Mbetawɔ Têtɛka Anto Wa Lotutsha Ndo Wayasha Efula Lo Dɔmbɛlɔ
“[“Nyonge la lotutsha,” “NW”]; nyushikike etema anyu, ne dia [“wôngelo wa,” “NW”] Khumadiondjo [w]aya suki.”—JAKOBA 5:8.
“WÔNGELO” wa Yeso Kristo wambotokongɛ edja efula wambɛnama ɛlɔ kɛnɛ. (Mateo 24:3-14, NW) Ɛlɔ kɛnɛ oleki nshi ya ntondo, wanɛ wayata ɔnɛ wekɔ la mbetawɔ le Nzambi la le Kristo wambokoka kana yimba ɔlɔlɔ l’ɛtɛkɛta ɛnɛ waki ombeki Jakɔba: “[“Analengo, nyonge la lotutsha,” NW], . . . edja ndu [“lo wôngelo wa,” NW] Khumadiondjo. Enda, ukambi ekambo atukungelaka dinela di’ololo dia diango diakandune lu kete. Ndi [“atongaka l’otema a lotutsha,” NW] edja ndu lam’ayolo mvula ka ntundu la ka l’okongo. Ndu nyu [“nyonge la lotutsha,” NW], nyushikike etema anyu, ne dia [“wôngelo wa,” NW] Khumadiondjo aya suki.”—Jakoba 5:7, 8.
2 Wanɛ wakafundela Jakɔba mukanda ande l’ɛlɔmbwɛlɔ ka nyuma wakahombe monga l’etema a lututsha ndo kandola ekakatanu a weho la weho waki lawɔ. Efula wakatshaka awui wahɔtɔnɛ la wanɛ wayata ɔnɛ wekɔ la mbetawɔ le Nzambi. Oko ɛnyɛlɔ, yɛdikɔ mɔtshi yakahombe mbɔsama lo dikambo dia nsaki mɔtshi yakafulanɛka l’etema w’anto amɔ. Aki ohomba mbidja wɔladi l’asa Akristo asɔ wa l’eleko ka ntondo. Anto asɔ waki nto l’ohomba w’alako dia monga l’etema a lotutsha ndo ndjashaka efula l’alɔmbɛlɔ. Oko wɔnaso sɛdingola kɛnɛ kakawatela Jakɔba, nyɛsɔ tende nganɛ wakokaso kamba l’ɛtɛkɛta ande lo nsɛnɔ yaso.
Nsaki ya Kɔlɔ Nanyaka Onto
3 Wɔladi komonga l’asa anto amɔtshi wakayataka ɔnɛ Akristo mbewɔ, ndo nsaki ya kɔlɔ mbaki kiɔkɔ ya dui sɔ. (Jakoba 4:1-3) Ewanu akâkakitolaka, ndo amɔtshi wakakanɛka anangɛwɔ kɔlɔ aha la mbaoka ngandji. Vɔ wakatshanelaka ngasɔ nɛ dia nsaki ya wolo ya ndjangɛnyangɛnya yakatetemalaka lo ta diakalɔmaka lo alemba awɔ. Ondo ndo shamɛ mbeyaka mɛna ohomba wa nɔmba ekimanyielo dia shika tanga la ntondo ka nsaki ya wolo ya l’emunyi ya monga la lokumu, la lowandji, ndo la mbo ya l’emunyi di’aha sho ndjosala vwi wui mɔtshi dia fukutanya wɔladi wa l’etshumanelo. (Romo 7:21-25; 1 Petero 2:11) L’atei w’Akristo amɔ wa l’eleko ka ntondo, ɔkɔmiya akaleke efula ko vɔ ndjôta ndo lohetsho la yimba y’ewanu. Lam’ele Nzambi hetawɔ alɔmbɛlɔ wasalawɔ lo ndjela nsaki yawɔ ya kɔlɔ, vɔ tetemalaka sala la wolo tshɛ dia kotsha eyango awɔ. Naka ndo sho mbele la nsaki ya kɔlɔ ya ngasɔ, kete sho mbeyaka nɔmba ko hatotokondja kɛnɛ kalɔmbaso, nɛ dia Nzambi kaso k’ekila hetawɔ alɔmbɛlɔ wa ngasɔ.—Delu dia Jeremiya 3:44; 3 Joani 9, 10.
