Kanyiya akambo wa nyuma kele onga la lɔsɛnɔ!
‘Kanyiya akambo wa nyuma ele lɔsɛnɔ.’—ROMO 8:6.
1, 2. Lo ndjela Bible otshikitanu akɔna wele lam’asa ‘demba’ la ‘nyuma’?
NAMA lɔkɛwɔ la pudipudi la ntondo ka Nzambi l’atei wa tshunda di’anto diambolana nɛ diele anto ndjashaka tshɛ lo nsaki ya demba kema dikambo dia tshitshɛ. Koko, Afundelo mɛnyaka otshikitanu wele lam’asa ‘demba’ la ‘nyuma,’ lo mɛnya hwe etombelo wakomɛ onto letawɔ dia demba diande dia pɛkato mbâhemɛ la ɛtshɔkɔ wakondja onto letawɔ sɛngiyama la nyuma k’ekila kaki Nzambi.
2 Oko ɛnyɛlɔ, Yeso Kristo akate ate: “Nyuma katushan[a]ka lumu; dimba hatshi dikambu. Aui wakamanyutedi mbeli nyuma la lumu.” (Joani 6:63) Ɔpɔstɔlɔ Paulo akafundɛ Akristo wa la Ngalatiya ate: “Ne dia dimba dieko la saki kutshikitanyi la [n]yuma, ndu [n]yuma eko la saki kutshikitanyi la dimba. Vo ahendi wambutshikitana.” (Ngalatiya 5:17) Paulo nde lawɔ akate ate: “Ne dia one latuneka lu dimba diandi, ayuna ehondelo uma lu dimba. Keli one latuneka lu [n]yuma, ayuna lumu la pundju uma le [n]yuma.”—Ngalatiya 6:8.
3. Kakɔna kele ohomba dia sho ndjatshungola oma lo nsaki ndo tokanyi ta kɔlɔ?
3 Nyuma k’ekila kaki Jehowa, mbut’ate wolo ande wakamba olimu, kokaka munula ‘nsaki ya demba’ ya kɔlɔ ndo tokimanyiya di’aha demba diaso nɛ dia pɛkato tahemɛ. (1 Petero 2:11) Dia sho ndjatshungola oma lo tokanyi ta kɔlɔ, ekɔ ohomba sho kondja ekimanyielo ka nyuma kaki Nzambi, nɛ dia Paulo akafunde ate: ‘Kanyiya akambo wa demba ele nyɔi, ndo kanyiya akambo wa nyuma ele lɔsɛnɔ ndo wɔladi.’ (Romo 8:6) Ko kanyiya akambo wa nyuma kɛdikɛdi na?
‘Kanyiya akambo wa nyuma’
4. Kakɔna kalembetshiya ‘kanyiya akambo wa nyuma’?
4 Lam’akafunde Paulo lo kɛnɛ kendana la ‘kanyiya akambo wa nyuma,’ nde akakambe la tshɛkɛta ya lo Grɛkɛ yɛnya “yoho ya kanyiya, mbidja yimba, . . . oweso, kombola, kana nsaki.” Vɛrbɛ mɔtshi yafɔna layɔ nembetshiyaka “kanyiya akambo lo yoho mɔtshi.” Ɔnkɔnɛ, kanyiya akambo wa nyuma nembetshiyaka mbahemamɛ, nɔmbwama, ndo tshutshuyama la wolo waki Jehowa wakamba olimu. Dikambo sɔ nembetshiyaka dia sho mbetawɔka la lolango laso shamɛ dia yimba yaso, tokanyi, ndo eyango aso sɛngiyama tshɛ lo tshɛ la nyuma k’ekila kaki Nzambi.
