Toyele ‘kɛnɛ kele ekila la wɔma wa Nzambi’

DIA mɛnya woho wele Jehowa Nzambi ekila lo yɛdikɔ y’efula, Bible mbutaka ɔnɛ: “Ekila, Ekila, Ekila eli [Jehowa].” (Is. 6:3; Eny. 4:8) Tshɛkɛta ya lo Hɛbɛru ndo ya lo Grɛkɛ yakadimɔma ɔnɛ “ekila” mbelaka kanyi ya pudipudi kana pudipudi kendana la ɔtɛmwɛlɔ, mbuta ate kakitɔna la mindo. Ekila ka Nzambi mendanaka la lɔkɛwɔ la kokele.

Onde Jehowa Nzambi k’ekila, hakoke nongamɛ dia wanɛ wɔtɛmɔla monga ekila, mbuta ate monga pudipudi lo demba, lo lɔkɛwɔ ndo lo nyuma? Bible mɛnyaka hwe dia Jehowa nangaka di’ekambi ande monga ekila. Sho mbadiaka lo 1 Petero 1:16 ɔnɛ: “Nyuyali ekila, ne dia dimi leko ekila.” Onde anto wele kema kokele kokaka mɛtɛ mbokoya Jehowa lo monga ekila? Eelo, koko aha lo yoho ya kokele. Nzambi ayotɔsa dia tekɔ ekila, naka sho mbɔtɛmɔla la eongelo ka pudipudi ka lo nyuma ndo monga la diɔtɔnganelo dia ma ma la nde.

Ko, ngande wakokaso monga pudipudi lo andja ɔnɛ wele la lɔkɛwɔ la mindo? Ditshelo diakɔna diahombaso mbewɔ? Etshikitanu akɔna wa lo ɛtɛkɛta ndo wa lo lɔkɛwɔ wahombaso sala? Nyɛsɔ tende wetshelo wakokaso kondja lo dikambo sɔ oma lo kɛnɛ kakalɔmbɛ Nzambi ase Juda wakakalola oma la Babilɔna otsha lo nkɛtɛ yawɔ ya lôtɔ lo 537 N.T.D.

‘Mboka k’ekila kayoyala lɛkɔ’

Jehowa akatɛ wodja ande waki lo lɔhɔmbɔ la Babilɔna dia vɔ wakahombe kalola lo nkɛtɛ yawɔ ya lôtɔ. Prɔfɛsiya k’okalwelo kaki la eshikikelo kɛnɛ: “Mbuka kayuyala leko, osese a wuki wayuweta vati: osese w’ekila.” (Is. 35:8a) Ɛtɛkɛta ɛsɔ mɛnyaka dia Jehowa akadiholɛ ase Juda mboka ka vɔ kalola lo nkɛtɛ yawɔ ndo akâshikikɛ dia nde ayowakokɛ lo lɔkɛndɔ lawɔ.

Jehowa akadiholɛ ekambi ande wa nshi nyɛ wa la nkɛtɛ ‘mboka k’ekila’ oma lo Babilɔna ka Woke, mbuta ate tshunda dia lo andja w’otondo di’ɛtɛmwɛlɔ wa kashi. Lo 1919, nde akatshungola Akristo w’akitami oma lo lɔhɔmbɔ la lo nyuma l’ɛtɛmwɛlɔ wa kashi ndo vɔ wakayɛdiaka ɔtɛmwɛlɔ awɔ yema yema oma lo wetshelo tshɛ wa kashi. Etshumanelo k’atɛmɔdi waki Jehowa ɛlɔ kɛnɛ kekɔ dihole dia pudipudi ndo diele la lotui tshitshi diakokaso tɛmɔla Jehowa ndo monga la diɔtɔnganelo dia wɔladi la nde ndo la asekaso anto.

Anto wa lo “limba la tshitshe l’ekoko” w’Akristo w’akitami ndo “ului a wuki” wa “ekoko ekina” watatetemala pama wakasɔnɛ dia kɛndakɛnda lo mboka k’ekila ndo wekɔ lo mbelɛ anto akina dia samba la wɔ. (Luka 12:32; Eny. 7:9; Joa. 10:16) ‘Mboka k’ekila’ kekɔ hwe le anto tshɛ walanga ‘nambola alemba awɔ oko elambo wasɛna, w’ekila la wetawɔma le Nzambi.’​—Romo 12:1.

