“Nyushikike Etema Anyu”
“Dieli la nyu dia ntetemala, dia nyu ntsha lulangu la [Nzambi], ku nyu nyayulungula daka diakandanyulaki.”—HEBERU 10:36.
1, 2. (a) Kakɔna kakakomɛ Akristo amɔtshi l’eleko ka ntondo? (b) Lande na kele bu wolo dia mbetawɔ mbɔla?
NDOKO ofundji ɔtɔi wa Bible wakatɛkɛta efula dikambo dia mbetawɔ oko ɔpɔstɔlɔ Paulo. Nde akatɛkɛta mbala efula dikambo di’anto wele mbetawɔ yawɔ yakɔ̂lɛ kana yakavu. Oko ɛnyɛlɔ, Humenaya la Alɛsandɛrɛ “wakashisha mbetawo yawo.” (1 Timote 1:19, 20) Demasi akalawɔ Paulo nɛ dia nde “akalangi akambu wa [“lo dikongɛ nɛ di’akambo,” NW].” (2 Timote 4:10) Amɔtshi, oma l’etsha awɔ wa kɔlɔ wahɔtɔnɛ la lɔkɛwɔ l’Akristo, ‘wakasɛkɛ mbetawɔ yawɔ.’ Akina wakakesama la yimba ya kɔlɔ ko “wakanganela uma lu mbuka ka mbetawo.”—1 Timote 5:8; 6:20, 21.
2 Lande na kakashisha Akristo asɔ w’akitami mbetawɔ yawɔ ngasɔ na? Ɛɛ, ‘mbetawɔ kɛdikɛdi dikongelo di’oshika di’akambo walongamɛso, ɔkɛnɛmwɛlɔ w’akambo wa mɛtɛ wayoya koko wahatɛnyi.’ (Heberu 11:1) Sho mbetawɔka kɛnɛ kahatakoke mɛna. Sho bu l’ohomba wa mbidja mbetawɔ l’akambo wɛnaso. Bu wolo kamba dia kondja diangɔ diɛnama oleki diahɛnama. (Mateu 19:21, 22) Diangɔ efula diɛnama, ɛnyɛlɔ oko “saki ka dimba, ndu saki ka ashu” kotolaka demba diaso di’ekokele nɛ wolo ndo kokaka mbɔladia mbetawɔ kaso.—1 Joani 2:16.
3. Mbetawɔ ka ngande kahomba monga l’Okristo?
3 Paulo ate: “Ɔnɛ laya lee [Nzambi] eekɔ la dya mbetawɔ dya [Nzambi] eekɔ, ndo nde mfutaka anɛ wooyanga.” Mɔsɛ aki la mbetawɔ ka ngasɔ. “Washo waakinde waaki paka lo mendɛɛ lofuto layaye” ndo “nde akakekeca otema waate kana nd’eekɔ lo mɛna [Nzambi] lahɛɛnama.” (Ebreyo 11:6, 24, 26, 27, Dyookaneelo dy’oyooyo) Mbetawɔ ka ngasɔ mbahomba Okristo monga la tɔ. Oko wakatɛnyi lo sawo di’etshi, Abarahama akasha ɛnyɛlɔ ka dimɛna lo dikambo sɔ.
