Tɔkɛndɛkɛndɛ La Nzambi—Dia Kondja Lɔsɛnɔ La Pondjo
‘Sho . . . tayɔkɛndakɛndaka lo lokombo la Jehowa Nzambi kaso pondjo pondjo.’—MIKA 4:5.
JEHOWA NZAMBI bu l’etatelo. Nde sunganaka mbetama ɔnɛ: “Tangu Andja,” nɛ dia heyama etena kakɔna kakandatɔngɔ. (Danyele 7:9, 13) Nshi ya Jehowa yayaye hayotonga l’ekomelo. Ndamɛ oto mbele ‘Nkumekanga ka pondjo.’ (Enyelo 10:6; 15:3) Ndo nto, lo washo ande, ɛnɔnyi kinunu wekɔ oko ‘lushi ɔtɔi lam’etalɔ, ndo oko djɔ ya ntondo l’otsho.’—Osambu 90:4.
2 Lam’ele Ombishi wa lɔsɛnɔ mongaka pondjo pondjo, nde akakoke mbisha Adama l’Eva, atshukanyi wa ntondo elongamelo ka vɔ monga la lɔsɛnɔ la pondjo lo Paradiso. Koko, l’ɔtɛ w’ohedia awɔ, Adama akashisha lotshungɔ la monga la lɔsɛnɔ la pondjo, ndo akayosambiyɛka ekana ande tshɛ pɛkato la nyɔi. (Romo 5:12) Koko, ɔtɔmbɔkwɛlɔ w’Adama kombitola sangwelo dia Nzambi di’oma k’etatelo. Lolango la Jehowa ele di’akanga w’okitanyiya kita lɔsɛnɔ la pondjo, ndo kɛnɛ kakandasangoya kayokotshama. (Isaya 55:11) Omalɔkɔ, sunganaka di’elongamelo kaso kana awui tshɛ wasangoyaso ntsha, sho mbatsha la kanyi ya kambɛ Jehowa l’oyango wa ndjokondja lɔsɛnɔ la pondjo. Sho nangaka momba “lushi la [Jehowa]” lo yimba, ndo ekɔ ohomba efula sho mbohɔka ɔnɛ oyango aso ele dia kɛndakɛndaka la Nzambi pondjo pondjo.—2 Petero 3:12.
Jehowa Ntshaka Akambo l’Etena Kakandashikikɛ
3 Oko watatakɛndakɛnda la Nzambi, sho ndjashaka efula dia kotshaka lolango lande. Sho mbeyaka ɔnɛ Jehowa mbele Okimedi wa Woke wa tena, ndo tekɔ l’eshikikelo k’ɔnɛ: ndoko kɛnɛ kakoka mboshimba nde kotsha asangwelo ande l’etena kakandashikikɛ. Oko ɛnyɛlɔ, “lam’akakuki yediko ya nshi, [Nzambi] akatumi On’andi.” (Ngalatiya 4:4) Wakatɛ ɔpɔstɔlɔ Joani ɔnɛ ‘etena kakashikikɛma’ kayoyala dia kɛnɛ kakandɛnyi lo tolembetelo kotshama. (Enyelo 1:1-3) ‘Etena kakashikikɛma ka nomboya anto wakavu’ kekɔ. (Enyelo 11:18) Ambeta ɛnɔnyi ndekana 1900, ɔpɔstɔlɔ Paulo akasambiyama dia nde mbut’ate: Nzambi “akasonola lushi la numbuya wa la kete [“la losembwe,” NW].”—Etsha 17:31.
