Tosale Wotelo Wa Lo Sɛkɛ Dia Panda
“Untu tshe [“latɛndɛ lokombo la Jehowa,” “NW”] ayushimbamela.”—ROMO 10:13.
ƐKƆNDƆ wa lo Bible mɛnyaka ɔnɛ ‘nshi ya Jehowa’ yekɔ efula. Mvula k’Eloka ka lo nshi ya Nɔa, elanyelo ka sɔdɔmɔ la Gɔmɔra la ka Jerusalɛma lo 607 N.T.D. ndo lo 70 T.D., nshi shɔ tshɛ yaki nshi ya Jehowa ya weke ndo ya wɔma. Yɔ yaki nshi yakakotsha Jehowa dombwelo diande di’osembwe otsha le anto wakɔ̂tɔmbɔkwɛ. (Malaki 4:5; Luka 21:22) Lo nshi shɔ, anto efula wakavu nɛ dia kɔlɔ yawɔ. Koko amɔ wakake. Jehowa akasale di’anto tshɛ kondja lɔhɛmɔ, nde akewoya anto wa kɔlɔ ɔnɛ wekɔ lo wâle wa nanyema ndo akasha anto w’ɛlɔlɔ diaaso dia vɔ shimbamela.
2 Elanyelo ka Jerusalɛma lo 70 T.D. akasha ɛnyɛlɔ ka mamba ka dui sɔ. Etena kakandewoyaka dui sɔ suke l’ɛnɔnyi 900 la ntondo ka diɔ kotshama, omvutshi Jɔɛlɛ akafunde ate: “Dimi layenya akambu wa mamba l’ulungu ndu la kete: dikila, dja, la dinga. Unya ayukadimo udjima, ngondo ayukadimo dikila, la ntundu ka lushi la [Jehowa] latayi, lushi la wuki ndu la woma.” Ngande wotokoka onto pandɔ oma lo dito dia wɔma dia ngasɔ na? Jɔɛlɛ akafunde l’ɛlɔmbwɛlɔ ka nyuma k’ekila ate: “L’etena keso, untu tshe [“layɔtɛndɛ lokombo la Jehowa,” NW], ayushimbamela. Uku akati [Jehowa] ati: Antu amotshi weli l’ukungu wa Siona ndu la Jerusalema wayuhanda. [Jehowa] ayeta amotshi uma l’atei w’atshikadi.”—Joele 2:30-32.
3 Lo Pɛntɛkɔsta ka l’ɔnɔnyi 33 T.D., ɔpɔstɔlɔ Petero akɛlɛ otsha le Ase Juda la ambetawudi w’ase wedja wakatshumana la Jerusalɛma ko akavusola pɔlɔfɛsi k’omvutshi Jɔɛlɛ, ɛnya ɔnɛ ampokami ande kokaka nongamɛ ekotshamelo k’awui asɔ lo nshi yawɔ ate: “Dimi layenya akambu wa mamba ladiku dia ulungu, la tulimbitelu l’esi ka kete; dikila la dja, ndu lungi la edinga. Unya ayukadimo udjima, ngondo ayukadimo dikila, la ntundu ka lushi la [Jehowa] latayi, lushi lako la wuki ndu la mamba. Ku lam’ayuyala dikambu so, untu tshe [“latɛndɛ lokombo la Jehowa,” NW], ayushimbamela.” (Etsha 2:16-21) Olui w’anto wakahokamɛka Petero wakikɔ vɔ tshɛ la tshina di’Ɛlɛmbɛ wa Mɔsɛ, ndo vɔ wakeyaka lokombo la Jehowa. Omalɔkɔ, Petero akalembetshiya ɔnɛ: tɛndɛ lokombo la Jehowa kɛdikɛdi ntsha awui akina aha paka mbeya lokombo la Jehowa loto. Lo yoho ya lânde, ɔtɛndɛlɔ ɔsɔ akalemanɛka la tshima onto batizama lo lokombo la Yeso, ɔnɛ lakadiakema ndo mbolwama otsha lo lɔsɛnɔ lahakomɛki l’olongo.—Etsha 2:37, 38.
