Ɛkɔkɔ Wa Jehowa Wekɔ L’ohomba W’ekokelo Koludi La Ngandji
“Nyeyi nyati: [Jehowa kele Nzambi, “NW”]! . . . Shu teko antu andi, ndu ekoko watunduleshaka.”—OSAMBU 100:3.
JEHOWA ekɔ Olami wa Woke w’Ɛkɔkɔ. Naka ekambi ande mbeso, kete nde tɔ̂saka oko ɛkɔkɔ ande ndo tokokɛka la ngandji tshɛ. Shɛso lele l’olongo tosambaka, tokeketshaka ndo tɔlɔmbɔlaka “lu mbuka y’akambu w’ololo ne dia lukumbu landi.” (Osambu 23:1-4) Yeso Kristo, Olami w’Ɔlɔlɔ w’Ɛkɔkɔ, tolangaka efula, diɔ diakɔ diakandakimɔ anima ande lo dikambo diaso.—Joani 10:7-15.
2 Lam’ele wekɔ lo tokokɛ la ngandji tshɛ, sho kokaka mbuta kâmɛ l’omembi w’esambu shate: “Nyukambelaki [Jehowa] ulimu l’ongenongeno, nyuyaki la ntundu kandi l’esambu! Nyeyi nyati: [Jehowa kele Nzambi, NW]! Ndi kakatutungi, wandi mbesu. Shu teko antu andi, ndu ekoko watunduleshaka.” (Osambu 100:2, 3) Mɛtɛ, tekɔ l’ɔngɛnɔngɛnɔ ndo tekɔ lo lotui tshitshi. Tekɔ oko ɛkɔkɔ wahakoke nyama ya ngala munda l’atei wa lokoto lele la pele dia wolo di’ave.—Walelu 32:16; 1 Samuele 24:3; Zefaniya 2:6.
Elami w’Ɛkɔkɔ w’Etema Ɛlɔlɔ
3 Aha la tamu, tekɔ l’ɔngɛnɔngɛnɔ oko weso ɛkɔkɔ wa Nzambi! Dikumanyi diakasɔnama diekɔ lo tɔlɔmbɔla. Vɔ hawoyaetɛ ‘oko ewandji,’ hawotâhemɛ, kana pemba dia monga la lowandji lâdiko dia mbetawɔ kaso. (Walelu 16:13; Mateu 20:25-28; 2 Koreto 1:24; Heberu 13:7) Koko vɔ wekɔ elami w’ɛkɔkɔ woludi la ngandji, ndo vɔ ndjelaka dako diaki ɔpɔstɔlɔ Petero diata ɔnɛ: “Nyulamaki ekoko wa [Nzambi, NW] weli l’atei anyu. Nyuwalami, aha la khudu, keli la etema w’ongenongeno, uku eli lulangu la [Nzambi, NW], aha dikambu di’ukundji, keli la yimba yolongoswami. Tanyahamelaki wane weli l’okongo anyu, keli nyuyali tulimbitelu t’ololo le ekoko.” (1 Petero 5:2, 3) Ɔpɔstɔlɔ Paulo akatɛ anyande dikumanyi ate: “Nyuyalami ololo, ndu nyulami limba tshe ololo, wako wakanyukitsha [nyuma k’ekila, NW] alami, dia nyu ndesha ekelizia wa [Nzambi, NW], wakandasumbi la dikila [di’Ɔnande hita, NW].” Mɛtɛ, ɛkɔkɔ wekɔ la lowando efula nɛ dia apami asɔ wakasɔnama oma le nyuma k’ekila ‘namaka lemba l’ɛkɔkɔ la ngandji tshɛ’!—Etsha 20:28-30.
4 Yeso akasha etshumanelo “anto [wele] oko weshasha,” amɔtshi oko “wa pasitɛlɛ,” kana elami w’ɛkɔkɔ walama lemba l’ɛkɔkɔ wa Jehowa la ngandji tshɛ. (Ɛfɛsɔ 4:8, 11; King James Version) Ɔmɔtshi a l’atei w’anto akɔ asɔ akikɔ Charles T. Russel, ɔnɔmbɔdi wa ntondo wa la Société Watch Tower. Wakawelɛka ɔnɛ Pasitɛlɛ Russell nɛ dia nde akakambaka olimu wa nama ɛkɔkɔ la ngandji tshɛ ndo la kɛtshi oma l’ɛlɔmbwɛlɔ kaki Yeso Kristo, Owandji w’Elami w’Ɛkɔkɔ. Ɛlɔ kɛnɛ, dikumanyi di’Akristo diekɔ lo sɔnama oma le Olui Walɔmbɔla w’Ɛmɛnyi wa Jehowa, ndo vɔ kokɛka ɛkɔkɔ aha lo mbɔsa tɔtɛkɛta tele oko “pasitɛlɛ,” “ekumanyi,” kana “ombetsha” oko mpɛtɛ mɔtshi. (Mateu 23:8-12) Koko, dikumanyi dia nshi nyɛ diekɔ lo sala olimu wa namaka ɛkɔkɔ waleshama oma le Jehowa.
