Todje wɛɔdu wa demba Otshumba
‘Kanyiya akambo wa demba ele nyɔi.’—ROMO 8:6.
1. Ngande wɔsa anto amɔtshi demba di’onto, ndo wembola akɔna wasungana sho sɛdingola?
“DIMI layukukaka lusaka, ne dia lakatungama etungelu ka woma ndu mamba.” (Osambu 139:14) Ngasɔ mbakembe omembi w’esambo Davidi lam’akandasɛdingolaka etongami kɛmɔtshi ka Jehowa, mbut’ate, demba di’onto. Otshikitanyi la yoho ya lotombo ya dimɛna shɔ, embetsha ɛmɔtshi wa l’ɛtɛmwɛlɔ mbɔsaka demba di’onto oko wooko kana ehomɔ ka pɛkato. Vɔ dielɛka ɔnɛ ‘dihɔndɔ dia woomombe, osukɔ w’akambo wa kɔlɔ, mɔlɔla wa kɔta mishiko, lokanu la wodjima, lɔsɛnɔ laha l’ɔngɛnɔngɛnɔ, diombo diateteta laso dihole tshɛ.’ Ekɔ mɛtɛ dia, ɔpɔstɔlɔ Paulo akate ate: “Nduku engo k’ololo keli lu dimba diami.” (Romo 7:18) Ko onde dikambo sɔ nembetshiyaka ɔnɛ tambondamaka osunge pondjo wa demba diaso nɛ dia pɛkato?
2. (a) ‘Kanyiya akambo wa demba’ kɛdikɛdi na? (b) Ta diakɔna dialɔshana ‘demba’ la ‘nyuma’ lo kɛnɛ kendana la nsaki kele l’anto ka ngɛnyangɛnya Nzambi?
2 L’Afundelo, tshɛkɛta “omunyi” nembetshiyaka mbala mɔtshi demba di’onto. (1 Nkumi ya Dikanga 21:27, NW) Vɔ kambaka nto la tshɛkɛta “omunyi” dia nembetshiya onto lo eongelo kande ka kema kokele kakandahowɔ oma le Adama onto ɔnɛ lakatɔmbɔkɔ. (Efeso 2:3; Osambu 51:5; Romo 5:12) ‘Wɛɔdu wa demba’ ndja oma lo kɛnɛ kakatahowɔ oma le nde. (Romo 6:19) Diakɔ diakatewola Paulo ate: ‘Kanyiya akambo wa demba ele nyɔi.’ (Romo 8:6) ‘Kanyiya akambo wa demba’ kɛdikɛdi mbahemamɛ ndo tshutshuyama la nsaki ya demba diaso nɛ dia pɛkato. (1 Joani 2:16) Ɔnkɔnɛ, naka sho nangaka ngɛnyangɛnya Nzambi, kete teye dia ekɔ ta diahashile dialɔma lasa lonyuma laso la eongelo kaso k’atshi wa pɛkato diatotshutshuya dia tetemala lo ‘etsha wa demba.’ (Ngalatiya 5:17-23; 1 Petero 2:11) L’ɔkɔngɔ wa nde kɔndɔla ta dia kɔlɔ dialɔma l’etei ka demba diande, Paulo akate ate: “Ande dimi nkɛci onde na woja! Ayooyoncungola oma lo demba nɛ dyantɔla oca lo nyɔi?” (Rɔma 7:24, Dyookaneelo dy’Oyoyo) Onde lâsɔ Paulo kokoka ndɔshana l’ehemba? Bible kadimolaka ɔnɛ kema!