4 Tatɛ oma lo Pɛntɛkɔsta, Akristo wakadianganya lokumu la Yeso, ɔnɛ lakolwama. (1 Koreto 1:23) Wakasambisha ɔnɛ anto kokaka mbetawɔma le Jehowa Nzambi oko anande wa lo nyuma ko ndjâla anto wa l’atei wa “Isariyele wa [Nzambi]” w’oyoyo, wodja wa lo nyuma wakahombe ‘ndjewoya ɛlɔlɔ wa mamba waki Jehowa lo wedja wa tale.’ (Ngalatiya 6:16; 1 Petero 2:9) Wanɛ wakalame kɔlamelo yawɔ polo lo nyɔi wotoyokondja lɔsɛnɔ lahakomɛki l’olongo oko ekitɔ kâmɛ la Yeso lo Diolelo diande dia l’olongo. (Mateu 24:13; Romo 8:15, 16; 1 Koreto 15:50-54) Lâdiko dia lâsɔ, Akristo asɔ waki la dia sambisha eyelo ka lushi la Jehowa la woke ndo la wɔma. Vɔ wakahombe mbewola Ase Juda ɔnɛ fɔnu ka mamba kahawâtɛnaka ndoko lushi kayokomɛ Jerusalɛma, osomba awɔ, kâmɛ ndo vɔ wanɛ wakayataka l’etena kɛsɔ ɔnɛ ekambi waki Nzambi mbewɔ. Koko ehandɔ wotoyala. Vɔ na? Wanɛ watɛndɛ lokombo la Jehowa.
“Lu Nshi y’Ekumelu”
5 Lo toho efula, awui waketaka lo nshi shɔ waki didjidji di’awui wɛnaso nshi nyɛ. Tatɛ oma lo 1914, anto wekɔ lo sɛna l’etena ka lânde kêlɛ Bible ɔnɛ “etena k’ekumelu,” ndo ‘ekomelo ka dikongɛ nɛ di’akambo,’ ndo “nshi y’ekumelu.” (Danyele 12:1, 4; Mateu 24:3-8; 2 Timote 3:1-5, 13) L’eleko kaso kɛnɛ, ata wa mamba, awui wa ngala wetshaka wenya, ofukutanu watomba l’atshunda w’anto la woho walanyema ngelo ambotosha djembetelo ya mamba yɛnya ɔnɛ pɔlɔfɛsi ya Bible yakotshamakɔ. Awui asɔ tshɛ wekɔ l’atei wa djembetelo yakatatshi Yeso, yɛnya ɔnɛ lushi la Jehowa la wɔma wa mamba laya suke la komɛ andja ɔnɛ. Lo Armagɛdɔna mbayokita ta sɔ dikuma, kondoko ya “[“fɔnu ka woke,” NW] wuhu wahatayala uma k’etatelu k’andja edja ndu kakiane, ndu wuhu wahayalaki pundju.”—Mateu 24:21; Enyelo 16:16.
6 Lam’ele lushi l’elanyelo lekɔ lo ndjaleke sukana, Jehowa ekɔ lo ntsha di’akanga a memakana panda. Lo ‘etena k’ekomelo kɛnɛ,’ nde ambotshumanyaka atshikadi w’ekomelo w’Isariyɛlɛ waki Nzambi wa lo nyuma ndo akakotola yambalo y’ekambi ande wa la nkɛtɛ, oma k’ɛnɔnyi wa 1930 tsha ntondo, dia tshumanya “ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” Lo mbaɔsa vɔ tshɛ kâmɛ, vɔ “wambuya uma lu [“fɔnu ka woke,” NW]” etondo eto. (Enyelo 7:9, 14) Ko woho akɔna wakoka onto tshɛ ndjashikikɛ ɔnɛ nde ayoshimbamela na? Ɔpɔstɔlɔ Paulo tokadimolaka lo dimbola sɔ. Lo Rɔmɔ tshapita 10, nde ambotosha alako w’amɛna dia panda kaso—alako akɔ waki ohomba lo nshi yande ndo weke ohomba lo nshi yaso nyɛ.
