“Nyuyali Ekila Lu Ditshelu Dianyu Tshe”
“One lakanyeti, eko ekila, okone ndu nyu nyuyali ekila lu ditshelu dianyu tshe. Ne dia ambufundama ati: [Nyu pombaka monga, “NW”] ekila, ne dia dimi leko ekila.”—1 PETERO 1:15, 16.
BONDE kakasha ɔpɔstɔlɔ Petero anyande Akristo dako sɔ na? Nɛ dia nde akɛnaka ɔnɛ ekɔ ohomba di’Okristo tshɛ nama tokanyi tande la ditshelo diande dia diɔ mbɔtɔnganɛka nshi tshɛ la eongelo k’ekila kaki Jehowa. Diɔ diakɔ diakandafunde ɛtɛkɛta ɛnɛ la ntondo ka dako sɔ: ‘Nyɔhɛtshahɛtshake timba tanyu dia munda olimu, nyoyalamake ɔlɔlɔ . . . Oko ana w’okitanyiya, takonyoyela nsaki yakinyu layɔ ntondo lam’akinyu nyateye akambo.’—1 Petero 1:13, 14.
2 Nsaki yakiso layɔ ntondo yaki mindo, yɔ komonga ekila. Lande na na? Nɛ dia efula l’atei aso takayelaka awui w’andja ɔnɛ la ntondo ka sho ndjetawɔ mɛtɛ k’Akristo. Petero akeyaka dui sɔ lam’akandafunde lo yoho yokɛma hwe ate: “Nshi yakanyayelaka saki y’asi wedja yakakuki, lam’akanyakendakendaka lu akambu wa kolo, la songu ya munanyi, la dinwelo dia wanu, la engenongeno wa kolo, la mindju yakanyadjoka wanu, la ditemwelo dia dikishi dia wononyi.” Lo mɛtɛ, Petero koshila nkombo ya ditshelo dia mindo diasalema l’andja wa nshi nyɛ, nɛ dia diɔ kombeyamaka l’etena kɛsɔ.—1 Petero 4:3, 4.
3 Onde wɛ akalembete ɔnɛ nsaki shɔ ngɛnyangɛnyaka demba, awoki, la otema? Naka tambotshika nsaki shɔ tâhemɛ, kete lâsɔ tokanyi taso la ditshelo diaso diayonga mindo esadi eto. Dui sɔ tɛnyaka ohomba wa tshika yimba yaso nɔmbɔla ditshelo diaso. Paulo akɛnya dikambo diakɔ lam’akandate ate: ‘Diɔ diakɔ dianyɔsɛngasɛngami, nyu anangɛmi, oma lo kɛtshi ka Nzambi, dia nyu nambola alemba anyu oko olambo wasɛna, w’ekila, wetawɔma le Nzambi: olimu w’ekila wosadimi la yimba yanyu.’—Romo 12:1, 2.
4 Dia sho nambola Nzambi olambo w’ekila, sho pombaka tshika yimba yaso tâhemɛ, koko aha otema aso. Ande efula kambɔkɔ l’awui a mindo nɛ dia vɔ wakatshike nsaki yawɔ mbahemɛ dionga diawɔ lee! Kɛsɔ hɛnya ɔnɛ sho pombaka ndjaka kana minya nsaki yaso; dikambo naka tamboyinya, ko okonde wayotokoka mɛnya ɔngɛnɔngɛnɔ wele laso l’olimu wa Jehowa na? Koko, naka sho nangaka monga l’elowa wa nyuma l’ɔtɛ w’etsha wa demba, kete lâsɔ sho pombaka mbɔtɔnganyiya timba taso la yimba ya Kristo.—Ngalatiya 5:22, 23; Filipi 2:5.
