Akɔna ayotokakitola oma lo ngandji ka Nzambi na?
“Shu tatûlangaka, ne dia ndi akatulangi ntundu.”—1 JOANI 4:19.
1, 2. (a) Lande na mbeya ɔnɛ sho mbokamaka ngandji ekɔ ohomba efula le so? (b) Ngandji kaki na keso l’ohomba woleki?
ONDE ekɔ ohomba le yɛ dia mbeya ɔnɛ wɛ mbokamaka ngandji? Tatɛ oma lo dikɛnda polo l’opalanga, anto nangaka mbokama ngandji. Onde wɛ atɛnaka ombutshi a womoto ɛmbi ɔnande l’ashashi la ngandji tshɛ l’anya ande? Esangɔ efula, ɔna hadje ndo yimba lo kɛnɛ tshɛ keta suke la nde etena kawenda nyango la washo w’ɔmɔnɔmɔnɔ, nde ekɔ l’ɔlɔ ndo atoyaokaka lo wɔladi l’anya wa nyango lawoka ngandji. Onde wɛ akohɔ woho wakayadjɔdjɔka awɛlɛ lo nshi yayɛ y’ɔlɔngɔlɔngɔ? (1 Tesalonika 2:7) Mbala mɔtshi, ondo wɛ kombeyaka shikaa kɛnɛ kakayalangaka kana shihodia woho wakayokaka, koko aki mɛtɛ ohomba efula mbeya wate papa la mama kayɛ wakakokaka ngandji! Shi aki ekimanyielo ka woke dia mbeya ɔnɛ wɛ akakokaka mbatɛ okakatanu kana wombola tshɛ waki layɛ? Lo mɛtɛ, ohomba ɔmɔtshi l’atei w’ehomba aso woleki weke lo lɔsɛnɔ laso l’otondo ele mbokama ngandji. Ngandji ka ngasɔ toshikikɛka dia tekɔ lo mbɔsama la nɛmɔ.
2 Ngandji k’etete koka ambutshi ɔnawɔ kimanyiyaka efula di’ɔna pama ndo monga la lɔsɛnɔ l’oshika. Diakɔ diele, monga l’eshikikelo ɔnɛ Shɛso lele l’olongo, Jehowa tokaka ngandji ekɔ ohomba efula dia sho monga la lonyuma ndo la yimba ya dimɛna. Ondo ambadi amɔtshi wa jurunalɛ nyɛ komonga l’ambutshi wakakokɛka mɛtɛ dimɛna. Naka wɛ lawɔ ekɔ l’atei w’anto asɔ, kete tɔkɔmɔke otema. Oyadi kânga wɛ kokondja ambutshi wakoka ngandji kana kombokama ngandji lo yoho yahombama, eya dia ngandji ka kɔlamelo kaki Nzambi kayanga kotsha dikambo sɔ.
3. Ngande wakashikikɛ Jehowa ekambi ande ngandji kende latɔ otsha le wɔ?
3 Oma lo tshimbo y’omvutshi ande Isaya, Jehowa akɛnya dia ombutshi a womoto koka “mbuhela” ona lalɔnyande koko Jehowa hohɛki ekambi ande. (Isaya 49:15) Woho akɔ wamɛ mbele Davidi akate l’eshikikelo tshɛ ate: “Lam’amboseka papa la nyomi, [Jehowa] ayunungula.” (Osambu 27:10) Ande eshikikelo mɛtɛ! Oyadi awui akɔna wele layɛ, naka wɛ amboyakimɔka le Jehowa Nzambi, kete wɛ pombaka mbohɔka lushi tshɛ dia ngandji kakokande ndeka ngandji tshɛ kakoka oseka woho w’onto tshɛ koka!
