‘Ɔnɛ mbele etena koleki dimɛna’
‘Enda, ɔnɛ mbele etena koleki dimɛna! Enda, ɔnɛ mbele lushi la panda!’—2 KOR. 6:2.
1. Lande na kahombaso mbeya kɛnɛ koleki ohomba kahombaso nsala l’etena kɛmɔtshi?
“ENGO tshe keko la etena kato, dikambu tshe l’esi ulungu dieko la etena kadio.” (Und. 3:1) Oma l’ɛtɛkɛta ɛsɔ, Sɔlɔmɔna akɛnya ohomba wa mbeya etena koleki dimɛna ka nsala dikambo dimɔtshi, ɛnyɛlɔ nkamba dikambɔ, munda lɔkɛndɔ, nsala okanda, kana nsawola l’anto akina. Koko, sho pombaka nto mbeya olimu woleki ohomba wahombaso nkamba l’etena kɛmɔtshi. Lo ɛtɛkɛta ekina, sho pombaka nshikikɛ akambo wahombaso mbetsha lo dihole dia ntondo.
2. Ngande weyaso dia etena kakasambishaka Yeso, nde akeyaka dimɛna etena kakandasɛnaka?
2 Etena kakinde lanɛ la nkɛtɛ, Yeso akeyaka dimɛna etena kakandasɛnaka ndo kɛnɛ kakandahombe nsala. Lam’ele nde akeyaka dimɛna awui wakandahombe mbetsha lo dihole dia ntondo, nde akeyaka dia prɔfɛsiya efula yendana la Mɛsiya yakakongɛka anto edja yaki suke la kotshama. (1 Pet. 1:11; Eny. 19:10) Nde aki l’olimu wakandahombe nsala dia nkimanyiya anto dia vɔ mbeya dia nde kele Mɛsiya wakalakema. Nde akahombe nsambisha akambo wa mɛtɛ wa Diolelo dimɛna dimɛna ndo ntshumanya wanɛ wakahombe ndjonga ekitɔ kâmɛ la nde lo Diolelo. Ndo nde akahombe ntatɛ nkenga etshumanelo k’Akristo kakahombe ndjokamba olimu w’esambishelo ndo wa mbetɛ anto ambeki polo ndo lo tokoma ta nkɛtɛ.—Mako 1:15.
3. Woho wakeyaka Yeso dia nde pombaka nsala akambo la wanyandja aki la shɛngiya yakɔna le nde?
3 Woho wakeyaka Yeso dia nde pombaka nsala akambo la wanyandja mbakaleke mbotshutshuya dia nde nsala lolango laki She l’ohetoheto. Nde akatɛ ambeki ande ate: “[Diangɔ dia] dinela dieko efula, keli ekambi mbele tshitshe; okone nyolombe uwandji a dinela, dia nyutumela ekambi lu dinela diandi.” (Luka 10:2; Mal. 4:5, 6) Yeso akasɔnɛ ntondotondo anto 12 ko oma lâsɔ 70 oma l’atei w’ambeki ande ko nde akawasha wetshelo wa shikaa ndo nde akâtome dia vɔ tosambisha losango l’ɔngɛnɔngɛnɔ lata ɔnɛ: “Diulelu dia l’ulungu diaya suki.” Lo dikambo dia Yeso, sho mbadiaka ɔnɛ: “Lam’akashili Jesu mbetsha ambeki andi dikumi la ahendi, ndi akamo uma leko dia ntetsha ndu dia ntusambisha lu esumba awo.”—Mat. 10:5-7; 11:1; Luka 10:1.
