Tewoya lokumu l’ɔlɔlɔ l’ohetoheto
“Nyɔhɛtɛhɛtɛ la nyuma. Nyokambe Jehowa oko ɛhɔmbɔ.”—RƆMƆ 12:11, NW.
1, 2. Naa dionga diayatshutshuya Akristo dia monga ladiɔ oko wewɔ esambisha wa lokumu l’ɔlɔlɔ?
ƆLƆNGƆLƆNGƆ ɔmɔtshi ambok’ɔlɔ heyama dia kondja olimu w’oyoyo. Lo lushi lande la ntondo l’olimu, nde ekɔ lo kongɛ l’asolo walomɔlomɔ di’owandji ande w’olimu mbotɛ kɛnɛ kahombande sala. Yimba yande tshɛ yekɔ paka l’olimu wayowowosha ntondo ndo woho wayondokamba olimu akɔ l’otema ɔtɔi. Nde ekɔ lo nomɔlɔmɔ dia ntsha tshɛ kakokande sala.
2 Lo yoho yakɔ yâmɛ, oko weso Akristo, sho kokaka ndjaɔsa oko as’olimu w’eyoyo. Lam’ele elongamelo kaso ekɔ ka sɛna pondjo pondjo, sho kokaka mbuta di’ɔnɛ tatɛ tsho mambototatɛ la kambɛ Jehowa. Lo mɛtɛ, Otungi aso ekɔ l’elimu efula wa tosha, elimu wayotokambaka pondjo pondjo. Koko olimu wa ntondo wakatalongola aki wa mbewoya lokumu l’ɔlɔlɔ la Diolelo diande. (1 Tesalonika 2:4) Ngande wayaokaso lo kɛnɛ kendana l’olimu ɔsɔ w’oma le Nzambi na? L’ɛnyɛlɔ k’ɔlɔngɔ a pami ɔsɔ, sho nangaka kamba olimu akɔ l’akoka aso tshɛ, la waasaso tshɛ, l’ɔngɛnɔngɛnɔ tshɛ, eelo, l’asolo walomɔlomɔ!
3. Oko weso ekambi wa lokumu l’ɔlɔlɔ, kakɔna kahombama dia sho tondoya olimu aso?
3 Lo mɛtɛ, monga la dionga dia ngasɔ bu dikambo dia wɔdu. Lâdiko w’olimu aso, tekɔ nto l’ɛkɛndɛ ekina efula, ɛmɔtshi l’atei awɔ mbeyaka tɔkɔmɔla demba ndo yimba. Lo yoho yoleki, sho tshaka tshɛ dia kotsha ɛkɛndɛ akɔ, aha la minya olimu aso yimba. Koko, olimu ɔsɔ kokaka monga ta dia lushi la lushi. (Mako 8:34) Yeso akatɛtɛ ɔnɛ oko weso Akristo, dia tondoya olimu ɔsɔ sho la dia sala la wolo tshɛ.—Luka 13:24.
4. Ngande wakoka ekiyanu wa lushi la lushi monga la shɛngiya lo ɛnɛlɔ kaso ka lo nyuma?
4 Lo tena dimɔtshi, sho kokaka mboka ɔlɛmbɛlɔ esadi eto kana mboka dia wotsho wamboleka nɛ dia akambo wa sala amboleka efula. ‘Ekiyanu wa lo lɔsɛnɔ’ kokaka kitshakitsha waasaso aso ndo lowando laso l’elimu wa teokrasi. (Luka 21:34, 35; Mako 4:18, 19) Oko weso kema kokele, sho kokaka ndjotshika ‘ngandji kaki laso ntondo.’ (Enyelo 2:1-4) Awui amɔtshi wendana l’olimu wakambɛso Jehowa kokaka ndjokoma eshi, mbut’ate, tomba kete tomba lawɔ. Ngande watosha Bible ekeketshelo keso k’ohomba di’aha sho shisha waasaso aso l’esambishelo na?