Yalama lo ngandji ka Nzambi
4. Ngande wakawashikikɛ Akristo wa lo ntambe ka ntondo lo dikambo dia ngandji ka Nzambi?
4 Etena kakɔna kakayeye ngandji ka Jehowa mbala ka ntondo? Ondo lo yɛdikɔ mɔtshi, woho wakeye Akristo wa lo ntambe ka ntondo ngandji kɛsɔ mbakayeye ndo wɛ. Tshapita ya tanu ya mukanda waki Paulo otsha le ase Rɔma kɔndɔlaka lo yoho ya dimɛna efula woho wele atshi wa pɛkato wakayanganya la Nzambi ntondo wakayokoma lo mbeya ngandji ka Jehowa. Lo divɛsa dia 5, sho mbadiaka ɔnɛ: “[Nzambi] ambutshulula ngandji kandi l’etema asu uma le nyuma [k’ekila] kakandatusha.” Lo divɛsa 8, Paulo mbutaka nto ate: “Keli [Nzambi] akatenya ngandji kandi ne dia Kristu akatuvwela lam’akisu antu wa kolo.”
5. Ngande wakayakome lo shihodia ndo monga la lowando lo woke woke wa ngandji kaki Nzambi?
5 Lo woho akɔ wamɛ mbele, etena kakawakɛ̂nya akambo wa mɛtɛ w’oma l’Ɔtɛkɛta wa Nzambi ndo kakayatatɛ monga la mbetawɔ, nyuma k’ekila kaki Jehowa kakatatɛ kamba olimu l’otema ayɛ. Lo woho ɔsɔ mbakayatatɛ shihodia ndo monga la lowando lo woke woke wa kɛnɛ kakasale Jehowa lo toma Ɔnande la ngandji dia nde ndjovɔ dikambo diayɛ. Ɔsɔku mbakakokimanyiya Jehowa dia wɛ mbeya shikaa woho wele ngandji k’efula kokande anto. Etena kakayeye dia kânga mbakayotɔ ele kanga pɛkato langanyi etale la nde, Jehowa akadihwɛ anto mboka dia vɔ koma akanga wa losembwe wele l’elongamelo ka monga la lɔsɛnɔ laha l’ekomelo, onde dikambo sɔ komunanda otema ayɛ? Onde wɛ kotshutshuyama dia mboka Jehowa ngandji?—Romo 5:10.
6. Lande na kakokaso ndjaoka lo tena dimɔtshi dia tambangana la Jehowa lo yɛdikɔ mɔtshi?
6 Oko wakayakotɔma diɛsɛ oma lo ngandji ka Shɔ lele l’olongo ndo wakayatshikitanya lɔsɛnɔ layɛ l’oyango wa mbetawɔma le nde, wɛ akayokomaka dia kimɔ lɔsɛnɔ layɛ le Nzambi. Kakianɛ wɛ aya la wɔladi lam’asayɛ la Nzambi. Ko, onde tena dimɔtshi wɛ ndjoyaokaka lo yɛdikɔ mɔtshi di’oko wɛ ambangana etale la Jehowa? Dikambo sɔ koka tokomɛ sho tshɛ. Koko, ohɔka nshi tshɛ dia Nzambi hatshikitana. Ngandji kande kekɔ nshi tshɛ ndo hatotshikitana oko wele wonya hatshikaki pondjo dia toma esase awɔ oya lanɛ la nkɛtɛ. (Malaki 3:6; Jakoba 1:17) Lo wedi okina, sho koka tshikitana kânga lo tshanda mɔtshi tsho. Etena katshimba nkɛtɛ, kahende ɔtɔi ka diangɔ diele l’okama akɔ mongaka lo wodjima. Woho akɔ wamɛ mbele, naka sho mboka Nzambi ɔkɔngɔ, kânga lo tshanda mɔtshi tsho, kete sho koka mboka di’oko diɔtɔnganelo diasaso lande diaya lo wâle. Akokaso sala dia nɔngɔsɔla dikambo sɔ na?
