Jehowa ekɔ Nzambi kele la solo dia lotutsha
“[Jehowa, Nzambi k]a ketshi ndu ngandji ka mamba, lahuki kele esadi, luludi too la ngandji ka shikaa.”—ETUMBELU 34:6.
1, 2. (a) Lo nshi yakete, waa na wakakondja wahɔ oma lo solo dia lotutsha diaki Jehowa? (b) “Solo dia lotutsha” kɛdikɛdi na?
ANTO wa lo nshi ya Nɔa, ase Isariyɛlɛ wakekekɔ l’oswe wa shɛnga vɔ la Mɔsɛ, ase Juda waki la lɔsɛnɔ l’etena kaki Yeso lanɛ la nkɛtɛ, anto asɔ tshɛ wakasɛnɛ l’atei w’akambo wotshikitanyi. Koko vɔ tshɛ wakakondja wahɔ oma lo dionga di’ɔlɔlɔ diaki Jehowa, dionga diakɔ ko solo dia lotutsha. Amɔtshi wakakondja panda oma lo dionga sɔ. Sho lawɔ koka kondja panda oma lo solo dia lotutsha diaki Jehowa.
2 Solo dia lotutsha kɛdikɛdi na? Etena kakɔna kɛnya Jehowa dionga sɔ, ndo lande na? Wakalembetshiya “solo dia lotutsha” oko: eongelo ka “mbikikɛ dikambo dimɔtshi dia kɔlɔ kana ɔsɔmbwɛlɔ ɔmɔtshi la memakana tshɛ, kana sala la wolo di’aha shisha elongamelo k’ɔnɛ diɔtɔnganelo diambolana diayolowana. Dionga sɔ diekɔ l’oyango ɔmɔtshi. Lo yoho ya lânde, diɔ nyangaka wahɔ w’onto latongɛ onto okina dikambo dia lonyangu. Koko, monga la solo dia lotutsha halembetshiya ndiha washo l’akambo wa kɔlɔ. Naka solo dia lotutsha diambokotsha oyango adiɔ, kana naka ndoko dikambo dialɔmba dia monga la solo dia lotutsha nto, kete dionga sɔ mongaka l’ekomelo.
3. Naa oyango wa solo dia lotutsha diaki Jehowa, ndo etena kakɔna kayodiokomɛ?
3 Kânga mbakoka anto monga la solo dia lotutsha, Jehowa mbele ɛnyɛlɔ koleki tshɛ lo kɛnɛ kendana la dionga sɔ. Lo ɛnɔnyi waki tatɛ oma lam’akalanya pɛkato diɔtɔnganelo dia lam’asa Jehowa nde l’anto wakandatonge, Otungi aso akakikɛ la memakana tshɛ ndo akɔshi ɛlɔngɔswɛlɔ woho w’anto wele la ndjatshumoya mbeya la ndowanya diɔtɔnganelo diele lam’asawɔ la nde. (2 Petero 3:9; 1 Joani 4:10) Koko etena kayokotsha solo dia lotutsha oyango adiɔ, Nzambi ayɔsɛ wanɛ wasala kɔlɔ l’okonda yɛdikɔ, lo komiya dikongɛ nɛ di’akambo dia kɔlɔ.—2 Petero 3:7.
Diɔ mbɔtɔnɛka la waonga wa weke waki Nzambi
4. (a) Ngande wɔkɛnɛmɔmi kanyi ya monga la solo dia lotutsha l’Afundelo w’ase Hɛbɛru? (Enda nto l’awui wa l’ɛse ka dikatshi.) (b) Kakɔna kakate omvutshi Nahuma lo dikambo dia Jehowa, ndo dikambo sɔ ɛnyadiɔ lo kɛnɛ kendana la solo dia lotutsha diaki Jehowa?
