Elongamelo ka eolwelo kekɔ mɛtɛ!
‘Lekɔ l’elongamelo le Nzambi . . . nte eolwelo kayonga.’—ETSHA 24:15.
1. Bonde kakokaso monga l’elongamelo lo eolwelo?
JEHOWA akatosha ɛkɔkɔ w’eshika wa monga l’elongamelo ka eolwelo. Ɔtɛkɛta ande totɛka dia wanɛ wakavu wayolɔ, mbut’ate wayonga la lɔsɛnɔ nto. Ndo sangwelo diakinde diendana la wanɛ woladi djɔ lo nyɔi diayokotshama ndoko onyake. (Isaya 55:11; Luka 18:27) Ndo Nzambi amboshilaka mɛnya nkudu kele lande ka mbolola wanɛ wakavu.
2. Ngande wakokaso kondja wahɔ oma l’elongamelo ka eolwelo?
2 Monga la mbetawɔ lo yɛdikɔ yaki Nzambi ya mbolola wanɛ wakavu lo tshimbo y’Ɔnande Yeso Kristo, kokaka tosukɛ lo tena di’ɔkɛi. Elongamelo ka eolwelo kokaka tokimanyiya nto dia nama kɔlamelo yaso le Shɛso lele l’olongo kânga la ntondo ka nyɔi. Lo mɛtɛ, elongamelo kaso ka eolwelo kayokeketshama naka sho sɛdingola ɛkɔndɔ ɛmɔtshi wa lo Bible wendana la eolwelo. Ahindo asɔ tshɛ wakasalema la wolo w’oma le Jehowa Nkum’Olongo.
Vɔ wakalongola wakiwɔ wakavu wakolɔ oma lo nyɔi
3. Nkudu kakɔna kakakondja Elidja lam’akavu ɔnaki wadi aki odo la la Zerefatɛ?
3 Lo ovuswelo wa dimɛna efula wendana la mbetawɔ kakɛnya ɛmɛnyi wa Jehowa wakasɛnaka la ntondo ka Kristo ndja la nkɛtɛ, ɔpɔstɔlɔ Paulo akafunde ate: “Amantu wakalungula asikawo wakavu, wakulwama uma lu nyoi.” (Heberu 11:35; 12:1) L’atei a wamato asɔ, ɔmɔtshi aki wadi aki odo l’ose wola lakadjasɛka la Finesiya l’osomba wa Zarefata. Lam’ele nde akalongola Elidja, omvutshi waki Nzambi, ufushi ande wa shima la esɔ kande koshila lo dihindo l’edja tshɛ kakonge ndjala ka kasha kotokoka mbôdiaka nde l’ɔnande. Lam’akayovɔka ɔnande, Elidja akawetamia lo tange, akalɔmbɛ, akayasembɛ lâdiko di’ɔna mbala shato, ko akasɛngasɛnga Nzambi ate: “[“Jehowa, Nzambi kami le,” NW], lambukosengasenga nti: Etawo lumu l’ona one nkalula.” Nzambi akasɛnya anima, mbuta ate lɔsɛnɔ, kawola nto lo demba dia yana ya hiami shɔ. (1 Khumi ya Dikanga 17:8-24) Ohokanyiya ɔlɔ wakahombe monga la wadi aki odo ɔsɔ lo woho wakafutama mbetawɔ kande oma lo eolwelo ka ntondo kɔkɔndwami lo Bible, eolwelo k’ɔnande la ngandji!
