Ɔnɛ Ekɔ Lushi La Panda!
“Ulungi, kakiane eko etena k’ololo; enda, kakiane eko lushi la panda.”—2 KORETO 6:2.
1. Kakɔna kele ohomba dia mbetawɔma le Nzambi la Kristo?
JEHOWA akasɔnɔla lushi lahombande nomboya anto tshɛ. (Etsha 17:31) Naka sho nangaka panda lo lushi lɔsɔ, kete sho pombaka mbetawɔma le nde ndo le Yeso Kristo, Shushi yakandasɔnɛ. (Joani 5:22) Dia vɔ têtawɔ, sho tshɛ pombaka ndjâla la lɔkɛwɔ lɔtɔnɛ la Dui dia Nzambi ndo la mbetawɔ katosokoya dia sho kimanyiya anto akina dia vɔ koma ambeki wa mɛtɛ waki Yeso.
2. Lande na kele andja aso ɔnɛ wambangana la Nzambi na?
2 L’ɔtɛ wa pɛkato k’ohowɔ, andja w’otondo wambângana la Nzambi. (Romo 5:12; Efeso 4:17, 18) Omalɔkɔ, dia anto wasambishaso kondja panda, vɔ la dia mbokana la Nzambi. Ɔpɔstɔlɔ Paulo akakɛnɛmɔla dikambo sɔ lam’akandafundɛ Akristo wa la Kɔrɛtɔ. Nyɛsɔ tɔsɛdingole 2 Koreto 5:10–6:10 dia mɛna kɛnɛ kakate Paulo lo dikambo di’elombwelo, dia diokanelo la Nzambi, ndo dia panda.
‘Tekɔ lo Tetemala Mbetawoya Anto’
3. Ngande ‘wakatetemalaka Paulo mbetawoya anto,’ ndo lande na kahombaso ntsha ngasɔ ɛlɔ kɛnɛ?
3 Paulo akɔtɔnganyia elombwelo la esambishelo lam’akandafunde ate: “Ne dia dieli la su, shu tshe, dia menama la ntundu k’elumbwelu ka Kristu, dia untu l’untu nungula akambu uku akandatshi lam’akindi lu dimba, kana ololo kana kolo. Ne dia shu mbeyaka woma wa Khumadiondjo, shu [“tekɔ lo tetemala mbetawoya,” NW] antu.” (2 Koreto 5:10, 11) Ɔpɔstɔlɔ ‘akatetemalaka mbetawoya anto’ lo mbâsambisha lokumu l’ɔlɔlɔ. Ko sho ngande na? Lam’ele ekomelo ka dikongɛ dia kɔlɔ nɛ di’akambo kaya suke, sho pombaka ntsha tshɛ dia mbetawoya anto akina dia vɔ ntsha woho w’aha monga l’onongo lo washo wa Yeso ndo dia vɔ mbetawɔma le Jehowa Nzambi, Kiɔkɔ ya panda.
4, 5. (a) Lande na kahatahombe funa lo dikambo dia kɛnɛ katshaso l’olimu wa Jehowa? (b) Lande na akafunde Paulo ‘lo dikambo dia Nzambi’?
4 Koko, naka Nzambi ambɔtshɔkɔla olimu aso, kete hatohombe funa. Ase Kɔrɛtɔ amɔtshi wakafunaka kana wakasalɛka anto akina lokanyi, ko dui sɔ diakâtolaka etshumanelo. (1 Koreto 1:10-13; 3:3, 4) Paulo akavusola dui sɔ lam’akandafunde ate: “Shu hatuyaeyanya le nyu ntu, keli shu tambunyutshikela dihuli dia nyu ndjatumbula lu dikambu diasu, ne dia nyu ndjala la wulu wa nkaluya diui le waku watuyatumbulaka lu ashu w’antu, aha uma l’etema. Naka shu tambudjo l[o] yimba, dikambu so dieko dia [Nzambi]. Naka shu la yimba y’ololo, dikambu so dieko dianyu.” (2 Koreto 5:12, 13) Akanga a didiya wakadjaka paka diatɔnelo l’atei w’etshumanelo ndo wakafukutanyaka lonyuma latɔ. Vɔ wakayasɛmaka lo demba, lo dihole dia vɔ kimanyiya anyawɔ ambetawudi dia vɔ mbɛdia etema awɔ la ntondo ka Nzambi. Omalɔkɔ, Paulo akayohangwɛ etshumanelo ate: “Keli one latuyatumbulaka, ayatumbuli le [Jehowa].”—2 Koreto 10:17.