4 Lo Afundelo w’ase Hɛbɛru, kanyi ya monga la solo dia lotutsha kɛnɛmɔma oma lo tɔtɛkɛta tohende ta lo Hɛbɛru talembetshiya mɛtɛ mɛtɛ ɔnɛ “otale w’ɔhɛmbɛ” ndo tɔ kadimɔma ɔnɛ “hoke nkɛlɛ esadi” lo Traduction du monde nouveau.a Lo kɛnɛ kendana la solo dia lotutsha diaki Nzambi, omvutshi Nahuma akate ate: “[Jehowa] huki kele esadi, ndi eli wuki lu wulu andi, ndi huyindja kanga unungu.” (Nahuma 1:3) Ɔnkɔnɛ, solo dia lotutsha diaki Jehowa kema djembetelo ya wɔdu ndo diɔ diekɔ l’elelo. Woho ɔnɛ wele Nzambi kanga-nkudu tshɛ hoke nkɛlɛ esadi ndo ekɔ la nkudu k’efula mɛnyaka dia solo diande dia lotutsha ndja oma lo woho wayakimɛnde l’ɔtɛ w’oyango ɔmɔtshi. Nde ekɔ la wolo wa mbisha dilanya, koko nde ndjakimɛka di’aha sala dikambo sɔ mbala ɔtɔi l’oyango wa nde mbisha otshi wa kɔlɔ diaaso dia nde tshikitanya lɔkɛwɔ lande. (Ezekiyele 18:31, 32) Ɔnkɔnɛ, solo dia lotutsha diele la Jehowa mɛnyaka ngandji kande, ndo diɔ mɛnyaka lomba lande lo woho wakambande la nkudu kande.
5. Lo yoho yakɔna yɔtɔnganɛ solo dia lotutsha diaki Jehowa la losembwe lande?
5 Solo dia lotutsha diaki Jehowa mbɔtɔnɛka nto la losembwe ndo la sambo kande k’ɔlɔlɔ. Nde akayashola le Mɔsɛ oko “[Nzambi k]a ketshi ndu ka ngandji ka mamba, lahuki kele esadi, [“kele la solo dia lotutsha,” King James Version] luludi too la ngandji ka shikaa la [mɛtɛ].” (Etumbelu 34:6) Ɛnɔnyi efula l’ɔkɔngɔ, Mɔsɛ akatombola Jehowa lo memba ate: “Mbuka yandi tshe yeli sambu k’ololo. [Nzambi k]a kolamelu, aha la kolo, ndi eli ololo ndu usimbwi.” (Euhwelu k’Elembe 32:4) Eelo, kɛtshi, solo dia lotutsha, losembwe, ndo sambo k’ɔlɔlɔ kaki Jehowa kambaka kamɛ.
Woho wakɛnya Jehowa solo dia lotutsha la ntondo ka Mvula k’Elola
6. Naa djembetelo ya shikaa yɛnya woho wakakɛnɛmɔla Jehowa solo diande dia lotutsha otsha le ana waki Adama la Eva?
6 Ɔtɔmbɔkwɛlɔ waki Adama la Eva l’Ɛdɛna wakalanya diɔtɔnganelo di’oshinga wolo diaki lam’asawɔ la Jehowa, Otungi awɔ wa ngandji. (Etatelu 3:8-13, 23, 24) Woho ɔsɔ wakawayanganya la Nzambi akonge l’etombelo wa kɔlɔ le anawɔ wakahowɔ pɛkato, demba diele kema kokele, ndo nyɔi. (Romo 5:17-19) Kânga mbele atshukanyi wa ntondo wakatshe pɛkato l’okonda, Jehowa akawasha diaaso dia mbota ana. L’ɔkɔngɔ diko, nde akɔshi yɛdikɔ yoludi la ngandji yakoka ana waki Adama l’Eva ndjaokanya la nde. (Joani 3:16, 36) Ɔpɔstɔlɔ Paulo akalembetshiya ate: “Keli [Nzambi] akatenya ngandji kandi ne dia Kristu akatuvwela lam’akisu antu wa kolo. Okone tayuleka nshimbamela uma lu kele ka [Nzambi] dikambu diande, ne dia tambuyindjama la dikila diandi. Naka shu takekesanela la [Nzambi] lu nyoi ka on’andi lam’akisu atunyi, ku lam’akatekesanela la ndi, shu tayuleka nshimbamela ne dia lumu landi.”—Romo 5:8-10.