Ɛnyɛlɔ k’Abarahama lo Dikambo dia Mbetawɔ
4. Ngande wakɛnya Abarahama mbetawɔ lo lɔsɛnɔ lande l’otondo?
4 Abarahama aki la Ura lam’akôlake Nzambi ɔnɛ nde ayota lɔtɔngɔ layoyɔtshɔkɔla wedja tshɛ wa la nkɛtɛ. (Etatelu 12:1-3; Etsha 7:2, 3) Lo ndjela daka sɔ, Abarahama akakitanyiya Jehowa ko akonɔ ntondo otsha la Harana, ko l’ɔkɔngɔ otsha la Kanana. Lɛkɔ mbakatôlakaka Jehowa dia mbisha ekana ande nkɛtɛ yakɔ. (Etatelu 12:7; Nehemiya 9:7, 8) Koko awui efula wakôlake Jehowa wakayokotshamaka paka l’ɔkɔngɔ wa nyɔi kande. Oko ɛnyɛlɔ, Abarahama kokondja kânga ɛtshi ka nkɛtɛ la Kanana, onyake wooko wa Makipela wakandasombe dia nkundɛka anto ande. (Etatelu 23:1-20) Kânga mbakidiɔ ɔsɔku, nde aki la mbetawɔ lo dui dia Jehowa. Lâdiko dia lâsɔ, nde aki la mbetawɔ lo “usumba [wayoya] weli la tshina dia wulu, [Nzambi] keli umbiki la olongosodi awo.” (Heberu 11:10) Mbetawɔ ka ngasɔ kakôsukɛ lo lɔsɛnɔ lande l’otondo.
5, 6. Ngande wakahembama mbetawɔ k’Abarahama lo dikambo di’alaka a Nzambi?
5 Mbetawɔ kakɔ mɛnamaka nto djekoleko lo daka di’ɔnɛ lɔtɔngɔ l’Abarahama layokoma wodja a woke. Dia dui sɔ ntshama, Abarahama akahombe mbota ɔna, ndo dia ndjôta ɔn’akɔ, nde akakonge edja efula. Hateye ɛnɔnyi engana waki lande lam’akandoke mbala ka ntondo kɛnɛ kakôlake Nzambi, ndo lam’akandatshu la Harana lo wodja w’etale, lâsɔ ko Jehowa atawosha ɔna. (Etatelu 11:30) Nde akadjasɛ edja la Harana, nde aki l’akoka wa ‘kondja diangɔ efula la mbota ana,’ ndo lam’akawonɔ otsha la Kanana, nde aki l’ɛnɔnyi 75, ko Sara 65. Koko polo ndo lâsɔ ko watote ndoko ɔna. (Etatelu 12:4, 5) Lam’akakotsha Sara ɛnɔnyi 70 l’ɛmɔtshi, nde akɛnyi ɔnɛ aya wolo mbotɛ Abarahama ɔna nto nɛ dia nde aya osombe efula. Omalɔkɔ, lo ndjela mbekelo ka lo nshi shɔ, nde akasha Abarahama Hangara, fumbe kande ka womoto oko wadi, ko wakote ɔna pami. Koko ɔn’ɔsɔ takinde ɔna la daka. Hangara l’Ishamɛlɛ w’ɔnande wakayotshanyemaka. Ko lam’akayâlɔmbɛka Abarahama, Jehowa akayôlaka dia tshɔkɔla Ishamɛlɛ.—Etatelu 16:1-4, 10; 17:15, 16, 18-20; 21:8-21.
6 L’etena kakashikikɛ Nzambi ndamɛ, edja efula l’ɔkɔngɔ wa lam’akâlake Nzambi mbala ka ntondo ɔnɛ wayota, Abarahama pami k’ɛnɔnyi 100 la Sara, wadiɛnde l’ɛnɔnyi 90, wakayotaka Isaka, ɔnawɔ la pami. Ɔsɔ aki dui dia diambo mɛtɛ! Le atshukanyi w’esombe asɔ, ɔsɔ aki oko eolwelo lam’akawɛnyi di’alemba awɔ ‘wambovɔ’ wamboyota lɔsɛnɔ l’oyoyo. (Romo 4:19-21) Wakakongɛ edja efula, koko lam’akayokotshamaka daka sɔ, wakayɛnaka di’ɔnɛ akasungana vɔ kongɛ mɛtɛ.
