Diewoyelo di’ohomba efula

JOHN BARR, ose Olui-Walɔmbɔla, ɔnɛ laki ɔnɔmbɔdi wa losanganya la l’ɔnɔnyi laki Watch Tower Bible and Tract Society of Pennsylvania lakasalema lo Ngɔndɔ ka Dikumi 7 k’ɔnɔnyi wetshi, akasha diewoyelo dimɔtshi di’ohomba efula. Diewoyelo sɔ diakashama l’ekomelo k’asawo efula wakashama la pindju lo losanganya lɔsɔ oma le Theodore Jaracz nde la Daniel Sydlik.​—Enda lo lɛkɛ 12-16 ndo 28-31 ka periodikɛ kɛnɛ.

Ɔnangɛso Barr akonyiya kanyi mɔtshi y’ohomba efula lo mbuta ate: “Wakasha ‘ɔhɔmbɔ wa kɔlamelo ndo wa kɛsɔ’ kâmɛ ndo Olui-Walɔmbɔla wahɔ woleki tshɛ ohomba ndo diangɔ dioleki tshɛ efula oleki ndo ɛkɛndɛ wele l’atshunda weyama le lɛɛta. Ɛkɛndɛ wofundami l’abuku w’ɛlɛmbɛ waki atshunda asɔ wekɔ l’elelo. Koko Yeso Kristo, Owandji aso, akakitsha ɔhɔmbɔ wa kɔlamelo lâdiko dia ‘diangɔ’ diande tshɛ, mbut’ate lâdiko dia wahɔ wa lanɛ la nkɛtɛ wendana la Diolelo diande.”​—Mateu 24:45-47.

Lo kɛnɛ kendana la Société kɛnɛ kalɔmbɔma oma la Pennsylvanie, ɔnangɛso Barr akakotsha ate: “Tatɛ oma l’ɔnɔnyi wa 1884 wakeyama Société kɛsɔ le lɛɛta, [tɔ] kekɔ l’ɔkɛndɛ w’ohomba efula l’ɔkɔndɔ aso wa nshi nyɛ. Koko, tɔ kekɔ paka ehomɔ kendana l’akambo wa lɛɛta kakamba ‘l’ɔhɔmbɔ wa kɔlamelo ndo wa kɛsɔ’ etena konga dikambo sɔ ohomba.”

Lo asawo wakawasha, ɔnangɛso Sydlik nde la Jaracz wakɛnya ɔnɛ, naka wakasha ‘ɔhɔmbɔ wa kɔlamelo ndo wa kɛsɔ’ diangɔ tshɛ dia la nkɛtɛ diaki Nkumadiɔndjɔ, kete lâsɔ vɔ wekɔ la lotshungɔ la mbɔsa ɛkɛndɛ ɛmɔtshi wendana l’ɛlɔmbwɛlɔ ko mbisha anto wakoka wele l’atei w’‘ɛkɔkɔ ekina.’ (Joani 10:16) Bible hate ɔnɛ ɛnɔmbɔdi tshɛ wa l’atshunda weyama le lɛɛta wakamba l’Ɛmɛnyi wa Jehowa pombaka monga paka l’Akristo w’akitami w’esɔ kana ɔnɛ pombaka mbɔsa Akristo w’akitami w’esɔ amɔtshi dia nɔmbɔla atshunda asɔ.

Ɔnangɛso Barr akalembetshiya ɔnɛ, atete edja, anto amɔtshi wa l’atei w’Olui-Walɔmbɔla w’Ɛmɛnyi wa Jehowa wanɛ waki edja efula l’atei wa tshunda di’ɛnɔmbɔdi wa Société ndo dia wanɛ wadja ɛlɛmbɛ atɔ wakayanya la lolango lawɔ vamɛ l’atei wa wanɛ walɔmbɔla atshunda asɔ tshɛ weyama le lɛɛta wakamba l’‘ɔhɔmbɔ wa kɔlamelo ndo wa kɛsɔ’ lo wodja w’États-Unis. Anangɛso wakoka wele l’atei w’ɛkɔkɔ ekina wakasɔnama l’ahole awɔ.

Yɛdikɔ shɔ yekɔ mɛtɛ la wahɔ efula. Wanɛ wele l’atei w’Olui-Walɔmbɔla wayongaka la wenya efula dia nɔngɔsɔlaka mbo ya ndɛ ya lo nyuma ndo dia ndjashaka lo toho tokina dikambo di’ehomba wa lo nyuma wa tshunda di’anangɛwɔ l’akadiyɛwɔ dia l’andja w’otondo.

La ntondo k’anto tshɛ, ɔnɔmbɔdi wa losanganya lɔsɔ akakomiya ate: “Ɛkɛndɛ wotshikitanyi wendana l’akambo wa laka lɛɛta ndo w’ɛlɔmbwɛlɔ waya kakianɛ l’ahɛka w’emendji wahokɔ akambo, . . . koko, ɔm’ɔmɔ l’atei w’emendji ɛsɔ ndjelaka ɛlɔmbwɛlɔ ka lo nyuma kaki Olui-Walɔmbɔla. . . . Nyɛsɔ tɔlɔmbake Jehowa sho tshɛ dia nde tshɔkɔla weolo wadjaso kâmɛ dia kotsha lolango lande, dia mbisha lokombo lande la woke nɛmɔ ndo litombola!”