5. Polo lo yɛdikɔ yakɔna yahombaso sɛngiyama la nyuma k’ekila?
5 Paulo akatɛtɛ dia mɛnya polo ndo lo yɛdikɔ yakɔna yahombaso mbetawɔ sɛngiyama la nyuma k’ekila lam’akandate dia sho monga ‘ɛhɔmbɔ waki nyuma.’ (Romo 7:6) Oma lo mbetawɔ kawɔ l’olambo wa tshungo waki Yeso, Akristo wakatshungɔ oma lo lɔhɔmbɔ la pɛkato ndo ‘wakavu’ lo eongelo kawɔ k’edjedja, mbut’ate ka woho wakiwɔ oko fumbe ya pɛkato. (Romo 6:2, 11) Wanɛ wambovɔ lo yoho ya didjidji shɔ wekekɔ la lɔsɛnɔ lo demba ndo kakianɛ waya la lotshungɔ la ndjela Kristo oko ‘ɛhɔmbɔ w’akambo wosembwe.’—Romo 6:18-20.
Otshikitanu wa diambo
6. Otshikitanu akɔna wakasale wanɛ wakakome ‘ɛhɔmbɔ w’akambo wosembwe’?
6 Tshika dia monga ‘ɛhɔmbɔ wa pɛkato’ ko kambɛ Nzambi oko ‘ɛhɔmbɔ w’akambo wosembwe’ ekɔ mɛtɛ dikambo dia diambo. Lo kɛnɛ kendana l’anto amɔtshi wakasale etshikitanu wa ngasɔ, Paulo akafunde ate: ‘Nyu nyakayaɛda, nyakakidiama, nyakayindjama lo lokombo la Nkumadiɔndjɔ Yeso Kristo, la le nyuma ka Nzambi kaso.’—Romo 6:17, 18; 1 Koreto 6:11.
7. Lande na kahombaso mɛna akambo oko awaɛna Jehowa?
7 Dia mbeya sala otshikitanu wa diambo wa ngasɔ, sho pombaka ntondo mbeka dia mbeya woho wɛna Jehowa akambo. Ambeta ɛnɔnyi nkama wele omembi w’esambo Davidi akalɔmbɛ Nzambi l’etete tshɛ ate: “Umbetsha mbuka yaye [wɛ Jehowa]. Onombolaki lu mete kaye, umbetshaki.” (Osambu 25:4, 5) Jehowa akoke dɔmbɛlɔ diaki Davidi, ndo Nde kokaka mboka alɔmbɛlɔ wa woho ɔsɔ wɔlɔmba ekambi ande wa nshi nyɛ. Lam’ele mboka yaki Nzambi ndo akambo ande wa mɛtɛ wekɔ pudipudi ndo ekila, kana l’akambo asɔ yimba, ayotokimanyiya efula wonya wahembamaso dia ngɛnyangɛnya nsaki ya mindo ya demba.
Ɔkɛndɛ w’ohomba wele l’Ɔtɛkɛta waki Nzambi
8. Bonde kahombaso mbeka Bible?
8 Bible, Ɔtɛkɛta waki Nzambi, akafundama oma lo wolo wa nyuma kande. Ɔnkɔnɛ, yoho mɔtshi yahombaso tshika dia nyuma monga la shɛngiya le so ele oma lo wadielo ndo wekelo wa Bible wa lushi la lushi, naka kokaka. (1 Koreto 2:10, 11; Efeso 5:18) Naka sho ndodja timba ndo etema aso l’akambo wa mɛtɛ ndo l’atɔndɔ wa lo Bible, kete tayeya woho wa shika ekolo la ntondo k’ehemba wendana la lonyuma laso. Eelo, lam’ahembamaso dia sala akambo wa mindo, nyuma kaki Nzambi kokaka tohola waohwelo kana atɔndɔ amɔtshi wa l’Afundelo wakoka keketsha yɛdikɔ yakatɔshi ya salaka akambo wɔtɔnganɛ la lolango laki Nzambi. (Osambu 119:1, 2, 99; Joani 14:26) Ɔnkɔnɛ, sho hatokesama dia ndjela akambo wa kɔlɔ.—2 Koreto 11:3.