Oko ‘dja yahɛta’ l’etema aso
5, 6. Ngande wakɔsaka Paulo diɛsɛ diande dia sambisha?
5 Olimu wakatosha Jehowa wekɔ la nɛmɔ di’efula, diele hatokoke mbetawɔ vɔ koma oko ɛngɔ k’anyanya. Ɔpɔstɔlɔ Paulo akɔsaka esambishelo ka lokumu l’ɔlɔlɔ oko diɛsɛ dia woke efula, ndo nde akayaɔsaka oko onto laki kokoka kondja diɛsɛ diakɔ. Nde akate ate: “Dimi ako luleki ekilami tshe nkitakita, kakawasha ngandji kene ka mamba dia nsambisha asi wedja ongonyi wa Kristu waheyema mbedika, ndu dia menya antu tshe uku eli ulimu wa dikambu dia usheshe diakashama deku la deku le [Nzambi], lakatungi diango tshe.”—Efeso 3:8, 9.
6 Dionga di’ɔlɔlɔ diaki la Paulo lo kɛnɛ kendana l’olimu ekɔ ɛnyɛlɔ ka dimɛna efula le so. Lo mukanda ande le ase Rɔma, nde akate ate: “Okone dimi la pusa efula dia ndjunyusambisha lukumu l’ololo.” Nde komboka lokumu l’ɔlɔlɔ sɔnyi. (Romo 1:15, 16) Nde aki la dionga di’ɔlɔlɔ ndo aki la saki k’efula ka tetemala kamba olimu ande.
7. Lo mukanda ande le ase Rɔma, Paulo akandawaewola?
7 Ɔpɔstɔlɔ Paulo akeyaka ohomba waha shisha waasaso ande, diɔ diakɔ diakandalake Akristo wa la Rɔma ate: “Nyokambe elimu anyu aha la tɛwɔla demba. Nyɔhɛtɛhɛtɛ la nyuma. Nyokambe Jehowa oko ɛhɔmbɔ.” (Rɔmɔ 12:11, NW) Tshɛkɛta ya lo Grɛkɛ yokadimwami ɔnɛ “tɛwɔla demba” yekɔ la kanyi ya monga “ɛnɛndɛ kana ɔkɔkɛ efula.” Kânga mbele sho hatɔtɛwɔla demba l’olimu aso, sho tshɛ tekɔ l’ohomba wa sɛna wolo dia mbeya mbishola oseka djembetelo tshɛ yɛnya ɔnɛ tambondama l’ɛnɛndɛ l’akambo wa lo nyuma ndo ntsha etshikitanu wahombama lo dionga diaso naka tambɛna weho wa tolembetelo ta ngasɔ le so shamɛ.—Tukedi 22:3.
8. (a) Kakɔna kakakome oko ‘dja yahɛta’ l’otema waki Jeremiya ndo lande na? (b) Wetshelo akɔna wakokaso kondja oma l’awui wakakomɛ Jeremiya?
8 Nyuma kaki Nzambi kokaka tokimanyiya naka tambɔkɔmɔ otema. Oko ɛnyɛlɔ, mbala kɛmɔtshi omvutshi Jeremiya akayaoke dia nde ambɔkɔmɔ otema, ko nde akalange dia tshika olimu ande w’ɔprɔfɛta. Nde akakome ndo lo mbuta lo dikambo dia Jehowa ate: “Dimi haludimula lukumbu landi ntu, dimi haloteketa ntu lu lukumbu landi.” Onde djembetelo shɔ yakɛnyaka ɔnɛ lonyuma la Jeremiya lambolana efula? Kema. Lonyuma la wolo laki la Jeremiya, ngandji kakandokaka Jehowa, ndo ohetoheto ande l’akambo wa mɛtɛ, akawosha nkudu ka nde tetemala kamba oko ɔprɔfɛta, mbut’ate, mbewoya akambo wahataye. Nde ekɔ lo nembetshiya ate: ‘L’otema ami [ɔtɛkɛta wa Jehowa] wakahɛtaka oko dja yambodihama lo weka ami; dimi lakahembe mbikikɛ, kele dimi kokoka.’ (Jeremiya 20:9) Bu dikambo dia diambo di’ekambi wa kɔlamelo waki Nzambi kɔmɔ otema tena la tena. Koko, lam’alɔmbawɔ Jehowa ekimanyielo, nde ayɔsɛdingola etema awɔ ndo ayowasha nyuma kande k’ekila woshasha naka, l’ɛnyɛlɔ ka Jeremiya, ɔtɛkɛta ande wekɔ l’etema awɔ.—Luka 11:9-13; Etsha 15:8.