7. Ngande wakɛnya Jehowa solo dia lotutsha la ntondo ka Mvula k’Elola, ndo bonde kele anto wakasɛnaka la ntondo ka Mvula k’Elola wakasunganaka ndanyema?
7 Solo dia lotutsha diaki Jehowa diakɛnama lo nshi ya Nɔa. Ndekana ntambe ɔtɔi la ntondo ka Mvula k’Elola, “[Nzambi] akende kete, ku ndi akenyi ati: Yo yambuyala kolo ketu, ne dia untu l’untu akalanya mbuka kandi.” (Etatelu 6:12) Koko, l’etena kɛmɔtshi kaki l’elelo, Jehowa akɛnya solo diande dia lotutsha otsha le anto. Nde akate ate: “Nyuma kami hutshikala le untu pundju, ne dia untu eko paka emunyi etu. Nshi ya lumu l’untu yayuyalaka deku lukama la akumi ahende.” (Etatelu 6:3) Ɛnɔnyi 120 ɛsɔ wakakimanyiya Nɔa laki pami ka kɔlamelo dia nde mbota ana, ndo wakawewoya didjango diaki Nzambi dia sɛla wato wa luudu ndo mbewola anto wa lo nshi yande lo kɛnɛ kendana la Mvula k’Elola kakahombe ndɔ. Ɔpɔstɔlɔ Petero akafunde ate: “Lam’akakungaka memakana [dikoka diɔtɔnganɛ la solo dia lotutsha] ka [Nzambi] lu nshi ya Noa, lam’akandatshaka watu a luudu, antu tshitshe mbakashimbamela loko l’ashi: antu enanei atu.” (1 Petero 3:20) Lo mɛtɛ, wanɛ waki komonga lo nkumbo kaki Nɔa, ‘kombidja yimba’ l’esambishelo kande. (Mateu 24:38, 39) Koko lo mbutɛ Nɔa dia nde sɛla wato wa luudu ndo kamba ondo ɛnɔnyi akumi oko “umvutshi w’akambu w’ololo,” Jehowa akasha anto wa lo nshi ya Nɔa diaaso dia vɔ ndjatshumoya oma lo mboka yawɔ ya ngala ndo kadimɔ le nde dia Mbokambɛka. (2 Petero 2:5; Heberu 11:7) Mbokɛmaka dia lɔlɔnga la kɔlɔ lɔsɔ lakasunganaka mɛtɛ ndanyema.
Solo dia lotutsha otsha le ase Isariyɛlɛ
8. Ngande wakɛnya Jehowa solo diande dia lotutsha otsha le wodja w’Isariyɛlɛ?
8 Jehowa akonge la solo dia lotutsha otsha le wodja w’Isariyɛlɛ ndekana ɛnɔnyi 120. Lo ɛnɔnyi ndekana 1500 w’ɔkɔndɔ awɔ oko wodja waki Nzambi wakasɔnama, paka tena dimɔtshi to mbaki ase Isariyɛlɛ kombidjaka solo dia lotutsha diaki Jehowa l’ohemba. Mingu ngana tsho l’ɔkɔngɔ wa vɔ tshungɔ lo dihindo oma l’Edjibito, vɔ wakamɛ tɛmɔla dikishi, lo mɛnya diɔnyɔ dia woke otsha le Otshungodi awɔ. (Etumbelu 32:4; Osambu 106:21) Lo ɛnɔnyi akumi wakayele, ase Isariyɛlɛ wakangunanguna dikambo dia mbo ya ndɛ yakawashaka Jehowa lo dihindo l’oswe wa shɛnga. Vɔ wakangunɛngunɛ Mɔsɛ nde l’Arɔna, wakatɛkɛta kɔlɔ lo lokombo la Jehowa, wakasale monanyi l’apanganu, ndo wakayakimɔ l’ɔtɛmwɛlɔ wa Baala. (Walelu 11:4-6; 14:2-4; 21:5; 25:1-3; 1 Koreto 10:6-11) Jehowa aki mɛtɛ la shadiya ya ndanya ekambi ande, koko nde akonge la solo dia lotutsha otsha le wɔ.—Etumbelu 14:11-21.