5 Ko onde paulo kondjadiyaka? Ondo amɔtshi wakakane ngasɔ lo woho wakandate nganɛ wende ɔpɔstɔlɔ. Koko nde akahombe ndjadiya le “Nzambi.” Nde akayadiya ngasɔ dia mɛnya lɔkɛlɛngɛ laki la nde oko ɔpɔstɔlɔ di’aha Ase Kɔrɛtɔ ndjângana la Jehowa. Paulo akatshe ngasɔ dia mbâkaloya oya le Nzambi nɛ dia apɔstɔlɔ wa kashi wakawanganyiyaka. (2 Koreto 11:16-21; 12:11, 12, 19-21; 13:10) Koko, Paulo kônyangaka paka dia mambiya anto l’awui wakandatshe.—Tukedi 21:4.
Onde Ngandji ka Kristo Kotshutshuyaka?
6. Ngandji ka Kristo pombaka tɔsɛngiya lo na?
6 Oko wakinde ɔpɔstɔlɔ wa mɛtɛ, Paulo aketsha anto akina dikambo di’olambo w’etshungwelo waki Yeso. Olambo akɔ waki la shɛngiya lo lɔsɛnɔ la Paulo nɛ dia nde akafunde ate: “Ngandji ka Kristu [“totshutshuyaka,” NW], ne dia shu mbetawoka shati: Otoi kakavwela tshe, okone tshe wakavu. Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakâvwela, lakulwama dikambu diawo.” (2 Koreto 5:14, 15) Ande ngandji kakɛnya Yeso lam’akandalambola lɔsɛnɔ lande lo dikambo diaso lee! Mɛtɛ, dui sɔ pombaka ndjâla oko nkudu kɛmɔtshi katotshutshuya lo nsɛnɔ yaso. Lowando laso otsha le Yeso lo woho wakandalambola lɔsɛnɔ lande lo dikambo diaso pombaka tosokoya dia sho sambisha l’ohetoheto tshɛ lokumu l’ɔlɔlɔ la panda lakatosha Jehowa oma lo tshimbo y’Ɔnande la ngandji efula. (Joani 3:16; ɛdika l’Osambu 96:2.) Onde “ngandji ka Kristu” kosokoyaka dia wɛ sambishaka lokumu la Diolelo ndo mbetɛka anto ambeki l’ohetoheto tshɛ oka?—Mateu 28:19, 20.
7. Etelo k’ɔnɛ “hateyi untu lu wuhu wa dimba” alembetshiyatɔ?
7 Lo nɔmbɔla nsɛnɔ yawɔ lo yoho yɛnya ɔnɛ vɔ mandolaka kɛnɛ kakâtshɛ Kristo, Akristo w’akitami ‘hawoyɔ̂sɛna nto lo dikambo diawɔ vamɛ, koko lo dikambo diande.’ Paulo ate: “Okone umaka kakiane, shu hateyi untu lu wuhu wa dimba, uku akateyi Kristu lu wuhu wa dimba, shu hatuweyi osoku ntu.” (2 Koreto 5:16) Akristo hawohombe mɛna anto lo yoho ya lo demba, esangɔ ɛmɔtshi oma lo semulaka Ase Juda kana akanga w’ɛngɔnyi ko mɛnɛka Ase Wedja kana akanga a wola. Akitami ‘haweye ndoko onto lo yoho ya lo demba’ nɛ dia diokanelo dia lo nyuma diele las’awɔ l’anyawɔ ambetawudi mboleki ohomba. Wanɛ ‘wakêyaka Kristo lo demba’ komonga paka wanɛ wakɛnyi Yeso lam’akinde lanɛ la nkɛtɛ. Kânga wanɛ wakalongamɛka Mɛsiya wakalongamɛka mɛna Kristo oko onto k’onto, koko takawahombe mbowɔ̂sa ngasɔ nto nɛ dia nde akolwama oko nyuma. Nde akakimɔ demba diande oko tshungo ndo akolwama oko nyuma kasha anto lɔsɛnɔ. Akina wanɛ wayolwama dia lɔsɛnɔ la l’olongo wayotshika alemba awɔ w’anto aha la mɛna Yeso Kristo ndoko lushi lanɛ la nkɛtɛ lo demba di’emunyi.—1 Koreto 15:45, 50; 2 Koreto 5:1-5.