5 Oko wewɔ elami w’ɛkɔkɔ, dikumanyi diekɔ l’ɔkɛndɛ w’ohomba efula lo dikambo di’ohamelo wa lo nyuma w’anto w’eyoyo. Diɔ diakɔ diata dibuku di’oyoyo dielɛwɔ Ewo Katɔla Otsha lo Lɔsɛnɔ la Pondjo lo lɛkɛ 168 ɔnɛ: “Yanga woho wa mbeya dikumanyi dia l’etshumanelo. Vɔ wambomana akambo efula fundo lam’akitanyiyawɔ ewo ka Nzambi, nɛ dia vɔ wekɔ la waonga wa l’atei a Bible walɔmbama le emendji. (1 Timote 3:1-7; Tito 1:5-9) Tengengake dia mbutɛ ɔmɔtshi a l’atei awɔ naka wɛ ekɔ l’ohomba w’ekimanyielo ka lo nyuma woho wa wɛ tshika mbekelo kɛmɔtshi kana dionga dimɔtshi diahɔtɔnɛ l’ɛlɛmbɛ wa Nzambi. Wɛ ayɛna ɔnɛ dikumanyi diekɔ lo ndjela dako diaki Paulo diata ɔnɛ: ‘Nyukikitsha akanga w’etema a weodu, nyusukeli wane weli weodu, nyuyali la memakana le antu tshe.’—1 Tesalonika 2:7, 8; 5:14.”
Etena Kalanga Anto w’Eyoyo Sambisha
6 L’ɔkɔngɔ w’ombeki wa Bible kondja ewo ndo mbɔtɔ lo nsanganya lo tshanda mɔtshi, ondo nde mbeyaka monga la saki ka ndjâla opandjudi wa Diolelo, osambisha wa lokumu l’ɔlɔlɔ. (Mako 13:10) Naka ɔsɔku mbediɔ, kete Ɔmɛnyi wa Jehowa weka lande Bible pombaka mɛnana l’omendji walɔmbɔla, ko omendji ɔsɔ mbayɔsa tɛdikɔ di’ekumanyi kɛmɔtshi ka lo Kɔmite k’Olimu ka l’Etshumanelo nde l’ekumanyi kekina pomana l’ombeki ɔsɔ wa Bible kâmɛ l’ombetsha ande. Sawo sɔ diayotomba oma lo dibuku dielɛwɔ ɔnɛ Organisés pour bien remplir notre ministère, lo lɛkɛ 98 la 99. Naka dikumanyi sɔ pende diambɛna ɔnɛ onto ɔsɔ l’oyoyo ekɔ lo mbetawɔ atshina a wetshelo wa lo Bible ndo amboyaɔtɔnganyiya la adjango wa Nzambi, kete vɔ wayowotɛ ɔnɛ wɛ ambokoka tomba l’olimu w’esambishelo.a Lam’ayondokimɔ alapɔlɔ w’oma l’olimu ande w’esambishelo, alapɔlɔ ɔsɔ wayodjama lo Fishi k’Opandjudi wa l’Etshumanelo kakasalema lo lokombo lande. L’etena kɛsɔ mbakoka onto ɔsɔ l’oyoyo kimɔka alapɔlɔ ande w’oma l’olimu w’esambishelo kâmɛ la miliyɔ kina y’anto ‘wasambisha dui dia Nzambi’ l’ɔngɛnɔngɛnɔ tshɛ. (Etsha 13:5) Vɔ pombaka mbewoya etshumanelo ɔnɛ nde aya opandjudi wahatalongola batismu.
