Sango diaso di’oshinga wolo—alembetshiyadiɔ le yɛ?
“Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.”—MATEU 25:34.
1. Naa weho wa diangɔ walongola anto oko sango na?
ANTO tshɛ wekɔ la diangɔ dimɔtshi diakawakite oko sango. Le amɔtshi, sango diawɔ mbeyaka monga lomombo la l’emunyi. Le akina diɔ mbeyaka monga lɔsɛnɔ la wola. Esangɔ ɛmɔtshi, l’ɔkɔkɔ wa kɛnɛ kakawɛnyi kana kakawoke, nɔnga yakete yakatshikɛ nɔnga ya nshi nyɛ lohetsho l’efula otsha le kabila kekina. Koko, ekɔ ɛngɔ kɛmɔtshi kakatakite sho tshɛ. Sho tshɛ takalongola sango dia pɛkato oma le pami ka ntondo, mbut’ate, oma le Adama. Sango sɔ tɔlaka otsha lo nyɔi.—Undaki 9:2, 10; Romo 5:12.
2, 3. Naa sango diakakitsha Jehowa l’etatelo dikambo di’ana waki Adama nde la Eva, ndo lande na kakiwɔ kodikita?
2 Oko wende Shɛso ka ngandji lele l’olongo, Jehowa akasha anto sango dimɔtshi dia dimɛna efula oma k’etatelo, sango diakɔ ko: lɔsɛnɔ la pondjo la kokele lo Paradiso. Ambutshi aso wa ntondo, Adama la Eva, wakalongola etatelo ka kokele, kaha la pɛkato. Jehowa Nzambi akasha anto Nkɛtɛ kɛnɛ oko woshasha. (Osambu 115:16) Nde akalɔngɔsɔla ekambɔ k’Ɛdɛna oko ɛnyɛlɔ ka woho wotokoka koma nkɛtɛ k’otondo ndo akasha ambutshi aso wa ntondo olimu wa diambo ndo wa dimɛna efula. Vɔ wakahombe mbota ana, nɔngɔsɔlaka nkɛtɛ kâmɛ ndo weho w’etamba la wa nyama tshɛ ya lɔkɔ, ndo nanula Paradiso dia tɔ kokanɛ lo nkɛtɛ k’otondo. (Etatelu 1:28; 2:8, 9, 15) Anawɔ wotoyokamba olimu akɔ wamɛ ɔsɔ. Ɔsɔ ekɔ mɛtɛ sango dia dimɛna efula diakawahombe mbisha anawɔ!
3 Koko, dia vɔ ngɛnangɛna l’akambo asɔ tshɛ, Adama la Eva kâmɛ ndo anawɔ wakahombe monga la diɔtɔnganelo di’ɔlɔlɔ vɔ la Nzambi. Vɔ wakahombe mboka Jehowa ngandji ndo monga l’okitanyiya le nde, koko Adama la Eva kɔngɛnangɛna kɛnɛ kakawasha Nzambi ndo wakahindola ɛlɛmbɛ wakinde. Vɔ wakashisha Paradiso kawɔ ndo elongamelo ka diambo kakakitsha Nzambi la ntondo kawɔ. Ɔnkɔnɛ, vɔ kokoka tshikɛ anawɔ Paradiso ndo elongamelo kɛsɔ ka diambo.—Etatelu 2:16, 17; 3:1-24.
4. Ngande wakokaso kita sango diakashisha Adama?
4 Oma lo kɛtshi kande, Jehowa akɔshi yɛdikɔ woho w’ana waki Adama la Eva monga la diaaso dia nongola sango diakashisha Adama. Yoho yakɔna na? L’etena kakashikikɛ Nzambi, Yeso Kristo Ɔnande hita, akakimɔ lɔsɛnɔ lande la kokele lo dikambo di’ana waki Adama. Lo yoho shɔ mbakâsombe Kristo vɔ tshɛ. Koko, ekɔ akambo amɔtshi wahombawɔ sala dia vɔ kondja sango sɔ. Vɔ pombaka mbetawɔma le Nzambi, koko dia vɔ mbetawɔma le nde, vɔ la dia monga la mbetawɔ lo nɛmɔ di’olambo waki Yeso wawaɛdia oma lo pɛkato ndo mɛnya mbetawɔ kakɔ oma l’okitanyiya awɔ. (Joani 3:16, 36; 1 Timote 2:5, 6; Heberu 2:9; 5:9) Onde yoho yayɛ ya lɔsɛnɔ mɛnyaka dia wɛ ngɛnangɛnaka yɛdikɔ shɔ?