9. Ngande wakeketsha wekelo wa lo Bible yɛdikɔ yaso ya nama diɔtɔnganelo diasaso la Jehowa?
9 Etena kekaso Afundelo l’otema ɔtɔi ndo l’etete l’ekimanyielo k’ekanda walembetshiya awui wa lo Bible, nyuma kaki Nzambi sɛngiyaka timba ndo etema aso, lo tokimanyiya dia sho nɛnya adjango waki Jehowa lo yɛdikɔ y’efula. Kɛsɔ ndjokonyaka diɔtɔnganelo diasaso la Nzambi ɛngɔ koleki ohomba lo lɔsɛnɔ laso. Lam’ahomanaso l’ehemba, tatokanyiyake ɔngɛnɔngɛnɔ wakokaso ndjokondja naka sho ndjakimɔ lo tshelo shɔ ya kɔlɔ. Koko, tokane yimba mbala kakɔ ɔtɔi dikambo dia kɔlamelo yaso otsha le Jehowa. Lowando l’efula lele laso lo diɔtɔnganelo diele lam’asaso la nde tokeketshaka dia ndɔshana la tokanyi takoka ndjolanya diɔtɔnganelo sɔ.
“Ndi ngandji katumukaka elembe aye li!”
10. Bonde kele kitanyiya ɛlɛmbɛ waki Jehowa ekɔ ohomba dia sho kanyiya akambo wa nyuma?
10 Dia sho kanyiyaka akambo wa nyuma, aha ewo k’Ɔtɛkɛta waki Nzambi keto mbele ohomba. Nkumekanga Sɔlɔmɔna akashihodiaka wadjango waki Jehowa dimɛna, koko nde akahekɔ mbakitanyiya oya l’ekomelo ka lɔsɛnɔ lande. (1 Khumi ya Dikanga 4:29, 30; 11:1-6) Naka tekɔ la lonyuma la dimɛna, kete tayɛna ohomba aha tsho wa mbeya kɛnɛ kata Bible koko ndo wa kitanyiya ɛlɛmbɛ waki Nzambi l’otema ɔtɔi. Mbut’ate sɛdingolaka wadjango waki Jehowa l’otema ɔtɔi ndo ndjatshutshuyaka dia mbakitanyiya. Dionga dia ngasɔ mbaki l’omembi w’esambo. Nde akembe ate: “Ndi ngandji katumukaka elembe aye li! Vo mbatumukanaka yanyi tshe.” (Osambu 119:97) Lam’ayakiyanyaso mɛtɛ dia ndjela ɛlɛmbɛ waki Nzambi, sho totatɛka kɛnɛmɔla waonga waki Nzambi. (Efeso 5:1, 2) Lo dihole dia kotwama esadi eto l’akambo wa kɔlɔ, sho kɛnɛmɔlaka elowa wa nyuma, ndo nsaki ka ngɛnyangɛnya Jehowa, kɛsɔ tokimanyiyaka dia sho mboka ‘etsha wa demba’ ɔkɔngɔ.—Ngalatiya 5:16, 19-23; Osambu 15:1, 2.
