‘Nyɔhɛtɛhɛtɛ la nyuma’
1. Dui diakɔna diahomba ndeka mɛnama l’olimu aso w’esambishelo?
1 Ndoko dikambo ɔtɔi di’olimu aso w’Okristo diahombaso minya yimba. Lo dihole dia nsala ngasɔ, Bible tokeketshaka dia sho ‘mpɛtahɛta la nyuma’ ndo dia ‘nkambɛ Jehowa oko ɛhɔmbɔ.’ (Romo 12:11) Koko, ekɔ akambo efula wakoka nkitshakitsha ohetoheto aso l’olimu w’esambishelo. Ngande wakokaso ‘ntshutshuya oko dja’ ohetoheto ndo wangasanu aso l’olimu aso wa Diolelo?—2 Tim. 1:6, 7.
2. Ngande watokimanyiya wekelo wa Bible w’onto ndamɛ dia sho monga l’ohetoheto l’olimu w’esambishelo?
2 Wekelo wa Bible w’onto ndamɛ: Opandjudi wa Diolelo wa manamana ele ɔnɛ lalanga ɛlɛmbɛ wa Nzambi ndo lanandema efula l’akambo wa mɛtɛ wele lɔkɔ. (Osam. 119:97) Etena kekaso akambo wa mɛtɛ wa lo Bible lo wekelo aso wa Bible w’onto ndamɛ, dui sɔ munandaka etema aso ndo fudiaka ohetoheto aso. Ngandji kokaso Ɔnɛ lele Kiɔkɔ y’akambo wa mɛtɛ asɔ ndo nsaki kele la so ka mbewoya anto akina lokumu l’ɔlɔlɔ totshutshuyaka dia ntombola Nzambi ndo mbewoya lokombo lande lo sɛkɛ. (Heb. 13:15) Mbokɛmaka hwe dia nsambisha lokumu l’ɔlɔlɔ l’otema ɔtɔi mɛnyaka lowando l’efula lele la so lo nɛmɔ dialɔ.
3. Ngande wakoka nyuma kaki Nzambi monga la shɛngiya l’olimu aso w’esambishelo?
3 Tɔlɔmbɛ dia nkondja nyuma ka Nzambi: Hatokoke nkondja etombelo w’ɛlɔlɔ l’esambishelo oma lo wolo aso hita. Onto mongaka l’ohetoheto wa mɛtɛ etena ketawɔnde dia nɔmbwama la nyuma kaki Nzambi. (1 Pet. 4:11) Naka sho ndeka ndjasukanya la Ɔnɛ lele Kiɔkɔ ya ‘nkudu k’otamanya,’ kete nde ayotosha wolo wa lo nyuma dia sho nsambisha la dihonga tshɛ. (Is. 40:26, 29-31) Etena kaki ɔpɔstɔlɔ Paulo la ntondo k’ɔlɔshamelo l’olimu ande w’esambishelo, nde ‘akalongola ekimanyielo k’oma le Nzambi.’ (Etsha 26:21, 22) Nyuma k’ekila kaki Jehowa kokaka tokimanyiya dia sho monga l’ohetoheto l’olimu w’esambishelo, lâsɔ sho pombaka nɔmbaka dia kikondja.—Luka 11:9-13.
4. Monga l’ohetoheto kokaka monga l’etombelo w’ɛlɔlɔ akɔna, ndo ɔhɛmwɛlɔ akɔna watoshawɔ lo dikambo sɔ?
4 Mbala efula, monga l’ohetoheto w’efula l’olimu w’esambishelo ka Diolelo tshutshuyaka wanyaso Akristo dia vɔ lawɔ monga l’ohetoheto w’efula. (2 Kor. 9:2) Etena keso l’esambishelo, anto kokaka mbetawɔ losango laso naka sho ntɛkɛta la wangasanu ndo la dietawɔ. Koko, lâdiko dia ohetoheto wele la so, sho pombaka mongaka nshi tshɛ la ɔkɔmi ndo la memakana. (Tito 3:2) Tena tshɛ, sho salaka la wolo dia nɛmiya ompokami aso ndo nɛmiya lotshungɔ la nsɔna lele la nde.
5. Dako diakasambiyama diakɔna diahombaso nsala la wolo dia nkamba la diɔ?
5 Oko weso apandjudi wa Diolelo, nyɛsɔ ‘tɔhɛtahɛtake la nyuma’ nshi tshɛ. Nyɛsɔ tongake l’ohetoheto lo salaka wekelo wa Bible w’onto ndamɛ ndo lo nɔmbaka Jehowa l’etete, ɔnɛ lakoka tosha nyuma k’ekila. Naka sho sala ngasɔ, kete tayokamba olimu aso w’esambishelo “lu wulu wa nyuma k’[ekila], ndu la mbetawo ka wulu.”—1 Tes. 1:5.