4 Jehowa ayolanya dikongɛ di’akambo nɛ dia kɔlɔ, dikambo lokombo lande lambɔnywama efula l’andja ɔnɛ. Anto wa kɔlɔ wambofulanɛ. (Osambu 92:7) Vɔ tɛngaka Nzambi oma l’ɛtɛkɛta la oma l’etsha awɔ, ndo nde mbokaka kandji efula l’asolo lam’asoyawɔ ndo wanyɔkɔlawɔ ekambi ande. (Zekariya 2:9) Lo mɛtɛ, kem’edja nto, Jehowa ayolanya ɔlɔngɔswamelo waki Satana w’otondo! Nzambi akashikikɛ etena kayondotsha dikambo sɔ, ndo nto, ekotshamelo ka pɔlɔfɛsi ya lo Bible mɛnyaka hwe ɔnɛ ɛlɔ kɛnɛ tekɔ lo nsɛna lo “etena k’ekumelu.” (Danyele 12:4) Nde ayangakotsha sangwelo diande dia mbisha wanɛ tshɛ wawoka ngandji ɛtshɔkɔ.
5 Ekambi wa Jehowa wa lo nshi ya ntondo wakakombolaka mɛna etena kayoshila awui wa kɔlɔ. Lɔta, onto ɔlɔlɔ ‘aki la lonyangu l’efula l’ɔtɛ w’akambo wa mindo wakatshaka anto wa kɔlɔ.’ (2 Petero 2:7) Lam’akandanyangaka di’akambo wakatshamaka lo nshi yande, omvutshi Habakuka akambola ate: “[Jehowa] li, edja ndu kaandi ayumulela ekimanyelu, ku we hambukela? Dimi lambukulelela dia akambu wa ngala, keli we hatushimbela. Dikambu kuna dia menyaye uhedia, ndu dia menyaye kolo? Elanyelu la akambu wa ngala weko la ntundu kami. Ta dieko, tamu tambufulanela.”—Habakuka 1:2, 3.
6 Jehowa akakadimola Habakuka ate: “Enelo kene keko ne dia etena kakasonwama. To kutsha nkuma lu ekumelu kato, to huta kashi. Kuyanga to kayutshimbatshimba, nyukikungeli. To kayuya mete, hakiutshimbatshimba.” (Habakuka 2:3) Ɔnkɔnɛ, Nzambi akɛnya ɔnɛ nde ayokotsha kɛnɛ kakandasangoya ‘l’etena kakandashikikɛ.’ Kânga mbɛ̂namande di’oko lushi lakɔ lekɔ lo tshimbatshimba, Jehowa ayokotsha sangwelo diande lo weho akɔ tshɛ!—2 Petero 3:9.
Tosambisha l’Ohetoheto, Aha la Mpekɔ
7 Onde paka sho ntêyi ntondo wonya shikaa wayokotsha Jehowa sangwelo diande ko sho kɛndakɛnda la Nzambi l’ohetoheto tshɛ? Kema, aha ngasɔ. Tɔshi bɛnyɛlɔ dimɔtshi. Yeso akayasha efula lo dikambo di’etena kayotshama lolango la Nzambi la nkɛtɛ oko atshamalɔ l’olongo. Ɛɛ, Kristo aketsha ambeki ande dia vɔ nɔmba ɔnɛ: “Shesu le l’ulungu, lukumbu laye lalemiami. Diulelu diaye diayi. Lulangu laye latshami la kete uku atshamalo l’ulungu.” (Mateu 6:9, 10) Kânga mbakeyaka Yeso ɔnɛ dɔmbɛlɔ sɔ diayokɛma, nde kombeyaka wonya shikaa wayotshama awui asɔ. Lo pɔlɔfɛsi kande ka woke kendana l’ekomelo ka dikongɛ nɛ di’akambo, nde akate ate: “Keli nduku untu leya lushi lako kana unya ako, kuyanga andjelo wa l’ulungu, kuyanga Ona, paka Papa ndamɛ.” (Mateu 24:36) Lam’ele Yeso Kristo mbele l’ɔkɛndɛ woleki woke l’ekotshamelo ka sangwelo diaki Nzambi, nde ayekama l’atei dia nanya atunyi wa She lele l’olongo. Kânga lam’aki Yeso lanɛ la nkɛtɛ, nde kombeyaka lushi layokotsha Nzambi kɛnɛ kasangoyande. Ko onde, dui sɔ diakatutsha ohetoheto ande l’olimu wa Jehowa? Atonga na! Kam’akawɛnyi Yeso ɛ̂dia tɛmpɛlɔ l’ohetoheto tshɛ, “ambeki [ande] wakuho diui diakafundama ate: Saki ka luudu laye kayonde.” (Joani 2:17; Osambu 69:9) Yeso kɔnɛngɔlaka demba dia kamba olimu wakawotome, ndo nde akakambe olimu akɔ l’ohetoheto wa mamba. Nde lawɔ akakambɛka Nzambi dia kondja lɔsɛnɔ la pondjo.