Sango diakawasha anto oma lo tshimbo y’Abarahama
5. Ngande wakɛnya Abarahama dia nde akɔsaka diɔtɔnganelo diaki lam’asande la Jehowa la nɛmɔ?
5 L’oyango wa kotsha sangwelo diande diendana la nkɛtɛ, Jehowa akakɛndakɛnda l’Abarahama lo yoho mɔtshi ya lânde. Jehowa akalɔmbɛ pami kɛsɔ ka kɔlamelo dia tshika wodja ande ko tshɔ lo nkɛtɛ yayondowɛnya. Abarahama akakitanyiya dui sɔ la lolango lande ndamɛ. L’ɔkɔngɔ w’Abarahama koma lɛkɔ, Jehowa akate dia aha otondo w’Abarahama mbayokita nkɛtɛ kɛsɔ oko sango koko tokanula tande mbakahombe ndjikita. (Etatelu 12:1, 2, 7) Ngande wakasale Abarahama na? Nde aketawɔ dia kambɛ Jehowa oyadi dihole diakɔna diakandahombe mbôtoma ndo Nzambi akakongɛ akambo woho w’anande ndjolongola sango diawɔ. Abarahama akakambɛ Jehowa lo wodja w’angɛndangɛnda ɛnɔnyi 100 w’etondo polo ndo lo nyɔi kande. (Etatelu 12:4; 25:8-10) Onde wɛ otokoka sala dikambo dia ngasɔ? Jehowa akate di’Abarahama aki ‘ɔngɛnyi’ wakinde.—Isaya 41:8.
6. (a) Kakɔna kakɛnya Abarahama lam’akandetawɔ dia nambola ɔnande? (b) Naa sango di’oshinga wolo diakakoke Abarahama tshikɛ tokanula tande?
6 Abarahama akakonge ɛnɔnyi efula la ntondo ka nde ndjôta Isaka, ɔnande la ngandji efula. Lam’akakome ɔn’ɔsɔ ɔlɔngɔ wa pami, Jehowa akatɛ Abarahama dia mbolambolande oko olambo. Abarahama kombeyaka dia nde ayanga mɛnya kɛnɛ kayoyotsha Nzambi ndamɛ lo kimɔ Ɔnande oko olambo; koko nde akakitanyiya kɛnɛ kakawawotɛ ndo lam’akinde suke la nambola Isaka, ondjelo waki Jehowa akayoshimbaka. (Etatelu 22:9-14) Lâsɔ ko Jehowa ambotataki edja efula la ntondo ɔnɛ alaka wakinde le Abarahama wayokotshama oma lo tshimbo y’Isaka. Ɔnkɔnɛ, Abarahama aki la mbetawɔ ɔnɛ, naka ekɔ ohomba, Nzambi ayokoka mbolola Isaka oma lo nyɔi, kânga mbele polo ndo l’etena kɛsɔ ko dikambo dia ngasɔ diatasalemaka. (Etatelu 17:15-18; Heberu 11:17-19) Lam’ele Abarahama kotona dia nambola tshondo y’ɔnande, Jehowa akate ate: ‘Oma lo tshimbo ya lɔtɔngɔ layɛ mbayɔtshɔkwama wedja tshɛ wa la nkɛtɛ.’ (Etatelu 22:15-18) Dikambo sɔ diakɛnya dia Lɔtɔngɔ la l’Etatelu 3:15, mbut’ate, Mɛsiya otshungudi, akahombe ndja oma l’ɔlɔndji waki Abarahama. Ɔsɔ mɛtɛ ekɔ sango di’oshinga wolo dia tshikɛ anto!
