Jehowa ambotoma Jɛrɛmiya dia tosambisha

Jehowa akasɔnɛ Jɛrɛmiya dia monga omvutshi dikambo di’ase Juda. Nde akawotɛ dia nsambisha anto ndo mbahɛmɔla ɔnɛ vɔ pombaka ntshika nsala awui wa kɔlɔ. Jɛrɛmiya akate ate: ‘Hayii Jehowa, dimi leeke dikɛnda. Dimi haleye woho wa ntɛkɛta l’anto.’ Jehowa akawotɛ ate: ‘Tokake wɔma. Dimi layokotɛ kɛnɛ kahombayɛ mbuta. Dimi layokokimanyiya.’

Jehowa akatɛ Jɛrɛmiya dia tshumanya dikumanyi dia wodja, ko nde mbodiodia mbaka ka diwomba la ntondo kawɔ ndo mbuta ɔnɛ: ‘Paka nganɛ mbayatshatshema Jɛrusalɛma.’ Etena kakasale Jɛrɛmiya kɛnɛ kakawotɛ Jehowa, dikumanyi dia wodja diakomala efula. Ɔlɔmbɛdi ɔmɔtshi wakawelɛka Pashura akakɔmɔla Jɛrɛmiya ndo akawodje lo lowete l’abaya. Otsho w’otondo, Jɛrɛmiya kokoka sukasuka. Pashura akootondja la wedi a pindju. Jɛrɛmiya akate ate: ‘Halotetawɔ dui dia nganɛ nto pondjo. Dimi layanga ntshika nsambisha.’ Ko onde nde mɛtɛ akatshike? Ndooko. Etena kakakanyiya Jɛrɛmiya efula lo dikambo sɔ nde akate ate: ‘Losango la Jehowa lekɔ oko dja l’etei kami. Halakoke ntshika nsambisha.’ Jɛrɛmiya akatetemala mbewola anto.

Ɛnɔnyi efula wakete ndo wakadje nkumekanga k’oyoyo la Juda. Ɛlɔmbɛdi ndo amvutshi wa kashi wakahetshaka losango laki Jɛrɛmiya. Vɔ wakatɛ ewandji vate: ‘Pami kɛnɛ pombaka ndjakema.’ Jɛrɛmiya akate ate: ‘Naka nyu ndjakami, kete nyayodiaka onto lele bu l’onongo. Ɛtɛkɛta wa Jehowa mbatɛkɛtami, koko aha wami hita.’ Etena kakoke ewandji dui sɔ vɔ wakate ɔnɛ: ‘Pami kɛnɛ hahombe ndjakema.’

Jɛrɛmiya akatetemala nsambisha ndo ewandji wakomala efula. Vɔ wakalɔmbɛ nkumekanga dia ndjaka Jɛrɛmiya. Nkumekanga akawatɛ dia vɔ kokaka salɛ Jɛrɛmiya kɛnɛ tshɛ kalangawɔ. Vɔ wakɔshi Jɛrɛmiya, ko wakawokadja lo difuku di’ɔhɔngɔ diaki la lɔtɛkɛ walongamɛ dia nde ayovɔ lɔkɔ. Jɛrɛmiya akatatɛ dinda lo lɔtɛkɛ lɔsɔ.

Oma laasɔ, owandji w’alami wakawelɛka Ɛbɛdɛ-Mɛlɛkɛ akatɛ nkumekanga ate: ‘Ewandji wakakadjisha Jɛrɛmiya lo difuku! Naka sho mbotshika lɔkɔ, kete nde ayovɔ.’ Nkumekanga akadjangɛ Ɛbɛdɛ-Mɛlɛkɛ dia nde ntshɔ kaamɛ l’apami 30 dia totondja Jɛrɛmiya oma lo difuku. Shi sho koka monga oko Jɛrɛmiya laki kombetawɔ kaanga dui ɔtɔi mboshimba dia nde nsambisha?