8 Ngasɔ mbakatshe ndo ambeki wa Kristo. Yeso akahomana la wɔ yema la ntondo ka nde mbudɛ l’olongo. Bible kɔndɔlaka ɔnɛ: “Okone lam’akawasangana kame, vo wakawumbula vati: Khumadiondjo, undi, we ayulwela Isariyele diulelu lu etena kakona?” Oko Nkumɛwɔ, vɔ lawɔ wakakombolaka Diolelo ndja. Koko Yeso akakadimola ate: “Aha dikambu dianyu dia mbeya tena kana enonyi wakashikike Papa lu wulu andi. Keli nyu nyayulungula wulu lam’ayuya [n]yuma [“k’ekila,” NW] le nyu. Nyu nyayuyala emenyi ami lu Jerusalema, lu Judiya tshe la Samariya edja ndu l’ekumelu ka kete.”—Etsha 1:6-8.
9 Ndoko kɛ̂nya ɔnɛ ambeki wakakɔmɔ lam’akawoke okadimwelo ɔsɔ. Koko, vɔ wakaleke ndjasha l’olimu w’esambishelo. Lo mingu mɔtshi tsho, vɔ wakalodia Jerusalɛma la wetshelo awɔ. (Etsha 5:28) Ndo l’edja k’ɛnɔnyi 30, vɔ wakadianganya olimu awɔ w’esambishelo polo ndo lo yɛdikɔ yakakoke Paulo mbuta ɔnɛ lokumu l’ɔlɔlɔ lakasambishama “l’etungelu tshe la tshina di’ulungu.” (Kolosai 1:23) Kânga mbakiwɔ ‘kombololɛ Isariyɛlɛ’ Diolelo oko wakawalongamɛka lo yoho yahɔtɔnɛ ndo mbakidiɔ koshikikɛma l’olongo lo nshi yakiwɔ la lɔsɛnɔ, ambeki wakatetemala kambɛ Jehowa l’ohetoheto tshɛ l’oyango wa kondja lɔsɛnɔ la pondjo.
Tɔsɛdingole Kɛnɛ Katotshutshuya
10 Nd’ekambi waki Jehowa wa nshi nyɛ mbakombola mɛna ekomelo ka dikongɛ nɛ dia kɔlɔ di’akambo. Koko, kɛnɛ koleki ohomba le so kema dia tshungɔ ko mbɔtɔ l’andja w’oyoyo waki Nzambi. Sho nangaka mɛna nganɛ wayosantoyama lokombo la Jehowa la nganɛ wayoyindjama lowandji lande. L’ɔkɔkɔ ɔsɔ, sho kokaka ngɛnangɛna lo woho wele Nzambi kotêwoya ‘lushi la wonya’ wakandashikikɛ dia nanya andja ɔnɛ waki Satana. Dui sɔ toshaka diaaso dia sho mɛnya ɔnɛ tamboyashikikɛ dia kɛndakɛnda la Nzambi pondjo nɛ dia sho mbôkaka ngandji koko aha ɔnɛ tekɔ l’eyango wa lokaki w’onaso ɔnɛ wakotshami esadi eto.