4 Akristo amɔ wa l’eleko ka ntondo waki la saki ka lomombo, akanga w’ɔkɔmiya ndo wa lotamanya. (Jakoba 4:4-6) Jakɔba akelɛ amɔtshi ate “akanga a munanyi” nɛ dia vɔ wakɔtɔ l’andja ɔnɛ ɔngɛnyi, ɔnkɔnɛ wakasalaka loseka la lo nyuma. (Ezekiyele 16:15-19, 25-45) Mɛtɛ, sho hatolange monga oko ase andja ɔnɛ lo lɔkɛwɔ laso, l’ɛtɛkɛta, ndo l’etsha nɛ dia dui sɔ mbeyaka ndjotêtɛ atunyi wa Nzambi. Dui diande tɛnyaka ɔnɛ: ‘ɔkɔmiya’ ekɔ ɔtɔi ɔmɔ l’atei wa nsaki ya kɔlɔ, kana ‘yimba’ yele l’otshi w’akambo wa kɔlɔ. (Etatelu 8:21; Walelu 16:1-3; Osambu 106:16, 17; Undaki 4:4) Omalɔkɔ, naka sho nangaka minya yimba y’ɔkɔmiya, y’ɔsɛmɔ, kana tokanyi tokina tshɛ ta kɔlɔ, kete tɔlɔmbɛ Nzambi dia nde tokimanyiya la nyuma kande k’ekila. Wolo ɔsɔ watosha Nzambi oma lo ngandji kande k’otamanya ndeka ‘nsaki k’ɔkɔmiya’ wolo. Ndo lam’ele Jehowa halange otako, nde ayotɛnya ngandji kande k’otamanya naka sho ndɔshana la nsaki ya kɔlɔ.
5 Ngande wakokaso mɛna ɔnɛ Nzambi ekɔ la ngandji k’otamanya oya le so na? (Jakoba 4:7-10) Dia Jehowa tɛnya ngandji kande k’otamanya, sho la dia mbɔlɛmia, mbetawɔ mma dia lo nyuma diatoshande, ndo kɛnɛ tshɛ kalangande. (Romo 8:28) Nto, sho la dia ‘sɛmanɛ’ la Diabolo kana ‘mbohangakalɛ.’ Nde ‘ayotolawɔ’ naka sho shika tanga oko atɛmɔdi wa Jehowa wâmɛ lowandji lande la l’andja w’otondo. Yeso ekɔ lo tokimanyiya, nde ɔnɛ ladja wolo w’anto wa kɔlɔ wa l’andja ɔnɛ l’ashi di’aha vɔ toshila oshiki. Ndo, tatohɛke ndoko lushi ɔnɛ: Oma l’alɔmbɛlɔ, l’okitanyiya, la mbetawɔ kaso, sho ndjasukanyaka la Nzambi, ndo nde ndjasukanyaka la so.—2 Ekondo 15:2.
6 Ko bonde kata Jakɔba ɔnɛ anto amɔtshi wayata ɔnɛ wekɔ la mbetawɔ le Nzambi wekɔ ‘atshi wa pɛkato’ na? Nɛ dia vɔ mbele l’onongo wa ‘ata’ wakalɔma la wa nyemba y’anto yakadiakema—lɔkɛwɔ lahakoke Akristo monga alɔ. (Tito 3:3) Vɔ wakahombe mbɔtsha ‘anya’ wakalole l’awui wa mindo. Nto, vɔ wakahombe mbɛdia “etema” awɔ, kiɔkɔ ya tokanyi t’onto tshɛ. (Mateu 15:18, 19) “Akanga w’etema ehendi” asɔ wakahakahakaka l’asa bɛkɛ pende: mbɔtɔ l’andja ɔnɛ ɔngɛnyi kana mbɔtɔ la Nzambi ɔngɛnyi. Oko wambowotewola di’aha ndjela ɛnyɛlɔ kawɔ ka kɔlɔ kɛsɔ, tosungukalake di’aha awui wa ngasɔ ndjɔlɛndja mbetawɔ kaso.—Romo 7:18-20.