4. Dihindo diakɔna diakatshe Elisha la Shunɛma?
4 Womoto okina lakalongola lakinde lakavu diɛsɛ oma lo eolwelo akasɛnaka l’osomba wa Shunɛma. Nde aki wadi aki osombe ɔmɔtshi wa pami, nde akɛnya ngandji kande otsha le omvutshi Elisha kamɛ ndo l’ose olimu ande. Nde akayokondjaka ɔna oko difuto. L’ɔkɔngɔ w’ɛnɔnyi efula, nde akelɛ omvutshi lakande, koko omvutshi akatotanaka ɔnaki mama kɛsɔ amboshila la mvɔ lo luudu lande. L’ɔkɔngɔ w’Elisha nɔmba ndo sala ditshelo dimɔtshi, ‘demba di’ɔna diakamɛ pɛta yema yema.’ Nde ‘akatatɛ kashiya oko tena esambele, l’ɔkɔngɔ diko ɔna pami ɔsɔ akadihola washo ande.’ Aha la tamu, eolwelo kɛsɔ akasha mama kɛsɔ nde l’ɔnande ɔngɛnɔngɛnɔ wa woke. (2 Khumi ya Dikanga 4:8-37; 8:1-6) Vɔ mɛtɛ wayoyoleka ngɛnangɛna lam’ayowolwama oya lo lɔsɛnɔ la lanɛ la nkɛtɛ lo ‘eolwelo ka dimɛna efula,’ eolwelo kayoyowasha dikoka di’aha mvɔ nto pondjo! Dui sɔ totshutshuyaka dia monga la lowando le Jehowa, Nzambi ka ngandji kolola wanɛ wakavu!—Heberu 11:35.
5. Dihindo dimɔtshi diakasalema l’ɔkɔngɔ wa nyɔi kaki Elisha, ngande wendanadiɔ la nde?
5 Kânga l’ɔkɔngɔ wa Elisha mvɔ ndo wa vɔ mbokundɛ, Nzambi akasha weka ande nkudu l’ekimanyielo ka nyuma k’ekila. Sho mbadiaka ɔnkɔnɛ: “Lam’akatatshokaka [ase Isariyɛlɛ amɔtshi dia] ntukhunde pami kemotshi, wenyi ku ului [w’ase Mɔaba] omotshi w’alimbi one wayayi, ku vo wakakadja udu lu diumbu dia Elisha. Lam’akasakana [odo] la weka wa Elisha, pami kako akulo, akemala ndame.” (2 Khumi ya Dikanga 13:20, 21) Ande diambo ndo ɔngɛnɔngɛnɔ wakonge la pami kɛsɔ lee! Ohonyokanyiya ɔngɛnɔngɛnɔ wayonga laso lam’ayolwama wakiso wa ngandji oya lo lɔsɛnɔ lo ndjela sangwelo diaki Jehowa Nzambi diahakokaki kita tatala!
Ɔnaki Nzambi akolola wanɛ wakavu
6. Dihindo diakɔna diakatshe Yeso suke l’osomba wa Nayina, ndo shɛngiya yakɔna yakoka monga la dikambo sɔ le so?
6 Yeso Kristo, Ɔnaki Nzambi akatosha ɛkɔkɔ w’eshika wa sho mbetawɔ ɔnɛ wanɛ wakavu kokaka mbolwama, l’elongamelo ka ndjonga la lɔsɛnɔ la pondjo. Dui dimɔtshi diakatombe suke l’osomba wa Nayina kokaka tokimanyiya dia mbetawɔ ɔnɛ dihindo dia ngasɔ kokaka salema lo nkudu k’oma le Nzambi. Lushi lɔmɔtshi, Yeso akahomana l’anto wayalele wayɛmbɛ odo w’ɔlɔngɔlɔngɔ ɔmɔtshi oma l’osomba dia tôkundɛ. Nde aki ɔna ɛtɔi laki wadi aki odo ɔmɔtshi. Yeso akatɛ mama kɛsɔ ate: ‘Tshika ndela.’ Oma lâsɔ, nde akananda kaka y’odo ndo akate ate: “Olongo a pami, lambukutela nti: Eto.” Ɔlɔngɔ akɔ akasungukala ndo akamɛ tɛkɛta. (Luka 7:11-15) Dihindo sɔ mɛtɛ keketshaka mbetawɔ kaso k’ɔnɛ elongamelo ka eolwelo kekɔ dikambo dia mɛtɛ.