7. Ngande wɔtɔnganɛ mbetawɔ l’ekikelo?
7 Ɛnyɛlɔ k’Abarahama toholaka dia hatohombe monga la mbetawɔ paka lo etenyi ka tshitshɛ keto. Paulo akɔtɔnganyiya mbetawɔ la etetemalo lam’akandafunde ate: “Diele la nyu dia ntetemala, dia nyu ntsha lulangu la [Nzambi], ku nyu nyayulungula daka diakandanyulaki. . . . Shu kema l’atei a wane watsho ekongokongo edja ndu l’eshishwelu, keli teko l’atei a wane weli la mbetawo ka nshimbela [“anima awɔ,” NW].” (Heberu 10:36-39) Efula wakakongɛ edja dia kondja kɛnɛ kakawâlake. Amɔtshi wakakongɛ lɔsɛnɔ lawɔ l’otondo. Mbetawɔ kawɔ ka wolo kakâsukɛ. Ndo l’ɛnyɛlɔ k’Abarahama, vɔ wayokondja difuto l’etena kakashikikɛ Jehowa.—Habakuka 2:3.
Tohokame Nzambi
8 Awui anɛi mbakakeketsha mbetawɔ k’Abarahama ndo mbakoka tokimanyiya sho lawɔ ɛlɔ kɛnɛ. Dui dia ntondo ele: nde ‘aketawɔ ɔnɛ Nzambi ekɔ’ lo woho wakandahokamɛka kɛnɛ kakataka Jehowa. Ɔnkɔnɛ, nde akatshikitana l’Ase Juda wa lo nshi ya Jeremiya wanɛ wakadjaka mbetawɔ kawɔ le Jehowa koko aha l’awui ande. (Jeremiya 44:15-19) Ɛlɔ kɛnɛ, Jehowa tɛkɛtaka aso lo tshimbo ya Bible, Dui diande diakasambiyama, diata Petero ɔnɛ diekɔ oko “tala diaheta lu dihuli dia wudjima . . . l’etema anyu.” (2 Petero 1:19) Lam’adiaso Bible la yambalo tshɛ, sho ‘ndeshamaka l’awui wa mbetawɔ.’ (1 Timote 4:6; Romo 10:17) Lâdiko dia lâsɔ, lo nshi nyɛ y’ekomelo, “ɔhɔmbɔ wa kɔlamelo ndo wa kɛsɔ” toshaka ‘mbo ya ndɛ ya lo nyuma l’etena kasungana,’ vɔ tɛnyaka nganɛ wakokaso kamba l’alako wa lo Bible ndo tomanyaka pɔlɔfɛsi ya lɔkɔ fundo. (Mateo 24:45-47, NW) Naka sho mpokamɛ Jehowa oma lo tshimbo ya dihomɔ sɔ, kete tayonga la mbetawɔ ka wolo.
9. Etombelo akɔna wayotokondja naka mɛtɛ sho mbetawɔ elongamelo kele l’Akristo?
9 Mbetawɔ k’Abarahama kakɔtɔnganɛ efula l’elongamelo kande. ‘Elongamelo mbakôkimanyiya dia nde monga la mbetawɔ dia ndjâla ombutshi wa wedja efula.’ (Romo 4:18) Ɔsɔ ekɔ dui dia hende diakoka tokimanyiya. Tatôhɛke pondjo ɔnɛ Jehowa kele “ufutshi a wane watûyangaka.” Ɔpɔstɔlɔ Paulo akate ate: “Dia dikambu ne mbatshasu ulimu [“wolo,” NW], ndu mbatetemalasu ne dia shu teko la elungamelu kasu le [“Nzambi kasɛna,” NW].” (1 Timote 4:10) Naka mɛtɛ tekɔ Akristo wele la mbetawɔ lo kɛnɛ kalongamɛso, kete tayɛnya mbetawɔ kɛsɔ lo lɔsɛnɔ laso l’otondo oko akasale Abarahama.
Woho wa Tɛkɛta la Nzambi
10. Dɔmbɛlɔ dia ngande diayokeketsha mbetawɔ kaso?
10 Dui dia sato diakakeketsha mbetawɔ k’Abarahama ele: nde akatɛkɛta la Nzambi. Ɛlɔ kɛnɛ, sho lawɔ kokaka tɛkɛta la Jehowa lo dɔmbɛlɔ oma lo tshimbo ya Yeso Kristo. (Joani 14:6; Efeso 6:18) L’ɔkɔngɔ wa nde mboka wɛɛla wa kɔlamɛka lo dɔmbɛlɔ, Yeso akoke dimbola nɛ ate: “Lam’ayuya On’a untu, ndi ayutana mbetawo la kete?” (Luka 18:8) Dɔmbɛlɔ diakeketsha mbetawɔ kaso kema oko dia lâhahɔ kana dia lokimɛ l’ɔtɛ. Diɔ diekɔ l’ohomba efula. Oko ɛnyɛlɔ, dɔmbɛlɔ di’oma k’ɛse otema diekɔ ohomba efula lam’alangaso mbɔsa tɛdikɔ t’ohomba kana lam’eso l’ehemba a wolo.—Luka 6:12, 13; 22:41-44.