7 Jakɔba akatɛ ambadi wa mukanda ande dia vɔ ‘ndjatshumoya, nyanga ndo ndela.’ Lonyangu lawɔ lɔtɔnɛ la lolango la Nzambi lotosha djembetelo y’ɔnɛ vɔ wekɔ la ndjatshumoya. (2 Koreto 7:10, 11) Ɛlɔ kɛnɛ, anto amɔ wata ɔnɛ vɔ wekɔ la mbetawɔ nyangaka dia mbɔtɔ ɔngɛnyi l’andja ɔnɛ. Ko naka mboka ka ngasɔ mbatatayele, onde hatokoke ndjakiyanya dia lonyuma laso laya wɔɔdu ndo mbɔsa tɛdikɔ esadi esadi dia nɔngɔsɔla dui sɔ oka? Naka sho sala etshikitanu wahombama ndo kondja edimanyielo oma le Nzambi, kete tayɔngɛnangɛna nɛ dia taya la nkum’otema ka pudipudi ndo l’elongamelo ka lɔsɛnɔ la pondjo.—Osambu 51:10-17; 1 Joani 2:15-17.
Tatolomboshanake
8 Bu dimɛna tɛkɛta kɔlɔ lo lokombo la onyaso ombetawudi. (Jakoba 4:11, 12) Eelo, anto amɔ mɔnyɔlaka anyawɔ Akristo, ondo dui sɔ ndjâka oma lo woho wayakanawɔ ɔnɛ vɔ mboleki anto w’ɛlɔlɔ ko kana nɛ dia vɔ nangaka monga la lokumu l’efula ko mɛnɛ̂ka akina. (Osambu 50:20; Tukedi 3:29) Tshɛkɛta ya lo Grɛkɛ yokadimudiwɔ ɔnɛ ‘tɛkɛta kɔlɔ lo lokombo l’onto’ kɛdikɛdi petsha onto, mbɔnyɔla, kana mbomamatanyiɛ awui a kashi. Dui sɔ hadiotshikitanyi l’onto lalomboya ɔnango la lohetsho. Ko bonde kele onto latsha ngasɔ ‘tɛkɛtaka kɔlɔ di’ɛlɛmbɛ a Nzambi ndo mbâlomboyaka’ na? Eelo, afundji l’Afarisɛ ‘wakakadjaka ɛlɛmbɛ a Nzambi l’okonda’ ndo wakalomboyaka anto l’ɛlɛmbɛ awɔ vamɛ. (Mako 7:1-13) Woho akɔ wâmɛ mbele, naka tambosha ɔnangɛso ɛkɔmɔ kɛna Jehowa ate nde hatshe kɔlɔ, onde lâsɔ, hatotɔfɔna l’onto ‘lalomboya ɛlɛmbɛ a Nzambi’ ndo mɛnya ɔnɛ ɛlɛmbɛ ande wekɔ anyanya oka? Ndo naka sho mɔnyɔlaka anangɛso wɔnyɔla ɔnyɔla, kete tambolengola ɔlɛmbɛ watɔlɔmba dia sho mbokana ngandji.—Romo 13:8-10.