7. Ngande wakɛnya Abarahama, Isaka, la Jakɔba dia vɔ wakɔsaka sango diawɔ la nɛmɔ?
7 Abarahama kombeyaka kitshimudi ya kɛnɛ kakahombe Jehowa ndjotsha l’ɔkɔngɔ; kâmɛ ndo Isaka kana okana wakinde Jakɔba, wakayokomaka ‘ekitɔ kâmɛ la nde wa daka diakɔ diamɛ.’ Koko vɔ tshɛ waki la mbetawɔ le Jehowa. Vɔ kondjakakatanya kânga la diolelo ɔtɔi dia l’osomba wakawadjasɛ nɛ dia vɔ wakalongamɛka ɛngɔ kɛmɔtshi ka dimɛna efula—“usumba weli la tshina dia wulu, [wele Nzambi] keli umbeki la olongosodi awo.” (Heberu 11:8-10, 13-16) Koko, aha tokanula t’Abarahama tshɛ mbakangɛnangɛna nɛmɔ diaki la sango diakawahombe kita oma lo tshimbo y’Abarahama.
Amɔtshi l’atei a wanɛ wakɔnyɔla sango sɔ
8. Ngande wakɛnya Esau dia nde kɔmbɔsa sango diande dia lo nyuma di’oshinga wolo la nɛmɔ?
8 Esau, ɔnaki Isaka l’enondo, kɔmbɔsa diɛsɛ diande di’ɔn’enondo la nɛmɔ. Nde kɔmbɔsaka akambo w’ekila la nɛmɔ. Lushi lɔmɔtshi lam’aki Esau la ndjala, nde akasondja Jakɔba y’ɔnango diɛsɛ diande di’ɔn’enondo. L’ɔkɔkɔ w’ɛngɔ kakɔna na? Nde akadiengɔnya la mapa ndo la yema y’osawo wa bela! (Etatelu 25:29-34; Heberu 12:14-17) Wodja wakalake Nzambi Abarahama wakahombe ndjokotshama oma le Jakɔba, ɔnɛ lele Nzambi akayowoshaka lokombo la Isariyɛlɛ. Sango dia lânde sɔ akawasha waaso akɔna na?
9. L’ɔtɛ wa sango diawɔ dia lo nyuma, etshungwelo kakɔna kakakondja ana wa Jakɔba, kana w’Isariyɛlɛ na?
9 L’etena kɛmɔtshi kaki ndjala ka kasha, Jakɔba la nkumbo kande wakonɔ otsha l’Edjibito. Vɔ wakatofulanɛka lɛkɔ ndo koma efula ka mamba, koko wakatokomaka nto ɛhɔmbɔ lo wodja ɔsɔ. Koko, Jehowa kombohɛ sheke yakandadje nde l’Abarahama. L’etena kakashikikɛ Nzambi, nde akayotshungolaka ana w’ase Isariyɛlɛ oma lo fumbe ndo akawatɛ dia nde ayanga mbaɔtshiya lo ‘nkɛtɛ yakɛlanɛ awɛlɛ l’osanga,’ nkɛtɛ yakandalake Abarahama.—Etumbelu 3:7, 8; Etatelu 15:18-21.
10. L’Okongo wa Sinai, naa dikambo dikina nto dia diambo diendana la sango diaki ana w’ase Isariyɛlɛ diakatombe na?
10 Lam’akatatshɔka ana w’Isariyɛlɛ otsha lo Nkɛtɛ ya Daka, Jehowa akâtshumanya l’Okongo wa Sinai. Lɛkɔ, nde akawatɛ ate: “Naka nyayulunga diui diami, ndu nyayulama daka diami, nyu nyayuyala wudja ami l’atei a wedja tshe, ne dia kete tshe yele yami. Nyu nyayuyala diulelu di’elombedi ndu wudja w’ekila le mi.” (Etumbelu 19:5, 6) L’ɔkɔngɔ wa vɔ tshɛ mbetawɔ dikambo sɔ la lolango lawɔ, Jehowa akamɛ mbasha Ɛlɛmbɛ ande, dikambo diakinde kotsha otsha le wedja ekina.—Osambu 147:19, 20.