“Tanyodimake dja ya nyuma”
9. Kakɔna kakoka ndjofukutanya olimu wakamba nyuma k’ekila lo wahɔ wakiso?
9 Ɔpɔstɔlɔ Paulo akakɔkɔmiya ase Tɛsalɔnika ate: “Tanyodimake dja ya nyuma.” (1 Tɛsalɔnika 5:19, NW) Eelo, ditshelo ndo waonga wahɔtɔnɛ l’ɛlɛmbɛ wa Nzambi kokaka ndjofukutanya olimu wakamba nyuma k’ekila lo wahɔ wakiso. (Efeso 4:30) Ɛlɔ kɛnɛ, Akristo wekɔ l’ɔkɛndɛ wa sambisha lokumu l’ɔlɔlɔ. Sho mbɔsaka diɛsɛ sɔ la nɛmɔ efula. Hatokoke mamba woho ɔnɛ wɔnyɔla wanɛ waheye Nzambi olimu aso w’esambishelo. Ko naka Okristo odja olimu ande sawosawo la lolango lande ndamɛ, kete nde kokaka ndjodima dja ya nyuma ka Nzambi yatotshutshuya dia ntsha olimu ɔsɔ.
10. (a) Woho wɔsaso anyaso anto kokaka monga la shɛngiya yakɔna le so? (b) Naa kanyi y’ɔlɔlɔ yendana l’olimu aso yofundami lo 2 Koreto 2:17?
10 Anto amɔtshi wa l’andja w’etshumanelo k’Akristo kokaka fɔnya ɔnɛ olimu aso ele wa takahɛka anto ekanda eto ko pe. Akina mbeyaka ndjakesa lo mbuta ɔnɛ sho tshɔka lo luudu la luudu l’oyango wa tayangaka weshasha. Naka sho mbetawɔ dia tokanyi tɔsɔ ta kɔlɔ monga la shɛngiya lo dionga diaso, kete tɔ kokaka ndjokitshakitsha waasaso aso l’esambishelo. Lo dihole dia sho mbetawɔ tokanyi ta ngasɔ monga la shɛngiya le so, nyɛsɔ totetemale la mɛna akambo oko woho wawaɛna Jehowa nde la Yeso lo kɛnɛ kendana l’olimu aso. Ɔpɔstɔlɔ Paulo akɛnya dia nde aki la dionga sɔ lam’akandate ate: “Ne dia shu kema uku antu efula, wane watulanyaka diui dia [Nzambi], keli shu teko uku antu wa mete, uku wane wakatumama uma le [Nzambi], la lu ashu a [Nzambi], mbatutoteketaka le Kristu.”—2 Koreto 2:17.
11. Kakɔna kakakimanyiya Akristo wa ntondo dia tshikala la waasaso l’atei w’ɛhɛnyɔhɛnyɔ, ndo naa shɛngiya yahomba monga l’ɛnyɛlɔ kawɔ le so?