9 Tatohɛke ɔnɛ: “Otoi keli umbidji w’elembe la usambudi”—Jehowa. ‘Ɛlɛmbɛ ande wekɔ kokele,’ vɔ bu wɛngɛngɛ. (Osambu 19:7; Isaya 33:22) Paka Nzambi mbele la lotshungɔ la mbidja ɛlɛmbɛ la adjango dia panda kaso. (Luka 12:5) Diakɔ diambola Jakɔba ate: “Ko wɛ ɔnɛ lalomboya onyaawɛɛ, ayaakanyiyɛɛ onde?” Sho bu la dikimɔ dia nombosha kana manya anto akina. (Mateu 7:1-5; Romo 14:4, 10) Naka sho kanyiya nganɛ wele lowandji la Nzambi, woho wahande la shɔnɔdi ndo dia munga yaso shamɛ, kete dui sɔ la dia toshimba di’aha sho nomboyaka anto akina ko ndjaɔsaka oko anto waha l’ɛkɔmɔ.
Tôngake Kanga Ofunu ndo Djong’Ewo
10 Tɛkamake Jehowa la ɛlɛmbɛ ande nshi tshɛ. (Jakoba 4:13-17) Onto lahadje Nzambi yimba ndo layâkana mbutaka ate: ‘Ɛlɔ kana lui, tayotshɔ l’osomba kapanda, tayotetsha ɔnɔnyi lɛkɔ, tayototsha okanda ndo tayotokondja falanga.’ Koko naka ‘sho ndjamɔtshɛka diangɔ ko sho bu ɔngɔnyi le Nzambi,’ kete lui kɛnɛ sho mbeyaka mvɔ ko pomba diaaso dia kambɛ Jehowa. (Luka 12:16-21) Oko wadita Jakɔba, Sho tekɔ oko loonge la pindju “lateneka etenyi ka tshitshe, ku latushishoka.” (1 Ekondo 29:15) Onyake sho mboyadi la mbetawɔ le Jehowa ko sho nongamɛ kondja ɔngɛnɔngɛnɔ ndo lɔsɛnɔ la pondjo.
11 Lo dihole dia sho ndjâsɛma ko mboka Nzambi ɔkɔngɔ, katotake ɔnɛ: “Naka [Jehowa] alanga, tayuyala la lumu, ku tayutsha okone kana osoku.” Mbuta ɔnɛ ‘naka Jehowa alanga’ mɛnyaka ɔnɛ sho salaka tshɛ dia ndjaɔtɔnganyiya la lolango lande. Ondo sho mbeyaka mɛna dimɛna sala okanda dia kimanyiya nkumbo kaso, kana ntshɔ lo nkɛndɔ y’olimu wa Diolelo, ndo awui akina. Koko, tatɔsɛmake. “Utaku one tshe, eko kolo” nɛ dia vɔ mɛnyaka ɔnɛ hatête la Nzambi.—Osambu 37:5; Tukedi 21:4; Jeremiya 9:23, 24.
12 Ondo dia nde kumiya l’ɛtɛkɛta ande wendana la lotamanya ndo l’onto lele djong’ewo, Jakɔba ambota ate: “Okone untu leya ntsha dikambu di’ololo, keli haditshi, dikambu diako dieko [“pɛkato,” NW] le ndi.” Okristo tshɛ la dia mbetawɔ la ndjakitshakitsha tshɛ ɔnɛ le Nzambi mbendɛnde. Naka nde hatshe ngasɔ, kete “dikambu diako dieko [“pɛkato,” NW] le ndi.” Lo mɛtɛ, pɛkato ka ngasɔ mendanaka ndo l’onto tshɛ lahasale kɛnɛ kahombama le wanɛ wele la mbetawɔ le Nzambi.—Luka 12:47, 48.