11 Naka sho nama kɔlamelo yaso le Nzambi kete tayɛnya ɔnɛ Diabolo akate kashi lam’akandatɛ Nzambi ɔnɛ Jɔbɔ, onto ɔlɔlɔ, kâmɛ nd’anto akina tshɛ wele oko nde, mbôkambɛka la wahɔ ɔmɔtshi. L’ɔkɔngɔ wa Jehowa mɛnya ɔnɛ okambi ande Jɔbɔ ekɔ onto l’aha l’onongo, onto ɔlɔlɔ, l’oka Nzambi wɔma, Satana kanga kɔlɔ akâme ata ate: “Undi, Jobo mbukaka [Nzambi] woma wukuka? We kumbudinga lukumbu dia mbulama, ndi la wa lu luudu landi la diango diandi tshe? We akatshokola ulimu w’anya andi, dungalunga diandi diambufulanela la kete. Keli uhusimbula lunya laye kakiane, unandi kene tshe keli la ndi. Mete, ndi ayukoseka kaku.” (Jobo 1:8-11) Lo nama kɔlamelo yande l’ehemba, Jɔbɔ akɛnya ɔnɛ ɔsɛmɔ w’anyanya ɔsɔ waki paka kashi keto.
12 Woho akɔ mbele, naka ndo sho lawɔ nama kɔlamelo yaso, kete sho kokaka mɔndɔla Satana, ɔnɛ latohindɛ ɔnɛ sho kambɛka Nzambi paka lo woho weyaso ɔnɛ nde ayasuke la tosha difuto dia woke. Woho wahateye lushi shikaa layolanya Jehowa anto wa kɔlɔ toshaka diaaso dia sho mɛnya ɔnɛ sho mɛtɛ mbokaka Jehowa ngandji ndo nangaka kɛndakɛnda lo mboka yande pondjo pondjo. Dui sɔ mɛnyaka ɔnɛ tekɔ la kɔlamelo le Nzambi ndo mbetawɔka yoho tshɛ yayondotsha dia shidiya akambo. Lâdiko dia lâsɔ, woho wahateye lushi la wonya tokimanyiyaka dia sho sungukalaka lo nyuma la kɛsakɛsaka nɛ dia sho mbeyaka ɔnɛ ekomelo mbeyaka ndja wonya tshɛ, oko watoyaka wovi l’otsho. (Mateu 24:42-44) Lo kɛndakɛndaka la Jehowa nshi tshɛ, sho mbɔ̂ngɛnyangɛnyaka ndo kaloyaka Diabolo ɔnɛ l’ɔsɔmbwɛ dui.—Tukedi 27:11.
Tokanyiyake Dikambo dia Lɔsɛnɔ la Pondjo!
13 Wanɛ wakɛndakɛnda la Nzambi mbeyaka ɔnɛ ekɔ ɔlɔlɔ kanyiyaka dikambo dia nshi yayaye. Etena keyawɔ ɔnɛ ekakatanu la lutshundu hawasha diaaso dia ntsha akambo amɔtshi, anto efula pembaka dia kamba la wolo ndo la nshi yawɔ y’ɛlɔngɔlɔngɔ lo yoho y’ɔlɔlɔ dia vɔ ndjêya woho wa ndjoyakotshɛka ehomba awɔ wa l’emunyi lo nshi yawɔ yayaye. Ko kayotota lo dikambo dioleki ohomba diendana la nshi yaso yayaye ya lo nyuma na? Tukedi 21:5 mbutaka ɔnɛ: “Tukanyi ta kanga kolamelu, tatûkundjiyaka diango efula. Keli kanga utalutalu atuyalaka la wula.” Ekɔ dimɛna efula takanyiyisha dikambo dia lɔsɛnɔ laha l’ekomelo. Lam’ele hateye etena shikaa kayoya ekomelo ka dikongɛ nɛ di’akambo, katokanyiyake yema lo dikambo di’ehomba aso wa lo nshi yayaye. Koko paka sho monga la wɛdimo ndo mbetshaka wahɔ wa diolelo diaki Nzambi la tondo. Anto wele kema la mbetawɔ kokaka mbuta ɔnɛ: naka tayotshaka awui tshɛ paka dia kotsha lolango la Nzambi kete tayonga oko wanɛ wahɛnyi etale. Ko onde ngasɔ mbediɔ?
