‘Di’aha nyu mbɔtɔ l’ehemba’
‘Nyotetemale sungukala ndo nyotetemale nɔmbaka di’aha nyu mbɔtɔ l’ehemba.’—MATEU 26:41.
ASUI wakahomana la Yeso Kristo y’Ɔna Nzambi wakaleke tshɛ wolo. Yeso Kristo, Ɔna Nzambi aki suke l’ekomelo ka lɔsɛnɔ lande la lanɛ la nkɛtɛ. Yeso akeye dia kem’edja, wayowonda, wayowofundɛ nyɔi, ndo wayowohanɛ l’otamba w’asui. Nde akeyaka dia yɛdikɔ ndo dikambo tshɛ diayondohomba sala diayonga la shɛngiya lo lokombo laki She. Yeso akeyaka dia lɔsɛnɔ la lo nshi yayaye laki anto lakahombe shikikɛma diɛsɛ oma lo dionga diakandahombe monga ladiɔ la ntondo k’asui. Ko kakɔna kakandasale la ntondo k’asui asɔ tshɛ na?
2 Yeso akatshu l’ekambɔ ka Ngɛtɛsɛmanɛ nde l’ambeki ande. Ɔsɔ aki dihole diakalekaka nanga Yeso. Lam’akawakome lɛkɔ, nde akangana yema nde l’ambeki ande. Lam’akandamɔ oma la le wɔ, nde akalɔmbɛ She lele l’olongo dia mbosha wolo, ndo nde akakɛnɛmɔlɛ Nzambi kɛnɛ tshɛ kaki lande l’otema lo mbɔlɔmba l’etete tshɛ, aha mbala ɔtɔi koko mbala shato y’etondo. Kânga mbakinde kokele, Yeso kombuta ɔnɛ layɔlɔshana l’ekakatanu ɛsɔ la wolo ami hita.—Mateu 26:36-44.
3 Ɛlɔ kɛnɛ, sho lawɔ tekɔ l’atei w’asui. L’etatelo ka biukubuku nyɛ, takɛnyi awui wɛnya dia tekɔ lo sɛna lo nshi y’ekomelo ya dikongɛ di’akambo nɛ. Ehemba ndo ekakatanu watela andja waki Satana ɔnɛ wekɔ lo taleke fulanɛ. Tɛdikɔ ndo kɛnɛ tshɛ kasalaso sho wanɛ wayata dia Nzambi ka mɛtɛ mbakambɛso ekɔ la shɛngiya y’efula lo lokombo laki Nzambi ndo ekɔ nto la shɛngiya y’efula l’elongamelo kele l’onto l’onto ka ndjɔsɛna l’andja w’oyoyo. Sho mbokaka Jehowa ngandji. Sho nangaka ‘mbikikɛ polo l’ekomelo,’ oyadi ekomelo ka lɔsɛnɔ laso kana ka dikongɛ nɛ di’akambo ndo oyadi kɛnɛ kayoya ntondo. (Mateu 24:13) Ko ngande wakokaso mɛnya dia tekɔ lo sala akambo la shamanya ndo ɔnɛ tekɔ lo tetemala la sungukala?
4 Lo mbeya di’ambeki ande, oyadi wa nshi ya ntondo kana wa nshi nyɛ wayosoyama, Yeso akate ate: ‘Nyotetemale sungukala ndo nyotetemale nɔmbaka di’aha nyu mbɔtɔ l’ehemba.’ (Mateu 26:41) Ɛtɛkɛta ɛsɔ alembetshiyawɔ le so ɛlɔ kɛnɛ? Ehemba akɔna wele lo ndɔshana layɛ? Ndo ngande wakokayɛ ‘tetemala sungukala’?
Tayohembama dia sala na?
