Tokoya solo dia lotutsha dia Jehowa
‘Jehowa kema ɔkɔkɛ lo kɛnɛ kendana la alaka ande. Kele nde ekɔ la solo dia lotutsha.’—2 PETERO 3:9.
1. Woshasha akɔna wahakoke mbɛdikama wakasha Jehowa anto?
JEHOWA akatosha ɛngɔ kɛmɔtshi kele ndoko onto okina lakoka toshatɔ. Tɔ kekɔ ɛngɔ ka dimɛna efula ndo k’oshinga wolo, ɛngɔ kahatakoke somba kana kondja oma lo wolo aso hita. Ɛngɔ kakɔ ko woshasha wa lɔsɛnɔ la pondjo. Le efula ka l’atei aso, kɛsɔ ayolembetshiya nsɛna lɔsɛnɔ laha la ekomelo lo paradiso ka la nkɛtɛ. (Joani 3:16) Ande ɔngɛnɔngɛnɔ wayoyala lee! Ndoko dikambo dia lonyangu diayoyala, mbuta ate ekiyanu, awui wa ngala, wola, diakatanelo, hemɔ ndo kânga nyɔi hoyala nto. Anto wayɔsɛna lo kokele, lo wɔladi wa mɛtɛ ndo lo kâmɛ lo ɛlɔmbwɛlɔ ka ngandji ka Diolelo diaki Nzambi. Ande woho wakombolaso Paradiso kɛsɔ lee!—Isaya 9:6, 7; Enyelo 21:4, 5.
2. Lande na kele Jehowa atalanya dikongɛ di’akambo dia kɔlɔ diaki Satana?
2 Jehowa ekɔ lo kongɛ etena kayondoshikikɛ Paradiso la nkɛtɛ. Ngasɔ mbediɔ mɛtɛ lo dikambo dia Jehowa nɛ dia nde nangaka sambo k’ɔlɔlɔ ndo losembwe. (Osambu 33:5) Nde hangɛnangɛna dia menda andja wele la wendjodi kana walɔshana la atɔndɔ ande wosembwe, mbuta ate, andja watona lowandji lande ndo wahɛnyahɛnya ekambi ande. Koko, ekɔ ɛkɔkɔ w’eshika wele nde atanya dikongɛ di’akambo dia kɔlɔ diaki Satana. Ɛkɔkɔ ɛsɔ mendanaka la ambola wa mbeya tshikitanya kɛnɛ kele ɔlɔlɔ la kɔlɔ lo dikambo dia lowandji lande. Dia kandola dui sɔ, Jehowa ekɔ lo kɛnɛmɔla dionga dimɔtshi diatokotola oya le nde, dionga diele efula ɛlɔ kɛnɛ kema ladiɔ, dionga diakɔ ko: solo dia lotutsha.
3. a) Naa kitshimudi ya tshɛkɛta ya lo Grɛkɛ ndo ya lo Hɛbɛru yokadimwami lo Bible ɔnɛ “solo dia lotutsha”? b) Ambola akɔna wayangaso sɛdingola kakianɛ?
3 Ekɔ tshɛkɛta ya lo Grɛkɛ yokadimwami mbala shato lo Traduction du monde nouveau ɔnɛ “solo dia lotutsha.” Yɔ nembetshiyaka ɔnɛ “yimba y’otale” ndo yɔ kadimɔmaka mbala efula ɔnɛ “wokikelo wa solo” ndo mbala ɔtɔi ɔnɛ “memakana.” Lo Grɛkɛ ndo lo Hɛbɛru tshɛkɛta “solo dia lotutsha” mbishaka kanyi ya ndjakimɛ ndo aha mboka kɛlɛ esadi. Ngande wakondjaso wahɔ oma lo solo dia lotutsha diaki Jehowa? Wetshelo akɔna wakondjaso oma lo solo dia lotutsha ndo lo ndjakimɛ ka Jehowa ndo k’ekambi ande wa kɔlamelo? Ngande weyaso ɔnɛ solo dia lotutsha diaki Jehowa diekɔ la elelo? Nyɛsɔ tɔsɛdingole awui asɔ.
