Kakɔna katɔlɔmba Jehowa ɛlɔ kɛnɛ?
“Diui diakayi uma lu dingi ati: On’ami la ngandji one, ndi ambongenyangenya; nyuwukeli!”—MATEU 17:5.
1. Etena kakɔna kakakotsha Ɛlɛmbɛ oyango awɔ?
JEHOWA akasha wodja w’Isariyɛlɛ Ɛlɛmbɛ, kâmɛ ndo awui efula wakendanaka la wɔ. Lo dikambo di’ɛlɛmbɛ akɔ, ɔpɔstɔlɔ Paulo akafunde ate: ‘Ɔsɔ aki paka adjango wakakongɛma wakendanaka la demba ndo wakahombaka ndjelama edja ndo l’etena ka mbidja akambo l’ɔnɔngɔ.’ (Heberu 9:10) Ɛlɛmbɛ wakakotsha oyango awɔ lam’akawalɔmbɔla atshikadi w’Ase Isariyɛlɛ dia vɔ mbetawɔ Yeso oko Mɛsiya, kana Kristo. Diɔ diakɔ diakate Paulo ate: “Kristu keli ekumelu k’elembe.”—Romo 10:4; Ngalatiya 3:19-25; 4:4, 5.
2. Waa na waki la tshina di’Ɛlɛmbɛ, ndo etena kakɔna kakawayotshungɔ oma lɔkɔ?
2 Onde lâsɔ kɛdikɛdi sho taya bu l’ɛse k’Ɛlɛmbɛ ɛlɔ kɛnɛ? Mɛtɛ, lemba loleki woke l’anto watongaka l’ɛse k’Ɛlɛmbɛ ndoko lushi ɔtɔi, oko wakalembetshiya omembi w’esambu ate: “Ndi [Jehowa] katenyaka Jakoba diui diandi, ndu elembe andi la adjangu andi le Isariyele. Ndi kuntshela wedja tshe pupu; osoku mbahaweyi adjangu andi.” (Osambu 147:19, 20) Lam’akayodja Nzambi sheke y’oyoyo l’olambo wa Yeso, kânga wodja w’Isariyɛlɛ kondjoyala nto l’ɔkɛndɛ wa paka ndjela Ɛlɛmbɛ. (Ngalatiya 3:13; Efeso 2:15; Kolosai 2:13, 14, 16) Lâsɔ, naka anto waya kema nto l’ɛse k’Ɛlɛmbɛ, ko kakɔna kalɔmba Jehowa wanɛ wele la mposa ka mbokambɛ ɛlɔ kɛnɛ na?
Kɛnɛ kalɔmba Jehowa
3, 4. (a) Kakɔna mɛtɛ katɔlɔmba Jehowa ɛlɔ kɛnɛ? (b) Bonde kahombaso ndjela wanya wa Yeso dimɛna?
3 Lo ɔnɔnyi w’ekomelo w’olimu wa Yeso, apɔstɔlɔ ande anɛ: Petero, Jakɔba la Joani, wakôtshindɛ lo dikona di’otale, ondo lo shɔdi mɔtshi ya Dikona dia Hɛrɛmɔna. Lɛkɔ, wakatɛna ɛnɛlɔ kɛmɔtshi ka prɔfɛsiya ka Yeso lo lotombo la dimɛna hangɔnɛ ndo wakoke dui dia Nzambi ndamɛ ata ate: “On’ami la ngandji one, ndi ambongenyangenya; nyuwûkeli!” (Mateu 17:1-5) Otondo wa dikambo diatɔlɔmba Nzambi v’ɔsɔ: mbokɛɛ kana mpokamɛ Ɔnande ndo ndjela ɛnyɛlɔ la wetshelo wakinde. (Mateu 16:24) Diakɔ diakafunde ɔpɔstɔlɔ Petero ate: “Kristu akanyusuwela, akanyutshikela djimbitelu, dia nyu mbuyela lu wanya andi.”—1 Petero 2:21.
4 Lande na kahombaso ndjela wanya wa Yeso dimɛna? Nɛ dia lam’awokoyaso, tekɔ lo mbokoya Jehowa Nzambi. Yeso akeyaka She dimɛna dimɛna, lam’ele nde akadjasɛ la nde l’olongo ɛnɔnyi miliyara heyama la ntondo ka ndjoya laa nkɛtɛ. (Tukedi 8:22-31; Joani 8:23; 17:5; Kolosai 1:15-17) Lam’akinde lanɛ laa nkɛtɛ, Yeso akɛnya didjidji dia She la kɔlamelo tshɛ. Nde akate ate: “Dimi mbutaka kɛnɛ kakandakanya Mbapa ketoo.” Eelo mɛtɛ, Yeso akokoyaka Jehowa lo tshɛ ko akakoke ndjota ate: “Ɔnɛ lambɔmɛna, ambɛɛna Mbapa.”—Yowanɛ 8:28; 14:9, Dyookaneelo dy’Oyooyo.