11. Ngande wakokayɛ nembetshiya dia ɔlɛmbɛ waki Jehowa wasekɛ monanyi la loseka ekɔ tshondo y’ekokelo le so?
11 Ngande wakokaso monga la dilɛmiyɛlɔ ndo la ngandji k’efula k’ɛlɛmbɛ waki Jehowa na? Yoho mɔtshi ele sɛdingola ohomba w’ɛlɛmbɛ akɔ dimɛna dimɛna. Tɔshi ɛnyɛlɔ k’ɔlɛmbɛ waki Nzambi wata dia dieyanelo pombaka komɛ paka le wanɛ wambotshukana ndo wasekɛ monanyi la loseka. (Heberu 13:4) Onde kitanyiya ɔlɛmbɛ ɔsɔ tohandjɛka ɛngɔ kɛmɔtshi ka dimɛna? Onde Shɛso ka ngandji lele l’olongo otokoka mbidja ɔlɛmbɛ ɔmɔtshi watohandjɛ ɛngɔ kɛmɔtshi kele ohomba? Kema. Tênde kɛnɛ kakomɛ anto efula wahɔtɔnganyiya nsɛnɔ yawɔ l’ɛlɛmbɛ wa Jehowa wendana la lɔkɛwɔ. Vɔ ndjotshutshuyamaka dia minya waemi wakawɔshi aha la lolango lawɔ kana mbɔtɔ l’awala wewɔ watakoke ndo waha l’ɔngɛnɔngɛnɔ. Efula wakahombe mbodia ɔna laha la she kana la nyango. Ndo nto, wanɛ wasala loseka kana monanyi ndjadjaka lo wâle wa mbɔsa hemɔ yasambemɛ oma l’awui wa dieyanelo. (1 Koreto 6:18) Ndo naka okambi waki Jehowa ambosala loseka kana monanyi, kete dikambo sɔ mbeyaka monga l’etombelo wa kɔlɔ efula lo yimba yande. Lam’ahemba onto dia minya pâ yaya oma lo nkum’otema kele l’onongo nde kokaka ndala engondo ndo ndjakiyanya efula. (Osambu 32:3, 4; 51:3) Lâsɔ, shi tamboka hwe dia, ɔlɛmbɛ waki Jehowa washimba monanyi wakadjama dikambo di’ekokelo kaso? Eelo, tayokondja ɛlɔlɔ w’efula lo nama lɔkɛwɔ la pudipudi!
Tɔlɔmbɛ ekimanyielo ka Jehowa
12, 13. Lande na ekɔ ohomba nɔmba etena kɛnɛ kayaso la nsaki ya kɔlɔ lo wɛɔngɔ kana l’etema aso?
12 Dia kanyiya akambo wa nyuma, ekɔ mɛtɛ ohomba sho salaka dɔmbɛlɔ dia l’otema ɔtɔi. Ekɔ ɔlɔlɔ nɔmba ekimanyielo ka nyuma kaki Nzambi, nɛ dia Yeso akate ate: “Naka nyu . . . mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba [n]yuma k’[ekila]?” (Luka 11:13) Lo dɔmbɛlɔ, sho kokaka mɛnya woho wêndɛso le nyuma dia tɔ tokimanyiya lo kɛnɛ kendana la wɛɔdu aso. (Romo 8:26, 27) Naka tambɛna dia nsaki kana dionga dia kɔlɔ diaya la shɛngiya le so, kana naka ɔnangɛso ɔmɔtshi otokotola lo dikambo diakɔ, kete ayonga ɔlɔlɔ sho mbidja dikambo diakɔ l’alɔmbɛlɔ aso ndo nɔmba ekimanyielo kaki Nzambi dia tondoya nsaki kana tokanyi tɔsɔ.
13 Jehowa kokaka tokimanyiya dia sho ndjasha l’akambo wosembwe, wele pudipudi, wele ɔlɔlɔ, ndo wasungana tombɔma. Sunganaka mɛtɛ sho mbɔsɛngasɛnga l’otema ɔtɔi woho wa ‘wɔladi waki Nzambi’ nama etema ndo timba taso! (Filipi 4:6-8) Lâsɔ, nyɛsɔ tɔlɔmbake ekimanyielo ka Jehowa dia sho ‘ndjela akambo wosembwe, mamema Nzambi, monga la mbetawɔ, la ngandji, l’etetemalelo, ndo la memakana.’ (1 Timote 6:11-14) L’ekimanyielo ka Shɛso lele l’olongo, ekiyanu ndo ehemba hawotohama polo ndo lo vɔ tahemɛ. Koko, tayonga la lotui tshitshi l’oma le Nzambi lo nsɛnɔ yaso.