Dɔmbɛlɔ Dikambo dia Panda
7 Etena kakafundɛ Paulo Ase Rɔmɔ mukanda ande, lâsɔ ko Jehowa ambokadjaka wodja w’Ase Isariyɛlɛ. Koko edja ndo l’etena kɛsɔ, ɔpɔstɔlɔ Paulo aketawɔ ate: “Lulangu l’utema ami la dombelo diami le [Nzambi] lu dikambu dia Isariyele eli dia vo nshimbamela.” Nde akalongamɛka di’Ase Juda kondja ewo k’oshika ka lolango la Nzambi kakahombe mbashimbela. (Romo 10:1, 2) Lâdiko dia lâsɔ, Jehowa nangaka shimbɛ anto tshɛ wa l’andja w’otondo wele la mbetawɔ, oko adiɛnya Joani 3:16 ɔnɛ: “[Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” Olambo w’etshungwelo wa Yeso akadihwɛ anto mboka otsha lo panda ka woke. Oko wakidiɔ lo nshi ya Nɔa ndo lo nshi nkina ya dombwelo diakayosalemaka, Jehowa tomaka ekambi ande dia vɔ sambisha “lokumu l’ololo” lasha anto diaaso dia vɔ kondja panda.—Mako 13:10, 19, 20.
8 Lo mɛnya Ase Juda l’Ase Wedja otema ande w’ɔlɔlɔ, Paulo akâsambishaka lo waaso tshɛ waki lande. Nde “akayangi mbetawuya asi Juda la asi Ngirika.” Nde akatɛ dikumanyi dia l’Ɛfɛsɔ ate: “Dimi kumbuka woma wa nyutela akambu tshe w’ololo, lakanyetshaka l’atei w’antu, ndu lu luudu la luudu, latela asi Juda ndu asi Ngirika dia nkadimula etema le [Nzambi], la dia mbetawo khumesu Jesu Kristu.” (Etsha 18:4; 20:20, 21) Lo yoho yakɔ yâmɛ, Ɛmɛnyi wa Jehowa wekɔ lo ndjasha ɛlɔ kɛnɛ l’olimu w’esambishelo, hawosambisha paka Ase Lokristokristo ato koko vɔ sambishaka anto tshɛ, kânga ‘polo ndo lo tokoma ta nkɛtɛ.’—Etsha 1:8; 18:5.
Tosambisha ‘Dui dia Mbetawɔ’
9 Pombaka onto monga la mbetawɔ kakikɛ awui ko nde kondja panda. Lam’akandavusolaka ɛtɛkɛta wa Euhwelu k’Elembe 30:14, Paulo akate ate: “Diui dieko lasuki la ye, dieko lasuki l’onyo aye ndu l’utema aye, (nkadimula ati: Diui diako dia mbetawo, mbatutusambishaka).” (Romo 10:8) Lam’ele sho nsambishaka “diui diako dia mbetawo,” diɔ ndekaka ntɔtɔmɛ l’etema aso. Ngasɔ mbaki Paulo, ndo awui ande efula wakandayokotshaka l’ɔkɔngɔ kokaka tokeketsha lo weolo wadjaso dia mbôkoya lo mbewoyaka anto akina mbetawɔ kakɔ: “Naka we ayushula l’unyo aye wati: Jesu keli Khumadiondjo, ndu naka we ayetawo l’utema aye wati: [Nzambi] akawulula uma lu nyoi, ku we ayushimbamela.” (Romo 10:9) Aha paka mɛnya anto wonya wa batizamayɛ ɔnɛ wɛ ekɔ la mbetawɔ ka ngasɔ kete amboshila, wɛ la dia tetemala la kiɛnya, sambisha awui a weke tshɛ wendana l’akambo wa mɛtɛ l’ohetoheto. Mɛtɛ yakɔ shɔ tɛtɛ̂ka dia lokombo l’ohomba efula laki Nkumadiɔndjɔ Jehowa; tɛtɛ̂ka dikambo dia Mɛsiya Nkumekanga kaso ndo Ontshungudi, Nkumadiɔndjɔ Yeso Kristo; ndo dikambo di’alaka wa mamba wendana la Diolelo.
