Wanya Wa Ntondo Wahombaso Takula—Dia Kɛndakɛnda La Nzambi
‘Nyusukani la Nzambi ko nde ayosukana le nyu.’—JAKOBA 4:8.
PAMI kɛmɔtshi akasowe ɛnɔnyi efula lo lokanu. Ko wakayowetaka dia nde tɛnama le owandji wa wodja. Akambo wakatotshikitanaka esadi esadi, ko ɔtɛkɛta kele edja, nkumekanga kakaleke wolo lo nshi shɔ la nkɛtɛ akatɔ̂saka ose lokanu ɔsɔ l’olimu. Onto ɔsɔ akatokondjaka ɔkɛndɛ a woke efula ndo dihole di’ɔnɛnɛ dia lokumu heyama. Yɔsɛfu, pami kakawakeleka manyɔta l’ekolo, ɛ̂ngɔla kakianɛ la nkumekanga!—Etatelu 41:14, 39-43; Osambu 105:17, 18.
2 Ɛlɔ kɛnɛ, anto wekɔ la diaaso dia kambɛ onto ɔmɔtshi loleki Farawɔ ka l’Edjibito la fwa. Omboledi w’andja w’otondo ekɔ lo teelɛ sho tshɛ dia mbokambɛ. Ande diɛsɛ dia mamba dia kambɛ Nzambi ndo mbɔtɔ la Jehowa, kanga wolo tshɛ ɔngɛnyi lee! Afundelo mɛnyaka ɔnɛ nde ekɔ la lotombo ndo la kudu k’efula, Nzambi ka ki, ɔkɔmi ndo ɔlɔlɔ. (Ezekiyele 1:26-28; Enyelo 4:1-3) Nde ntshaka awui ande tshɛ la ngandji. (1 Joani 4:8) Nde hataka kashi pondjo. (Walelu 23:19) Jehowa hôtshaki ekambi ande wa kɔlamelo sɔnyi pondjo. (Osambu 18:25) Ɔnɛ tshɛ lakitanyiya adjango ande w’osembwe, ɛlɔ kɛnɛ kokaka monga la lɔsɛnɔ l’ɔngɛnɔngɛnɔ, l’oshika, ndo nongamɛ kondja lɔsɛnɔ la pondjo lo nshi yayaye. (Joani 17:3) Ndoko nkumekanga k’onto kakoka têla ɛtshɔkɔ la waɛsɛ wa weke wa ngasɔ.
3 Ambeta deko aha nɛ, tshɛso Nɔa akɔshi yɛdikɔ ya mbɔtɔnganyiya lɔsɛnɔ lande la lolango ndo la sangwelo diaki Nzambi. Bible mbutaka lo dikambo diande ɔnɛ: “Noa aki ololo la uluwanyi l’atei w’antu wa lolonga landi. Ndi akakendakendaka la [“Nzambi ka mɛtɛ,” NW].” (Etatelu 6:9) Lo mɛtɛ, Nɔa kɔkɛndakɛnda la Jehowa lo yoho yɛnama nɛ dia ndoko onto ‘lakɛnyi Nzambi lushi lɔmɔtshi.’ (Joani 1:18) Koko, Nɔa akakɛndakɛnda la Nzambi lo yoho yakandatshe kɛnɛ tshɛ kakawotɛ Nzambi dia ntsha. Lam’ele Nɔa akatshaka paka lolango la Jehowa lo lɔsɛnɔ lande, lɔngɛnyi la dimɛna efula ndo la ma ma lâkikɔ l’asande la Nzambi, Kanga-Wolo-Tshɛ. Oko Nɔa, miliyɔ y’anto ɛlɔ kɛnɛ ‘wakɛndakɛndakɔ la Nzambi’ lo kitanyiyaka alako la adjango wa Jehowa lo nsɛnɔ yawɔ. Ngande wakoka onto tatɛ kɛndakɛnda lande na?