7. Ngande wakoka ndjasɛdingola ka shamɛ tokimanyiya dia kakatanaka la ngandji ka Nzambi?
7 Naka toka di’oko tambangana yema la ngandji ka Nzambi, kete toyambole ɔnɛ: ‘Onde lakatetemala la mbɔsa ngandji ka Nzambi la nɛmɔ? Onde lekɔ lo toke Nzambi kasɛna ndo ka ngandji ɔkɔngɔ yema yema lo yɛdikɔ mɔtshi lo mɛnya lo weho efula dia laya la mbetawɔ ka wɔdu? Onde lambodja yimba yami lo “akambu wa dimba,” lo dihole dia “akambu wa nyuma”?’ (Romo 8:5-8; Heberu 3:12) Naka takayanganya shamɛ oma le Jehowa, kete sho koka sala dia nɔngɔsɔla akambo ndo monga nto la diɔtɔnganelo dia wolo ndo di’oshika sho la nde. Jakɔba tɔlɔmbaka ate: “Nyusukani la [Nzambi], ku ndi ayusukana le nyu.” (Jakoba 4:8) Yela ɛtɛkɛta ɛnɛ waki Juda wata ɔnɛ: “Keli nyu, elangimi ami, nyuyaudia lu mbetawo kanyu kuleki ekila; nyolombaki le [nyuma k’ekila]. Nyuyalamaki lu ngandji ka [Nzambi].”—Jude 20, 21.
Otshikitanelo w’akambo hatshikitanya ngandji ka Nzambi
8. Naa etshikitanu wokoki tokomɛ la shashimoya lo nsɛnɔ yaso?
8 Lɔsɛnɔ laso la lo dikongɛ nɛ di’akambo mongaka l’etshikitanu efula. Nkumekanga Sɔlɔmɔna akate ate: ‘Tena l’akambo wa shashimoya tokomɛka sho tshɛ.’ (Undaki 9:11) Lɔsɛnɔ laso mbeyaka tshikitana tshɛ lo tshɛ lo shashimoya. Ɛlɔ mbeyaka monga ko tekɔ demba dimɛna, loyi ko tambondama la hemɔ ka wolo. Ɛlɔ sho mbeyaka mɛna dia tekɔ l’olimu wa shikaa, koko lushi lokina sho mbeyaka pomba olimu. Aha la sho mbeya, nyɔi koka tɔhɔtɔla lakiso ɔmɔtshi la ngandji. Akristo wa lo wodja ɔmɔtshi koka monga la wɔladi lo tena dimɔtshi, ko l’etena kekina ɛhɛnyɔhɛnyɔ ndjakomɛ la shashimoya. Anto mbeyaka tohindɛ akambo ndo sho soyama l’ɔtɛ wa dikambo sɔ. Eelo, lɔsɛnɔ kema shikaa ndo lɔ kema l’eshikikelo ka tshɛ.—Jakoba 4:13-15.
9. Lande na kele ekɔ dimɛna sɛdingola etenyi ka Romo tshapita 8?
9 Etena katokomɛ akambo wa kɔlɔ, sho koka ndjaoka di’oko tambokalema, ndo fɔnya dia ngandji ka Nzambi oya le so kambokitakita. Lam’ele akambo wa ngasɔ tokomɛka sho tshɛ, sho pombaka sɛdingola ɛtɛkɛta w’esambelo waki ɔpɔstɔlɔ Paulo wofundami lo Romo tshapita 8 la yambalo tshɛ. Akristo w’akitami w’esɔ mbakawafundɛ ɛtɛkɛta ɛsɔ. Koko, vɔ mendanaka nto la wanɛ wele l’atei w’ɛkɔkɔ ekina, wambokoma akanga wa losembwe ndo angɛnyi waki Nzambi oko waki Abarama lo tena dia la ntondo k’etena k’Akristo.—Romo 4:20-22; Jakoba 2:21-23.
10, 11. (a) Akambo akɔna wamamatanyɛ atunyi ekambi waki Nzambi lo tena dimɔtshi? (b) Lande na kele emamatanya ɛsɔ kema dikambo di’ohomba le Akristo na?
