‘Lɔkɔhɔ lami lekɔ tefutefu ndo oshikɔ ami wekɔ osadi’
“Nyembe lokoho lami, nyeki akambu uma le mi.”—MATEU 11:29.
1, 2. (a) Lo lɔsɛnɔ layɛ, kakɔna katokoshaka ekeketshelo? (b) Kakɔna kahomba onto sala dia nde kondja ekeketshelo kakalake Yeso?
ANDE ekeketshelo kakondja onto etena kɔkande ashi l’ɔkɔngɔ wa lushi la yanyi ya tɛ ndo la yɔyɔ, kana etena kalalande djɔ ya lɔngɔvungɔvu l’ɔkɔngɔ wa lɔkɛndɔ l’otale ndo lakɔmɔla demba lee! Woho akɔ wâmɛ mbasalema ndo l’etena katâmuyawɔ oshikɔ wa wotsho kana lam’atodimanyiyɛwɔ pɛkato la munga yaso. (Tukedi 25:25; Etsha 3:19) Ekeketshelo ka ngasɔ kakondjaso pɛtshahɛtshaka otema aso, tosalanganyaka ndo toshaka wolo dia sho ntshɔ otsha la ntondo.
2 Wanɛ tshɛ wayaoka dia vɔ wekɔ lo sowa la wetsho ndo wambɔlɛmba kokaka ndja oya le Yeso, nɛ dia nde akalake dia mbasha ekeketshelo. Koko, di’onto kondja ekeketshelo kɛsɔ ka dimɛna efula, nde pombaka mbetawɔ dia sala dikambo dimɔtshi. Yeso akate ate: “Nyembe lokoho lami, nyeki akambu uma le mi. . . . ku nyu nyayutana [ekeketshelo lo dikambo di’anima anyu, NW].” (Mateu 11:29) Lɔkɔhɔ kɛdikɛdi na? Woho akɔna washalɔ onto ekeketshelo?
Lɔkɔhɔ la Tefutefu
3. (a) Lo tena diakafundamaka Bible, weoho akɔna wa nkɔhɔ yakawakambaka layɔ olimu? (b) Ngande wɔsawɔ lɔkɔhɔ lo yoho ya didjidji?
3 Oko wakawadjasɛka lo wodja w’akambikambi a dikambɔ, Yeso nde l’ampokami ande wakeyaka ɛngɔ kelɛwɔ lɔkɔhɔ. Lɔkɔhɔ kɛdikɛdi etenyi k’osongo kele oko osembe, etenyi kakɔ kekɔ la tokoma tohende tɔtshɔngiwɔ kana sɔngɔla lo wedi wa l’ɛse woho wa mbɔtɔnɛ lâdiko dia weodi wa nyama hiende yekɛ mɛmba wetsho, tena efula wakɔsaka paka ngɔmbɛ, dia ndjikakatanya kâmɛ woho wa yɔ kotola lôngo, pusupusu, kana oshikɔ ɔmɔtshi. (1 Samuele 6:7) Ndo anto wakakambaka la nkɔhɔ. Nkɔhɔ shɔ yaki paka oko etenyi ka longandjɔ kana oko esembe wakɛmbaka onto l’ahɛka ko keleka eshikɔ lo tokoma takɔ tohende. Ehomɔ kɛsɔ kakakimanyiyaka anto dia vɔ mɛmba diangɔ dia wotsho. (Jeremiya 27:2; 28:10, 13) Lam’ele lɔkɔhɔ mbɔtɔnɛka la wetsho ndo la lotumu, lɔ mbɔsamaka tena efula lo yoho ya didjidji l’atei a Bible dia nembetshiya diolelo la lowandji.—Euhwelu k’Elembe 28:48; 1 Khumi ya Dikanga 12:4; Etsha 15:10.