5 Lushi la lushi, sho tshɛ pembamaka dia tala lo ‘djonga yaki Diabolo.’ (2 Timote 2:26) Bible totɛka dia Satana ekɔ lo ndeka sɔmana l’atɛmɔdi waki Jehowa. (1 Petero 5:8; Enyelo 12:12, 17) L’oyango akɔna? Aha paka dia todiaka. Satana hadje otshumba naka tambovɔ la kɔlamelo otsha le Nzambi. Satana mbeyaka dia Jehowa, ayolola anto l’etena kakandashikikɛ.—Luka 20:37, 38.
6 Satana nangaka ndanya ɛngɔ kɛmɔtshi koleki ndo lɔsɛnɔ laso la nshi nyɛ oshinga wolo, ɛngɔ kakɔ ko: olowanyi. Satana ambohekɔ dia mɛnya dia nde kokaka tɛkɔla oma le Jehowa. Ɔnkɔnɛ, naka tamboshisha kɔlamelo yaso otsha le Nzambi, lo tshika sambisha lokumu l’ɔlɔlɔ kana naka tamboka ɛlɛmbɛ w’Akristo ɔkɔngɔ, kete ɔsɔ ayonga otshumba le Satana! (Efeso 6:11-13) Ɔnkɔnɛ, ‘Ohembanyi’ tokitshɛka ehemba la ntondo kaso.—Mateu 4:3.
7 Satana kambaka la toho efula dia nde “kesa anto la mayɛlɛ.” (Efeso 6:11, Jewish New Testament) Nde koka tohemba dia sho monga la nsaki ka lomombo la l’emunyi ndo la wɔma. Nde koka monɛ tâmu l’etema aso kana tohemba dia sho nyanga ɛngɛnɔngɛnɔ wa lo lɔsɛnɔ. Koko djonga mɔtshi yalekande munda anto ele ɔkɔmwɛlɔ w’otema. Oko wakambande la kɛnɛ tshɛ katokomɛ, nde mbeyaka di’ɔkɔmwɛlɔ w’otema koka kitshakitsha lonyuma laso woho wa nde totadja esadi eto. (Tukedi 24:10) Etena ‘katɛtɛ solo diaso,’ mbalekande tohemba dia sho tshika kambɛ Nzambi.—Osambu 38:8.
8 Oko watataleke nyɔngɔmɛ lo nshi y’ekomelo, mɛnamaka di’akambo wakɔmɔla anto etema wekɔ lo tafulanɛ ndo akambo akɔ koka tokomɛ. (Enda lo kiombo yele l’ɔtɛ a dui ɔnɛ: “Akambo Amɔtshi Wakɔmɔla Anto Etema.”) Ɔkɔmwɛlɔ w’otema koka kitshakitsha wolo aso, oyadi kakɔna kele lo kiɔkɔ ya dikambo sɔ. ‘Ndjatshungwɛ etena k’ɔlɔlɔ’ dikambo di’ɛkɛndɛ aso wa lo nyuma, mbidja ndo wekelo wa Bible, wɔtwɛlɔ wa lo nsanganya, esambishelo koka monga tshondo y’ohemba le yɛ, naka wɛ ambɔlɛmba lo demba, lo yimba ndo lo tokanyi. (Efeso 5:15, 16) Ohɔ di’Ohembanyi nangaka dia wɛ tshika sala awui w’ɔlɔlɔ. Koko ɔnɛ kema etena ka tɛwɔla demba kana ka mbohɛ dia sho pombaka sala akambo la shamanya l’etena kɛnɛ! (Luka 21:34-36) Ngande wakokayɛ shika tanga l’ehemba ndo sungukalaka na? Tɔsɛdingole alako anɛi wakoka tokimanyiya.