10 Adia Romo 8:31-34. Paulo mumbolaka ate: “Naka [Nzambi] eko la su wedi ayeya ntahamela na?” Mɛtɛ, Satana nde l’andja ande wa kɔlɔ wekɔ lo tɔlɔsha. Atunyi mbeyaka tohindɛ akambo, kânga le tuminadi ta lo wodja. Wakahindɛ ambutshi amɔtshi w’Akristo ɔnɛ vɔ petshaka anawɔ dikambo hawetawɔ dia vɔ mbasha esakelo kasekola ɛlɛmbɛ waki Nzambi kana ɔnɛ vɔ mbashimbaka dia sala afɛstɔ w’apanganu. (Etsha 15:28, 29; 2 Koreto 6:14-16) Wakamamatanyiya Akristo akina wa kɔlamelo ɔnɛ wekɔ atɔmbɔki nɛ dia wakatone ndjaka asekawɔ anto l’ata kana ndjatambiya l’awui wa pɔlitikɛ. (Joani 17:16) Atunyi amɔtshi wakahandjola awui wa kashi lo tita sango ndo wakahindɛ Ɛmɛnyi wa Jehowa ɔnɛ wekɔ ɔtɛmwɛlɔ wa wâle.
11 Koko, tatohɛke dia lo nshi y’apɔstɔlɔ, wakataka vate: “Lu ahuli tshe, antu mvutaka aui wa kolo lu dikambu diawo.” (Etsha 28:22) Onde ekɔ ohomba efula mbidja yimba l’awui wa kashi watohindɛwɔ asɔ? Nzambi ndamɛ mbayindja Akristo wa mɛtɛ lo ndjela mbetawɔ kawɔ l’olambo wa Kristo. Lande na kokoki Jehowa tshika dia mboka atɛmɔdi ande ngandji l’ɔkɔngɔ wa nde mbasha woshasha woleki oshinga wolo, mbut’ate Ɔnande ɛtɔi la ngandji na? (1 Joani 4:10) Etena kɛnɛ kele Yeso akashile la mbolwama oma l’edo ndo kitshama lo lonya l’omi la Nzambi, nde ekɔ lo sukɛ Akristo la wolo tshɛ. Akɔna akoka shimba Kristo dia nde sukɛ ambeki ande kana shimba Nzambi dia nde nyindja ekambi ande wa kɔlamelo na? Ndoko onto!—Isaya 50:8:9; Heberu 4:15:16.
12, 13. (a) Naa akambo kana ekakatanu wahakoke tokakitola oma lo ngandji ka Nzambi? (b) Oyango akɔna wele la Diabolo etena katelande ekakatanu? (c) Lande na kayohomba Akristo mbidja otshumba wa woke?
12 Adia Romo 8:35-37. Lo wedi aso, onde ekɔ onto ɔmɔtshi kana ɛngɔ kɛmɔtshi kakoka tokakitola oma lo ngandji ka Jehowa ndo k’Ɔnande, Kristo Yeso? Satana mbeyaka kamba l’anto ande wa la nkɛtɛ dia mbela Akristo ekakatanu efula. Lo ntambe yakete, efula k’anangɛso l’akadiyɛso w’Akristo wakasoyama wolo lo wedja efula. L’ahole amɔtshi ɛlɔ kɛnɛ, anangɛso wekɔ lo diɛnɛ lushi la lushi l’okakatanu wendana l’ekondjelo. Amɔtshi wekɔ lo mɛna pâ la ndjala kana l’otaka w’ahɔndɔ. Oyango akɔna wele la Satana lam’elande asui wa weho ɛsɔ na? Oyango ande ɔmɔtshi ele wa kɔmɔla atɛmɔdi wa mɛtɛ waki Jehowa otema. Satana nangaka tetawoya dia ngandji kaki Nzambi oya leso kambɔla yɔɔ. Ko onde ɔsɔku mbediɔ?