11. Naa diangɔ dimɔtshi di’oshinga wolo diaki l’atei wa sango dia lo nyuma diaki l’ana w’ase Isariyɛlɛ?
11 Wodja w’oyoyo ɔsɔ wakakondja mɛtɛ sango dia lo nyuma dia dimɛna efula! Vɔ wakatɛmɔlaka Nzambi kâmɛ ka mɛtɛ. Nde akâtshungola oma l’Edjibito ndo wakɛnyi akambo wa wɔma efula la washo awɔ lam’akawalongola Ɛlɛmbɛ l’Okongo wa Sinai. Sango diawɔ diakayoleka pama lam’akawayolongola ‘awui akina w’ekila waki Nzambi’ oma lo tshimbo y’amvutshi. (Romo 3:1, 2) Vɔ wakasɔnama oma le Nzambi dia monga ɛmɛnyi wakinde. (Isaya 43:10-12) Mɛsiya, ɔnɛ laki Lɔtɔngɔ akahombe tomba oma lo wodja awɔ. Ɛlɛmbɛ wakatɛkɛta dikambo diakinde, wakahombe mbeyanya Mɛsiya, ndo nkimanyiya ase Isariyɛlɛ dia mbeya ohomba wa lɔtɔngɔ lɔsɔ. (Ngalatiya 3:19, 24) Ndo nto, vɔ wakahombe kondja diaaso dia kamba kamɛ la Mɛsiya mbut’ate Lɔtɔngɔ lɔsɔ oko diolelo di’ɛlɔmbɛdi ndo oko wodja w’ekila.—Romo 9:4, 5.
12. Kânga mbakawɔtɔ lo Nkɛtɛ ya Daka, kakɔna kaki kokondja ase Isariyɛlɛ? Lande na?
12 L’oyango wa kotsha daka diande, Jehowa akalɔmbɔla ase Isariyɛlɛ otsha lo Nkɛtɛ ya Daka. Koko, oko wakayodilembetshiyaka ɔpɔstɔlɔ Paulo l’ɔkɔngɔ, wodja ɔsɔ komonga la mbetawɔ, diakɔ diaki nkɛtɛ ya daka kombaongɛ mɛtɛ ‘dihole dia mumuya.’ Lo tshɛ kawɔ, vɔ kɔmbɔtɔ lo ‘mumuya kaki Nzambi,’ nɛ dia vɔ koshihodia ndo kokamba lo yoho yɔtɔnganɛ la sangwelo dia lushi laki Nzambi la mumuya lakamɛ l’ɔkɔngɔ wa Adama la Eva tongama.—Heberu 4:3-10.
13. Kakɔna kakashisha wodja w’Isariyɛlɛ lo woho wakiwɔ kɔmbɔsa sango diawɔ dia lo nyuma la nɛmɔ?
13 Ase Isariyɛlɛ wa lôtɔ wakakoke kotsha lofulo la wanɛ wakahombe monga kâmɛ la Mɛsiya lo Diolelo diande dia l’olongo oko diolelo di’ɛlɔmbɛdi ndo wodja w’ekila. Koko vɔ kɔmbɔsa sango diawɔ sɔ di’oshinga wolo la nɛmɔ. Paka atɔi ato l’atei w’ase Isariyɛlɛ wa lôtɔ mbaketawɔ Mɛsiya lam’akandaye. Diakɔ mbele, yema tshitshɛ tsho mbakayongaka lo diolelo di’ɛlɔmbɛdi diakalakema. Wakakɔsɔla ase Isariyɛlɛ wa lôtɔ Diolelo ndo ‘wakadisha wodja watɔ elowa adiɔ.’ (Mateu 21:43) Naa wodja ɔsɔ na?
Sango dimɔtshi dia l’olongo
14, 15. (a) L’ɔkɔngɔ wa nyɔi ka Yeso, ngande wakatshɔkwama wedja oma lo tshimbo ya ‘lɔtɔngɔ’ laki Abarahama? (b) Sango diakɔna dialongola ‘Isariyɛlɛ waki Nzambi’?