‘Totetemale nɔmbaka’
9 Yaɛkɛ le Jehowa lo dɔmbɛlɔ. Ohɔsa ɛnyɛlɔ kaki Yeso l’ekambɔ ka Ngɛtɛsɛmanɛ. Akandasale lam’akandatshimbe yimba? Nde akakadimɔ le Jehowa dia nɔmba ekimanyielo, nde akalɔmbɛ l’etete tshɛ woho ɔnɛ wele ‘dungu diakandatombe diakonge oko apɔpɔ wa dikila mbakɔ la nkɛtɛ.’ (Luka 22:44) Ohokanyiya dikambo sɔ. Yeso akeyaka Satana dimɛna. Yeso akasɛdingola oma l’olongo ehemba tshɛ wakamba la Satana lo welo wadjande dia tadja ekambi waki Nzambi. Koko, Yeso kombuta di’ohemba tshɛ wayowokitshɛ Ohembanyi la ntondo, nde ayowotondoya aha la kânga yema y’okakatanu. Naka Ɔnaki Nzambi la kokele akɛnyi ohomba wa nɔmba dia kondja ekimanyielo kaki Nzambi ndo wolo ande, kete hoke sho!—1 Petero 2:21.
10 Tohɔ nto dia l’ɔkɔngɔ wa nde keketsha ambeki ande dia ‘tetemala nɔmbaka,’ Yeso akate ate: “Mete utema nangaka, keli dimba mbeli wodu.” (Mateu 26:41) Demba diaki waa na diakatɛkɛtaka Yeso lanɛ? Lo mɛtɛ aha demba diande mbakandataka, nɛ dia demba diande komonga wɔdu dikambo nde aki onto la kokele. (1 Petero 2:22) Nde akatshikitana l’ambeki ande. Lo woho wakawahɛnɛ eongelo kele kema kokele ndo tokanyi ta kɔlɔ, vɔ waki l’ohomba w’efula w’ekimanyielo dia shika tanga la ntondo k’ehemba. (Romo 7:21-24) Diakɔ diakandâkeketsha ndo diakeketshande Akristo tshɛ wa mɛtɛ wakahombe ndjonga la lɔsɛnɔ l’ɔkɔngɔ awɔ dia nɔmba ekimanyielo dia vɔ mbeya ndɔshana dimɛna l’ehemba. (Mateu 6:13) Jehowa kadimolaka weho w’alɔmbɛlɔ wa ngasɔ. (Osambu 65:2) Woho akɔna? Lo toho tohende.
11 Ntondotondo, Nzambi tokimanyiyaka dia mbeya ɔnɛ dui kapanda diekɔ ohemba. Ehemba waki Satana wekɔ oko tolonga toshɛmi lo mboka ka wodjima. Naka wɛ hatiɛnyi, wɛ koka tala lɔkɔ. Oma l’ekimanyielo ka Bible ndo k’ekanda wakilembetshiya, Jehowa kɛnɛmɔlaka tolonga taki Satana, ndo tokimanyiyaka dia sho tiewɔ di’aha tala lɔkɔ. Aya ɛnɔnyi efula wele ekanda watomba ndo nsanganya ya weke yasalema tewolaka mbala tshɛ dikambo dia wɔma w’onto, awui wa mindo wa dieyanelo, nsaki ka lomombo la l’emunyi, ndo ehemba ekina waki Satana. (Tukedi 29:25; 1 Koreto 10:8-11; 1 Timote 6:9, 10) Shi wɛ ekɔ la lowando le Jehowa ɔnɛ latewola oma lo tolonga taki Satana? (2 Koreto 2:11) Ɛhɛmwɛlɔ ɛsɔ ekɔ ekadimwelo l’alɔmbɛlɔ aso wayangaso ekimanyielo dia shika tanga la ntondo k’ehemba.