Lɔsɛnɔ l’Ekila, Oshinga w’Ekila
5 Lande na kakatɛtɛka Petero ngasɔ ɔnɛ ekɔ ohomba di’Okristo tshɛ monga ekila na? Nɛ dia nde akeyaka l’ɔlɔlɔ tshɛ ɔnɛ oshinga w’ekila wakafutama dia tshungola anto wele l’okitanyiya. Nde akafunde ate: “Nyeyi nyati: Nyu kuntshungwama la diango diayulana, la fesa kana paunyi, uma lu ditshelu dianyu di’anyanya, diakanyakiti uma le watshenyu. Keli nyu nyakatshungwama la dikila di’ushinga a wulu, uku dia ona okoko laha la munga kuyanga vadi, dia Kristu ndame.” (1 Petero 1:18, 19) Eelo, Jehowa Nzambi, Kiɔkɔ ya losanto, akatome Ɔnande ɛtɔi lakandote, “Okilami,” oya la nkɛtɛ dia nde ndjofuta tshungo diakoka kimanyiya anto dia vɔ monga la diokanelo di’ɔlɔlɔ l’asawɔ la Nzambi.—Joani 3:16; 6:69, NW; Etumbelu 28:36; Mateu 20:28.
6 Koko, sho pombaka mbetawɔ ɔnɛ ekɔ wolo monga la lɔsɛnɔ l’ekila lam’eso l’andja ɔnɛ wa Satana woludi la ditshelo dia kɔlɔ. Nde mambaka tolonga dia munda Akristo wa mɛtɛ, wanɛ wayatshutshuya di’aha nkɔ lo dikongɛ diande di’akambo. (Efeso 6:12; 1 Timote 6:9, 10) Ɛhɛnyɔhɛnyɔ wa l’olimu wa l’emunyi, w’oma le ase nkumbo, lɔsɔkɔ la la kalasa ndo tɔsɛngiya t’angɛnyi nɔmbaka di’onto monga la lonyuma la wolo dia nde mongaka nshi tshɛ ekila. Dui sɔ mɛnyaka ɔnɛ ekɔ ohomba sho monga la wekelo w’onto ndamɛ ndo mbɔtɔka lo nsanganya y’Akristo esangɔ tshɛ. Paulo akalake Timɔtɛ ate: “Ukimeli yediko ya aui w’ololo wakayuki le mi, lu mbetawo la ngandji keli le Kristu Jesu.” (2 Timote 1:13) Sho mbokaka ɛtɛkɛta ɛsɔ washa onto demba dia wolo lo Mbalasa kaso ka Diolelo ndo sho mbadiaka ɛtɛkɛta akɔ lo wekelo aso wa Bible w’onto ndamɛ. Vɔ kokaka tokimanyiya dia sho mongaka ekila lo dionga diaso dia lushi la lushi la ntondo k’akambo efula wotshikitanyi.
Dionga di’Ekila lo Nkumbo
7 Lam’akavusola Petero ɛtɛkɛta wa lo Akambu w’Asi Lewi 11:44, nde akafunde tshɛkɛta ya lo Grɛkɛ, haʹgi·os, yalembetshiya “ɔnɛ lambangana oma lo pɛkato ko amboyakimɔ le Nzambi, ɔnɛ lele ekila.” (An Expository Dictionary of New Testament Words, diakafunde W. E. Vine) Ngande wahomba dui sɔ monga la shɛngiya le so, sho Akristo, lo lɔsɛnɔ laso la nkumbo na? Mɛtɛ, diɔ mɛnyaka ɔnɛ ngandji mbahomba monga etshina ka lɔsɛnɔ laso la nkumbo, dikambo “Nzambi ele ngandji.” (1 Joani 4:8) Ngandji ka nyangaka wahɔ w’akina koko aha wayɛ wɛmɛ kekɔ esɔ kalɔngɔsɔla diokanelo dia l’asa wadi l’omi ndo l’asa ambutshi l’ana.—1 Koreto 13:4-8; Efeso 5:28, 29, 33; 6:4; Kolosai 3:18, 21.
