Tokambe L’anima Aso Tshɛ
1 Awui efula wekɔ wahombaso monga la lowando le Jehowa. Oko ɛnyɛlɔ, kɛnɛ kakandatosalɛ lo nshi ya ntondo, katosalɛnde nshi nyɛ ndo kayondotosalɛ nto lo nshi yayaye. Lowando laso pombaka tosokoya dia ntsha na? Osambu ɔmɔtshi wa Davidi kadimolaka ɔnɛ: “Dimi layutumbulaka [Jehowa, NW] tena tshe. Diandu diandi diayuyalaka l’unyo ami la lushi la lushi.”—Osam. 34:1.
2 Bible mɛnyaka hwe ɔnɛ sho pombaka sambisha. Sho kambaka olimu ɔsɔ ‘l’anima aso tshɛ, oko wa Jehowa.’ (Kol. 3:23) Naka tekɔ lo kamba mɛtɛ olimu l’anima aso tshɛ, lo yɛdikɔ yakɔna yayotôkamba? Lam’akanaso yimba lo ngandji katôka Jehowa, mɛtɛ otema aso totshutshuyaka dia tɛkɛta l’ohetoheto dia dikambo diande ndo dia asangwelo ande wa diambo. Tekɔ la saki ka sala kɛnɛ tshɛ kokokiso sala.
3 Sunganaka sho mbuta ɔnɛ onto lakamba l’anima ande tshɛ kombolaka monga la yimba yoshikimadi l’olimu ande w’ekila. Omembi w’esambu, ɔnɛ lakakanaka ɔsɔku, akate ate: “Dimi latukandulaka tena esambeli lu lushi.” (Osam. 119:164) Wanɛ wele l’omembi w’esambu nsaki yâmɛ nyangaka dia kondja ɛlɔlɔ oma lo akoka wele la wɔ wa tombola Jehowa. Lo ndjela akambo wele la wɔ, vɔ salaka tshɛ kokokiwɔ sala dia kamba l’ohetoheto.
4 Tekɔ la Waaso Efula wa Tombola Jehowa: Kema ohomba dia kongɛ paka lo luudu la luudu dia sambisha lokumu l’ɔlɔlɔ. Asekaso wa l’olimu, angɛnyi aso wa la kalasa, ase nkumbo kaso ndo wanɛ weyana la so wekɔ l’ohomba wa mboka losango la Diolelo. Lam’eso lo wɛ̂ngɔ, sho kokaka tatɛ asawo, wayokoka ondo tokonya lo sambisha, wanɛ wakamba l’ɔtɛlɛ, ase olimu wa lo rɛstora kana wasondja mazoto, kana wa toshufɛlɛ ta taxi. La ngelo, sho mbeyaka sambisha asukanyi aso. Naka tambɔtɔ lo lopitadi la hemɔ, sho kokaka sambisha ɛfɛlɛmɛ, adɔkɔtɛlɛ ndo ɛkɔnyi ekina lo yoho ya tshakitudi.
5 Esambishelo ka lo Tshakitudi Tondjaka Elowa: Lushi lɔmɔtshi, lam’akawatetetaka l’ekambɔ ka wa nyama, Ɛmɛnyi ehende wakatatɛ kɛtshanya l’ɔlɔngɔ ɔmɔtshi wakatɛngɔlaka l’ɔnande. L’edjedja a wonya, pami kɛsɔ nde la wadiɛnde wakayɔtɔka lo mɛtɛ. Ɔlɔngɔ ɔsɔ akayetawɔka ɔnɛ, yema la ntondo ka nde pomana l’Ɛmɛnyi ehende akɔ mbala ka ntondo, nde akalɔmbɛ Nzambi ate: ‘Naka mɛtɛ wɛ ekɔ, okimanyiya dia dimi nkêya.’ Le nde, ohomanelo wa l’ekambɔ ka wa nyama aki okadimwelo waki Jehowa lo dɔmbɛlɔ diande.
6 Wanɛ wayasha l’anima awɔ tshɛ lo saki kawɔ ka kimanyiya anyawɔ lo nyuma kondjaka ɔngɛnɔngɛnɔ efula. Vɔ mbeyaka ɔnɛ olimu ɔsɔ, wakambawɔ “l’otema otoi,” ngɛnyangɛnyaka Jehowa.—1 Ek. 28:9.