Wambewola Akanga w’Ɛngɔnyi
13 Nɛ dia Akristo amɔ wa l’eleko ka ntondo wakayokomaka anangi wa mbo ya l’emunyi kana wakayomɛ kombola ɔngɔnyi, Jakɔba ambotɛ akanga w’ɛngɔnyi amɔ awui wâkɛtsha asolo. (Jakoba 5:1-6) Anto wa l’andja ɔnɛ wakamba l’ɛngɔnyi awɔ lo yoho ya kɔlɔ ‘wayolela, wayâwana lo dikambo dia pokoso kayowakomɛ’ lam’ayowafuta Nzambi lo ndjela etsha awɔ. Lo nshi shɔ, ɔngɔnyi w’anto efula wakɛnamaka lo diangɔ diele oko ahɔndɔ, mbo ya ndɛ, la wanu. (Joele 2:19; Mateu 11:8) Lo diangɔ sɔ diaki lawɔ, dimɔ diakakokaka mbɔtɔ matadi kana ‘loombo,’ koko Jakɔba ekɔ lo tɛtɛ lanɛ, aha dia woho wakoka diangɔ diakɔ pɔnda, koko dia woho wediɔ anyanya. Kânga mbahakoke paunyi la fɛsa mbɔtɔ matadi, naka tayoyamɔtshɛkayɔ emete emete, kete yɔ mbeyaka ndjonga anyanya oko diangɔ diambɔtɔ matadi. ‘Matadi’ mɛnyaka ɔnɛ onto kokamba l’ɔngɔnyi ande wa l’emunyi lo yoho y’ɔlɔlɔ. Omalɔkɔ, tatohɛke ɔnɛ ‘yangɔ yele oko dja’ mbele wombo ‘wambetɛ anto wêndɛ paka lo ɛngɔnyi awɔ wa l’emunyi l’etena k’ekomelo kɛnɛ’ lam’ayoya kɛlɛ ka Nzambi le wɔ. Lam’ele tekɔ lo nsɛna “l’etena k’ekumelu,” lo yoho ya lânde, awui wa ngasɔ têndaka mɛtɛ.—Danyele 12:4; Romo 2:5.
14 Mbala efula, akanga w’ɛngɔnyi kesaka wanɛ wawanɛ diangɔ lo dikambɔ diawɔ, lam’ele hawafute, vɔ ‘mbudaka ekoko’ ɔnɛ kele wâsambole. (Ɛdika la Etatelu 4:9, 10.) Akanga w’ɛngɔnyi wa l’andja ɔnɛ ‘wakɔkaka lo diɛngɔ.’ Lam’ele vɔ ndjangɛnyangɛnyaka ɔtɛkɔya, vɔ wamboyasha paka lo dishi, etema awɔ waya lonyû ndo wayotetemalaka sala awui asɔ polo ndo “lushi” layowodiakema. Vɔ ‘mamiaka anto akana waha l’onongo ndo mbadiakaka.’ Jakɔba ate: ‘onde vɔ wakanyohangakalɛ oka?’ Kana oko wata Ekadimwelo kɛmɔtshi ɔnɛ: “onto ɔlɔlɔ; nde hanyɔsɛmɛ wolo.” Tatongake la shɔnɔdi ya mbɛkamaka paka akanga w’ɛngɔnyi. Sho la dia mbidja wahɔ wa lo nyuma lo dihole dia ntondo lo lɔsɛnɔ laso.—Mateu 6:25-33.
Mbetawɔ Tokimanyiyaka dia Sho Monga la Lotutsha
15 L’ɔkɔngɔ wa nde tɛkɛta dikambo di’akanga w’ɛngɔnyi wɛnya anto pâ l’andja ɔnɛ, kakianɛ Jakɔba ôkeketsha Akristo wɛngiyawɔ dia vɔ monga la lotutsha. (Jakoba 5:7, 8) Naka ambetawudi wayokikɛ ekakatanu awɔ l’asolo a lotutsha, kete wayofutama dikambo dia kɔlamelo yawɔ lo nshi ya wôngelo wa Kristo, lam’ayowokoya l’anto wakâsoyaka. (Mateu 24:37-41) Akristo wa ntondo asɔ wakahombe monga oko okambi w’ekambɔ wakongɛ nshi y’avula l’asolo a lotutsha woho wa nde monɛ, ndo nshi y’ɔwɔ dia nde ndjona kɛnɛ kakandonɛ. (Joele 2:23) Sho lawɔ la dia monga l’asolo a lotutsha ndo keketsha etema aso, djekoleko lo nshi nyɛ ya “wôngelo wa Kumadiɔndjɔ” Yeso Kristo!