8 Sho mbeyaka kanyiya ɔnɛ mɛnya ngandji ka ngasɔ pombaka monga dikambo diasalema dwamɛ lo nkumbo k’Akristo. Koko, sho pombaka suya ɔnɛ lo nkumbo mɔtshi y’Akristo, ngandji kema lo yɛdikɔ yahombatɔ monga. Lo Mbalasa ka Diolelo, mbeyaka mɛnama di’oko tekɔ lo mbokana ngandji, koko eongelo kaso k’anto w’ekila kitakitaka esadi eto lam’akalolaso la ngelo. Etena kɛsɔ, sho mbeyaka ndjohɛ esadi eto ɔnɛ wadiɛso ekekɔ kadiyɛso k’Okristo kana ɔnɛ omɛso ekekɔ ɔnangɛso (ondo nde ekɔ okambi w’olimu kana ekumanyi) lɛnama dia mbɔsamaka la nɛmɔ lo Mbalasa ka Diolelo. Sho mbeyaka mboka nkɛlɛ, ko ewanu wa mamba kokaka ndjotomba. Sho mbeyaka ndjoyala la lɔsɛnɔ la dungi pende. Lâsɔ kete taya bu nto la diokanelo diele oko dia Kristo diahomba monga l’asa wadi l’omi koko taya paka oko pami la omoto mbawana. Tambohɛ ndo ɔnɛ awui weta la ngelo pombaka monga ekila. Mbala mɔtshi, sho mbeyaka ndjotatɛ tɛkɛta oko ase andja ɔnɛ. Etena kɛsɔ, ɛtɛkɛta wa kɔlɔ ndo watshumba onto asolo kokaka tomba esadi eto oma l’onyɔ!—Tukedi 12:18; enda ndo lo Etsha 15:37-39.
9 Koko, Paulo ekɔ lo tosha dako nɛ ate: “Diui dia kolo [lo Grɛkɛ, loʹgos sa·prosʹ, “ɛtɛkɛta wa mindo,” wele bu ekila] tadiutumbaki uma l’enyo anyu, keli paka aui w’ololo, weya mbudia antu uku ahumbawo, ne dia nfudiya wane wuka ngandji ka mamba.” Dikambo sɔ mendanaka la wanɛ tshɛ walonga awui watama l’atei a luudu, oyadi kânga ana.—Efeso 4:29; Jakoba 3:8-10.
10 Ndo nto, dako sɔ diatotɛ dia sho monga ekila mendanaka popo ndo l’ana l’atei a nkumbo k’Akristo. Vɔ bu ndoko l’okakatanu naka wambokalola oma la kalasa ko tatɛ mbokoya ɛtɛkɛta w’atɔmbɔki ndo wa diɔnyɔ watɛkɛta anyawɔ w’ase andja ɔnɛ! Nyu ana, he tanyokotwamake dia mbokoya waonga w’ana w’ɛsɛndji wakatɛngɛ omvutshi wa Jehowa ndo wele oko ana wa nshi nyɛ watondja ɛtɛkɛta wa mindo ndo wa lɔtɛngɔ oma l’enyo awɔ! (2 Nkumi ya Dikanga 2:23, 24) Aha awui watomba oma l’enyɔ anyu nanyema l’ɛtɛkɛta w’ɛsɛndji watɔtɛkɛtaka anto wôka wolo tɛkɛta ɛtɛkɛta wa pudipudi kana wahalɛmiya anyawɔ anto. Oko weso Akristo, sho pombaka monga l’ɛtɛkɛta w’ekila, w’amɛna, wakeketsha anyaso, w’ɛlɔlɔ, ndo ‘wɔsɔhanyemi la lɛɛhɔ.’ Ɛtɛkɛta aso pombaka totshikitanya l’anto akina.—Kolosai 3:8-10; 4:6.
Toyale Ekila le Ase Nkumbo Kaso Wele Bu Ambetawudi
11 Lam’ayatshutshuyaso l’otema ɔtɔi dia mɛnya eongelo kaso k’anto w’ekila, hatohombe ndjaɛnya di’oko sho ndeka anto akina ɔlɔlɔ kana mbaleka losembwe, djekoleko lam’eso la ntondo k’ase nkumbo kaso wele bu ambetawudi. Dionga diaso di’ɔlɔlɔ di’Okristo pombaka mbakimanyiya dia vɔ mɛna ɔnɛ sho tshikitana la wɔ lo yoho y’ɔlɔlɔ, vɔ pombaka mɛna ɔnɛ sho mɛtɛ mbeyaka woho wa mɛnya anyaso anto ngandji la kɛtshi kawaokaso, oko akasale Ose Samariya l’ɔlɔlɔ la lo wɛɛla wa Yeso.—Luka 10:30-37.