Kɛnɛ kele mɛtɛ lo dikambo di’ehemba ndo dia pɛkato
3. Ngande wɔsa anto efula pɛkato ndo ehemba, ko ngande watewola Bible oma lo dionga dia ngasɔ?
3 Anto efula ɛlɔ kɛnɛ hawetawɔ kanyi y’ɔnɛ pɛkato kekɔ. Amɔtshi mbutaka la shɛkɛsɛkɛ tshɛ dia ‘pɛkato’ ekɔ tshɛkɛta yambeta lowe yakamba l’anto dia tɛkɛta dikambo dia munga kana wɛɔdu w’anto. Vɔ haweye ɔnɛ “dieli la su, shu tshe, dia menama la ntundu k’elumbwelu ka Kristu, dia untu l’untu nungula akambu uku akandatshi lam’akindi lu dimba, kana ololo kana kolo.” (2 Koreto 5:10) La lɔsɔkɔ tshɛ akina komaka ndo lo mbuta ɔnɛ: “Dimi kokaka shika ekolo la ntondo ka dikambo tshɛ, onyake la ntondo k’ohemba!” Anto amɔtshi wekɔ lo sɛna l’ahole wele anto nangaka shidiya mposa yawɔ mbala kakɔ ɔtɔi kana ndjangɛnyangɛnya efula, oyadi l’awui w’olelo, wa dieyanelo, wa tɔkɛnyɔ, kana l’awui akina watshawɔ. Vɔ nangaka kondja tshɛ kalangawɔ, ndo paka ko wonya akɔ wamɛ! (Luka 15:12) Vɔ mɛnaka paka ɛngɛnɔngɛnɔ wa kakianɛ eto koko aha wa lo nshi yayaye wendana la ‘lɔsɛnɔ l’oshika’ layonga l’anto. (1 Timote 6:19) Koko, Bible tetshaka woho wa sho kana yimba dimɛna, mɛna etale, ndo mbewɔ osek’ɛngɔ tshɛ kakoka tôkadja wâle lo nyuma kana lo yoho kina. Yokedi mɔtshi ya lo Bible mbutaka ɔnɛ: “Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.”—Tukedi 27:12.
4. Dako diakɔna diakasha Paulo lo 1 Koreto 10:12, 13?
4 Lam’akafundɛ Paulo Akristo wa la Kɔrɛtɔ, osomba wakeyamaka efula oma lo lɔkɛwɔ la mindo laki l’anto wa lɔkɔ, nde akawaewola lo kɛnɛ kendana l’ehemba ndo oma lo nkudu kele la pɛkato. Nde akate ate: “Okone untu lakana ati: Dimi lambemala, ewo, atukoko. Nduku uhimba waya le nyu, waheyi antu memba. Keli ]Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.” (1 Koreto 10:12, 13) Sho tshɛ, oyadi dikɛnda, opalanga, pami kana womoto pomanaka l’ehemba la kalasa, l’olimu, kana l’ahole akina. Lâsɔ, nyɛsɔ tɔsɛdingole ɛtɛkɛta waki Paulo ndo tênde kitshimudi yele l’ɛtɛkɛta ɛsɔ le so.
Tatolekake ndjaɛkɛ le so shamɛ
5. Bonde kele ekɔ wâle naka sho ndeka ndjaɛkɛ le so shamɛ?
5 Paulo ate: “Okone untu lakana ati: Dimi lambemala, ewo, atukoko.” (1 Koreto 10:12) Ekɔ wâle naka sho ndeka ndjaɛkɛ lo wolo aso hita. Dui sɔ mɛnyaka dia sho hatoshihodia elɛwɔ pɛkato ndo nkudu kele latɔ. Naka anto wele oko Mɔsɛ, Davidi, Sɔlɔmɔna, ndo ɔpɔstɔlɔ Petero wakakɔ lo pɛkato, onde sho kokaka fɔnya dia sho hatokoke nkɔ pondjo? (Walelu 20:2-13; 2 Samuele 11:1-27; 1 Khumi ya Dikanga 11:1-6; Mateu 26:69-75) Tukedi 14:16 mbutaka ɔnɛ: “Kanga yimba atuyakimelaka, atukadimoka uma lu kolo. Keli kanga enginya hatuyakimelaka, atutshaka utshatsha.” Ndo nto, Yeso akate ate: “Mete utema nangaka, keli dimba mbeli wodu.” (Mateu 26:41) Lam’ele onto tshɛ lele kema kokele hakoke pomɛ tolo ɔnɛ nsaki ya kɔlɔ hayokomɛki, sho la dia mbidja yimba dimɛna l’ɔhɛmwɛlɔ waki Paulo ndo shika ekolo la ntondo k’ehemba, di’aha sho ndjɔkɔ.—Jeremiya 17:9.