9. Lo nshi y’Embadi ndo lo nshi ya nkumi ya dikanga yakayahɔnaka lo dioho, ngande wakɛnya Jehowa dia nde ekɔ Nzambi kele la solo dia lotutsha?
9 Lo nshi y’Embadi, ase Isariyɛlɛ wakakɔ mbala ko mbala l’ɔtɛmwɛlɔ wa dikishi. Lam’akawatshe ngasɔ, Jehowa akakimɔ l’anya w’atunyi awɔ. Koko lam’akawayatshumoya ndo wakawɔlɔmbɛ ekimanyielo, nde akonge la solo dia lotutsha ndo akatome embadi dia mbatshungola. (Embadi 2:17, 18) L’etena k’otale kakayahɔnaka ase dioho l’okudi, nkumi ya dikanga ngana tsho mbakayakimɔ tshɛ le Jehowa. Ndo kânga l’ɛlɔmbwɛlɔ ka nkumi ya dikanga yaki la kɔlamelo, anto wakasɔhanyaka ɔtɛmwɛlɔ wa mɛtɛ la wa kashi. Etena kakatomaka Jehowa amvutshi dia mbaewola dia vɔ tshikala la kɔlamelo, mbala efula anto wakalekaka nanga mpokamɛ awui w’ɛlɔmbɛdi wa kɔlɔ ndo w’amvutshi wa kashi. (Jeremiya 5:31; 25:4-7) Ɔnkɔnɛ, ase Isariyɛlɛ wakahɛnyahɛnya amvutshi wa kɔlamelo waki Jehowa ndo wakadiake amɔtshi l’atei awɔ. (2 Ekondo 24:20, 21; Etsha 7:51, 52) Koko, Jehowa akatetemala la monga la solo dia lotutsha.—2 Ekondo 36:15.
Jehowa atashisha solo diande dia lotutsha
10. Etena kakɔna kakakomɛ solo dia lotutsha diaki Jehowa?
10 Ɔkɔndɔ w’ana w’anto mɛnyaka dia solo dia lotutsha diaki Nzambi diekɔ l’elelo. L’ɔnɔnyi wa 740 N.T.D., nde akatshike di’ase Asuriya ndanya waoho dikumi wa diolelo di’Isariyɛlɛ ndo tɔla anto wa lo waolelo asɔ lo lɔhɔmbɔ. (2 Khumi ya Dikanga 17:5, 6) Ndo otsha l’ekomelo ka ntambe kakahɔna, nde aketawɔ dia ase Babilɔna mbɔtwɛ waoho ahende wa diolelo dia Juda ndo ndanya Jerusalɛma la tɛmpɛlɔ kayɔ.—2 Ekondo 36:16-19.
11. Ngande wakɛnya Jehowa solo diande dia lotutsha kânga lam’akandela dombwelo diande?
11 Kânga lam’akandela dombwelo diande le Isariyɛlɛ la Juda, Jehowa kombohɛ dia monga la solo dia lotutsha. Oma lo tshimbo y’omvutshi ande Jeremiya, Jehowa akatɛkɛta dikambo di’otshungwelo w’ekambi ande wakandasɔnɛ. Nde akate ate: “Lam’ayunyukutsha deku akumi esambeli lu Babilona, dimi layunyokendela dia nshidiya diui diami di’ololo le nyu, dia nyukaluya lu dihuli ne mbata [Jehowa]. Dimi layetawo nyu mbishulami . . . Layunyusanganya uma lu wedja tshe ndu uma l’ahuli tshe, lene akamanyutshanya. Dimi layunyukaluya lu dihuli diakamanyose, dia nyotola lu fumbi.”—Jeremiya 29:10, 14.
12. Ngande wele okalwelo w’atshikadi w’ase Juda otsha lo wodja awɔ wakasalema l’ɛlɔmbwɛlɔ kaki Nzambi dia nɔngɔsɔla oyelo waki Mɛsiya na?