12 Petero akatɛtɛ ɔnɛ ekɔ ohomba di’onto monga la dionga di’ɔlɔlɔ la ntondo k’ase nkumbo kande wele bu ambetawudi lam’akandafundɛ Akristo wotshukami ate: “Okone nyu amantu, nyetawo aui a waumenyu, ne dia naka amotshi hawukitanyia diui dia [Nzambi, NW], ndu waha la diui dia [Nzambi, NW], wayudietawo ne dia ditshelu dia wadiewo lam’ayuwena ditshelu dianyu di’ololo diosohanyemi la [dilɛmiɛlɔ di’efula, NW].” Wadi lele Okristo (kana omi lele Okristo lo dikambo diakɔ) kokaka kimanyiya otshukanyi ande lele bu ombetawudi dia nde ngɛnangɛna wetshelo wa mɛtɛ naka nde ekɔ la dionga dia pudipudi, kanɛka anto akina, ndo mbalɛmiyaka. Kɛsɔ mɛnyaka ɔnɛ wɛ hahombe monga l’otema wa dive lo kɛnɛ k’endana l’ekongelo k’akambo wa teokrasi lo yoho yakoka ndo omɛyɛ kana wadiɛyɛ lele bu ombetawudi ndjɛ̂na di’oko wɛ mbɔ̂nyɔlaka kana hawodje yimba.a—1 Petero 3:1, 2.
13 Tena dimɔtshi, dikumanyi la ekambi w’olimu kokaka kimanyiya atshukanyi naka vɔ nyanga dia mbeya omi lele bu ombetawudi lo sawolaka la nde. Lo yoho shɔ mbakokande mɛna ɔnɛ Ɛmɛnyi wa Jehowa wekɔ oko anto akina tshɛ, vɔ wekɔ la ditshelo di’ɛlɔlɔ ndo ndjashaka lo awui efula, aha paka l’akambo wa lo Bible ato. L’etena kɛmɔtshi, ekumanyi kɛmɔtshi akamɛ ndjasha lo woho wakatshɔka om’aki kadiyɛso kɛmɔtshi dia têtshaka wenya ande lo mboka yɔdi. Kombeta ndoko edja, vɔ akɔ ahende wakayongaka angɛnyi. L’ɔkɔngɔ diko, pami kɛsɔ akayokomaka ɔnangɛso lambobatizama. L’etena kekina, om’aki kɛdiyɛso kɛmɔtshi laki komonga ombetawudi akangɛnangɛnaka tofudufudu telɛwɔ canari woho w’anyanya. Dikumanyi kompekɔ. Ekumanyi kɛmɔtshi akeke dikambo dia tofudufudu takɔ tele la nkembo y’amɛna ate kele lam’ayomɛnana la pami kakɔ mbala kayaye, layotatɛ sawola la nde lo dikambo diakɔ sɔ dialangande efula! Ɔnkɔnɛ, monga ekila hɛnya ɔnɛ monga onto l’awui wolo kana ndjâla la yimba ya tshitshɛ.—1 Koreto 9:20-23.
Ngande Wakokaso Monga Ekila l’Atei w’Etshumanelo?
14 Satana Diabolo ekɔ omamanyishi, nɛ dia tshɛkɛta ya lo Grɛkɛ yokadimwami ɔnɛ Diabolo, di·aʹbo·los, nembetshiyaka ɔnɛ “ɔnɛ lasɔngwanɛ” kana “omamanyishi.” Mamatanyiyɛ anto ekɔ olimu ɔmɔtshi walekande mbeya, ndo nde nyangaka dia kamba olimu akɔ l’atei w’etshumanelo. Shambo yalekande nanga ele tshɔbɔla l’akambo akana. Onde sho ndjatshikaka dia nde tokesa lo dionga dia mindo sɔ? Ngande wakoka dui sɔ ndjosalema na? Diɔ kokaka ndjosalema naka tambɔhɔhɔla sawo dimɔtshi lo awui akana, tambodivusola, kana tambodihokamɛ. Yokedi mɔtshi ya lomba mbutaka ɔnɛ: “Kanga atui wulu atutungaka lundju. Kanga sedisedi katatanyaka engenyi a wulu.” (Tukedi 16:28) Kakɔna kakoka tokokɛ di’aha sho sanyaka awui akana ndo mamatanyiyanɛka akambo na? Sho pombaka mendaka dia kana ɛtɛkɛta aso wekɔ nshi tshɛ ɛtɛkɛta wakeketsha anto ndo wotumbi oma lo ngandji. Naka sho nyangaka waonga w’ɛlɔlɔ lo dihole dia ditshelo di’anangɛso diafɔnyaso ɔnɛ diekɔ kɔlɔ, kete asawo aso wayongaka nshi tshɛ amɛna ndo wayokeketshaka anyaso lo nyuma. Tohɛke wate: kema wolo tɛnda onto. Ndo nto, onto latɛnda anto akina le yɛ mbeyaka tokɔtɛnda ndo wɛ lawɔ le anto akina!—1 Timote 5:13; Tito 2:3.