11 Yema tshitshɛ l’ɔkɔngɔ wa nyɔi ka Yeso, ambeki ande wa la Jerusalɛma wakakome l’etena k’ɛhɛnyɔhɛnyɔ. Vɔ wakawawanɛ ndo wakawatɛ di’aha sambisha. Koko, Bible mbutaka dia vɔ ‘wakalole la nyuma k’ekila ndo wakasambishaka ɔtɛkɛta waki Nzambi la dihonga.’ (Etsha 4:17, 21, 31) Ɛtɛkɛta wakatɛ Paulo Timɔtɛ ɛnɔnyi ɛmɔtshi engana l’ɔkɔngɔ wa lâsɔ mɛnyaka dionga di’ɔlɔlɔ diahomba monga l’Akristo. Paulo akate ate: “Ne dia [Nzambi] kuntusha utema a woma, keli ndi akatusha utema a wulu la wa ngandji ndu wa ndjakimela. Okone tukaki sonyi dia mvuta akambu wa Khumesu kuyanga akambu ami, dimi usi lukanu landi, keli usuwi [l’ɔkɔkɔ w]a lukumu l’ololo uku eli wulu a [Nzambi].”—2 Timote 1:7, 8.
Ahombaso mbisha anyaso anto?
12. Naa ɔkɔkɔ wa woke watotshutshuya dia sambisha lokumu l’ɔlɔlɔ?
12 Dia sho monga la dionga di’ɔlɔlɔ lo kɛnɛ kendana l’olimu aso, sho la dia monga l’eyango w’amɛna. Lande na kasambishaso? Ɔkɔkɔ woleki woke mɛnamaka l’ɛtɛkɛta ɛnɛ w’omembi w’esambo lakate ate: ‘Ekambi wakiyɛ wa kɔlamelo wayokotombola wɛ [Jehowa]. Vɔ wayosanyɛ anto dia lotombo la lowandji layɛ ndo dia nkudu kayɛ. Vɔ wayewoya ana w’anto elimu wakiyɛ wa mamba ndo lotombo la ngaingai ka lowandji layɛ.’ (Osambu 145:10-12) Eelo, sho sambishaka l’oyango wa tombola Jehowa lo sɛkɛ ndo kidia lokombo lande la ntondo k’anto tshɛ. Oyadi kânga anto angana ato mbatohokamɛ, woho wasambishaso losango la panda la kɔlamelo tshɛ mbishaka Jehowa lotombo.
13. Kakɔna katotshutshuya dia mbewoya anto akina elongamelo ka panda?
13 Sho sambishaka nto oma lo ngandji kokaso anto ndo dia mbewɔ onongo wa dikila. (Ezekiyele 33:8; Mako 6:34) Dikambo sɔ mbɔtɔnɛka l’ɛtɛkɛta waki Paulo wendana l’anto wele l’andja w’etshumanelo k’Akristo: “Dimi leko la dibasa le asi Ngirika ndu le asendji, le kanga a yimba, ndu le akanga a dinginya.” (Romo 1:14) Paulo akoke dia nde ekɔ la dibasa le anto, dibasa dia mbaewoya lokumu l’ɔlɔlɔ, nɛ dia lolango la Nzambi ele dia ‘weho w’anto tshɛ shimbamɛ.’ (1 Timote 2:4) Ɛlɔ kɛnɛ, tekɔ la ngandji ndo l’ɔkɛndɛ akɔ wâmɛ otsha le anyaso anto. Ngandji kele la Jehowa otsha le anto akôtshutshuya dia toma Ɔnande lanɛ la nkɛtɛ dia ndjavwɛ. (Joani 3:16) Ɔsɔ aki mɛtɛ olambo wa woke. Sho mbokoyaka ngandji ka Jehowa lo mbetsha wenya efula ndo lo mbidja weolo wa mbewoya anto akina lokumu l’ɔlɔlɔ la panda loki etshina l’olambo wa Yeso.