14 Wodja ɔnɛ wakawasha Diolelo aki ‘Isariyɛlɛ waki Nzambi,’ mbut’ate Isariyɛlɛ wa lo nyuma, wokengami l’ambeki 144 000 waki Yeso Kristo wakotɔ lo nyuma. (Ngalatiya 6:16; Enyelo 5:9, 10; 14:1-3) Amɔtshi l’atei w’anto 144 000 waki ase Juda wa lôtɔ, koko efula l’atei awɔ wakasɔnama oma l’atei w’ase Wedja. Lo yoho shɔ mbakamɛ kotshama daka diaki Jehowa otsha le Abarahama di’ɔnɛ wedja tshɛ wayɔtshɔkwama oma lo tshimbo ya ‘lɔtɔngɔ’ lande. (Etsha 3:25, 26; Ngalatiya 3:8, 9) Lo ekotshamelo kɛsɔ ka ntondo ka daka sɔ, ase wedja wakakitama esɔ ka nyuma k’ekila ndo wakotama oma le Jehowa Nzambi oko anande wa lo nyuma, anango Yeso Kristo. Ngasɔ, mbakawayokomaka vɔ lawɔ etenyi ka hende ka ‘lɔtɔngɔ.’—Ngalatiya 3:28, 29.
15 La ntondo ka nyɔi kande, Yeso akadje sheke y’oyoyo l’ase Juda asɔ wa lo wodja w’oyoyo, sheke yakahombe ndjoshikikɛma oma lo dikila diande hita. Oma lo mbetawɔ kawɔ l’olambo ɔsɔ, mbakahombe wanɛ wakɔtɔ lo sheke shɔ koma ‘kokele lo pondjo.’ (Heberu 10:14-18) Vɔ wakakoke ‘nyindjama’ ndo kondja edimanyielo ka pɛkato yawɔ. (1 Koreto 6:11) Ɔnkɔnɛ, lo yoho shɔ mbayawɔ oko waki Adama la ntondo ka nde sala pɛkato. Koko, aha dia vɔ sɛna lo paradiso ka lanɛ la nkɛtɛ. Yeso akate dia nde akatatshɔka dia talɔngɔswɛ dihole l’olongo. (Joani 14:2, 3) Vɔ wakatshike akambo wakawalongamɛka lanɛ la nkɛtɛ dia vɔ ‘tɔhɛna kɛnɛ kakawawaombɛ l’olongo.’ (1 Petero 1:4) Ko ayowototsha lɛkɔ na? Yeso akawatɛ ate: ‘Lambodja lanyu sheke . . . dikambo dia diolelo.’—Luka 22:29.
16. Naa olimu wa dimɛna efula wakongɛ Akristo w’akitami w’esɔ?
16 L’atei w’akambo efula wayosala wanɛ wayolɛ kâmɛ la Kristo l’olongo, mbayonga ndo wonyelo wa wanɛ tshɛ watɔmbɔkwɛ lowandji laki Jehowa lanɛ la nkɛtɛ. (Enyelo 2:26, 27) Oko wewɔ etenyi kahende ka lɔtɔngɔ la lo nyuma laki Abarahama, vɔ wayosha lonya dia mbela anto wa lo wedja tshɛ ɔtshɔkɔ wa lɔsɛnɔ la kokele. (Romo 8:17-21) Vɔ mɛtɛ wekɔ la sango di’oshinga wolo!—Efeso 1:16-18.
17. Naa ɛlɔlɔ ɛmɔtshi wendana la sango diawɔ wakondja Akristo w’akitami etena kekewɔ lanɛ la nkɛtɛ na?
17 Aha paka l’ɔkɔngɔ wa nyɔi kawɔ mbayokondja ambeki wa Yeso w’akitami w’esɔ sango diawɔ. Lo yoho nyɛ yaki kokoka ndoko onto sala, Yeso akâkimanyiya dia vɔ mbeya Jehowa, Nzambi kâmɛ ka mɛtɛ. (Mateu 11:27; Joani 17:3, 26) Oma l’ɔtɛkɛta ndo oma l’ɛnyɛlɔ kande, nde akawaetsha kɛnɛ kalembetshiya ‘mbɛkama Jehowa’ ndo monga l’okitanyiya le nde. (Heberu 2:13; 5:7-9) Yeso akawasha ewo k’akambo wa mɛtɛ wendana la sangwelo diaki Nzambi ndo akâshikikɛ dia nyuma k’ekila ayowalɔmbɔla dia vɔ ndeka shihodia sangwelo diakɔ. (Joani 14:24-26) Nde akakɔkɔmiya ohomba wa Diolelo diaki Nzambi lo timba ndo l’etema awɔ. (Mateu 6:10, 33) Yeso akawasha nto ɔkɛndɛ wa sambisha ndo mbetɛ anto ambeki la Jerusalɛma, la Judeya, la Samariya, ndo l’ahole woleki etale wa lanɛ la nkɛtɛ.—Mateu 24:14; 28:19, 20; Etsha 1:8.
