Lonyemba—Diaaso Dia Kamba Olimu La Yambalo Tshɛ
‘[Dui sɔ] nembetshiyaka kambɛ Nkumadiɔndjɔ olimu w’etete, la yambalo tshɛ.’—1 KORETO 7:35.
ƆPƆSTƆLƆ Paulo akayakiyanyaka lo dikambo di’Akristo w’anango wa la Kɔrɛtɔ, lo wodja wa Ngirika. Lâsɔ ko ambeta oko ɛnɔnyi etanu, nde akâte etshumanelo l’osomba ɔsɔ waki la lomombo ndo wakeyamaka efula l’ɔtɛ w’akambo wa mindo wakasalemaka lɔkɔ. Otsha l’ɔnɔnyi wa 55 T.D., lam’akinde l’Ɛfɛsɔ, l’Asie Mineur, nde akalongola nsango ya lonyangu oma la Kɔrɛtɔ lo dikambo dia diatɔnelo diaki l’etshumanelo kakɔ ndo lo woho wakawatshikaka onto ɔmɔtshi lakasale monanyi ka mamba l’atei atɔ. Lâdiko dia lâsɔ, Paulo akalongola mukanda oma le Akristo wa la Kɔrɛtɔ wakawɔlɔmbaka alako wahomba mbalɔmbɔla lo akambo wa dieyanelo, lonyemba, diwala, okakitɔnelo, ndo lo dikambo dia ntshuka kana ntshukama nto.
2 Akambo wa mamba wa mindo wakekɔnɛ la Kɔrɛtɔ wakɛnamaka di’oko waki la shɛngiya le etshumanelo kaki lɛkɔ lo weoho ehende. Akristo amɔtshi wakakɔ lo ndjela yoho ya lɔsɛnɔ la kɔlɔ ndo waketawɔka akambo wa mindo salema. (1 Koreto 5:1; 6:15-17) Ondo Akristo akina, lo menda ɛngɛnɔngɛnɔ w’awui a dieyanelo wakatanemaka l’ahole tshɛ wa l’osomba, wakayotamba olelo ko ndjosekɛ ndo awui tshɛ wa dieyanelo, koyanga l’asa wadi l’omi.—1 Koreto 7:5.
3 Lo mukanda w’otale wakafundɛ Paulo Ase Kɔrɛtɔ, nde akatɛkɛta ntondo dikambo dia diatɔnelo. (1 Koreto tshapita 1-4) Nde akâkeketsha di’aha vɔ ndjelaka anto, nɛ dia dui sɔ kokaka mbela paka diatɔnelo dia kɔlɔ to. Vɔ wakahombe monga kâmɛ oko ‘wanɛ wakambɛ Nzambi kâmɛ.’ Oma lâsɔ, nde akayowasha alako wa shikaa wɛnya woho wakawahombe nama etshumanelo pudipudi lo kɛnɛ k’endana la lɔkɛwɔ. (Tshapita 5, 6) Oma lâsɔ, ɔpɔstɔlɔ Paulo akayendaka mukanda wakawôfundɛ.
Lonyemba Lambokeketshama
4 Nde akatatɛ ate: “Lu akambu wakanyafundela, eko ololo le pami, diaha ndi munanda umuntu.” (1 Koreto 7:1) Lanɛ, tshɛkɛta ‘aha munanda omoto’ nembetshiyaka ɔnɛ pami pombaka ndjâlama di’aha sakanya omoto l’oyango wa ndjângɛnyangɛnya l’awui a dieyanelo. Lam’ele Paulo akashile sekɛ monanyi, kakianɛ nde akatɛkɛtaka dikambo dia dieyanelo dia l’atei wa diwala. Ɔnkɔnɛ, Paulo aki lo ndaka anyande Akristo dia vɔ tshikala enyemba. (1 Koreto 6:9, 16, 18; ɛdika la Etatelu 20:6; Tukedi 6:29.) Yema otsha la ntondo, nde akayofunda ate: “Keli dimi lambutela enyimba la wadi waki edu nti: Eko ololo dia vo ntshikala uku dimi.” (1 Koreto 7:8) Paulo komonga la wadi, ondo nde aki oma aki odo.—1 Koreto 9:5.