12 Atshikadi w’oma l’atei w’ase Juda waki lo lɔhɔmbɔ wakakawola mɛtɛ la Juda ndo wakayolola ɔtɛmwɛlɔ waki Jehowa lo tɛmpɛlɔ ka Jerusalɛma kakahikama nto. Lo ekotshamelo ka sangwelo diaki Jehowa, atshikadi asɔ wakahombe koma oko ‘lɔpɔpɔ l’oma le Jehowa,’ lasha ekeketshelo ndo lɔngɔnyu. Vɔ wakahombe nto monga la dihonga ndo la wolo oko ‘tambwe l’atei wa nyama ya l’okonda.’ (Mika 5:7, 8) Mbeyaka monga ko ɛtɛkɛta wa komelo ɛnɛ wakakotshama lo nshi ya waa Makabe etena kakatshanya ase Juda atunyi awɔ oma lo Nkɛtɛ ya Daka l’ɛlɔmbwɛlɔ ka nkumbo ka waa Makabe ndo kakawanyomoyosapola tɛmpɛlɔ kɛnɛ kakalole l’awui wa mindo. Ɔnkɔnɛ, wodja ndo tɛmpɛlɔ wakakokamɛ woho ɔnɛ wakakoke otshikadi okina wa kɔlamelo ndjonga l’akoka wa nongola Ɔna Nzambi lam’akandɛnama lɔkɔ oko Mɛsiya.—Danyele 9:25; Luka 1:13-17, 67-79; 3:15, 21, 22.
13. Kânga l’ɔkɔngɔ w’ase Juda ndjaka Ɔnande, ngande wakatetemala Jehowa la mbaɛnya solo diande dia lotutsha?
13 Kânga l’ɔkɔngɔ w’ase Juda ndjaka Ɔnande, Jehowa akatetemala la mbaɛnya solo diande dia lotutsha l’edja k’ɛnɔnyi esato l’etenyi, lo mbasha diaaso dia lânde dia vɔ mbelamɛ dia ndjonga etenyi kɛmɔtshi ka lo lɔtɔngɔ la lo nyuma laki Abarahama. (Danyele 9:27)b La ntondo ndo l’ɔkɔngɔ w’ɔnɔnyi 36 T.D., ase Juda amɔtshi waketawɔ leeta lɔsɔ, ndo oko wakayodiɛnya Paulo l’ɔkɔngɔ, “atshikadi amotshi weko, wakasonwama lu ngandji ka mamba ka [Nzambi].”—Romo 11:5.
14. (a) L’ɔnɔnyi 36 T.D., wana wakakondja diɛsɛ dia monga atɔi amɔtshi wa lo lɔtɔngɔ la lo nyuma laki Abarahama? (b) Ngande wakɛnya Paulo ɔngɛnɔngɛnɔ ande lo woho wakasɔnɛ Jehowa anto wahomba kenga Isariyɛlɛ wa lo nyuma?
14 L’ɔnɔnyi 36 T.D., diɛsɛ dia koma ɔmɔtshi wa lo lɔtɔngɔ la lo nyuma laki Abarahama diakashama mbala ka ntondo oyadi le anto waki komonga ase Juda kana le ambetawudi w’ase wedja. Onto tshɛ laketawɔka diɛsɛ sɔ akakondjaka wahɔ oma lo ngandji ka mamba ndo oma lo solo dia lotutsha diaki Jehowa. (Ngalatiya 3:26-29; Efeso 2:4-7) Lo mɛnya lowando lande l’efula lo lomba ndo lo sangwelo diele l’edia ka solo dia lotutsha diaki Jehowa loludi la kɛtshi, dionga diakakimanyiya Nzambi dia kotsha lofulo la wanɛ wahomba kenga Isariyɛlɛ wa lo nyuma, Paulo akate ate: “Ya ndi wuki w’ongonyi wa yimba ndu wa ewu ka [Nzambi] li! Ndi dumbwelu diandi diahamanema fundo, la mbuka yandi yaheyama nonda li!’—Romo 11:25, 26, 33; Ngalatiya 6:15, 16.
Solo dia lotutsha dikambo dia lokombo lande
15. Naa ɔkɔkɔ wa ntondo wakonge Nzambi la solo dia lotutsha, ndo naa dikambo diakalɔmbɛ etena k’otale la ntondo ka diɔ kandɔma?
