Ɛkɔkɔ Ekina La Sheke Y’oyoyo
“Asi wedja . . . , wane tshe watulamaka lushi la mumuya diaha lulanya, ndu watushikikalaka lu sheki yami. Dimi layuwaela l’ukungu ami w’ekila.”—ISAYA 56:6, 7.
LO ƐNƐLƆ ka nɛi ka lo dibuku di’Enyelo, ɔpɔstɔlɔ Joani akɛnyi wokime mpɛpɛ ya dombwelo ya Jehowa di’aha yɔ fufa paka anto tshɛ w’‘Isariyɛlɛ wa Nzambi’ wamboshila la mbidjama tolembetelo. Vɔ mbele anto wa ntondo wakatshɔkwama oma le Yeso, lɔtɔngɔ la ntondo l’Abarahama. (Ngalatiya 6:16; Etatelu 22:18; Enyelo 7:1-4) Lo ɛnɛlɔ kakɔ kâmɛ, Joani akɛnyi “Ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe, . . . vo wakahangohango la diui dia wulu vati: Panda keko ka [“Nzambi kaso,” NW], latudjaseka lu kiti ka diulelu, ndu ka Ona-Okoko!” (Enyelo 7:9, 10) Lo mbuta ɔnɛ: “Panda keko ka . . . Ona-Okoko,” olui a woke mɛnyaka ɔnɛ ndo vɔ mbambɔtshɔkwama oma le Lɔtɔngɔ l’Abarahama.
2 Olui a woke ɔsɔ wakeyama oma ko 1935, ndo ɛlɔ kɛnɛ lofulo lawɔ lambolekana miliyɔ tshanu. Lam’ele wambɔsɔnama dia panda lo fɔnu ka woke, anto wa l’olui akɔ wayɔsɔtɔma dia kondja lɔsɛnɔ la pondjo lam’ayokakitola Yeso “ekoko” la “mbudi.” Akristo wa l’olui a woke wekɔ l’atei w’“ekoko ekina” wa lo wɛɛla waki Yeso wa nkoto y’ɛkɔkɔ. Vɔ nongamɛka sɛna pondjo lo paradiso ka la nkɛtɛ.—Mateu 25:31-46; Joani 10:16; Enyelo 21:3, 4.
3 Anto 144000 asɔ kondjaka ɛtshɔkɔ w’oma lo sheke y’Abarahama lo tshimbo ya sheke y’oyoyo. Oko wewɔ lo sheke yakɔ, vɔ wekɔ “la tshina dia ngandji ka mamba” ndo “la tshina dia elembe wa Kristu.” (Romo 6:15; 1 Koreto 9:21) Omalɔkɔ, paka anto 144000 wa l’Isariyɛlɛ wa Nzambi mbasungana ndɛ mapa la nnɔ vinyɔ lo Eohwelo ka nyɔi ka Yeso, ndo paka nde la wɔ ato mbakadje Yeso sheke dikambo dia Diolelo. (Luka 22:19, 20, 29) Ase olui wa woke bu lo sheke y’oyoyo. Koko, vɔ kambaka kâmɛ l’Isariyɛlɛ wa Nzambi ndo vɔ mbidjasɛ la wɔ lo “wudja” awɔ. (Isaya 66:8) Omalɔkɔ, sunganaka sho mbuta ɔnɛ ndo vɔ lawɔ wekɔ la tshina dia ngandji ka mamba kaki Jehowa ndo la tshina di’ɛlɛmbɛ wa Kristo. Kânga mbewɔ bu lo sheke y’oyoyo, vɔ kondjaka ɛlɔlɔ oma lɔkɔ.