7 Opandjudi wahatalongola batismu ekɔ l’ohomba w’ekimanyielo ka dikumanyi ndo k’Akristo wambotshunda wɔɔngɔ. Oko ɛnyɛlɔ, ɔnɔmbɔdi wa Wekelo wa Dibuku wa l’Etshumanelo wa l’olui wɔtɔnde pombaka mbidjaka yimba lo dikambo di’ohamelo ande wa lo nyuma. Opandjudi w’oyoyo mbeyaka mɛna wolo dia tɛkɛta dimɛna l’olimu w’esambishelo ka lo luudu la luudu woho wa nde kondja etombelo w’ɛlɔlɔ. (Etsha 20:20) Ɔnkɔnɛ, nde mɛtɛ ayetawɔ ekimanyielo, djekoleko ekimanyielo k’oma le ɔnɛ lakekaka lande Bible lo dibuku Ewo. Ekimanyielo k’oshika ka ngasɔ sunganaka efula, nɛ dia Yeso Kristo akalɔngɔsɔlaka ambeki ande lo dikambo di’olimu w’esambishelo.—Mako 6:7-13; Luka 10:1-22.
8 Naka sho nangaka kondja etombelo w’ɛlɔlɔ l’olimu aso, kete ekɔ ohomba sho tayalɔngɔsɔlaki dimɛna efula la ntondo. Ɔnkɔnɛ, apandjudi ahende kokaka tâhembi ntondo asawo walakanyema lo numɛlɔ k’Olimu Aso wa Diolelo watomba ngɔndɔ la ngɔndɔ. Lam’ayowomɛ olimu awɔ w’esambishelo, ɔnɛ lele l’ewo koleki efula pombaka mbɔsa soko dia ntondo kana asoko ahende. L’ɔkɔngɔ w’ɛtɛkɛta wa mbɔtwɛlɔ woludi la ngandji, apandjudi akɔ ahende kokaka sambisha onto lohomanyi lawɔ. Naka vɔ kamba kâmɛ l’olimu w’esambishelo l’edja ka mingu mɔtshi, kete vɔ mbeyaka ndjokondja anto w’eshika wakokawɔ kalolaka dia ndjowaenda ndo kânga ndjɔlɔmbɔla wekelo wa Bible wa la ngelo lo dibuku Ewo Katɔla Otsha lo Lɔsɛnɔ la Pondjo. Opandjudi wele l’ewo koleki efula pombaka nɔmbɔla wekelo lo tshanda mɔtshi ko l’ɔkɔngɔ diko, nde ayoyokimɔ ombeki ɔsɔ wa Bible l’anya w’opandjudi ɔsɔ w’oyoyo. Ande ɔlɔ wayoka apandjudi asɔ ahende naka ombeki wa Bible ambɛnya lowando lele lande lo dikambo di’ewo ka Nzambi lee!
9 Naka opandjudi wahatalongola batismu ekɔ lo tahame lo nyuma, kete nde mbeyaka ndjakimɔ le Nzambi lo dɔmbɛlɔ ndo monga la saki ka nongola batismu. (Ɛdika la Mako 1:9-11.) Nde pombaka mbewoya omendji walɔmbɔla etshumanelo saki kande ka nongola batismu, ko omendji ɔsɔ mbayɔsa tɛdikɔ dia dikumanyi vusola lande wembola wele lo biukubuku yelɛwɔ ɔnɛ Atshina a Wetshelo w’Oma lo Bible, lo lɛkɛ 11-63. Wembola ɛsɔ wokahanyemi lo tenyi nɛi kokaka shidiyama lo tena sato oma le dikumanyi sato diotshikitanyi, naka kokaka. Naka vɔ wambetawɔ ɔnɛ opandjudi akɔ ɔsɔ wahatalongola batismu ekɔ la ewo ka Bible lo yɛdikɔ yakoka ndo ekɔ la akoka akina, kete vɔ wayowotɛ ɔnɛ wɛ ambokoka nongola batismu. Naka nde amboyakimɔ le Nzambi ndo ambolongola batismu, kete nde ‘ambodjama djembetelo’ dia kondja panda.—Ezekiyele 9:4-6.