Tokane yimba dikambo dia solo dia lotutsha diaki Jehowa
4. Lo kɛnɛ kendana la solo dia lotutsha diaki Jehowa, kakɔna kakafunde ɔpɔstɔlɔ Petero?
4 Ɔpɔstɔlɔ Petero akafunde lo kɛnɛ kendana la solo dia lotutsha diaki Jehowa ɔnɛ: “Elangimi ami, dikambu otoi ne mbahumbanyu mbeya nyati: Lushi otoi leli uku deku kinunu lu ashu wa Khumadiondjo, la deku kinunu dieko uku lushi otoi. [Jehowa] huhela dia nshidiya alaka andi, uku atedikaka antu wauhu awo, keli ndi eko la [“solo dia lotutsha,” NW]. Ndi halangi nduku omotshi nshisho, keli ndi nangaka tshe wakadimuli etema.” (2 Petero 3:8, 9) Tolembete akambo ahende wɛnyishami lanɛ wakoka tokimanyiya dia sho shihodia solo dia lotutsha diaki Jehowa.
5. Ngande wele woho wɔsa Jehowa tena ekɔ la shɛngiya lo kɛnɛ kasalande?
5 Wetshelo wa ntondo ele Jehowa hɔshi ɛnɔnyi woho wɔsaso. Le Ɔnɛ latotshikalaka pondjo pondjo, ɛnɔnyi kinunu wekɔ paka oko lushi ɔtɔi. Nde hasale akambo oko onto lele bu la wenya efula, ndo nde bu ɔkɔkɛ dia sala akambo. Oko wende la yimba yahakome, Jehowa mbeyaka etena koleki dimɛna ka sala dikambo dia wahɔ w’anto tshɛ wendana la dikambo sɔ ndo nde kongɛka la solo dia lotutsha lam’ayokoka etena kakɔ. Koko, hatohombe mbuta ɔnɛ Jehowa hadje yimba lo asui tshɛ wakoka ekambi ande diɛnɛ lawɔ l’etena kele nde akakongɛ dia nɔngɔsɔla akambo. Nde ekɔ Nzambi ka “ketshi ka mamba,” tshondotondo ya ngandji. (Luka 1:78; 1 Joani 4:8) Nde kokaka shidiya tshɛ lo tshɛ ndo lo pondjo wâle tshɛ wakoka ndja lo woho wetawɔnde dia asui monga lo tshanda mɔtshi.—Osambu 37:10.
6. Kakɔna kahatahombe mbuta lo dikambo dia Nzambi, ndo lande na?
6 Kema dui dia wɔdu dia kongɛ ɛngɔ kɛmɔtshi kakombolaso. (Tukedi 13:12) Ɔnkɔnɛ, etena kahatokotshaka anto alaka awɔ, akina mbeyaka mbuta ɔnɛ vɔ bu la mposa ka ntsha awui akɔ. Ayonga mɛtɛ dui di’enginya dia kanyiya ngasɔ lo dikambo dia Nzambi! Naka sho sala munga ka mbɔsa solo dia lotutsha diaki Nzambi oko nde ekɔ ɔkɔkɛ, kete woho watete tena mbeyaka ndjotokonya lo monga la tâmu ndo ndjɔkɔmɔ otema, ndo kɛsɔ mbeyaka ndjotokonya lo wâle wa ndala djɔ lo nyuma. Kɛnɛ koleki kɔlɔ ele, sho mbeyaka ndjonganyiyama oma le wanɛ wele Petero akatewodi la ntondo lo dikambo diawɔ, mbuta ate amɔnyɔdi, wanɛ waha la mbetawɔ. Anto asɔ mbutaka la lɔsɔkɔ tshɛ ɔnɛ: “Daka dia eyelu kandi, lend’edio? Ne dia umaka lushi lakavu watshesu, diango tshe dieko pupu uku akidio uma l’etatelu k’etungelu.”—2 Petero 3:4.
7. Ngande wele solo dia lotutsha diaki Jehowa mbɔtɔnɛka la nsaki kele lande ka anto kadimola etema?
7 Wetshelo wa hende wakokaso kondja oma lo ɛtɛkɛta wa Petero ele, Jehowa ekɔ la solo dia lotutsha nɛ dia nde nangaka dia anto tshɛ kadimola etema. Wanɛ watona la otako tshɛ dia tshika mboka yawɔ ya kɔlɔ wayolanyema oma le Jehowa. Koko, Nzambi hangɛnangɛna nyɔi k’onto a kɔlɔ. Nde ngɛnangɛnaka dia mɛna anto wakadimola etema, woka ditshelo diawɔ dia kɔlɔ ɔkɔngɔ dia vɔ tshikala la lɔsɛnɔ. (Ezekiyele 33:11) Diakɔ diele, nde ekɔ lo tetemala monga la solo dia lotutsha ndo ekɔ lo toma ekambi ande dia vɔ mbewoya lokumu l’ɔlɔlɔ lo nkɛtɛ k’otondo dia anto kondja waaso wa vɔ tshikala la lɔsɛnɔ.