10 Ndoko panda le onto tshɛ latona ndo lahakambe la “diui diako dia mbetawo,” oko wata ɔpɔstɔlɔ ate: ‘L’otema mbɛnya onto mbetawɔ kande l’akambo w’ɔlɔlɔ, koko l’ɔnyɔ mbasalande wotelo wa lo sɛkɛ dia panda. Nɛ dia Afundelo mbutaka ɔnɛ: onto tshɛ lawetawɔ hɔtɔ lo sɔnyi.’ (Romo 10:10, 11) Sho pombaka kondja ewo k’oshika ka “diui diako dia mbetawo” ndo tetemala la kihamia l’etema aso dia sho ndjosokoyama dia kitela anto akina. Yeso toholaka ndamɛ ate: “Untu tshe l’atei a lolonga lone la luseka ndu l’akambu wa kolo layumbuka dimi la aui ami sonyi, ndu dimi, On’a untu, layuwuka sonyi lam’ayumuya lu lutumbu la Papa, kame la andjelo w’ekila.”—Mako 8:38.
11 Oko wakadite omvutshi Danyɛlɛ, l’etena kɛnɛ k’ekomelo, “akanga a yimba” wɛnamakɔ lo woho wangamulawɔ esase awɔ “uku ngaingai k’ulungu,” lam’atakokanɛ esambishelo ka Diolelo lo tokoma ta nkɛtɛ. Vɔ “watukadimulaka antu efula utsha l’akambu w’ololo,” ndo ewo ka mɛtɛ kambofulanɛ, nɛ dia Jehowa ekɔ lo taleke ngamula osase ande dia nembetshiya pɔlɔfɛsi yendana l’etena kɛnɛ k’ekomelo. (Danyele 12:3, 4) Ɔsɔ ekɔ losango lɔmɔ la panda l’ohomba efula le anto tshɛ wayoshimbamela, mbut’ate anto walanga akambo wa mɛtɛ la wa losembwe.
12 Ɔpɔstɔlɔ Paulo ambotetemala mbuta ate: “Kema utshikitanu l’asa usi Juda la usi Ngirika, ne dia Khumadiondjo kako kame, keli Khumadiondjo k’antu tshe. Ndi atukimoka engonyi andi le wane tshe watuwetaka.” (Romo 10:12) “Lukumu l’ololo” pombaka sambishama le anto tshɛ ɛlɔ kɛnɛ—lo bɛkɛ tshɛ dia l’andja w’otondo, polo lo tokoma ta nkɛtɛ. Ondjelo wa lo Enyelo 14:6 ekɔ lo tafumbɔ tsho l’atei olongo, ele la “lukumu l’ololo la pundju, la[t]andatela wa la kete, ndu wedja tshe ndu wauhu tshe ndu eteketa tshe, ndu antu tshe.” Wahɔ akɔna wakondja anto walietawɔ na?
Tɛndɛ Lokombo la Jehowa
13 Etena kavusolande Joele 2:32, Paulo ekɔ lo totɛ ate: “Untu tshe [“latɛndɛ lokombo la Jehowa,” NW] ayushimbamela.” (Romo 10:13) Ande woho wasunganadiɔ nɛ dia awui asɔ wakasɔnama oko divɛsa di’Ɛmɛnyi wa Jehowa di’ɔnɔnyi ɔnɛ wa 1998 lee! Nshi yaso nyɛ mbamboleka mɛnama ohomba wa ndeka ndjaɛkɛ le Jehowa, mbewoya lokombo lande ndo nganɛ wokimanelɔ l’asangwelo ande wa weke! Oko wakidiɔ l’eleko ka ntondo, woho akɔ mbele lo nshi y’ekomelo ka dikongɛ nɛ dia kɔlɔ di’akambo, dako nɛ di’ɔhɛmwɛlɔ diamboleka mbokɛma: “Nyuyashimbeli uma lu lolonga la kolo lone!” (Etsha 2:40) Ɔsɔ ekɔ dimama (trompette) diambowodɛ anto tshɛ woka Nzambi wɔma l’andja w’otondo dia vɔ tɛndɛ lokombo la Jehowa dia ndjokondja panda kande ndo dia wanɛ walongola lokumu l’ɔlɔlɔ lasambishawɔ lo sɛkɛ ndjoshimbamɛ ndo vɔ lawɔ.—1 Timote 4:16.