13 L’ɛnyɛlɔ ka Paulo lakavusola kɛnɛ kakafundama l’Osambu 44:22, sho takeke Ɔtɛkɛta wa Nzambi wakafundama. Sho shihodiaka dia l’ɔtɛ wa lokombo laki Nzambi mbatokomɛ akambo anɛ nɛ dia tekɔ “ekoko” ande. Ekidiamelo ka lokombo laki Nzambi ndo oyindjamelo wa lowandji lande la l’andja w’otondo mendanaka la dikambo nɛ. Ekɔ nɛ di’akambo asɔ wa weke mbaketawɔ Nzambi di’ehemba tokomɛ koko aha nɛ dia nde hayotoka ngandji. Oyadi woho w’ekakatanu wakoka monga, tekɔ l’eshikikelo k’ɔnɛ ngandji koka Nzambi ekambi ande, mbidja ndo kokande onto tshɛ la l’atei aso, hatshikitana. Oseka dikambo tshɛ diokoki mɛnama di’oko tambɔlɛndjama ayokadimɔ otshumba wa woke naka hatoshishisha kɔlamelo yaso. Sho kondjaka ekeketshelo ndo osukɔ oma l’eshikikelo k’ɔnɛ ngandji ka Nzambi kayotshikalaka nshi tshɛ.
14. Lande na kaki Paulo l’eshikikelo lo dikambo dia ngandji ka Nzambi kânga mbakakokaka Akristo diɛnɛ l’asui?
14 Adia Romo 8:38, 39. Kakɔna kaketawoya Paulo dia ndoko ɛngɔ kakoka kakitola Akristo oma lo ngandji ka Nzambi? Aha la tamu, awui wakɛnyi Paulo ndamɛ etena kakandakambaka olimu ande akaleke keketsha eshikikelo kande k’ɔnɛ asui hawokoke minya ngandji ka Nzambi oma le so. (2 Koreto 11:23-27; Filipi 4:13) Ndo nto, Paulo akeyaka sangwelo diaki Jehowa dia pondjo ndo woho wakandakɛndakɛnda l’ekambi Ande lo nshi yakete. Onde nyɔi koka mbidja ngandji ka Nzambi otshumba dikambo dia wanɛ wakokambɛ la kɔlamelo? Ndoko yema! Anto wa kɔlamelo wavɔ wekɔ lo yimba yaki Nzambi ya kokele ndo nde ayowaolola l’etena kakandashikikɛ.—Luka 20:37, 38; 1 Koreto 15:22-26.
15, 16. Shila diangɔ dimɔtshi diahakoke pondjo pembola ngandji ka Nzambi otsha le ekambi ande.
15 Oyadi dikambo diakɔna dia kɔlɔ diakoka tokomɛ lo lɔsɛnɔ ɛlɔ kɛnɛ kana mpokoso kɛmɔtshi, hemɔ ka nyɔi, kana pâ kendana l’ekondjelo, ndoko dikambo diakoka ndanya ngandji ka Nzambi oya le ekambi ande. Andjelo wa nkudu, ɛnyɛlɔ oko ondjelo w’ɔtɔmbɔki wakayokomaka Satana, hakoke tshutshuya Jehowa dia nde tshika dia mboka ekambi ande wakayakimɔ le nde ngandji. (Jobo 2:3) Lɛɛta mbeyaka shimba olimu aso, tondja lo kanu kana pɛnyahɛnya ekambi waki Nzambi ndo nteta ɔnɛ tekɔ wa “persona non grata” mbut’ate anto wahalangema. (1 Koreto 4:13) Lohetsho l’oma le wedja laheyama bonde lɔsɔ koka ndjotshutshuya anto di’aha vɔ tohokamɛ, koko halotshutshuya Owandji wa l’andja w’otondo dia nde tokalɛ.
