Dja yimba l’ɔtɛkɛta wa prɔfɛsiya waki Nzambi
“Tekɔ l’ɔtɛkɛta wa prɔfɛsiya wamboleka shikikɛma; ndo nyekɔ lo ntsha ɔlɔlɔ lam’awodjanyu yimba.”—2 PETERO 1:19, NW.
1, 2. Bɛnyɛlɔ diakɔna diendana la wa mɛsiya wa kashi diakokayɛ tɔkɔndɔlɛ?
AYA ɛnɔnyi nkama wele wa mɛsiya wa kashi wekɔ lo pemba mbuta akambo wahataye. Lo ntambe ka tanu lo nshi yaso nyɛ, yoshi mɔtshi yakasakola lokombo la Mɔsɛ aketawoya ase Juda wa lo disɛnga dia Kɛrɛtɛ ɔnɛ dimi mbele mɛsiya ndo ɔnɛ layonyotshungola oma lo shɔkɔ. Lam’akakoke lushi l’etshungwelo kawɔ, vɔ wakoyele lo shɔdi mɔtshi ya dikona di’ave diaki suke la Ndjale ka Mediteraniya. Nde akawatɛ ate: nyombe lo ndjale ko nyayɛna tɔ kambatɔna l’ahende. Efula ka wanɛ wakambɛ l’ashi wakavu, ndo mɛsiya ɔsɔ wa kashi akadingɔ, haweye ndo lɛnɛ akandatshu.
2 Lo ntambe ka 12, ɔlɔngɔ okina wakayaelɛka “mɛsiya” akatombe la Yemen. Kalifa, mbut’ate omboledi, akɔ̂lɔmbɛ djembetelo yɛnya ɔnɛ nde ekɔ mɛtɛ mɛsiya. “Mɛsiya” ɔsɔ wa l’onyɔ akatɛ kalifa ate ompembole ɔtɛ, eolwelo kami k’esadi esadi mbayonga djembetelo le yɛ. Kalifa aketawɔ mbohembola ɔtɛ—ko “mɛsiya” ɔsɔ akatshu l’esake polo ndo ɛlɔ kɛnɛ.
3. Ele Mɛsiya wa mɛtɛ, ndo kakɔna kakɛnyaka olimu ande?
3 Wa mɛsiya wa kashi wakakite tatala kâmɛ ndo prɔfɛsiya yawɔ, koko, naka sho mbidja yimba l’ɔtɛkɛta wa prɔfɛsiya waki Nzambi, kete hatotshamaki sɔnyi pondjo. Yeso Kristo, Mɛsiya wa mɛtɛ, akakotsha prɔfɛsiya efula ya lo Bible. Oko ɛnyɛlɔ, lam’akandoholaka prɔfɛsiya k’Isaya, Mateo, ofundji ɔmɔtshi w’Evanjiliɔ, akafunde ate: “Kete ya Zebuluna la kete ya Nafetali, l’umamu w’uduwa, la wedi wa Jorodana, Ngalili k’asi wedja—Antu wakadjaseka lu udjima wakenyi usasi a wuki. Usasi wakahetela antu wakadjaseka lu dihuli dia didjidji dia nyoi. Uma l’etena kako, kakatatela Jesu sambisha, ata ati: Nyukadimuli etema, ne dia diulelu dia l’ulungu diaya suki.” (Mateu 4:15-17; Isaya 9:1, 2) Yeso mbaki ‘osase ɔsɔ wa woke,’ ndo olimu ande akɛnya dia nde mbaki Omvutshi wakatatshi Mɔsɛ ɔnɛ nde ayoya. Wanɛ wakatonaka dia mpokamɛ Yeso wakahombe ndjodiakema.—Euhwelu k’Elembe 18:18, 19; Etsha 3:22, 23.
4. Ngande wakakotsha Yeso Isaya 53:12?
4 Yeso akakotsha nto ɛtɛkɛta wa prɔfɛsiya wa l’Isaya 53:12 wata ɔnɛ: “Ndi akakimo lumu landi lu nyoi, akalema kame [l]’antu wa kolo. Ndi akembela antu efula kolo yawo, akateketela akanga w’enungu.” Oko wakandeyaka ɔnɛ nde ayokimɔ lɔsɛnɔ lande l’onto oko tshungo, Yeso akakeketsha mbetawɔ k’ambeki ande. (Mako 10:45) Nde akatshe dikambo sɔ lo yoho mɔtshi ya diambo efula, mbut’ate, l’ekimanyielo ka ohilwelo wakinde.