15 Lande na konga Jehowa la solo dia lotutsha na? Ntondotondo ele dia tombola lokombo lande l’ekila ndo dia nyindja lowandji lande. (1 Samuele12:20-22) Dikambo diendana la lɔkɛwɔ l’ɔlɔlɔ diakonyiya Satana lo kɛnɛ kendana la woho wakamba Jehowa la lowandji Lande akalɔmbɛ etena k’otale dia dikambo sɔ kandɔma lo yoho y’ɔlɔlɔ la ntondo ka ditongami diande tshɛ. (Jobo 1:9-11; 42:2, 5, 6) Diakɔ diele, lam’akasoyamaka ekambi ande l’Edjibito, Jehowa akatɛ Farawɔ ate: “Keli dimi lakakutshiki la lumu dia nkenya wulu ami, la dia lukumbu lami [di]angana lu kete tshe.”—Etumbelu 9:16.
16. (a) Ngande wakakimanyiya solo dia lotutsha diaki Jehowa dia sɔna anto dikambo dia lokombo lande na? (b) Ngande wayokidiama lokombo la Jehowa ndo wayoyindjama lowandji lande?
16 Ɛtɛkɛta wakatɛ Jehowa Farawɔ wakavusɔma etena kakalembetshiya ɔpɔstɔlɔ Paulo ohomba wele la lotutsha laki Nzambi lo otombwelo wa lokombo lande l’ekila. Oma lâsɔ, Paulo akafunde ate: “Kayututa na, naka [Nzambi], latulangaka ntenya kele kandi ndu tulimbitshiya wulu andi, akayala la memakana ka mamba le ditungatunga dia kele kandi diakatungama ne dia nanyema? Kayututa na, naka ndi mbetawoka ntenya ongonyi wa lutumbu landi lu ditungatunga dia ketshi, diakandatalongosodi ne dia lutumbu? Osoku mbakandateti, aha paka uma l’atei w’asi Juda, keli ndu uma l’atei w’asi wedja. Uku akandati lu Hosea ati: Wane waki kundjala wudja ami, dimi layuwaeta nti: Wudja ami.” (Romo 9:17, 22-25) Lam’ele Jehowa akonge la solo dia lotutsha, nde aki l’akoka wa nsɔna ‘anto dikambo dia lokombo lande’ oma l’atei wa wedja. (Etsha 15:14) Lo ɛlɔmbwɛlɔ k’Owandji awɔ, Yeso Kristo, ‘ekilami’ ɛsɔ wekɔ ekitɔ wa Diolelo diayokamba la Jehowa dia kidia lokombo lande la woke ndo nyindja lowandji lande.—Danyele 2:44; 7:13, 14, 27; Enyelo 4:9-11; 5:9, 10.
Solo dia lotutsha diaki Jehowa kimanyiyaka anto dia kondja panda
17, 18. (a) Lo sala dikambo diakɔna diakokaso ndjɔnyɔla Jehowa lo woho wakambande la solo diande dia lotutsha? (b) Ngande wahombaso mbɔsa solo dia lotutsha diaki Jehowa?
17 Tatɛ oma lam’akakɔ anto lo pɛkato polo nd’ɛlɔ kɛnɛ, Jehowa akɛnya dia nde ekɔ Nzambi kele la solo dia lotutsha. Solo dia lotutsha diaki lande la ntondo ka Mvula k’Elola akakimanyiya di’ɔhɛmwɛlɔ mbishama ndo dia nɔngɔsɔla ehomɔ k’anto kondja panda. Koko, lotutsha lande lakakome l’ekomelo ko nde akalɔsha Mvula k’Elola. Polo nd’ɛlɔ, Jehowa ekɔ lo mɛnya solo dia lotutsha di’efula, ndo nde ayonga ladiɔ edja ndo anto amɔtshi wambɔsa yɛdikɔ ya dimɛna. Koko, ɔsɔ kema ɔkɔkɔ wa shisha elongamelo. Naka sho sala ngasɔ kete tayonga oko wanɛ wɔnyɔla Nzambi l’ɔtɛ wende la solo dia lotutsha. Paulo akambola ate: “We latonyolaka ongonyi w’ololo wa [Nzambi], la ndjakimela kandi, ndu memakana kandi, we heyi wati: Ololo andi mbatukolombolaka utsha l’ekadimwelu k’utema?”—Romo 2:4.