16 Oko weso Akristo, hatohombe mboka ndoko wɔma ɔnɛ akambo wakelɛ Paulo ate: “akambu wa kakiane,” mbut’ate awui weta ndo awui wa lo lɔsɛnɔ, la akambo wa l’andja ɔnɛ kana “akambu wayayi” lo nshi yayaye koka pembola omamemelo waki Nzambi oya le ekambi ande. Kânga mbatɔlɔsha nyuma ya loowa ndo anto wa la nkɛtɛ nyɛ, ngandji k’oshika katoka Nzambi tosukɛka. Oyadi “utali, kuyanga ohongo,” hawokoke tanganya la ngandji ka Nzambi oko wakashikikɛ Paulo. Eelo, ndoko ɛngɔ ɔtɔi, oyadi kɛnɛ katɔkɔmɔla otema kana kele la shɛngiya y’efula leso kakoka tokakitola oma lo ngandji ka Nzambi; ndo ndoko etongami ɔtɔi kakoka pembola diɔtɔnganelo di’asa Otungi nde l’ekambi ande wa kɔlamelo. Ngandji ka Nzambi hashilaki ndoko lushi; tɔ kekɔ pondjo pondjo.—1 Koreto 13:8.
Tɔshi ɔlɔlɔ w’otema waki Nzambi la nɛmɔ pondjo pondjo
17. (a) Lande na kele monga la ngandji ka Nzambi ‘ndeka lɔsɛnɔ ɔlɔlɔ’? (b) Ngande wɛnyaso dia sho mbɔsaka ngandji ka Nzambi la nɛmɔ?
17 Ohomba akɔna wele la ngandji ka Nzambi le yɛ na? Onde wɛ ndjaokaka oko Davidi lakafunde ate: “Elomo ami wayukutumbulaka, ne dia ngandji kaye ka shikaa kuleki lumu ololo. Dimi layediaka anya ami lu lukumbu laye, layukutumbulaka lam’ekimi la lumu.” (Osambu 63:3, 4) Lo mɛtɛ, onde ekɔ ɛngɔ kɛmɔtshi ka lo lɔsɛnɔ kakoka andja ɔnɛ tosha ko mbɛdima la mbokama ngandji oma le Nzambi ndo monga la diɔtɔnganelo di’oshika la nde? Ɛnyɛlɔ, onde kamba olimu wa l’emunyi watondja falanga efula koka ndeka monga la ki ka lo yimba ndo ɔngɛnɔngɛnɔ waya oma lo diɔtɔnganelo di’oshika la Nzambi? (Luka 12:15) Akristo amɔtshi wakonge la ntondo k’akambo wakawahombe sɔna lam’asa tona Jehowa la ndjakema. Dikambo sɔ diakakomɛ Ɛmɛnyi wa Jehowa efula lo pango ya nkanu y’aseka Nazi lo nshi yakalɔmaka Ta dia Hende dia l’Andja w’Otondo. Efula k’anangɛso w’Akristo wakasɔnɛ dia tshikala lo ngandji ka Nzambi, lo mbetawɔ dia ndjakema naka kokaka. Wanɛ wakatshikala la kɔlamelo tshɛ lo ngandji kande koka monga l’eshikikelo ka kondja lɔsɛnɔ la pondjo oma le Nzambi lo nshi yayaye. Ɔsɔ ekɔ engɔ kahakoke andja ɔnɛ tosha. (Mako 8:34-36) Koko tayokondja diangɔ efula, aha paka lɔsɛnɔ la pondjo loto.