4. Lo yoho yakɔna yakokoya Paulo Yesu Kristo?
4 Yeso akatshikɛ ambeki ande tshɛ ɛnyɛlɔ ka kokele kendana l’ohetoheto ndo la ndjasha l’etete l’olimu. Kɛsɔ mbakɛnya ɔpɔstɔlɔ Paulo etena kakandakeketsha asekande ambetawudi ɔnɛ: “Nyumbukuyaki, uku wukuyami Kristu.” (1 Kor. 11:1) Lo yoho yakɔna yakokoya Paulo Kristo? Ntondotondo lo nsala kɛnɛ tshɛ kakandakoke nsala dia nsambisha lokumu l’ɔlɔlɔ. Lo mikanda wakafundɛ Paulo tshumanelo, sho tanaka ditelo diele oko ‘nyokambe elimu anyu aha la ndewalewa,’ ‘nyokambe Jehowa olimu oko ɛhɔmbɔ,’ ‘nyongake nshi tshɛ l’akambo efula wa nsala l’olimu wa Nkumadiɔndjɔ’ ndo “akambu tshe watshanyu, nyâtshi l’utema otoi, uku le [Jehowa].” (Romo 12:11; 1 Kor. 15:58; Kol. 3:23) Paulo kombohɛ pondjo woho wakandahomana la Nkumadiɔndjɔ Yeso Kristo lo mboka k’otsha la Damasɛkɛ ndo ɛtɛkɛta waki Yeso wakawotɛ ombeki Ananiya wata ɔnɛ: “Ndi eko usi ulimu lambumusonola, dia ndi ntsho la lukumbu lami la ntundu k’asi wedja la ka khumi ya dikanga, ndu le asi Isariyele.”—Etsha 9:15; Romo 1:1, 5; Ngal. 1:16.
‘Etena koleki dimɛna’
5. Kakɔna kakatshutshuya Paulo dia nde ndjasha l’olimu w’esambishelo l’ohetoheto tshɛ?
5 Etena kadiaso dibuku di’Etsha, sho mɛnaka dihonga ndo ohetoheto waki la Paulo l’esambishelo. (Etsha 13:9, 10; 17:16, 17; 18:5) Paulo akashihodia ohomba w’etena kakandasɛnaka. Nde akate ate: ‘Enda, ɔnɛ mbele etena koleki dimɛna! Enda, ɔnɛ mbele lushi la panda!’ (2 Kor. 6:2) Ɔnɔnyi 537 N.T.D., aki etena ka dimɛna ka wanɛ waki lo lɔhɔmbɔ la Babilɔna nkalola lo wodja awɔ wa lôtɔ. (Is. 49:8, 9) Ko dia dikambo diakɔna diakalange Paulo mbuta lanɛ? Avɛsa wosukanyi la divɛsa sɔ tokimanyiyaka dia sho mbeya kɛnɛ kaki la nde lo yimba.
6, 7. Diɛsɛ diakɔna dia woke diakalongola Akristo w’akitami wa nshi nyɛ ndo, ndo waa na wakamba kâmɛ lawɔ ɛlɔ kɛnɛ?
6 L’etatelo ka mukanda ande, Paulo akatɛkɛta dikambo dia diɛsɛ dia woke diakandalongola nde l’asekande Akristo w’akitami. (Adia 2 Koreto 5:18-20.) Nde akalembetshiya dia vɔ wakelamɛ oma le Nzambi l’oyango ɔmɔtshi shikaa, mbuta ate nkamba ‘olimu wa diokanyelo’ ndo nsɛngasɛnga anto dia vɔ ‘ndjaokanya nto la Nzambi.’ Kɛsɔ nembetshiyaka nkaloya lɔngɛnyi ndo mbidja wɔladi lam’asawɔ la Nzambi.