‘Onto la mindo hateta lɔkɔ’

Lo 537 N.T.D., ase Juda wakakalola wakahombe kitanyiya didjango dimɔtshi di’ohomba. Lo kɛnɛ kendana la wanɛ wakoka kɛndakɛnda lo ‘mboka k’ekila,’ Isaya 35:8b mbutaka ɔnɛ: ‘Onto la mindo hateta lɔkɔ. Ndo tekekɔ la akanga a dinginya hawotɔkɛndakɛnda lɔkɔ.’ Lam’ele oyango wakakalola ase Juda la Jerusalɛma aki dia tolola ɔtɛmwɛlɔ wa pudipudi, wanɛ wele la eyango wa lokaki, wahalɛmiya awui w’ekila kana wele mindo lo nyuma takawahombe tanema lɛkɔ. Wanɛ wakakalola wakahombe kitanyiya ɛlɛmbɛ waki Jehowa wa lâdiko wendana la lɔkɛwɔ. Wanɛ wakombola mbetawɔma le Nzambi ɛlɔ kɛnɛ pombaka kitanyiya didjango sɔ. Vɔ pombaka tetemala ndjela ‘kɛnɛ kele ekila la wɔma wa Nzambi.’ (2 Kor. 7:1) Ko naa ditshelo dia mindo diahombaso mbewɔ?

Ɔpɔstɔlɔ Paulo akafunde ate: “Etsha wa dimba watenamaka vo ene: munanyi, akambu wa sonyi, saki y’akambu wa kolo.” (Ngal. 5:19) Monanyi mendanaka la tshelo tshɛ ya dieyanelo yakambawɔ la tenyi dia demba dia diwutshi lo andja wa diwala. Akambo wa kɔlɔ mendanaka la “akambo wa fumbɔ sɔnyi, akambo wa sɔnyi, akambo wa mindo.” Mbokɛmaka hwe dia monanyi la akambo wa kɔlɔ hɔtɔnɛ la ekila kaki Jehowa. Omalɔkɔ, wanɛ watetemala sala akambo asɔ hawetawɔma l’etshumanelo k’Akristo kana vɔ mbitshanyemaka oma l’etshumanelo. Kɛsɔ mbasalema ndo le wanɛ wasala akambo wa mindo, mbuta ate “akambu tshe wa mindu la saki ka wulu.”​—Ef. 4:19.

“Mindu” ekɔ tshɛkɛta yalembetshiya pɛkato efula. Tshɛkɛta ya lo Grɛkɛ yalembetshiya mindo mendanaka la weho tshɛ wa mindo ka lo lɔkɛwɔ, ka l’ɛtɛkɛta ndo ka lo nyuma. Yɔ mendanaka la ditshelo dia mindo lo yɛdikɔ mɔtshi yele ondo halɔmbɛ di’onto nomboshama.a Ko onde wanɛ wasala akambo wa mindo asɔ wekɔ lo ndjela kɛnɛ kele ekila?

Tɔshi di’Okristo ɔmɔtshi ambotatɛ menda filmɛ yɛnyawɔ anto etakataka lo woshɛshɛ. Yema yema, etena kayafule nsaki ya mindo, yɛdikɔ yande ya tshikala pudipudi la ntondo ka Jehowa yekɔ lo takitakita. Mbeyaka monga ko lɔkɛwɔ lande latakome polo lo yɛdikɔ ya mbêlɛ ɔnɛ mindo k’efula, koko nde hayotetemala sɛdingola paka ‘akambo wele pudipudi, wele la lokumu l’ɔlɔlɔ, w’amɛna ndo wasungana.’ (Fil. 4:8) Filmɛ yɛnyawɔ anto etakataka ekɔ dui dia mindo ndo lo mɛtɛ dui sɔ ndanyaka diɔtɔnganelo di’asa onto la Nzambi. Weho tshɛ w’akambo wa mindo hawohombe monga l’atei aso.​—Ef. 5:3.

Tɔsɛdingole ɛnyɛlɔ kekina. Tɔshi di’Okristo ɔmɔtshi ekɔ lo sala tshelo ya esuse, mbuta ate ekɔ lo ndjatshutshuya la lolango lande dia monga la nsaki ka dieyanelo oyadi l’ɔkɔngɔ wa menda filmɛ yɛnyawɔ anto etakataka kana bu. Kânga mbele tshɛkɛta esuse hayotanema lo Bible, aha la tâmu ɔsɔ ekɔ tshelo yadja onto mindo lo yimba. Shi tetemala ndjadja mindo lo yoho shɔ ndanyaka diɔtɔnganelo diele l’onto la Jehowa ndo mbêtɛka mindo lo washo wa Nzambi? Nyɛsɔ tokitanyiya dako diaki ɔpɔstɔlɔ Paulo diata dia ‘ndjaɛdia oma lo mindo tshɛ ya lo demba ndo ya lo yimba’ ndo ‘ndjaka tenyi dia demba dia la nkɛtɛ lo kɛnɛ kendana la monanyi, lomindomindo, nsaki ka demba, ekombwelo ka kɔlɔ la ɔkɔmiya, wele ɔtɛmwɛlɔ wa dikishi.’​—2 Kor. 7:1; Kol. 3:5.