5 Ondo Akristo wa la Kɔrɛtɔ wakayeya akambo amɔtshi w’endana la filɔzɔfi y’Ase Ngirika yele anto amɔtshi wakatombolaka tshelo ya monga la lɔsɛnɔ lambɔtɛkɔya wolo, kana ndjâsɛka. Shi ondo diɔ diakɔ diakambola Ase Kɔrɛtɔ Paulo ɔnɛ kana ekɔ ‘ɔlɔlɔ’ le Akristo dia tona weoho tshɛ wa dieyanelo? Okadimwelo wa Paulo kɔsɔhana la filɔzɔfi y’Ase Ngirika. (Kolosai 2:8) Otshikitanyi l’ase teoloji y’Aseka Mupɛ, ndoko dihole kânga ɔtɔi lo mikanda ande diakandalake anto dia vɔ monga la lɔsɛnɔ la lonyemba ndo ndjâsɛka ko ntshɔ dia todjasɛ lo luudu l’andjashi Nzambi kana lo kuva, wate kana oko enyemba mbele ekila lo yoho yoleki ndo vɔ kokaka kondja panda kawɔ hita oma lo yoho yawɔ ya lɔsɛnɔ la oma l’alɔmbɛlɔ awɔ.
6 Paulo akalake anango dia vɔ tshikala enyemba “ne dia fono keli la su.” (1 Koreto 7:26) Ondo nde akatɛkɛtaka dikambo dia tena dia wolo diakasɛnaka Akristo, tena diotoyoleka wolo tshɛ naka mbidja ndo diwala l’ɔnɔngɔ. (1 Koreto 7:28) Nde akalake Akristo w’enyemba ate: “Eko ololo dia vo ntshikala uku dimi.” Nde akatɛ waomi waki edo ate: “We ambukelekwama uma le wadi, tuyangaki wadi.” Ko le Akristo wele wadi waki edo, nde akâfundɛ ate: “Ndi ambuleka ngenangena dia ntshikala kaku. Dimi lambukana nti: Ndu dimi leko la nyuma ka [Nzambi, NW].”—1 Koreto 7:8, 27, 40.
Ndoko Lahikawɔ dia Tshikala Onyemba
7 Aha la tamu, nyuma k’ekila ka Jehowa kakalɔmbɔla Paulo lam’akandashaka dako sɔ. Lo awui tshɛ wakandatɛkɛta lo dikambo dia lonyemba ndo dia diwala, nde kɔmɛngama lɛkɛ lɔmɔtshi ndo akayakimɛ. Nde kɔmɛnya ɔnɛ ɔsɔ ekɔ dikambo dia monga la kɔlamelo kana kema. Koko, ɔsɔ ekɔ dikambo diahomba onto sɔna ndamɛ, ndo diɔ mɛnyaka wahɔ efula wele la lonyemba le wanɛ wakoka tshikala la lɔsɛnɔ la pudipudi lɔkɔ.
8 Kam’akandashidiya mbuta ɔnɛ “eko ololo le pami, diaha ndi munanda umuntu,” Paulo akate nto ate: ‘Koko lam’ele monanyi ambekɔnɛ, pami tshɛ ayale la wadiɛnde hita, ndo omoto tshɛ ayale l’omɛnde hita.’ (1 Koreto 7:1, 2) L’ɔkɔngɔ wa nde ndaka enyemba la wadi waki edo dia vɔ “ntshikala uku dimi,” nde kotshimbatshimba lo ndjowatɛ nto ate: ‘Nɛ dia ndeka ɔlɔlɔ wɛ ntshukana la ntondo ka ntɛnaka pâ la nsaki.’ (1 Koreto 7:8, 9) Nde akasha waomi waki edo dako nɛ nto ate: “Tuyangaki wadi. Keli naka we ambutshuka wadi, we hatshi kolo.” (1 Koreto 7:27, 28) Dako sɔ di’oshika mɛnyaka lotshungɔ lele l’onto la sɔna kɛnɛ kalangande.