7 Ntatɛ oma l’ɔtɔmbɔkwɛlɔ wa l’Ɛdɛna, anto tshɛ wakangana la Jehowa. (Romo 3:10, 23) Wanganelo ɔsɔ wakakonya anto lo tshɛ kawɔ lo wodjima wa lo nyuma ndo dui sɔ diakela asui ndo nyɔi. Paulo akafunde ate: “Ditungatunga tshe diatukhumaka akhumu, ndu diatutataka nyono lu diutelu edja ndu kakiane.” (Romo 8:22) Koko Nzambi akɔshi tɛdikɔ dia nkeketsha, mbuta ate “nsɛngasɛnga” anto dia vɔ mbokalolɛ kana nyomokana nto la nde. Ɔsɔ mbaki ɔkɛndɛ wakalongola Paulo nde la asekande Akristo w’akitami l’etena kɛsɔ. ‘Etena ka dimɛna’ kɛsɔ kakakoke monga ‘lushi la panda’ le wanɛ waki la mbetawɔ le Yeso. Akristo w’akitami tshɛ ndo asekawɔ “ekoko ekina” wakamba kâmɛ la wɔ wekɔ lo ntetemala mbelɛ anto dia vɔ ndjokondja wahɔ oma lo ‘etena ka dimɛna.’—Joa. 10:16.
8. Kakɔna ketɛ leeta la ndjaokanya la Nzambi dui dia diambo?
8 Leeta lelɛwɔ anto dia ndjaokanya la Nzambi ekɔ leeta la diambo nɛ dia kânga mbele anto vɔamɛ mbakalanya diɔtɔnganelo diasawɔ la Nzambi l’ɔtɛ w’ɔtɔmbɔkwɛlɔ waki l’Ɛdɛna, Nzambi mbakɔshi yɛdikɔ ya nɔngɔsɔla diɔtɔnganelo sɔ. (1 Joa. 4:10, 19) Kakɔna kakandasale? Paulo kadimolaka ate: “Oma lee Kristo, [Nzambi] akakambaka dya mbokanya anto cɛɛ lande ndaamɛɛ, aha la menda munga yaakiwɔ, ko nde akatosha ɔkɛɛndɛ wa mbewoya lotumu lɔnɛ la dyookaneelo.”—2 Kor. 5:19, Dyookaneelo dy’Oyooyo; Is. 55:6.
9. Kakɔna kakasale Paulo dia mɛnya lowando lande lo kɛtshi ka Nzambi?
9 Lo nkimɔ olambo wa tshungo, Jehowa akasale dia anto wele la mbetawɔ dimanyiyama munga yawɔ ndo nkaloya lɔngɛnyi ndo mbidja wɔladi la nde. Ndo nto, nde tomaka enyimpala ande dia nkeketsha anto wa l’ahole tshɛ dia vɔ mbidja wɔladi la nde etena kâkakoke dikambo sɔ salema. (Adia 1 Timote 2:3-6.) Lo nshihodia lolango laki Nzambi ndo lo mbeya etena kakandasɛnaka, Paulo akayasha aha la mpekɔ lo ‘olimu wa diokanyelo.’ Lolango laki Jehowa latatshikitana. Nde âkatetemala tɔlɛkɛ lonya polo ndo nshi nyɛ. Ɛtɛkɛta wa Paulo w’ɔnɛ: ‘Ɔnɛ mbele etena koleki dimɛna’ ndo ‘ɔnɛ mbele lushi la panda’ wekɔ lo mbɔtɔnɛ ndo la nshi yaso nyɛ. Jehowa ekɔ mɛtɛ Nzambi ka kɛtshi ndo ka ngandji!—Etum. 34:6, 7.
‘Tatoshishake oyango atɔ’
10. ‘Lushi la panda’ laki la kitshimudi yakɔna le Akristo w’akitami wa lo nshi y’edjedja ndo lekɔ la kitshimudi yakɔna le Akristo w’akitami wa nshi nyɛ?