7. Kakɔna kakatombe lo kɛnɛ kendana l’ɔnaki Jariyo la womoto?
7 Tênde nto dikambo diaki Jariyo, owandji ɔmɔtshi w’ɔtɛmwɛlɔ wa la Kapɛrɛnauma. Nde akalɔmbɛ Yeso dia ndja lakande dia ndjokimanyiya nɛ dia ɔnande la womoto l’ɛnɔnyi 12 lakandokaka ngandji efula akonaka lomu. Kombet’edja, losango lakaye ɔnɛ ɔnakɔ amboshila la mvɔ Yeso akaketshaka Jariyo ɔnɛ lakasongotɔ demba la lonyangu dia nde monga la mbetawɔ, ko nde akatshu la nde lakande lɛnɛ akalelaka lemba l’anto. Vɔ wakɔlɛ lam’akawatɛ Yeso ate: “Ndi havwi, lu djo kendi.” Ɔna womoto ɔsɔ akavu mɛtɛ, koko Yeso aki suke la mɛnya di’anto kokaka mbolwama oya lo lɔsɛnɔ oko wakokawɔ memɔ oma lo djɔ ya baku. Nde akakimɛ ɔna womoto ɔsɔ lo lonya, ko akate ate: “Ona umuntu, eto.” Nde aketɔ mbala kakɔ ɔtɔi, ko “ambutshi ande wakambi” woho w’anyanya. (Mako 5:35-43; Luka 8:49-56) Aha la tamu, ase nkumbo ‘wayamba heyama’ lam’ayolɔ wakiwɔ wa ngandji wakavu oya lo lɔsɛnɔ lo paradiso ka lanɛ la nkɛtɛ.
8. Kakɔna kakatshe Yeso lo diombo diaki Lazaro?
8 Nshi nyɛi l’ɔkɔngɔ wa nyɔi ka Lazaro, mbakaye Yeso oya lo diombo diande ndo mbifola dive diaki lâdiko diadiɔ. L’ɔkɔngɔ wa nde nɔmba lo washo w’anto tshɛ dia vɔ mbeya ɔnɛ oma lo nkudu kaki Nzambi mbakandatshaka akambo, Yeso akate la dui dia wolo ate: “Lazaro, tumba!” Ko nde akatombe! Anya l’ekolo ande wakɔmbama l’ahɔndɔ wa diombo ndo elongi kande kakakombama la kitambala. Yeso akate ate: “Nyuwombole, [ndo nyotshike] atshu.” Lo mɛna dihindo sɔ, efula ka wanɛ wakaye dia ndjosamba akadiyɔ waki Lazaro, mbuta ate Mariya nde la Mata, wakonge la mbetawɔ le Yeso. (Joani 11:1-45) Shi ɔkɔndɔ ɔnɛ koshaka elongamelo k’efula ɔnɛ wakiyɛ wa ngandji wakavu mbeyaka mbolɔ oya lo lɔsɛnɔ l’andja w’oyoyo waki Nzambi?
9. Kakianɛ, bonde kakokaso ndjashikikɛ ɔnɛ Yeso kokaka mbolola wanɛ wakavu?
9 Lam’aki Joani Obatizanyi lo lokanu, Yeso akotomɛ losango lɔnɛ langɛnyangɛnya otema ate: “Akanga a tutshungu wambena, . . . edu wambulo.” (Mateu 11:4-6) Lam’ele Yeso akolola anto lam’akinde lanɛ la nkɛtɛ, nde kokaka mɛtɛ ntsha dikambo sɔ djekoleko l’etena kayande etongami ka wolo ka lo nyuma kambolongola nkudu oma le Nzambi. Yeso ekɔ ‘eolwelo la lɔsɛnɔ,’ ndo sho keketshamaka efula lo mbeya ɔnɛ kem’edja nto kete ‘wanɛ tshɛ wele lo waombo wohɔma wayoka dui diande ko wayotomba’!—Joani 5:28, 29; 11:25.
Eolwelo ekina wakeketsha elongamelo kaso
10. Ngande wakokayɛ kɔndɔla eolwelo ka ntondo kakasale ɔpɔstɔlɔ ɔmɔtshi?
10 Lam’akatome Yeso apɔstɔlɔ ande oko esambisha wa Diolelo, nde akate ate: “Nyululi edu.” (Mateu 10:5-8) Lo mɛtɛ, dia vɔ sala dikambo sɔ, wakahombe ndjaɛkɛ lo nkudu kaki Nzambi. La Jɔpa, l’ɔnɔnyi 36 T.D., Dɔrɔka (Tabita) womoto lakokaka Nzambi wɔma akalale djɔ lo nyɔi. L’atei w’etsha ande w’ɔlɔlɔ mbaki ndo ahɔndɔ wakandatɛlɛka wadi waki edo, wanɛ wakolele efula lam’akandavu. Ambeki wakalɔngɔsɔla demba diande dia mbokundɛ ko wakatomɛ ɔpɔstɔlɔ Petero dui, ondo dia nde ndjâsamba. (Etsha 9:32-38) L’ɔkɔngɔ wa tondja anto tshɛ waki lo luudu la ladiko, nde akalɔmbɛ, ko akate ate: “Tabita, eto!” Nde akadihola washo ande, akasungukala, akakimɛ Petero lo lonya ko Petero akawôlola. Eolwelo ka ntondo k’oma le ɔpɔstɔlɔ kɛsɔ akayotshutshuyaka anto efula dia koma ambetawudi. (Etsha 9:39-42) Tɔ toshaka nto ɔkɔkɔ okina wa monga l’elongamelo lo eolwelo.