11. (a) Ngande wakakeketshama Abarahama lam’akandadiholɛ Nzambi otema? (b) Wetshelo akɔna wambotokondja oma lo kɛnɛ kakakomɛ Abarahama?
11 Lam’akatalekaka Abarahama tshunda osombe ko Jehowa atawosha lɔtɔngɔ la daka, nde akasawola la Nzambi lo dikambo sɔ. Jehowa akôshikikɛ dikambo diakɔ. Kakatombe na? Abarahama ‘akadje mbetawɔ le Jehowa; ko Jehowa akatatɛ mbowɛna onto ɔlɔlɔ oma lo dui sɔ.’ Oma lâsɔ ko Jehowa ndjowosha djembetelo dia shikikɛ awui wakandawotɛ. (Etatelu 15:1-18) Naka sho ndjiholɛ Jehowa etema aso lo dɔmbɛlɔ, mbetawɔ kɛnɛ katoshikikɛnde lo Bible Dui diande, ko mbôkitanyiya la mbetawɔ kaso tshɛ, kete nde lawɔ ayokeketsha mbetawɔ kaso.—Mateu 21:22; Jude 20, 21.
12, 13. (a) Ngande wakatshɔkwama Abarahama lam’akandayele ɛlɔmbwɛlɔ ka Jehowa? (b) Akambo akɔna wakatshama wakoka keketsha mbetawɔ kaso?
12 Dui dia nɛi diakakeketsha mbetawɔ k’Abarahama ele osukɔ waki lande oma le Jehowa lam’akandayele ɛlɔmbwɛlɔ kande. Lam’akatshu Abarahama dia totshungola Lɔta oma l’anya wa nkumi ya dikanga yakawonde, Jehowa akawodjɛ otshumba. (Etatelu 14:16, 20) Lam’akadjasɛka Abarahama oko ɔngɛndangɛnda lo nkɛtɛ yakahombe ndjokita lɔtɔngɔ lande, Jehowa akatshɔkɔla mbo yande ya l’emunyi. (Ɛdika l’Etatelu 14:21-23.) Jehowa akalɔmbɔla kapita k’ekambi ande kakatshu atoyangɛ Isaka wadi. (Etatelu 24:10-27) Eelo mɛtɛ, Jehowa “akatshokola Abarahama lu akambu andi tshe.” (Etatelu 24:1) Oko wakaleke mbetawɔ kande keketala mbakandaleke ndo mbokana la Jehowa Nzambi ko Jehowa ndjowelɛ ɔnɛ “ongeny’ami.”—Isaya 41:8; Jakoba 2:23.
13 Onde sho kokaka monga la woho wa mbetawɔ ka wolo ka ngasɔ ɛlɔ kɛnɛ? Eelo. Naka sho mbokoya Abarahama lo mbidja Jehowa l’ohemba lo kitanyiya ɛlɛmbɛ ande, kete nde ayotɔtshɔkɔla sho lawɔ, ndo mbetawɔ kaso kayokeketshama. Oko ɛnyɛlɔ, naka sho mboka sso lo Alapɔlɔ w’Olimu w’Ɔnɔnyi wa 1998 kete tayɛna di’anto efula wakatshɔkwama heyama lo kitanyiya ɔlɛmbɛ ande wa sambisha lokumu l’ɔlɔlɔ.—Mako 13:10.
