Wembola w’oma le ambadi

Ɛmɛnyi wa Jehowa akanawɔ lo dikambo dia vɔɔtɛ?

Ekɔ awui amɔtshi wokɛma hwe l’atei a Bible wakimanyiya ekambi wa Nzambi dia vɔ monga la kanyi y’ɔlɔlɔ lo dikambo sɔ. Koko, ndooko dihole diofundami lɔkɔ diɛnya ɔnɛ tshelo ya vɔɔtɛ yekɔ kɔlɔ. Ɛnyɛlɔ, ndooko kɛnɛ kashimba olui w’ɛnɔmbɔdi wa tshunda dimɔtshi dia vɔ sala vɔɔtɛ dia mbɔsa tɛdikɔ tɔmɔtshi tendana la tshunda diawɔ. Esangɔ efula, tshumanelo di’Ɛmɛnyi wa Jehowa salaka vɔɔtɛ y’anto memɛ anya l’olongo dia vɔ sɔna wenya wa mbɔtɔka nsanganya la kana mbetawɔ falanga y’etshumanelo tomba lo dikambo dimɔtshi.

Ko lâsɔ, kakɔna kayotota lo dikambo dia vɔɔtɛ yasɔnawɔ ewandji wa pɔlitikɛ na? Lo wedja ɛmɔtshi wele la demɔkrasi, anto efula, kânga 50 lo lokama, hawotshu dia todja akatshi lushi la vɔɔtɛ. Ɛmɛnyi wa Jehowa hawokeketsha ndo hawosekɛ akina dia vɔ mbidjanɛ akatshi; vɔ haweteta dia tatɛka anto ɔnɛ tanyɔvɔtɛke l’akambo wa pɔlitikɛ. Vɔ nɛmiyaka ndo kimanɛka l’emboledi wasɔnama lo yoho ya dimɛna lo waa vɔɔtɛ ya ngasɔ. (Romo 13:​1-7) Lo kɛnɛ kendana l’onto vɔtɛ onto ɔmɔtshi, Ɔmɛnyi wa Jehowa tshɛ mbɔsaka tɛdikɔ oma lo nkum’otema kande kambekiyama la Bible ndo lo ndjela eokelo k’ɔkɛndɛ wele la nde le Nzambi ndo le Lɛɛta. (Mateu 22:21; 1 Petero 3:16) Lam’ɔsande tɛdikɔ tande tɔsɔ, Ɔmɛnyi wa Jehowa mendaka awui amɔtshi.

Ntondotondo, Yeso Kristo akate lo dikambo di’ambeki ande ate: ‘Vɔ bu ase andja ɔnɛ, oko wemi bu ose andja ɔnɛ.’ (Joani 17:14) Ɛmɛnyi wa Jehowa mbɔsaka dui sɔ la nɛmɔ efula. Oko wewɔ ‘bu ase andja ɔnɛ,’ vɔ hawɔtɔ l’akambo wa pɔlitikɛ wa l’andja ɔnɛ.​—⁠Joani 18:⁠36.

Dui dia hende, ɔpɔstɔlɔ Paulo akayaelɛ ɔnɛ ‘ambasadɛrɛ’ wa Kristo le anto wa lo nshi yande. (Efeso 6:20; 2 Koreto 5:20) Ɛmɛnyi wa Jehowa mbetawɔka ɔnɛ nshi nyɛ Kristo Yeso ambahema l’okudi oko Nkumekanga ka Diolelo dia Nzambi dia l’olongo ndo, oko waa ambasadɛrɛ, vɔ pombaka mbewoya dui sɔ le wedja. (Mateu 24:14; Enyelo 11:15) Waa ambasadɛrɛ nɔmbamaka dia monga lomange ndo aha mbɔtɔ l’akambo wa l’etei wa wedja wa lɛnɛ akawatomama. Oko akɛndji wa Diolelo dia Nzambi dia l’olongo, Ɛmɛnyi wa Jehowa mɛnaka dia ndo vɔ lawɔ wekɔ l’ɔkɛndɛ ɔsɔ w’aha mbɔtɔ l’akambo wa pɔlitikɛ wa wedja wodjashiwɔ.

Dui dia sato diahomba onto menda ele ɔnɛ wanɛ wadjɛ onto ɔmɔtshi akatshi dia nde sɔnama l’olimu ɔmɔtshi mbeyaka ndjoyala l’ɔkɛndɛ wa kɛnɛ kasalande. (Enda lo 1 Timote 5:​22, The New English Bible.) Akristo pombaka menda dimɛna dimɛna kana vɔ nangaka ndjɛ̂mba ɔkɛndɛ ɔsɔ.

Dui dia nɛi ele Ɛmɛnyi wa Jehowa mbɔsaka kâmɛ kawɔ k’Akristo la nɛmɔ efula. (Kolosai 3:14) Lam’ayaɔtshiya ɛtɛmwɛlɔ lo pɔlitikɛ, kɛnɛ kayotombaka mbala efula ele diatɔnɛlo l’asa anto awɔ. Lo ndjela ɛnyɛlɔ ka Yeso Kristo, Ɛmɛnyi wa Jehowa hawetawɔ ndjaɔtshiya l’akambo wa pɔlitikɛ; ɔnkɔnɛ, vɔ namaka kâmɛ kawɔ k’Akristo.​—⁠Mateu 12:25; Joani 6:15; 18:​36, 37.

Dui dia tanu ndo dia ndjihelo, woho wahawayaɔtshiya l’akambo wa pɔlitikɛ mbishaka Ɛmɛnyi wa Jehowa dihonga dia vɔ mbewoya anto wa lo weho tshɛ w’atshunda wa pɔlitikɛ losango l’ohomba la Diolelo.​—⁠Heberu 10:⁠35.

