Nzambi Kokanɛka

MARY, Okristo ɔmɔtshi wa omoto akasowe efula lo lɔsɛnɔ lande l’ekomelo k’ɔnɔnyi ande wa 40. Lâsɔ ko ambeta ɛnɔnyi ndekana dikumi oma lam’akawadiake diwala l’ɔtɛ wa loseka l’omɛnde. Oma lâsɔ, Mary akatatɛ sala tshɛ dia kotsha ɔkɛndɛ ande oko ombutshi waha l’omi lo dikambo di’anande anɛi. Koko nde aki paka ndamɛ, ko tena dimɔtshi woho wakinde ɔmpɔkɔ akɛnamaka oko hakoke mbikikɛ. Mary akayambolaka ate: ‘Onde lâsɔ dikambo nɛ nembetshiyaka ɔnɛ Nzambi hakanɛ kana hakanɛ anami waha la shɛwɔ?’

Oyadi wɛ ambotanemaka la dikambo dia ngasɔ kana kema, mɛtɛ wɛ kokaka monga la Mary kanyi yâmɛ. Sho tshɛ tambokikɛka ekakatanu wa wolo, ndo ondo takayambola etena ndo woho wakayotokokɛ Jehowa. Ɛmɔtshi a l’atei w’ekakatanu ɛsɔ wekɔ lo ndja oma lo kɔlamelo yaso l’ɛlɛmbɛ wa Nzambi. (Mateu 10:​16-18; Etsha 5:29) Ekina wekɔ etombelo w’oma lo woho weso anto w’ekokele wasɛna l’andja ɔnɛ walɔmbwama oma le Satana. (1 Joani 5:19) Ɔpɔstɔlɔ Paulo akafunde ate: “Ditongami tshɛ diekɔ lo tetemala la kuma akumu kâmɛ ndo la mboka kandji.”​—⁠Rɔmɔ 8:​22, NW.

Koko, dikambo di’ɔnɛ wɛ ekɔ lo tanema l’ehemba a wolo hɛnya ɔnɛ Jehowa ambokokalɛ kana hakokanɛ. Woho akɔna wokokiyɛ shikikɛ dikambo sɔ? Ɛ̂nya ɔnɛ Nzambi kokanɛka?

Ɛnyɛlɔ Kɛmɔtshi k’Edjedja

Bible mɛnyaka hwe woho wakokɛ Jehowa anto, l’onto ndo l’onto. Tɔshi ɛnyɛlɔ kaki Davidi. Jehowa akakotola yambalo le dikɛnda sɔ di’olami w’ɛkɔkɔ, ko nde akawɛnyi “untu lufanyi la ndi l’utema.” (1 Samuele 13:14) L’ɔkɔngɔ diko, lam’akayolɛka Davidi oko nkumekanga, Jehowa akôlake ate: “Dimi layonga la yɛ l’ahole tshɛ wayoyotshɔ.”​—⁠2 Samuɛlɛ 7:​9, NW.

Onde lâsɔ mɛnyaka ɔnɛ Davidi akasɛnɛ lɔsɛnɔ la “wɔ̂yi” aha pomane l’okakatanu? Kema, Davidi akatanema l’ekakatanu oyadi la ntondo kana lo nshi yakandolɛka. Ɛnɔnyi efula la ntondo ka nde monga nkumekanga, wakatawotshanyaka oma le Nkumekanga Saulo, ondjakanyi. L’etena kɛsɔ ka lɔsɛnɔ lande, Davidi akafunde ate: “Anima ami wekɔ l’atei wa dimbwe . . . [eelo,] ana w’anto, wele wanyu oko akɔnga la akuwa.”​—⁠Osambu 57:​4, NW.

Davidi akɛnyi dia mɛtɛ Jehowa akôkokɛka ndamɛ l’edja tshɛ kakaviya mpokoso kɛso. Nde akate lo dɔmbɛlɔ dimɔtshi le Jehowa ate: “We atalaka kendo yami.” Mɛtɛ, le Davidi aki wate kana Jehowa akafundaka ohemba tshɛ. Ko Davidi akayokotsha ate: “Udji asoi ami l’olondo aye [w’ekoho, NW]. Efula kawo kunfundama lu buku diaye uka?”a (Osambu 56:⁠8) Lo wɛɛla ɔsɔ, Davidi akɛnya dia Jehowa kombeyaka paka dikambo sɔ nto koko akeyaka ndo woho wayodiôkashimuya.

