‘Nyɔlɔtɛ solo dia lotutsha’
‘Nyɔlɔtɛ solo dia kɛtshi . . . ndo dia lotutsha.’—KOLOSAI 3:12.
1. Kɔndɔla ɛnyɛlɔ kɛmɔtshi ka dimɛna k’onto laki la solo dia lotutsha.
RÉGIS, pami kɛmɔtshi kodjashi lo sidɛ-owɛstɛ ka France akakome Ɔmɛnyi wa Jehowa wambobatizama l’ɔnɔnyi wa 1952. Ɛnɔnyi efula, wadɛnde akatshe tshɛ kakinde l’akoka wa sala dia mboshimba dia nde kambɛ Jehowa. Dia mboshimba di’aha nde tshɔ lo nsanganya, nde akatondolaka etshimbi wa mutuka ande, ndo lushi lɔmɔtshi, nde akoyele lam’akandatasambishaka losango l’oma lo Bible lo luudu la luudu, ko akawosha sɔnyi etena kakandasambishaka anto dikambo dia lokumu l’ɔlɔlɔ la Diolelo. Kânga mbakatetemala wadɛnde mbɔlɔsha, Régis akatetemala monga la solo dia lotutsha. Ɔnkɔnɛ, Régis ekɔ ɛnyɛlɔ ka dimɛna efula le Akristo tshɛ, nɛ dia Jehowa nɔmbaka atɛmɔdi ande tshɛ dia monga la solo dia lotutsha lam’asɛnawɔ l’anto akina.
2. Kakɔna kalembetshiya mɛtɛ mɛtɛ tshɛkɛta ya lo Grɛkɛ yokadimɔmi ɔnɛ ‘solo dia lotutsha,’ ndo yɔ mbelaka kanyi yakɔna?
2 Tshɛkɛta ya lo Grɛkɛ yokadimwami ɔnɛ “solo dia lotutsha” nembetshiyaka mɛtɛ mɛtɛ “yimba y’otale.” Traduction du monde nouveau (l’Angɛlɛ) kadimolaka tshɛkɛta shɔ mbala dikumi y’etondo ɔnɛ “solo dia lotutsha,” mbala shato ɔnɛ “memakana,” ndo mbala ɔtɔi ɔnɛ “wokikelo wa solo.” Etelo ka lo Hɛbɛru ndo ka lo Grɛkɛ kokadimwami ɔnɛ “solo dia la lotutsha” mbelaka kanyi ya memakana, ndjakimɛ, ndo aha mboka nkɛlɛ esadi.
3. Ngande wakatshikitana yoho yakɔsaka Akristo solo dia lotutsha la woho wakɔsaka ase Ngirika wa lo ntambe ka ntondo dionga sɔ na?
3 Solo dia lotutsha kɔmbɔsamaka oko dionga di’ɔlɔlɔ le ase Ngirika wa lo ntambe ka ntondo. Ndo ndoko lushi lakakambe ambewi wa filozofi w’aseka Stɔa la tshɛkɛta shɔ. Lo ndjela William Barclay, nomb’ewo kɛmɔtshi k’awui wa Bible, solo dia lotutsha “tshikitana efula la dionga diakɔsaka ase Ngirika ɔnɛ dionga di’ɔlɔlɔ.” L’atei w’akambo wakawasɛmaka, vɔ wakataka dia “hawokokaki pondjo mbikikɛ woho tshɛ wa lɔtɛngɔ kana wa kɔlɔ kɛmɔtshi.” Nde mbutaka ate: “Le ase Ngirika, onto lakɔsamaka la nɛmɔ ele onto laki kotshikalaka la tongo. Koko, le Akristo onto lɔsama la nɛmɔ ele onto lele bu kânga la yema ya shɔmbɔya, oyadi kânga l’etena kakokande sala dikambo sɔ.” Ondo ase Ngirika wakɔsaka solo dia lotutsha oko wɔdu ɔmɔtshi, koko lanɛ, ndo l’akambo akina, “enginya ka [Nzambi] kamboleka yimba y’antu, la wodu a [Nzambi] ambuleka wulu w’antu.”—1 Koreto 1:25.