14 Kakɔna kayotomba lam’ayoya lushi la woke la Jehowa la nkɛtɛ kɛnɛ na? Efula koleki hawotêndɛ le Jehowa dia kondja panda. Suke l’anto tshɛ “wa[yu]tela ekungu la ave vati: Nyutukungweli, nyutushe uma lu ashu wa one latudjaseka lu kiti ka diulelu, ndu uma lu kele ka Ona-Okoko.” (Enyelo 6:15, 16) Elongamelo kawɔ kayoyala le ɛlɔngɔswamelo wa l’andja ɔnɛ wele oko akona la le atshunda w’anto wa lo dikongɛ nɛ di’akambo. Ande dimɛna otowodja elongamelo kawɔ le Jehowa Nzambi, Dive dioleki akina tshɛ woke lee! (Euhwelu k’Elembe 32:3, 4) Nkumekanga Davidi akate lo dikambo diande ate: “[Jehowa] keli dive diami, wumbe ami wa ta la utshungudi ami.” Jehowa kele “dive dia panda kasu.” (Esambu 18:2; 95:1) Lokombo lande lekɔ “etangelu ka wulu,” tshɔi yakɔ “y’etangelu” ka wolo efula kakoka tokokɛ la ntondo ka ditto diâye. (Tukedi 18:10) Omalɔkɔ, ekɔ ohomba efula sho ndakanya suke la miliyara shamalo y’anto wasɛna l’andja ɔnɛ, naka kokaka, dia vɔ mbeya woho wa tɛndɛ lokombo la Jehowa la kɔlamelo ndo l’otema ɔtɔi.
15 Sunganaka mɛtɛ di’ɔpɔstɔlɔ Paulo mumbola ate: “Ukundi ayuweya [“tɛndɛ,” NW] one lahawatetawo?” (Romo 10:14) Tâkakoke kimanyiya anto efula dia vɔ mbetawɔ ‘dui dia mbetawɔ,’ woho wa vɔ tɛndɛ Jehowa dia panda. Mbetawɔ kekɔ ohomba mɛtɛ. Paulo ambota lo mukanda okina ate: “Untu laha la mbetawo, heyi mbôngenyangenya. Ne dia dieli la one layuya le [Nzambi] mbetawo ati: Ndi eko, la ndi keli ufutshi a wane watûyangaka.” (Heberu 11:6) Ko ngande wayonga miliyɔ y’anto la mbetawɔ le Nzambi na? Lo mukanda wakandafundɛ Ase Rɔmɔ, Paulo ekɔ lo mumbola ate: “Ukundi eyawo mbêtawo, lam’ahawatuki lukumu landi?” (Romo 10:14) Ko onde Jehowa akâlɔngɔsɔlɛ yoho mɔtshi yakokawɔ mboka? Eelo, ngasɔ mbediɔ! Nyolonge nganɛ wata Paulo ate: “Ukundi eyawo mbuka, lam’ahawo la usambisha?”
16 Lo ndjela tokanyi taki Paulo tɔsɔ, tamboka hwe mɛtɛ ɔnɛ ohomba w’esambisha wekɔ. Yeso akɛnya ɔnɛ ohomba awɔ wayoyala oma k’etena kɛsɔ, “edja ndu l’ekumelu k’andja.” (Mateu 24:14; 28:18-20) Esambishelo ekɔ etenyi kɛmɔ ka tɛdikɔ takɔshi Nzambi dia kimanyiya anto dia vɔ tɛndɛ lokombo la Jehowa woho wa vɔ ndjoshimbamela. Kânga lo Lokristokristo, suke l’anto tshɛ hawotshe ndoko ema dia tombola lokombo la Nzambi la nɛmɔ efula. Efula kawɔ bu l’elongamelo; hawotshikitanya Jehowa la Yeso ndo la nyuma k’ekila, ko vɔ mbodjaka lo wetshelo wa Losato l’Osanto latawɔ ɔnɛ ekɔ ehekesa dikambo kaheyama nembetshiya. Ndo nto, efula kawɔ wekɔ l’ɔnɔngɔ w’anto watawɔ lo Esambu 14:1 la 53:1 ɔnɛ: “Enginya katutaka l’utema andi ati: [“Jehowa bu,” NW].” Vɔ wekɔ l’ohomba wa mbeya ɔnɛ Jehowa ekɔ Nzambi kasɛna, ndo nyanga dia mbeya kɛnɛ kalembetshiya lokombo lande naka vɔ nangaka mbika lo fɔnu ka woke kalɛndalɛnda.