8. Ngande wakɛnama solo dia lotutsha diaki Nzambi lo woho wakandongaka la wodja wa Isariyɛlɛ?
8 Solo dia lotutsha diaki Nzambi mɛnamaka nto lo woho wakandongaka la wodja w’Isariyɛlɛ w’edjedja. L’edja ka nkama y’ɛnɔnyi, nde akakikɛ ohedia awɔ. Oma lo tshimbo ya aprɔfɛta ande, nde akâkeketsha mbala la mbala ɔnɛ: “Nyukadimo uma lu mbuka yanyu ya kolo, nyukitanyia elembe ami la adjangu ami, uku elembe tshe wakamadjela washenyu, ndu wakamanyutumela le ekambi ami amvutshi.” Etombelo akɔna wakayala? Lonyangu ko, wodja “kûmbukela.”—2 Khumi ya Dikanga 17:13, 14.
9. Ngande wakakɛnɛmɔla Yeso solo dia lotutsha diaki She?
9 L’ekomelo, Jehowa akatome Ɔnande, lakatshe kɛnɛ tshɛ kakandakoke ntsha dia mbetawoya ase Juda dia vɔ pombaka sala dia mbokana nto la Nzambi. Yeso akakɛnɛmɔla solo dia lotutsha diaki She lo yoho ya kokele. Oko wakandeye dimɛna ɔnɛ nde ayanga ndjakema kema edja, Yeso akalele ate: “Yee, Jerusalema, Jerusalema, latudiakaka amvutshi, latukaka wane watuwukutumelaka ave! Ndi tena efula diakamalangi nsanganya an’aye, uku atusanganyaka wali a koko ana ato la tshina dia ahafu ato, keli nyu kunanga li!” (Mateu 23:37) Ɛtɛkɛta ɛsɔ wananda asolo kema waki shushi mɔtshi yahokana kɛtshi yalomolomɔ dia mbisha onto dilanya, koko wekɔ ɛtɛkɛta wa ɔngɛnyi woludi la ngandji wele la solo dia lotutsha otsha le anto. Oko She lele l’olongo, Yeso akakombola dia anto kadimola etema ndo pandɔ lo elanyelo. Amɔtshi wakakitanyiya ɛhɛmwɛlɔ waki Yeso ndo wakahandɔ lo elanyelo kakasalema la Jerusalɛma lo 70 T.D.—Luka 21:20-22.
10. Lo yoho yakɔna yakondjaso wahɔ oma lo solo dia lotutsha diaki Nzambi?
10 Kema solo dia lotutsha diaki Nzambi diekɔ mɛtɛ ɛngɔ ka diambo? Kânga mbakatɔmbɔkɔ anto efula, Jehowa aketawɔ dia onto tshɛ la l’atei aso kâmɛ ndo miliyɔ y’anto nkina, kondja diaaso dia mboweya ndo monga la elongamelo ka panda. Petero akafundɛ asekande Akristo ate: ‘Nyɔsɛ solo dia lotutsha dia Nkumadiɔndjɔ kaso oko panda.’ (2 Petero 3:15) Shi tekɔ la lowando lo woho wele solo dia lotutsha diaki Jehowa toshaka diaaso dia sho ndjoshimbamɛ? Shi sho tetemalaka nɔmba Jehowa dia monga la solo dia lotutsha otsha le so woho wa sho mbokambɛka olimu lushi la lushi?—Mateu 6:12.
11. Woho wambotoshihodia solo dia lotutsha diaki Jehowa ayototshutshuya dia sho ntsha na?
11 Etena kashihodiaso bonde kele Jehowa la solo dia lotutsha, sho kimanyiyamaka dia kongɛ la solo dia lotutsha panda kayondela. Tatotake pondjo ɔnɛ nde ekɔ ɔkɔkɛ dia kotsha alaka ande. (Delu dia Jeremiya 3:26) Kânga mbatetemalaso nɔmba dia Diolelo diaki Nzambi ndja, sho nongamɛka dia Nzambi mbeyaka etena koleki dimɛna ka kadimola dɔmbɛlɔ sɔ. Lâdiko dia lâsɔ, sho tshutshuyamaka dia mbokoya Jehowa lo monga la solo dia lotutsha lo woho wasɛnaso la anangɛso ndo l’anto wasambishaso. Sho lawɔ hatolange dia kânga onto ɔtɔi ndjakema, koko sho nangaka dia vɔ kadimola etema ndo monga la elongamelo kele laso ka lɔsɛnɔ la pondjo.—1 Timote 2:3, 4.