11. Eolwelo kakɔna k’ekomelo kɔkɔndwami lo Bible?
11 Eolwelo k’ekomelo kɔkɔndwami lo Bible ele kɛnɛ kakasalema la Tɔrɔa. Lam’aki Paulo lɛkɔ lo lɔkɛndɔ lande la sato la misiɔnɛrɛ, nde akasha sawo diande dia lo sɛkɛ polo ndo la midi k’otsho. Lam’akinde l’ɔlɛmbɛlɔ, mbala mɔtshi, oma lo dungu di’efula k’atala wakahɛtaka ndo oma lo lomba tshimba l’efula k’anto kaki lo dihole dia losanganya, ɔlɔngɔlɔngɔ wakawelɛka Etukɔ akalale djɔ ya baku ko akakɔ oma lo didishi dia l’etajɛ wa sato. Vɔ ‘wakayɔtɔngana odo,’ koko aha oko onto lamboshisha ewo keto. Paulo akasembemala ndamɛ lâdiko dia Etukɔ, akokumbatɛ, ndo akatɛ anto ate: “Tanyudjaki lufungusu, ndi eki la lumu.” Paulo akalembetshiya dia lɔsɛnɔ l’ɔlɔngɔ a pami ɔsɔ lakakawola. Wanɛ waki lawɔ ‘wakakeketshama woho w’anyanya.’ (Etsha 20:7-12) Ɛlɔ kɛnɛ, ekambi waki Nzambi keketshamaka efula lo mbeya ɔnɛ angɛnyi awɔ w’edjedja wakakambaka lawɔ olimu waki Nzambi wayɛna woho wayokotshama elongamelo ka eolwelo kaki lawɔ deko aha nɛ.
Eolwelo ekɔ elongamelo k’oma ko mɔmbɔkɔmbɔla
12. Mbetawɔ kakɔna kakɛnya Paulo lam’akinde la ntondo ka Felika, Nguvɛrnɛrɛ ka la Rɔma?
12 Lam’akinde lo tuminadi la ntondo ka Felika, Nguvɛrnɛrɛ ka la Rɔma, Paulo akate ate: ‘Dimi mbetawɔka akambo tshɛ wofundami l’Ɛlɛmbɛ ndo wakafunde Amvutshi; ndo lekɔ l’elongamelo le Nzambi . . . k’ɔnɛ eolwelo k’anto w’ɔlɔlɔ la k’anto wa kɔlɔ oma lo nyɔi kayonga.’ (Etsha 24:14, 15) Ngande watɛkɛta tenyi dia l’Ɔtɛkɛta waki Nzambi, oko etenyi kendana l’‘Ɛlɛmbɛ,’ dikambo dia eolwelo k’oma l’edo na?
13. Bonde kakokaso mbuta ɔnɛ Nzambi akatɛkɛta dia eolwelo lo prɔfɛsiya ka ntondo kakandasha?
13 Nzambi ndamɛ akatɛkɛta dia eolwelo lam’akandasha prɔfɛsiya ka ntondo lo Ɛdɛna. Lam’akandadjaka ‘olui w’edjedja,’ welɛwɔ Satana Diabolo mananu, Nzambi akate ate: “Dimi layodja lohetsho lam’asayɛ la womoto, ndo lam’asa lɔtɔngɔ layɛ la lɔtɔngɔ lande. Nde ayokominola l’ɔtɛ ndo wɛ ayowolumata l’etshindji.” (Enyelo 12:9; Etatelo 3:14, 15, NW) Olumatamelo wa kanula ya womoto l’etshindji akalembetshiyaka odiakemelo wa Yeso Kristo. Naka Lɔtɔngɔ lɔsɔ mbakahombe ndjominola ɔtɛ waki olui l’ɔkɔngɔ, kete Kristo akahombe mbolwama oma l’edo.