Ekɔ Ohomba Monga l’Ewo k’Oshika
4 Ntondo ka kɛndakɛnda la Nzambi, sho pombaka tokowêya. Omvutshi Isaya akate ate: “Lu nshi yayayi, ukungu wa luudu la [Jehowa] ayushikikala ladiku di’ekungu. Vo wayediama ladiku dia ekuna. Ku wedja tshe wayokelaka utsha leko. Wedja efula wayunelaka, wayutaka vati: Nyuyi tumbeli lu ukungu wa [Jehowa], utsha la luudu la [Nzambi ka] Jakoba. Ndi ayututetsha akambu andi. Ku shu tayokendakendaka lu mbuka [y]andi, ne dia olembe ayutumba uma la Siona, la diui dia [Jehowa] uma la Jerusalema.” (Isaya 2:2, 3) Eelo, sho kokaka mbetawɔ ɔnɛ Jehowa ayetsha wanɛ tshɛ wayanga dia kɛndakɛnda lo mboka yande. Jehowa akatosha Bible Dui diande, ndo nde tokimanyiyaka dia sho dimana fundo. Yoho mɔtshi yatokimanyiyande ele oma lo tshimbo y’“ɔhɔmbɔ wa kɔlamelo ndo wa kɛsɔ.” (Mateo 24:45-47, NW) Jehowa kambaka l’‘ɔhɔmbɔ wa kɔlamelo’ dia tosha wetshelo wa lo nyuma wahombaso oma l’ekimanyielo k’ekanda walembetshiya Bible, ka nsanganya y’Akristo, ndo ka mbetshaka anto Bible lawakawɔ ofele. Nzambi mbishaka ekambi ande nyuma k’ekila nto dia mbâkimanyiya woho wa vɔ mana Dui diande fundo.—1 Koreto 2:10-16.
5 Kânga mbahatafute falanga dia mbeya akambo wa mɛtɛ wa lo Bible, vɔ wekɔ ohomba efula. Wonya wekaso Dui dia Nzambi, sho mbekaka awui wendana la Nzambi ndamɛ—lokombo lande, lonto lande, adjango ande ndo woho wongande l’anto. Sho kondjaka ndo ekadimwelo watotshungola oma lo wembola wele oko: Lande na kêso la nkɛtɛ? Lande na katshika Nzambi asui? Nshi yayaye ya ngande yatokongɛ? Lande na katshundaso la kavɔso? Onde onto sɛnaka l’ɔkɔngɔ a nyɔi? Lâdiko dia lâsɔ, sho mbeyaka kɛnɛ katokombwɛ Nzambi, mbut’ate: woho wahombaso kɛndakɛnda dia mbɔngɛnyangɛnya l’akambo tshɛ. Sho mbeyaka ɔnɛ nde todjɛka ɛlɛmbɛ wakokaso kitanyiya ndo watokundjiyɛ wahɔ efula naka sho mbâkitanyiya. Ndoko woho wokukiso mbeya awui asɔ tshɛ naka Nzambi hatolakanyisha.
6 Mɛtɛ ya lo Bible yekɔ la nkudu ndo tosokoyaka dia sho ntsha etshikitanu lo nsɛnɔ yaso. (Heberu 4:12) La ntondo ka sho kondja ewo k’Afundelo, takakɛndakɛndaka ‘oko ase dikongɛ nɛ di’akambo.’ (Efeso 2:2) Kok’ewo k’oshika ka Dui dia Nzambi tɛnyaka mboka kekina kahombaso “nkendakenda ololo uku alanga [Jehowa].” (Kolosai 1:10) Ande ɔlɔ takula na dia ntondo lo kɛndakɛnda la Jehowa, Onto loleki woke l’andja w’otondo lee!—Luka 11:28.