4. Lɔkɔhɔ lalaka Yeso dia mbisha wanɛ waya le nde kɛdikɛdi na?
4 Ko lâsɔ, naa lɔkɔhɔ lakatɛ Yeso wanɛ waya le nde dia ndjokondja ekeketshelo dia vɔ mɛmba na? Tohɔ dia nde akate ate: “Nyembe lokoho lami, nyeki akambu uma le mi.” (Mateu 11:29) Ɔnɛ leka akambo ekɔ ombeki. Ɔnkɔnɛ, mɛmba lɔkɔhɔ laki Yeso kɛdikɛdi ndjâla ombeki ande. (Filipi 4:3) Koko, dia sala dikambo sɔ, pombaka sala awui efula, aha paka monga l’ewo keto ka wetshelo ande. Onto pombaka monga la ditshelo diɔtɔnɛ la wetshelo akɔ—kamba olimu wakakambe Yeso ndo monga la lɔsɛnɔ lele oko lɔnɛ laki lande. (1 Koreto 11:1; 1 Petero 2:21) Nde pombaka ndjakitshakitsha l’otema ɔtɔi la tshina dia lowandji lande ndo la tshina dia wanɛ wakandasha lowandji. (Efeso 5:21; Heberu 13:17) Kɛdikɛdi, onto pombaka ndjâla Okristo wamboyakimɔ le Nzambi, wambolongola batismu, ndo mbetawɔ waɛsɛ tshɛ la ɛkɛndɛ tshɛ waya oma lo ndjakimɔ kande le Nzambi. Ɔsɔ mbele lɔkɔhɔ lalaka Yeso dia mbisha wanɛ tshɛ waya le nde dia ndjokondja esambelo la ekeketshelo. Onde wɛ ekɔ suke suke dia mbetawɔ lɔkɔhɔ lakɔ lɔsɔ?—Joani 8:31, 32.
5. Lande na kele kema pâ di’onto mɛmba lɔkɔhɔ laki Yeso?
5 Kondja ekeketshelo lo mɛmba lɔkɔhɔ—shi ɔsɔ ekɔ ɛtɛkɛta wahɔtɔnɛ? Kema aha ɔsɔku, nɛ dia Yeso akate ɔnɛ lɔkɔhɔ lande lekɔ “[tefutefu, Dikelemba di’oyuyu].” Tshɛkɛta shɔ nembetshiyaka bɔkubɔku, ɔlɔlɔ, dimɛna. (Mateu 11:30; Luka 5:39; Romo 2:4; 1 Petero 2:3) Oko wakinde otshudi w’abaya wa manamana, ondo mɛtɛ Yeso akasalaka nkongo la nkɔhɔ, ndo nde akeyaka mɛtɛ woho wa sɛla lɔkɔhɔ la dimɛna lakoka kimanyiya onto dia nde kamba lotumu l’ɔlɔlɔ tshɛ. Ondo nde akɔmbaka ɛtshi ka dihɔndɔ kana ekoho kɛmɔtshi lâdiko dia nkɔhɔ yakandasɛlaka. Wakasɛlaka nkɔhɔ efula lo yoho shɔ woho w’aha yɔ mɛnya onto pâ kana mbohisola lo wôdi. Lo yoho yakɔ yâmɛ, lɔkɔhɔ la didjidji latolaka Yeso dia tosha lekɔ “tefutefu.” Kânga mbele di’onto ndjâla ombeki ande nde pombaka kotsha awui amɔtshi la ɛkɛndɛ ɛmɔtshi, ɔsɔ kema dikambo dia pâ ndo diatɔhɛnyahɛnya, koko ekɔ dikambo diatokeketsha. Ɛlɛmbɛ wa Jehowa, She Lele l’Olongo, kema wotsho ndo vɔ lawɔ.—Euhwelo k’Elembe 30:11; 1 Joani 5:3.