Ɛnyɛlɔ ka Kristo ka solo dia lotutsha
4, 5. Naa ɛnyɛlɔ ka diambo efula kakasha Yeso lo kɛnɛ kendana la solo dia lotutsha?
4 Lâdiko wa Jehowa, onto lakasha ɛnyɛlɔ ka dimɛna efula ka solo dia lotutsha ko Kristo Yeso. Lam’akinde l’atei w’ehemba wakaleke tshɛ, nde akayakimɛ lo yoho ya diambo efula. Wakatatshi lo dikambo diande ɔnɛ: “Ndi akahenyahenyama, akasuyama, keli ndi kumvuta diui. Uku atolombwamaka on’okoko utsha l’ediakelu, uku atolembohalaka okoko la ntundu k’ahimbudi wa diosa, osoku mbakindi kundjihula unyo.”—Isaya 53:7.
5 Yeso akɛnya solo dia lotutsha dia mamba lo nshi tshɛ yakandakambaka olimu ande lanɛ la nkɛtɛ! Nde akakikɛ wembola wa lɔngɔ w’oma le atunyi ande ndo tɛngɔ y’oma le andɔshi ande. (Mateu 22:15-46; 1 Petero 2:23) Nde aki la solo dia lotutsha otsha le ambeki ande, oyadi kânga lam’akawatetemalaka la kakatana dia mbeya ɔnɛ loleki woke l’atei awɔ. (Mako 9:33-37; 10:35-45; Luka 22:24-27) Ndo Yeso mɛtɛ aki la ndjakimɛ k’efula l’otsho wakawofunge etena kakalalaka Petero nde la Joani djɔ l’ɔkɔngɔ wa nde mbatɛ dia vɔ ‘tetemala la sungukala’!—Mateu 26:36-41.
6. Ngande wakakondja Paulo wahɔ oma lo solo dia lotutsha diaki Yeso, ndo wetshelo akɔna wakondjaso oma lo dikambo sɔ?
6 L’ɔkɔngɔ wa nyɔi ndo eolwelo kande, Yeso akatetemala monga la solo dia lotutsha. Ɔpɔstɔlɔ Paulo akeyaka dikambo sɔ dimɛna, nɛ dia nde aki osoyanyi w’edjedja w’Akristo. Paulo akafunde ate: “Diui dia kolamelu ne, ndu diakuka antu tshe mbetawo vati: Kristu Jesu akayi la kete dia ndjushimbela antu wa kolo; wulekimi kolo. Keli dia dikambu ne, mbakamukama ketshi, dia Jesu Kristu enya antu memakana kandi tshe l’utema ami, dimi lâleki, dia dimi ndjala djimbitelu le wane wayuwetawo, dia vo nkundja lumu la pundju.” (1 Timote 1:15, 16) Oyadi lɔsɛnɔ la ngande laki laso ntondo, naka sho monga la mbetawɔ le Yeso, kete nde ayonga la solo dia lotutsha oya le so, alongamɛ dia sho monga ‘l’etsha wa ndjatshumoya.’ (Etsha 26:20; Romo 2:4) Nsango yakatomɛ Kristo tshumanelo esambele dia l’Asie mineure mɛnyaka dia kânga mende la solo dia lotutsha, nde nongamɛka dia sho ndowanya nkɛwɔ yaso.—Enyelo, tshapita 2 la 3.