Sango di’oshinga wolo dikambo dia lemba la woke
18. Lo yoho yakɔna yakotshama daka diaki Jehowa di’ɔnɛ wedja tshɛ wayɔtshɔkwama oma lo tshimbo ya ‘lɔtɔngɔ’ laki Abarahama ɛlɔ kɛnɛ na?
18 Mɛnamaka dia lofulo l’Isariyɛlɛ wa lo nyuma, mbut’ate la ‘lemba la tshitshɛ l’ɛkɔkɔ’ l’ekitɔ wa Diolelo lamboshilaka la koka. (Luka 12:32) Aya ɛnɔnyi akumi wambokotola Jehowa yambalo yande dia tshumanya lemba la woke l’anto akina w’oma lo wedja tshɛ. Ɔnkɔnɛ, daka diakasha Jehowa Abarahama di’ɔnɛ wedja tshɛ wayɔtshɔkwama oma lo tshimbo ya ‘lɔtɔngɔ’ lande diekɔ lo kotshama lo yɛdikɔ y’efula. L’ɔngɛnɔngɛnɔ tshɛ, anto asɔ wambɔtshɔkwama wekɔ lo kambɛ Jehowa olimu w’ekila vɔ lawɔ ndo vɔ mbetawɔka dia panda kawɔ nemanɛka la mbetawɔ kayonga lawɔ le Ɔn’ɔkɔkɔ wa Nzambi, Yeso Kristo. (Enyelo 7:9, 10) Onde wɛ ambetawɔka leeta laki Jehowa la monga l’atei w’olui w’anto anɛ wele l’ɔngɛnɔngɛnɔ?
19. Sango diakɔna diakongɛ wanɛ wele l’atei wa wedja wambɔtshɔkwama kakianɛ?
19 Sango diakɔna di’oshinga wolo diambosha Jehowa wanɛ wele bu l’atei wa lemba la tshitshɛ l’ɛkɔkɔ? Sango sɔ kema dia l’olongo. Ɔsɔ ekɔ sango diakahombe Adama tshikɛ anande, sango diakɔ ko elongamelo ka lɔsɛnɔ la pondjo la kokele lo paradiso kayotakokanɛka yema yema lo nkɛtɛ k’otondo. L’andja ɔsɔ, ‘nyɔi hatonga nto, koyanga ndjawi, koyanga kandji.’ (Enyelo 21:4) Ɔnkɔnɛ, Ɔtɛkɛta waki Nzambi wekɔ lo kotɛ ɔnɛ: “Ekamaki [Jehowa], utshaki ololo, ku we ayudjase la kete, ayulutshama uma lu kolamelu yandi. Ndu ongenangenaki le [Jehowa], ku ndi ayukusha kene kalanga utema aye. Etenyi ka tshitshe ketu, k’untu a kolo hatanema ntu. . . . Keli akanga a memakana wayukita kete, ndu wayongenangena la etshoko efula wa ki. Antu w’ololo wayukita kete, wayudjaseka loko pundju.”—Osambu 37:3, 4, 10, 11, 29.