9 Paulo akɛnya ɔnɛ ndo diwala ndo lonyemba tshɛ ekɔ weshasha w’oma le Nzambi. ‘Dimi lotolanga anto tshɛ monga oko dimi. Koko onto tshɛ ekɔ la losha lande lakawosha Nzambi, ɔnɛ la losha lande, ɔnɛ la losha lande.’ (1 Koreto 7:7) Aha la tamu, nde akohɔka kɛnɛ kakate Yeso. L’ɔkɔngɔ wa nde mbuta ɔnɛ Nzambi mbele kiɔkɔ ya diwala, Yeso akɛnya ɔnɛ lonyemba letawɔ onto ndamɛ la lolango lande l’oyango wa kambɛ wahɔ wa Diolelo ekɔ tshondo ya losha la lânde: “Antu tshe haweyi nungula diui ne, paka wane wambushama wulu wa dilungula. Elenga emotshi weko, wakuto osoku uma l’etema w’anyengewo. Elenga ekina weko, wakatungwama le antu. Elenga ekina weko, wakayatungula ne dia diulelu dia l’ulungu. One leya nungula diui ne, adilunguli.”—Mateu 19:4-6, 11, 12.
Mbetawɔ Losha la Monga Onyemba
10 Kânga mbakate Yeso nde la Paulo ɔnɛ lonyemba ekɔ ‘losha,’ vɔ kɔmɛnya ɔnɛ ɔsɔ ekɔ losha la dihindo lakakondja anto amɔtshi ato. Yeso akate ate: “antu tshe haweyi nungula” losha lɔsɔ, ko nde akakeketsha wanɛ wakoka sala ngasɔ dia vɔ “nungula diui ne,” oko akasale Yeso nde la Paulo. Mɛtɛ, Paulo akafunde ate: ‘Nɛ dia ndeka ɔlɔlɔ wɛ ntshukana la ntondo ka ntɛnaka pâ la nsaki,’ koko nde akatɛkɛtaka dikambo dia wanɛ “[waheyi] ndjakimela.” (1 Koreto 7:9) Lo mikanda ande wakandafunde ntondo, Paulo akɛnya ɔnɛ Akristo kokaka mbewɔ kudunganaka la nsaki. (Ngalatiya 5:16, 22-24) Kɛndakɛnda la nyuma kɛdikɛdi ntshika nyuma ka Jehowa nɔmbɔla wanya aso tshɛ. Onde ɛlɔngɔlɔngɔ w’Akristo kokaka ntsha dikambo sɔ? Eelo, naka vɔ ndjela Dui dia Jehowa lo nna ndo lo nna. Omembi w’esambu akafunde ate: “Ukundi ayuluwanya olongo a pami [kana osekaseka wa omoto] lumu landi? Naka ndi ayululamaka uku diui diaye.”—Osambu 119:9.
11 Dia nde sala ɔsɔku, nde pombaka ndjâlama oma lo tokanyi ta kɔlɔ taya oma lo emisiɔ wa televiziɔ, filmɛ, asawo wa lo tojurunalɛ, abuku, ndo nkembo ya lolango. Tokanyi ta ngasɔ mbishaka onto paka saki ka demba keto. Okristo wele ɔlɔngɔlɔngɔ kana osekaseka, lalanga mbetawɔ monga onyemba, ‘hahombe kɛndakɛnda lo akambo wa demba, koko lo akambo wa nyuma. Nɛ dia wanɛ watoyelaka akambo wa demba, watodjaka timba tawɔ lo akambo wa demba, koko wanɛ watoyelaka nyuma [watodjaka timba tawɔ] lo akambo wa nyuma.’ (Romo 8:4, 5) Akambo wa nyuma wekɔ losembwe, pudipudi, amɛna, ɔlɔlɔ. Ekɔ ɔlɔlɔ di’Akristo w’ɛlɔngɔlɔngɔ ndo wa dikumanyi ‘tetemalaka menda akambo asɔ.’—Filipi 4:8, 9.