14 Yeso akoke wɛɛla ɔmɔtshi wahotola dikambo sɔ. Nde akate ate: “Kete ya kanga ongonyi omotshi yakangonya diango efula. Ku ndi akakani yimba l’utema andi ati: Kayumutsha na, ne dia dimi kema la lama mumba diango diami dia dinela? Ku ndi akati ati: Dimi layutsha okone: layuhandjula apenge ami, layuhika akina wuleki waki. Ku dimi layumba diango diami dia dinela la diango diami tshe loko. Ku layutela utema ami nti: Utema, we la diango efula diumbami dia deku efula. Ukaki olo, olekaki, onokaki, ongenangenaki. Keli [Nzambi] akawutela ati: Enginya li! Wayolomba [“anima,” NW] aye l’utshu w’elo one. Ku diango diakayalongosola diayuyala diaki na? Osoku mbeli untu layaumbela diango, laha la ukundji le [Nzambi].”—Luka 12:16-21.
15 Onde Yeso akataka lâsɔ ɔnɛ kanga ɔngɔnyi tâkinde la dia kamba efula dia ndjaombɛ ekundji woho wa ndjɔsɛna dimɛna lo nshi yande yayaye? Kema, nɛ dia Afundelo tokeketshaka dia sho kamba la wolo. (2 Tesalonika 3:10) Kɔlɔ kakatshe kanga ɔngɔnyi ɔsɔ ele nɛ dia nde kotsha kɛnɛ kaki ohomba dia ndjâla ‘l’ɔngɔnyi le Nzambi.’ Kânga mbakandakoke munanda ɔngɔnyi ande wa l’emunyi ɛnɔnyi efula, ekomelo a shimu ko nde otovɔ. Nde kɔmɛnaka etale la ntondo, kokanyiyaka lo dikambo dia lɔsɛnɔ la pondjo.
16 Kɛndakɛnda la Jehowa la kanyi ya ndjokondja lɔsɛnɔ la pondjo ekɔ dui dia tshundju ndo diɛnya ɔnɛ sho mɛnaka etale. Ɔsɔ ekɔ yoho yoleki ɔlɔlɔ ya kanyiya dikambo dia nshi yayaye. Kânga mbele ekɔ dui dia lomba dia sangoya kɛnɛ kayoyotsha lo nshi yayaye lo dikambo dia kalasa, olimu, kana di’ɛkɛndɛ wa lo nkumbo, sho pombaka mbohɔ nshi tshɛ ɔnɛ Jehowa hakalɛki ekambi ande wa kɔlamelo pondjo. Nkumekanga Davidi akembe ate: “Dimi laki olongo a pami, ku laya usumbi, keli latenyi untu ololo asekama, kuyanga an’andi walomba ma.” (Osambu 37:25) Woho akɔ wamɛ mbakatoshikikɛ Yeso ɔnɛ Nzambi ayokotsha ehomba a wanɛ tshɛ wetsha wahɔ wa Diolelo la ntondo ndo wakɛndakɛnda lo mboka ya Jehowa y’osembwe.—Mateu 6:33.