15 Dia sho namaka etshumanelo ekila nshi tshɛ, sho tshɛ pombaka monga la yimba ya Kristo, ndo sho mbeyaka ɔnɛ dionga diande dioleki woke ele ngandji. Diɔ diakɔ diakalake Paulo Ase Kɔlɔsai dia vɔ mbokanaka kɛtshi oko Kristo, lam’akandawatɛ ate: ‘Ɔnkɔnɛ, oko anto wakasɔnama oma le Nzambi, anto w’ekila ndo wôkama ngandji, nyɔlɔtɛ etema wa kɛtshi, lɔsɛngɔ, yimba ya ndjakitshakitsha, wɔlamu, la lotutsha . . . , nyokimɔnɛke onto la onyande . . . Lâdiko di’akambo asɔ tshɛ, nyɔlɔtɛ ngandji, nɛ dia tɔ mbele dimama di’osanga dia kokele.’ Oma lâsɔ, nde akayota nto ate: “Ndo nto, wɔladi wa Kristo walɔmbɔlɛ etema anyu.” Mɛtɛ, naka tekɔ la yimba ya ngasɔ ya kimɔnɛka, kete sho kokaka nama kâmɛ la eongelo k’ekila ka l’etshumanelo.—Kɔlɔsai 3:12-15, NW.
Onde Ekila Kaso Mɛnamaka le Asukanyi Aso?
16 Kayotota lo dikambo di’asukanyi aso na? Ngande watɛnawɔ? Onde sho mɛnyaka ɔngɛnɔngɛnɔ aso lo sɛkɛ, ɔngɛnɔngɛnɔ wele laso l’ɔtɛ wa mɛtɛ kakateke lo Bible, ko kana sho mbetɛka mɛtɛ kakɔ oko ɛngɔ ka wotsho? Naka tekɔ ekila oko wele Jehowa ekila, kete ekila kɛsɔ pombaka mɛnama l’ɛtɛkɛta aso la lo dionga diaso. Sho pombaka mɛnya hwe ɔnɛ ɔtɛmwɛlɔ aso w’ekila wekɔ ɔtɛmwɛlɔ w’ɔngɛnɔngɛnɔ. Lande na na? Nɛ dia Jehowa Nzambi kaso, ekɔ Nzambi k’ɔngɛnɔngɛnɔ, kalanga atɛmɔdi ande monga l’ɔngɛnɔngɛnɔ. Diɔ diakɔ diakakoke omembi w’esambu mbuta lo dikambo di’anto wa Jehowa lo nshi y’edjedja ate: “Wudja weli la [Jehowa] uku [Nzambi kawɔ, NW], weko la ongenongeno.” Onde sho mɛnyaka ɔngɛnɔngɛnɔ ɔsɔ lo sɛkɛ? Onde anaso ndo vɔ lawɔ mɛnyaka ɔlɔ wokawɔ dia monga l’atei w’ekambi wa Jehowa lo Mbalasa ka Diolelo la lo nsanganya ya weke?—Osambu 89:15, 16; 144:15b.
17 Sho kokaka nto mɛnya ekila kaso kele bu ka tshambandeko oma lo yimba yaso ya mbetawɔka kamba kâmɛ l’asukanyi aso ndo mbasalɛka ɔlɔlɔ. Tena dimɔtshi ekɔ ohomba dia wanɛ wodjashi l’etenyi ka ngelo ɔtɔi kamba kâmɛ, ondo dia mbɛdia etenyi kɛmɔtshi ka ngelo kana, oko wasalemadiɔ lo wedja ɛmɔtshi, dia mɔmbɛ toshinga la nɔngɔsɔla etadimbo a weke. Lo dikambo sɔ, ekila kaso kokaka mɛnama lo woho walɔngɔsɔlaso ngelo kaso, sɛkɛ diaso, kana diangɔ diaso dikina. Naka sho tshikaka mindo lo sɛkɛ diaso, hatɔmbɛ adiyo ndo hatodilɔngɔsɔla, kana kalɛka emusu a mituka lɔkɔ wakoka anto tshɛ mɛna, onde lâsɔ sho kokaka mbuta ɔnɛ sho nɛmiyaka asukanyi aso?—Enyelo 11:18.