12 Lo yɛdikɔ ya woke, mbetawɔ losha la lonyemba ekɔ dikambo dialemanɛ efula la mbidja otema ayɛ l’oyango ɔsɔ ndo la nɔmba Jehowa dia nde kokimanyiya dia wɛ tetemala lɔkɔ. (Filipi 4:6, 7) Paulo akafunde ate: “Ku one lakikitala l’utema, aha la saki, keli ambeya lama ndjakimela, la ambusanguya l’utema dia mumba usekaseka andi w’emuma, ndi ambutsha ololo. Okone ntshukana, eko ololo; ndu aha ntshukana, eko ololo. Aha ntshukana, ambuleka ntshukana ololo.”—1 Koreto 7:37, 38.
Lonyemba Lele l’Oyango
13 Lonyemba lwamɛ loto kema la nɛmɔ. Ko lâsɔ, lo yoho yakɔna yakokalɔ ‘ndeka ɔlɔlɔ’ na? Lo mɛtɛ, dui sɔ nemanɛka la woho wakamba onto la lotshungɔ l’oma lo lonyemba. Paulo akafunde ate: “Keli dimi halangi nyu ndjala la ukananu. One lahatatshuki, atulamaka akambu wa Khumadiondjo, uku weyandi ngenyangenya Khumadiondjo. Keli utshukanyi atulamaka akambu wa la kete, uku weyandi ngenyangenya wadendi, ku ndi ambatana. Osoku ndu umuntu laha la umi, ndu usekaseka w’emuma, vo watulamaka akambu wa Khumadiondjo, dia vo ndjala ekilami l’alimba ndu l’etema. Keli utshukami atulamaka akambu wa la kete, uku weyandi ngenyangenya umendi. Dimi lambunyutela dikambu ne dia ololo anyu. Aha dia nyutadia lu djunga, keli dia nyu ndjala la akambu w’usunganyi, la dia nyu mbeya [kambɛ, NW] Khumadiondjo [olimu w’etete, la yambalo tshɛ, NW].”—1 Koreto 7:32-35.
14 Okristo w’onyemba wakamba la lonyemba lande dia mbesa eyango wa lokaki hasale ‘ɔlɔlɔ’ oleki Akristo wambotshukana. Nde ekɔ lo tshikala onyemba, aha “ne dia diulelu,” koko l’ɔtɛ w’awui ande ndamɛ. (Mateu 19:12) Onyemba a pami kana wa omoto pombaka ‘ndjakiyanya di’akambo wa Nkumadiɔndjɔ,’ nde pombaka ndjakiyanya dia ‘mbetawɔma le Nkumadiɔndjɔ,’ ndo ‘tetemala kambɛ Nkumadiɔndjɔ olimu w’etete, la yambalo tshɛ.’ Kɛsɔ mɛnyaka ɔnɛ nde pombaka mbidja yimba yande tshɛ lo kambɛ Jehowa la Yeso Kristo. Paka lo yoho shɔ tsho mbakoka apami ndo amato wele Akristo w’enyemba sala ‘ɔlɔlɔ’ oleki Akristo wambotshukana.
Olimu wa la Yambalo Tshɛ
15 Otondo wa lokanyi la Paulo lo tshapita nyɛ lɔ lɔnɛ: Kânga mbele diwala ekɔ dui diasungana, ndo lo tena dimɔtshi diɔ diekɔ ɔlɔlɔ le anto amɔtshi, lonyemba mɛtɛ lekɔ la wahɔ le Okristo wa pami kana wa omoto lalanga kambɛ Jehowa aha la yimba mbekɔ efula l’akambo akina. Otshukanyi ‘mbatɔna,’ koko Okristo w’onyemba ekɔ la lotshungɔ la mbidja yimba yande lo ‘akambo wa Nkumadiɔndjɔ.’