Ndjakimɔ la Batismu Ekɔ Wanya Ahende w’Ohomba
7 Wonya watataleke mana Bible fundo, sho tatɛka sɛdingola akambo weta lo lɔsɛnɔ l’anto ndo lo nsɛnɔ yaso shamɛ lo ndjela osase wa lo nyuma wakondjaso oma lo Dui dia Nzambi. Omalɔkɔ, sho ndjokomaka lo mbeya dikambo dimɔtshi dia mɛtɛ di’ohomba efula. Jeremiya amboshilaka mɛnya dikambo diakɔ sɔ, aya edja efula lam’akandafunde ate: “[Jehowa] li, dimi mbeyaka nti: Untu hakendakendaka lu mbuka uma lu wulu andi! Lam’atundokendakendaka, ndi ndame heyi nombola ekulu andi.” (Jeremiya 10:23) Osek’onto tshɛ ekɔ l’ohomba w’ɛlɔmbwɛlɔ ka Nzambi.
8 Naka sho mana dui di’ohomba efula sɔ fundo, kete tayotshutshuyama dia nyanga ɛlɔmbwɛlɔ ka Jehowa. Nto, ngandji kokaso Nzambi tosokoyaka dia sho kimɔ nsɛnɔ yaso le nde. Ndjakimɔ le Nzambi kɛdikɛdi mbotɛ lo dɔmbɛlɔ di’oma k’ɛse otema ɔnɛ tayowokambɛka paka nde oto lo lɔsɛnɔ laso ndo tayɔkɛndakɛndaka la kɔlamelo tshɛ lo mboka yande. Naka sho ntsha ngasɔ, kete tayôkoya Yeso, ɔnɛ lakayaɛnyanya la ntondo ka she ndo lakayashikikɛ dia ntshaka lolango la Jehowa.—Heberu 10:7.
9 Ndoko lushi lakahɛhiya Jehowa Nzambi onto ɔmɔtshi dia nde ndjakimɔ le nde. (Ɛdika la 2 Koreto 9:7.) Lâdiko dia lâsɔ, Nzambi halongamɛ ɔnɛ onto ɔmɔtshi ayakimɔ le Nde l’ɔtɛ wa saki kɛmɔtshi kambowonda bandjikwi. La ntondo ka batismu, onto pombaka tokokoma ombeki, ko dia nde koma ombeki, vɔ mbɔlɔmbaka dia nde mbidja weolo w’efula dia kondja ewo. (Mateu 28:19, 20) Paulo akalɔmbɛ wanɛ wambôbatizamaka dia vɔ ‘kimɔ alemba awɔ oko olambo wa sɛna, w’ekila, ndo wêtawɔ Nzambi, ndo mbokambɛ olimu w’ekila l’ekanelo kawɔ ka yimba.’ (Romo 12:1) Sho ndjakimɔka le Jehowa Nzambi lo kamba l’ekanelo kaso ka yimba. L’ɔkɔngɔ wa sho mbeya kɛnɛ katɔlɔmbawɔ ndo lo kana yimba dimɛna la dikambo sɔ, sho ndjoyakimɔka l’ɔngɛnɔngɛnɔ ndo la lolango laso shamɛ le Nzambi.—Osambu 110:3.
10 L’ɔkɔngɔ wa sho nɔmba Nzambi lo woshamu dia mbowɛnya woho wambotoyashikikɛ dia kɛndakɛnda lo mboka yande, sho ndjotakulaka nna dikina. Sho ndjɛ̂nyaka anto tshɛ lo sɛkɛ ɔnɛ tamboyakimɔ le Nzambi oma lo batismu kaso ka l’ashi. Ɔsɔ ekɔ etelo ka lo sɛkɛ kɛnya ɔnɛ tambotshika dɔkɔlɔkɔ dia ntshaka lolango la Nzambi. Oma k’etatelo k’olimu ande wa la nkɛtɛ, Yeso akatshu le Joani dia tobatizama, ngasɔ mbakandatotshikɛ ɛnyɛlɔ ka sho ndjela. (Mateu 3:13-17) L’ɔkɔngɔ diko, Yeso akasha ambeki ande olimu wa mbetɛ anto ambeki la mbabatiza. Omalɔkɔ, ndjakimɔ la batismu ekɔ wanya w’ohomba wele la dia takula ɔnɛ lalanga kɛndakɛnda kamɛ la Jehowa.