14. Ngande wakɔndɔla Bible anto wa l’andja w’etshumanelo k’Akristo?
14 Ɛmɛnyi wa Jehowa mbɔsaka anyawɔ anto oko anto wakoka koma atɔi amɔtshi wa lo nkumbo k’Akristo k’anto l’ɔnango. Sho la dia sambisha la dihonga, koko dihonga diaso kema dia mbidjana l’anto tamu. Mbala mɔtshi, Bible kambaka l’ɛtɛkɛta wa wolo lam’atɛkɛtatɔ di’anto wa l’andja ɔnɛ lo tshɛ kawɔ. Paulo kambaka la tshɛkɛta “andja” lo yoho ya kɔlɔ etena katɛkɛtande dia ‘lomba la l’andja ɔnɛ’ ndo ‘nsaki ya l’andja ɔnɛ.’ (1 Koreto 3:19; Tito 2:12) Paulo akohola nto Akristo w’ase Ɛfɛsɔ dia etena kakawakɛndakɛndaka ‘lo ndjela akambo wa l’andja ɔnɛ,’ vɔ waki ‘edo’ lo nyuma. (Efeso 2:1-3) Ɛtɛkɛta ɛsɔ ndo ekina wa woho ɔsɔ mbɔtɔnɛka l’ɛtɛkɛta waki ɔpɔstɔlɔ Joani w’ɔnɛ: ‘Andja w’otondo wekɔ l’ɛse ka lowandji la kanga kɔlɔ.’—1 Joani 5:19.
15. Lo kɛnɛ kendana l’anto wa l’andja w’etshumanelo k’Akristo, kakɔna kahatatshe, ndo lande na?
15 Koko, ohɔ di’ɛtɛkɛta ɛsɔ mendanaka l’andja ɔnɛ wamangana oma le Nzambi lo tshɛ kawɔ, koko aha l’onto ndo l’onto. Akristo hawɔfɔnya ɔfɔnyafɔnya ɔnɛ kapanda mbayetawɔ esambishelo kaso koko aha shisha ndjɛndɛ. Vɔ ndoko la djembetelo ɔtɔi ya mbɔsa anto amɔtshi oko waa mbudi. Sho kema la lotshungɔ la mbuta nganɛ wayeta akambo lam’ayoya Yeso dia ndjokakitola ‘ɛkɔkɔ’ la ‘mbudi.’ (Mateu 25:31-46) Yeso mbele shushi yakasɔnama; koko aha sho. Ndo nto, awui weta mɛnyaka dia kânga anto amɔtshi waki la lɔkɛwɔ loleki tshɛ kɔlɔ wakayetawɔka losango l’oma lo Bible, wakayotshikitanya nsɛnɔ yawɔ, ndo ndjokoma Akristo wele la lɔsɛnɔ la pudipudi. Koko, kânga mbahatakoke mbɔtɔ angɛnyi l’anto amɔtshi, sho hatohombe mengenga dia mbaewoya akambo wendana l’elongamelo ka Diolelo mbala tshɛ katanema diaaso. Afundelo tɛkɛtaka dikambo di’anto amɔtshi wele, kânga mbahawatonge ambetawudi ɔnɛ “wakasonwama lu lumu la pundju.” L’edjedja wonya vɔ ndjokomaka ambetawudi. (Etsha 13:48) Sho hatokoke mbeya pondjo ɔnɛ onto kapanda ayetawɔ losango laso naka tatawosambisha, mbala mɔtshi mbosambisha mbala efula. Lam’eso la kanyi shɔ l’ɔtɛ, sho kɛndakɛndaka la wanɛ wahatetawɔ losango la panda la yimba ya ‘lotutsha’ ndo mbaɔsaka la ‘nɛmɔ di’efula,’ l’elongamelo k’ɔnɛ amɔtshi l’atei awɔ mbeyaka ndjetawɔ losango la lɔsɛnɔ.—2 Timote 2:25; 1 Petero 3:15.