Ohilwelo wambokeketsha mbetawɔ
5. L’ɛtɛkɛta ayɛ hita, ngande wakokayɛ kɔndɔla ohilwelo ɔsɔ?
5 Ohilwelo ɔsɔ aki tshondo ya prɔfɛsiya kɛmɔtshi. Yeso akate ate: “Ne dia On’a untu ayuya lu lutumbu la Shi, ndi la andjelo andi, . . . Mete kanyutelami nti: Amotshi wemadi lane, hawunganela nyoi ntundu watenyi On’a untu ayayi lu diulelu dianddi.” (Mateu 16:27, 28) Onde mɛtɛ apɔstɔlɔ amɔtshi wakɛnyi lam’akaye Yeso lo Diolelo diande? Mateu 17:1-7 mbutaka ɔnɛ: “Lam’aketi nshi shamalu, Jesu akose Petero, Jakoba la Joani onango Jakoba, akambela la wo vame l’ukungu w’utali. Ndi akahilo la ntundu kawo.” Ɔsɔ aki mɛtɛ dikambo dia mamba! “Elundji kandi kakahete uku unya. Ahondo andi wakayala wema uku usasi. Ku Mose la Elidja wakene le wo, wasawula la ndi.” Ndo nto, “wenyi ku dingi dia ngaingai diambâhutamela,” ko wakoke dui diaki Nzambi diata ɔnɛ: “On’ami la ngandji one, ndi ambongenyangenya; nyuwukeli. Lam’akuki ambeki diui so, vo wakayakosha ekhukhumadi; wakuki woma efula. Ku Jesu akayi, akawananda. Ndi akati ati: Nyeto, tanyukaki woma.”
6. (a) Lande na kakelɛ Yeso ohilwelo ɔsɔ ɔnɛ ɛnɛlɔ? (b) Ohilwelo ɔsɔ aki wɛnamelo wa ntondo wa dui diakɔna?
6 Ondo dikambo sɔ dia wɔma diakasalema l’ɔkɛngɛ ɔmɔtshi wa Dikona dia Hɛrɛmɔna, lɛnɛ akatotshikala Yeso nde l’ambeki ande asato otsho w’otondo. Ohilwelo ɔsɔ wakasalema l’otsho, ko wakaleke mɛnama dimɛna efula. Ɔkɔkɔ ɔmɔtshi wakelɛ Yeso dikambo sɔ ɔnɛ ɛnɛlɔ aki nɛ dia Mɔsɛ la Elidja, anto wambovɔka l’edjedja, komonga lâwɔ lo mɛtɛ mɛtɛ. Paka Kristo ndamɛ mbaki lâwɔ lo mɛtɛ mɛtɛ. (Mateu 17:8, 9) Ohilwelo ɔsɔ wa diambo efula akasha Petero, Jakɔba la Joani ɛnamelo ka ntondo ka wôngelo wa Yeso lo lotombo la lowandji la Diolelo. Mɔsɛ la Elidja waki didjidji diasungana di’akitami wayonga ekitɔ kâmɛ la Yeso lo Diolelo. Ndo ɛnɛlɔ kɛsɔ akanyomoyoleka keketsha kɛnɛ kakandataka dikambo dia Diolelo diande la dia lowandji lande la lo nshi yayaye.