11 Sho kokaka mbɛdinya ombeki wa Yeso Kristo wamboyakimɔ le Nzambi ndo wambobatizama l’onto lalanga tshuka kana tshukama. Lo wedja efula, la ntondo k’anto ahende tshukana, ekɔ wanya efula wahombawɔ takula. Pami la womoto pomanaka, onto l’onto nyangaka dia mbeya dionga dia wonyande, ko vɔ ndjolangana. Oma lâsɔ ko vɔ ndjolakana dia tshukana. Lushi la diwala, vɔ ndjɛ̂nyaka lo sɛkɛ awui wakawokanaka lo woshɛshɛ—wa tshukana la namba lo diwala oko wadi l’omi. Lushi latshukanawɔ mbɛnyawɔ anto tshɛ ɔnɛ wambotatɛ sɛna yoho ya lɔsɛnɔ lɔsɔ la lânde. Lushi lɔsɔ mbele etatelo ka diwala diawɔ. Woho akɔ mbele, lushi labatizama onto mbatatɛnde kɛndakɛnda oko onto lamboyakimɔ le Jehowa.
12 Tênde ɛnyɛlɔ kekina. L’ɔkɔngɔ wa lushi la diwala, ngandji kôkana wadi l’omi pombaka tɔtɔmɛ ndo tshunda. Dia ndeka keketsha dimama diawɔ, atshukanyi akɔ ahende pombaka ntsha tshɛ, di’onto l’onto mbetsha ehomba w’olonganyi ande la ntondo, dia nama ndo keketsha diokanelo diawɔ dia lo diwala. Kânga mbahatatshukana la Nzambi, l’ɔkɔngɔ wa batismu kaso, sho la dia ntsha tshɛ dia nama diokanelo diasaso la Jehowa. Nde mɛnaka ndo ngɛnangɛnaka weolo wadjaso dia ntsha lolango lande ndo nde ndjasukanyaka laso. Jakɔba akafunde ate: “Nyuyasukanya [la Nzambi], ku ndi ayusukana l[a] nyu.”—Jakoba 4:8.
Tɔlɔndɛ Wanya wa Yeso
13 Dia sho kɛndakɛnda la Jehowa, sho pombaka ndjela ɛnyɛlɔ kakatotshikɛ Yeso Kristo lo nna ndo lo nna. Ɔpɔstɔlɔ Petero akafunde ate: “Nyu nyaketama dia dikambu diako, ne dia Kristu akanyusuwela, akanyutshikela djimbitelu, dia nyu mbuyela lu wanya andi.” (1 Petero 2:21) Lam’ele Yeso aki kokele ko sho têkɔ ekokele, hatokoke mbôkoya l’akambo tshɛ. Koko, Jehowa tɔlɔmbaka dia sho ntsha kɛnɛ kɛdimi l’akoka aso. Nyɛ̂sɔ tênde awui atanu wakatshe Yeso lo lɔsɛnɔ la l’olimu ande wahomba Akristo wamboyakimɔ le Nzambi ntsha la wolo dia mbôkoya.
14 Yeso aki l’ewo k’oshika ndo akamanyamanyaka Dui dia Nzambi. Lam’akandakambaka olimu ande, mbala efula, Yeso akavusolaka awui w’oma l’Afundelo wa lo Hɛbɛru. (Luka 4:4, 8) Lo mɛtɛ, ewandji wa kɔlɔ w’ɛtɛmwɛlɔ wa lo nshi shɔ wakavusolaka ndo vɔ lawɔ awui w’oma l’Afundelo. (Mateu 22:23, 24) Otshikitanu wakikɔ ele Yeso akamanaka Afundelo fundo, ndo akakambaka lawɔ lo lɔsɛnɔ lande. Nde akeyaka ndo kitshimudi y’Ɛlɛmbɛ, ndo oyango wakawawesaka. Lam’ele tekɔ lo ndjela ɛnyɛlɔ ka Yeso, ndo sho lawɔ pombaka ntsha tshɛ dia mana Dui dia Nzambi fundo, mbeya kɛnɛ katadiɔ ndo oyango adiɔ. Naka tayotsha ngasɔ, kete tayonga ekambi wetawɔma le Nzambi, wele l’akoka wa ‘nembetshiya akambo wa mɛtɛ lo yoho y’ɔlɔlɔ.’—2 Timote 2:15.