6. Etena kakɔna ndo ngande wahombaso ndjalɔngɔsɔla lo kɛnɛ kendana l’ohemba?
6 Ekɔ dia lomba ndjalɔngɔsɔla la ntondo lo kɛnɛ kendana l’ekakatanu wokoki tokomɛ aha la sho nongamɛ. Nkumekanga Asa akɛnyi dia l’etena ka wɔladi mbakandahombe mbika esomba wa wolo ndo ndjadinga la pele dia ndjakokɛ. (2 Ekondo 14:2, 6, 7) Nde akeyaka dia ayoleka dimɛna tayalɔngɔsɔdi la ntondo k’atunyi mbaɔtwɛ. Yoho yakɔ yamɛ mbele, wonya wêke wɔɔngɔ ki mbahombaso mbɔsa tɛdikɔ tendana l’ehemba wakoka tokomɛ koko aha l’etena kayaso l’ehemba. (Osambu 63:6) Danyɛlɛ nde l’angɛnyi ande wakokaka Nzambi wɔma wakɔshi yɛdikɔ ya tshikala la kɔlamelo l’ɛlɛmbɛ waki Jehowa la ntondo ka vɔ ndjatshutshuya dia ndɛ mbo y’ɛlɔlɔ yakalɛkaka nkumekanga. Ɔnkɔnɛ, vɔ komengenga dia kukutɛ mbetawɔ kawɔ ndo tona dia ndɛ diangɔ dia mindo sɔ. (Danyele 1:8) La ntondo k’ehemba tokomɛ, ekɔ ɔlɔlɔ sho takeketshisha yɛdikɔ yakatɔshi ya nama lɔkɛwɔ laso la pudipudi. Lâsɔ mbayotonga la wolo wa shika tanga la ntondo ka pɛkato.
7. Bonde kakeketshamaso lo mbeya ɔnɛ anto akina wakatondoya ehemba l’ɔlɔlɔ tshɛ?
7 Sho keketshamaka oma l’ɛtɛkɛta waki Paulo w’ɔnɛ: “Nduku uhimba waya le nyu, waheyi antu memba”! (1 Koreto 10:13) Ɔpɔstɔlɔ Petero akafunde ate: “Nyutetemali [tona Diabolo] lu mbetawo kanyu; nyeyi nyati: Anyanyu wa la kete watusuwaka pupu.” (1 Petero 5:9) Eelo, lam’ele anto akina wakahomana l’ehemba akɔ wamɛ kowakâtondoya l’ɔlɔlɔ tshɛ oma l’ekimanyielo kaki Nzambi, ɔnkɔnɛ ndo sho lawɔ kokaka mbâtondoya. Ɔnkɔnɛ, oko weso Akristo wa mɛtɛ ndo oko wasɛnaso l’andja ɔnɛ wambolana, sho tshɛ kokaka pembama oyadi nshi nyɛ kana l’edjedja ka wonya. Lâsɔ, ngande wakokaso ndjashikikɛ dia mbidja wɛɔdu wa demba la ehemba watotshutshuya lo pɛkato otshumba na?
Sho kokaka shika ekolo la ntondo k’ehemba!
8. Naa yoho yoleki dimɛna ya ndawɔ ehemba?
8 Yoho yoleki dimɛna yaha ndjaetɛ nto ‘fumbe ka pɛkato’ ele mbewɔ ehemba kam’ekende suke. (Romo 6:6) Tukedi 4:14, 15 tokeketshaka ɔnɛ: “Totoki lu mbuka k’akanga a kolo, tokendakendaki lu mbuka k’antu wa kolo. Ewo mbuka kako, tetaki loko; ukadimo uma loko, eti leke lukina.” Mbala efula sho teyaka la ntondo ɔnɛ dui nɛ mbeyaka ndjotokonya lo pɛkato. Diakɔ diele, oko weso Akristo kɛnɛ kele ohomba efula sala ele ‘nyɛka dihɛka,’ mbewɔ weho w’anto tshɛ, w’akambo tshɛ kana w’ahole tshɛ wakoka nomialomia nsaki kana mposa ya kɔlɔ l’etema aso.
9. Ngande watɛtɛ Afundelo l’ohomba wa mbewɔ awui wakoka ndjotokonya l’ehemba?
9 Ndawɔ dikambo diakoka todja l’ohemba ekɔ yoho kina y’ɔlɔlɔ yaha sho nkɔ lɔkɔ. Paulo akatolake ate: “Nyulawo munanyi.” (1 Koreto 6:18) Nde akafunde nto ate: “Nyulawo otemwelo wa dikishi.” (1 Koreto 10:14) Ɔpɔstɔlɔ ɔsɔ akewola nto Timɔtɛ dia nde ndawɔ eyango wa lomombo la l’emunyi ndo “saki ya kolo y’elongo w’apami.”—2 Timote 2:22; 1 Timote 6:9-11.