8. Ngande wayongaka onto ‘kâmɛ la Kristo’?
8 Lam’akandatɛka akitami awui asɔ, Paulo akakotsha ate: “Naka untu eko [“kâmɛ la,” NW] Kristu ndi ambuyala etungamelu k’uyuyu. Akambu w’edjedja wambetaka, enda, akambu tshe wambuyala eyuyu.” (2 Koreto 5:17) ‘Monga kâmɛ la Kristo’ kɛdikɛdi monga ɔtɔi kâmɛ lande. (Joani 17:21) Onto ndjokomaka lo mbokana lande ngasɔ naka Jehowa ambôkotola oya le Ɔnande ndo ambowota l’ekimanyielo ka nyuma k’ekila. Lam’ende ɔna Nzambi lakotɔ le nyuma, nde aki “etungamelu k’uyuyu” kaki l’elongamelo ka mbolɛ kâmɛ la Kristo lo Diolelo diande dia l’olongo. (Joani 3:3-8; 6:44; Ngalatiya 4:6, 7) Akristo w’akitami asɔ wakakondja diɛsɛ di’olimu dia woke efula.
‘Nyôkane la Nzambi’
9. Kakɔna kakatshe Nzambi di’anto mbokana la nde na?
9 Ande ɔlɔlɔ wakasalɛ Jehowa “etungamelu k’uyuyu” lee! Paulo ate: ‘Diangɔ tshɛ diele oma le Nzambi, lakôkana la so ndamɛ oma le Kristo, ndo lakatosha olimu wa mbokanya anto wa l’andja ɔnɛ kâmɛ la Nzambi ndamɛ oma lo tshimbo ya Kristo, aha mbâlela ediakelo kawɔ k’ɛlɛmbɛ, kele akatokitshiya dui dia mbokana la so.’ (2 Koreto 5:18, 19) Anto tshɛ wakangana la Nzambi oma k’etena kakatshe Adama pɛkato. Koko oma lo ngandji kande, Jehowa akɔshi yɛdikɔ dia tatɛ mbokana l’anto oma lo tshimbo y’olambo wa Yeso.—Romo 5:6-12.
10. Jehowa Akristo akɔna wakandasha olimu wa mbokanya anto la nde, ndo akawatshe dia kotsha ɔkɛndɛ ɔsɔ?
10 Lam’ele Jehowa akasha akitami olimu wa mbokanya, Paulo akakoke mbuta ate: “Sho teekɔ lo ntɛkɛta l’ɔtɛ wa Kristo, oko waate kana [Nzambi] ndaamɛɛ kanyeeta oma leeso; tambonyɔsɛngasɛnga lo lokombo la Kristo shaate nyeetawɔ dya mbokana la [Nzambi].” (2 Kɔrɛntɛ 5:20, Dyookaneelo dy’oyooyo) Lo nshi ya ntondo, wakatomaka akɛndji, djekoleko lo nshi y’ofukutanu, dia tênda kana vɔ kokaka mbewɔ ta. (Luka 14:31, 32) Lam’ele andja w’akanga a pɛkato ɔnɛ mangana etale la Nzambi, nde akatome akitami oko akɛndji dia mbewoya anto kɛnɛ kalɔmbama dia vɔ mbokana la nde. Oko wewɔ akɛndji wa Kristo, akitami nɔmbaka anto tshɛ ɔnɛ: ‘Nyôkane la Nzambi.’ Ɔsɔ ekɔ leeta la kɛtshi di’anto nyanga wɔladi l’asawɔ la Nzambi ndo mbetawɔ panda kashande oma lo tshimbo ya Kristo.