16 Bonde kahombaso ndjâla l’asolo a lotutsha na? (Jakoba 5:9-12) Lotutsha tokimanyiyaka di’aha sho kunyama kûnya kana kiyana naka onyaso ombetawudi ambotomadja. Naka ‘sho momalanɛ’ la kanyi ya kɔlɔ, kete Yeso Kristo Shushi yaso ayoyotâmia. (Joani 5:22) Ɛlɔ kɛnɛ kele “wôngelo” ande wambɛnama ndo ‘kayande ka soko,’ nyɛsɔ toyelake wɔladi lo mongaka la lotutsha otsha le anangɛso wahembama efula lo mbetawɔ yawɔ. Mbetawɔ kaso keketshamaka lam’ohɔso ɔnɛ Nzambi akafute Jɔbɔ lo woho wakandakikɛ ehemba ande la lotutsha. (Jobo 42:10-17) Naka tayongaka la mbetawɔ ndo la lotutsha, kete tayɛna ɔnɛ ‘Jehowa ekɔ kanga ɔlɔlɔ w’efula ndo lokana kɛtshi.’—Mika 7:18, 19.
17 Naka hatungi la lotutsha, kete sho kokaka ndjokamba la lolemi laso lo yoho ya kɔlɔ wonya weso la nkɛlɛ. Oko ɛnyɛlɔ, sho mbeyaka ndjotshika etunyi esadi eto aha la kanyiya. Jakɔba ate: “tanyutshibaki,” mbut’ate aha vɔ tshiba otshibatshiba. Aha wonya tshɛ mbele, dia mbetawɔ dui dimɔtshi paka tshiba, onto ɔsɔ ekɔ oko kanga dungi pende. Koko sho la dia mbutaka mɛtɛ keto, sala dia eelo kaso kayale eelo, ndo kema, kema. (Mateu 5:33-37) Mɛtɛ, Jakɔba hatoshimbe tshiba dia mbuta mɛtɛ naka wambotelɛ lo tuminadi.
Mbetawɔ la Alɔmbɛlɔ Aso
18 Dɔmbɛlɔ diekɔ ohomba efula lo lɔsɛnɔ laso naka sho nangaka sɔna ɛtɛkɛta wa tondja, monga la lotutsha, ndo monga la mbetawɔ ka nge le Nzambi. (Jakoba 5:13-20) ‘Katotetemalake nɔmba’ djekoleko lam’eso l’ehemba. Naka tekɔ l’ɔngɛnɔngɛnɔ, ko sho ‘memba esambu,’ oko akasale Yeso l’apɔstɔlɔ ande lam’akandahɔhɔla dambo dia Eohwelo ka nyɔi kande. (Mako 14:26) Mbala mɔtshi, sho kokaka tombola Nzambi l’esambu l’otema aso dia mbôka losaka. (1 Koreto 14:15; Efeso 5:19) Ande ɔlɔ tombola Jehowa l’esambu lo nsanganya y’Akristo lee!
19 Sho mbeyaka mboka wolo memba naka taya la hemɔ lo nyuma, ondo nɛ dia takatshe dui dimɔ dia kɔlɔ ko kana hatoyɔlɛ nshi tshɛ lo mɛsa wa Jehowa. Naka ngasɔ mbayaokaso, kete têle dikumanyi l’okitshakitsha tshɛ dia vɔ ‘ndjotɔlɔmbɛ.’ (Tukedi 15:29) Ndo nto, vɔ ‘wayoyotokita esɔ lo lokombo la Jehowa.’ Oko esɔ ka yɔɔyɔ lo mpota, ɛtɛkɛta w’ekeketshelo la alako awɔ w’oma l’Afundelo wayokimanyiya ɔnɛ lambɔkɔmɔ, ɔnɛ ladja tamu ndo lele la wɔma. ‘Alɔmbɛlɔ wa mbetawɔ wayotokalanganya’ naka sho mbasukɛ la mbetawɔ kaso shamɛ. Naka dikumanyi wambɛna ɔnɛ pɛkato ka woke mbele lo kiɔkɔ ya hemɔ kaso ka lo nyuma, kete l’ɔlɔlɔ tshɛ, vɔ wayototɛ woke wa pɛkato kaso ndo wayosala tshɛ dia tokimanyiya. (Osambu 141:5) Ndo naka sho ndjatshumoya, kete sho kokaka mbetawɔ ɔnɛ Nzambi ayoka alɔmbɛlɔ awɔ ko ayotodimanyiyɛ.