10. Naa bɛnyɛlɔ dihende diotshikitanyi diɛnya ohomba wa ndawɔ ehemba?
10 Tɔshi ɛnyɛlɔ kaki Davidi, Nkumekanga k’Isariyɛlɛ. Lushi lɔmɔtshi lam’akinde lo sambe kande ka luudu, nde akɛnyi womoto ɔmɔtshi l’olangala efula ɔ̂ka, ko otema ande wakalole la nsaki ya kɔlɔ. Nde akakoke mimɔ oma lo sambe kande ka luudu dia ndawɔ ohemba ɔsɔ. Koko lo dihole dia nde sala ngasɔ, nde akambola dia mbeya awui wendana la womoto ɔsɔ, mbut’ate Batɛshɛba, ndo dikambo sɔ diakayongaka l’etombelo wa kɔlɔ efula. (2 Samuele 11:1–12:23) Lo wedi okina, kakɔna kakasale Yɔsɛfu lam’akotshutshuya wadi aki nkumɛnde laki la lɔkɛwɔ la mindo dia vɔ mbeyana na? Ɔkɔndɔ ɔsɔ totɛka ɔnɛ: “Kuyanga mbakandasengasengaka Josefu la lushi la lushi, ndi kumbetawo mbeyana la ndi, kana ndjala kame la ndi.” Kânga mbaki l’etena kɛsɔ ko Ɛlɛmbɛ waki Mɔsɛ watonge, Yɔsɛfu akôkadimola ate: “Ukundi ukukimi ntsha munga kene ka wuki, la ntshela [Nzambi] kolo?” Lushi lɔmɔtshi, womoto ɔsɔ akawomamɛ, awotɛ ate: “Yaka tetami!” Onde Yɔsɛfu akatshikala kâmɛ la nde dia pemba kana la nde yimba? Kema. Nde “akalawo l’andja.” Yɔsɛfu konanga nkɔ l’ohemba ɔsɔ wendana l’awui wa mindo wa dieyanelo. Nde akalawɔ!—Etatelu 39:7-16.
11. Akokaso sala naka ohemba ɔmɔtshi wambotodingama?
11 Oyadi kânga wayotɔsa oko yɔ̂mɔma, minya demba dia ndawɔ ohemba mongaka mbala efula dui dia lomba. Mbeyaka monga ko tekɔ lo ndɔshana l’ohemba ɔmɔtshi wahatokolɔ lo dihole di’olimu. Kânga mbele ondo hatokoke tshikitanya olimu, ekɔ toho tokina takokaso sala di’aha nkɔ l’ehemba. Sho pombaka ndawɔ oseka dikambo tshɛ dieyaso ɔnɛ diekɔ kɔlɔ, ndo sho pombaka ndjashikikɛ dia sala paka kɛnɛ kele ɔlɔlɔ. (Amose 5:15) Oyadi lende eso, ndawɔ ohemba kɛdikɛdi mbewɔ waa filmɛ ndo abuku wɛnyawɔ anto etakataka kana ahole amɔtshi wa tɔkɛnyɔ wakoka ndjotokonya lo wâle. Ndawɔ ohemba mbeyaka nembetshiya nto tona mbadia jurunalɛ yele l’akambo wa kɔlɔ ndo nyanga angɛnyi w’eyoyo walanga Nzambi ndo wakoka tokimanyiya. (Tukedi 13:20) Oyadi dikambo diakɔna diayoyanga tɔkɔsha lo pɛkato, tayɛnya dia tekɔ la yimba, naka tayoyashikikɛ dia dioka ɔkɔngɔ.—Romo 12:9.
Woho wakoka tokimanyiya dɔmbɛlɔ
12. Alɔmbaso le Nzambi lam’ataso ɔnɛ: ‘Totokonyake l’ehemba’ na?
12 Paulo tokeketshaka l’eshikikelo tshɛ ate: “Keli [Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.” (1 Koreto 10:13) Yoho mɔtshi yatokimanyiya Jehowa ele lo tokadimola alɔmbɛlɔ aso dia tokimanyiya woho wa sho tondoya ehemba. Yeso Kristo akatetsha dia nɔmbaka ɔnɛ: ‘Totokonyake l’ehemba, koko otokoke oma le kanga kɔlɔ.’ (Mateu 6:13) Lo kadimola l’alɔmbɛlɔ wa ngasɔ woye oma k’ɛse otema, Jehowa hototshika l’ehemba; nde ayototshungola oma le Satana ndo oma lo tolonga tande ta mayɛlɛ. (Efeso 6:11, nɔtɛ ka l’ɛse ka dikatshi) Sho pombaka nɔmba Nzambi dia nde tokimanyiya dia sho mbeyaka ɔnɛ dikambo nɛ diekɔ ohemba ndo tosha wolo wa sho shika ekolo la ntondo k’ohemba akɔ. Naka tayowɔsɛngasɛnga di’aha nde totshika dia sho nkɔ etena kahembamaso, kete nde ayotokimanyiya di’aha sho mindama oma le Satana ‘kanga kɔlɔ.’