6. Kakɔna kakalange Yeso mbuta lam’akandate ate: “Nyembe lokoho lami”?
6 Dikambo dikina nto diekɔ dietɛ lɔkɔhɔ laki Yeso “tefutefu,” kana kema wolo dia mɛmba. Lam’akandate ate: “Nyembe lokoho lami,” nde akakoke monga la kanyi ya mbuta awui ahende. Naka nde aki la kanyi ya lɔkɔhɔ lakelekawɔ diangɔ pende, mbuta ate woho wa lɔkɔhɔ lakakatanyawɔ nyama hiende yekɛ mɛmba wetsho dia yɔ kotola oshikɔ ɔmɔtshi, kete nde akatelɛka dia sho mbɔtɔ lo lɔkɔhɔ ɔtɔi kâmɛ lande. Ande ɔtshɔkɔ wakokaso kondja—dia Yeso ndjâla suke laso dia tɛmbaka oshikɔ aso kâmɛ laso lee! Lo wedi okina, naka Yeso akakanyiyaka dikambo dia osembe wakɛmbaka ase olimu, kete nde aki lo tɛnya woho wakokaso mbetɛ oshikɔ tshɛ wahombaso mɛmba osadi w’efula kana aha l’okakatanu. Lo weoho akɔ ehende, lɔkɔhɔ lande lekɔ kiɔkɔ y’ekeketshelo ka mɛtɛ nɛ dia nde ekɔ lo toshikikɛ ate: “[Nɛ dia dimi lekɔ la dionga dia wɔladi ndo l’otema wa ndjakitshakitsha, NW].”
7, 8. Munga kakɔna katosalaka anto amɔtshi etena kayaokawɔ ɔnɛ waya la pâ?
7 Ko lâsɔ, kakɔna kahombaso sala naka tekɔ lo mboka ɔnɛ ekakatanu wa lo lɔsɛnɔ weso lo tɛmbɛ waya wolo mbikikɛ ndo yimba yaso yambofukutana na? Anto amɔtshi kokaka sala munga lo kanyiya ɔnɛ lɔkɔhɔ la monga ombeki wa Yeso Kristo tɛkɔnya wolo kana mbɔsɛka onto wenya efula la shidiyaka wolo ande, tete le ekiyanu wa lo lɔsɛnɔ la lushi la lushi mbambâheka. Lam’akomawɔ lo lɔsɛnɔ la ngasɔ, anto amɔtshi totshikaka dia mbɔtɔ lo sanganya y’Akristo, kana hawotolangaka tomba l’olimu w’esambishelo, lo kanyiyaka ɔnɛ kana ɔsɔku mbayowomuya yema. Koko, ɔsɔ mɛtɛ ekɔ munga ka woke.
8 Sho mbeyaka l’ɔlɔlɔ tshɛ ɔnɛ lokɔhɔ lalaka Yeso dia tosha lekɔ “tefutefu.” Naka hatoliɛmbi dimɛna, kete lɔ kokaka tohumuya. L’etena kɛsɔ, sho pombaka sɛdingola lɔkɔhɔ lele l’ahɛka aso. Naka, l’ɛkɔkɔ ɛmɔtshi, lɔkɔhɔ lekɔ kɔlɔ kana halɔtɔnɛ dimɛna, ko tekɔ lo liɛmba, kete dikambo sɔ hadiotototshutshuya tsho dia sho mbidja weolo efula koko diayotosha ndo pâ. Kɛdikɛdi, naka tɛna elimu wa lo Teokrasi oko wotsho ɔmɔtshi, kete sho pombaka sɛdingola dia mɛna kana tekɔ lo mbasala lo yoho yasungana. Kakɔna katotshutshuya dia sho sala kɛnɛ kasalaso? Onde sho ndjalɔngɔsɔlaka l’ɔlɔlɔ tshɛ lam’atshɔso otsha lo sanganya? Onde sho tayalɔngɔsɔlaki dimɛna lo demba ndo lo yimba etena katombaso otsha l’olimu w’esambishelo? Onde tekɔ la diokanelo dia ma ma ndo dia dimɛna lam’asaso l’anto akina wa l’atei w’etshumanelo? Lâdiko di’akambo asɔ tshɛ, ngande wele diokanelo diasaso sho la Jehowa Nzambi l’Ɔnande Yeso Kristo?