16 Akambo akɔna wa Nkumadiɔndjɔ wakoka Okristo w’onyemba mbidja yimba efula ndeka ndo atshukanyi na? Lo etena kekina, Yeso akatɛkɛta dia ‘diangɔ dia Nzambi’—diangɔ diahakoke Okristo mbisha Kayisa. (Mateu 22:21) Diangɔ sɔ mendanaka ntondotondo la lɔsɛnɔ l’Okristo, l’ɔtɛmwɛlɔ ande ndo l’olimu ande.—Mateu 4:10; Romo 14:8; 2 Koreto 2:17; 3:5, 6; 4:1.
17 Enyemba efula keto wekɔ la lotshungɔ loleki efula la mbetsha wenya efula l’olimu wa Jehowa, ndo dui sɔ kokaka mbakimanyiya lo nyuma ndo mbasha diaaso dia vɔ pamia olimu awɔ. Vɔ kokaka mbetsha wenya efula lo wekelo w’onto ndamɛ ndo lo kanaka yimba l’akambo wekawɔ. Akristo w’enyemba bu l’okakatanu efula oko wanɛ wotshukanyi dia tana etena ka mbadiaka Bible. Vɔ mbeyaka nɔngɔsɔla nsanganya la olimu w’esambishelo ɔlɔlɔ oleki atshukanyi. Akambo asɔ tshɛ wekɔ dikambo dia ‘wahɔ awɔ vamɛ.’—1 Koreto 7:35.
18 Anangɛso efula w’enyemba wakamba oko ekambi w’olimu wekɔ la lotshungɔ la mbutɛ Jehowa vate: “Dim’one, untumi.” (Isaya 6:8) Vɔ kokaka nɔmba dia mbɔtɔ lo Kalasa k’Olowanyelo w’Ekambi, kalasa kɔ̂tɔ paka enyemba wele ekambi w’olimu la dikumanyi, wanɛ wele la lotshungɔ la tokamba lɛnɛ ele ohomba ndeka efula. Kânga anangɛso w’enyemba wele bu la diaaso dia tshika tshumanelo diawɔ kokaka ndjasha dia kambɛ anangɛwɔ oko ekambi w’olimu kana oko dikumanyi.—Filipi 2:20-23.
19 Akadiyɛso w’enyemba, wanɛ waha la omi la mumbolaka kanyi ndo la mbutɛka toseke, mbeyaka monga l’akoka efula ‘wa kitsha wetsho awɔ le Jehowa.’ (Osambu 55:22; 1 Koreto 11:3) Dui sɔ diekɔ ohomba efula, djekoleko le akadiyɛso watshikala enyemba l’ɔtɛ wa ngandji kokawɔ Jehowa. Naka vɔ wamboyotshukama l’ɔkɔngɔ diko, kete paka ‘lo Nkumadiɔndjɔ,’ mbuta ate paka l’onto lamboyakimɔ le Jehowa. (1 Koreto 7:39) Dikumanyi ngɛnangɛnaka monga l’akadiyɛso w’enyemba lo tshumanelo diawɔ; mbala efula, akadiyɛso asɔ w’enyemba membolaka wanɛ watata hemɔ la esombe ndo mbakimanyiyaka. Kɛsɔ mbelaka ɔngɛnɔngɛnɔ le anto tshɛ.—Etsha 20:35.
20 Akristo efula w’ɛlɔngɔlɔngɔ la w’esekaseka wakakongɛ akambo awɔ woho wa vɔ ‘kambɛ Nkumadiɔndjɔ olimu w’etete, la yambalo tshɛ.’ (1 Koreto 7:35) Vɔ wekɔ lo kambɛ Jehowa oko ambatshi mboka wa lo tena tshɛ, oko wa misiyɔnɛrɛ, kana wekɔ lo kamba lo filialɛ kɛmɔtshi kaki la Société Watch Tower. Vɔ mɛtɛ wekɔ olui w’anto wele l’ɔngɛnɔngɛnɔ! Wôngelo awɔ mɛtɛ mbishaka ndo ekeketshelo! Kɛdikɛdi, lo asho wa Jehowa la wa Yeso, vɔ wekɔ “uku lopopo.”—Osambu 110:3.
