Ambola w’oma le ambadi

Onde ɛtɛkɛta waki Yeso wele lo Mateo 19:10-12 mɛnyaka dia wanɛ watshikala enyemba wakalongola woshasha wa lonyemba lo yoho y’ehekesa?

▪ Tɔsɛdingole kɛnɛ kakayokonya Yeso dia ntɛkɛta dikambo dia lonyemba. Etena kakaye afarisɛ le nde ndo kakawawombola dikambo di’odiakelo wa diwala, Yeso akawaɛnya hwe kanyi ya Jehowa lo dikambo sɔ. L’etena kɛsɔ, Ɛlɛmbɛ wa Mɔsɛ waketawɔka di’omi fundɛ wadɛnde mukanda w’odiakelo wa diwala naka nde ambowɛna la “dikambu dimotshi dia sonyi,” koko aha ngasɔ mbakadiakongɛma oma k’etatelo. (Eoh. 24:1, 2) Yeso akawatɛ ate: “Onto tshɛ ladiaka diwala la wadɛnde, naka aha l’ɔkɔkɔ wa monanyi ko ntshuka womoto okina, nde ambosala loseka.”—Mat. 19:3-9.

Etena kakawoke ɛtɛkɛta ɛsɔ, ambeki wa Yeso wakate ɔnɛ: “Naka ngasɔ mbele diwala, kete ndeka dimɛna ntshikala onyemba.” Yeso akâkadimola ate: “Aha anto tshɛ mbetawɔ ɛtɛkɛta ɛsɔ, koko paka wanɛ wakalongola losha. Nɛ dia ekɔ anto amɔtshi wakotɔ ɛlɛnga, ndo ekɔ anto amɔtshi waketɛma ɛlɛnga oma le anto akina ndo anto akina wakayaetɛ ɛlɛnga lo dikambo dia Diolelo dia l’olongo. Onto tshɛ lakoka mbetawɔ yoho ya lɔsɛnɔ shɔ etawɔ.”—Mat. 19:10-12.

Ɛlɛnga wa mɛtɛ mɛtɛ ele wanɛ waki kombotɔ l’akoka wa mbota kana wakakome ɛlɛnga l’ɔtɛ w’aksida ɛmɔtshi. Koko, ekɔ akina wakayaetɛ ɛlɛnga la lolango lawɔ hita. Kânga mbakokawɔ monga l’ohomba wa tshukana, vɔ mbahemɛka nsaki yawɔ ndo tshikalaka enyemba “lo dikambo dia Diolelo dia l’olongo.” L’ɛnyɛlɔ ka Yeso, vɔ mbetawɔka dia ntshikala enyemba l’oyango wa ndeka ndjasha l’olimu wa Diolelo. Vɔ kombotɔ la losha la lonyemba kana lilongola lo yoho y’ehekesa. Vɔ waketawɔ dia ntshikala enyemba ko yema yema wamboyonga oko anto wele la losha lakɔ.

Dia nkeketsha kanyi yaki Yeso, ɔpɔstɔlɔ Pɔɔlɔ akɛnya dia kânga mbakoka Akristo tshɛ, enyemba kana atshukanyi kambɛ Nzambi lo yoho yetawɔnde, wanɛ ‘wamboyashikikɛ l’etema awɔ’ dia ntshikala enyemba ndeka nsala ‘dimɛna.’ Lande na? Nɛ di’Okristo wambotshukana pombaka mbetsha wenya ande ɛmɔtshi ndo nkamba la wolo ande dia nkotsha ehomba w’olonganyi ande. Koko, Akristo w’enyemba koka ndjasha tshɛ lo tshɛ l’olimu wa Nkumadiɔndjɔ aha la mbidja yimba lo ɛkɛndɛ ɛsɔ. Vɔ mbɔsaka diɛsɛ sɔ oko “losha” l’oma le Nzambi.—1 Kɔr. 7:7, 32-38.

Ɔnkɔnɛ, Afundelo hawototɛ di’Okristo nongolaka losha la lonyemba lo yoho y’ehekesa. Koko nde mongaka la losha lɔsɔ lo ntshikala onyemba l’oyango wa ntɔla wahɔ wa Diolelo la ntondo, aha la monga l’awui w’ekola yimba. Akristo efula wa nshi nyɛ wakayashikikɛ l’etema awɔ dia ntshikala enyemba l’ɔtɛ w’ɔkɔkɔ akɔ wâmɛ, ndo anto akina wayosala dimɛna naka vɔ mbakeketsha.

[Osato wa lo lɛkɛ 20]