7. Ngande weyaso ɔnɛ Petero kombohɛ ohilwelo ɔsɔ?
7 Ohilwelo ɔsɔ wakakeketsha mbetawɔ k’apɔstɔlɔ asato asɔ wanɛ wakahombe ndjɔlɔmbɔla etshumanelo k’Akristo. Elungi ka Kristo kakayala ngaingai, ahɔndɔ ande wakayala wɛma oko osase, ndo Nzambi ndamɛ akatɛkɛta ɔnɛ Yeso ekɔ Ɔnande lalangema lahombawɔ mbokɛɛ—eelo mɛtɛ, ɛnɛlɔ kɛsɔ akakotsha oyango atɔ dimɛna dimɛna. Koko apɔstɔlɔ takawahombe kɔndɔlɛ kânga onto ɔtɔi ɛnɛlɔ kɛsɔ edja ndo Yeso ambolwama. L’ɔkɔngɔ w’ɛnɔnyi oko 32, ɛnɛlɔ kɛsɔ kombohamɛ kânga yema lo yimba ya Petero. Lam’akandatɛkɛtaka dia ɛnɛlɔ kɛsɔ ndo dia kitshimudi yatɔ, nde akafunde ate: “Ne dia shu kundjela ekondo w’uma lu yimba y’antu, lam’akatanyutela dia wulu la dia eyelu ka Khumesu Jesu Kristu, keli shu taki emenyi wa lutumbu landi lu ashu. Ne dia ndi akalungula kenemo la lutumbu uma le [Nzambi], Shesu, lam’akayi diui ne le ndi uma le Lutumbu la Khumadiondjo ati: On’ami la ngandji one, ndi atongenyangenyaka. Shu takuki diui so diakayi uma l’ulungu lam’akisu kame la ndi l’ukungu w’ekila.”—2 Petero 1:16-18.
8. (a) Ɛtɛkɛta waki Nzambi wendana l’Ɔnande mbikaka epole ɔsɛkɛ lo dikambo diakɔna? (b) Dinge diakahotama wonya w’ohilwelo mɛnyaka na?
8 Etenyi koleki ohomba l’ohilwelo ɔsɔ ele kɛnɛ kakate Nzambi ɔnɛ: “On’ami la ngandji one, ndi ambongenyangenya; nyuwukeli.” Ɛtɛkɛta ɛsɔ mɛnyaka ɔnɛ Yeso ekɔ Nkumekanga kakahema l’okudi oma le Nzambi, ɔnɛ lahomba ditongami tshɛ mbokitanyiya. Dinge diakokombe akɛnyaka dia ɛnɛlɔ kɛsɔ kayokotshama lo yoho yahɛnama. Tɔ kayɛnama paka la washo wa lo yimba le wanɛ wetawɔ ‘djembetelo’ ya wôngelo wahɛnama waki Yeso lo lowandji la Diolelo. (Mateu 24:3) Omalɔkɔ, woho wakâshimbe Yeso di’aha mbutɛ anto akina ɛnɛlɔ kɛsɔ edja ndo lam’ayondolɔ oma l’edo mɛnyaka ɔnɛ l’ɔkɔngɔ wa eolwelo kande mbakandahombe ndjodiyama lo dihole dia lâdiko ndo ndjotombɔma.
9. Bonde kakoka ohilwelo wa Yeso keketsha mbetawɔ kaso?
9 L’ɔkɔngɔ wa nde tɛkɛta dia ohilwelo ɔsɔ, Petero akate ate: “Lâsɔ tekɔ l’ɔtɛkɛta wa prɔfɛsiya wamboleka shikikɛma; ndo nyekɔ lo ntsha ɔlɔlɔ lam’awodjanyu yimba oko wanɛ wenda tala diahɛta lo dihole dia wodjima, edja ndo lam’atatɛ wonya mpotɔ ko nsongayɔɔtɔ mbalɛ, l’etema wakinyu. Nɛ dia nyu mbeyaka dui nɛ ntondotondo ɔnɛ: ndoko prɔfɛsiya ɔtɔi k’Afundelo koye oma lo diɔmbwɛlɔ di’onto ndamɛ. Nɛ dia prɔfɛsiya kondja ndoko lushi oma lo lolango l’onto, koko anto wakatɛkɛtaka oma le Nzambi, oko wakawɛmbamaka oma le nyuma k’ekila.” (2 Petero 1:19-21, NW) Ohilwelo wa Yeso mbikaka epole ɔsɛkɛ ɔnɛ ɔtɛkɛta wa prɔfɛsiya waki Nzambi wekɔ shikaa ndo hawetaka weteta. Sho pombaka mbidja yimba l’ɔtɛkɛta ɔsɔ koko aha lo ‘ɛkɔndɔ wa kashi walokolonganya’ wahetawɔma le Nzambi. Ohilwelo ɔsɔ pombaka keketsha mbetawɔ kaso l’ɔtɛkɛta wa prɔfɛsiya waki Nzambi, nɛ dia ɛnɛlɔ kɛsɔ kakɛnyaka ntondo ɔnɛ lotombo la Kristo ndo Diolelo diande aya dikambo dia mɛtɛ ɛlɔ kɛnɛ. Eelo, tekɔ la djembetelo ya shika yɛnya ɔnɛ ɛlɔ kɛnɛ Kristo ekɔ Nkumekanga ka l’olongo kele la nkudu k’efula.