Tokane yimba lo solo dia lotutsha diaki aprɔfɛta
12, 13. Lo ndjela Jakoba 5:10, ngande wakakɛnɛmɔla ɔprɔfɛta Isaya solo dia lotutsha lo yoho ya dimɛna efula?
12 Lo sɛdingola solo dia lotutsha diaki Jehowa, tambokimanyiyama dia mandola ndo monga la dionga sɔ. Kema wɔdu le anto wele kema kokele dia monga la solo dia lotutsha, koko vɔ kokaka monga ladiɔ. Sho kondjaka wetshelo oma le ekambi waki Nzambi wa lo nshi y’edjedja. Ombeki Jakɔba akafunde ate: “Lo kɛnɛ kendana la mbikikɛ kɔlɔ ndo monga la solo dia lotutsha, nyɔsɛ ɛnyɛlɔ le aprɔfɛta wakatɛkɛta lo lokombo la Jehowa.” (Jakoba 5:10, NW) Ekɔ mɛtɛ esambelo ndo ekeketshelo mbeya ɔnɛ anto akina wakahomana ndo wakatondoya kɛnɛ kambotokomɛ.
13 Ɛnyɛlɔ, ɔprɔfɛta Isaya aki l’ohomba wa monga la solo dia lotutsha l’olimu ande. Jehowa akɛnya dui sɔ lam’akandawotɛ ate: “Tshoka, tuteli wudja one wati: Mete nyu nyatukaka, keli hanyumani fundu. Mete, nyu nyatenaka, keli hanyulimbitela. Ununya etema w’asi wudja one, uwaete atui wulu, udihi ashu awo, ne dia vo watukena l’ashu awo, watukuka l’atui awo, watukumana fundu l’etema awo, watukukadimo ku vo kono.” (Isaya 6:9, 10) Kânga mbaki anto la wendjodi, Isaya akewoyaka nsango yaki Jehowa y’ɛhɛmwɛlɔ la solo dia lotutsha l’edja ka ɛnɔnyi 46! Woho akɔ wâmɛ mbele solo dia lotutsha diayotokimanyiya dia sho tetemala l’olimu aso w’esambishelo ka lokumu l’ɔlɔlɔ, oyadi anto efula hawolietawɔ.
14, 15. Kakɔna kakakimanyiya Jeremiya dia nde ndɔshana la ɛhɛnyɔhɛnyɔ ndo la ɔkɔmwɛlɔ?
14 Eelo, lâdiko dia wendjodi, aprɔfɛta wakahomana nto la ɛhɛnyɔhɛnyɔ lo olimu awɔ. Jeremiya akadjama lo lowete, akadjama lo “luudu la lukanu,” ndo akakashema lo difuku. (Jeremiya 20:2; 37:15; 38:6) Nde akahɛnyahɛnyama oma le anto wakandalangaka kimanyiya. Koko, Jeremiya komonga la lohetsho otsha le wɔ, kana sɔmbɔya. Nde akakikɛ la solo dia lotutsha l’edja k’ɛnɔnyi akumi.
15 Ɛhɛnyɔhɛnyɔ ndo lɔsɔkɔ kɔnɛmbɔhaya Jeremiya, ndo awui asɔ hawokoke tɔlɛmbɔhaya ɛlɔ kɛnɛ. Ekɔ mɛtɛ dia, sho mbeyaka kɔmɔ lo tena dimɔtshi. Jeremiya akakɔmɔ. Nde akafunde ate: “Diui dia [Jehowa] ndjalaka engo ka wononyi le mi, ndu ka dionyo la lushi la lushi. Naka dimi layuta nti: Dimi haludimula lukumbu landi ntu, dimi haloteketa ntu lu lukumbu landi ntu.” Kakɔna kakayotombaka oma lâsɔ? Onde Jeremiya akatshike dia sambisha? Nde tetemalaka ate: “Ku ndjalaka l’utema ami uku dja yadikita, mbambudihama lu weka ami. Dimi mpimbaka mbikike, keli hakuki.” (Jeremiya 20:8, 9) Tolembete dia etena kakandadjaka yimba lo lɔsɔkɔ laki anto, nde akashishaka ɔngɛnɔngɛnɔ ande. Etena kakandakanaka yimba lo dimɛna ndo ohomba waki la losango lɔ lɔamɛ, ɔngɛnɔngɛnɔ ande wakakalolaka. Lâdiko dia lâsɔ, Jehowa akikɔ la Jeremiya “uku dihuka diukawo woma,” nde akokeketsha dia nde mbewoya ɔtɛkɛta ande la ohetoheto ndo la dihonga.—Jeremiya 20:11.