14. Ngande wakokaso mbuta ɔnɛ Jehowa ekɔ ‘Nzambi aha ka wavɔ, koko ka wanɛ wasɛna’?
14 Yeso akate ate: “Keli wavo watulwamaka; ndu Mose akatenya dikambu diako lu ahuli wata dikambu dia dikumbu, lene akandeti Khumadiondjo ati: [Nzambi k’]a Abarahama, [ka] Isaka, [ndo Nzambi ka] Jakoba. Ndi kema [Nzambi k]a wavo, keli ndi eko [Nzambi k]a wasena, ne dia tshe weko la lumu le ndi.” (Luka 20:27, 37, 38; Etumbelu 3:6) Kânga mbakavu Abarahama, Isaka, la Jakɔba, sangwelo diaki Nzambi dia mbaolola diakikɔ mɛtɛ shika, diɔ diakɔ diakakoke mbuta Yeso ɔnɛ vɔ wekɔ oko wanɛ wele la lɔsɛnɔ.
15. Ɔkɔkɔ akɔna waki l’Abarahama wa mbetawɔ eolwelo?
15 Abarahama aki l’ɔkɔkɔ wa monga l’elongamelo lo eolwelo, nɛ dia lam’akawatshunde esombe efula nde la Sara ka wadiɛnde, ndo akawonge oko anto wambovɔ lo kɛnɛ kendana l’akoka wa diwotshi, Nzambi akôlola akoka awɔ wa diwutshi lo dihindo. Ɔsɔ aki oko eolwelo kɛmɔtshi. (Etatelu 18:9-11; 21:1-3; Heberu 11:11, 12) Lam’akonge ɔnawɔ, Isaka l’ɛnɔnyi oko 25, Nzambi akatɛ Abarahama dia nde mbôlambola ɔnande. Koko, kam’akalange Abarahama sembola lonya lande dia ndjaka Isaka, ondjelo waki Jehowa akekɛ lonya. Abarahama “aketawo ati: [Nzambi] eko la wulu wa mbulula [Isaka] kuyanga wane wakavu; uma loko mbakandûlungula uku djimbitelu.”—Heberu 11:17-19; Etatelu 22:1-18.
16. Abarahama akongɛnde lam’ende kakianɛ lo djɔ lo nyɔi?
16 Abarahama aki l’elongamelo ka ndjôlɔ lo ɛlɔmbwɛlɔ kaki Mɛsiya, Lɔtɔngɔ lakalakema. Oma lo dihole dia woke diaki lande la ntondo ka nde ndjotɔ oko onto, Ɔna Nzambi akɛnyi mbetawɔ kaki Abarahama. Lam’akinde oko onto, Yeso Kristo akatɛ ase Juda ate: “Tshenyu Abarahama akangenangena dia mena lushi lami.” (Joani 8:56-58; Tukedi 8:30, 31) Ɛlɔ kɛnɛ Abarahama ndala djɔ lo nyɔi, akongɛ eolwelo ka lo lɔsɛnɔ la lanɛ la nkɛtɛ l’ɛlɔmbwɛlɔ ka Diolelo diaki Mɛsiya waki Nzambi.—Heberu 11:8-10, 13.
Djembetelo oma l’ɛlɛmbɛ ndo oma l’esambo
17. Ngande watɛkɛta ‘awui wa l’Ɛlɛmbɛ’ dia eolwelo ka Yeso Kristo?
17 Elongamelo ka eolwelo kaki la Paulo kakɔtɔnganɛka l’‘akambo wakafundama l’Ɛlɛmbɛ.’ Nzambi akatɛ ase Isariyɛlɛ ate: “Kanyelaki ekanda k’olonga ka dinela dianyu le olombedi. [Ndo lo Ngɔndɔ ka Nisana 16] ndi ayetshetsha ekanda kako la ntundu ka [Jehowa], dia to nungwama dikambu dianyu.” (Akambu w’Asi Lewi 23:9-14) Ondo aha la mbohɛ ɔlɛmbɛ ɔsɔ, Paulo akafunde ate: “Keli kakiane Kristu ambulwama uma lu nyoi, ndi keli olonga a wane wakavu.” Oko “olonga,” Yeso akolwama lo Ngɔndɔ ka Nisana 16, 33 T.D. L’ɔkɔngɔ diko, lo wôngelo wakinde, mbayonga eolwelo k’‘elowa wa l’ɔkɔngɔ,’ mbut’ate, k’ambeki w’akitami wa nyuma.—1 Koreto 15:20-23; 2 Koreto 1:21; 1 Joani 2:20, 27.