13. Ahombaso sala lam’eso l’atei w’ohemba wahatokolɔ?
13 Lo yoho ya lânde, sho la dia nɔmbaka l’etete lam’alɔshanaso l’ohemba wambotokama oko losondjo. Ehemba ɛmɔtshi kokaka tɔlɔsha efula l’otema, mbut’ate ndɔshana la tokanyi kana waonga aso watohola polo lo yɛdikɔ yakɔna yeso wɔdu. (Osambu 51:5) Oko ɛnyɛlɔ, kakɔna kakokaso sala naka tambokiyana efula nɛ dia tambohɔ akambo amɔtshi wa kɔlɔ wakatasale lo nshi y’edjedja? Ko kayotota naka tambohembama dia kawola l’akambo asɔ na? Lo dihole dia nyanga tsho woho wa minya tokanyi tɔsɔ, ayoleka dimɛna sho mbokiya Jehowa dikambo sɔ lo dɔmbɛlɔ mbala la mbala naka ekɔ ohomba. (Osambu 55:22) Oma lo nkudu kele l’Ɔtɛkɛta ande ndo ka nyuma kande k’ekila, nde kokaka tokimanyiya dia sho minya tokanyi ta mindo oma lo wɔɔngɔ aso.—Osambu 19:8, 9.
14. Lande na kele dɔmbɛlɔ diekɔ ohomba dia ndɔshana la wɛɔdu wa demba?
14 L’ekambɔ ka Ngɛtɛsamanɛ, lam’akandɛnyi wɛɔdu w’apɔstɔlɔ ande, Yeso akâkeketsha ate: “Nyewoki, nyolombaki, nyutukoko l’ehimba. Mete utema nangaka, keli dimba mbeli wodu.” (Mateu 26:41) Yoho mɔtshi yakokaso tondoya ohemba ele sɛna wolo lo kɛnɛ kendana la weho tshɛ w’ehemba wakoka tokomɛ ndo mbeya tolonga tatɔ ta woshamu. Ekɔ nto ohomba dia sho nɔmba aha la tshimbatshimba lo kɛnɛ kendana l’ohemba akɔ woho wa sho mbeya ndjashikimadja lo nyuma dia ndɔshana l’ohemba akɔ. Lam’ele ohemba toyɛka paka lo dikambo dieso wɔdu, eko wolo sho mbôtondoya shamɛ. Dɔmbɛlɔ diekɔ ohomba nɛ dia wolo waki Nzambi kokaka tokimanyiya dia sho ndɔshana la Satana. (Filipi 4:6, 7) Sho koka nto monga l’ohomba w’ekimanyielo ka lo nyuma ndo alɔmbɛlɔ wa ‘dikumanyi dia l’etshumanelo.’—Jakoba 5:13-18.
Toshike ekolo la ntondo k’ehemba la wolo tshɛ
15. Shika tanga la ntondo k’ehemba kɛdikɛdi na?
15 Lâdiko wa sho mbewɔ ohemba etena kekende suke, sho pombaka nto tetemala shika ekolo la ntondo k’ohemba akɔ polo lam’ayoweta kana wayotshikitana akambo. Lam’akahembama Yeso oma le Satana, nde akashike ekolo edja ndo lam’akôtshike Satana. (Mateu 4:1-11) Ombeki Jakɔba akafunde ate: “Nyusemaneli [la Diabolo], ku ndi ayunyulawo.” (Jakoba 4:7) Sho tatɛka shika ekolo lo keketsha yimba yaso l’ekimanyielo k’Ɔtɛkɛta waki Nzambi ndo kɔsaso yɛdikɔ la wolo tshɛ dia ndjela wadjango ande. Ekɔ ohomba sho kimɛ avɛsa amɔtshi w’ohomba l’ɔtɛ ndo kanaka lawɔ yimba etena kalɔshanaso la wɔdu ɔmɔtshi wa lânde. Ayonga dui dia lomba wɛ tshɔ le Okristo ɔmɔtshi wambotshunda, kana le ekumanyi kɛmɔtshi kakokayɛ mbutɛ kɛnɛ kele layɛ ndo ɔnɛ lakokaso toyanga ekimanyielo lam’ongaso la ntondo k’ohemba.—Tukedi 22:17.