18 Ndoko onto l’atei aso lakoka mbeya polo lo yɛdikɔ yakɔna yeso l’ohomba wa solo dia lotutsha diaki Nzambi dia monga l’eshikikelo k’ɔnɛ tayokondja panda oma le nde. Paulo tolakaka dia sho ‘tetemala kamba dikambo dia panda kaso hita la wɔma ndo la lokomba.’ (Filipi 2:12) Ɔpɔstɔlɔ Petero akafundɛ anyande Akristo ate: “Khumadiondjo huhela dia nshidiya alaka andi, uku atedikaka antu wauhu awo, keli ndi eko la nyu memakana. Ndi halangi nduku omotshi nshisho, keli ndi nangaka tshe wakadimuli etema.”—2 Petero 3:9, sho mbɛnganyisha alɛta ango.
19. Lo yoho yakɔna yakokaso kondja wahɔ oma lo solo dia lotutsha diaki Jehowa?
19 Ɔnkɔnɛ, tomate solo pɔlɛpɔlɛ lo menda woho wasala Jehowa akambo. Nyɛsɔ toyele dako dikina diaki Petero ndo ‘tɔshi solo dia lotutsha diaki Nkumadiɔndjɔ kaso oko panda.’ Panda kaki waa na? Panda kaso, ndo oma lâsɔ panda k’anto akina waheyama mbadia weke l’ohomba wa mboka ‘lokumu l’ɔlɔlɔ la diolelo.’ (2 Petero 3:15; Mateu 24:14) Kɛsɔ mbayotokimanyiya dia monga la lowando l’efula lo menda solo dia woke dia lotutsha diele la Jehowa ndo monga la solo diakɔ dia lotutsha lo yoho yasɛnaso l’anto akina.
[Nɔtɛ ya l’ɛse ka dikatshi]
a Lo Hɛbɛru, tshɛkɛta yalembetshiya ɔnɛ “ɔhɛmbɛ” kana “wosho w’ɔhɛmbɛ” (ʼaph) nembetshiyaka mbala efula lo yoho ya didjidji ɔnɛ nkɛlɛ. Ekɔ ngasɔ lo menda woho watotshaka ɔhɛmbɛ w’onto lamboka nkɛlɛ nwɛ nwɛ la wolo tshɛ.
b Dia wɛ kondja olembetshiyelo okina wendana la prɔfɛsiya kɛnɛ, enda lo dibuku Prêtons attention à la prophetie de Daniel!, lɛkɛ 191-194, diakatondja Ɛmɛnyi wa Jehowa.
Onde wɛ koka nembetshiya?
• Kakɔna kalembetshiya tshɛkɛta ‘solo dia lotutsha’ lo Bible?
• Ngande wakɛnya Jehowa solo diande dia lotutsha la ntondo ka Mvula k’Elola, l’ɔkɔngɔ w’ekambi ande tshɔ lo lɔhɔmbɔ la Babilɔna, ndo lo ntambe ka ntondo ka lo T.D.?
• L’ɔtɛ w’ɛkɔkɔ akɔna w’ohomba efula wakɛnya Jehowa solo diande dia lotutsha?
• Ngande wahombaso mbɔsa solo dia lotutsha diaki Jehowa?
[Osato wa lo lɛkɛ 23]
Solo dia lotutsha diaki la Jehowa la ntondo ka Mvula k’Elola diakasha anto diaaso dia vɔ ndjatshumoya
[Osato wa lo lɛkɛ 24]
L’ɔkɔngɔ w’ɔkwɛlɔ wa Babilɔna, ase Juda wakakondja wahɔ oma lo solo dia lotutsha diaki Jehowa
[Osato wa lo lɛkɛ 25]
Lo ntambe ka ntondo, ase Juda la wanɛ waki komonga ase Juda wakakondja wahɔ oma lo solo dia lotutsha diaki Jehowa
[Esato wa lo lɛkɛ 26]
Ɛlɔ kɛnɛ Akristo kondjaka wahɔ oma lo solo dia lotutsha diaki Jehowa