15 Kristo Yeso akewoya anto akina awui wendana la She le l’olongo. Yeso akakahanaka l’anto akina awui wakandeyaka lo Dui dia Nzambi. Kânga atunyi ande wakawetaka ɔnɛ: “Umbetsha,” nɛ dia l’ahole tshɛ wakandatshɔ̂ka, nde akasanyɛka anto awui wa Jehowa l’asangwelo Ande. (Mateu 12:28) Yeso akasambisha lo washo w’anto tshɛ l’asɛkɛ wa lo tɛmpɛlɔ, lo shinangɔnga, l’esomba, ndo lo toshamba. (Mako 1:39; Luka 8:1; Joani 18:20) Nde aketshaka anto la kɛtshi ndo l’otema w’ɔlɔlɔ, akôkaka wanɛ wakandakimanyiyaka ngandji. (Mateu 4:23) Wanɛ wayela ɛnyɛlɔ ka Yeso ndo vɔ lawɔ kondjaka waaso efula wa sambisha anto kɛnɛ kendana la Jehowa Nzambi ndo l’asangwelo ande wa diambo lo toho totshikitanyi.
16 Yeso akôkanaka efula la wanɛ wakatɛmɔlaka Jehowa. Lushi lɔmɔtshi, lam’akasambishaka Yeso anto, nyango l’anango w’apanganu wakaye andjowotɛ dui dimɔtshi. Bible kɔndɔlaka ɔnɛ: “Untu omotshi akawutela ati: Enda, nyo la ananyo ane wemadi l’andja, wayanga nkutela diui. Keli ndi akakaluya one lakayuwutela diui ati: Akona eli nyomi? Ndu wana weli analingu? Ku ndi akatshumi lunya le ambeki andi, akati ati: Wane mbeli nyomi la analingu! Ne dia untu tshe latutshaka lulangu la Papa le l’ulungu, keli onalingu, ndu kadiemi, la nyomi.” (Mateu 12:47-50) Dui sɔ hadiɛnya ɔnɛ Yeso kombidjaka nkumbo kande yimba, nɛ dia nde akayɛnyaka l’ɔkɔngɔ ɔnɛ nde ndjakiyanyaka lo dikambo diawɔ. (Joani 19:25-27) Eelo mɛtɛ, ɔkɔndɔ ɔsɔ mbikaka epole ɔsɛkɛ lo ngandji kakokaka Yeso anyande ambetawudi. Pôpo nd’ɛlɔ kɛnɛ, wanɛ wakɛndakɛnda kamɛ la Nzambi nyangaka dia mbekesanɛ l’ekambi ekina wa Jehowa ndo ngandji k’efula kawaokawɔ tafulaka tsho.—1 Petero 4:8.
17 Lo ntsha lolango la Nzambi, Yeso akɛnya ngandji kakandokaka She le l’olongo. Yeso akakitanyiyaka Jehowa l’akambo tshɛ. Nde akate ate: “Ma diami, dieli ntsha lulangu la one lakantumi, la dia nshidiya ulimu andi.” (Joani 4:34) Kristo akate nto ate: “Dimi latutshaka akambu watongenyangenyaka [Nzambi].” (Joani 8:29) Yeso akalange She le l’olongo otamanya ko “ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [“w’asui,” NW].” (Filipi 2:8) Lo wedi ande, Jehowa akatshɔkɔla Yeso, akawodiya lo dihole di’owandji ndo dia lotombo oko onto lahende oma la le Jehowa ndamɛ. (Filipi 2:9-11) Lo ndjela ɛnyɛlɔ ka Yeso, sho mɛnyaka Nzambi ngandji kawokaso lo nama ɛlɛmbɛ ande ndo lo ntsha lolango lande.—1 Joani 5:3.
