ƆKƆNDƆ 27
Nkumekanga ka kɔlɔ ambolɛ l’Edjibito
APAMI anɛ wekɔ lo kambisha anto olimu la wolo. Ohenda pami kengo kakɔmɔla ose olimu ɔmɔtshi fimbɔ! Ase olimu wekɔ lo nkumbo ka Jakɔbɔ, ndo vɔ mbaelɛka ɔnɛ: Ase Isariyɛlɛ. Ndo apami wâkambisha olimu la wolo, Ase Edjibito mbewɔ. Ase Isariyɛlɛ waya fumbe y’Ase Edjibito. Woho akɔna wakasalema dikambo sɔ na?
Nkumbo ka woke kaki Jakɔbɔ kakadjasɛ ɛnɔnyi efula lo wɔladi l’Edjibito. Yɔsɛfu, ɔnɛ laki onto l’ohomba efula l’Edjibito malale nkumekanga Farawɔ, akâkokɛka. Koko Yɔsɛfu akayovɔ. Ko Farawɔ k’oyoyo, kaki konangaka Ase Isariyɛlɛ, akayokomaka nkumekanga l’Edjibito.
Omalɔkɔ, Farawɔ ka kɔlɔ kɛsɔ akayokonya Ase Isariyɛlɛ fumbe. Ko nde akadje apami wa mpɛnyɛ ndo w’ekonda ewandji awɔ. Vɔ wakakambishaka Ase Isariyɛlɛ olimu a wolo wa mbikɛ Farawɔ esomba. Koko Ase Isariyɛlɛ wakatafulanɛka tsho. L’ɔkɔngɔ Ase Edjibito wakakitɛ lo mboka wɔma ɔnɛ Ase Isariyɛlɛ wayoyonga anto efula ndo wolo.
Onde wɛ mbeyaka kɛnɛ kakasale Farawɔ? Nde akatɛ amato wakôtshaka wa mama y’Ase Isariyɛlɛ ate: ‘Nyu pombaka ndjaka ɔna tshɛ la pami layôtɔka.’ Koko vɔ waki amato w’ɛlɔlɔ, ndo vɔ kondjaka ana.
Omalɔkɔ, Farawɔ akadjangela anto ande tshɛ ate: ‘Nyodiakake ana w’Ase Isariyɛlɛ tshɛ w’apami. Nyutshikake paka ana wa amato la lɔsɛnɔ.’ Onde ɔsɔ kondjala mɛtɛ didjango dia kɔlɔ oka? Tênde woho ɔnɛ wakake ɔna pami ɔmɔtshi.