11. Waa na wayɛnamaka akanga a losembwe lo washo a Nzambi oma lo monga la mbetawɔ lo tshungo ka Yeso?
11 Anto tshɛ wele la mbetawɔ l’olambo wa tshungo kokaka mbokana la Nzambi. (Joani 3:36) Paulo ate: ‘Ɔnɛ laki kontsha pɛkato, nde akawɛ̂mbia pɛkato yaso, dia sho mɛnama anto w’ɔlɔlɔ le Nzambi oma lo tshimbo yande.’ (2 Koreto 5:21) Yeso, onto a kokele mbakafute olambo lo dikambo dia pɛkato k’ana w’Adama tshɛ wambotshungɔ oma lo pɛkato k’ohowɔ. Vɔ ‘wakɛnama anto a losembwe lo washo a Nzambi’ oma le Yeso. Losembwe lɔsɔ, kana mɛnama anto w’ɔlɔlɔ lo washo a Nzambi mboleki ohomba le ekitɔ 144000 wayôlɛ kâmɛ la Kristo. Lo Diolelo diande di’Ɛnɔnyi Kinunu, ana tshɛ wa la nkɛtɛ waki Yeso Kristo, Shɛso ka Pondjo, wayɛnama akanga a losembwe lo monga anto wa kokele. Nde ayowakonya anto w’ɛlɔlɔ ndo wa kokele dia vɔ mɛnya kɔlamelo yawɔ le Nzambi ko kondja woshasha wa lɔsɛnɔ la pondjo.—Isaya 9:6; Enyelo 14:1; 20:4-6, 11-15.
“Etena k’Ololo”
12. Olimu akɔna w’ohomba wakamba akɛndji ndo atomami wa Jehowa?
12 Dia kondja panda, sho pombaka ndjela ɛtɛkɛta ɛnɛ w’ɔpɔstɔlɔ Paulo: “Shu tatukambaka kame la [Jehowa], tambunyosengasenga shati: Tanyulungulaki ngandji ka mamba ka [“Nzambi ko ndjoshisha oyango atɔ,” NW]; ne dia ndi akati ati: L’etena k’ololo, dimi lakakuhukama; Lu lushi la panda, dimi lakakukimanyia. Ulungi, kakiane eko etena k’ololo; enda, kakiane eko lushi la panda.” (2 Koreto 6:1, 2) Akɛndji waki Jehowa w’akitami kamɛ ndo atomami ande, mbut’ate: “ekoko ekina,” hawolongola ngandji ka mamba ka Shɛwɔ lele l’olongo ko ndjoshisha oyango atɔ. (Joani 10:16) Oma lo lɔkɛwɔ lawɔ l’ɔlɔlɔ ndo oma l’olimu wakambawɔ l’ohetoheto lo “etena k’ololo,” vɔ nyangaka ngandji ka Nzambi ndo mbewoyaka wanɛ wodjashi la nkɛtɛ vate: ɔnɛ ekɔ “lushi la panda.”
13. Kanyi yakɔna y’ohomba yele lo Isaya 49:8, ndo ngande wakakotshama divɛsa sɔ mbala ka ntondo?
13 Paulo akavusola awui w’Isaya 49:8, lɛnɛ adiaso ɔnɛ: “Okone mbata [Jehowa] ati: L’etena ka ngandji kami [mbakama]kukaluya diui, ndu lu lushi la panda mbakamakukimanyia. Dimi layukulama ndu layukushikike, dia we mbidja la wudja sheki, dia we mbulula luhanga, ndu dia nkahanya ahuli wakalana.” Pɔlɔfɛsi kɛnɛ kakakotshama mbala ka ntondo lam’akatshungɔ As’Isariyɛlɛ oma lo fumbe la Babilɔna ko vɔ ndjokalola lo nkɛtɛ yawɔ yakatshikala tɔngɔ to.—Isaya 49:3, 9.