Woho Wakokaso Kotsha Ehomba wa Lânde
10 L’ɔkɔngɔ w’onto shidiya la mbeka Bible lo dibuku Ewo, ko nde ambolongola batismu, kema ohomba mbeka lande dibuku dia hende, ɛnyɛlɔ oko Unis dans le culte du seul vrai Dieu.b Mɛtɛ, onto lêke ka nongola batismu ayoyeka akambo efula lam’ayondɔlɔngɔsɔlaka nsanganya y’Akristo ndo lam’ayondɔtɔka lo nsanganya yakɔ esangɔ tshɛ. Ndo nto, nde ayofudia ewo kande lam’awotshutshuya mposa kande k’akambo wa mɛtɛ dia mbalaka ndo mbekaka abuku w’Akristo ndamɛ ndo dia kɛtshanyaka l’anyande ambetawudi akambo wa l’Afundelo. Ko kakɔna kayotosala naka ehomba wa lânde wambɛnama na?
11 Kânga Apolo, ɔnɛ ‘lakamanaka Afundelo fundo’ ndo laketshaka anto akambo wa Yeso dimɛna dimɛna, akakondja ɛlɔlɔ lam’akaye Piriskila nde la Akula, wanɛ waki l’ewo efula, dia ‘ndjowɔsa ko tômanya mboka ka Nzambi fundo.’ (Etsha 18:24-26; ɛdika la Etsha 19:1-7.) Ohɔsa dia ɔlɔngɔlɔngɔ kana osekaseka wêke ka nongola batismu ôsangoya dia kɛndɛka pami kɛmɔtshi kana omoto ɔmɔtshi dia vɔ tshukana. Okristo wele l’ewo k’efula mbeyaka mbokimanyiya dia nde tana alako w’endana l’awui asɔ lo abuku waki la Société Watch Tower. Oko ɛnyɛlɔ, alako w’ohomba w’endana l’awui asɔ tanemaka lo dibuku Les jeunes s’interrogent — Réponses pratiques, lo Etenyi 7.c Opandjudi wakekaka lande Bible kokaka sawola akambo asɔ nde l’onto ɔsɔ l’oyoyo, koko aha nde tatɛ mbeka lande Bible nto mbala la mbala.
12 Tɔ̂shi ɛnyɛlɔ kekina. Ondo atshukanyi wêke ka nongola batismu wekɔ l’ekakatanu w’endana la woho wa kitanyiyaka adjango wa Nzambi. Vɔ kokaka mɛnana l’ekumanyi kɛmɔtshi kayokoka mbɔsa akɔlɔ amɔtshi dia sawolaka lawɔ akambo wa l’Afundelo ndo kotolaka yambalo yawɔ oya l’alako watanema lo abuku waki la Société Watch Tower. Koko, ekumanyi kɛsɔ hahombe tatɛ wekelo wa Bible wa mbala la mbala nde l’atshukanyi asɔ ahende.
Naka Onto Lêke ka Nongola Batismu Ambotsha Pɛkato
13 Dikumanyi mbokoyaka Jehowa, Olami w’Ɛkɔkɔ wa Woke wata ate: “Dimi dime layuyala ulami w’ekoko ami, . . . Dimi layusula puta ka one wakahumo, ndu layokonoya one weli la kandji.” (Ezekiyele 34:15, 16; Efeso 5:1) Lo kanyi yakɔ yâmɛ mbakakeketsha ombeki Judɛ anyande dia vɔ monga la kɛtshi otsha le Akristo w’akitami wakadjaka tâmu kana wakasale pɛkato. (Jude 22, 23) Lam’ele tekɔ lo kongɛ efula lo yoho yasungana oma le Akristo wele la diewo, mɛtɛ onto lêke ka nongola batismu—ɔna ɔkɔkɔ wele kema la wolo—lambotsha pɛkato ko amboyatshumuya pombaka mbokama kɛtshi. (Luka 12:48; 15:1-7) Diɔ diakɔ diele dikumanyi, wanɛ ‘walomboya lo lokombo la Jehowa,’ kokɛka ɛkɔkɔ wa ngasɔ la ngandji tshɛ ndo mbangolaka la yimba ya wɔlamu.—2 Ekondo 19:6; Etsha 20:28, 29; Ngalatiya 6:1.d
14 Ohokanyiya dia opandjudi ɔmɔtshi wêke ka nongola batismu akikɔ ntondo la okakatanu w’endana l’edjwelo ka wanu ko akayɔkɔ nto l’ɔnwɛlɔ w’alɔfu wa tshambandeko etena kɛmɔtshi kana tena pende. Kana ondo nde akalɛmbia mbekelo k’edjedja ka nɔ̂ka mfɔka koko akayɔkɔ nto l’ohemba wa nɔ mfɔka lo yishɛshɛ mbala ɔtɔi kana mbala hiende. Kânga mbakalɔmbɛ ɔnangɛso ɔsɔ l’oyoyo Nzambi dia nde mbodimanyiyɛ, nde pombaka nyanga ekimanyielo oma le ekumanyi kɛmɔtshi woho w’aha pɛkato kɛsɔ ndjoyala oko tshondo ya mbekelo lo lonto lande. (Osambu 32:1-5; Jakoba 5:14, 15) Lam’atɛnde ekumanyi kɛmɔtshi pɛkato kande, ekumanyi kɛsɔ pombaka ndjatshutshuya dia mingola onto ɔsɔ l’oyoyo lo yoho yoludi la kɛtshi. (Osambu 130:3) Alako wa l’Afundelo mbeyaka koka dia mbokimanyiya dia nde nɔngɔsɔlɛ ekolo ande mboka yosembwe. (Heberu 12:12, 13) Ekumanyi kɛsɔ pombaka kɛtshanyaka dikambo diakɔ sɔ nde l’omendji walɔmbɔla etshumanelo dia vɔ mbeya ekimanyielo kekina kahombawɔ mbisha onto akɔ.