Woho wambotomba nsongayɔɔtɔ
10. Ele ‘Nsongayɔɔtɔ’ yakate Petero, ndo bonde kakadimolayɛ ngasɔ?
10 Petero akafunde ate: “Nyekɔ lo ntsha ɔlɔlɔ [lam’adjanyu yimba l’ɔtɛkɛta wa prɔfɛsiya] oko wanɛ wenda tala diahɛta lo dihole dia wodjima, edja ndo lam’atatɛ wonya mpotɔ ko nsongayɔɔtɔ mbalɛ.” Ko ele “nsongayɔɔtɔ” na? Tshɛkɛta “songayɔɔtɔ” yɔ la “yɔɔtɔ ya pindju” nembetshiyaka ɛngɔ kakɔ ɔtɔi. Ɛnyɛlɔ 22:16 (NW) mbelɛka Yeso Kristo ɔnɛ “yɔɔtɔ ya pindju ya ngaingai.” Lo deko dimɔtshi dia l’ɔnɔnyi, tɔɔtɔ ta ngasɔ mbayokomɛka mbalɛ lo lɛkɛ latomba wonya yema la ntondo ka wonya mbalɛ. Tɔ tombaka yema tshitshɛ la ntondo ka wonya tomba, ndo tɔ mɛnyaka ɔnɛ lushi l’oyoyo lambotatɛ. Petero akakambe la tshɛkɛta “nsongayɔɔtɔ” dia tɛkɛta dikambo dia Yeso l’ɔkɔngɔ wa Nde nongola lowandji la Diolelo. L’etena kɛsɔ, Yeso akawalɛ l’andja w’otondo, ndo l’okama aso ɔnɛ wa nkɛtɛ! Oko wende Nsongayɔɔtɔ Mɛsiya, nde mɛnyaka ɔnɛ etena k’oyoyo kana lushi l’oyoyo lambohotwɛ anto tshɛ wele l’okitanyiya.
11. (a) Lande na kele 2 Petero 1:19 hɛnya dia ‘Nsongayɔɔtɔ’ ekɔ lo mbalɛ nshi nyɛ l’etema w’anto woludi l’emunyi? (b) Ngande wakokayɛ nembetshiya 2 Petero 1:19?
11 Dikadimwelo efula dia Bible keketshaka kanyi y’ɔnɛ ɛtɛkɛta w’ɔpɔstɔlɔ Petero wa lo 2 Petero 1:19 mbutaka dia doyi di’onto diatakiya (cœur). Doyi di’opalanga w’onto mongaka la wotsho wa gramɛ tatɛ oma lo 250 polo 300. Lâsɔ, okonde wakoka Yeso Kristo, ɔnɛ laya nshi nyɛ etongami ka lo nyuma kahavɔki ‘kodjashi l’osase wahakoke onto sukana otsha lɛkɔ,’ mbalɛ kana tomba l’etenyi kɛsɔ ka tshitshɛ ka demba di’onto na? (1 Timote 6:16) Lo mɛtɛ, dui sɔ mendanaka l’etema aso wa didjidji (aha wa mɛtɛ mɛtɛ), nɛ dia l’etema ɛsɔ mbadjaso yimba lo ɔtɛkɛta wa prɔfɛsiya waki Nzambi. Koko, enda 2 Petero 1:19 dimɛna dimɛna, ko wɛ ayɛna dia Traduction du monde nouveau mbidjaka shilola l’ɔkɔngɔ a wotelo w’ɔnɛ “edja ndo lam’atatɛ wonya mpotɔ ko nsongayɔɔtɔ mbalɛ,” dia mbokakitola la tɔtɛkɛta t’ɔnɛ: “l’etema wakinyu.” Divɛsa sɔ kokaka mbadiema nganɛ: ‘Lâsɔ tekɔ l’ɔtɛkɛta wa prɔfɛsiya wamboleka shikikɛma; ndo nyekɔ lo ntsha ɔlɔlɔ lam’awodjanyu yimba oko wanɛ wenda tala diahɛta lo dihole dia wodjima, mbut’ate l’etema wakinyu, edja ndo lam’atatɛ wonya mpotɔ ko nsongayɔɔtɔ mbalɛ.’