20 ‘Naka tayoshwanɛka pɛkato yaso’ kete tayokondja ekimanyielo di’aha sho ndjosala pɛkato nkina l’ɔkɔngɔ. Kɛsɔ mbayotokeketsha dia sho mbokana kɛtshi, dionga diatɔsɛngiya dia sho ‘nɔmbanɛka.’ Sho kokaka mbetawɔ ɔnɛ dui sɔ diayotokimanyiya nɛ dia dɔmbɛlɔ ‘di’onto ɔlɔlɔ’—onto lele la mbetawɔ ndo la losembwe lo washo wa Nzambi—kokaka ntsha akambo wa weke l’ekimanyielo ka Jehowa. (1 Petero 3:12) Omvutshi Elidja aki la wɛɔdu ɛmɔtshi oko sho, koko alɔmbɛlɔ ande waki la nkudu. Nde akalɔmbɛ di’aha mvula ndɔ, ko mvula kɔndɔ l’edja k’ɛnɔnyi esato l’etenyi. Lam’akandayɔlɔmbaka nto dia tɔ ndɔ, tɔ kakalɔ.—1 Khumi ya Dikanga 17:1; 18:1, 42-45; Luka 4:25.
21 Kayotota naka ose etshumanelo ɔmɔtshi “ambunganela uma lu [“akambo wa,” NW] mete,” ambotshika wetshelo wa mɛtɛ ndo lɔkɛwɔ l’ɔlɔlɔ na? Sho mbeyaka mbongola oma lo munga kande lo tshimbo y’alako wa Bible, dɔmbɛlɔ, kana mbokimanyiya woho okina. Naka tambôkimanyiya, kete nde ayotetemala kondja wahɔ w’oma lo tshungo (rançon) kakafute Kristo ndo ayoshimbamɛ oma lo nyɔi ka lo nyuma ndo oma l’elanyelo. Lo kimanyiya onto lambonganɛ, sho kombaka efula ka pɛkato yande. Naka otshi wa pɛkato ambongɔ oma lo mboka kande ka kɔlɔ, amboyatshumoya, ndo ambɔlɔmba edimanyielo, kete tayɔngɛnangɛna nɛ dia takôkimanyiya dia komba pɛkato yande.—Osambu 32:1, 2; Jude 22, 23.
Mukanda wa Jakɔba Wekɔ l’Awui Watenda Sho Tshɛ
22 Lo mɛtɛ, mukanda wa Jakɔba wekɔ l’awui amɔ w’ohomba efula watenda sho tshɛ. Vɔ tɛnyaka woho wa mbikikɛ ehemba, tolakaka dia sho tshika shɔnɔdi ndo woho wa sho tetemala kɛndakɛnda lo mboka k’osembwe. Jakɔba tolakaka dia sho nama lolemi laso, dia shika tanga la ntondo ka tɔsɛngiya t’andja ɔnɛ, ndo dia mbesa wɔladi. Awui ande totshutshuyaka nto dia sho monga la lotutsha ndo ndjashaka efula lo dɔmbɛlɔ.