9. Lande na kahahombe lɔkɔhɔ l’Okristo ndjâla oko wotsho wahandakoke mɛmba?
9 Naka sho mbetawɔ lɔkɔhɔ latosha Yeso l’otema ɔtɔi ndo mbeka woho wa liɛmba dimɛna, kete lɔ halongaki pondjo oko wotsho ɔmɔtshi wahatakoke mɛmba. Mɛtɛ, naka sho kanyiya woho wele dikambo sɔ—Yeso kâmɛ laso lo lɔkɔhɔ ɔtɔi—kete kema wolo dia sho mɛna ɔnɛ lataleke mɛmba wotsho w’efula. Ekɔ wate kana oko ɔna dikɛnda latatakula lateke lɔkɛndɔ lo pusupusu kande, nde ekɔ lo kanyiya ɔnɛ nde mbatakipuse otsha la ntondo, tete le mɛtɛ, she kana nyango mbatakipuse. Oko wende ombutshi woludi la ngandji, Jehowa Nzambi mbeyaka lam’okome wolo aso ndo mbeyaka wɛɔdu aso, ndo nde tokotshɛka ehomba aso oma lo tshimbo ya Yeso Kristo. Paulo akate ate: “[Nzambi, NW] . . . ayukutsha ehumba anyu tshe uku eli ongonyi andi lu lutumbu [oma] le Kristu Jesu.”—Filipi 4:19; ɛdika la Isaya 65:24.
10. Kakɔna kakɛnyi Okristo ɔmɔtshi wa omoto wɔsa lɔsɛnɔ lande l’ombeki a Yeso la nɛmɔ?
10 Akristo efula wakɛnyi dikambo sɔ lo nsɛnɔ yawɔ vaɔmɛ. Tɔ̂shi ɛnyɛlɔ kaki Jeanine, nde mɛnaka ɔnɛ kamba olimu w’ombatshi mboka wa tshanda ngɔndɔ tshɛ ndo kambaka olimu wa l’emunyi wa lushi l’otondo wawɔsɛ wenya efula ndo wotshutshuya dia nde mbidja weolo efula mboshaka ofukutanu efula lo tokanyi. Koko, nde kanyiyaka ɔnɛ olimu w’ombatshi mboka mbokimanyiyaka di’aha nde mɛngɛnga. Dikambo dialeka mbosha ɔngɛnɔngɛnɔ w’efula lo lɔsɛnɔ lande loludi la wesanu ele kimanyiya anto dia vɔ mbeka mɛtɛ kele l’atei a Bible ndo mɛna anto akɔ wasala etshikitanu lo nsɛnɔ yawɔ dia vɔ mpomɔ lokolɔ l’ɔlɔ lo asho wa Nzambi. Oma ka tshina di’otema ande, nde mbetawɔka ɛtɛkɛta wa lo Tukedi wata ɔnɛ: “Otshoko wa [Jehowa] mbatongonyaka. Ndi hataheka lunyangu ladiku diawo.”—Tukedi 10:22.
Oshikɔ w’Osadi
11, 12. Kakɔna kakalange Yeso mbuta lam’akandate ɔnɛ: “Ushiko ami weko usadi”?
11 Lâdiko dia nde tolaka dia tosha lɔkɔhɔ la “tefutefu,” Yeso ekɔ lo toshikikɛ ɔnɛ: “Ushiko ami weko usadi.” Lɔkɔhɔ la “tefutefu” loto mbetɛka olimu wɔdu efula; naka ndo oshikɔ wekɔ osadi, kete lotumu lakɔ mɛtɛ mbishaka ndo ɔngɛnɔngɛnɔ. Ko kakɔna kakalange Yeso mbuta oma l’ɛtɛkɛta ɛsɔ na?
12 Tênde kɛnɛ kahomba okambi wa dikambɔ sala etena kalangande mbisha nyama yande lotumu lokina, ɛnyɛlɔ oko ndjisha pusupusu dia yɔ kikotola l’ɔkɔngɔ wa yɔ mfusa kɛtɛ. Ntondotondo, nde ayoyikelekola oma lo lôngo ko ayoyikeleka lo pusupusu. Nde ayɛna kɔlɔ keleka nyama shɔ ndo lôngo ko ndo pusupusu etena kakɔ kâmɛ. Woho akɔ wâmɛ mbele, Yeso kombutɛka anto dia vɔ mbahɛ oshikɔ ande lâdiko dia wɔnɛ wakawatɛmbaka. Nde akatɛ ambeki ande ate: “Nduku untu leya nkambela ewandji ehendi ulimu.” (Luka 16:13) Ɔnkɔnɛ, Yeso akashaka anto ɔsɔnwɛlɔ ɔmɔtshi. Onde ampokami ande wayotetemala la mɛmba eshikɔ awɔ wa wotsho, kana vɔ wayowakitsha dia mbetawɔ wɔnɛ wakawashaka Yeso? Yeso akawasha ɔkɔkɔ woludi la ngandji, ata ate: “Ushiko ami weko usadi.”