Olowa wa nyuma
7. Diɔtɔnganelo diakɔna diele lam’asa solo dia lotutsha la nyuma k’ekila?
7 Lo tshapita 5 ya mukanda ande le ase Ngalatiya, Paulo akɛnya otshikitanu wele lam’asa etsha wa demba la elowa wa nyuma. (Ngalatiya 5:19-23) Lam’ele solo dia lotutsha ekɔ dionga dimɔtshi diaki Nzambi, diɔ ndja oma le nde ndo diɔ diekɔ olowa wa nyuma kande. (Etumbelu 34:6, 7) Ɔnkɔnɛ, solo dia lotutsha ekɔ olowa wa nɛi l’ɔnɔngɔ w’elowa wa nyuma wakashile Paulo, l’ɔnɔngɔ wa “ngandji, ongenongeno, ki, . . . ketshi, ololo, kolamelu, memakana, ndjaenda.” (Ngalatiya 5:22, 23) Omalɔkɔ, lam’akɛnɛmɔla ekambi waki Nzambi woho wa solo dia lotutsha diele lande, vɔ salaka dikambo sɔ l’ekimanyielo ka nyuma k’ekila.
8. Kakɔna kayotokimanyiya dia sho tɔ elowa wa nyuma, mbidja ndo solo dia lotutsha?
8 Koko, dikambo sɔ halembetshiya dia Jehowa mbishaka onto nyuma kande la wolo. Shwamɛ mbahomba nɔmba dia tɔ monga la shɛngiya le so. (2 Koreto 3:17; Efeso 4:30) Sho tshikɛka nyuma k’ekila dihole dia tɔ kamba olimu lo nsɛnɔ yaso lo kɛnɛmɔla elowa atɔ lo kɛnɛ tshɛ kasalaso. L’ɔkɔngɔ wa nde shila etsha wa demba ndo elowa wa nyuma, Paulo akakotsha ate: “Naka shu teko la lumu uma le nyuma, tokendakendaki la nyuma. Tuyadimbiyaki, [Nzambi] hasokama; untu tshe ayuna diango diakandune. Ne dia one latuneka lu dimba diandi, ayuna ehondelo uma lu dimba. Keli one latuneka lu nyuma, ayuna lumu la pundju uma le nyuma.” (Ngalatiya 5:25; 6:7, 8) Dia sho mbeya monga la solo dia lotutsha, sho pombaka nto kɛnɛmɔla elowa ekina watɔ Akristo oma l’ekimanyielo ka nyuma k’ekila.
“Ngandji ekɔ la solo dia lotutsha”
9. Lande na ondo kakatɛ Paulo ase Kɔrɛtɔ ɔnɛ “ngandji ekɔ la solo dia lotutsha”?
9 Paulo akɛnya dia diɔtɔnganelo dia lânde diekɔ lam’asa ngandji la solo dia lotutsha lam’akandate ate: “Ngandji ekɔ la solo dia lotutsha.” (1 Kɔrɛtɔ 13:4, NW) Albert Barnes, nomb’ewo kɛmɔtshi l’awui wa Bible mbutaka dia Paulo akake epole ɔsɛkɛ lo dionga sɔ lo menda tamanu ndo ewanu waki l’etshumanelo k’Akristo ka la Kɔrɛtɔ. (1 Koreto 1:11, 12) Barnes mɛnyaka ɔnɛ: “Tshɛkɛta yokambi lawɔ lanɛ [dia nembetshiya solo dia lotutsha] hɔtɔnɛ la lohetsho: mbut’ate l’ɛtɛkɛta ndo la tokanyi ta nkɛlɛ, ndo la womalelo. Yɔ mbelaka kanyi ya dionga diakoka MBIKIKƐ EDJA wonya wele onto lo soyama, kana wambowɔsɔmbwɛ.” Ngandji ndo solo dia lotutsha kimanyiyaka efula dia wɔladi monga l’atei w’etshumanelo k’Akristo.
10. (a) Lo yoho yakɔna yatokimanyiya ngandji dia monga la solo dia lotutsha, ndo dako diakɔna diasha Paulo lo dikambo sɔ? (b) Kakɔna kakate nomb’ewo kɛmɔtshi ka l’awui wa lo Bible lo dikambo dia solo dia lotutsha diaki Nzambi ndo dia kɛtshi kande? (Enda lo awui wa l’ɛse ka dikatshi.)