14. Ngande wakakotshama Isaya 49:8 lo dikambo dia Yeso?
14 Lam’akayokotshama pɔlɔfɛsi k’Isaya mbala ka hende, Jehowa akakimɔ “ukambi” ande, Yeso, oko “usasi le asi wedja, dia nkumia panda ka [Nzambi] lu kuma ya la kete.” (Isaya 49:6, 8; ɛdika la Isaya 42:1-4, 6, 7; Mateu 12:18-21.) ‘Etena ka ngandji,’ kana “etena k’ololo,” kakendana la Yeso lam’akinde lanɛ la nkɛtɛ. Nde akalɔmbɛ ko Nzambi ‘akôkadimola.’ Le Yeso, ɔsɔ aki “lushi la panda” nɛ dia nde akalame kɔlamelo l’akambo tshɛ ko “ndi akayala utungi a panda ka pundju le wane tshe watûkitanyiaka.”—Heberu 5:7, 9; Joani 12:27, 28.
15. Oma k’etena kakɔna kakayasha Ase Isariyɛlɛ wa lo nyuma dia mɛnya ɔnɛ vɔ sunganaka la ngandji k’ɔtɛkɔya kaki Nzambi, ndo l’oyango akɔna?
15 Paulo akakambe la Isaya 49:8 lo dikambo di’Akristo w’akitami, akâsɛngasɛnga ‘di’aha vɔ shisha oyango wa ngandji k’ɔtɛkɔya kaki Nzambi’ oma lo pekɔ nyanga ɔlɔlɔ ande “l’etena k’ololo” ndo lo “lushi la panda” lashande anto. Paulo akakotsha ate: “Ulungi, kakiane eko etena k’ololo; enda, kakiane eko lushi la panda.” (2 Koreto 6:2) Oma ko pɛntɛkɔsta ka lo 33 T.D., As’Isariyɛlɛ wa lo nyuma wakatshe tshɛ dia mɛnya ɔnɛ vɔ sunganaka la ngandji k’ɔtɛkɔya—ka Nzambi woho wa “etena k’ololo” ndjâla ‘lushi la panda’ le wɔ.
‘Toyaɛnya Shamɛ oko Ekambi a Nzambi’
16. La ntondo k’ekakatanu akɔna wakayaɛnya Paulo oko okambi a Nzambi?
16 Anto amɔtshi waki l’etshumanelo k’Ase Kɔrɛtɔ kondjaɛnyaka ɔnɛ vɔ sunganaka la ngandji k’ɔtɛkɔya kaki Nzambi. Wakamamatanyiyɛ Paulo awui wa kashi dia nanya lowandji laki lande oko ɔpɔstɔlɔ, kânga mbakandewɔka di’aha ndjâla ‘otamba wa ntakanya le anto akina.’ Lo mɛtɛ, nde akayaɛnya oko okambi a Nzambi “lu ekikelu ka mamba, lu asui, lu ehumba, lu akambu wa penyo, lu dikomoki, lu mvudu ya kanu, lu mindju, lu pa, lu senelo, lu dikilelu dia mbu ya nde.” (2 Koreto 6:3-5) Paulo akayokanaka yimba l’ɔkɔngɔ diko ate: naka atunyi ande waki ekambi, kete nde ‘akâleke l’awui efula’ nɛ dia nde akasowe hakoke lo nkanu, akakulama, aki lo wâle efula, ndo lo wola.—2 Koreto 11:23-27.
17. (a) Sho kokaka ndjaɛnya ɔnɛ tekɔ ekambi a Nzambi lo monga la waonga akɔna? (b) Ele “eloto wa ta w’akambu w’ololo”?