18 Yeso akalɔmbaka efula. Nde akalɔmbɛ lo batismu kande. (Luka 3:21) La ntondo ka sɔna apɔstɔlɔ ande 12, nde akalɔmbɛ otsho w’otondo. (Luka 6:12, 13) Yeso aketsha ambeki ande woho wahombawɔ nɔmbaka. (Luka 11:1-4) L’otsho, la ntondo ka nyɔi kande, nde akalɔmbɛ dikambo di’ambeki ande ndo akalɔmbɛ kâmɛ lawɔ. (Joani 17:1-26) Dɔmbɛlɔ aki etenyi kɛmɔtshi k’ohomba efula ka lo lɔsɛnɔ la Yeso oko ahombadiɔ ndjâla lo nsɛnɔ yaso, nɛ dia sho tekɔ ambeki ande. Ande diɛsɛ dia woke efula dia sawola l’Omboledi w’Andja w’Otondo lo dɔmbɛlɔ lee! Lâdiko dia lâsɔ, Jehowa kadimolaka alɔmbɛlɔ nɛ dia Joani akafunde ate: “Dihunga ne mbeli la su le ndi shati: Naka shu tayolomba engo uku lulangu landi, ndi ayutukela. Naka shu tambeya shati: Ndi atutukelaka lu kene katutôlombaka, shu mbeyaka shati: Shu tambulungula kene kakatalombe.”—1 Joani 5:14, 15.
19 Tayeka awui efula naka sho sɛdingola la yambalo tshɛ nganɛ waki lɔsɛnɔ la Yeso Kristo l’olimu ande wa lanɛ la nkɛtɛ! Ohokanyiya dikambo dia waonga wakandɛnya anɛ: ngandji, kɛtshi, ɔlɔlɔ, ekeketshelo, wɛdimo, ekanelo ka yimba, okitshakitsha, dihonga la dionga di’aha la lokaki. Naka sho tetemala la mbeka awui wendana la Yeso, kete tayoleka kombola monga ambeki ande wa kɔlamelo. Ndo nto, ewo ka Yeso tokotolaka efula otsha le Jehowa. Lâdiko di’akambo asɔ tshɛ, Yeso akatshaka awui tshɛ oko wotâtsha She le l’olongo. Oma lo lɔngɛnyi l’efula laki lam’asande la Jehowa, nde akakoke mbuta ate: “One lakamenyi, akenyi Papa.”—Joani 14:9.
Ɛkama Nzambi dia Nde Kosukɛ 20 Wonya watatɛ ɔna kɛndakɛnda, nde hatoshikikadiaka ekolo la nkɛtɛ. Ko ngande wêkawɔ dia kɛndakɛnda l’eshikikelo tshɛ na? Ele lo pembaka wonya tshɛ ndo lo tetemala. Eelo mɛtɛ, wanɛ wakɛndakɛnda la Jehowa ntshaka tshɛ dia ndjashikikɛ lam’akɛndakɛndawɔ, lo takula wanya dimɛna dimɛna. Ekɔ nto ohomba monga l’etete ndo nshi efula mbeta dia kɛndakɛnda ngasɔ. Paulo akɛnya ohomba wa monga l’etete lam’akɛndakɛndaso la Nzambi lam’akandafunde ate: “Anyasu, diui diasu dia ndjihelu ne shati: Tambunyosengasenga ndu tambunyokokomiya le Khumadiondjo Jesu shati: Uku akatanyetsha lama kendakenda, ndu lama ngenyangenya [Nzambi], uku watunyokendakendaka, dia nyu ntetemala nkendakenda wuhu ako.”—1 Tesalonika 4:1.