“Asi Wedja” la ‘Isariyɛlɛ wa Nzambi’
4 Omvutshi Isaya akafunde ate: “Asi wedja watumamemaka [Jehowa] dia mbukambela ulimu, la dia mbuka lukumbu landi ngandji, la dia ndjala ekambi andi, ee, wane tshe watulamaka lushi la mumuya diaha lulanya, ndu watushikikalaka lu sheki yami. Dimi layuwaela l’ukungu ami w’ekila. Layangenyangenya lu luudu lami la dombelo. Layetawo eshasha awo la elambu awo l’ediakelu kami.” (Isaya 56:6, 7) Dui sɔ diakɛnyaka ɔnɛ: “asi wedja” wa l’Isariyɛlɛ, kana wanɛ waha Ase Juda, wakahombaka tɛmɔla Jehowa—mbokaka lokombo lande ngandji, kitanyiyaka adjango wa lo sheke y’Ɛlɛmbɛ, namaka lushi la Sabato, ndo nambolaka elambo lo tɛmpɛlɔ, lo “luudu la dombelo” laki Nzambi.—Mateu 21:13.
5 Lo nshi yaso nyɛ, olui wa woke mbele “asi wedja watumamemaka [“Jehowa vamɛ,” NW].” Vɔ kambɛka Jehowa kâmɛ l’Isariyɛlɛ waki Nzambi. (Zekariya 8:23) Vɔ kimɔka elambo akɔ wâmɛ wetawɔma oko wasala Isariyɛlɛ wa Nzambi. (Heberu 13:15, 16) Vɔ tɛmɔlaka Nzambi lo tɛmpɛlɔ kande ka lo nyuma, lo “luudu landi la dombelo.” (Ɛdika la Enyelo 7:15.) Onde vɔ namaka lushi la sabato lumingu tshɛ? Oyadi akitami kana ɛkɔkɔ ekina, ndoko ladjangɛwɔ dia sala dikambo sɔ. (Kolosai 2:16, 17) Koko, Paulo akatɛ Akristo w’akitami w’Ase Hɛbɛru ate: “Okone mumuya ka lushi l’ekila kambutshikala le antu wa [Nzambi]. Ne dia one lotwe lu mumuya kandi, ambumuya uma lu elimu andi, uku akumuya [Nzambi] uma lu elimu andi.” (Heberu 4:9, 10) Ase Hɛbɛru asɔ wakɔtɔ lo ‘lushi la mumuya’ lɔsɔ lam’akawayakitshakitsha vamɛ la tshina dia ‘losembwe la Nzambi’ ndo wakomuya oma lo woho wakawahembaka ndjaɛnya oko anto w’ɛlɔlɔ l’ekimanyielo k’elimu w’Ɛlɛmbɛ. (Romo 10:3, 4) Akristo w’akitami w’Ase Wedja mumuyaka woho akɔ lo ndjakitshakitsha vamɛ la tshina dia losembwe laki Jehowa. Olui a woke wambosangana la wɔ lo diomuyelo sɔ.