Dɔkɔlɔkɔ dia Tshikala Onyemba Pondjo Bu
21 Dui dioleki ohomba lo dako dia Paulo ele ɔnɛ Akristo ‘wayotsha ɔlɔlɔ’ dia mbetawɔ tshikala enyemba lo nsɛnɔ yawɔ. (1 Koreto 7:1, 8, 26, 37) Koko nde hawatɛ kânga yema dia vɔ tshika dɔkɔlɔkɔ dia tshikala onyemba. Lo yoho yotshikitanyi, nde akafunde ate: “Koko naka onto ekɔ lo kana ate nde ekɔ lo salɛ eongelo kande k’emuma akambo lo yoho yahasungana, ko naka tɔ kambolekana dɛmbɔlɛmbɔ dia nshi y’ɔlɔngɔlɔngɔ, ko dikambo sɔ pombaka salema ngasɔ, nde asale kɛnɛ kalangande; aha pɛkato mbasalande. Vɔ watshukane.” (1 Kɔrɛtɔ 7:36, NW) Tshɛkɛta ya lo Grɛkɛ (hy·peʹra·kmos) yokadimwami ɔnɛ ‘ndekana dɛmbɔlɛmbɔ dia nshi y’ɔlɔngɔlɔngɔ’ nembetshiyaka lo mɛtɛ mɛtɛ ɔnɛ ‘lâdiko dia yɛdikɔ yokome’ ndo yɔ mendanaka la olekanelo w’etena kaleka mposa ka dieyanelo nomɔlomɔ. Ɔnkɔnɛ, wanɛ wambotshikala enyemba ɛnɔnyi efula ko wamboyɛna l’ɔkɔngɔ diko ɔnɛ pombaka ntshuka kana ntshukama wekɔ la lotshungɔ tshɛ la vɔ ntshuka kana ntshukama la onyawɔ ombetawudi.—2 Koreto 6:14.
22 Ɛnɔnyi wetsha ɔlɔngɔlɔngɔ kana osekaseka w’Okristo lo kambɛ Jehowa la yambalo tshɛ wekɔ oko tshondo y’okundji wômbande oko kanga lomba. Ɛnɔnyi ɛsɔ mbokimanyiyaka dia nde kondja lomba l’oshika, diewo, la yimba. (Tukedi 1:3, 4) Onto lakatshikala onyemba l’ɔtɛ wa Diolelo ndjolekaka monga l’akoka wahombama l’ɔkɔngɔ diko, naka nde amboyɔsa tɛdikɔ, dia mɛmba ɛkɛndɛ wa lɔsɛnɔ la lo diwala kana w’ombutshi.
23 Akristo amɔtshi wanɛ waketsha ɛnɔnyi efula lo kambɛ Jehowa olimu w’ombatshi mboka kana wa lo tena tshɛ oko enyemba sɔnaka emambedi awɔ la yambalo tshɛ la kanyi ya ndjotetemala lo yoho mɔtshi y’olimu w’ombatshi mboka kana wa lo tena tshɛ. Ɔsɔ mɛtɛ ekɔ dikambo dioleki ɔlɔlɔ. Ondo amɔtshi mbeyaka ndjosangoya dia ntshuka kana ntshukama la kanyi y’aha tshikɛ diwala dihole dia diɔ fukutanya olimu awɔ lo yoho mɔtshi. Ko onde Okristo wele otshukanyi pombaka ndjaoka oko nde ekɔ la lotshungɔ la ndjasha tshɛ l’olimu wa Jehowa oko nshi yakinde onyemba? Asawo wayela wayokadimola dimbola sɔ.