Ekila l’Olimu ndo la Kalasa
18 Ɔpɔstɔlɔ Paulo akafundɛ Akristo wakadjasɛka la Kɔrɛtɔ, osomba wa mindo, ate: “Dimi lakanyufundela lu mukanda ami nti: Tanyosohanaki l’akanga a munanyi. Dimi halati dia akanga a munanyi wa la kete nye, kuyanga akanga w’ekomiya, kuyanga apotwanyi, kuyanga atemodi wa dikishi, lam’ahumbanyu mumo uma la kete nye.” (1 Koreto 5:9, 10) Ɔsɔ ekɔ okakatanu a woke le Akristo, wanɛ wahomba pomanaka nshi tshɛ l’anto wa mindo ndo wahete oyadi ɔlɔlɔ kana kɔlɔ katshawɔ. Ɔsɔ ekɔ ohemba a woke lo kɔlamelo, djekoleko lo wedja wakeketshawɔ ndo wetawɔwɔ anto pɛnyahɛnya anto akina l’awui wa dieyanelo, nkimɔ kana ndɛ mbo y’otsho, ndo sala lokeso. Lo ahole wa ngasɔ, hatokoke mbetawɔ dia kitshakitsha ɛlɛmbɛ aso ɔnɛ kele tɛ̂name dia tekɔ anto “w’ɛlɔlɔ” le wanɛ wotodingi. Koko, dionga diaso di’ɔlɔlɔ di’Okristo ndo diotshikitanyi pombaka mɛnama lo asho w’anto wele la shɛnɔdi, wanɛ weya dia vɔ wekɔ akanga a weola lo nyuma ndo wayanga ɛngɔ kɛmɔtshi koleki ɔlɔlɔ.—Mateu 5:3; 1 Petero 3:16, 17.
19 Woho akɔ wâmɛ mbahomana ndo anaso l’ehemba efula la kalasa. Nyu ambutshi, onde nyu ntshɔkaka dia tênda kalasa yɔ̂tɔ ananyu? Onde nyu mbeyaka awui weta lɛkɔ? Onde nyu mɛnanaka l’embetsha awɔ? Lande na kele wembola ɛsɔ ohomba na? Wembola ɛsɔ wekɔ ohomba nɛ dia l’esomba efula wa l’andja ɔnɛ, kalasa yaya oko ahole wasalema awui a ngala, wanɔwɔ kândji kana didjoyadjoya, ndo wasalema awui a dieyanelo. Ngande wakoka ananyu nama kɔlamelo yawɔ la dionga diawɔ ekila naka hawokundjisha ekimanyielo koludi la ngandji oma le nyu, nyu ambutshi awɔ na? Paulo akasha ambutshi dako nɛ diasungana ate: ‘Nyu ambutshi w’apami, tanyokiyake ananyu nkɛlɛ di’aha vɔ ndjɔkɔmɔ etema.’ (Kolosai 3:21) Yoho mɔtshi yakoka ambutshi mbokiya ana nkɛlɛ ele ntona dia mboka ekakatanu la ehemba wahomana la wɔ lushi la lushi. Awui wa lo nyuma weta la ngelo k’Okristo mbatamɛki nɔngɔsɔla ɔna dia nde nshika ekolo la ntondo k’ehemba wa la kalasa.—Euhwelu k’Elembe 6:6-9; Tukedi 22:6.
20 Dia sho nkomiya, bonde kahombaso sho tshɛ monga ekila na? Nɛ dia eongelo k’ekila tokokɛka di’aha andja ɔnɛ wa Satana la tokanyi tande ndjotodja otshumba. Tɔ kekɔ tshondo y’ɔtshɔkɔ nshi nyɛ ndo kayonga ngasɔ oto lo nshi yayaye. Tɔ toshikikɛka ɔnɛ tayokondja lɔsɛnɔ la mɛtɛ l’andja w’oyoyo wa losembwe. Tɔ tokimanyiyaka dia sho monga Akristo wahatshe akambo lo tshambandeko, wôkana l’anto ndo wêya sawola l’anto—koko aha monga oko wanɛ wele l’ohetoheto wambotamba olelo. Lo tshena pe, eongelo k’ekila tokonyaka oko Kristo.—1 Timote 6:19.