16. Ngande wakokaso nama ɔngɛnɔngɛnɔ lo olimu aso wa sambisha lokumu l’ɔlɔlɔ?
16 Onde ɔprɔfɛta Jeremiya akakondja ɔngɛnɔngɛnɔ lo olimu ande? Eelo! Nde akatɛ Jehowa ate: “Dimi lakatani aui aye, lakali. Vo wakayala ongenongeno le mi, wakangenyangenya utema ami, ne dia watumbetaka lukumbu laye, we [Jehowa].” (Jeremiya 15:16) Jeremiya akangɛnangɛna diɛsɛ diande dia monga onyimpala wa Nzambi ka mɛtɛ ndo dia sambisha ɔtɛkɛta ande. Sho lawɔ kokaka ngɛnangɛna. Lâdiko dia lâsɔ, sho ngɛnangɛnaka oko wangɛnangɛna andjelo l’olongo, woho wele lo andja w’otondo, efula wekɔ lo mbetawɔ losango la Diolelo, wekɔ lo kadimola etema, ndo wekɔ lo mbɔtɔ lo mboka k’otsha lo lɔsɛnɔ la pondjo.—Luka 15:10.
‘Wokikelo wa Jɔbɔ’
17, 18. Lo yoho yakɔna yakakikɛ Jɔbɔ, ndo kakɔna kakayotombaka?
17 L’ɔkɔngɔ wa nde tɛkɛta dikambo dia aprɔfɛta wa nshi ya ntondo, ombeki Jakɔba akafunde ate: “ Nyu nyakuki lukumu la etetemalu ka Jobo, nyakenyi ekumelu [kakawosha Jehowa], ndu uku uludi [Jehowa] la memakana la ketshi.” (Jakoba 5:11) Tshɛkɛta ya lo Grɛkɛ yokadimwami lanɛ ɔnɛ “etetemalu” ekɔ la kitshimudi yakɔ yâmɛ la tshɛkɛta yokambi la Jakɔba lo divɛsa diele la diko ɔnɛ ‘solo dia lotutsha.’ Lo mɛnya otshikitanu wele lam’asa tɔtɛkɛta tɔsɔ tohende, nomb’ewo kɛmɔtshi akafunde ate: “Tshɛkɛta ya lo Grɛkɛ yokadimɔmi ɔnɛ solo dia lotutsha tɛkɛtamaka etena katosalɛ anto kɔlɔ, koko tshɛkɛta ya lo Grɛkɛ yokadimɔmi ɔnɛ etetemalo tɛkɛtamaka etena kakikɛso lam’ahomanaso l’ekakatanu wa wolo.”
18 Jɔbɔ akasowe efula. Nde akashisha okundji ande, akavusha anande ndo akatate hemɔ ka wolo. Nde akalɔshana nto la tokanyi ta kɔlɔ taki lande ta ɔnɛ Jehowa mbakawosha dilanya. Jɔbɔ akatondja ɔhɛnyɔhɛnyɔ ande sɛkɛ; nde akalele dikambo diaki lande polo lo nde mbuta dia nde akaleke Nzambi ɔlɔlɔ. (Jobo 35:2) Koko, nde koshisha mbetawɔ, ndo dui sɔ kondanya olowanyi ande. Nde kɔsɛka Nzambi oko wakate Satana. (Jobo 1:11, 21) Etombelo akɔna wakayala? Jehowa “akatshokola Jobo lu nshi yadi ya l’okongo, uleki nshi yandi ya ntundu.” (Jobo 42:12) Jehowa akakɔnɔya Jɔbɔ, akalodia ɔngɔnyi ande l’ahende ndo akɔtshɔkɔla efula, nde akonge la lɔsɛnɔ l’ɔngɛnɔngɛnɔ kâmɛ l’anto wakandokaka ngandji. Woho wakakikɛ Jɔbɔ la kɔlamelo akôkimanyiya dia nde ndeka mana lonto la Jehowa fundo.