16. Naa ɔkɔkɔ ɔmɔtshi watotshutshuya dia monga la ‘yewo ya ndakanya’?
16 Naka sho monga l’akoka w’amɛna w’embetsha, kete tayohamia nsaki kaso k’efula ka mbewoya lokumu l’ɔlɔlɔ. Oko ɛnyɛlɔ: Mishiki kana kɛnyɔ mɔtshi y’ɔlɔ mbeyaka monga anyanya le onto ɔmɔtshi naka nde heye woho wayikɛnyawɔ. Koko le ɔnɛ leya woho wa poma mishiki akɔ kana wa kɛnya kɛnyɔ yakɔ, ɔsɔ mongaka dikambo di’ɔngɛnɔngɛnɔ. Yoho yakɔ yamɛ, Akristo wahamia ‘diewo dia mbetsha’ pamiyaka ɔngɛnɔngɛnɔ awɔ l’olimu. (2 Timote 4:2; Tito 1:9) Paulo akalake Timɔtɛ ate: ‘Yakimɔ le Nzambi oko onto lambolowana, ose olimu lahotshama sɔnyi kânga lo dikambo ɔtɔi, ndo lamanyamanya ɔtɛkɛta w’akambo wa mɛtɛ dimɛna.’ (2 Timote 2:15) Ngande wakokaso pamia akoka aso wa mbeya mbetsha na?
17. Ngande wakokaso ‘monga la nsaki k’efula’ ka kondja ewo ka Bible, ndo ngande wayôtokimanyiya ewo kɛsɔ l’olimu aso?
17 Yoho mɔtshi ele kondja ewo k’oshika ka lâdiko. Ɔpɔstɔlɔ Petero tokeketshaka ate: “Nyuyali uku ana wutshiwo kakiane. Nyulangi awele wa diui di’ololo diaha la lukesu, dia nyu mbula lu diui ne edja ndu nyayutana panda.” (1 Petero 2:2) Ɔna l’ashashi lele la demba dia wolo mbotɔka la saki k’efula ka nɔma awɛlɛ. Ɔnkɔnɛ, Okristo kokaka monga l’ohomba wa ‘ndjala la nsaki k’efula’ k’ewo k’oma lo Bible. Sho kokaka monga la nsaki k’efula k’ewo k’oma lo Bible lo monga la mbekelo y’ɔlɔlɔ ya wekelo ndo ya wadielo. (Tukedi 2:1-6) Naka sho nangaka koma embetsha w’eshika w’Ɔtɛkɛta waki Nzambi, kete sho pombaka mbidja weolo ndo ndjaekiya, ndo teye dia tayokondja wahɔ oma lo weolo ɛsɔ wayotodja. Ɔngɛnɔngɛnɔ waya oma lo sɛdingola Ɔtɛkɛta waki Nzambi wayotolodja la nyuma kaki Nzambi ndo wayotosha saki ka mbewoya anto akina akambo wekaso.
18. Ngande wakoka nsanganya y’Akristo tokimanyiya dia manyamanya ɔtɛkɛta w’akambo wa mɛtɛ dimɛna?
18 Nsanganya y’Akristo tokimanyiyaka nto dia mbeya kamba dimɛna l’Ɔtɛkɛta waki Nzambi. Etena kadiema avɛsa wa Bible wonya washama asawo wa lo sɛkɛ ndo ɔkɛtshanyelo okina w’oma l’Afundelo, ekɔ ɔlɔlɔ sho ndjela lo Bible yaso. Ekɔ dikambo dia yimba naka sho ndjela tenyi dia lo losanganya la yambalo tshɛ, mbidja ndo tenyi dialeka mendana l’olimu aso w’esambishelo. Tatɔnyɔlake pondjo bɛnyɛlɔ diasalema, mbala mɔtshi lo mbekola yimba l’awui akina. Lanɛ nto, tekɔ l’ohomba wa ndjaekiya ndo wa kanaka yimba ɔlɔlɔ. (1 Timote 4:16) Nsanganya y’Akristo keketshaka mbetawɔ kaso, tokimanyiyaka dia monga la nsaki k’efula k’Ɔtɛkɛta waki Nzambi, ndo tohokolaka dia monga apandjudi wa lokumu l’ɔlɔlɔ wele l’ohetoheto.