[Footnote]
a Dia wɛ mbeya awui akina wɛnya yewo yahomba wadi kana omi monga layɔ otsha le otshukanyi ande lele bu ombetawudi, enda lo Tshoto y’Etangelo ya lo Falase ya Loseketanya 15, 1990, “Tonyake Otshukanyi Ayɛ Yimba!,” lɛkɛ 20-2 la Tshaka Fudu 1, 1988, lɛkɛ 24-5, odingɔ 20-2 (lo Falase).
[Study Questions]
1. Lande na kakakeketsha Petero Akristo dia vɔ monga ekila?
2. Lande na kele nsaki yakiso layɔ la ntondo ka sho ndjêka mɛtɛ yaki mindo?
3, 4. (a) Ngande wakokaso minya nsaki ya kɔlɔ? (b) Onde Akristo pombaka ndjaka nsaki yawɔ tshɛ? Lembetshiya.
5. Lande na kakatɛkɛta Petero ɔnɛ ekɔ ohomba di’Okristo monga ekila?
6. (a) Lande na kele ekɔ wolo le so dia sho tetemala monga la dionga di’ekila? (b) Naa dako di’oshika diatosha Bible lo dikambo sɔ?
7. Eongelo k’ekila pombaka monga la shɛngiya yakɔna lo lɔsɛnɔ la nkumbo kaso?
8, 9. (a) Naa akambo amɔtshi watotombaka tena dimɔtshi lo nkumbo y’Akristo? (b) Naa dako di’oshika diatosha Bible lo dikambo sɔ?
10. Dako diatotɛ dia monga ekila mendanaka ndo l’ana lo yoho yakɔna?
11. Lande na kele monga ekila halembetshiya ɔnɛ ndjaɛnya di’oko wɛ ndeka anto akina ɔlɔlɔ?
12. Ngande wakoka atshukanyi w’Akristo kimanyiya wadiɛwɔ la waomɛwɔ dia vɔ ngɛnangɛna wetshelo wa mɛtɛ?
13. Ngande wakoka dikumanyi la ekambi w’olimu kimanyiyaka waomi wele bu ambetawudi tena dimɔtshi dia vɔ ngɛnangɛna wetshelo wa Jehowa?
14. (a) Naa shambo mɔtshi yatosalaka Satana dia nde fukutanya etshumanelo? (b) Ngande wakokaso mbewɔ djonga ya Satana?
15. Naa waonga wele oko wa Kristo wakoka kimanyiya ase etshumanelo tshɛ dia vɔ mongaka ekila?
16. Lande na kahomba ɔtɛmwɛlɔ aso w’ekila monga ɔtɛmwɛlɔ w’ɔngɛnɔngɛnɔ?
17. Akokaso sala dia mɛnya ekila kaso kele bu ka tshambandeko?
18. (a) Naa okakatanu a woke wahomana l’Akristo ɛlɔ kɛnɛ? (b) Ngande wakokaso tshikitana l’andja ɔnɛ?
19. (a) Nyu ana, ehemba akɔna wanyokomɛ la kalasa? (b) Ambutshi akokawɔ sala dia sukɛ anawɔ ndo dionga diawɔ di’ekila?
20. Lande na kele ekɔ ohomba sho tshɛ monga ekila?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 27]
[Diombwɛlo di’osato wa lo lɛkɛ 27]
Oko weso Ɛmɛnyi wa Jehowa, sho pombaka ngɛnangɛnaka lam’akambɛso Nzambi ndo lam’asalaso elimu ekina
[Caption on page 31]
Onde Wɛ Mbohɔka?
◻ Lande na kakɛnyi Petero ohomba dia ndaka Akristo dia vɔ monga ekila?
◻ Lande na kele ekɔ wolo di’onto monga la lɔsɛnɔ l’ekila?
◻ Akokaso sala sho tshɛ dia ndowanya eongelo k’ekila lo nkumbo?
◻ Di’etshumanelo mongaka nshi tshɛ ekila, naa dionga dia mindo diahombaso mbewɔ?
◻ Ngande wakokaso tshikalaka ekila l’olimu ndo la kalasa?