[Study Questions]
1. Naa nsango ya lonyangu yakalongola Paulo lo dikambo di’Akristo wa la Kɔrɛtɔ?
2. Akambo wa mindo wakalole la Kɔrɛtɔ wakɛnamaka di’oko waki la shɛngiya yakɔna le Akristo waki l’osomba ɔsɔ?
3. Akambo akɔna wakatɛkɛta Paulo ntondo lo mukanda ande wa ntondo wakandafundɛ Ase Kɔrɛtɔ?
4. Kakɔna kakalange Paulo mbuta lam’akandate ate: “Eko ololo le pami, diaha ndi munanda umuntu”?
5, 6. (a) Lande na kokɛmande hwe ɔnɛ Paulo kosokoya anto lo vɔ sɛna yoho ya lɔsɛnɔ ya lo kuva na? (b) Bonde kakakeketsha Paulo Akristo dia tshikala enyemba?
7, 8. Kakɔna kɛnya ɔnɛ Paulo kotshutshuyaka Akristo dia vɔ tshikala enyemba?
9. Lo ndjela ɛtɛkɛta wa Yeso la Paulo, ngande wele ndo diwala ndo lonyemba tshɛ weshasha w’oma le Nzambi na?
10. Ngande wakoka onto ‘mbetawɔ’ losha la lonyemba na?
11. ‘Kɛndakɛnda lo ndjela akambo wa nyuma’ kɛdikɛdi na?
12. Di’onto nongola losha la lonyemba, dui sɔ nemanɛka efula la dikambo diakɔna na?
13, 14. (a) Wɛdikelo akɔna wakasale ɔpɔstɔlɔ Paulo l’asa Akristo w’enyemba la wanɛ wele atshukanyi na? (b) Naa yoho yâmɛ yakoka Okristo w’onyemba ‘sala ɔlɔlɔ’ oleki Akristo wele atshukanyi?
15. Naa otondo a dikambo wele l’ɛtɛkɛta wa Paulo wa lo 1 Koreto tshapita 7?
16, 17. Ngande wakoka Okristo w’onyemba mbidja yimba lo ‘akambo wa Nkumadɔndjɔ’ lo yoho yoleki ɔlɔlɔ na?
18. Ngande wakoka anangɛso efula w’enyemba mɛnya ɔnɛ vɔ nangaka kambɛ Jehowa ‘la yambalo tshɛ’?
19. Ngande watshɔkɔma akadiyɛso efula w’enyemba, ndo yoho yakɔna yakokawɔ monga tshondo y’ɔtshɔkɔ le etshumanelo na?
20. Ngande wɛnya Akristo efula ɔnɛ vɔ wekɔ lo ‘kambɛ Nkumadiɔndjɔ olimu w’etete, la yambalo tshɛ’?
21. (a) Bonde kele mbokɛmaka hwe ɔnɛ Paulo kotshutshuyaka anto dia vɔ tshika dɔkɔlɔkɔ dia lonyemba? (b) Kakɔna kakalange Paulo mbuta lam’akandate dia ‘ndekanya dɛmbɔlɛmbɔ di’ɔlɔngɔlɔngɔ’?
22. Lande na kele ekɔ ɔlɔlɔ lo weoho tshɛ di’aha Okristo ntshuka kana ntshukama lam’ekende dikɛnda efula?
23. Kakɔna kahomba wanɛ wasangoya ntshuka kana ntshukama mbohɔka, ko dimbola diakɔna diayotɔsɛdingola l’asawo wayela na?
[Caption]
[Wembola]
[Caption on page 10]
Ovuswelo
◻ Bonde kakɛnyi ɔpɔstɔlɔ Paulo ohomba fundɛ etshumanelo ka la Kɔrɛtɔ mukanda?
◻ Lande na keyaso shate Paulo kosokoyaka anto dia vɔ sɛna yoho ya lɔsɛnɔ ya lo kuva?
◻ Ngande wakoka onto ‘mbetawɔ’ tshikala onyemba?
◻ Ngande wakoka akadiyɛso w’enyemba kondja wahɔ oma lo lonyemba lawɔ na?
◻ Lo weoho akɔna wakoka anangɛso kondja wahɔ oma lo lotshungɔ lawɔ la kambɛ Jehowa ‘la yambalo tshɛ’ na?