Sho kokaka nongamɛ ekimanyielo kaki Jehowa
19. Lande na ekɔ ohomba efula sambishaka mbala la mbala?
19 Akristo anɛ ‘wahɛtahɛta la nyuma’ ndo walomɔlomɔ dia mbewoya lokumu l’ɔlɔlɔ ntshaka tshɛ dia sambishaka mbala la mbala. (Efeso 5:15, 16) Ekɔ mɛtɛ dia, lɔsɛnɔ l’onto l’onto tshikitana, ndo aha anto tshɛ mbakoka mbetsha lofulo lamɛ la wenya l’olimu ɔsɔ washimbɛ nsɛnɔ y’anto. (Ngalatiya 6:4, 5) Ko kânga mbediɔ ɔsɔku, ondo aha lofulo la wenya letshaso l’olimu w’esambishelo mboleki ohomba koko woho watombaso mbala la mbala dia tewoya anto akina elongamelo kele laso. (2 Timote 4:1, 2) Lo yɛdikɔ yasambishaso efula, mbayotoleka mɛna nɛmɔ diele l’olimu aso. (Romo 10:14, 15) Tayonga la kɛtshi ndo la ngandji k’efula le anyaso, etena katshɔso mbala la mbala le anto wele l’etema w’ɛlɔlɔ wanɛ wele lo kuma akumu ndo waha l’elongamelo.—Ezekiyele 9:4; Romo 8:22.
20, 21. (a) Olimu akɔna wêke la ntondo kaso? (b) Ngande wasukɛ Jehowa weolo wadjaso?
20 Jehowa akatosha ɔkɛndɛ wa mbewoya lokumu l’ɔlɔlɔ. Ɔsɔ mbele ɔkɛndɛ wa ntondo wakatalongola oma le nde oko weso ‘anyande ekambi.’ (1 Koreto 3:6-9) Tekɔ lo nomɔlomɔ dia kotsha ɔkɛndɛ ɔsɔ wakatosha Nzambi l’anima aso tshɛ, lo yɛdikɔ yɛdimi l’akoka aso. (Mako 12:30; Romo 12:1) Anto efula wele la ndjala k’akambo wa mɛtɛ wekekɔ l’andja ɔnɛ. Têke l’olimu efula wa sala, koko sho kokaka nongamɛ ekimanyielo ka Jehowa naka tekɔ lo kamba olimu akɔ dimɛna.—2 Timote 4:5.
21 Jehowa toshaka nyuma kande ndo ‘yɔmbɔ ya nyuma,’ mbut’ate, Ɔtɛkɛta waki Nzambi. L’ekimanyielo kande sho kokaka dihola enyɔ aso ‘dia mbewoya la dihonga tshɛ akambo w’ekila wendana la lokumu l’ɔlɔlɔ.’ (Efeso 6:17-20) Anto wate lo dikambo diaso ɛtɛkɛta ɛnɛ wakafundɛ Paulo Akristo wa la Tɛsalɔnika w’ɔnɛ: “Ne dia lukumu l’ololo lakayi le nyu, aha la diui tu, keli ndu lu wulu wa [nyuma k’ekila], ndu la mbetawo ka wulu.” (1 Tesalonika 1:5) Eelo, nyɛsɔ tewoya lokumu l’ɔlɔlɔ l’ohetoheto tshɛ!
Ovuswelo wa lo hiembola
• L’ɔtɛ w’ekiyanu wa lɔsɛnɔ, kakɔna kakoka komɛ ohetoheto aso l’olimu w’esambishelo?
• Lo woho akɔna wahomba nsaki kaso ka mbewoya lokumu l’ɔlɔlɔ monga oko ‘dja yahɛta’ l’etema aso?
• Naa dionga dia kɔlɔ diahombaso mbewɔ lo kɛnɛ kendana l’olimu aso?
• Lo tshɛ, ngande wahombaso mbɔsa wanɛ wele bu laso mbetawɔ ɔtɔi?
• Ngande watokimanyiya Jehowa dia nama ohetoheto aso l’olimu w’esambishelo?
[Esato wa lo lɛkɛ 23]
Akristo mbokoyaka waasaso waki Paulo nde la Jeremiya
[Esato wa lo lɛkɛ 24]
Ngandji kokaso Nzambi la anyaso anto mbatotshutshuya dia monga la waasaso l’esambishelo