17 Kânga mbakambɛso Nzambi la kanyi ya monga la lɔsɛnɔ la pondjo, sho namaka lushi la Jehowa nshi tshɛ lo timba taso. Ekotshamelo ka pɔlɔfɛsi ya lo Bible mɛnyaka mɛtɛ ɔnɛ lushi lɔsɔ laya kasuke. Eleko kɛnɛ kamboleka ndola l’ata, hemɔ, adidimu wa nkɛtɛ, la ndjala ya kasha, kâmɛ ndo ɛhɛnyɔhɛnyɔ le Akristo wa mɛtɛ, aha la mbohɛ esambishelo ka l’andja w’otondo ka lokumu l’ɔlɔlɔ la Diolelo diaki Nzambi. Awui asɔ tshɛ wekɔ tolembetelo tɛnya ɔnɛ tekɔ lo nshi y’ekomelo ya dikongɛ dia kɔlɔ nɛ di’akambo. (Mateu 24:7-14; Luka 21:11) Andja ɔnɛ wambolola l’anto ‘wayalanga, walanga falanga, wayasɛma, akanga w’etako, atɛnganyi, wanɛ wahakitanyiya awui w’ambutshi, wanɛ wahokana losaka, atshi wa kɔlɔ, wahokana ngandji ka mɛtɛ, wa etamba alako, amamanyishi, wanɛ wahayakimɛ, akanga w’esehe, atshi w’akambo wa kɔlɔ, afungi, akanga w’ɛtɛ wolo, etako, anangi w’ɛngɛnɔngɛnɔ oleki anangi wa Nzambi.’ (2 Timote 3:1-5) Lɔsɛnɔ laya wolo efula lo nshi nyɛ y’ekomelo le so, sho Ɛmɛnyi wa Jehowa. Ande efula kakombolaso lushi layonya Diolelo diaki Jehowa akambo wa kɔlɔ tshɛ oma la nkɛtɛ lee! L’etena kâkatasɛnɛ kɛnɛ, nyɛsɔ toyashikikɛ dia kɛndakɛndaka la Nzambi l’oyango wa kondja lɔsɛnɔ la pondjo lo nshi yayaye.
Tokambake la Kanyi ya Lɔsɛnɔ Laha l’Ekomelo
18 Katôhɔke mbetawɔ kaki la Abɛlɛ, Ɛnɔka, Nɔa, Abarahama, la Sara etena kɛnɛ katatakɛndakɛnda la Jehowa. L’ɔkɔngɔ wa nde mbashila, Paulo akafunde ate: “Wane tshe wakavu lu mbetawo la ntundu watalungula alaka, keli vo wakawaenyi uma l’etali, wakâlemia; waketawo vati: antu wa kana la angendangenda mbesu la kete nye.” (Heberu 11:13) Akanga wa kɔlamelo asɔ tshɛ ‘wakalongamɛka dia kondja dihole di’ɔlɔlɔ efula, mbut’ate: dia l’olongo.’ (Heberu 11:16) Oma lo mbetawɔ kawɔ mbakawêndɛka la ntondo dia kondja dihole di’ɔlɔlɔ la tshina di’ɛlɔmbwɛlɔ ka Diolelo dia Mɛsiya waki Nzambi. Sho mbeyaka ndjashikikɛ ɔnɛ Nzambi ayowafuta lɔsɛnɔ la pondjo lo dihole dia dimɛna sɔ, mbut’ate: lo Paradiso ka la nkɛtɛ l’ɛlɔmbwɛlɔ ka Diolelo.—Heberu 11:39, 40.
19 Omvutshi Mika ambɛnya nganɛ wamboyâshikikɛ ekambi wa Jehowa dia kambɛka Nzambi pondjo pondjo. Nde akafunde ate: ‘Lo kɛnɛ kawaenda, anto tshɛ wayɔkɛndakɛnda, onto l’onto lo lokombo la nzambi kawɔ; koko le so, sho tayɔkɛndakɛndaka lo lokombo la Jehowa Nzambi kaso pondjo pondjo.’ (Mika 4:5) Mika akakambɛ Jehowa la kɔlamelo polo lo nyɔi. Ndo aha la tamu, lam’ayondolwama l’andja w’oyoyo, omvutshi ɔsɔ ayotetemala kɛndakɛnda la Nzambi pondjo pondjo. Ande ɛnyɛlɔ k’ɔlɔlɔ le so sho wanɛ wasɛna ɛlɔ kɛnɛ l’etena k’ekomelo lee!