Tatonyangiyake nyuma
14. Bonde kele nyuma ka Nzambi ekɔ wolo watokimanyiya dia sho ndjaɛda?
14 Okambi waki Jehowa tshɛ wambotshunda kambaka la dako nɛ diaki Paulo diata ɔnɛ: ‘Tanyodimake dja ya nyuma.’ (1 Tesalonika 5:19) Lam’ele nyuma ka Nzambi ekɔ “nyuma k’akambu w’ekila,” tɔ kekɔ pudipudi, aha la vadi ndo ekila. (Romo 1:4) Lam’akambatɔ olimu l’etema aso, nyuma kɛsɔ mbɔsamaka oko wolo w’akambo w’ekila, kana wa pudipudi. Tɔ tokimanyiyaka dia sho tshikala lo mboka ka pudipudi, k’anto wele l’okitanyiya otsha le Nzambi, katɔla otsha lo lɔsɛnɔ. (1 Petero 1:2) Tshelo tshɛ ya mindo nyangiyaka nyuma, ndo yɔ kokaka monga l’etombelo wa kɔlɔ efula. Lo yoho yakɔna na?
15, 16. (a) Ngande wakokaso nyangiya nyuma ka Nzambi? (b) Ngande wakokaso mbewɔ dia nyangiya nyuma ka Jehowa?
15 Paulo akafunde ate: “Tanyunyangiaki nyuma k’[ekila] ka [Nzambi], nyu nyakadjama djimbitelu uma le ndi edja ndu lushi l’etshungwelu.” (Efeso 4:30) Afundelo mbɔsaka nyuma kaki Jehowa oko djembetelo, kana ‘didjidji dia kɛnɛ kahomba ndja,’ lo dikambo di’Akristo w’akitami w’esɔ. Ɔsɔ ekɔ lɔsɛnɔ l’otsha l’olongo lahawavu nto. (2 Koreto 1:22; 1 Koreto 15:50-57; Enyelo 2:10) Nyuma ka Nzambi kokaka nɔmbɔla akitami w’esɔ la anyawɔ wele l’elongamelo ka sɛna la nkɛtɛ oma lo kɔlamelo yawɔ ndo kokaka mbakimanyiya dia mbewɔ etsha wa kɔlɔ.
16 Ɔpɔstɔlɔ tewolaka lo kɛnɛ kendana la kashi, wovi, lɔkɛwɔ la sɔnyi, ndo akambo akina. Naka sho mbetawɔ kotwama l’akambo asɔ, kete hatotokitanyiya dako nɛ dia l’Ɔtɛkɛta waki Nzambi diakasambiyama oma lo wolo wa nyuma. (Efeso 4:17-29; 5:1-5) Sho mbeyaka ndjonyangiya nyuma ka Nzambi lo yɛdikɔ mɔtshi, sho pombaka mɛtɛ mbewɔ dikambo sɔ. Lo dikambo sɔ, naka ɔmɔtshi l’atei aso ayomɛ mɔnyɔla alako wa l’Ɔtɛkɛta waki Jehowa, kete lâsɔ tambomɛ kɛnɛmɔla waonga wakoka ndjotokonya lo sala pɛkato l’okonda ko Nzambi ndjotoka ɔkɔngɔ. (Heberu 6:4-6) Oyadi kânga polo ndo kakianɛ tatatshe pɛkato, sho kokaka kitanyiya dako sɔ. Naka sho tona ɛlɔmbwɛlɔ ka nyuma, kete tayokinyangiya. Ndo kete lâsɔ tambotona Jehowa ndo tambônyangiya, nɛ dia nde kele kiɔkɔ ya nyuma k’ekila. Oko weso anto woka Nzambi ngandji, sho hatolange pondjo sala ngasɔ. Lo dihole dia tsha ɔsɔku, sho pombaka nɔmba ekimanyielo kaki Jehowa di’aha sho nyangiya nyuma kande, koko dia sho monga l’akoka wa tombola lokombo lande l’ekila lo tetemala kanyiya akambo wa nyuma.