12 Yoho ya hende, Jehowa kadimolaka l’alɔmbɛlɔ aso lo tosha wolo wa mbikikɛ ehemba. Ɔtɛkɛta ande mbutaka ɔnɛ: “Ndi hetawo dia nyu mpimbama uleki wulu anyu. Keli lam’ayuya ehimba ndi ayunyutshela mbuka ka nyu mpanda dia nyu ndjala la wulu wa nshikikala.” (1 Koreto 10:13) Nzambi hetawɔki pondjo di’ohemba tohekesanya woho ɔnɛ wele taya bu la wolo wa lo nyuma dia mbikikɛ ohemba akɔ, naka sho ndjaɛkɛ le nde. Nde “ayu[to]tshela mbuka” lo woho akɔna? Nde ‘mbishaka nyuma k’ekila le wanɛ wɔlɔmbatɔ.’ (Luka 11:13) Nyuma kɛsɔ mbeyaka tokimanyiya dia mbohɔ atɔndɔ wa lo Bible wakoka keketsha yɛdikɔ yakatɔshi dia sala kɛnɛ kele ɔlɔlɔ ndo dia mbɔsa tɛdikɔ ta lomba. (Joani 14:26; Jakoba 1:5, 6) Tɔ koka tokimanyiya dia kɛnɛmɔla waonga wele laso mɛtɛ ohomba dia sho nɛndja tokanyi taso ta kɔlɔ. (Ngalatiya 5:22, 23) Nyuma ka Nzambi koka tshutshuya anyaso ambewudi dia vɔ ‘koma ekimanyielo kakeketsha le so.’ (Kolosai 4:11) Onde wɛ kema la lowando lo woho wakadimola Jehowa alɔmbɛlɔ aso lo toho tɔsɔ toludi tɔɔ la ngandji?
Onga l’ekanelo k’ɔlɔlɔ lo kɛnɛ kalongamɛso
13 Dia tetemala sungukala, ekɔ ohomba sho monga l’ekanelo k’ɔlɔlɔ lo kɛnɛ kalongamɛso. L’ɔtɛ w’ekakatanu wa lo lɔsɛnɔ, tokomɛka tena dimɔtshi dia sho nɛmba. Koko sho pombaka mbohɔ dia ndoko lushi lakalake Nzambi dia tayonga la lɔsɛnɔ l’aha l’ekakatanu lo dikongɛ di’akambo di’omusu nɛ. Kânga lo tena diakafundamaka Bible, ekambi waki Nzambi wakahomana l’ɛhɛnyɔhɛnyɔ, mbidja ndo ɔlɔshamelo, wola, ɔkɔmwɛlɔ w’otema ndo hemɔ.—Etsha 8:1; 2 Koreto 8:1, 2; 1 Tesalonika 5:14; 1 Timote 5:23.
14 Ɛlɔ kɛnɛ, sho lawɔ pomanaka l’ekakatanu. Sho ndɔshamaka, tekɔ l’ekakatanu wendana l’ekondjelo, tekɔ lo ndɔshana l’ɔkɔmwɛlɔ w’otema, hemɔ ndo sho sowaka lo toho tokina. Naka Jehowa pombaka tokokɛ oma lo dui tshɛ dia kɔlɔ diakoka tokomɛ, shi kete Satana ayokondjaka waaso wa mɔnyɔla Jehowa? (Tukedi 27:11) Jehowa mbetawɔka di’ekambi ande pembama, ndo tena dimɔtshi kânga dia vɔ mvɔ nyɔi y’esondjo oma l’anya w’atunyi awɔ.—Joani 16:2.
15 Kakɔna kalaka Jehowa oma lâsɔ? Oko wakataditshi ntondo, nde ndakaka dia nde ayotokimanyiya dia sho shika tanga la ntondo k’ohemba tshɛ, naka sho ndjaɛkɛ tshɛ le nde. (Tukedi 3:5, 6) Lo tshimbo y’Ɔtɛkɛta ande, ya nyuma kande ndo y’ɔlɔngɔswamelo ande, nde tokokɛka lo nyuma lo tokimanyiya dia kokɛ diɔtɔnganelo diasaso la nde. Naka sho nama diɔtɔnganelo sɔ, kete kânga mvɔ mbovweso, sho tayodja otshumba. Ndoko ɛngɔ ɔtɔi, oyadi kânga nyɔi kakoka shimba Nzambi dia futa ekambi ande wa kɔlamelo. (Heberu 11:6) Ndo l’andja w’oyoyo, waya suke, Jehowa ayokotsha alaka ande tshɛ wa diambo wendana l’ɛtshɔkɔ wakandalake wanɛ wawoka ngandji.—Osambu 145:16.