23 Eelo, mukanda wa Jakɔba akatomama ntondo paka le Akristo w’akitami wa l’eleko ka ntondo. Koko, sho tshɛ la dia sala di’alako awɔ tokimanyiya dia sho kukutɛ mbetawɔ kaso. Awui wakafunde Jakɔba kokaka tokeketsha lo mbetawɔ dia sho mbɔsa tɛdikɔ dia ntsha awui w’ɛlɔlɔ l’olimu wa Nzambi. Ndo nto, mukanda ɔnɛ wakafundama l’ɛlɔmbwɛlɔ ka nyuma k’ekila kaki Nzambi keketshaka mbetawɔ kaso katêtɛ akanga wa lotutsha, sho Ɛmɛnyi wa Jehowa wa nshi nyɛ ya ‘wôngelo wa Nkumadiɔndjɔ’ Yeso Kristo ndo wayasha efula lo dɔmbɛlɔ.
[Study Questions]
1. Bonde kahombaso kanaka yimba l’ɛtɛkɛta wa lo Jakoba 5:7, 8?
2. Naa ekakatanu ɛmɔtshi wakahomanaka la wanɛ wakafundɛ Jakɔba mukanda ande?
3. Kakɔna kaki lo kiɔkɔ y’ewanu wa l’etshumanelo, ndo wetshelo akɔna wakondjaso oma lo dikambo sɔ na?
4. Bonde kakelɛ Jakɔba Akristo amɔtshi ɔnɛ “akanga a munanyi,” ndo ngande watenda etelo kande kɛsɔ?
5. Dia Nzambi tɛnya ngandji kande k’otamanya, tɛdikɔ takɔna tahombaso kotsha?
6. Lande na kakelɛ Jakɔba Akristo amɔtshi ɔnɛ ‘atshi wa pɛkato’?
7. Lande na kakatɛ Jakɔba amɔtshi ɔnɛ ‘wade ekoko ndo walele’?
8, 9. Bonde kahatahombe tɛkɛta kɔlɔ lo lokombo l’onto kana nomboshana lam’asaso?
10. Bonde kahombaso mbidjaka Jehowa yimba lo lɔsɛnɔ laso la lushi la lushi?
11. Mbuta ɔnɛ ‘naka Jehowa alanga’ alembetshiyande?
12. Awui wa lo Jakoba 4:17 alangawɔ nembetshiya?
13. Jakɔba atande lo dikambo dia wanɛ waheye kamba l’ɛngɔnyi awɔ?
14. Mbala efula, ngande watotshaka akanga w’ɛngɔnyi, ndo ahombaso ntsha lo dikambo sɔ?
15, 16. Bonde kende ohomba efula monga l’asolo wa lotutsha?
17. Lande na kata Jakɔba ate: “Tanyutshibaki”?
18. La ntondo k’awui akɔna wahombaso ‘kɔlamɛka lo dɔmbɛlɔ’ ndo ‘memba esambu’?
19. Ahombaso sala naka totata lo nyuma, ndo lande na sala ngasɔ?
20. Lande na kahombaso mbishwanɛ pɛkato yaso ndo nɔmbanɛ lam’asaso na?
21. Kakɔna kakokaso sala naka onyaso Okristo ‘ambotakɔ mboka k’akambo wa mɛtɛ’?
22, 23. Ngande watenda awui wakafunde Jakɔba na?
[Caption]
[Questions]
[Caption on page 17]
[Caption on page 17]
Akristo amɔtshi wa lo nshi ya ntondo wakahombaka monga la lotutsha otsha le anyawɔ ambetawudi
[Caption on page 18]
[Caption on page 18]
Akristo pombaka monga la lotutsha, mbokana ngandji, ndo nɔmbaka efula
[Caption on page 19]
[Review on page 19]
Ngande Wayoyokadimola?
◻ Lande na kakahombe Akristo amɔtshi wa ntondo tshikitanya lɔkɛwɔ ndo dionga diawɔ na?
◻ Jakɔba ngande wakandewola akanga w’ɛngɔnyi?
◻ Lande na kahombaso monga la lotutsha?
◻ Lande na kahombaso nɔmbaka nshi tshɛ?