Andja ɔnɛ walɔmbwama oma le Satana mbetawɔka lɔkɛwɔ la kɔlɔ ndo likeketshaka. Shika ekolo la ntondo k’ohemba wa ndjatambiya lo lɔkɛwɔ la mindo mbeyaka monga tshondo y’okakatanu. Koko Akristo wa mɛtɛ hawohombe “[salaka akambo] uku atutshaka asi wedja, lu tunginyanginya ta tumba tawo.” (Ef. 4:17) Jehowa ayetawɔ dia sho tetemala kɛndakɛnda lo ‘mboka k’ekila,’ paka naka sho mbewe lɔkɛwɔ la mindo oyadi lo woshɛshɛ kana lo sɛkɛ.

“Nduku tambwe kayuyala leko”

Dia mbetawɔma le Jehowa Nzambi k’ekila, nɔmbamaka di’onto sala etshikitanu ɛmɔtshi wa weke lo lɔkɛwɔ ndo lo ɛtɛkɛta. Isaya 35:9 mbutaka ɔnɛ: “Nduku tambwe kayuyala leko, kuyanga nyama ka ngala, yo hayutanema loko,” mbuta ate lo ‘mboka k’ekila.’ Lo yoho ya didjidji, anto wa ngala ndo anto wasala akambo wa ngala lo etsha ndo lo ɛtɛkɛta mbɛdikamaka la nyama ya ngala. Lo mɛtɛ, vɔ hawototanema lo andja w’oyoyo waki Nzambi wa losembwe. (Is. 11:6; 65:25) Omalɔkɔ, ekɔ ohomba efula dia wanɛ wakombola mbetawɔma le Nzambi tshika waonga wafɔna la wa nyama asɔ ndo ndjela kɛnɛ kele ekila.

Afundelo totɛka ɔnɛ: “Yenyi tshe, la lutunu, la kele, la utshanu, la etenganelu, la wehu tshe wa somboki, wamo uma le nyu.” (Ef. 4:31) Lo Kolosai 3:8 sho mbadiaka ɔnɛ: “Nyunya akambu ane tshe: kele, lutunu, somboki, lotengo, aui wa sonyi uma l’enyo anyu.” Tshɛkɛta “etenganelu” ndo “lotengo” yokambi lawɔ lo avɛsa ahende anɛ nembetshiyaka ntondotondo todjɛ onto ɛtɛkɛta watshidia asolo kana wa kɔlɔ.

Ɛlɔ kɛnɛ, anto efula wekɔ lo tɛkɛta lo yoho ya kɔlɔ ndo yele bu la kɛnɛmɔ kânga la ngelo. Atshukanyi tondjanɛka ndo vɔ tondjɛka anawɔ ɛtɛkɛta wahomuya, wa ngala kana washa onto sɔnyi. Woho w’ɛtɛkɛta wa ngala wa ngasɔ hawohombe tanema lo nkumbo y’Akristo.​—1 Kor. 5:11.

Ndjela ‘kɛnɛ kele ekila la wɔma wa Nzambi ekɔ tshondo y’ɔtshɔkɔ!

Ekɔ mɛtɛ diɛsɛ dia mamba dia kambɛ Jehowa Nzambi k’ekila! (Jas. 24:19) Paradiso ka lo nyuma kambotɔtshiya Jehowa lɔkɔ ekɔ ɛngɔ ka nɛmɔ efula. Monga la lɔkɛwɔ l’ekila lo washo wa Jehowa ekɔ mɛtɛ yoho ya lɔsɛnɔ yoleki dimɛna.

Kem’edja Paradiso ka la nkɛtɛ kakalake Nzambi kayanga ndja. (Is. 35:1, 2, 5-7) Wanɛ wakikombola ndo watetemala ndjela yoho ya lɔsɛnɔ yangɛnyangɛnya Nzambi wayonga la lɔsɛnɔ lɛkɔ. (Is. 65:17, 21) Ɔnkɔnɛ, nyɛsɔ totetemale la tɛmɔla Nzambi la eongelo ka pudipudi lo nyuma ndo tonge la diɔtɔnganelo dia ma ma la nde.

[Nɔte ka l’ɛse ka dikatshi]

[Osato wa lo lɛkɛ 26]

Kakɔna kakahombe ase Juda sala dia kɛndakɛnda lo ‘mboka k’ekila’?

[Osato wa lo lɛkɛ 27]

Awui wa mindo ndanyaka diɔtɔnganelo diele lam’asa onto la Jehowa

[Osato wa lo lɛkɛ 28]

“Utshanu, la etenganelu . . . wamo uma le nyu”