6 Lâdiko dia lâsɔ, ɛkɔkɔ ekina ndjakitshakitshaka la tshina dia sheke y’oyoyo oko wakayakitshakitsha ase wedja wa lo nshi ya ntondo la tshina dia sheke y’Ɛlɛmbɛ. Lo yoho yakɔna? Aha lo monga anto wa lo sheke yakɔ, koko lo kitanyiya ɛlɛmbɛ wendana la sheke yakɔ ndo lo kondja ɛlɔlɔ w’oma lɔkɔ. (Ɛdika la Jeremiya 31:33, 34.) Oko anyawɔ w’akitami, ɛkɔkɔ ekina wekɔ l’ɛlɛmbɛ wa Jehowa wofundami ‘l’etema awɔ.’ Vɔ nangaka efula ndo kitanyiyaka ɛlɛmbɛ la awui wa Jehowa. (Esambu 37:31; 119:97) Vɔ mbeyaka Jehowa oko aweya Akristo w’akitami. (Joani 17:3) Kayotota dikambo dia wahemelo w’ohekele na? Suke l’ɛnɔnyi 1500 la ntondo ka sheke y’oyoyo mbidjama, Mɔsɛ akakɔkɔmiya As’Isariyɛlɛ ate: “Nyahemia etema anyu uhekeli.” (Euhwelu k’Elembe 10:16; Jeremiya 4:4) Lam’ele wahemelo w’ohekele wa l’emunyi akalengɔ kâmɛ l’Ɛlɛmbɛ, vɔ tshɛ, oyadi akitami kana ɛkɔkɔ ekina, la dia ‘mbahemia etema awɔ ohekele.’ (Kolosai 2:11) L’ekomelo, Jehowa dimanyiyɛka ɛkɔkɔ ekina munga yawɔ lo tshimbo ya ‘dikila dia sheke’ diakatshola Yeso. (Mateu 26:28; 1 Joani 1:9; 2:2) Nzambi hawaote oko anande wa lo nyuma oko wɔsande anto 144000. Koko, nde mbelɛka ɛkɔkɔ ekina ɔnɛ akanga a losembwe, lo yoho yakelamɛ Abarahama kanga losembwe lam’akinde ɔngɛnyi a Nzambi.—Mateu 25:46; Romo 4:2, 3; Jakoba 2:23.
7 Le anto 144000, mbelamɛ akanga a losembwe mbadihwɛka mboka dia vɔ kondja elongamelo ka tôlɛ kâmɛ la Yeso lo Diolelo dia l’olongo. (Romo 8:16, 17; Ngalatiya 2:16) Le ɛkɔkɔ ekina, mbelamɛ akanga a losembwe oko ɛngɛnyi wa Nzambi mbashaka diaaso di’aha vɔ shisha elongamelo ka lɔsɛnɔ la pondjo lo paradiso ka la nkɛtɛ—oyadi oko ose olui a woke wayoka lo Armagɛdɔna, kana layolɔ lo ‘eolwelo k’anto w’ɔlɔlɔ.’ (Etsha 24:15) Ande diɛsɛ dia monga l’elongamelo ka ngasɔ ndo ndjâla ɔngɛnyi w’Omboledi w’andja w’otondo, dia ndjâla ‘ɔngɛndangɛnda wa lo luudu lande’ lee! (Osambu 15:1, 2) Eelo mɛtɛ, vɔ tshɛ, oyadi akitami kana ɛkɔkɔ ekina, wambɔtshɔkwama heyama oma lo tshimbo ya Yeso, Lɔtɔngɔ l’Abarahama.
Lushi la Woke l’Ekesanelo
8 Lam’akandatɛkɛtaka dia sheke y’oyoyo, Paulo akohola ambadi wa mukanda ande dikambo dia Lushi l’Ekesanelo lakasalemaka mbala ɔtɔi l’ɔnɔnyi la tshina dia sheke y’Ɛlɛmbɛ. Lushi lɔsɔ, elambo wotshikitanyi wakalambɔmaka—ɔmɔtshi lo dikambo dia dioho dia Lɛwi la okina lo dikambo dia nkumbo nkina 12 yaki komongaka lo dioho di’ɛlɔmbɛdi. Aya edja, wambotolembetshiyaka ɔnɛ olambo ɔsɔ wekɔ didjidji dia olambo wa woke wa Yeso wakahombe ndjokimanyiya elui akɔ ehende, oyadi anto 144000 wele l’elongamelo k’otsha l’olongo, kana miliyɔ nkina y’anto walongamɛ nsɛna lanɛ la nkɛtɛ.a Paulo akɛnya ɔnɛ: lam’ayokoka lushi lakɔ, anto wayokondja ɛlɔlɔ w’oma l’olambo waki Yeso lo Lushi la woke l’Ekesanelo la tshina dia sheke y’oyoyo. Oko wende Ɔlɔmbɛdi a Lâdiko wa lushi lɔsɔ la woke, Yeso akalambola demba diande dia kokele oko olambo w’etshungwelo dia kondjiyɛ anto tshɛ ‘etshungwelo ka pondjo.’—Heberu 9:11-24.