16. Woho akɔna wakokaso nama lɔkɛwɔ l’ɔlɔlɔ?
16 Afundelo tokeketshaka dia ndɔta lonto l’oyoyo. (Efeso 4:24) Mbut’ate sho pombaka mbetawɔ dia Jehowa tokenga ndo totshikitanya. Lam’akandafundɛka Timɔtɛ, onyande okambi, Paulo akate ate: “Uyeli akambu w’usimbwi, la ololo tshe, la mbetawo, la ngandji, la kolamelu, la memakana. Olo ta di’ololo dia mbetawo, ukimeli lumu la pundju, lakayetama loko.” (1 Timote 6:11, 12) Sho kokaka ‘ndjela akambo wosembwe’ lo mbeka Ɔtɛkɛta waki Nzambi l’etete l’oyango wa shihodia lonto lakinde ndo lo kitanyiya kɛnɛ kalɔmbande. Ekɔ nto ohomba monga l’ekongelo koludi tɔɔ l’elimu w’Akristo, ɛnyɛlɔ oko esambishelo ka lokumu l’ɔlɔlɔ la wɔtwɛlɔ wa lo nsanganya. Naka sho ndjasukanya la Nzambi ndo ngɛnangɛna la tɛdikɔ tande ta lo nyuma, kete tayohama lo nyuma ndo tayolama lɔkɛwɔ laso la pudipudi.—Jakoba 4:8.
17. Ngande weyaso dia Nzambi hatotokalɛ lo wonya w’ohemba?
17 Paulo toshikikɛka ɔnɛ ndoko ohemba wayotokomɛ wayotamba akoka wakatosha Nzambi dia ndɔshana lawɔ. Jehowa ‘ayotɔlɔngɔsɔlɛ mboka dia sho mbeya mbikikɛ ohemba akɔ.’ (1 Koreto 10:13) Lo mɛtɛ, naka sho ndjaɛkɛ le Nzambi, kete nde hatotshika di’ohemba tokomɛ wotsho woho ɔnɛ wakokaso pomba ndo wolo wa lo nyuma wakoka tokimanyiya dia sho tshikala la kɔlamelo. Nde nangaka dia sho tondoya ehemba watotshutshuya dia sho sala kɛnɛ kele kema ɔlɔlɔ lo washo ande. Ndo nto, sho kokaka monga la mbetawɔ lo daka diande nɛ: “Dimi hakoseke, halakutshiki.”—Heberu 13:5.
18. Lande na kakokaso ndjashikikɛ ɔnɛ sho kokaka nɛndja wɛɔdu aso wa demba?
18 Paulo akeyaka etombelo wa ta diakandalɔka la wɛɔdu ande wa demba. Nde kondjaɛnaka dia nde kema ndoko l’ekimanyielo kana dia nde ekɔ fumbe ka nsaki yande ya demba. Lo wedi okina, nde akate ate: “Dimi latusakaka luwangu laha la wengengo. Dimi latolokaka, aha uku untu lakomola lopepe. Keli dimi latuyakomolaka, latuyalembiaka lu fumbi, ne dia lam’asambishami akina, dime ntukuyala utunami.” (1Koreto 9:26, 27) Sho lawɔ kokaka mbidja demba diakiso diele kema kokele otshumba. L’ekimanyielo k’Afundelo, k’ekanda walembetshiya awui wa lo Bible, ka nsanganya y’Akristo, ndo ka anyaso Akristo wambotshunda, Shɛso ka ngandji tetemalaka tosha waohwelo watokimanyiya dia sho tetemala lo mboka k’ɔlɔlɔ. L’ekimanyielo kande, sho kokaka mbidja wɛɔdu wa demba otshumba!
Onde wɛ mbohɔka?
• ‘Kanyiya akambo wa demba’ kɛdikɛdi na?
• Ngande wakokaso ndjalɔngɔsɔla dia ndɔshana l’ehemba?
• Akokaso sala dia ndɔshana l’ehemba?
• Ngande watokimanyiya dɔmbɛlɔ dia ndɔshana l’ehemba?
• Ngande weyaso dia sho kokaka mbidja wɛɔdu wa demba otshumba?
[Esato wa lo lɛkɛ 8]
Bible hetsha dia hatokoke kondja ekimanyielo dia tondoya nsaki yaso ya demba
[Osato wa lo lɛkɛ 10]
Yoho mɔtshi ya mbewɔ pɛkato ele ndawɔ ehemba