13. Lo nshi yaki Yeso, eshikɔ akɔna wakɛmbaka anto, ndo etombelo akɔna wakayala?
13 Lo nshi yaki Yeso, anto wakatshingatshingaka l’eshikɔ wa wotsho wakawɛndjamaka oma le emboledi w’Ase Rɔmɔ la oma le ewandji w’ɛtɛmwɛlɔ, wa dungi pende, ndo wakatɛmɔlaka paka l’onyɔ oto. (Mateu 23:23) Lam’akawayange dia ndjatshungola oma la tshina dia lowandji l’Ase Rɔmɔ, anto amɔtshi wakahembe dia sala akambo lo ndjela tokanyi tawɔ vɔamɛ. Vɔ wakayatambiya tshavu l’ata w’akambo wa pɔlitikɛ, koko ndoko di’ɔlɔ diakawakondja oma lɔkɔ. (Etsha 5:36, 37) Akina wakɔshi tɛdikɔ ta ndowanya lɔsɛnɔ lawɔ lo ndjakimɔ la tshondo l’oyango wa lomombo. (Mateu 19:21, 22; Luka 14:18-20) Lam’akawaɛnya Yeso woho wakokawɔ kondja ekimanyielo lo ndjâla ambeki ande, aha anto tshɛ mbaketawɔ. Vɔ wakakandakandaka dia kitsha eshikɔ awɔ, kânga mbakiwɔ wotsho efula, ko mɛmba oshikɔ waki Yeso. (Luka 9:59-62) Ande munga ka woke kakawasale!
14. Woho akɔna wakoka ekiyanu wa lo lɔsɛnɔ la saki ka lomombo tɛnya pâ?
14 Naka hatoyalami ɔlɔlɔ, kete sho kokaka sala munga kakɔ kâmɛ ɛlɔ kɛnɛ. Ndjala ambeki wa Yeso totshungolaka oma lo saki ka monga l’eyango ndo la lɔkɛwɔ lele l’anto wa l’andja ɔnɛ. Kânga mbahombaso kamba efula dia kondja diangɔ diele ohomba lo lɔsɛnɔ, sho hatɛkɛ lɔsɛnɔ laso paka lo diangɔ sɔ. Koko, ekiyanu wa lo lɔsɛnɔ ndo saki ka kondja lomombo kokaka monga la shɛngiya ya wolo le so. Naka hatohetetadi, kete saki ya ngasɔ kokaka mbututadia mɛtɛ kakatetawɔ l’ohetoheto tshɛ. (Mateu 13:22) Sho kokaka ndjoyakiyanya ɔtɛkɔya dia kotsha saki ya ngasɔ ko ɛkɛndɛ aso w’Okristo ndjoyala oko ɛkɛndɛ wakɔmɔla demba walangaso kotsha paka l’ehatohato, esadi eto, ko minya demba. Naka tekɔ lo kambɛ Nzambi olimu la yimba ya ngasɔ, kete tatolongamɛke ɔnɛ tayokondja kânga yema y’ekeketshelo tshitshɛ.
15. Dako diakɔna diakasha Yeso dia mbewola anto oma lo saki ya lomombo?
15 Yeso akake epole ɔsɛkɛ ɔnɛ di’onto monga la lɔsɛnɔ l’ɔngɛnɔngɛnɔ, nde pombaka shihodia akambo woleki ohomba, koko aha lo ndjatshutshuya dia kotsha saki yande tshɛ. Nde akate ate: “Tanyuyakananyaki dia nyumu nyati: Ayutole na? kana, ayutono na? kana dia alimba anyu nyati: Ayutolota na? Lumu haluleki mbu ya nde? dimba hadiuleki ahondo?” Oma lâsɔ, nde akakotola yambalo oya le tofudu ta l’olongo, ko akate ate: “Yo hayutuneka, hayutunaka, hayutumbaka diango lu apenge, keli Shenyu leli l’ulungu atuyileshaka.” Lo kɛnɛ k’endana l’alɛmbɔlɛmbɔ wa l’ekambɔ, nde akate ate: “Vo hawutukambaka ulimu kuyanga mbitsha ahondo. Keli dimi lambunyutela nti: Kuyanga Solomona lu lutumbu landi tshe kondota uku dembo dimotshi dia l’atei awo.”—Mateu 6:25-29.