10 “Ngandji kele kanga solo dia lotutsha ndo ɔlɔlɔ. Ngandji . . . hayange wahɔ atɔ hita, homala.” Ɔnkɔnɛ, l’akambo efula, ngandji tokimanyiyaka dia monga la solo dia lotutsha.a (1 Kɔrɛtɔ 13:4, 5, NW) Ngandji tokimanyiyaka dia mbikikanɛ kɔlɔ ndo mbohɔ ɔnɛ sho tshɛ tekɔ anto wele kema kokele, wele la munga ndo watsha kɔlɔ. Tɔ tokimanyiyaka dia mbishana nɛmɔ ndo dimanyiyana. Ɔpɔstɔlɔ Paulo tokeketshaka dia kɛndakɛnda “la ndjakitshakitsha tshe ndu la [“solo dia lotutsha,” NW], ndu nyimanyiyana kolo la ngandji. Nyutetemali dia nama utundu wa nyuma lu dimama dia ki.”—Efeso 4:1-3.
11. Lande na ekɔ ohomba efula monga la solo dia lotutsha l’atei w’atshunda w’Akristo na?
11 Solo dia lotutsha diele lam’asawɔ kimanyiyaka dia wɔladi ndo ɔngɛnɔngɛnɔ monga l’atei w’atshunda w’Akristo, oyadi lo tshumanelo, lo waa Bɛtɛlɛ, lo mvudu ya waa misiɔnɛrɛ, l’atei wa wanɛ watake mvudu yaki Société, kana lo waa kalasa y’Akristo. Koko, lam’ele wekɔ la lonto, tokanyi, wodiamelo, ndo ɛlɛmbɛ wendana la loshilambo ndo la pudipudi ka demba wotshikitanyi ekakatanu koka tomba tena la tena lam’asawɔ. Akambo asɔ tombaka ndo l’atei wa nkumbo. Lâsɔ, ekɔ ohomba di’aha mbokaka nkɛlɛ esadi. (Tukedi 14:29; 15:18; 19:11) Solo dia lotutsha, mbut’ate mbikikɛ la memakana, l’elongamelo k’ɔnɛ akambo wayotshikitana lo yoho ya dimɛna, ekɔ ohomba le onto tshɛ.—Romo 15:1-6.
Solo dia lotutsha tokimanyiyaka dia mbikikɛ
12. Lande na kahombaso monga la solo dia lotutsha l’atei w’ekakatanu?
12 Solo dia lotutsha tokimanyiyaka dia mbikikɛ ekakatanu wɛnama di’oko hawotokoka komɛ kana kandɔma esadi. Ɔsɔku mbakidiɔ lo kɛnɛ kendana la Régis, lakatatɛkɛtshi dikambo diande l’etatelo. L’edja k’ɛnɔnyi efula, wadɛnde akadjaka wekamu lo welo wakandadjaka dia kambɛ Jehowa. Koko, lushi lɔmɔtshi wadɛnde ɔsɔ akaye le nde l’asɔi lo washo ndo akawotɛ ate: “Dimi mbeyaka dia ekɔ akambo wa mɛtɛ. Okimanyiya. Dimi nangaka mbeka Bible.” L’ɔkɔngɔ diko nde akayokomaka Ɔmɛnyi wa Jehowa wambobatizama. Régis ekɔ lo mbuta ate: “Dikambo sɔ diakɛnya dia Jehowa akatshɔkɔla ɛnɔnyi ɛsɔ wakatalɔshanaka, wakimi la memakana, ndo wakamakikɛ.” Nde akatshɔkwama oma lo solo diande dia lotutsha.