18. Lande na kele lɔsɛnɔ la pondjo dimɛna efula?
18 Kânga mbahatakoke sɛna pondjo pondjo aha l’ekimanyielo ka Jehowa, ohokanyiya ngande wotokoka monga lɔsɛnɔ l’otale efula naka aha Otungi aso. Lɔ lotonga ɛngɔ kɛmɔtshi k’anyanya kele bu l’oyango wa shikaa. Jehowa akasha ekambi ande olimu washa ɔngɛnɔngɛnɔ wa sala lo nshi y’ekomelo nyɛ. Ɔnkɔnɛ, sho koka monga l’eshikikelo ɔnɛ etena kasha Jehowa lɔsɛnɔ la pondjo nde lele Shakasaka lakotsha asangwelo ande, lɔsɛnɔ lakɔ layolola la diangɔ dia diambo, diasungana sho dieka ndo disala. (Undaki 3:11) Koko, oyadi efula k’akambo wayoteka l’edja k’ɛnɔnyi kinunu wele la ntondo kaso, hatokokaki pondjo shihodia “wuki w’ongonyi wa yimba ndu wa ewu ka [Nzambi]” tshɛ lo tshɛ.—Romo 11:33.
Shɛso kokaka ngandji
19. Naa eshikikelo kakasha Yeso Kristo ambeki ande?
19 Lo Ngɔndɔ ka Nisana 14, l’ɔnɔnyi wa 33 T.D., lo dikɔlɔ dia komelo diakandetsha nde l’ambeki ande 11 wa kɔlamelo, Yeso akate akambo efula dia mbakeketsha l’ɔtɛ wa kɛnɛ kakakongɛka la ntondo. Vɔ tshɛ wakatshikala la Yeso l’ehemba ande ndo vɔ tshɛ onto l’onto akɛnyi ngandji kaki lande oya le wɔ. (Luka 22:28, 30; Joani 1:16; 13:1) Oma lâsɔ, Yeso akashikikɛ ate: “Papa ndame nyulangaka.” (Joani 16:27) Ɛtɛkɛta ɛsɔ mɛtɛ wakahombe kimanyiya ambeki dia mbeya ngandji k’oshika kaki la Shɛwɔ lele l’olongo oya le wɔ!
20. Yɛdikɔ yakɔna yamboyɔsa dia sala, ndo lo dikambo diakɔna diakokayɛ monga la wɛkamu?
20 Efula k’anto wele la lomu ɛlɔ kɛnɛ wambokambɛ Jehowa la kɔlamelo l’edja k’ɛnɔnyi akumi. Aha la tamu, la ntondo k’ekomelo ka dikongɛ nɛ di’akambo dia kɔlɔ, tayohomana l’ehemba efula. Tetawɔke pondjo di’ehemba kana nyangu shɔ mbidja tamu l’atei w’otema ayɛ diɔnɛ Nzambi hayokoka ngandji. Eya dia: Jehowa kokaka ngandji. (Jakoba 5:11) Nyɛsɔ sho tshɛ totetemale la sala kɛnɛ kahombama lo kitanyiyaka wadjango waki Nzambi la kɔlamelo tshɛ. (Joani 15:8-10) Tokambe la diaso tshɛ dia tombola lokombo lande. Sho pombaka keketsha yɛdikɔ yaso ya tetemala la ndjasukanya la Jehowa lo dɔmbɛlɔ ndo mbekaka Ɔtɛkɛta ande. Oyadi kɛnɛ tshɛ kayotomba loyi, naka tekɔ lo sala la wolo aso tshɛ dia ngɛnyangɛnya Jehowa, kete tayotetemala monga la wɔladi ndo la wɛkamu tshɛ lo ngandji kande kahakoke kita tatala.—2 Petero 3:14.
Ayoyokadimola na?
• Dia sho mbeya nama lonyuma ndo yimba yaso, ohomba wa ngandji kaki na wele laso?
• Akambo akɔna wahakoke pondjo shimba Jehowa dia nde mboka ekambi ande ngandji?
• Lande na kele kondja ngandji ka Jehowa ‘ndeka lɔsɛnɔ ɔlɔlɔ’?
[Esato wa lo lɛkɛ 8]
Naka tamboyaoka dia tambokakitɔna oma lo ngandji ka Nzambi, kete sho koka sala dia nɔngɔsɔla akambo
[Osato wa lo lɛkɛ 9]
Paulo akeye ɔkɔkɔ wakandasoyamaka