16. Etombelo akɔna wayala oma l’oyangelo wa lomombo?
16 Onde sho kokaka kondja wetshelo ɔmɔtshi oma lo diɛnyɛlɔ sɔ diokɛma hwe? Wetshelo akɔ v’ɔnɛ: le onto tshɛ, lam’atandaleke ndjatshutshuya dia ndowanya lɔsɛnɔ lande l’akambo w’okundji, mbatandaleke ndo tala lo djonga y’eyango wa l’andja ɔnɛ ndo mbataleke peka wotsho wa l’ahɛka ande. L’andja ɔnɛ, lokema l’anto wakalowanya lɔsɛnɔ lawɔ l’akambo w’okundji wakahandjola nkumbo yawɔ, wakalanya awala awɔ, ndo wakafukutanya alemba awɔ, l’akambo akina efula. (Luka 9:25; 1 Timote 6:9, 10) Albert Einstein, ɔnɛ lakalongola Prix Nobel, akate lushi lɔmɔtshi ate: “Le mi: lomombo, ɔngɛnɔngɛnɔ wa l’andja ka demba, lokumu, ɔngɔnyi—ekɔ akambo wɛngami diɛngɛku nshi tshɛ. Dimi kanyiyaka nte: kɛnɛ koleki ɔlɔlɔ le onto tshɛ, ele dia nde monga la lɔsɛnɔ laha la lokumu ndo la lo yɛdikɔ.” Ɛtɛkɛta ɛsɔ wekɔ lo mbohola paka dako diakasha ɔpɔstɔlɔ Paulo lam’akandate ɔnɛ: ‘mamema Nzambi ekɔ ɔngɔnyi wa woke le onto, naka nde ngɛnangɛna kɛnɛ kende latɔ.’—1 Timote 6:6.
17. Yoho yakɔna ya lɔsɛnɔ latokeketsha Bible dia sho ndjâla lalɔ?
17 Dikambo dimɔtshi di’ohomba diahatahombe minya yimba diekɔ. Kânga mbele “lɔsɛnɔ laha la lokumu ndo la lo yɛdikɔ” lekɔ la wahɔ efula, aha lɔ lwamɛ mbele kiɔkɔ y’ɔngɛnɔngɛnɔ. Anto efula wekɔ la lɔsɛnɔ lele kema la lokumu nɛ dia vɔ kema l’akoka wa ndowanya lɔsɛnɔ lawɔ lam’ele lɔsɛnɔ lekɔ pâ, koko vɔ kema l’ɔngɛnɔngɛnɔ. Bible hatotshutshuya dia sho tona diangɔ dia l’emunyi kana monga la lɔsɛnɔ l’ondjashi Nzambi woyadjase ndamɛ mangana l’anto. Kɛnɛ kakawɔ epole ɔsɛkɛ ele mamema Nzambi, koko aha paka di’onto ngɛnangɛna lo kɛnɛ kele lande. Paka lam’ayotosanganya akambo asɔ ahende mbayotokondja ‘ɔngɔnyi wa woke.’ Ɔngɔnyi akɔna na? Yema l’ɛse lo mukanda akɔ wâmɛ, Paulo ekɔ lo mbuta ɔnɛ wanɛ ‘wahɛ asolo awɔ le Nzambi, koko aha lo ekundji wahangana la mbeta, wayoyatshumanyɛ okundji wa mɛtɛ, etshina k’ɔlɔlɔ ka nshi yayaye, dia vɔ kondja lɔsɛnɔ la mɛtɛ.’—1 Timote 6:17-19.