10 Anto wa ntondo wakakondja wahɔ oma lo ngandji ka mamba kaki Nzambi ele wanɛ ‘wele kâmɛ la Kristo.’ (2 Kor. 5:17, 18) Le wɔ, ‘lushi la panda’ lakatatɛ lo Pɛntɛkɔsta ka lo 33 T.D. Ntatɛ oma lo lushi lɔsɔ, vɔ wakalongola ɔkɛndɛ wa mbewoya ‘ɔtɛkɛta wa diokanyelo.’ Ɛlɔ kɛnɛ, atshikadi w’Akristo w’akimi wekɔ lo ntetemala nkamba ‘olimu wa diokanyelo.’ Vɔ mbeyaka dia andjelo anɛi wakɛnyi ɔpɔstɔlɔ Joani lo ɛnɛlɔ ka prɔfɛsiya wekɔ lo “[nkimɛ] pepe nyei ya la kete ne dia lopepe talopepaki la kete.” Ɔnkɔnɛ, ɔnɛ ekekɔ ‘lushi la panda’ ndo ‘etena koleki dimɛna.’ (Eny. 7:1-3) Diakɔ diele, ntatɛ l’etatelo ka ntambe ka 20, atshikadi w’akitami wakayasha l’ohetoheto tshɛ lo ‘olimu wa diokanyelo’ polo ndo lo tokoma ta nkɛtɛ.
11, 12. Kakɔna kakasale Akristo w’akitami l’etatelo ka ntambe ka 20 kakɛnyaka dia vɔ wakeyaka etena kakawasɛnaka? (Enda osato wele lo lɛkɛ 15.)
11 Ɛnyɛlɔ, oko wakadiatama lo dibuku Les Témoins de Jéhovah : Prédicateurs du Royaume de Dieu, l’etatelo ka ntambe ka 20, “Charles Russell nde la asekande waketawɔka l’eshikikelo tshɛ dia vɔ waki l’etena ka dinela ndo ɔnɛ anto pombaka mboka akambo wa mɛtɛ wahomba mbatshungola.” Kakɔna kakawasale lo dikambo sɔ? Lo mbeya dia vɔ waki l’etena ka dinela, mbuta ate ‘etena koleki dimɛna,’ anangɛso asɔ kokomɛ tsho lo mbelɛ anto l’ɔtɛmwɛlɔ. Kɛsɔ mbakasalaka ewandji w’ɛtɛmwɛlɔ wa lo Lokristokristo oma ko edjedja. Koko Akristo w’akitami asɔ wakatatɛ nyanga toho ta shikaa ta dianganya lokumu l’ɔlɔlɔ. L’atei wa kɛnɛ kakawasale mbaki ndo okambelo wa la lomba wa la tshulatshula dieke katomba dia ntɔla olimu otsha la ntondo.
12 Dia dianganya lokumu l’ɔlɔlɔ la Diolelo, djui ya tshitshɛ y’ekambi yaki l’ohetoheto shɔ wakakambe la traktɛ, periodikɛ ndo abuku. Ndo nto, vɔ wakafunde asawo amɔtshi wakatondjama lo nunu dia tojurnalɛ. Vɔ wakashaka asawo w’oma lo Afundelo lo aradiyo wa wedja la wedja ndo aradiyo wakokɛmaka lo wedja efula. Vɔ wakatondja ndo wakakambe la filmɛ yele l’esato wakɛndakɛnda ndo yatɛkɛta anto la ntondo ka anto akina ntondja filmɛ ya ngasɔ. Etombelo akɔna wakawakondja oma l’olimu wa l’etete tshɛ ɔsɔ? Ɛlɔ kɛnɛ, anto oko miliyɔ esambele waketawɔ ndo wekɔ lo mbisha lonya dia mbewoya losango l’ɔnɛ: ‘Nyokane nto la Nzambi.’ Lo mɛtɛ, ekambi waki Jehowa wa ntondo ɛsɔ waki bɛnyɛlɔ di’amɛna di’ohetoheto kânga mbakiwɔ komonga la dihomɔ efula.