12. Ngande wele etema w’anto lo tshɛ kawɔ, ko kayotota di’Akristo wa mɛtɛ?
12 Lo tshɛ kawɔ, ngande wele etema wa didjidji w’anto wa l’andja w’otondo, wanɛ wele akanga wa pɛkato na? Etema awɔ wekɔ lo wodjima wa lo nyuma. Koko naka tekɔ Akristo wa mɛtɛ, kete ekɔ oko tekɔ la tala diahɛta l’etema aso, etema wotoyala wodjima otondoyala aha tala diakɔ. Oko wadiɛnya ɛtɛkɛta wa Petero, paka lo mbidja yimba l’ɔtɛkɛta wa prɔfɛsiya waki Nzambi mbahomba Akristo wa mɛtɛ sungukala ndo monga l’osase polo ndo l’ehotwelo ka lushi l’oyoyo. Vɔ pombaka mbeya dia Nsongayɔɔtɔ ambowalɛka, aha l’etema w’anto woludi l’ɛsɔhi, koko la ntondo ka ditongami tshɛ.
13. (a) Lande na kakokaso monga l’eshikikelo ɔnɛ Nsongayɔɔtɔ ambotawalɛka na? (b) Lande na kakoka Akristo mbikikɛ shɔkɔ yakatatshi Yeso yendana la nshi yaso nyɛ na?
13 Nsongayɔɔtɔ ambowalɛka l’edjedja! Sho kokaka shikikɛ dikambo sɔ lo mbidja yimba lo prɔfɛsiya ka woke kaki Yeso kendana la wôngelo ande. Ɛlɔ kɛnɛ, tekɔ lo mɛna ekotshamelo katɔ lo menda ata, ndjala ya kasha, adidimu wa nkɛtɛ—awui wahatongaka ndoko lushi—ndo esambishelo ka lokumu l’ɔlɔlɔ l’andja w’otondo. (Mateu 24:3-14) Kânga mbele pâ shɔ tshɛ yakate Yeso tokomɛka sho Akristo, sho tekɔ l’akoka wa mbikikɛ la wɔladi ndo l’ɔngɛnɔngɛnɔ wa l’otema. Lande na na? Nɛ dia sho mbidjaka yimba l’ɔtɛkɛta wa prɔfɛsiya waki Nzambi ndo tekɔ la mbetawɔ l’alaka ande wendana la nshi yayaye. Sho mbeyaka ɔnɛ taya kaa suke la tena dioleki ɔlɔlɔ nɛ dia tamboleka nyɔngɔmɛ etale ‘l’etena k’ekomelo’! (Danyele 12:4) Andja ɔnɛ waya lo shɔkɔ ya mamba oko wakataditshi Isaya 60:2 ɔnɛ: “Enda, hyutshihutshi ayukumba kete, la udjima a tshududu asi wedja.” Ngande wakoka onto mɛna mboka ka nde kɛndakɛnda lo wodjima ɔsɔ na? Nde pombaka ndjakitshakitsha ko mbidja yimba lo ɔtɛkɛta wa prɔfɛsiya waki Nzambi kakianɛ kam’ekende suke. Anto w’etema wosembwe pombaka mbɛlɛ le Jehowa Nzambi, ɔnɛ lele Kiɔkɔ ya lɔsɛnɔ ndo y’osase. (Osambu 36:9; Etsha 17:28) Paka lo ntsha ngasɔ mbakoka onto nongamɛ kondja osase wa mɛtɛ ndo nongamɛ ngɛnangɛna la lɔsɛnɔ la dimɛna efula lo nshi yayaye yakalake Nzambi akanga w’okitanyiya.—Enyelo 21:1-5.