13. Kakɔna kakakimanyiya Paulo dia mbikikɛ, ndo ngande wakoka ɛnyɛlɔ kande tokimanyiya dia mbikikɛ?
13 Lo ntambe ka ntondo ka lo tena diaso nɛ, ɔpɔstɔlɔ Paulo akasha ɛnyɛlɔ ka dimɛna efula k’onto laki la solo dia lotutsha. (2 Koreto 6:3-10; 1 Timote 1:16) Oya l’ekomelo ka lɔsɛnɔ lande, lam’akandalakaka ɔlɔngɔlɔngɔ Timɔtɛ wa wonyande, Paulo akawotɛ di’Akristo tshɛ wayohomana l’ehemba. Paulo akashile ɛnyɛlɔ kande hita ndo akɔlɔmbɛ dia monga la waonga w’Akristo wele ohomba dia monga la ekikelo. Nde akafunde ate: “We akayeli wetshelu ami, la lokewo lami, ndu esangweyu kami, mbetawo kami, memakana kami, ngandji kami, la ekikelu kami, ndu ehenyohenyo ami, asui ami, la akambu wakamundi l’Atiyoka, l’Ikoniya ndu la Lustera; dimi lakayala la wolamu l’asui efula. Khumadiondjo akantshungula uma l’akambu aso tshe. Ndu wane tshe walanga ndjala la lumu l’ololo le Kristu Jesu, wayusuwa.” (2 Timote 3:10-12; Etsha 13:49-51; 14:19-22) Dia mbikikɛ, sho tshɛ tekɔ l’ohomba wa mbetawɔ, wa ngandji, ndo wa solo dia lotutsha.
Tɔlɔtɛ solo dia lotutsha
14. Paulo akɛdika solo dia lotutsha la waonga akɔna waki Nzambi, ndo dako diakɔna diakandasha Akristo wa la Kɔlɔsai?
14 Ɔpɔstɔlɔ Paulo akɛdika solo dia lotutsha ndo waonga akina waki Nzambi la ahɔndɔ wahomba Okristo ndɔta l’ɔkɔngɔ wa nde tshika ditshelo diendana la ‘lonto l’edjedja.’ (Kolosai 3:5-10) Nde akafunde ate: “Ne dia nyu nyeko esonami wa [Nzambi], la ekilami wa ngandji, osoku nyolote etema wa ketshi, la wa [ndjakimela], la wa ndjakitshakitsha, la wa kenemo, la wa kolamelu. Nyukikaneli kolo. Nyudimanyanyia kolo yanyu, naka untu eko la ukina dikambu. Uku akanyudimanyia Khumadiondjo kolo, dieli la nyu, ndu nyu dia nyimanyiana kolo. Ladiku dia akambu ane tshe, nyolote ngandji; to keli dimama dia uluwanyi.”—Kolosai 3:12-14.
15. Kakɔna katomba ‘lam’ayalɔtsha’ Akristo la solo dia lotutsha ndo la waonga akina waki Nzambi?
15 Naka ase etshumanelo ‘ndjalɔtsha vamɛ’ la kɛtshi, l’ɔlɔlɔ, la ndjakitshakitsha, la kɛnɛmɔ, la solo dia lotutsha, la ngandji, kete wayonga l’akoka wa kandola ekakatanu ndo tshɔ otsha la ntondo kamɛ l’olimu wa Jehowa. Lo yoho ya lânde, emendji w’Akristo pombaka monga la solo dia lotutsha. Ekɔ tena dimɔtshi diahombawɔ mingola Okristo ɔmɔtshi, koko ekɔ toho efula takokawɔ sala dikambo sɔ. Paulo akakɔndɔla dionga dia dimɛna efula diahomba monga la wɔ lam’akandafundɛ Timɔtɛ ate: ‘owangolake, owahangwɛke, owalakake la solo dia lotutsha ndo la diewo dia mbetsha.’ (2 Timote 4:2) Eelo, pombaka salɛka ɛkɔkɔ waki Jehowa akambo nshi tshɛ la solo dia lotutsha, la kɛnɛmɔ, ndo la ngandji.—Mateu 7:12; 11:28; Etsha 20:28, 29; Romo 12:10.