Otsha l’ekomelo ka lɔsɛnɔ lande, Davidi akakoke funda akambo wakandɛnyi ndamɛ ate: “[Jehowa, NW] atuluwanyaka lokendo l’untu ololo, atongenangenaka mbuka kandi. Kuyanga ndi ayoko, ndi hakomama wulu, ne dia [Jehowa, NW] atûkimelaka lu lunya.” (Osambu 37:​23, 24) Ndo wɛ lawɔ kokaka ndjashikikɛ ɔnɛ koyanga ehemba wekɔ lo tetemala ndo talekoyaka, Jehowa mbeyaka ndo ngɛnangɛnaka woho wakikɛyɛ. Paulo akafunde ate: “[Nzambi, NW] kema kolo, dia ndi mbuhela ulimu anyu la ngandji kakanyenya antu lu lukumbu landi, ndu uku atshanyu edja ndu elo.”​—⁠Heberu 6:⁠10.

Ndo nto, Jehowa kokaka kosalɛ ɔlɔlɔ lo kosha wolo wa wɛ mbikikɛ oyadi wekamu akɔna tshɛ wele lo mboka kayɛ. Davidi akafunde ate: “Asui w’untu ololo watuyalaka efula, keli [Jehowa, NW] atûtshungulaka uma loko nshi tshe.” (Osambu 34:19) Mɛtɛ, Bible totɛka ɔnɛ Jehowa “atukaka ashu lu kete tshe, dia nsukela waku weli la etema tshe le ndi.”​—⁠2 Ekondo 16:⁠9.

Jehowa Ambokokotola

Djembetelo kina yɛnya okokelo wa Jehowa ndamɛ tanemaka lo ɛtɛkɛta wa Yeso. Nde akate ate: “Nduku untu leya ndja le mi, tshikima Papa lakantumi kûkutudi.” (Joani 6:44) Mɛtɛ, Jehowa kimanyiyaka onto l’onto dia nde kondja ɛlɔlɔ oma l’olambo wa Kristo. Woho akɔna? Lo yɛdikɔ ya woke, ekɔ lo tshimbo ya olimu w’esambishelo ka Diolelo. Mɛtɛ, olimu ɔsɔ kambemaka oko “omenyi le wedja tshe,” koko vɔ tonandaka onto l’onto. Lam’ele wɛ akoke ndo aketawɔ losango la lokumu l’ɔlɔlɔ, dikambo sɔ mɛnyaka ɔnɛ Jehowa ndamɛ akayasha le yɛ.​—⁠Mateu 24:⁠14.

Oma lo tshimbo ya nyuma k’ekila, Jehowa kotolaka onto l’onto oya le Ɔnande ndo oya l’elongamelo ka lɔsɛnɔ la pondjo. Kɛsɔ tshɛ tshutshuyaka onto l’onto dia nde kimɛ ndo kamba la mɛtɛ ya lo nyuma kânga mbeso ekokele ndo wɛɔdu. Mɛtɛ, ndoko onto lokoki shihodia asangwelo wa Nzambi aha l’ekimanyielo ka nyuma ka Nzambi. (1 Koreto 2:​11, 12) Oko akafundɛ Paulo Ase Tɛsalɔnika ate: “aha antu tshe mbeli la mbetawo.” (2 Tesalonika 3:⁠2) Jehowa tomaka nyuma kande paka le wanɛ wɛnya lolango la kotɔma le nde.

Jehowa kotolaka anto nɛ dia nde mbalangaka l’onto ndo l’onto ndo nde nangaka dia vɔ kondja panda. Ande djembetelo y’oshika yɛnya okokelo wa Nzambi ndamɛ lee! Yeso akate ate: “Shenyu leli l’ulungu halangi nduku kiendakenda mvo.” (Mateu 18:14) Mɛtɛ, lo washo wa Nzambi onto tshɛ ekɔ ohomba oko otshikitanyiwɔ onto l’onto. Diɔ diakɔ diakafunde Paulo ate: “[Nde ayofuta] untu l’untu uku etsha andi.” (Romo 2:⁠6) Ndo ɔpɔstɔlɔ Petero akate ate: “[Nzambi, NW] kema la shonodi y’antu. Keli ndi mbetawoka wa lu wedja tshe, wane [onto l’onto] wawuka woma la watsha akambu w’ololo.”​—⁠Etsha 10:​34, 35.

Ahindo wa Yeso

Woho wayasha Nzambi ndamɛ le anto akɛnyama lo yoho ya diambo l’ahindo wakasale Ɔnande, Yeso. Ɛkɔnwɛlɔ ɛsɔ wakasalemaka la kɛtshi ka mamba. (Mako 1:​40, 41) Yeso “heyi ntsha nduku dikambu ndame, keli ndi atutshaka uku wenandi Shi atsha,” kɛtshi kande mɛnyaka ngandji ka Jehowa le onto tshɛ lele okambi ande.​—⁠Joani 5:⁠19.