9 Akristo efula w’Ase Hɛbɛru wa l’eleko ka ntondo waki ‘l’ohetoheto wa mɛtɛ l’Ɛlɛmbɛ wa Mɔsɛ.’ (Etsha 21:20) L’ɔkɔngɔ diko, Paulo akayowaohola lo yoho yasungana ate: “[Yeso] eekɔ ompakemi wa dyookaneelo dy’oyooyo, kele anɛ wakeetama lee [Nzambi] wakoke laa nongola sango dya ponjo dyakandalake lee anto waakinde. Endaka vɔ wambokoka nongola sango nɛ, kete paka oma lo wooho wakandayovɔɔka, ko nyɔi kɛnɛ kamboyocungola anto oma lo munga yakawace laamakiwɔ lo dyookaneelo dya ntondo.” (Ebreyo 9:15, Dyookaneelo dy’oyooyo) Sheke y’oyoyo yakatshungola Akristo w’Ase Hɛbɛru oma lo sheke y’edjedja, yakatondjaka kɔlɔ yawɔ sɛkɛ. Diɛsɛ ko, oma lo sheke y’oyoyo, vɔ wakakoke “laa nongola sango dya ponjo [dia l’olongo].”
10 “Untu” tshɛ “letawo Ona” ayokondja wahɔ oma l’olambo w’etshungwelo. (Joani 3:16, 36) Paulo akate ate: “Kristo akalambɔma osangɔ akɔ waamɛɛ oko olambo dya ndimanya munga y’anto efula. Nde ayoonyomotomba sɛkɛ osangɔ wa hende aha dya njodimanya munga, koko dya njoca anɛ wookongɛɛ.” (Ebreyo 9:28, Dyookaneelo dy’oyooyo) Ɛlɔ kɛnɛ, l’atei wa wanɛ weendɛ le Yeso l’asolo walomɔlomɔ, sho tanaka ndo ehandɔ w’Akristo w’akitami wa l’Isariyɛlɛ waki Nzambi la miliyɔ y’anto watonga olui a woke, wanɛ wayokita lɔsɛnɔ la pondjo ndo vɔ lawɔ. Elui akɔ ehende mbokaka Nzambi losaka lo woho wakandalɔngɔsɔla sheke y’oyoyo ndo ɛtshɔkɔ wendana la sheke yakɔ wakoka mbisha anto lɔsɛnɔ kâmɛ ndo woho wakandashikikɛ Lushi l’Ekesanelo loleki woke ndo olimu w’Ɔlɔmbɛdi wa Lâdiko wakamba Yeso lo dihole Dioleki Ekila dia l’olongo.
Tângemake lo Olimu w’Ekila
11 Lo mukanda ande le Ase Hɛbɛru, Paulo akatɛtɛ di’ohomba w’efula wele l’olambo wa Yeso lo sheke y’oyoyo lo mbowɛdinya l’elambo w’edimanyielo ka pɛkato wakalambɔmaka lo sheke y’edjedja. (Heberu 9:13-15) Olambo wa dimɛna efula waki Yeso kokaka ‘mbɛdia nkum’etema yaso oma l’etsha wa nyɔi dia sho mbeya la kambɛ Nzambi kasɛna olimu w’ekila.’ Le Akristo w’Ase Hɛbɛru, l’atei ‘w’etsha wa nyɔi’ sho tanaka ‘awui wa kɔlɔ wakawasalaka lo sheke ya ntondo.’ Ɛlɔ kɛnɛ, le Akristo, etsha akɔ wa nyɔi mendanaka la pɛkato y’edjedja yakawatshe ko wakayatshumoya oma lɔkɔ l’otema ɔtɔi ndo yakadimanyiyɛ Nzambi. (1 Koreto 6:9-11) Lam’ewɔ la nkum’etema yambɛdiama, Akristo w’akitami kambɛka ‘Nzambi kasɛna olimu w’ekila.’ Ndo ngasɔ akɔ mbasala olui a woke. Lam’ele wakɛdia nkum’etema yawɔ lo tshimbo ya ‘dikila di’Ɔna Ɔkɔkɔ,’ vɔ wekɔ lo tɛmpɛlɔ ka woke ka lo nyuma kaki Nzambi, ‘dia mbokambɛka olimu ndo l’otsho ndo la yanyi.’—Enyelo 7:14, 15.