‘Nyonge la solo dia lotutsha le anto tshɛ’
16. Kakɔna kakoka tomba naka tekɔ la ‘solo dia lotutsha otsha le anto tshɛ’?
16 Solo dia lotutsha diele la Jehowa otsha le anto totshutshuyaka dia sho lawɔ monga la ‘solo dia lotutsha otsha le anto tshɛ.’ (1 Tesalonika 5:14) Dikambo sɔ nembetshiyaka monga la memakana otsha le ase nkumbo kaso wele bu Ɛmɛnyi wa Jehowa, otsha le asukanyi aso, anyaso wa l’olimu, ndo wa la kalasa. Ɛmɛnyi wa Jehowa wakatondoya dikanyiyakanyiya efula diaki l’anto oya le wɔ mbala mɔtshi l’edja k’ɛnɔnyi efula, vɔ wakakikɛ awui wa lɔsɔkɔ ndo ɔlɔshamelo waheyama ndo bonde w’oma le anto wakamba lawɔ kana oma le anyawɔ wa la kalasa. (Kolosai 4:5, 6) Ɔpɔstɔlɔ Petero akafunde ate: “Nyuyali la ditshelu di’ololo l’atei w’ase wedja. Okone, naka wambunyosongwela vati: Nyu nyeko atshi wa kolo, naka vo wayena etsha anyu w’ololo, ku vo wayutumbula [Nzambi], lu lushi layundâkendela.”—1 Petero 2:12.
17. Ngande wakokaso mbokoya ngandji ndo solo dia lotutsha diaki Jehowa, ndo lande na kahombaso sala ngasɔ?
17 Miliyɔ y’anto wayokondja panda oma lo solo dia lotutsha diaki Jehowa. (2 Petero 3:9, 15) Naka sho mbokoya ngandji ndo solo dia lotutsha diaki Jehowa, kete tayotetemala la sambisha lokumu l’ɔlɔlɔ la Diolelo diaki Nzambi la memakana tshɛ ndo mbetsha anto akina dia vɔ ndjakitshakitsha l’ɛse k’ɛlɔmbwɛlɔ ka Diolelo diaki Kristo. (Mateu 28:18-20; Mako 13:10) Naka sho tshika sambisha, kete ayonga oko sho nangaka dia solo dia lotutsha diaki Jehowa monga l’elelo ndo aha kotsha oyango adiɔ wa konya anto dia kadimola etema.—Romo 2:4.
18. Kakɔna kakalɔmbɛ Paulo lo dikambo di’ase Kɔlɔsai?
18 Lo mukanda ande le Akristo w’ase Kɔlɔsai, wa l’Asie mineure, Paulo akafunde ate: “Dia dikambu ne, ndu shu, uma lu unya wakatuki lukumu lone, hatuheko nyolombela lu dombelo diasu, dia nyu ndudiama lu nimbitela lulangu landi, dia nyu ndjala la yimba ya nshihudia akambu tshe wa nyuma, dia nyu nkendakenda ololo uku alanga Khumadiondjo, dia nyu nto elua lu elimu w’ololo tshe, la dia mbula lu nimbitela [Nzambi]. Nyukikitshami la wulu tshe, uku wulu a lutumbu landi, dia nyu ndjala la etetemalu lu memakana, kame la ongenongeno.”—Kolosai 1:9-11.
19, 20. (a) Ngande wakokaso mbewɔ di’aha mbɔsa solo dia lotutsha diaki Jehowa oko ohemba ɔmɔtshi? (b) Ɛtshɔkɔ akɔna wayotokondja lo monga la solo dia lotutsha?
19 Solo dia lotutsha ndo memakana katetemala Jehowa mɛnya, hatonga ohemba le so naka sho ‘ndola l’ewo k’oshika ka lolango lande.’ Lolango lande ele di’“antu tshe nshimbamela ndu nkuma lu ewu ka mete.” (1 Timote 2:4) Tayotetemala la ‘tɔ elowa lo elimu tshɛ w’ɔlɔlɔ,’ djekoleko elimu wendana l’esambishelo ka “lukumu l’ololo lone la diulelu.” (Mateu 24:14) Naka tayotetemala sala dikambo sɔ la kɔlamelo tshɛ, kete Jehowa ‘ayotosha nkudu koleki tshɛ’ kayotokimanyiya dia ‘mbikikɛ efula ndo monga la solo dia lotutsha l’ɔngɛnɔngɛnɔ.’ Ndo naka sho sala ɔsɔku, kete ‘tayɔkɛndakɛnda lo yoho yasungana la ntondo ka Jehowa,’ ndo tayonga la ki kaya oma lo mbeya ɔnɛ ‘tekɔ lo mbɔngɛnyangɛnya lo yoho y’efula.’