‘Osase wakaye la nkɛtɛ’
14. Ahombaso ntsha dia mɛna ekotshamelo ka prɔfɛsiya ya diambo ya lo Bible?
14 Afundelo mɛnyaka hwe ɔnɛ Yeso Kristo ekɔ lo mbolɛ kakianɛ oko Nkumekanga. Lam’ele nde akale lowandji lo 1914, prɔfɛsiya nkina tshɛ yayokotshama. Dia sho ndjɛ̂na ekotshamelo ka prɔfɛsiya yakɔ, sho pombaka mɛnya dia tekɔ akanga wa ndjâkitshakitsha wɛnya mbetawɔ kaso le Yeso Kristo, lo ndjâtshumoya oma l’etsha wa pɛkato ndo oma lo kɔlɔ yakatatshaka aha la mbeya. Lo mɛtɛ, wanɛ walanga wodjima hawotokondja lɔsɛnɔ la pondjo. Yeso akate ate: “Elumbwelu kene ati: Yanyi yakayi la kete, keli antu wakaleki nanga udjima, uleki yanyi, ne dia etsha awo waki kolo. Untu tshe latutshaka kolo, atuhetshaka yanyi. Ndi hatuyakaka lu yanyi, watukûtshumuya dia etsha andi. Keli untu tshe latutshaka akambu wa mete, atuyakaka lu yanyi, ne dia etsha andi wenami vati: Wakatshama le [Nzambi].”—Joani 3:19-21.
15. Kakɔna kayotokomɛ naka sho minya yimba lo panda kɛnɛ kakalɔngɔsɔla Nzambi dia tosha oma lo tshimbo y’Ɔnande?
15 Osase wa lo nyuma wakaye la nkɛtɛ lo tshimbo ya Yeso, ndo ekɔ ohomba mbohokamɛ. Paulo akafunde ate: “Lu nshi y’edjedja, [Nzambi] akatelaka watshesu aui andi l’enyo w’amvutshi lu akambu efula la wehu efula wa ditelu. Keli l’ekumelu ka nshi [nyɛ], ndi akatutela diui l’unyo w’On’andi, lakandasonola ukito a diango tshe.” (Heberu 1:1, 2) Kakɔna kayotokomɛ naka hatodje yimba lo panda kɛsɔ kakasale Jehowa Nzambi dia sho kondja oma lo tshimbo y’Ɔnande na? Paulo ate: “Ne dia naka diui diakati andjelo diakashikikala, ndu kolo tshe la uhedia wakalungula difutu diedimi la etsha ako, ukundi ayutuhanda, naka tambukale panda kene ka wuki? To kakatutela Khumadiondjo ntundu, ndu kakashikikala le su uma le wane wakakiuki. Ndu [Nzambi] kakati diui kame la wo lu tulimbitelu la akambu wa mamba, lu akambu wa wulu wa wehu efula, ndu lu eshasha wa [“nyuma k’ekila,” NW], uku lulangu landi.” (Heberu 2:2-4) Eelo, ɔtɛkɛta ɔsɔ wa prɔfɛsiya ndekaka tɛkɛta dia Yeso.—Enyelo 19:10.
16. Lande na kakokaso monga la mbetawɔ k’efula lo prɔfɛsiya tshɛ yaki Jehowa Nzambi?
16 Oko wakatadiɛnyi, Petero akate ate: “Ndoko prɔfɛsiya ɔtɔi k’Afundelo koye oma lo diɔmbwɛlɔ di’onto ndamɛ.” Kɛsɔ mɛnyaka ɔnɛ anto vamɛ hawokokaki tomba la prɔfɛsiya ka mɛtɛ pondjo, koko sho kokaka mbɛkɛ etema aso tshɛ lo prɔfɛsiya yaki Nzambi. Yɔ ndja oma le Jehowa Nzambi ndamɛ. Nde akakimanyiya ekambi ande la nyuma k’ekila dia vɔ shihodia nganɛ wakotshama prɔfɛsiya ya lo Bible. Tekɔ la lowando efula le Jehowa lo woho wambotɛna ekotshamelo ka prɔfɛsiya ya ngasɔ oma k’ɔnɔnyi wa 1914. Ɔnkɔnɛ, tekɔ l’eshikikelo ɔnɛ prɔfɛsiya yahatakotshama yendana l’ekomelo k’andja ɔnɛ wa kɔlɔ yayokotshama tshɛ. Ekɔ ohomba sho tetemala mbidja yimba lo akambo wahataye wakalake Nzambi ko pɛtshaka ndo osase wakiso. (Mateu 5:16) Ande ɔngɛnɔngɛnɔ wele laso lo woho ‘watɔhɛtshɛ Jehowa osase lo wodjima wa mamba’ wambokomba andja ɔnɛ lee!—Isaya 5:10.