13. Naa sangwelo diaki Nzambi diahombaso mbohɔka?
13 Etelo kaki Paulo k’ɔnɛ ‘ɔnɛ mbele etena koleki dimɛna’ kekekɔ mɛtɛ. Sho wanɛ wambokondja wahɔ oma lo ngandji ka mamba kaki Jehowa tekɔ la lowando lo woho wambotokondja diaaso dia mboka ndo mbetawɔ losango la diokanyelo. Lo dihole dia nkɔma anya, sho kitanyiyaka ɛtɛkɛta waki Paulo wayela ɛnɛ: “Tambunyosengasenga shati: Tanyulungulaki ngandji ka mamba ka [Nzambi ko nshisha oyango atɔ].” (2 Kor. 6:1) Oyango wele la ngandji ka mamba ka Nzambi ele dia ‘mbokanya anto la nde’ lo tshimbo ya Kristo.—2 Kor. 5:19.
14. Etshikitanu akɔna w’amɛna wasalema lo wedja efula?
14 Anto efula wambetɛma totshungu oma le Satana wâkanganyi la Nzambi ndo haweye oyango wele la ngandji ka mamba ka Nzambi. (2 Kor. 4:3, 4; 1 Joa. 5:19) Koko, woho wataleke akambo wa l’andja ɔnɛ ndana ambokonya anto efula dia vɔ mbetawɔ ndjaokanya la Nzambi etena kawaɛnyawɔ dia woho wakawangana la Nde mbele lo kiɔkɔ y’akambo wa kɔlɔ ndo y’asui w’anto. Kânga lo wedja wele anto efula waki la wendjudi lo olimu aso w’esambishelo, kakianɛ anto efula wetawɔ lokumu l’ɔlɔlɔ ndo wɔsa yɛdikɔ ya ndjaokanya la Nzambi. Onde sho shihodiaka dia ɔnɛ ekɔ etena ka sho ndjasha tshɛ l’ohetoheto dia mbewoya losango l’ɔnɛ: ‘Nyokane nto la Nzambi’?
15. Lo dihole dia nsambisha losango l’oyango wa ngɛnyangɛnya tsho anto, kakɔna kalangaso dia anto wa l’ahole tshɛ mbeya?
15 Ɔkɛndɛ aso kema tsho dia mbutɛ anto ɔnɛ naka nyu kalolɛ Nzambi, kete nde ayonyokandolɛ ekakatanu anyu tshɛ ndo nyayonga la lɔsɛnɔ la dimɛna. Kɛsɔ keto mbalongamɛ anto efula etena katshɔwɔ l’ɛtɛmwɛlɔ ndo ewandji w’ɛtɛmwɛlɔ wekɔ la nsaki k’efula ka nkotsha nsaki y’anto. (2 Tim. 4:3, 4) Aha ɔsɔ mbele oyango w’olimu aso w’esambishelo. Lokumu l’ɔlɔlɔ lasambishaso ele l’ɔnɛ oma lo ngandji kande, Jehowa mbetawɔka dimanyiya anto munga lo tshimbo ya Kristo. Ɔnkɔnɛ, onto l’onto kokaka ndjaokanya nto la Nzambi. (Romo 5:10; 8:32) Koko, ‘etena koleki dimɛna’ kekɔ lo tatshu esadi esadi otsha l’ekomelo.
‘Tɔhɛtɛhɛtɛ la nyuma’