Totetemale kanyiya akambo wa nyuma
17. Naa eyango ɛmɔtshi wa lo nyuma wakokaso ndjadjɛ, ndo lande na sala ngasɔ ekɔ dui dia lomba?
17 Yoho ya dimɛna ya tetemala kanyiya akambo wa nyuma ele ndjadjɛ eyango wa lo nyuma ndo sala la wolo dia mbâkotsha. Lo ndjela ehomba ndo awui wele laso lo lɔsɛnɔ, sho koka ndjadjɛ eyango wa ndowanya mbekelo yaso yendana la wekelo, ndeka ndjasha l’olimu w’esambishelo, kana kondja diɛsɛ dimɔtshi dia lânde di’olimu, ɛnyɛlɔ kamba oko ombatshi mboka wa pondjo, kamba lo Bɛtɛlɛ, kana monga misiɔnɛrɛ. Naka sho sala ngasɔ, kete timba taso tayolola paka l’akambo wa nyuma ndo hatotɔkɔ lo wɛɔdu aso wa demba kana ndjadjɛ eyango wa kondja lomombo ndo ndjoyakimɔ lo nsaki y’akambo wa l’andja ɔnɛ yahɔtɔnɛ l’Afundelo. Ɔsɔ ekɔ mɛtɛ dui dia lomba, nɛ dia Yeso akatolake ate: “Tanyuyaumbelaki diango la kete, lene ukuki tumumbu la matadi dilanya, lene ukuki evi mbula mvudu la diva. Keli nyuyaumbeli diango l’ulungu, lene aheyi tumumbu kana matadi dilanya, lene aheyi evi mbula mvudu la diva. Ne dia len’eli diango diaye, kayuyala ndu utema aye.”—Mateu 6:19-21.
18. Bonde kele ekɔ ohomba efula tetemala kanyiyaka akambo wa nyuma lo nshi nyɛ y’ekomelo?
18 Kanyiya akambo wa nyuma ndo minya nsaki ya l’andja ɔnɛ oma lo wɛɔngɔ aso ekɔ mɛtɛ dui dia lomba diahombaso sala lo ‘nshi y’ekomelo’ nyɛ. (2 Timote 3:1-5) Lâdiko di’akambo asɔ tshɛ, “akambu wa la kete la saki yawo wayushila. Kele one latutshaka lulangu la [Nzambi] atuyalaka pundju.” (1 Joani 2:15-17) Naka ɔlɔngɔlɔngɔ w’Okristo ayoyadjɛ oyango wa kamba olimu wa lo tena tshɛ, kete dikambo sɔ mbeyaka monga oko tala diatɔ̂lɔmbɔla lo nshi yande y’ɔlɔngɔlɔngɔ yoludi l’ehemba. Lam’ayondɔsɛngiyama dia sekola ɛlɛmbɛ waki Nzambi, onto la ngasɔ ayonga la kanyi y’ɔlɔlɔ ya kɛnɛ kalangande kotsha l’olimu waki Jehowa. Onto la ngasɔ ayɛna dia ekɔ dui di’enginya dia nde mbikasha eyango wa lo nyuma ko mbɔtɔ lo tawesaka lomombo la l’emunyi kana ɛngɛnɔngɛnɔ wakokande kondja oma lo pɛkato. Tohɔ dia lonyuma l’ɔlɔlɔ mbakatshutshuya Mɔsɛ dia ‘sɔna dia sowa kâmɛ la wodja waki Nzambi lo dihole dia nde ngɛnangɛna l’ɔlɔ wa tshanda wa pɛkato.’ (Heberu 11:24, 25) Oyadi dikɛnda kana opalanga mbeso, sho koka sala ɔsɔnwɛlɔ akɔ wamɛ lam’atetemalaso kanyiya akambo wa lo nyuma lo dihole dia kanyiya akambo wa lo demba diaso nɛ dia kɔlɔ.