15 Lo tena dimɔtshi, akambo efula mbeyaka monga ohomba. Naka lokumu la pɛkato kakɔ lakekɔnɛ ndo tɔ kekɔ wâle le lemba l’ɛkɔkɔ kana ekakatanu ekina tomba oma lɔkɔ, kete olui wa dikumanyi wayɔsɔnɔla dikumanyi pende dia vɔ menda dikambo sɔ. Naka dikamanyu sɔ wambɛna ɔnɛ dikambo sɔ diekɔ woke efula ndo ekɔ ohomba wa ditɔla lo kɔmite ka kilombo, kete vɔ wayotɛ olui wa dikumanyi dikambo sɔ. Ko olui wa dikumanyi wayɔsɔnɔla dikumanyi dimɔtshi oko kɔmite ka kilombo dia vɔ kimanyiya ɔnɛ losadi pɛkato. Vɔ pombaka ndjatshutshuya dia mingola onto akɔ ɔsɔ lo ndjela kɛnɛ kata Afundelo. Naka nde ambokadimola otema oma lo weolo wa la ngandji wadja kɔmite ka kilombo, kete vɔ kokaka mbɔsa tɛdikɔ dia kana ekɔ ɔlɔlɔ di’aha nde mbudɛ lo lɔyɛnga dia sala asawo amɔtshi wonya wasalema losanganya lo Mbalasa ka Diolelo kana nde kokaka mbisha kɔmatɛrɛ lo nsanganya.
16 Naka ɔnɛ losadi pɛkato ambokadimola otema, ekumanyi kɛmɔtshi kana dikumanyi pende dia l’olui wa kɔmite ka kilombo kokaka ndjalɔngɔsɔla dia ntshɔka dia towenda dia keketsha mbetawɔ kande ndo dia shikikadia lowando lele lande lo dikambo di’adjango wa losembwe waki Nzambi. Ɔm’ɔmɔ a l’atei awɔ pombaka tombaka lande l’olimu w’eshambishelo esangɔ l’esangɔ. Vɔ mbeyaka sawolaka lande akambo w’oma l’Afundelo, ondo oma l’ekimanyielo k’asawo wasungana wakatombe lo Tshoto y’Etangelo la Réveillez-vous!, koko aha mumɛ lande wekelo wa Bible wa mbala la mbala. Naka ɔnɛ losadi pɛkato ayokondja ekokelo kangasɔ koludi la ngandji, kete nde ayokeketala dia nshika tomamba lo wɛɔdu wa demba lo nshi yayaye.