20 Jehowa ngɛnangɛnaka ngandji kôkaso lokombo lande. (Heberu 6:10) Nde mbeyaka ɔnɛ kema dui dia tshitshɛ dia nama kɔlamelo yaso le nde l’andja ɔnɛ walɔmbwama oma le Diabolo. Koko, kânga ‘mbatete andja ɔnɛ, onto latsha lolango la Nzambi ayotshikala pondjo.’ (1 Joani 2:17; 5:19) Ɔnkɔnɛ, oma l’ekimanyielo ka Jehowa, nyɛsɔ toyashikikɛ dia mbikikɛ ehemba wa lushi la lushi wahomana laso. Oyadi lo lɔkɛwɔ kana lo tokanyi taso, nyɛsɔ todje timba taso paka lo ɛtshɔkɔ wa diambo wakatolake Shɛso ka ngandji le l’olongo. Sho kokaka kondja ɛtshɔkɔ ɛsɔ naka tayɔkɔlamɛ kɛndakɛnda la Nzambi l’oyango wa kondja lɔsɛnɔ la pondjo.—Jude 20, 21.
[Study Questions]
1. Bonde kakokaso mbelɛ Jehowa ɔnɛ ‘Nkum’ekanga ka pondjo’?
2. (a) Kakɔna kasangoya Nzambi salɛ akanga w’okitanyiya? (b) Elongamelo l’asangwelo aso pombaka monga lo dikambo diakɔna?
3. Ngande weyaso ɔnɛ Jehowa ekɔ ‘l’etena kakandashikikɛ’ ka kotsha asangwelo ande?
4. Ngande weyaso ɔnɛ Jehowa nangaka kumiya dikongɛ nɛ dia kɔlɔ di’akambo?
5. Ngande wakɛnaka Lɔta la Habakuka awui wakatshamaka lo nshi yawɔ?
6. Naa okadimwelo wakasha Jehowa Habakuka lo dɔmbɛlɔ diande, ndo wetshelo akɔna wakokaso kondja oma lɔkɔ?
7. Kânga mbaki kombeya Yeso etena shikaa kayoya lushi la Jehowa, ngande wakandakambaka olimu ande?
8, 9. Akawatɛ ambeki lam’akawambola dikambo dia eolwelo ka Diolelo, ko akawatshe?
10. Ahombaso mɛnya etena kɛnɛ kahateye wonya wayolanya Nzambi dikongɛ nɛ di’akambo diaki Satana?
11, 12. Ngande wakɔtɔ kɔlamelo ya Jɔbɔ l’ehemba, ndo lo na atenda ohemba akɔ na?
13. Bible atatɔ lo dikambo di’asangwelo aso wendana la nshi yayaye na?
14, 15. (a) Wɛɛla akɔna wakoke Yeso lo dikambo di’akambo wasangoyaso ntsha lo nshi yayaye na? (b) Bonde kele kanga ɔngɔnyi la lo wɛɛla wa Yeso kɔmɛnaka etale na?
16. Bonde kahombaso ndjaɛkɛ tshɛ le Jehowa lo dikambo dia nshi yaso yayaye?
17. Ngande weyaso ɔnɛ ekomelo kaya suke?
18, 19. Kakɔna kɛnya ɔnɛ akanga wa kɔlamelo wa lo nshi ya ntondo wakakambɛka Nzambi la kanyi ya lɔsɛnɔ la pondjo na?
20. Ahombaso ndjashikikɛ dia ntsha?
[Caption]
[Questions]
[Caption on page 17]
[Caption on page 17]
Dia kɛndakɛnda la Nzambi, sho la dia mbokambɛ l’ohetoheto oko ambeki wa Kristo
[Caption on page 18]
[Review on page 18]
Ngande Wayoyokadimola?
◻ Nzambi asangoyande salɛ akanga w’okitanyiya?
◻ Bonde kahatâlanya Jehowa andja wa kɔlɔ ɔnɛ na?
◻ Bonde kahatahombe kitshakitsha ohetoheto aso l’ɔkɔkɔ w’ɔnɛ hateye etena shikaa kayolanya Jehowa andja ɔnɛ?
◻ Ɛlɔlɔ ɛmɔtshi akɔna wayotokondja naka sho kɛndakɛnda la Nzambi l’oyango wa kondja lɔsɛnɔ la pondjo na?