KIOMBO YA WETSHELO 1B
Awui wele lo dibuku dia Ɛzɛkiyɛlɛ lo tshena pe
Dibuku dia Ɛzɛkiyɛlɛ koka kahanyema lo yoho yayela nyɛ:
TSHAPITA 1 POLO 3
Lo 613 N.T.D., etena kakandasɛnaka kaamɛ l’ase Juda waki lo lɔhɔmbɔ la Babilɔna, Ɛzɛkiyɛlɛ akɛnyi waɛnɛlɔ wa Jehowa ndo akalongola ɔkɛndɛ dia mbewoya prɔfɛsiya le ase Juda wakadjasɛka l’omamu w’ɔkɛdi wa Kebara.
TSHAPITA 4 POLO 24
Lam’asa 613 la 609 N.T.D., Ɛzɛkiyɛlɛ ambewoya nsango ya prɔfɛsiya yendana ntondotondo la kilombo ka Jɛrusalɛma ndo k’anto wa lɛkɔ wakatɔmbɔkɔ ndo wakatɛmɔlaka dikishi.
TSHAPITA 25 POLO 32
Oma lo 609 N.T.D., ɔnɔnyi w’ekomelo wakadinge ase Babilɔna Jɛrusalɛma ntatɛ, Ɛzɛkiyɛlɛ akatshike ntɛkɛta dikambo dia kilombo ka Jɛrusalɛma, ko akatɛkɛta dikambo dia kilombo ka wedja w’atunyi wakaadinge, mbuta ate Amɔna, Ɛdɔmɛ, Edjibito, Mɔaba, Filistiya, Sidɔna ndo Tura.
TSHAPITA 33 POLO 48
Ntatɛ lo 606 N.T.D., Jɛrusalɛma kaamɛ la tɛmpɛlɔ kayɔ ambotshikala tɔngɔ to lo nkama ya kilɔmɛtrɛ, Ɛzɛkiyɛlɛ amboleka ndjasha lo losango l’elongamelo, mbuta ate okaloyelo wa diambo w’ɔtɛmwɛlɔ wa pudipudi wa Jehowa Nzambi.
Ɔnkɔnɛ, awui wele lo dibuku dia Ɛzɛkiyɛlɛ nɔngama lo ndjela woho wakayahɔnaka akambo ndo lo ndjela dikambo la dikambo. Prɔfɛsiya yendana la elanyelo ka Jɛrusalɛma ndo tɛmpɛlɔ kayɔ mbɔtɛkɛtami ntondo ka prɔfɛsiya efula yendana la okaloyelo w’ɔtɛmwɛlɔ wa pudipudi. Dui sɔ mbokɛmaka nɛ dia prɔfɛsiya y’okaloyelo nangaka mɛnya dia ɔtɛmwɛlɔ wa lo tɛmpɛlɔ wakakomɛ.
Ndo nto, prɔfɛsiya ya Ɛzɛkiyɛlɛ yendana la wedja w’atunyi wakaadinge (tshapita 25 polo 32) tanemaka lam’asa nsango yande ya kilombo otsha le Jɛrusalɛma la prɔfɛsiya yendana la okaloyelo w’ɔtɛmwɛlɔ wa pudipudi. Lo ntɛkɛta dikambo dia nsango ya kilombo ya Ɛzɛkiyɛlɛ otsha le wedja, nomb’ewo kɛmɔtshi mbutaka ate: “Yɔ yekɔ dui dia dimɛna diele lam’asa etelo ka nkɛlɛ ka Nzambi la etelo ka kɛtshi kande otsha le ekambi Ande, nɛ dia dilanya dia atunyi awɔ diekɔ etenyi kɛmɔtshi k’etshungwelo k’ekambi Ande.”