17 Mɛtɛ, woho wêke onto ka nongola batismu kema yɛkɛ nɛndɛ ya nde salaka pɛkato aha la ndjatshumuya. (Heberu 10:26, 27; Jude 4) Naka onto ɔmɔtshi lakalongola batismu ekɔ lo ntsha pɛkato ko nde hayatshumuya ndo hatshike sala pɛkato, kete nde pombaka mbitshanyema oma l’atei w’etshumanelo. (1 Koreto 5:6, 11-13; 2 Tesalonika 2:11, 12; 2 Joani 9-11) Naka dikambo sɔ diambɛnama ohomba, kete olui wa dikumanyi wayɔsɔnɔla kɔmite kɛmɔtshi ka kilombo. Naka wambowotshanya oma l’atei w’etshumanelo, kete diewoyelo nɛ dia lo tshena pe pombaka mbewoyama: “kapanda shishadjɛndɛ aya kema ɔnangɛso kana kadiyɛso nto.”e
Tâkimanyiya dia Vɔ ‘Samanya Otsha lo Ditshelo di’Etshundju w’Anto’
18 Efula k’ekambi wa Nzambi wayotshikala l’atei wa lemba l’ɛkɔkɔ. Diɛsɛ ko, ndo ɔm’ɔmɔ la l’atei aso ayoyala l’akoka wa ndeka sukana la Shɛso lele l’olongo nɛ dia nshi tshɛ nde ayokokaka mbeka akambo efula w’endana lande ndo la lolango lande. (Undaki 3:11; Jakoba 4:8) Mɛtɛ, nunu di’anto diakalongola batismu lo Pɛntɛkɔsta ka l’ɔnɔnyi 33 T.D. wakahombe mbeka akambo efula. (Etsha 2:5, 37-41; 4:4) Ɔsɔku mbakasale Ase Wedja, wanɛ waki kombeyaka Afundelo ntondo. Oko ɛnyɛlɔ, dikambo sɔ diakɛnama le wanɛ wakalongola batismu l’ɔkɔngɔ wa dako diakasha Paulo l’Areɔpango, l’osomba w’Atɛna. (Etsha 17:33, 34) Ndo ɛlɔ kɛnɛ, anto wêke ka nongola batismu wekɔ l’akambo efula wahombawɔ mbeka ndo wekɔ l’ohomba w’etena l’ekimanyielo dia vɔ keketsha tɛdikɔ tawɔ ta tetemala la sala kɛnɛ kele ɔlɔlɔ lo asho wa Nzambi.—Ngalatiya 6:9; 2 Tesalonika 3:13.
19 Ɔnɔnyi tshɛ, nunu di’anto nongolaka batismu ndo vɔ wekɔ l’ohomba w’ekimanyielo dia vɔ ‘samanya otsha lo ditshelo di’etshundju w’anto.’ (Heberu 6:1-3) Oma l’ɛtɛkɛta ayɛ, oma l’etsha ayɛ, ndo oma l’ekimanyielo k’oshika kawashayɛ l’olimu w’esambishelo, wɛ kokaka kimanyiya anto amɔtshi dia vɔ ndɔta lonto l’oyoyo ndo dia vɔ ‘tetemala kɛndakɛnda lo mɛtɛ.’ (3 Joani 4; Kolosai 3:9, 10) Naka wɛ ekɔ opandjudi wele l’ewo, kete dikumanyi mbeyaka kelɛ dia wɛ ndjokimanyiya onyayɛ ombetawudi lêke oyoyo l’olimu w’esambishelo kana dia ndjosawola lande akambo amɔtshi wa l’Afundelo l’edja ka mingu mɔtshi woho wa keketsha mbetawɔ kande le Nzambi, lowando lande lo nsanganya y’Akristo, ndo l’akambo akina efula. Diɔtɔnganelo diele lam’asa elami vɔ la lemba l’ɛkɔkɔ diekɔ oko ombutshi wa pami walaka anande ndo oko waale wa omoto wasɛngasɛnga anande. (1 Tesalonika 2:7, 8, 11) Koko, dikumanyi dimɔtshi to la ekambi w’olimu hawokoke kotsha kɛnɛ tshɛ kahombama l’atei w’etshumanelo. Sho tshɛ tekɔ oko ase nkumbo wakimanyiyana lam’asawɔ. Ɔm’ɔmɔ a l’atei aso kokaka sala dikambo dimɔtshi dia kimanyiya anyaso atɛmɔdi. Wɛmɛ kokaka mbisha onto ɔmɔtshi ekeketshelo, samba onto lele l’ekiyanu, ndo sukɛ kanga wɔdu.—1 Tesalonika 5:14, 15.
20 Anto wekɔ l’ohomba w’ewo ka Nzambi, ndo oko weyɛ Ɔmɛnyi wa Jehowa, wɛ kokaka kidianganya l’ɔngɛnɔngɛnɔ tshɛ. Ɛkɔkɔ wa Jehowa wekɔ l’ohomba w’ekokelo koludi la ngandji, ndo wɛ kokaka ndjâla l’ɔkɛndɛ woludi la ngandji lo mbakimanyiya dia vɔ kondja ekokelo kakɔ kɛsɔ. Sho nɔmbaka dia Jehowa tshɔkɔla olimu wawokambɛyɛ, ndo dia nde kɔtshɔkɔla l’ɔtɛ wa weolo wadjayɛ oma ka tshina di’otema dia kimanyiya ɛkɔkɔ waleshande.