Djembetelo ya Mbetawɔ Ɛlɔ Kɛnɛ
14. Ngande wakatshɔkɔla Jehowa odianganyelo wa Nkumu ya Diolelo No. 35?
14 Oma ko Ngɔndɔ ka Dikumi 1997, olimu w’odianganyelo wa Nkumu ya Diolelo No. 35 l’andja w’otondo akakambema dimɛna efula oma l’ohetoheto ndo wangasanu waki la miliyɔ y’Ɛmɛnyi l’onto ndo l’onto. Tênde ɛnyɛlɔ kɛnɛ k’oma lo Ghana. Wakadianganya suke la miliyɔ hiende l’etenyi ya kɔpi l’ɛtɛkɛta ɛnɛi, ndo suke l’anto 2000 wakalɔmbɛ dia tatɛ mbeka Bible. La Chypre, Ɛmɛnyi ehende wakatâdianganyaka Nkumu ya Diolelo wakɛnyi dia owandj’abé ɔmɔtshi akayawayelaka. Ɔtɛkɛta kele edja, vɔ wakawosha kɔpi kɛmɔtshi. Tete le nde amboshilaka kilongola, ko nd’awɔ ate: “Lakambe heyama lo menda losango lele lɔkɔ, diakɔ dialangami mbisha anto wakayifunde losaka.” La Danemark, anangɛso wakakahe Nkumu ya Diolelo miliyɔ ɔtɔi l’etenyi ko wakakondja etombelo w’amɛna. Osekaseka ɔmɔtshi wakamba laka lɛɛta akate ate: “Traktɛ kakɔ kekɔ la losango lendana l’osek’onto tshɛ. Tɔ fundama l’ɛtɛkɛta wa wɔdu ndo tshutshuyaka onto esadi eto dia nde mbeya akambo akina. Awui watatɔ wekɔ awui wa mɛtɛ!”
15. Kakɔna kakɛnya ɔnɛ Jehowa akatshɔkɔla weolo wakadjama dia sambisha anto l’ahole tshɛ?
15 Lo 1998, wakadje weolo dia sambisha anto l’ahole tshɛ wewɔ, aha lo mvudu yawɔ oto. Atshukanyi amɔtshi wakamba olimu wa misiɔnɛrɛ la Côte d’Ivoire wakêmbola masuwa 322 waki l’abongo. Vɔ wakakahe abuku 247, periodikɛ 2284, tobukubuku 500, la nkama ya wa traktɛ, ndo bandɛ vidéos dia wanɛ wakamba elimu lo masuwa têndaka lo nkɛndɔ yawɔ l’atei a ndjale. La Canada, Ɔmɛnyi ɔmɔtshi akatshu atosambisha lo makashinyi wasondjawɔ mbolo ya mituka. Kanga makashinyi akɔ akangɛnangɛna losango lakandoke ko ɔnangɛso aketsha wenya a tango ɛnɛi l’etenyi lawɔ, kânga mbakandasambisha wa kidiya oko yɛdikɔ ya wonya a tango ɔtɔi. Wakokana dia mbekaka Bible l’eshidi 10 w’otsho. Mbala mɔtshi, wekelo koshilaka la midi k’otsho, wakatetemalaka polo l’eshidi ehende wa pindju. Ekongelo kawɔ kɛsɔ aki oko tshondo y’ohemba, koko wakakondja etombelo w’ɔlɔlɔ. Pami kakɔ akɔshi yɛdikɔ ya dihaka makashinyi ande nshi ya Mingu tshɛ dia nde ntshɔka lo nsanganya. Nde la nkumbo kande wakatatɛ pama esadi eto.
16. Awui akɔna wakatshama wɛnya ɔnɛ biukubuku Katɔlɔmba la dibuku Ewo wekɔ dihomɔ di’amɛna efula l’olimu aso w’esambishelo la wa wetshelo na?