12 Paulo ambokotsha ate: “Okone tusukani l’etema a mete wuludi la mbetawo, la etema asu wolongoswami uma lu khum’etema ya kolo, la alimba asu wotshami l’ashi a pudipudi.” (Heberu 10:22) Ngande wokukiso mɛnya ɔnɛ tekɔ “l’etema a mete wuludi la mbetawo”? Paulo akakɔkɔmiya Akristo w’Ase Hɛbɛru ate: “Tutetemali lu mbetawo k’elungamelu kasu, to katukengama; ne dia one lakalaki daka ne eli la kolamelu. Tukananeli untu l’untu dia ntomboshanya lu ngandji la lu elimu w’ololo. Tatukimoki nsangana kame, uku eli etshelu k’amotshi, keli tukikitshanyaki. Tuleki ntsha okone, ne dia nyambena nyati: Lushi lako laya suki.” (Heberu 10:23-25) Naka mbetawɔ kaso kahɛtahɛtakɔ, kete ndo sho lawɔ ‘hatotokimɔ nsanganaka kâmɛ.’ Tayɔngɛnangɛna dia tshutshuya anangɛso ndo tshutshuyama oma le wɔ, dia mbokana ngandji ndo sala awui w’ɔlɔlɔ ndo keketshanya dia kamba olimu w’ohomba efula wa tataka elongamelo kaso lo sɛkɛ, oyadi ka la nkɛtɛ kana k’otsha l’olongo mbetɔ.—Joani 13:35.
“Sheki ya Pundju”
13 Kakɔna kayotshama lam’ayokondja onto l’ekomelo la l’atei w’anto 144000 elongamelo kande k’otsha l’olongo na? Onde sheke y’oyoyo yayotshika kamba olimu ayɔ? L’etena kɛsɔ, ndoko otshikadi ɔtɔi wa lo Isariyɛlɛ wa Nzambi wayonga nto lanɛ la nkɛtɛ. Lâsɔ ko ase sheke y’oyoyo waya vɔ tshɛ kâmɛ la Yeso “lu diulelu dia [She].” (Mateu 26:29) Koko, sho mbohɔka ɛtɛkɛta ɛnɛ wa Paulo wakandafundɛ Ase Hɛbɛru lo mukanda ande: “[Nzambi] ka ki, . . akakaluya ulami a wuki w’ekoko uma lu nyoi la dikila dia sheki ya pundju.” (Heberu 13:20; Isaya 55:3, Sho mbɛnganyisha alɛta ango.) Lo woho akɔna wele sheke y’oyoyo shɔ sheke ya pondjo na?