ANTO efula mbutaka woho wele asawo amɔtshi wa lo Tshoto y’Etangelo kana wa lo Réveillez-vous! wakakeketsha diokanelo diasawɔ la Jehowa. Omoto ɔmɔtshi akate ate: “L’ɔkɔngɔ wa dimi mbala sawo nɛ, lakayaoke nte: Jehowa ekɔ lale mi la nkudu kande tshɛ ndo la woke woke ande. Lakɛnyi nte: nde ekɔ onto la shikaa.” Mukanda okina akate ɔnɛ: “Etema aso la timba taso tambotshikitana heyama lo woho wakatɔsaka Jehowa ko taya bu nto weoho w’anto wakiso ntondo. Ekɔ wate kana onto ɔmɔtshi amboyosola talatalaka yaso ya lo asho, ko kakianɛ, tôkoka mɛna oseka ɛngɔ tshɛ dimɛna dimɛna.”
Amɔtshi fundaka mikanda dia mbuta woho wâkimanyiya periodikɛ dia vɔ kandola ekakatanu ɛmɔtshi wele lawɔ, ko ndjâshikikɛka ndo ɔnɛ Jehowa ndjashaka lo dikambo diawɔ. Ombadi ɔmɔtshi wa omoto akafunde ate: “Losaka efula lo woho wambonyotosha diaaso nto dia sho mɛna nganɛ wakokɛ Jehowa anto ande ndo wawaokande ngandji k’efula.” Lo wodja wa Japon, omoto ɔmɔtshi lakavusha ɔna akate ɔnkɔnɛ lo kɛnɛ k’endana l’asawo wa lo Réveillez-vous! watɛkɛta dikambo sɔ: “Lam’akamâle asawo akɔ, lakɛnyi nte: Nzambi ekɔ la kɛtshi ka mamba, ko dimi lakalele woho w’anyanya. Lakakitsha asawo asɔ lo dihole diakokami mbâla esadi eto wonya tshɛ wemi l’otshutshumalo ndo wayaokami oko opoko.” Omoto okina lakavusha lakinde akafunde ate: “Asawo wa lo Tshoto y’Etangelo, wa lo Réveillez-vous! ndo wa lo biukubuku “Quand la mort frappe un être aimé,” wakambisha wolo wakamahombaka dia dimi mbikikɛ tena diami dia lonyangu.”
Afundelo w’Ekila mbele kiɔkɔ ya ntondo y’ekeketshelo. (Romo 15:4) Tshoto y’Etangelo mamemaka Bible oko ɔnɔmbɔdi ayɔ, woho akɔ wâmɛ mbele ndo periodikɛ ka onyatɔ kelɛwɔ ɔnɛ: Réveillez-vous! Diɔ diakɔ diasha tojurunalɛ tɔnɛ esambelo ndo ekeketshelo le ambadi atɔ.
[Footnotes]
a Naka nde ambotakula nna sɔ, kete onto ɔsɔ l’oyoyo kokaka kondja kɔpi kɛmɔtshi ka dibuku Organisés pour bien remplir notre ministère.
b Dibuku diakatondjama oma le Watchtower Bible and Tract Society of New York, Inc.
c Dibuku diakatondjama oma le Watchtower Bible and Tract Society of New York, Inc.
d Ekongelo ka ngasɔ lo dikambo dia wanɛ wahatalongola batismu kakalembetshiyama lo sawo diele l’ɔtɛ a dui w’ɔnɛ: “Tokimanyiya Anyaso dia Vɔ Tɛmɔla Nzambi,” sawo diakatombe lo Tshoto y’Etangelo ya Tshaka Fudu 15, 1988, lɛkɛ 15-20 (lo Falase).
e Naka wambɔsa yɛdikɔ ya mbotshanya oma l’atei w’etshumanelo ko nde ambɔlɔmba dia mbɛviya kɔmite kekina, kete vɔ pombaka tokemɛ diewoyelo sɔ polo ndo lam’ayoyeyama etombelo. Enda lo lɛkɛ 146-7 la lo dibuku Organisés pour bien remplir notre ministère, dibuku diakatondjama oma le Watchtower Bible and Tract Society of New York, Inc.