Akambo wa mbohɔka
16 Dia mbikikɛ polo l’ekomelo, sho la dia mbohɔ akambo w’ohomba wɛnya bonde katshika Nzambi akambo wa kɔlɔ. Naka l’etena kɛmɔtshi ekakatanu wele laso mɛnamaka dia wamboleka ndo tambohembama dia tshika kambɛ Nzambi, kete sho la dia mbeya dia Satana akate dia Jehowa bu la lotshungɔ la mbolɛ. Okesanyi ɔsɔ akate nto di’atɛmɔdi waki Nzambi hawotshikalaki l’olowanyi otsha le nde. (Jobo 1:8-11; 2:3, 4) Akambo asɔ ndo woho wakasɔnɛ Jehowa dia mbâkandola ndeka nsɛnɔ yaso hita ohomba. Lo woho akɔna?
17 Woho wakatshike Nzambi ekakatanu lo tshanda mɔtshi akasha anto akina diaaso dia mbeya akambo wa mɛtɛ. Kanyiya dikambo nɛ: Yeso akasoyama dia sho kondja lɔsɛnɔ. (Joani 3:16) Onde sho kema la lowando lo dikambo sɔ? Ko onde sho mbetawɔka ndɔshana l’ehemba lo tshanda ya tshitshɛ yambotshikala nyɛ di’anto akina nto kondja lɔsɛnɔ? Dia mbikikɛ polo l’ekomelo, sho la dia mbeya dia lomba laki Jehowa ndeka laso la fwa. (Isaya 55:9) Nde ayokomiya akambo wa kɔlɔ l’etena kayondɛna ɔlɔlɔ kandola akambo asɔ lo pondjo ndo lo wahɔ aso wa pondjo. Shi ɔsɔ mbele mɛtɛ yoho ya dimɛna ya kandola akambo asɔ? Nzambi bu l’akambo wa kɔlɔ!—Romo 9:14-24.
‘Toyasukanya le Nzambi’
18 Dia sho sala akambo la shamanya, ekɔ ohomba sho ndjasukanya le Jehowa. Tatohɛke dia Satana ekɔ lo sala tshɛ kende l’akoka wa sala dia ndanya diɔtɔnganelo di’ɔlɔlɔ diele lam’asaso la Jehowa. Satana nangaka tetawoya di’ekomelo hayaki pondjo, ndo ɔnɛ ndoko ohomba sambisha lokumu l’ɔlɔlɔ kana sɛna lo yoho yɔtɔnɛ l’atɔndɔ wa lo Bible. Koko nde ‘ekɔ kanga kashi ndo she kashi.’ (Joani 8:44) Sho pombaka ndjashikikɛ dia ‘ndɔshana la Diabolo.’ Hatohombe pondjo mbɔsa diɔtɔnganelo diasaso la Jehowa oko ɛngɔ k’anyanya. Bible tokeketshaka la ngandji tshɛ ɔnɛ: ‘Nyosukane le Nzambi, ko nde ayosukana oya le nyu.’ (Jakoba 4:7, 8) Ngande wakokayɛ ndeka ndjasukanya le Jehowa na?