19. Wahɔ akɔna wayotokondja naka sho tetemala kanyiyaka akambo wa nyuma?
19 “Tukanyi ta dimba teli utunyi wa [Nzambi],” keli “tukanyi ta nyuma teli lumu la ki.” (Romo 8:6, 7) Naka sho tetemala kanyiya akambo wa nyuma, kete tayonga la wɔladi woleki tshɛ. Etema la timba taso tayokokamɛ tshɛ lo tshɛ oma lo shɛngiya ya eongelo kaso k’akanga wa pɛkato. Tayonga l’akoka wa shika tanga la ntondo k’ehemba watotshutshuya dia ndjakimɔ l’akambo wa kɔlɔ. Ndo Nzambi ayotokimanyiya dia tetemala lo ta diele lam’asa demba la nyuma.
20. Bonde kakokaso monga l’eshikikelo ɔnɛ sho koka mbidja otshumba lo ta diele lam’asa demba la nyuma na?
20 Lo tetemala kanyiya akambo wa nyuma, sho namaka losambi lele lam’asaso la Jehowa ɔnɛ lele kiɔkɔ ya lɔsɛnɔ ndo ya nyuma k’ekila. (Osambu 36:9; 51:11) Satana Diabolo nde l’ekambi ande wekɔ lo sala kɛnɛ tshɛ kewɔ la wolo wa sala dia ndanya diɔtɔnganelo diasaso la Jehowa Nzambi. Vɔ pembaka dia mbahemɛ timba taso, weya dia naka sho pekɔ, kete tayoyakonya atunyi waki Nzambi ndo tayoyodiakema. Koko sho kokaka mbidja otshumba lo ta nɛ diele lam’asa demba la nyuma. Kɛsɔ mbakakomɛ ndo Paulo, nɛ dia lam’akandafundaka dikambo diendana la ta diakandalɔ, nde akambola ntondo ate: “Akona ayutshungula uma lu dimba dia nyoi ne?” L’ɔkɔngɔ wa nde mɛnya dia nde akakoke kondja ekimanyielo, nde akate ate: “Lusaka le [Nzambi] uma le Jesu Kristu Khumesu!” (Romo 7:21-25) Sho lawɔ kokaka mbisha Nzambi losaka lo tshimbo ya Kristo lo woho wakandatosha dihomɔ dia sho ndɔshana la wɛɔdu wa demba ndo tetemala la kanyiya akambo wa nyuma tele l’elongamelo ka diambo ka lɔsɛnɔ la pondjo.—Romo 6:23.
Onde wɛ mbohɔka?
• Kanyiya akambo wa nyuma kɛdikɛdi na?
• Ngande wakokaso tshikɛ nyuma ka Jehowa diaso dia tɔ kamba olimu l’etema aso?
• Lembetshiya bonde kele, lo ta nɛ dialɔso la pɛkato, ekɔ ohomba sho mbeka Bible, kitanyiya ɛlɛmbɛ waki Jehowa, ndo mbɔlɔmbaka.
• Ngande wakoka eyango wa lo nyuma tokimanyiya dia tshikala lo mboka ka lɔsɛnɔ?
[Osato wa lo lɛkɛ 14]
Wekelo wa Bible tokimanyiyaka dia tondoya ehemba wendana la lonyuma laso
[Osato wa lo lɛkɛ 15]
Ekɔ ohomba nɔmba ekimanyielo ka Jehowa dia nɛdja nsaki ya kɔlɔ
[Esato wa lo lɛkɛ 16]
Eyango wa lo nyuma kokaka tokimanyiya dia tetemala kanyiya akambo wa nyuma