[Study Questions]
1. Woho akɔna wɔ̂sa Jehowa ekambi ande?
2. Lɔsɛnɔ la woho akɔna lele l’anto wa Nzambi?
3. Ngande wele dionga di’Akristo wakasɔnama oko dikumanyi otsha le lemba l’ɛkɔkɔ wa Nzambi?
4. Woho akɔna wa diɔtɔnganelo diakeyamaka lam’asa Charles T. Russell nde la lemba l’ɛkɔkɔ?
5. Lande na kahomba anto w’eyoyo nyanga dia mbeya dikumanyi diakasɔnama l’atei w’etshumanelo k’Akristo?
6. Kakɔna kasalema naka ombeki wa Bible ambolanga ndjâla opandjudi wa Diolelo?
7, 8. Woho akɔna wakoka opandjudi wahatalongola batismu kondja ekimanyielo kele lande ohomba l’olimu w’esambishelo?
9. Wanya akɔna wahomba takɔma naka opandjudi ɔmɔtshi ambolanga nongola batismu?
10. Woho akɔna wayokoka onto pamia ewo kande k’Afundelo l’ɔkɔngɔ wa nde shidiya la mbeka dibuku Ewo ndo l’ɔkɔngɔ wa nde nongola batismu?
11. (a) Woho akɔna wakakimanyiyama Apolo oma le Piriskila la Akula? (b) Ekimanyielo kakɔna kakokawɔ mbisha ɔlɔngɔlɔngɔ kana osekaseka wêke ka nongola batismu ko osangoya dia tshukana?
12. Ekimanyielo kakɔna kakokawɔ mbisha atshukanyi wêke ka nongola batismu ko wekɔ l’ekakatanu lo diwala?
13. Lande na kahomba dikumanyi dia l’etshumanelo monga la kɛtshi otsha le onto lêke ka nongola batismu ko ambosala pɛkato koko ekɔ la ndjatshumumuya?
14. Kakɔna kahomba salema naka opandjudi wêke ka nongola batismu ambosala pɛkato ka woke, ndo woho akɔna wakokande kondja ekimanyielo?
15. Lo tena dimɔtshi, kakɔna kahomba salema naka onto lêke ka nongola batismu ambosala pɛkato?
16. Kakɔna kakoka dikumanyi sala dia vɔ kimanyiya ɔnɛ losadi pɛkato?
17. Tɛdikɔ takɔna tɔ̂sama naka onto lambolongolaka batismu ambosala pɛkato ko hayatshumuya ndo hatshike sala pɛkato na?
18. Lande na kakokaso ndjashikikɛ ɔnɛ Akristo wêke ka nongola batismu l’akina wayongaka nshi tshɛ l’akambo efula wahombawɔ mbeka lo dikambo dia Jehowa ndo dia lolango lande?
19. Woho akɔna wakokaso kimanyiyaka wanɛ walongola batismu dia vɔ ‘samanya otsha lo ditshelo di’etshundju w’anto’?
20. Kakɔna kakokayɛ sala dia dianganya ewo ka Nzambi ndo dia mbisha ɛkɔkɔ waleshama oma le Jehowa ekokelo koludi la ngandji?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 10]
[Diombwɛlo di’osato wa lo lɛkɛ 10]
Charles T. Russell akeyamaka ɔlɔlɔ oko olami w’ɛkɔkɔ woludi la ngandji
[Caption on page 12]
[Diombwɛlo di’osato wa lo lɛkɛ 12]
Elami w’ɛkɔkɔ wele la kɛtshi kokɛka ɛkɔkɔ wa Nzambi la ngandji tshɛ
[Caption on page 13]
Okonde Ayôkadimola Na?
◻ Woho akɔna wɔ̂sa Jehowa ɛkɔkɔ ande?
◻ Kakɔna kasalema naka anto w’eyoyo wôlanga sambisha?
◻ Woho akɔna wakoka ambetawudi kimanyiya anyawɔ w’eyoyo wele l’ehomba wa lânde?
◻ Ekimanyielo kakɔna kakoka dikumanyi mbisha wanɛ wasala pɛkato ko wekɔ la ndjatshumuya?
◻ Woho akɔna wakokayɛ kimanyiya onto lêke ka nongola batismu dia nde ‘samanya otsha lo ditshelo di’etshundju w’anto’?
[Caption on page 14]
[Box on page 14]
Ekeketshelo Le Wanɛ Wele L’ohomba