‘Ekolo w’Amɛna’ w’Esambisha
17 Ɔpɔstɔlɔ Paulo ekekɔ la dimbola dikina di’ohomba efula: “Ukundi eyawo nsambisha, lam’ahawatatumama? Uku akafundama ati: Ndi amena weli ekulu a wane wasambisha lukumu l’ololo li!” (Romo 10:15) Lo divɛsa nɛ, Paulo ambovusola kɛnɛ kofundami lo Isaya 52:7, etenyi kɛmɔ ka pɔlɔfɛsi k’ɔlɔngɔswɛlɔ kakamɛ kotshama oma lo 1919. Ndo ɛlɔ kɛnɛ, Jehowa atomakɔ “omembi wa kumu y’ololo . . . Ee, dikendji diatudianganyaka lukumu la ki, latelaka kumu y’ololo, diatudianganyaka lukumu la panda.” L’okitanyiya tshɛ, akitami wa Nzambi, “alami” la anyawɔ watetemalakɔ sambisha l’ɔngɛnɔngɛnɔ. (Isaya 52:7, 8) Ɛlɔ kɛnɛ, ekolo a wanɛ wasambisha losango la panda mbeyaka nɛmba, kana monga otoko oto, lam’atshɔwɔ lo luudu la luudu; ko ande ɔlɔ dia mɛna dungi diawɔ di’ɔngɛnɔngɛnɔ lee! Vɔ mbeyaka ɔnɛ Jehowa mbowasha ɔkɛndɛ wa sambisha lokumu l’ɔlɔlɔ la wɔladi dia keketsha wanɛ walela, dia mbakimanyiya dia vɔ tɛndɛ lokombo la Jehowa l’elongamelo ka ndjokondja panda.
18 Oyadi anto ‘mbetawɔka awui wakawoke’ kana hawolange mbâkitanyiya, ɛtɛkɛta ɛnɛ wa Paulo kotshamaka: “Vo kumbuka? Mete, vo wakuki; ne dia: wetshelu awo wakadiangana lu kete tshe, la awui awo pulu ndu lu kuma y’andja.” (Romo 10:16-18) Oko wele ‘elongo watosanyaka lotombo la Nzambi,’ oko wadiɛnaso l’ekimanyielo k’elimu w’etongelo, woho akɔ mbahomba Ɛmɛnyi ande wa la nkɛtɛ sambisha “eleku ka ngandji ka mamba ka [Jehowa] la dia lushi l’esombweyo ka [Nzambi] [k]asu, . . . dia nsamba antu tshe walela.”—Osambu 19:1-4; Isaya 61:2.
19 Lushi la Jehowa la woke ndo la wɔma laya kâsuke. “Hai! ndi lushi li! Ne dia lushi la [Jehowa] laya suki, lo lambuya uku elanyelu k’uma le Kanga-Wulu-Tshe.” (Joele 1:15; 2:31) Kɛnɛ kalɔmbaso ele dia nyemba y’anto mbetawɔ losango l’ɔlɔlɔ aha la tshimbatshimba, dia vɔ mpongomɔ oya l’ɔlɔngɔswamelo waki Jehowa. (Isaya 60:8; Habakuka 2:3) Tatohɛke dia nshi nkina yaki Jehowa yakadiake anto wa kɔlɔ—lo nshi ya Nɔa, ya Lɔta, ndo lo nshi y’Isariyɛlɛ la Juda, wedja wakatɔmbɔkɔ. Kakianɛ, taya kâ onyɔ wa fɔnu ka woke koleki nkina tshɛ, lam’ayofufa ponganɛndji kaki Jehowa dia tota awui wa kɔlɔ tshɛ oma la nkɛtɛ, dia mɔmbɛ paradiso ka wɔladi wa pondjo mboka. Onde, wɛ ayonga l’atei a wanɛ ‘watɛndɛ lokombo la Jehowa’ la kɔlamelo tshɛ? Naka ɔsɔku, kete oka ɔlɔ mɛtɛ! Nzambi ekɔ lo kolaka ndamɛ ate: wɛ ayoshimbamela.—Romo 10:13.