16 Biukubuku Kakɔna Katɔlɔmba Nzambi? la dibuku Ewo Katɔla Otsha lo Lɔsɛnɔ la Pondjo watetemalakɔ kambema oko dihomɔ di’amɛna efula l’olimu w’esambishelo ndo wa wetshelo. L’Italie, masɛlɛ ɔmɔtshi wakakongɛka bisi akɔshi kɔpi kɛmɔtshi ka Nkumu ya Diolelo. La wedi a pindju, wakasawola la nde nto, ko nde akɔsɛ biukubuku Katɔlɔmba. Lushi tshɛ tatɛ oma lâsɔ, nde akêkaka Bible l’edja ka taahe 10 kana 15 lo dihole diemala waa bisi. L’ɔkɔngɔ wa ngɔndɔ l’etenyi, nde akɔsɛ yɛdikɔ ya mumɔ oma lo kuva ko kalola lakawɔ la Guatemala dia totetemala mbeka. La Malawi, Lobina, mama kɛmɔtshi kahetshaka lo misa, kɔngɛnangɛna lam’akamɛ anande a wamato mbeka Bible l’Ɛmɛnyi wa Jehowa. Koko an’asɔ wakasambishaka nyangɛwɔ akambo wa mɛtɛ w’oma lo Bible mbala tshɛ kakawakondjaka diaaso. Lam’akɛnyi Lobina dibuku Ewo lo Ngɔndɔ ka Samalo 1997, nde akakotɔma oma l’ɛtɛkɛta w’ɔnɛ: “Ewo Katɔla.” Nde aketawɔ mbeka Bible lo Ngɔndɔ k’Esambele. Nde akɔtɔ lo Losanganya la distrikɛ lo Ngɔndɔ k’Enanɛi ko akaliyele la yambalo tshɛ. Otsha l’ekomelo ka ngɔndɔ kakɔ, nde akamɔ oma l’ɔtɛmwɛlɔ awɔ ko akakome opandjudi wahatalongola batismu. Nde akabatizama lo Ngɔndɔ ka Dikumi l’Ɔtɔi 1997.
17, 18. Kakɔna kɛnya ɔnɛ bandɛ vidéos yaki la Société yaki ohomba efula dia kimanyiya anto dia vɔ ‘mɛna’ diangɔ dia lo nyuma na?
17 Vidéos ya la Société yakakimanyiya anto efula dia “mɛna” diangɔ dia lo nyuma. Lo Île Maurice, pami kɛmɔtshi akamɔ oma l’ɔtɛmwɛlɔ awɔ l’ɔtɛ wa diatɔnelo. Misiɔnɛrɛ ɔmɔtshi akawɛnya kâmɛ kele lam’asa Ɛmɛnyi wa Jehowa l’ekimanyielo ka bandɛ vidéo Unis grâce à l’enseignement divin. Pami kakɔ akambe heyama ko akate ate: “Nyu Ɛmɛnyi wa Jehowa nyamboshilaka mbɔtɔ lo Paradiso!” Nde aketawɔ mbeka Bible. Kadiyɛso kɛmɔtshi ka la Japon akɛnya omɛnde l’opanganu bandɛ vidéo Les Témoins de Jéhovah: un nom, une organisation ko nde akanandema polo ndo tatɛ mbeka Bible mbala la mbala. L’ɔkɔngɔ wa menda bandɛ vidéo Unis grâce à l’enseignement divin, nde akalange ndjâla Ɔmɛnyi wa Jehowa. Bandɛ vidéo ka tenyi sato kele l’ɔtɛ a dui w’ɔnɛ: La Bible: Un récit historique exact, des prophéties dignes de foi. akôkimanyiya dia nde kamba l’awui wa lo Bible lo lɔsɛnɔ lande. L’ekomelo, bandɛ vidéo ka La fermeté des Témoins de Jéhovah face à la persécution nazie akawɛnya ɔnɛ Jehowa keketshaka ekambi Ande la ntondo k’ɔlɔshɛlɔ w’oma le Satana. Pami kakɔ akabatizama lo Ngɔndɔ ka Dikumi 1997.
18 Ɔsɔ ekɔ yema y’akambo tshitshɛ l’atei w’efula k’akambo wakâkomɛ l’ɔnɔnyi w’olimu wetshi ɔnɛ. Vɔ mɛnyaka ɔnɛ Ɛmɛnyi wa Jehowa wekɔ la mbetawɔ kahɛtahɛta ndo ɔnɛ Jehowa keketshaka mbetawɔ kakɔ lo tshɔkɔla olimu awɔ.—Jakoba 2:17.