14 Ntondotondo, otshikitanyi la sheke y’Ɛlɛmbɛ, yɔ hayɔhɛnamaki pondjo. Ka hende, etombelo w’oma l’olimu wakambema wekɔ wa pondjo, oko wele lowandji laki Yeso lowandji la pondjo. (Ɛdika Luka 1:33 la 1 Koreto 15:27, 28.) Diolelo dia l’olongo diekɔ la dihole diadiɔ dia pondjo lo asangwelo waki Jehowa. (Enyelo 22:5) Ndo ka sato, ɛkɔkɔ ekina wayotetemala kondja wahɔ oma lo sheke y’oyoyo yakalɔngɔswama. Lo Diolelo di’Ɛnɔnyi Kinunu diaki Kristo, akanga wa kɔlamelo wayotetemala ‘kambɛ Jehowa olimu w’ekila ndo l’otsho ndo la yanyi lo tɛmpɛlɔ kande’ oko wôkambɛwɔ ɛlɔ kɛnɛ. Jehowa hohɔ nto pɛkato yawɔ y’edjedja yakandadimanyiyɛ l’ɔtɛ wa ‘dikila dia sheke’ diaki Yeso. Oko wewɔ ɛngɛnyi wa Jehowa, vɔ wayɔsamaka oko akanga a losembwe la ntondo kande, ndo ɛlɛmbɛ ande hawotodimɔma l’etema awɔ.
15 Onde l’etena kɛsɔ Jehowa ayokoka mbuta dikambo di’ekambi ande ate: ‘Dimi mbele Nzambi kawɔ, ndo vɔ wekɔ ekambi ami’? Eelo. “Ndi ayudjase la wo, ku vo wayuyala antu andi. [Nzambi] ndame ayuyala la wo.” (Enyelo 21:3, sho mbɛnganyisha alɛta ango.) Vɔ wayoyala “pangu k’ekilami,” akɛndji wa la nkɛtɛ wa “usumba wakalangema,” omambedi waki Yeso Kristo wa l’olongo. (Enyelo 14:1; 20:9; 21:2) Awui asɔ tshɛ wayotshama nɛ dia vɔ wekɔ la mbetawɔ lo ‘dikila dia sheke’ diakatshola Yeso ndo vɔ ndjakitshakitshaka l’ɛse ka nkumi ya dikanga la ɛlɔmbɛdi wa l’olongo, wanɛ waki Isariyɛlɛ wa Nzambi lam’akiwɔ la nkɛtɛ.—Enyelo 5:10.
16 Kayotota di’anto wakavu wayolwama la nkɛtɛ na? (Joani 5:28, 29) Ndo vɔ lawɔ wayelamɛ dia ‘kondja ɛtshɔkɔ’ lo tshimbo ya Yeso, Lɔtɔngɔ l’Abarahama. (Etatelu 22:18) Vɔ lawɔ wayohomba nanga lokombo la Jehowa, mbokambɛka, nambolaka elambo wetawɔma, ndo mbokambɛka olimu w’ekila lo luudu lande la dɔmbɛlɔ. Wanɛ wasala ngasɔ wayɔtɔ lo diomuyelo dia Nzambi. (Isaya 56:6, 7) Otsha l’ekomelo k’ɛnɔnyi kinunu, akanga wa kɔlamelo tshɛ wayokoma anto wa kokele oma l’ɛlɔmbwɛlɔ ka Yeso Kristo nde l’ɛlɔmbɛdi 144000 wa anyande. Vɔ hawotɔsama tsho akanga a losembwe oko angɛnyi w’osembwe waki Nzambi. Vɔ ‘wayoya lo lɔsɛnɔ,’ lâsɔ ko wambotshungɔ oma lo pɛkato tshɛ la nyɔi kakawahowɔ oma le Adama. (Enyelo 20:5; 22:2) Ande ɔtshɔkɔ wayonga lee! Lo ndjela kanyi yele laso ɛlɔ kɛnɛ, mɛnamaka di’oko olimu w’ɔlɔmbɛdi wakamba Yeso nde l’anto 144000 wayokomɛ l’etena kɛsɔ. Lâsɔ mbayokondja anto ɛtshɔkɔ tshɛ wa lo Lushi la woke l’Ekesanelo. Lâdiko dia lâsɔ, Yeso ‘ayosha Nzambi ndo She diolelo.’ (1 Koreto 15:24) Ohemba w’ekomelo wayoyala lo dikambo di’anto tshɛ, oma lâsɔ ko Satana l’ɛdiɛngɛ ande ndjodiakema pondjo.—Enyelo 20:7, 10.