16. Kakɔna kakakimanyiya Paulo dia nde monga la dihonga ndo l’ohetoheto?
16 Ko ngande wakokaso monga la ohetoheto dikambo dia ɔtɛmwɛlɔ wa mɛtɛ ndo mbolama? Anto amɔtshi mbeyaka monga diki kana hawoleke ntɛkɛta efula ndo vɔ mbeyaka monga l’okakatanu dia nkɛnɛmɔla nsaki yawɔ lo sɛkɛ kana nsawola l’anto la lɔngɛnyi tshɛ. Koko, ekɔ dimɛna mbohɔka dia ohetoheto kema tsho ɛnamelo ka lo sɛkɛ ka nsaki kana ɔngɛnɔngɛnɔ wele l’onto; ndo vɔ hawolemanɛ la lonto lele l’onto. Paulo akɛnya sheke ya monga l’ohetoheto etena kakandakeketsha asekande Akristo ɔnɛ: ‘Nyɔhɛtɛhɛtɛ la nyuma.’ (Romo 12:11) Nyuma kaki Jehowa kakakimanyiya ɔpɔstɔlɔ Paulo efula dia nde monga la dihonga ndo l’etete l’olimu w’esambishelo. Ntatɛ oma l’etena kakandalongola leeta oma le Yeso polo l’etena kakandandama lo lokanu ndo kakandadiakema la Rɔma, edja kolekanyi ɛnɔnyi 30, ohetoheto waki la Paulo kokitakita. Mbala tshɛ, Paulo akendɛka le Nzambi lakawoshaka wolo lo tshimbo ya nyuma. Nde akate ate: “Dimi mbeyaka ntsha akambu tshe la wulu wa one latunkikitshaka.” (Fil. 4:13) Sho kokaka nkondja wahɔ efula naka sho nkondja wetshelo oma lo ɛnyɛlɔ kande.
17. Ngande wakokaso ‘pɛtahɛta la nyuma’?
17 Tshɛkɛta yokadimɔmi ɔnɛ “pɛtahɛta” nembetshiyaka “mbidɔdɔ.” (Kingdom Interlinear) Dia mpoke k’ashi ntetemala mbidɔdɔ, sho pombaka ntetemala ntshutshuya dja. Woho akɔ wâmɛ mbele, dia sho ‘pɛtahɛta la nyuma,’ tekɔ l’ohomba wa nyuma kaki Nzambi wonya tshɛ. Dia sho monga la nyuma kɛsɔ, sho pombaka nkamba la tɛdikɔ tshɛ tatosha Jehowa dia tokeketsha lo nyuma. Kɛsɔ nembetshiyaka monga l’ekongelo k’ɔlɔlɔ k’ɔtɛmwɛlɔ wa lo nkumbo ndo wa l’etshumanelo, mbuta ate salaka wekelo w’onto ndamɛ ndo wa lo nkumbo mbala la mbala, salaka dɔmbɛlɔ ndo mbɔtɔka lo nsanganya l’asekaso Akristo. Kɛsɔ ayotokimanyiya dia monga la ‘dja’ yayotokimanyiya dia sho “mbidɔdɔ” dia sho ntetemala ‘pɛtahɛta la nyuma.’—Adia Etsha 4:20; 18:25.
18. Oko weso Akristo wakayakimɔ le Nzambi, lo oyango akɔna wahombaso ndjasha tshɛ lɔkɔ?
18 Onto lakayakimɔ lo dikambo dimɔtshi ndjashaka tshɛ lo dikambo diakɔ ndo nde hakɔmɔ esadi. Oko weso Akristo wakayakimɔ le Nzambi, oyango aso ele dia nsala kɛnɛ tshɛ kalanga Jehowa dia sho nsala oko wakasale Yeso. (Heb. 10:7) Ɛlɔ kɛnɛ, lolango la Jehowa ele dia anto efula ndjaokanya nto la nde. Ɔnkɔnɛ, nyɛsɔ toyasha l’ohetoheto tshɛ l’ɛnyɛlɔ ka Yeso ndo ka Paulo l’olimu woleki tshɛ ohomba wahomba salema la wanyandja tshɛ ɛlɔ kɛnɛ.
Onde wɛ âkohɔ?
• Naa ‘olimu wa diokanyelo’ wakalongola Paulo la Akristo akina w’akitami?
• Ngande wakamba atshikadi w’akitami dimɛna la ‘etena koleki dimɛna’?
• Ngande wakoka ekambi w’Akristo ‘pɛtahɛta la nyuma’?
[Osato wa lo lɛkɛ 12]
Paulo kombohɛ pondjo woho wakandahomana la Nkumadiɔndjɔ Yeso Kristo