Tônge la Mbetawɔ Ɛlɔ Kɛnɛ
19. (a) Ngande wolekiso Abarahama? (b) Anto angana wakasangana dia mbohɔ nyɔi ka Yeso k’olambo? (c) Wedja akɔna wakaleke nsanganya anto l’Eohwelo ɔnɔnyi wetshi? (Enda lo lɛkɛ 26 polo 29.)
19 Sho tamboleka Abarahama l’akambo efula ɛlɔ kɛnɛ. Sho mbeyaka ɔnɛ Jehowa akakotsha kɛnɛ tshɛ kakandalake Abarahama. Lo mɛtɛ, ekana w’Abarahama wakakite nkɛtɛ ya Kanana, ndo wakayala wodja a woke. (1 Khumi ya Dikanga 4:20; Heberu 11:12) Lâdiko dia lâsɔ, yɛdikɔ y’ɛnɔnyi 1971 l’ɔkɔngɔ w’Abarahama monɔ oma la Harana, Yeso, okana ande ɔmɔtshi akayobatizama l’ashi oma le Joani Obatizanyi ko ndo Jehowa ndamɛ akôbatiza la nyuma k’ekila dia nde ndjâla Mɛsiya, Lɔtɔngɔ l’Abarahama la sɔlɔ mɛtɛ lo yoho ya lo nyuma. (Mateu 3:16, 17; Ngalatiya 3:16) Lo ngɔndɔ ka Nisana 14, 33 T.D., Yeso akalambola lɔsɛnɔ lande oko tshungo lo dikambo di’anto wayonga la mbetawɔ le nde. (Mateu 20:28; Joani 3:16) Ɛlɔ kɛnɛ, miliyɔ y’anto kokaka tshɔkwama oma le nde. Ɔnɔnyi wetshi, anto 13896312 wakasangana lo Nisana 14 dia mbohɔ tshelo shɔ ya ngandji k’efula kakandatoke. Ande nganɛ wakayindjama Jehowa, Ondaki a Woke w’alaka lee!
20, 21. Ngande wakatshɔkwama anto w’oma lo wedja tshɛ lo tshimbo ya Lɔtɔngɔ l’Abarahama l’eleko ka ntondo, ndo ngande watshɔkwamawɔ ɛlɔ kɛnɛ?
20 Ase wedja efula wa l’eleko ka ntondo, tatɛ oma le Ase Isariyɛlɛ wa l’emunyi, waki la mbetawɔ le Lɔtɔngɔ lɔsɔ l’Abarahama ko wakakome ana a Nzambi w’akitami, ‘Isariyɛlɛ waki Nzambi w’oyoyo’ wa lo nyuma. (Ngalatiya 3:26-29; 6:16; Etsha 3:25, 26) Vɔ waki l’elongamelo k’oshika ka monga la lɔsɛnɔ la lo nyuma l’olongo oko emboledi lo Diolelo diaki Nzambi. Onyake anto 144000 mbayokondja diɛsɛ dia ngasɔ, ndo tɔtɔi ta l’atei awɔ wêkekɔ la nkɛtɛ. (Enyelo 5:9, 10; 7:4) Ɔnɔnyi wetshi, anto 8756 wakɛnya ɔnɛ wekɔ akitami oma lo ndɛ tolembetelo lo losanganya l’Eohwelo.
