondo k’asɔlayi. Vɔ wakalɔngama oma la Jɛrusalɛma polo lo dihole diakalɔmaka ta diakawelɛka ɔnɛ Tekoa.

Etena kakatombolaka amembi Jehowa l’ɔngɛnɔngɛnɔ tshɛ ndo l’awui wa wolo, Jehowa akohɔ wodja ande. Nde akadje ase Amɔna l’ase Mɔaba lo lofunge ko vɔ wakatatɛ ndɔshana lam’asawɔ, ko ndooko onto lakatshikala la lɔsɛnɔ. Koko Jehowa akakokɛ ekambi ande w’ase Juda, oyadi asɔlayi kana ɛlɔmbɛdi. Anto tshɛ wa lo wedja waki suke la wɔ wakoke kɛnɛ kakasale Jehowa ndo vɔ wakeyaka dia Jehowa ekɔ lo ntetemala ndwɛlɛ wodja ande. Ngande wakokɛ Jehowa ekambi ande? Lo toho efula. Nde bu l’ohomba wa wolo w’oma le anto dia nsala dui sɔ.