Tênde ɔkɔndɔ wa dihindo dimɔtshi diakasale Yeso, wakakɔndɔma lo Mako 7:​31-37. Lanɛ Yeso akakɔnɔla pami kɛmɔtshi kaki ehoke ndo dikokoma. Bible mbutaka ɔnɛ: Nde “akawose [pami kakɔ], akamo la ndi uma l’atei ului w’antu.” Ko, “akâlela l’ulungu; akasikuma; akawutela ati: “Efefata,” nkadimula ati: Udihwami.” (Sho mbɛnganyisha alɛta ango.)

Lande na kakamɔ Yeso l’onto ɔsɔ oma la le olui w’anto? Mɛtɛ, mɛnamaka di’oko kanga lohoke, ɔnɛ lele l’okakatanu lo tɛkɛta mbeyaka ndjaoka-etitadi lo asho w’anto. Yeso akɛnyi ohokosanu w’onto akɔ, diɔ diakɔ diakandɛnyi dimɛna tɔ̂kɔnɔla l’omamu. Ombeyi wa Bible ɔmɔtshi akɛnyi ate: “Ɔkɔndɔ akɔ w’otondo tɛnyaka hwe dia Yeso kɔmbɔsaka onto akɔ paka oko ose hemɔ oto koko nde akawɔsaka oko onto la lânde. Pami kakɔ aki l’ohomba wa lânde ndo dikambo dia lânde, ndo la kɛtshi tshɛ Yeso akayadje lo dihole diande lo mboka tokanyi tande ndo lo yoho y’ɔnɛ nde ayokoka shihodia.”

Ɔkɔndɔ ɔsɔ mɛnyaka ɔnɛ Yeso akayashaka le onto l’onto. Wɛ kokaka ndjashikikɛ ɔnɛ nde ndjashaka le yɛ. Mɛtɛ, nyɔi kande k’olambo ekɔ djembetelo mɔtshi ya ngandji kokande anto wa l’andja w’otondo wakandatshungola. Wɛ mbeyaka mbetɛ dikambo sɔ oko diayɛ wɛmɛ, oko akasale Paulo, lakafunde ate: “On’a [Nzambi, NW] . . . lakanangi, ndu lakayakimo dikambu diami.” (Ngalatiya 2:​20, sho mbɛnganyisha alɛta ango) Ndo Yeso akate ate: ‘Ɔnɛ lakawɛnyi, akɛnyi She,’ sho kokaka ndjashikikɛ ɔnɛ Jehowa ndjashaka le ekambi ande tshɛ woho akɔ wâmɛ.​—⁠Joani 14:⁠9.

Jehowa Aya Ofutshi

Monga l’ewo ka Nzambi nɔmbaka dia mbeya dionga tshɛ dia lonto lande oko wɛnyamidiɔ lo Bible. Lokombo la mɛtɛ mɛtɛ la Jehowa lalembetshiya ɔnɛ “Nde Atosalaka,” mɛnyaka dia Jehowa kokaka ndjâla woho tshɛ walangande dia kotsha lolango lande. L’ɔkɔndɔ w’otondo, nde akɔsɛ ɛkɛndɛ efula wotshikitanyi, mbidja ndo wɔnɛ w’Otungi, Shɛso, Nkumadiɔndjɔ Omboledi, Olami w’Ekɔkɔ, Jehowa kanga lolembelembe, Lôka alɔmbɛlɔ, Shushi, Ombetsha wa Woke, ndo Otshungodi.b

Dia sho shihodia kitshimudi ya lokombo la Nzambi, sho pombaka mbeya Jehowa nto oko Ofutshi. Paulo akafunde ate: “Untu laha la mbetawo, heyi mbôngenyangenya. Ne dia dieli la one layuya le [Nzambi, NW] mbetawo ati: Ndi eko, la ndi keli ufutshi a wane watûyangaka.”​—⁠Heberu 11:⁠6.

Jehowa akalake wanɛ wasɔna ɛlɔ kɛnɛ dia mbokambɛ l’otema ɔtɔi lɔsɛnɔ la pondjo lo paradiso ka la nkɛtɛ. Kema dikambo dia lokaki dia mendɛ lo ekotshamelo ka daka sɔ dia woke, kânga otako dia kanyiya woho wa lɔsɛnɔ layoyɔsɛnaka lɛkɔ. Mɔsɛ “akalongameka difutu diayayi.” (Heberu 11:26) Paulo lawɔ akakeketsha ekotshamelo ka daka dia Nzambi le Akristo w’akitami wa kɔlamelo. Nde akafunde ate: “Dimi lambusamanya utsha lu dihuli diatamatshu, dia nungula difutu dia leta l’uma l’ulungu, lakambeti [Nzambi, NW] le Kristu Jesu.”​—⁠Filipi 3:⁠14.