21 Suke l’Ɛmɛnyi wa Jehowa tshɛ wa nshi nyɛ wekɔ l’atei wa “ului a wuki” wakatama lo Enyelo 7:9-17. Lam’ele wayɔtshɔkwama oma le Yeso, vɔ wekɔ l’elongamelo ka kondja lɔsɛnɔ la pondjo lo paradiso ka la nkɛtɛ. (Enyelo 21:3-5) Lofulo l’anto 5888650 wakasambisha lo 1998 lekɔ tshondo ya djembetelo yɛnya ɔnɛ mɛtɛ “ului” akɔ ɔsɔ wekɔ woke. Lo yoho ya lânde, taki l’ɔlɔ wa mamba dia mɛna woho wakakome apandjudi 100000 mbala ka ntondo la Russie la l’Ukraine. Dui dikina nto dia diambo ele alapɔlɔ ɔnɛ w’oma l’États-Unis lɛnɛ akakome apandjudi 1040283 lo ngɔndɔ k’Enanɛi! Wedja esato ɛsɔ wekɔ l’atei wa wedja 19 wakakotsha lofulo l’apandjudi oleki 100000 ɔnɔnyi wetshi.
Kema Edja Nto, Kete Dikongelo Diaso Diambokotshama
22, 23. (a) Lande na kahombaso nshikikɛ etema aso ɛlɔ kɛnɛ? (b) Ngande wakokaso mɛnya ɔnɛ tekɔ oko Abarahama koko aha oko wanɛ waha la mbetawɔ wakataka Paulo?
22 Lofulo l’anto wakɔtɔ lo losanganya l’Eohwelo toholaka ɔnɛ alaka wa Jehowa wambokotshama lo yɛdikɔ y’efula. Yeso akahema l’okudi lo 1914 oko Nkumekanga ka Diolelo diaki Nzambi dia l’olongo. Etena kɛsɔ mbakandatatɛ wôngelo ande oko nkumekanga. (Mateu 24:3; Enyelo 11:15) Eelo mɛtɛ, wonya ɔnɛ, Lɔtɔngɔ l’Abarahama ôlɛ l’olongo! Jakɔba akatɛ Akristo wa lo nshi yande ate: “Ndu nyu nyutetemali, nyushikike etema anyu, ne dia eyelu ka Khumadiondjo aya suki.” (Jakoba 5:8) Ɛlɔ kɛnɛ, ndoko ladja taamu nto dia wôngelo ande! Ande dui dia yimba le so dia sho nshikikɛ etema aso lee!
23 Nyɛsɔ tɛ̂kamake alaka wa Nzambi nshi tshɛ lo mbekaka Bible lo yoho y’ɔlɔlɔ mbala tshɛ ndo lo nɔmbaka. Aha sho pomba ɛtshɔkɔ wa Jehowa ndoko lushi oma lo tona kitanyiya Dui diande. Ngasɔ kete tayonga oko Abarahama, koko aha oko anto waya la mbetawɔ yɛ̂ngɛnga kana yambɔla oko akate Paulo. Ndoko ema kahomba tokakitola oma lo mbetawɔ kaso koleki ekila. (Jude 20) Ngasɔ mbalɔmbaso di’ekambi wa Jehowa tshɛ kukutɛ mbetawɔ yawɔ l’ɔnɔnyi w’otondo w’olimu wa 1999 ɔnɛ ndo polo lam’ayotokondja lɔsɛnɔ la pondjo lo nshi yayaye.
8. Woho akɔna wahokamɛso Nzambi ɛlɔ kɛnɛ, ndo lande na kele dui sɔ diayokeketsha mbetawɔ kaso?
[Caption]
[Questions]
[Caption on page 24]
[Caption on page 24]
Naka tayolongaka Dui dia Jehowa, kete tayɛkamaka alaka ande nshi tshɛ
[Caption on page 31]
[Caption on page 31]
Mbetawɔ kaso keketshamaka lam’asambishaso
[Caption on page 31]
[Review on page 31]
Wɛ Mbeyaka?
◻ Ngande wakokaso mpokamɛ Nzambi ɛlɔ kɛnɛ?
◻ Wahɔ akɔna wakondjaso oma l’alɔmbɛlɔ aso w’eshika otsha le Nzambi?
◻ Naka sho ndjela ɛlɔmbwɛlɔ ka Jehowa l’okitanyiya tshɛ, ngande wayokeketshama mbetawɔ kaso?
◻ Naa awui amɔtshi wɛnayɛ l’alapɔlɔ w’ɔnɔnyi wetshi (lɛkɛ 26 polo 29) waleka kâmbiya?