[Study Questions]
1. Naa lɔhɛmɔ lokowɔhɛmɔlaka anto oma ka mɔmbɔ k’ɔmbɔla?
2, 3. (a) Naa ɔhɛmwɛlɔ ɔmɔ wele lo pɔlɔfɛsi kakavusɔma lo Pɛntɛkɔsta na? (b) Kakɔna kakalɔmbamaka dia tɛndɛ lokombo la Jehowa oma ko Pɛntɛkɔsta ka l’ɔnɔnyi 33 T.D.?
4. Losango lakɔna lakasambisha Akristo lo wedja wa tale?
5. Pɔlɔfɛsi yakɔna yakotshama ɛlɔ kɛnɛ?
6. (a) Ngande wasala Jehowa dia shimbɛ akanga w’okitshakitsha? (b) Lende atanaso alako wa Paulo wɛnya nganɛ wakokaso kondja panda?
7. (a) Elongamelo kakɔna kalembetshiyawɔ lo Romo 10:1, 2? (b) Lande na katoma Jehowa anto ande dia vɔ sambisha “lukumu l’ololo” l’ahole efula ɛlɔ kɛnɛ?
8. Lo ndjela ɛnyɛlɔ ka Paulo, woho akɔna ndo otsha le na ɛnya Akristo etema awɔ w’ɔlɔlɔ ɛlɔ kɛnɛ?
9. (a) Woho akɔna wa mbetawɔ katokeketsha Romo 10:8, 9 dia sho monga atɔ? (b) Etena kakɔna ndo ngande wahombaso mɛnya ɔnɛ tekɔ la mbetawɔ?
10. Lo ndjela Romo 10:10, 11, ahombaso salaka la ‘dui dia mbetawɔ’ na?
11. Ngande wahomba lokumu l’ɔlɔlɔ sambishama efula, ndo lande na?
12. Ngande wɔtɔnɛ kɛnɛ kata Romo 10:12 la ɔkɛndɛ wele l’ondjelo watawɔ lo Enyelo 14:6?
13. (a) Naa divɛsa diaso di’ɔnɔnyi wa 1998? (b) Lande na kaleka sungana divɛsa diakɔ sɔ ɛlɔ kɛnɛ?
14. Dive diakɔna diahombaso tɛndɛ dia sho kondja panda?
15. Kakɔna kɛnya Romo 10:14 lo dikambo dia mbetawɔ?
16. Lo ndjela asangwelo wa Nzambi, lande na kɛnama ohomba w’apandjudi?
17. (a) Lande na kasunganadiɔ dia Paulo vusola pɔlɔfɛsi k’ɔlɔngɔswɛlɔ? (b) Monga ‘l’ekolo w’amɛna’ kɛdikɛdi na?
18. Kakɔna kata Romo 10:16-18 lo dikambo di’etombelo wayonga l’esambishelo ka lokumu l’ɔlɔlɔ?
19. Kakɔna kayokomɛ anto ‘watɛndɛ lokombo la Jehowa’ ɛlɔ kɛnɛ?
[Caption]
[Questions]
[Caption on page 15]
[Caption on page 15]
Ekambi wa Nzambi watakɔ awui ande wa mamba lo nkɛtɛ k’otondo oma la Porto Rico polo lo Sénégal, oma la Pérou polo ndo la Papouasie-Nouvelle-Guinée
[Caption on page 16]
[Review on page 16]
Ngande Wayoyokadimola?
◻ Akambo akɔna w’eyoyo wakawasambisha l’ɔkɔngɔ wa Pɛntɛkɔsta ka l’ɔnɔnyi 33 T.D.?
◻ Ngande wakoka Akristo mbidja yimba lo ‘dui dia mbetawɔ’?
◻ ‘Tɛndɛ lokombo la Jehowa’ kɛdikɛdi na?
◻ Lo woho akɔna wele apandjudi wa Diolelo la ‘ekolo w’amɛna’?