21 Naka takayakimɔ l’etondo aso tshɛ le Nzambi, kete nde ayotokimanyiya dia sho tetemala la kɛndakɛnda la nde. (Isaya 40:29-31) Ndok’ema kakoka andja ɔnɛ tosha kayɛdima l’ɛtshɔkɔ washande wanɛ wakɛndakɛnda lo mboka yande. Nde ‘têtshaka di’ɔlɔlɔ aso shamɛ, Ɔnɛ latɔlɔmbɔla lo mboka kahombaso kɛndakɛnda. Ndo naka tayodja ɛlɛmbɛ ande yimba, kete wɔladi aso ayonga oko ɔkɛdi w’ashi, ndo losembwe laso oko asuku w’ashi a wake.’ (Isaya 48:17, 18) Naka sho mbetawɔ kɛndakɛnda kâmɛ la Nzambi la kɔlamelo tshɛ, kete tayokoka monga la wɔladi wa pondjo pondjo lam’asaso lande.
[Study Questions]
1, 2. Bonde kakokayɛ mbuta ɔnɛ kambɛ Jehowa ekɔ diɛsɛ dia woke na?
3. Ngande ‘wakakɛndakɛnda Nɔa la Nzambi ka mɛtɛ’ na?
4. Ngande walakanya Jehowa ekambi ande?
5. Bonde kele mɛtɛ y’oma l’Afundelo yekɔ ohomba efula?
6. Ewo k’oshika k’oma lo Bible tokimanyiyaka dia sho monga la lɔkɛwɔ la woh’akɔna?
7. Dui diakɔna diahotɔso dimɛna lam’ekaso Dui dia Nzambi lo kɛnɛ kendana la mandji y’anto?
8. (a) Kakɔna katshutshuya anto dia vɔ ndjakimɔ le Nzambi? (b) Ndjakimɔ k’Okristo kɛdikɛdi na?
9. Bonde kayakimɔ anto le Jehowa lɔsɛnɔ lawɔ l’otondo na?
10. Ngande wɔtɔnɛ ndjakimɔ k’onto la batismu kande?
11, 12. (a) Ngande wakokaso mbɛdinya batismu la diwala na? (b) Ngande wafɔna diokanelo diasaso la Jehowa la nɛ diele l’asa wadi l’omi na?
13. Dia kɛndakɛnda la Nzambi, sho pombaka ndjela ɛnyɛlɔ kaki na?
14. Mbeya Dui dia Nzambi kɛdikɛdi na?
15. Naa ɛnyɛlɔ kakasha Yeso lo dikambo dia tɛkɛta awui wendana la Nzambi?
16. Naa diokanelo diaki l’asa Yeso nde l’atɛmɔdi akina waki Jehowa na?
17. Ngande wakayaokaka Yeso lo ntsha lolango la She le l’olongo, ndo ngande watenda dui sɔ?
18. Naa ɛnyɛlɔ kakatosha Yeso lo dikambo dia dɔmbɛlɔ?
19. (a) Naa waonga wa Yeso wahombaso mbokoya? (b) Ngande wakondjaso wahɔ lam’ekaso lɔsɛnɔ la Yeso l’olimu wakandakambe na?
20. Naa ɛkamelo kayonga laso naka sho kɛndakɛnda la Jehowa?
21. Ɛtshɔkɔ akɔna wakokaso kondja naka sho kɛndakɛnda la Jehowa?
[Caption]
[Questions]
[Caption on page 11]
[Caption on page 11]
Wekelo, ndjakimɔ, la batismu ekɔ wanya w’ohomba takula dia kɛndakɛnda la Nzambi
[Caption on page 12]
[Review on page 12]
Ngande Wayoyokadimola?
◻ Bonde kênde kɛndakɛnda la Nzambi ka mɛtɛ ekɔ dui dia lokumu na?
◻ Bonde kele wekelo, ndjakimɔ la batismu ekɔ wanya wa ntondo wahombaso takula dia kɛndakɛnda la Jehowa?
◻ Ngande wakokaso nɔnda wanya wa Yeso?
◻ Ngande weyaso ɔnɛ Jehowa ayotosukɛ naka sho kɛndakɛnda la nde?