18. (a) Woho akɔna wakoka onto kondja ekeketshelo ka mɛtɛ? (b) Woho akɔna wahombaso mbɔsa etshikitanu ɛmɔtshi wahombaso sala?
18 Tayokondja ekeketshelo naka sho mbeka woho wa kitsha oshikɔ aso wa wotsho ko mɛmba oshikɔ w’osadi watosha Yeso. Anto efula wanɛ wakalɔngɔsɔla nsɛnɔ yawɔ woho wa vɔ kamba efula l’olimu wa Diolelo wakɛnyi yoho yakokawɔ kondja lɔsɛnɔ l’ɔlɔ ndo l’ɔngɛnɔngɛnɔ. Mɛtɛ, di’onto sala etshikitanu wa ngasɔ, nde pombaka monga la mbetawɔ, la dihonga, ndo wekamu ɛmɔtshi mbeyaka mbêkamɛ la ntondo. Koko, Bible toholaka ɔnɛ: “One latendaka lopepe hune, la one latendaka wangi hani.” (Undaki 11:4) Sho ndjɛnaka akambo efula ɔnɛ vɔ kema wolo efula oko wakatakanyiyaka naka tambɔsa tɛdikɔ dia mbasala. Dikambo diɛnama oko wolo efula ele: mbɔsa tɛdikɔ. Naka sho kandakandaka kana tonaka dia sala lotumu la wolo kete tayoyalɛndja shoamɛ. Naka sho keketsha otema ndo mbetawɔ mbekola wekamu, kete sho kokaka ndjamba dia mɛna ɔnɛ ɔsɔ ekɔ tshondo y’ɔtshɔkɔ. Omembi w’esambu akatokeketsha ate: “Nyunganeli, nyenyi nyati: [Jehowa] eli ololo.”—Osambu 34:8; 1 Petero 1:13.
“Ekeketshelo lo Dikambo di’Anima Anyu”
19. (a) Lam’atatetemala awui wa l’andja ɔnɛ fukutana, kakɔna kahombaso nongamɛ? (b) Kakɔna kayashikikɛso ɔnɛ tayokondja naka tekɔ la tshina dia lɔkɔhɔ laki Yeso?
19 Ɔpɔstɔlɔ Paulo akohola ambeki waki l’eleko ka ntondo ate: “L’atei w’asui, kahumbasu mboto lu diulelu dia [Nzambi, NW].” (Etsha 14:22) Dikambo sɔ diekɔ lo kotshama lo nshi yaso nyɛ. Lam’ele awui wa l’andja ɔnɛ wekɔ lo tafukutana tsho, wanɛ wakɔshi tɛdikɔ dia mamema Nzambi ndo monga la lɔsɛnɔ la losembwe wekɔ lo taleke pomana l’ekakatanu. (2 Timote 3:12; Enyelo 13:16, 17) Koko, asolo aso wekɔ oko waki Paulo lam’akandate ate: “Shu [tambohinama lo weoho tshɛ, koko tatadjama lo mpika, NW]; tambukanana, keli tataheko; tambusuyama, keli tatasekama; tambumbama la kete, keli tatadiakema.” Ngasɔ mbeso nɛ dia sho kokaka mendɛ le Yeso Kristo dia nde tosha wolo woleki wɔnɛ wokoyalaka l’onto. (2 Koreto 4:7-9) Naka sho mbetawɔ lɔkɔhɔ la ndjâla ambeki wa Yeso l’otema ɔtɔi, kete tayɔngɛnangɛna lo mɛna ekotshamelo ka daka diande di’ɔnɛ: “Nyayutana [ekeketshelo lo dikambo di’anima anyu, NW].”—Mateu 11:29.
Onde Wɛ Kokaka Nembetshiya?
◻ Lɔkɔhɔ la tefutefu lalaka Yeso dia mbisha anto kɛdikɛdi na?
◻ Kakɔna kahombaso sala naka tamboka di’oko lɔkɔhɔ laso laya wotsho?
◻ Kakɔna kakalange Yeso mbuta lam’akandate ɔnɛ: “Ushiko ami weko usadi”?
◻ Woho akɔna wahombaso sala dia lɔkɔhɔ laso tshikalaka osadi oto?