Ndo wɛ lawɔ mbeyaka mendɛ difuto diakalake Jehowa wanɛ wakikɛ. Naka wɛ kondja ewo ka Nzambi ndo monga l’etete l’olimu ande, kete wɛ kokaka ndjaɛna oko amboshila la kondja difuto diakɔ. Ɔnkɔnɛ, kanaka yimba lushi la lushi l’ɛtshɔkɔ wambokombɛ Jehowa. Mary, ɔnɛ lakatatɛkɛtshi diande la ntondo, akadje weolo wa lânde dia sala dikambo sɔ. Nde akate ate: “Aki mbala ka ntondo lo lɔsɛnɔ lami ka dimi mbetawɔ ɔnɛ Yeso akakimɔ olambo lo dikambo diami. Lakatatɛ la kanyiya ɔnɛ Jehowa kanɛkami oko onto. Dimi laki Okristo edja kolekanyi ɛnɔnyi 20, koko atonge edja komemi la mbetawɔ dikambo sɔ.”

Oma lo wekelo l’ekanelo ka yimba k’oma ka tshina di’otema lo kɛnɛ k’endana la Bible, Mary, kâmɛ la miliyɔ y’anto akina, wamboyeya ɔnɛ Jehowa kanɛka anto ande aha paka l’olui koko ndo l’onto l’onto. Ɔpɔstɔlɔ Petero aketawɔ dikambo sɔ, diɔ diakɔ diakandafunde ate: “Nyukitsha ukananu anyu tshe le [Nzambi], ne dia ndi atunyukanelaka.” (1 Petero 5:⁠7) Mɛtɛ, Nzambi kokanɛka!

DJEMBETELO y’oshika yɛnya ɔnɛ Nzambi ndjashaka le ɔm’ɔmɔ a l’atei aso tanemaka lo Bible lo Joani 5:​28, 29: “Etena [kayokoka, NW], kayuka wane weli lu waumbu [wôhɔma, NW] diui diandi [dia Yeso], ku vo wayutumba.”

Dikambo dia diambo ko, tshɛkɛta ya lo Grɛkɛ mne·meiʹon (diombo diôhɔma) kambemaka olimu lanɛ lo dihole dia taʹphos (diombo). Tshɛkɛta taʹphos mbɔtɔnɛka paka la kanyi y’okundelo tsho. Koko, mne·meiʹon nangaka tɛkɛta dikambo dia mbohɔ ɔkɔndɔ kana akambo wakatshaka onto lakavu.

Omalɔkɔ, ohokanyiya kɛnɛ kayohomba Jehowa Nzambi ntsha dia mbolola anto. Dia kaloya onto ɔmɔtshi lo lɔsɛnɔ, nde pombaka mbeya kiambokambo tshɛ y’endana l’onto akɔ​—⁠kâmɛ ndo waonga ande wa lotɔ ndo akoka ande tshɛ wa lo yimba. Paka l’ɔkɔngɔ w’awui asɔ mbakoka onto ɔsɔ ndjolwama tshondo tsho oko wakinde ntondo.

Mɛtɛ, ɔsɔ ekɔ dui diahakoke tshama lo ndjela tokanyi t’anto, koko ‘le Nzambi, akambo tshɛ kokaka tshama.’ (Mako 10:27) Nde kokaka kânga shikikɛ kɛnɛ kele l’otema w’onto. Oyadi kânga onto ambovɔkaka l’edja ka deko la deko, akambo womba Nzambi lo yimba yande lo dikambo di’onto ɔsɔ hawokoke shishɔ; hawokoke mbohamɛ pondjo. (Jobo 14:​13-15) Ɔnkɔnɛ, lam’akandatɛkɛtaka dikambo di’Abarahama, Isaka la Jakɔbɔ, Yeso akakoke mbuta koyanga deko ko deko l’ɔkɔngɔ wa vɔ mvɔ ate: Jehowa ‘ekɔ Nzambi, aha ka wanɛ wambovɔ, koko ka wanɛ wasɛna, nɛ dia le nde, vɔ tshɛ wekɔ la lɔsɛnɔ.’​—⁠Luka 20:⁠38.

Ɔnkɔnɛ, tokambokambo tshɛ takatshaka anto miliyara wakavu tekɔ lo yimba ya Jehowa Nzambi. Ande djembetelo ya mamba yɛnya ɔnɛ Nzambi tokanɛka sho tshɛ, onto l’onto lo woho ande lee!

[Footnotes]

[Caption]

[Notɛ ka l’ɛsɛ ka dikatshi]

[Caption on page 7]

[Diombwɛlo di’osato wa lo lɛkɛ 7]

Yeso akakotolaka yambalo yande le wanɛ wakandatakɔnɔlaka

[Caption on page 6]

[Box on page 6]

Eolwelo​—⁠djembetelo Yɛnya Ɔnɛ Nzambi Tokanɛka