17. Lande na keso l’ohomba w’osase wa lo nyuma oma le Nzambi?
17 Osase wa wonya tokimanyiyaka dia sho mɛna. Vɔ totondjɛka ndo diangɔ dia ndɛ dia weho la weho. Hatokoke tshikala la lɔsɛnɔ naka osase a wonya bu. Akokaso mbuta lo kɛnɛ kendana l’osase wa lo nyuma na? Vɔ tɔlɔmbɔlaka ndo tɛnyaka nganɛ wayoyala nshi yayaye yakatatshi Bible, Ɔtɛkɛta waki Nzambi. (Osambu 119:105) Lo ngandji katokande, Jehowa Nzambi ‘totomɛka osase ande la mɛtɛ kande.’ (Osambu 43:3) Lo mɛtɛ, sho pombaka monga la lowando l’efula lo kɛnɛ kendana la tɛdikɔ tɔsɔ. Lâsɔ, nyɛsɔ totshe tshɛ dia kondja osase wa ‘ewo ka lotombo la Nzambi’ dia tɔ ngamulɛ etema aso wa didjidji.—2 Koreto 4:6; Efeso 1:18.
18. Kakɔna kamboyalɔngɔsɔla Nsongayɔɔtɔ ka Jehowa dia ntsha kakianɛ?
18 Ande diɛsɛ diele laso dia mbeya ɔnɛ l’ɔnɔnyi wa 1914, Yeso Kristo, Nsongayɔɔtɔ, akawalɛ l’andja w’otondo ndo akamɛ kotsha ɛnɛlɔ ka diambo k’ohilwelo ande lee! Kakianɛ, Nsongayɔɔtɔ ka Jehowa ekɔ lo mbolɛ, ndo ekɔ suke dia kotsha sangwelo diaki Nzambi lo ekotshamelo kekina k’ohilwelo ande—‘lo ta dia lushi la woke laki Nzambi Kanga-Nkudu-Tshɛ.’ (Enyelo 16:14, 16) L’ɔkɔngɔ w’andja ɔnɛ wa kɔlɔ ndanyema, Jehowa ayokotsha sangwelo diande diendana l’‘olongo w’oyoyo ndo la nkɛtɛ k’oyoyo’ lɛnɛ ayotokoka mbotombola pondjo pondjo oko Nkum’olongo ndo Nzambi ka prɔfɛsiya ka mɛtɛ. (Petero 3:13) Nyɛsɔ totetemale kɛndakɛnda l’osase waki Nzambi lo mbidja yimba l’ɔtɛkɛta wa prɔfɛsiya waki Nzambi, polo ndo lam’okoya lushi lɔsɔ la woke.
Ngande wayoyokadimola?
• Ngande wakokayɛ kɔndɔla ohilwelo wa Yeso?
• Ngande wakeketsha ohilwelo wa Yeso mbetawɔ kaso?
• Ele Nsongayɔɔtɔ ka Jehowa, ndo etena kakɔna kakandawalɛ?
• Bonde kahombaso mbidja yimba l’ɔtɛkɛta wa prɔfɛsiya waki Nzambi?
[Osato wa lo lɛkɛ 21]
Onde wɛ kokaka nembetshiya kitshimudi y’ohilwelo wa Yeso?
[Osato wa lo lɛkɛ 23]
Nsongayɔɔtɔ ambowalɛka l’edjedja. Onde wɛ mbeyaka ngande ndo etena kakɔna?