Diolelo diele oko osongo wa woke

L’otsho ɔmɔtshi, Nɛbukadinɛza akɛnyi dɔ dia wɔma efula. Nde akelɛ anto ande w’ase tomba dia ndjowotɛ kitshimudi yadiɔ. Koko ndooko onto la l’atei awɔ lakakoke nembetshiya dɔ sɔ. L’ekomelo, nkumekanga akayɛnana la Danyɛlɛ.

Nɛbukadinɛza akatɛ Danyɛlɛ ate: ‘Lo dɔ diami, dimi lakɛnyi osongo ɔmɔtshi. Vɔ wakole efula ko wakakome polo l’olongo. Vɔ wakɛnamaka lo tokoma tshɛ ta nkɛtɛ. Vɔ waki l’akatshi w’amɛna efula ndo waki l’elowa efula. Nyama ya l’okonda yakomuyaka lo dɛdi diawɔ ndo tofudu takasalaka tokefu lo ntahe yawɔ. Oma laasɔ, ondjelo ɔmɔtshi akaholɔ oma l’olongo. Nde akawelɛ la dui dia wolo ate: “Nyɔkɔtɛ osongo akɔ ndo nyohembole ntahe yawɔ. Koko nyotshike ehekele la edio awɔ lo nkɛtɛ, ndo nyokikeleke mɔlɔla wa lowolo ndo wa nkonga. Otema ande wamɔ otema w’onto ndo wawosha otema wa nyama, ndo tena esambele diawetee. Anto tshɛ wayeya ɔnɛ Nzambi ekɔ Omboledi ndo ɔnɛ nde mbishaka onto tshɛ lalangande diolelo.”’

Jehowa akasholɛ Danyɛlɛ kitshimudi ya dɔ sɔ. Etena kakoke Danyɛlɛ dɔ sɔ, nde akoke wɔma. Nde akate ate: ‘Nkumekanga le, lakakombodi dia dɔ sɔ mendana l’atunyi ayɛ, koko diɔ mendanaka la yɛ. Osongo wa woke wakakɔtama ekɔ wɛ. Wɛ ayoshisha diolelo diayɛ ndo wɛ ayɔlɛka adiyo wa l’oswe oko nyama ka l’okonda. Koko lam’ele ondjelo akate dia ntshika ehekele kaamɛ la edio atɔ, wɛ ayoyonga nkumekanga nto.’

Ɔnɔnyi ɔtɔi l’ɔkɔngɔ wa laasɔ, Nɛbukadinɛza akatetetaka lo tshoto ya luudu lande la nkumekanga, atɛtɛmɔla Babilɔna. Nde akate ate: ‘Ohonyenda osomba wa dimɛna wakamake ɔnɛ. Ohonyenda woho wemi woke!’ Kam’akandatɛkɛtaka, dui diakaye oma l’olongo diakate ɔnɛ: ‘Nɛbukadinɛza! Kakianɛ, wɛ amboshisha diolelo diayɛ.’

L’etena kɛsɔ, Nɛbukadinɛza akangayɔ ndo akakome oko nyama ka l’okonda. Nde akatshutshuyama dia mimɔ oma lo luudu lande la nkumekanga ko tɔsɛna la nyama ya l’okonda. Divo dia Nɛbukadinɛza diakadɔ oko nsala ya mpongo ndo nkala yande oko ya fudu.

L’ɔkɔngɔ w’ɛnɔnyi esambele, Nɛbukadinɛza akayongaka onto a nombe nto ndo Jehowa akawetɛ nkumekanga ka Babilɔna. Ko Nɛbukadinɛza akate ate: ‘Lambotombola Jehowa, Owandji w’olongo. Kakianɛ, lambeya dia Jehowa ekɔ Omboledi. Nde kitshakitshaka akanga wa lotamanya ndo nde koka mbisha diolelo le onto tshɛ lalangande.’