17 Ko naa ohomba wa ‘sheke ya pondjo’ naka ndoko olimu wayowokambaka na? Dui sɔ hadiotende. Kɛnɛ kambotosholɛ Jehowa polo ndo kakianɛ kambokoka la so. Dui sɔ totshikaka enyɔ hwe mɛtɛ. Ohokanyiya—monga la lɔsɛnɔ la pondjo oko ose “ulungu w’uyuyu la kete y’uyuyu”! (2 Petero 3:13) Aha kânga ɛngɔ ɔtɔi kitshakitsha saki kaso ka mɛna ekotshamelo ka daka sɔ. Mbeyaka monga wolo di’onto tshikala nge lo mbetawɔ. Paulo akate ate: “Dieli la nyu dia ntetemala, dia nyu ntsha lulangu la [Nzambi], ku nyu nyayulungula daka diakandanyulaki.” (Heberu 10:36) Ndo nto, tohɛke ɔnɛ: okakatanu tshɛ wahombayɛ tondoya, kana wekamu tshɛ wahombayɛ mbekola wekɔ anyanya lo menda ɔngɛnɔngɛnɔ watokongɛ. (2 Koreto 4:17) Omalɔkɔ, tatongake ‘weho w’anto wakalola ɛkɔngɔkɔngɔ dia nanyema.’ Koko, nyɛsɔ shamɛ tɛnya ɔnɛ tekɔ “l’atei a wane weli la mbetawo ka nshimbela nyumu yasu.” (Heberu 10:39) Nyɛsɔ sho tshɛ tɛkame Jehowa, Nzambi ka toseke, l’otema ɔtɔi polo ndo lam’ayotokondja sho tshɛ ɛtshɔkɔ wa pondjo.
Olui a woke tombolaka Jehowa kâmɛ l’Akristo w’akitami lo sɛkɛ dia la nkɛtɛ dia tɛmpɛlɔ kande ka woke ka lo nyuma. (Enyelo 7:14, 15; 11:2) Sho bu ndoko l’ɔkɔkɔ ɔmɔ wɛnya ɔnɛ Sɛkɛ diawɔ tshikitana la nɛ di’Ase Wedja. Lam’aki Yeso la nkɛtɛ, Sɛkɛ di’Ase Wedja diakikɔ lo tɛmpɛlɔ. Koko, lo ekongelo k’ohikelo wa tɛmpɛlɔ kakasha Nzambi Sɔlɔmɔna la Ezekiyɛlɛ, Sɛkɛ di’Ase Wedja kondjâla. Lo tɛmpɛlɔ kaki Sɔlɔmɔna, Sɛkɛ dimɔ di’esambanasambana diakikɔ, lɛnɛ akatɛmɔlaka As’Isariyɛlɛ vɔ l’ambetawudi w’ase wedja kâmɛ, oyadi apami kana amato. Ɔsɔ kele didjidji dia sɛkɛ dia la nkɛtɛ dia tɛmpɛlɔ ka lo nyuma, lɛnɛ akɛnyi Joani olui a woke wakamba olimu w’ekila.
Koko, paka ɛlɔmbɛdi l’Ase Lɛwi ato mbakɔtɔka lo sɛkɛ dia l’ɔhɔngɔ, lɛnɛ akatanemaka dihole dia woke di’elambwelo (altar); paka ɛlɔmbɛdi eto mbakɔtɔka lo dihole di’Ekila; ndo paka ɔlɔmbɛdi a lâdiko oto mbakɔtɔka lo dihole Dioleki Ekila. Mbokɛmaka lâsɔ dia sɛkɛ dia l’etei la dihole di’Ekila mbele didjidji dia eongelo kakɔ ɔtɔi ka lo nyuma kele l’Akristo w’akitami lanɛ la nkɛtɛ. Ndo dihole Dioleki Ekila ekɔ didjidji di’olongo, lɛnɛ alongola Akristo w’akitami lɔsɛnɔ lahalanyemaki kâmɛ la Ɔlɔmbɛdi awɔ a Lâdiko wa l’olongo.—Heberu 10:19, 20.