20. Lo woho akɔna wele ‘ɛkɔkɔ ekina’ kondjaka wahɔ efula oma lo sango dia lo nyuma di’Akristo w’akitami w’esɔ?
20 ‘Ɛkɔkɔ ekina’ waki Yeso wayonga la sango lanɛ la nkɛtɛ lo ɛlɔmbwɛlɔ ka Diolelo di’oma l’olongo. (Joani 10:16a) Kânga mbahawatonga l’olongo, efula ka sango dia lo nyuma diele l’akitami diambokimɔma l’anya wakiwɔ. Oma lo tshimbo y’olui w’akitami, wakenga ‘ɔhɔmbɔ wa kɔlamelo ndo wa kɛsɔ,’ mbele ɛkɔkɔ ekina wamboyonga la eokelo k’efula k’alaka w’amɛna efula wele l’Ɔtɛkɛta waki Nzambi. (Mateu 24:45-47; 25:34) Akitami w’esɔ la ɛkɔkɔ ekina mbeyaka Jehowa, Nzambi kâmɛ ka mɛtɛ ndo wekɔ lo mbɔtɛmɔla. (Joani 17:20, 21) Vɔ tshɛ mbishaka Nzambi losaka lo nɛmɔ diele l’olambo waki Yeso wɛdia pɛkato. Vɔ wekɔ lo kamba kâmɛ oko olui ɔtɔi l’ɛlɔmbwɛlɔ k’Olami ɔtɔi, Yeso Kristo. (Joani 10:16b) Vɔ tshɛ wekɔ l’atei wa nkumbo ka l’andja w’otondo k’anto l’ɔnango koludi la ngandji. Vɔ tshɛ wekɔ la diɛsɛ dia monga Ɛmɛnyi wa Jehowa ndo wa Diolelo diande. Eelo, naka wɛ amboyakimɔka le Nzambi ndo aya okambi waki Jehowa wambobatizamaka, kete akambo asɔ tshɛ mbɔtɔka l’ɔnɔngɔ wa sango diayɛ dia lo nyuma.
21, 22. Ngande wakokaso mɛnya sho tshɛ dia sho mbɔsaka sango diaso dia lo nyuma la nɛmɔ?
21 Onde sango dia lo nyuma sɔ diekɔ la nɛmɔ efula le yɛ? Onde wɛ diɔsaka la nɛmɔ di’efula lo mbɔsa osalelo wa lolango la Nzambi oko ɛngɔ koleki ohomba lo lɔsɛnɔ layɛ? Dia wɛ mɛnya ɔnɛ ekɔ ngasɔ, onde wɛ kitanyiyaka dako diashama l’Ɔtɛkɛta ande ndo dia l’ɔlɔngɔswamelo ande diakɔlɔmba dia mbɔtɔka lo nsanganya tshɛ y’Akristo ya l’etshumanelo? (Heberu 10:24, 25) Onde nɛmɔ diele la sango diayɛ, kotshutshuyaka dia wɛ tetemalaka la kambɛ Nzambi kânga lo tena dia wolo? Onde woho wɔsayɛ sango sɔ la nɛmɔ, kokimanyiyaka dia shika ekolo la ntondo k’ehemba wakoka ndjokoshishɛ sango diakɔ?
22 Nyɛsɔ sho tshɛ tɔshi sango dia lo nyuma diakatosha Nzambi la nɛmɔ di’efula. Etena kɛnɛ kambotoka washo aso lo Paradiso kele la ntondo kaso, nyɛsɔ tɔngɛnɛngɛnɛ la waɛsɛ wa lo nyuma watosha Jehowa nshi nyɛ. Lo monga mɛtɛ la diɔtɔnganelo di’ɔlɔlɔ la Jehowa, sho mɛnyaka nɛmɔ diele la sango dia lo nyuma diakatosha Nzambi. Nyɛsɔ tonge l’atei w’anto wata vate: ‘Layokotombola wɛ Nzambi Nkumekanga, ndo layotombolaka lokombo layɛ pondjo pondjo.’—Osambu 145:1.
Ngande wakokayɛ nembetshiya?
• Otondonga Adama aki la kɔlamelo le Nzambi, sango diakɔna diotondototshikɛ?
• Ngande wakɔsaka tokanula ta Abarahama sango diawɔ?
• Sango diakɔna diele l’ambeki wa Kristo w’akitami w’esɔ?
• Naa sango diele l’olui wa woke, ndo ngande wakokawɔ mɛnya dia vɔ mɛtɛ diɔsaka la nɛmɔ?
[Esato wa lo lɛkɛ 29]
Tokanula ta Abarahama wakalongola daka dia sango di’oshinga wolo
[Esato wa lo lɛkɛ 31]
Onde wɛ mbɔsaka sango diayɛ dia lo nyuma la nɛmɔ?