Lo menda awui w’oma l’Afundelo wɔtɛkɛtshiso la diko ango, lo wedja efula Ɛmɛnyi wa Jehowa mbɔsaka tɛdikɔ l’onto ndo l’onto di’aha nde vɔtɛɛ l’akambo wa pɔlitikɛ, ndo lotshungɔ lawɔ la mbɔsa yɛdikɔ ya ngasɔ mbetawɔmaka l’ɛlɛmbɛ wa wodja. Ko ahombama naka ɛlɛmbɛ mpikaka ase wodja dia vɔ vɔtɛɛ na? L’etena ka ngasɔ, Ɔmɛnyi wa Jehowa tshɛ ekɔ ndamɛ l’ɔkɛndɛ wa mbɔsa tɛdikɔ t’oma lo nkum’otema kande ndo lo ndjela Bible, dia nde mbeya woho wayondosala lo dikambo dia ngasɔ. Naka onto ɔmɔtshi ambota dia ntshɔ lo biro ka vɔɔtɛ, sɔ ko diawenda. Kɛnɛ katshande lɛkɔ ndooko lɛna, paka Otungi ande ndamɛ.

Tshoto y’Etangelo ya Ngɔndɔ ka Tanu 1, 1951, lɛkɛ 137, yakate ɔnɛ: “Lɛnɛ ahika Kayisa dia paka ase wodja mbidja akatshi . . . [Ɛmɛnyi wa Jehowa] kokaka ntshɔ lo biro ya vɔɔtɛ ko mbɔtɔ lo shambrɛ yadjawɔ onto ndamɛ. Lo shambrɛ shɔ mbalodja onto dikatshi diande dia vɔɔtɛ kana mbafundande lokombo l’onto ladjɛnde dikatshi. Wanɛ wavɔtɛ ntshaka kɛnɛ kayowolanga l’akatshi awɔ wa vɔɔtɛ. Ɔnkɔnɛ, lo dihole sɔ, la ntondo ka Nzambi, mbahomba ɛmɛnyi ande ntsha kɛnɛ kɔtɔnɛ l’ɛlɛmbɛ ande ndo lo ndjela mbetawɔ kawɔ. Sho bu l’ɔkɛndɛ wa mbalakanya kɛnɛ kahombawɔ ntshaka la dikatshi dia vɔɔtɛ.”

Kayotota naka Okristo ɔmɔtshi ekɔ l’omi lele bu ombetawodi ko pami kɛsɔ ambɔtɛtɛ dia paka wadiɛnde ntshɔ otsha lo vɔɔtɛ na? Nde ekɔ l’ɛse k’omɛnde oko wele Akristo l’ɛse k’emboledi wa lâdiko. (Efeso 5:22; 1 Petero 2:​13-17) Naka nde amboyela kɛnɛ kowote omɛnde ko ambotshɔ lo biro ka vɔɔtɛ, ɔsɔ ekɔ dui diawenda ndamɛ. Ndooko lahomba mbɔ̂nyɔla lo kɛnɛ kosadinde.​—⁠Enda lo Romo 14:⁠4.

Kayotota dia wodja wele lɛkɔ ɛlɛmbɛ wa lɛɛta hahike anto dia vɔ mbidja akatshi koko lohetsho la mamba lekɔ otsha le wanɛ wahatshu lo biro ya vɔɔtɛ, kana vɔ mbidjamaka ndo lo wâle wa soyama lo demba na? Kana, kayotota naka, kânga mbahâlɔmbɛ ɛlɛmbɛ wa lɛɛta dia vɔ mbidja akatshi, anto nongolaka alanya lo woho ɔmɔtshi naka hawotshwe lo biro ka vɔɔtɛ na? Lo dikambo sɔ ndo l’akambo akina wa woho ɔsɔ, Okristo pombaka mbɔsa yɛdikɔ yande ndamɛ. ‘Onto l’onto ayɛmba wotsho ande ndamɛ.’​—⁠Ngalatiya 6:⁠5.

Ekɔ anto amɔtshi wakoka takana lam’ɛnawɔ ɔnɛ lo nshi ya vɔɔtɛ lo wodja awɔ, Ɛmɛnyi wa Jehowa ɛmɔtshi ntshɔka lo biro ka vɔɔtɛ ko akina hawotshu. Vɔ mbeyaka ndjota ɔnɛ: ‘Ɛmɛnyi wa Jehowa keema lolemi ɔtɔi.’ Koko, anto pombaka mbeya ɔnɛ lo akambo wendana la nkum’otema, ɛnyɛlɔ oko lo dikambo nɛ, Okristo tshɛ pombaka mbɔsa yɛdikɔ yande ndamɛ la ntondo ka Jehowa Nzambi.​—⁠Romo 14:⁠12.

Oyadi tɛdikɔ takɔna tayɔsa Ɛmɛnyi wa Jehowa l’onto ndo l’onto lam’ewɔ la ntondo k’akambo wotshikitanyi, vɔ mbidjaka yimba dia nama lomange lawɔ l’Akristo la lotshungɔ lawɔ la tɛkɛta kɛnɛ kalangawɔ. L’akambo tshɛ, vɔ ndjaɛkɛka le Jehowa Nzambi dia nde mbasha wolo, lomba la ekimanyielo di’aha vɔ ntsha akambo wahɔtɔnɛ la mbetawɔ kawɔ lo woho ɔmɔtshi. Ɔsɔku mbɛnyawɔ mbetawɔ kawɔ lo ɛtɛkɛta ɛnɛ w’omembi w’esambu w’ɔnɛ: “We eli dive diami la lungeli lami. Okone ne dia lukumbu laye, omenyaki mbuka, onombolaki.”​—⁠Osambu 31:⁠3.