17 Oko Paulo la wanyande, sho kokaka ndjaɛnya shamɛ oko ekambi a Nzambi. Woho akɔna na? ‘Lo monga pudipudi,’ kana tona awui a mindo, ndo lo ntshaka akambo wɔtɔnɛ l’ewo k’oshika k’oma lo Bible. Sho kokaka ndjaɛnya oko ekambi a Nzambi ‘lo monga la lotutsha,’ latokimanyiya dia mbikikɛ akambo wa kɔlɔ kana esolanyi, ndo lo monga ‘l’otema w’ɔlɔlɔ’ wa kimanyiyaka anto akina. Lâdiko dia lâsɔ, sho kokaka ndjaɛnya shamɛ oko ekambi a Nzambi lo mbetawɔ ɛlɔmbwɛlɔ ka nyuma kande, lo mɛnya “ngandji kaha la lukesu,” lo mbutaka awui wa mɛtɛ, ndo lo ndjaɛkɛka le nde dia kondja wolo wa tetemala kamba olimu aso. Dui dia diambo ele Paulo akɛnya nto woho wende okambi “lu eloto wa ta w’akambu w’ololo, lu lunya la pami ndu lu lunya la lomoso.” L’ata wakawalɔka nshi shɔ, anto waki la mbekelo ka kimɛka yɔɔmbɔ lo lonya l’omi ko engawo lo lonya la wadi. Lam’akandalɔka ta dia lo nyuma l’embetsha wa kashi, Paulo kôkamba la bɔngɛ dia l’emunyi diele oko: lokeso, kana kashi. (2 Koreto 6:6, 7; 11:12-14; Tukedi 3:32) Nde akakambaka la bɔngɛ kana “eloto wa ta” w’ɔlɔlɔ dia pamia ɔtɛmwɛlɔ wa mɛtɛ. Ngasɔ mbahombaso ntsha sho lawɔ.
18. Naka ekambi a Nzambi mbeso, ngande wahomba monga lɔkɛwɔ laso na?
18 Naka tekɔ ekambi a Nzambi, kete tayongaka oko Paulo l’anyande ekambi. Tayotshaka awui aso oko Akristo oyadi anto wayotɔlɛnya kana bu. Awui wa kashi watawɔ lo lokombo laso hakoke toshimba sambisha, kana hatokoke ndjadiya etena katawɔ awui w’ɔlɔlɔ lo lokombo laso. Tayotaka mɛtɛ keto ndo anto wayoteya oma l’etsha aso wa wanɛ woka Nzambi wɔma. Oyadi kânga tambokoma lo wâle la ntondo k’atunyi wambotohangakalɛ, diaso ele mbɛkama Jehowa. Ndo tayetawɔka wongwelo la lowando.—2 Koreto 6:8, 9.
19. Ngande wakokaso ‘ndjaetɛ ɔngɔnyi efula’ lo nyuma na?
19 L’ekomelo ka sawo diande diendana l’olimu wa mbokanya anto la Nzambi, Paulo akate lo dikambo diande ndo di’anyande ɔnɛ vɔ wekɔ “uku akanga wa lunyangu, keli [w]atongenangenaka nshi tshe; uku akanga a weula, keli [w]atongonyaka antu efula; uku wane waha la engo, keli [w]eko akanga wa diango tshe.” (2 Koreto 6:10) Kânga mbele ekambi ɛsɔ wakanyangaka lo dikambo di’asui awɔ, vɔ waki l’ɔlɔ l’otema. Waki akanga a weola l’emunyi, koko ‘waki l’ɔngɔnyi w’efula’ lo nyuma. Lo mɛtɛ, vɔ ‘waki la diangɔ tshɛ’ nɛ dia mbetawɔ kawɔ akawaelaka ɔngɔnyi wa lo nyuma—oko elongamelo ka ndjâla ana a Nzambi wa l’olongo. Ndo nto, vɔ waki la lɔsɛnɔ l’ɔngɔnyi ndo l’ɔngɛnɔngɛnɔ oko ekambi w’Akristo. (Etsha 20:35) Lo ndjela ɛnyɛlɔ kawɔ, sho lawɔ koka ‘monga l’ɔngɔnyi w’efula’ lo sambishaka anto dia vɔ mbokana la Nzambi ɛlɔ kɛnɛ—lo lushi lɔnɛ la panda lasɛnaso!