19. Wetshelo akɔna wakondjaso oma lo woho wakakikɛ Jɔbɔ la solo dia lotutsha?
19 Kakɔna kekaso oma lo woho wakakikɛ Jɔbɔ la solo dia lotutsha? Oko Jɔbɔ, sho mbeyaka sowa la hemɔ kana la pâ nkina. Mbeyaka monga ko hatoshihodia dimɛna lande na ketawɔ Jehowa dia ohemba ɔmɔtshi tokomɛ. Koko, sho mbeyaka monga la eshikikelo lo dikambo nɛ: Naka sho tshikala la kɔlamelo, kete tayɔtshɔkwama. Aha la tâmu, Jehowa futaka wanɛ watôyangaka l’otema ɔtɔi. (Heberu 11:6) Yeso akate ate: “Keli one latetemala edja ndu l’ekumelu, ayushimbamela.”—Mateu 10:22; 24:13.
‘Lushi la Jehowa layoya’
20. Lande na kakokaso monga la eshikikelo ɔnɛ lushi la Jehowa layoya?
20 Kânga mbele Jehowa ekɔ la solo dia lotutsha, nde ekɔ nto kanga losembwe ndo nde hatetawɔ dia awui wa kɔlɔ tetemala lo pondjo. Solo diande dia lotutsha diekɔ la elelo. Petero akafunde ate: ‘Nzambi kondjakimɛ dia mbisha andja wa nshi ya ntondo dilanya.’ Kânga mbele Nɔa nde la nkumbo kande wakatshikala la lɔsɛnɔ, andja wa kɔlɔ ɔsɔ wakalanyema la mvula k’elola. Jehowa akalanya nto osomba wa Sɔdɔma la Ngɔmɔra, akawaetɛ otoko oto. Elanyelo kɛsɔ ekɔ “djimbitelu le antu wa[to]tshaka akambu wa kolo.” Omalɔkɔ, sho kokaka monga la eshikikelo ɔnɛ: ‘Lushi la Jehowa layoya.’—2 Petero 2:5, 6; 3:10.
21. Ngande wakokaso kɛnɛmɔla solo diaso dia lotutsha ndo wokikelo aso, ndo awui akɔna wayotɔsɛdingola lo sawo diayela?
21 Ɔnkɔnɛ, nyɛsɔ tokoya solo dia lotutsha diaki Jehowa lo kimanyiya anto akina dia vɔ kadimola etema woho wa vɔ ndjoshimbamɛ. Nyɛsɔ tokoya nto aprɔfɛta lo mbewoya lokumu l’ɔlɔlɔ la solo dia lotutsha oyadi anto amɔtshi wasambishaso hawetawɔ. Lâdiko dia lâsɔ, sho koka monga la eshikikelo dia Jehowa ayotɔtshɔkɔla efula naka lo ɛnyɛlɔ ka Jɔbɔ sho mbikikɛ ehemba ndo nama olowanyi aso. Tekɔ la ɔkɔkɔ w’oshika wahombaso ngɛnangɛna lo olimu aso etena kɛnaso woho watshɔkɔla Jehowa welo wadja ekambi ande dia sambisha lokumu l’ɔlɔlɔ lo nkɛtɛ k’otondo. Kɛsɔ mbayotɛna lo sawo diayela.
Onde wɛ âkohɔ?
• Lande na kele Jehowa ekɔ la solo dia lotutsha?
• Kakɔna kekaso oma lo solo dia lotutsha diaki aprɔfɛta?
• Ngande wakakikɛ Jɔbɔ, ndo dui sɔ diaki la etombelo akɔna?
• Ngande weyaso ɔnɛ solo dia lotutsha diaki Jehowa diekɔ la elelo?
[Osato wa lo lɛkɛ 15]
Yeso akakɛnɛmɔla solo dia lotutsha diaki She lo yoho ya kokele
[Esato wa lo lɛkɛ 16]
Ngande wakafute Jehowa Jeremiya l’ɔtɛ wa solo diande dia lotutsha?
[Esato wa lo lɛkɛ 17]
Ngande wakafute Jehowa Jɔbɔ l’ɔtɛ wa ekikelo kande?