‘Onto Tshɛ Lakoka Mbetawɔ Dikambo Sɔ Adietawɔ’
1 Mbala kɛmɔtshi kakatɛkɛtaka Yeso nde l’ambeki ande lo dikambo dia diwala, nde akawaɛnya dia onyemba ekɔ oko ‘losha.’ Oma lasɔ, nde akate ate: ‘Ɔnɛ lakoka mbetawɔ dikambo sɔ adietawɔ.’ (Mat. 19:10-12) L’ɔkɔngɔ w’ɛnɔnyi ɛmɔtshi, ɔpɔstɔlɔ Paulo akafunde lo kɛnɛ kendana la wahɔ wa tshikala onyemba ndo akakeketsha anto akina dia vɔ ndjela ɛnyɛlɔ kande ka tshikala onyemba. (1 Kor. 7:7, 38) Anto efula ɛlɔ kɛnɛ ‘wambetawɔ’ tshikala enyemba ndo wekɔ lo kondja wahɔ efula. Naa wahɔ ɛmɔtshi l’atei a wahɔ ɛsɔ na?
2 Kamba “Aha l’Ofutanu”: Paulo akashihodia dia lam’akandatshikala onyemba nde aki la diaaso dia kambɛ Jehowa “aha l’ofutanu.” Woho akɔ wâmɛ mbele ɛlɔ kɛnɛ, ɔnangɛso leke onyemba mbeyaka kotsha akoka walɔmbama dia mbɔtɔ lo Kalasa k’Olowanyelo w’Ekambi, ndo mbala efula onto leke onyemba mongaka la lotshungɔ efula la kamba olimu w’ombatshi mboka, mbeka ɔtɛkɛta okina, tshɔ lɛnɛ ele ohomba w’apandjudi efula, kamba lo Bɛtɛlɛ, kana monga suke dia mbɔsa waɛsɛ akina w’elimu wa lânde. Nde mbeyaka kondja wenya ndo waaso efula wa ndjasha lo wekelo ande w’onto ndamɛ ndo ndeka kana yimba lo diɔtɔnganelo diele lam’asande la Jehowa lo dɔmbɛlɔ diande dia l’otema ɔtɔi. Onto leke onyemba mongaka la wenya efula wa ndjasha ndamɛ dia kimanyiya anto akina. Olimu ɔsɔ tshɛ ele di’‘ɔlɔlɔ w’onto ndamɛ.’—1 Kor. 7:32-35; Etsha 20:35
3 Kambɛ Jehowa Olimu waha l’ofutanu wa ngasɔ mbishaka difuto. L’ɔkɔngɔ wa nde mbetsha ɛnɔnyi 27 lo wodja wa Kenya, kadiyɛso kɛmɔtshi akafunde ate: “Angɛnyi ndo elimu waki efula! Takasalaka akambo tshɛ kâmɛ ndo takembɔnaka lam’asaso. . . . Dimi laki la lotshungɔ efula la sambisha etena kakimi onyemba ndo dikambo sɔ diakambishaka ɔngɛnɔngɛnɔ w’efula.” Nde akate nto ate: “L’edja k’ɛnɔnyi efula, diɔtɔnganelo dia lam’asami la Jehowa diakaleke keketala.”
4 Kamba la Losha Lɔsɔ Dimɛna: Yeso akate dia oyango wa losha l’onyemba pombaka monga “ne dia diulelu dia l’ulungu.” (Mat. 19:12) Oko wele losha tshɛ, losha l’onyemba pombaka kambema lo yoho ya dimɛna dia mbela ɔngɛnɔngɛnɔ ndo wahɔ. Lo kamba dimɛna la waaso washa losha l’onyemba ndo lo ndjaɛkɛ le Jehowa dia kondja lomba ndo ekeketshelo, enyemba efula wamboshihodia ohomba wa mbetawɔ woshasha ɔsɔ.