20 Teye dimɛna dia solo dia lotutsha diaki Jehowa kɛnɛmɔlaka lomba lande. Diɔ diekɔ dikambo dia panda kaso shamɛ ndo ka wanɛ wahokamɛ esambishelo la wetshelo aso. (1 Timote 4:16) Monga l’elowa wa nyuma ɛnɛ: ngandji, kɛtshi, ɔlɔlɔ, memakana, ndo ndjaenda ayotokimanyiya dia kɛnɛmɔla solo dia lotutsha l’ɔngɛnɔngɛnɔ tshɛ. Tayonga l’akoka wa sɛna lo wɔladi l’ase nkumbo kaso ndo l’anangɛso l’akadiyɛso wa l’atei w’etshumanelo. Solo dia lotutsha ayotokimanyiya dia monga la memakana otsha le anyaso wa l’olimu kana wa la kalasa. Ndo solo diaso dia lotutsha diayonga l’oyango ɔmɔtshi, oyango wa shimbɛ atshi wa kɔlɔ ndo wa tombola Jehowa, Nzambi kele la solo dia lotutsha.
[Nɔtɛ ka l’ɛse ka dikatshi]
a Lo dikambo di’ɛtɛkɛta waki Paulo w’ɔnɛ “ngandji ekɔ la solo dia lotutsha ndo ɔlɔlɔ,” Gordon Fee, nomb’ewo k’awui wa lo Bible akafunde ate: “Lo awui wa teoloji wakeke Pauline [solo dia lotutsha la ɔlɔlɔ] wekɔ waonga ahende wele la Nzambi otsha le anto (enda lo Romo 2:4). Lo wedi ɔmɔtshi, woho wakikɛ Nzambi akambo la ngandji mɛnamaka oma lo woho wasukɛnde nkɛlɛ kande otsha le anto wɔtɔmbɔkwɛ; ndo lo wedi okina, ɔlɔlɔ ande mɛnamaka lo woho wɛnyande kɛtshi kande mbala nunu. Diɔ diakɔ diatatɛ Paulo tɛkɛta dikambo dia ngandji l’akambo ahende anɛ wendana la Nzambi, ɔnɛ lele oma lo tshimbo yaki Kristo akɛnya ndjakimɛ ndo ɔlɔlɔ ande otsha le wanɛ wasungana nongola alanya ande.”
Onde wɛ koka nembetshiya?
• Lo toho takɔna tele Yeso ekɔ ɛnyɛlɔ ka dimɛna efula lo kɛnɛ kendana la solo dia lotutsha?
• Kakɔna kayotokimanyiya dia monga la solo dia lotutsha?
• Ngande wakimanyiya solo dia lotutsha nkumbo, atshunda w’Akristo, ndo dikumanyi?
• Wahɔ akɔna wayotokondja ndo wayokondja anto akina oma lo solo diaso dia lotutsha na?
[Osato wa lo lɛkɛ 29]
Kânga l’atei w’ekakatanu wa wolo, Yeso akonge la memakana otsha le ambeki ande
[Osato wa lo lɛkɛ 30]
Emendji w’Akristo keketshamaka dia mbisha ɛnyɛlɔ k’ɔlɔlɔ k’anto wele la solo dia lotutsha lo yoho yasɛnawɔ l’anangɛwɔ
[Osato wa lo lɛkɛ 31]
Naka sho mbokoya ngandji ndo solo dia lotutsha diaki Jehowa, kete tayotetemala la sambisha lokumu l’ɔlɔlɔ
[Osato wa lo lɛkɛ 32]
Paulo akalɔmbɛ di’Akristo ‘monga la solo dia lotutsha l’ɔngɛnɔngɛnɔ tshɛ.’