Toyaɛkɛ lo Panda ka Jehowa
20. (a) Paulo akandalekaka kombola, ndo lande na kakiwɔ komonga la wenya wa mbetsha wetshetsha? (b) Kakɔna kɛnya ɔnɛ tekɔ lo nsɛna ɛlɔ kɛnɛ lo lushi la panda?
20 Lam’akafundɛ Paulo Ase Kɔrɛtɔ mukanda ande wa hende oya lo 55 T.D., dikongɛ di’akambo di’Ase Juda diakatshikala paka l’ɛnɔnyi 15 eto la ntondo ka diɔ nanyema. Ɔpɔstɔlɔ akakombola efula di’Ase Juda l’Ase Wedja mbokana la Nzambi oma lo tshimbo ya Kristo. Ɔsɔ aki lushi la panda, ndo takawahombe mbetsha wenya wetshetsha. Ɛɛ, ndo sho lawɔ tekɔ lo nsɛna lo nshi y’ekomelo ka dikongɛ nɛ di’akambo oma ko 1914. Olimu w’esambishelo ka Diolelo wakambema ɛlɔ kɛnɛ mɛnyaka ɔnɛ tekɔ lo lushi la panda.
21. (a) Naa divɛsa di’ɔnɔnyi wa 1999? (b) Kakɔna kahombaso ntshaka lo lushi lɔnɛ la panda na?
21 Anto wa lo wedja tshɛ wekɔ l’ohomba wa mbeya yɛdikɔ yambɔsa Nzambi oma lo tshimbo ya Yeso Kristo dia mbisha anto panda. Ɔnɛ bu wonya wa tshimbatshimba. Paulo akafunde ate: “Enda, kakiane eko lushi la panda.” Ɛtɛkɛta ɛsɔ wa lo 2 Koreto 6:2 mbayoyala divɛsa di’ɔnɔnyi wa 1999 le Ɛmɛnyi wa Jehowa. Ande woho wasungana divɛsa sɔ nɛ dia tekɔ la ntondo ka dikambo dimɔtshi dia wolo efula oleki elanyelo ka Jerusalɛma la tɛmpɛlɔ katɔ lee! Kem’edja, kete dikongɛ nɛ di’akambo diambokomɛ, dui diendana l’anto tshɛ wa la nkɛtɛ. Ɛlɔ kɛnɛ koko aha lui, mbele etena ka wɛ mbɔsa yɛdikɔ mɔtshi. Naka sho mbetawɔka ɔnɛ panda kekɔ ka Jehowa, naka sho mbôkaka ngandji, ndo naka sho nangaka sɛna pondjo, kete hatotohandja oyango wa ngandji k’ɔtɛkɔya kaki Nzambi. Naka sho kombolaka tombola Jehowa oma k’ɛse otema, kete tayɛnya oma l’etsha ndo oma l’ɛtɛkɛta aso ɔnɛ sho tamboshihodia ohomba w’ɛtɛkɛta ɛnɛ: “Enda, kakiane eko lushi la panda.”
[Caption]
[Questions]
[Caption on page 15]
[Caption on page 15]
L’ɛnyɛlɔ ka Paulo, onde wɛ sambishaka l’ohetoheto tshɛ ndo kimanyiyaka akina dia vɔ mbokana la Nzambi?
États-Unis, France, Côte d’Ivoire
[Caption on page 16]
[Caption on page 16]
Onde wɛ ekɔ l’atei wa lemba l’anto lôkana la Jehowa Nzambi lo lushi lɔnɛ la panda?
[Caption on page 16]
[Review on page 16]
Ngande Wayoyokadimola?
◻ Lande na kele ekɔ ohomba efula mbokana la Nzambi?
◻ Waa na wele atomami wakamba olimu wa mbokanya anto la Nzambi na?
◻ Ngande wakokaso ndjaɛnya shamɛ oko ekambi a Nzambi?
◻ Divɛsa diɔsɔnyi Ɛmɛnyi wa Jehowa di’ɔnɔnyi wa 1999 akêtshadiɔ na?