[Footnote]
a Enda lo tshapita 13 ya Comment assurer votre survie et hériter d’une nouvelle terre, dibuku diakatondja Watchtower Bible and Tract Society of New York, Inc.
[Study Questions]
1. (a) Lo ndjela ɛnɛlɔ kaki Joani, kakɔna katshama etena kokimewɔ mpɛpɛ ya dombwelo yaki Jehowa? (b) Naa olui a woke w’anto wakɛnyi Joani?
2. Etena kakɔna kakɛnama olui a woke, ndo ngande weyamawɔ?
3. Ngande watshikitana Akristo w’akitami la ɛkɔkɔ ekina lo kɛnɛ kendana la sheke y’oyoyo?
4, 5. (a) Lo ndjela Isaya, olui akɔna wakahombe kambɛ Jehowa? (b) Ngande wakakotshama Isaya 56:6, 7 lo dikambo di’olui a woke?
6. Ngande wayakitsha ɛkɔkɔ ekina ɛlɔ kɛnɛ la tshina dia sheke y’oyoyo?
7. Elongamelo kakɔna kele l’ɛkɔkɔ ekina ɛlɔ kɛnɛ, vɔ wanɛ wambelamɛ akanga a losembwe oko waki Abarahama?
8. Kakɔna kaki didjidji dia Lushi l’Ekesanelo lakasalemaka la tshina di’Ɛlɛmbɛ?
9. Kakɔna kakakoke nongola Akristo w’akitami w’Ase Hɛbɛru waki lo sheke y’oyoyo na?
10. Lo na ahomba akitami l’ɛkɔkɔ ekina mboka Nzambi losaka?
11. Olimu akɔna wasala akitami l’ɛkɔkɔ ekina l’ɔngɛnɔngɛnɔ tshɛ lam’ambɛdiama nkum’etema yawɔ oma l’olambo waki Yeso na?
12. Ngande wɛnyaso ɔnɛ tekɔ “l’etema a mete wuludi la mbetawo”?
13, 14. Lo woho akɔna wele sheke y’oyoyo sheke ya pondjo na?
15. Lembetshiya diokanelo diayonga l’asa Jehowa l’atɛmɔdi ande wa la nkɛtɛ l’andja w’oyoyo.
16. (a) Awui akɔna wakongɛ anto wayolɔ dia ndjonga la lɔsɛnɔ la nkɛtɛ? (b) Ɛtshɔkɔ akɔna wayɛnama l’ekomelo k’ɛnɔnyi kinunu?
17. Lo menda ɔngɛnɔngɛnɔ watokongɛ, kakɔna kahomba ndjashikikɛ ɔm’ɔmɔ a l’atei aso dia nde salaka?
[Caption]
[Footnotes]
[Caption]
[Questions]
[Caption on page 30]
[Box on page 30]
OLIMU W’EKILA LO TƐMPƐLƆ
[Caption on page 32]
[Review on page 32]
Onde Wɛ Akoki?
◻ Aha la mbala Akristo w’akitami, waa na nto wayɔtshɔkwama oma lo tshimbo ya Lɔtɔngɔ l’Abarahama?
◻ Etena kalongolawɔ ɛtshɔkɔ w’oma lo sheke y’oyoyo, ngande wafɔna ɛkɔkɔ ekina la ambetawudi w’ase wedja waki la tshina dia sheke y’edjedja?
◻ Ngande watshɔkwama ɛkɔkɔ ekina oma lo tshimbo ya Lushi la woke l’Ekesanelo?
◻ Bonde kakelɛ Paulo sheke y’oyoyo ɔnɛ ‘sheke ya pondjo’?