18. Ngande wakɛnya Petero dia eolwelo ka Yeso kambotatamaki lo Esambo?
18 Esambo nto sukɛka kanyi ya eolwelo. Lo lushi la Pɛntɛkɔsta ka l’ɔnɔnyi wa 33 T.D., ɔpɔstɔlɔ Petero akavusola ɛtɛkɛta wa l’Osambu 16:8-11, lo mbuta ate: Davidi mbutaka lo dikambo dia [Kristo] ate: “Latukitshaka [Jehowa] la ntundu kami nshi tshe. Lam’atunduyalaka lu lunya lami la pami, dimi hatudidimaka la woma. Utema ami atongenangenaka otekoya. Okone khum’utema kami atuyalaka l’ongenongeno, ndu dimba diami diatuyalaka la elamelu. We hutshika utema ami lu Dihuli di’Edu, kuyanga mbetawo ulangimi aye mena [“ɛhɔndɛlɔ,” NW ].” Petero akate nto ate: ‘[Davidi] akɛnyi edja efula la ntondo ndo akatɛkɛta dia eolwelo ka Kristo, ate nde kotshikala l’odimu a pɛngando ndo demba diande kɔpɔnda. Yeso yakɔ shɔ, Nzambi akawolola oma lo nyɔi.’—Etsha 2:25-32.
19, 20. Etena kakɔna kakavusola Petero ɛtɛkɛta wa l’Osambo 118:22, ndo ngande wakendanaka ɛtɛkɛta ɛsɔ la nyɔi ndo la eolwelo ka Yeso?
19 L’ɔkɔngɔ wa nshi mɔtshi tsho, Petero akemala la ntondo k’ase Luudu la Sheke l’ase Juda ko akavusola ɛtɛkɛta wakafundama lo Esambo. Lam’akawawombola woho wakandakɔnɔla kanga djɔmbɔ laki ekuse, ɔpɔstɔlɔ ɔsɔ akate ate: “Nyu tshe nyeyi, ndu asi Isariyele tshe, nyati: Lu lukumbu la Jesu Kristu y’usi Nazareta, lakanyadiaki lu utamba wa [asui] lakulula [Nzambi] uma lo nyoi, ne dia lukumbu lone mbemadi untu one la ntundu kanyu. Panda kema le untu ukina. Nduku lukumbu lukina la tshina di’ulungu lamboyama le antu, leya ntushimbela.”—Etsha 4:10-12.
20 Lanɛ Petero ambovusola kɛnɛ kakatama l’Osambu 118:22, lo kamba l’ɛtɛkɛta ɛsɔ dikambo dia nyɔi ndo dia eolwelo kaki Yeso. Lo shɛngiya y’ewandji w’ɛtɛmwɛlɔ, ase Juda wakakadja Yeso. (Joani 19:14-18; Etsha 3:14, 15) ‘Woho wakakadja ambiki wa luudu dive,’ akayokonyaka lo nyɔi ka Kristo, koko ‘dive diamboyokoma ɔtɛ wa tshuku’ mbut’ate eolwelo kande otsha lo lotombo la nyuma l’olongo. Oko wakatâditshi omembi w’esambo: “Dikambu ne diambutshama uma le [Jehowa].” (Osambu 118:23) Mbetɛ ‘dive’ Ɔtɛ wa tshuku kɛdikɛdi mbotombola oko Nkumekanga Kambɔsɔnama.—Efeso 1:19, 20.
Wakakeketshama diɛsɛ oma l’elongamelo ka eolwelo
21, 22. Elongamelo kakɔna kaki la Jɔbɔ lo ndjela kɛnɛ kɔkɔndwami lo Jobo 14:13-15, ndo ngande wakokatɔ keketsha wanɛ wambovusha ɛlɔ kɛnɛ?