19 Ekɔ ohomba efula kanaka yimba lo dɔmbɛlɔ. Naka wɛ ambɛna di’ekakatanu wa lo lɔsɛnɔ wamboleka kohelenganya, kete diholɛ Jehowa otema ayɛ. Naka wɛ mbuta shikaa kɛnɛ keyɛ l’ohomba, kete ayonga wɔdu le yɛ dia wɛ mɛna dia nde ambokadimola l’alɔmbɛlɔ ayɛ. Okadimwelo hatongaka nshi tshɛ kɛnɛ kele lo wɔɔngɔ ayɛ, koko naka nsaki kayɛ ekɔ ka mbosha nɛmɔ ndo ka nama olowanyi ayɛ, kete nde ayokosha ekimanyielo kele layɛ ohomba woho wa wɛ mbeya mbikikɛ dimɛna. (1 Joani 5:14) Naka wɛ ekɔ lo mɛna ɛlɔmbwɛlɔ kande lo lɔsɛnɔ layɛ, kete wɛ ayoyasukanya le nde. Kana yimba dimɛna la waonga ndo la mboka ya Jehowa oko wɔkɛnɛmɔmiyɔ lo Bible, ekɔ nto ohomba. Okanelo wa yimba wa ngasɔ ayokokimanyiya dia mbêya dimɛna; dui sɔ diayonanda otema ayɛ ndo diayofudia ngandji kayɛ otsha le nde. (Osambu 19:14) Oleki ɛngɔ kekina tshɛ, ngandji kɛsɔ ayokokimanyiya dia shika tanga l’ehemba ndo dia wɛ tetemala sungukala.—1 Joani 5:3.
20 Dia ndjasukanya le Jehowa, ekɔ nto ohomba ndjasukanya le anyaso atɛmɔdi. Dui sɔ mbayotɔkɛtshanya l’etenyi k’ekomelo ka biukubuku nyɛ.
WEMBOLA WA WEKELO
• Akasale Yeso lam’akinde l’atei w’asui woleki tshɛ wolo suke l’ekomelo ka lɔsɛnɔ lande la lanɛ la nkɛtɛ, ndo akandakeketsha ambeki ande dia sala? (Od. 1-4)
• Bonde kasɔmana Satana l’atɛmɔdi wa Jehowa ndo lo toho takɔna tatohembande? (Od. 5-8)
• Dia shika tanga l’ehemba, bonde kahombaso tetemala nɔmba (Od. 9-12), monga l’ekanelo k’ɔlɔlɔ lo kɛnɛ kalongamɛso (Od. 13-15), mbohɔ akambo amɔtshi (Od. 16-17), ndo ‘ndjasukanya le Nzambi’ (Od. 18-20)?
[Kiombo ya lo lɛkɛ 25]
Akambo amɔtshi wakɔmɔla anto etema
Yonge ya demba/Lotshundu. Naka tekɔ lo sowa la hemɔ kɛmɔtshi kahakɔnɔ esadi kana lotshundu otodjɛ wekamu ɛmɔtshi, kete akambo asɔ koka tɔkɔmɔla otema nɛ dia taya bu l’akoka wa kambɛ Nzambi efula.—Heberu 6:10.
Lonyangu. Sho koka kɔm’otema naka anto yema tshitshɛ tsho mbetawɔ losango latatasambisha l’oma l’Ɔtɛkɛta wa Nzambi.—Tukedi 13:12.
Ndjaɔsa oko ɛngɔ k’anyanya. L’ɔtɛ w’ɛnɔnyi efula w’ɔhɛnyɔhɛnyɔ, onto mbeyaka ndjota dia nde halangema, kânga oma le Jehowa.—1 Joani 3:19, 20.
Tokanyi tasha pâ l’asolo. Naka onto ɔmɔtshi onyande ombetawudi ambosalɛ kɔlɔ k’efula, nde koka monga la lonyangu l’efula lakoka mbotshutshuya dia tshika mbɔtɔka lo nsanganya y’Akristo kana tomba l’esambishelo.—Luka 17:1.
Ɔhɛnyɔhɛnyɔ. Anto akina wele bu la yɛ mbetawɔ ɔtɔi koka kɔlɔsha, kɔhɛnyahɛnya, kana kɔ̂nyɔla.—2 Timote 3:12; 2 Petero 3:3, 4.
[Osato wa lo lɛkɛ 26]
Yeso tokeketshaka dia ‘tetemala nɔmba’ dia kondja ekimanyielo ka ndɔshanaka l’ehemba