21 Kânga mbele shamɛ tatɛnaka eolwelo k’onto ndoko lushi, ɛkɔndɔ wa lo Bible wambotɔsɛdingola, wambotoshikikɛ dikambo dia eolwelo. Ɔnkɔnɛ, sho kokaka monga l’elongamelo kaki la Jɔbɔ, onto ɔlɔlɔ. Lam’akinde l’asui nde akalɔmbɛ ate: “[Jehowa le] utuyetawo mbishemi lu Dihuli di’Edu, utuyetawo namami lu usheshe, edja ndu lam’ambukitakita kele kaye, utuyetawo nshikike etena ka we mbuhomi li! Undi, naka untu ambuvo, ndi ayulumba ntu? . . . We ayumbeta, ku dimi layuketawo; we ayukaka ulimu w’anya aye ketshi.” (Jobo 14:13-15) Nzambi ‘ayoka olimu w’anya ande kɛtshi,’ nɛ dia nde ekɔ la saki k’efula ka mbolola Jɔbɔ. Dikambo sɔ toshaka mɛtɛ elongamelo!
22 Ose nkumbo ɔmɔtshi loka Nzambi wɔma kokaka nkɔ baka la hemɔ, oko waki Jɔbɔ ndo tɔ kokaka mbala mɔtshi mbokonya polo ndo lo nyɔi, ɔnɛ lele otunyi aso sho tshɛ. Aha la taamu, wanɛ wambovusha mbeyaka kɛdia asɔi wa lonyangu, oko wakalele Yeso lam’akavu Lazaro. (Joani 11:35) Koko, ekɔ mɛtɛ tshondo y’ekeketshelo dia mbeya ɔnɛ Nzambi ayeta wanɛ wele kombo yawɔ yekɔ lo wɔɔngɔ wakinde ko vɔ wayetawɔ. Ayonga oko vɔ wambokawola oma lo lɔkɛndɔ lɔmɔtshi, aha la monga l’alemba wa hemɔ kana wa kɔnyangakɔnyanga, koko l’alemba w’amɛna.
23. Ngande wakɛnya anto amɔtshi mbetawɔ kawɔ l’elongamelo ka eolwelo?
23 Nyɔi k’osombe ɔmɔtshi wa kɔlamelo w’Okristo akatshutshuya anyande ambetawudi dia mbofundɛ ɔnɛ: “Tambolanga kahana lanyu kandji kokanyu lo nyɔi ka mama kanyu. Hateta ndoko edja, tayowolongola nto la demba dia dimɛna efula ndo dia wolo!” Ambutshi wakavusha ɔnawɔ wakate vate: “Tekɔ lo kongɛ l’asolo walɔmɔlomɔ lushi layolɔ Jason! Nde ayoshishima, ko ayɛna Paradiso kakandakombolaka. . . . Wanɛ wakawokaka ngandji l’atei aso wayɔngɛnangɛna monga lɛkɔ ndo vɔ lawɔ.” Eelo, sho mɛtɛ kokaka monga la lowando lo mbeya ɔnɛ elongamelo ka eolwelo ekɔ dikambo dia mɛtɛ!
Ngande wayoyokadimola?
• Ngande wokokiso kondja ekimanyielo lo monga la mbetawɔ lo yɛdikɔ yaki Nzambi ya mbolola wanɛ wakavu?
• Naa awui amɔtshi wofundami l’Afundelo watosha ɔkɔkɔ wa monga l’elongamelo lo eolwelo?
• Lande na kakokaso mbuta ɔnɛ eolwelo ekɔ elongamelo kaya edja efula?
• Elongamelo kakɔna kakokaso monga latɔ lo kɛnɛ kendana la wanɛ wakavu?
[Osato wa lo lɛkɛ 10]
Oma lo nkudu k’oma le Jehowa, Elidja akolola ɔnaki wadi aki odo
[Osato wa lo lɛkɛ 12]
Lam’akolola Yeso ɔnaki Jariyo la womoto, ambutshi ande wakambe woho w’anyanya
[Osato wa lo lɛkɛ 15]
Lo lushi la Pɛntɛkɔsta ka l’ɔnɔnyi 33 T.D., ɔpɔstɔlɔ Petero akasambisha la dihonga tshɛ ɔnɛ Yeso akolwama oma l’edo.