5. Akristo wekɔ la tshina di’ɛlɛmbɛ akɔna, ndo etena kakɔna kakayomɛ ɛlɛmbɛ ɛsɔ kamba olimu?
5 Ahombaso ntsha dia mpokamɛ Yeso ndo mbôkoya na? Onde lâsɔ pombaka sho monga l’ɛse k’ɛlɛmbɛ ɛmɔtshi? Paulo akafunde ate: “Dime kema la tshina di’elembe.” Lanɛ, nde akatɛkɛtaka dia ‘sheke y’edjedja,’ mbut’ate sheke y’Ɛlɛmbɛ yakawadje l’Isariyɛlɛ. Paulo aketawɔ ɔnɛ nde aki “la tshina dia elembe wa Kristu.” (1 Koreto 9:20, 21; 2 Koreto 3:14) Lam’akakomɛ sheke y’edjedja y’Ɛlɛmbɛ, “sheki y’uyuyu” yakayotatɛ kamba olimu la “elembe [ayɔ] wa Kristu” wahomba ekambi tshɛ wa Jehowa wa nshi nyɛ kitanyiya.—Luka 22:20; Ngalatiya 6:2; Heberu 8:7-13.
6. Ngande wakokaso nembetshiya “elembe wa Kristu,” ndo ngande wâkitanyiyaso?
6 Jehowa kosala dia “elembe wa Kristu” fundama oko lokongɛ l’ɛlɛmbɛ wokahanyemi lo weho wotshikitanyi, oko ɔnkɔnɛ wakandasale la sheke y’edjedja y’Ɛlɛmbɛ. Ɛlɛmbɛ ɛsɔ w’eyoyo wahomba ambeki wa Kristo ndjela kema oshilo w’otale wa adjango wolembetshiyami l’ɔm’ɔmɔ. Koko, l’atei w’Ɔtɛkɛta ande, Jehowa akalame ɛkɔndɔ ɛnɛi wa weke wa lɔsɛnɔ la wetshelo w’Ɔnande. Lâdiko dia lâsɔ, Nzambi akasokoya ambeki amɔtshi wa Yeso wa ntondo la nyuma kande dia vɔ funda awui amɔtshi lo kɛnɛ kendana la lɔkɛwɔ lahomba monga l’onto, lo kɛnɛ kendana l’akambo wa l’etshumanelo, la dionga dia l’atei a nkumbo ndo l’akambo akina. (1 Koreto 6:18; 14:26-35; Efeso 5:21-33; Heberu 10:24, 25) Sho kitanyiyaka “elembe wa Kristu” lam’ɔtɔnganyiyaso nsɛnɔ yaso l’ɛnyɛlɔ ndo la wetshelo wa Yeso Kristo ndo lam’ayelaso alako w’afundji wa Bible wa l’eleko ka ntondo. Kɛsɔ mbalɔmba Jehowa ekambi ande nshi nyɛ.
Ohomba wa ngandji
7. Ngande wakake Yeso epole ɔsɛkɛ lo dui di’ohomba dia l’ɛlɛmbɛ lo Pasaka ka komelo kakandale l’apɔstɔlɔ ande?
7 Kânga mbaki ngandji ohomba lo Ɛlɛmbɛ, tɔ mbele dui dioleki ohomba lo ɛlɛmbɛ wa Kristo. Yeso akake epole ɔsɛkɛ lo dikambo sɔ lam’akandasangana l’apɔstɔlɔ wakinde dia vɔ sala difɛstɔ dia Pasaka l’ɔnɔnyi wa 33 wa lo tena diaso nɛ. Lo ndjela woho wakɔndɔla ɔpɔstɔlɔ Joani kɛnɛ kakete l’otsho ɔsɔ, Yeso akatɛkɛta dia ngandji mbala 28 l’atei w’ɛtɛkɛta w’oma k’ɛse otema wakandatondja. Dikambo sɔ diakakɔkɔmiya lo wɛɔngɔ w’apɔstɔlɔ ande dui dioleki ohomba kana oyango w’ɛlɛmbɛ ande. Tolembete dia Joani akamɛ ɔkɔndɔ ande w’akambo wakasalema la dikɔlɔ di’otsho sɔ di’ohomba l’ɛtɛkɛta ɛnɛ ate: “Jesu akeyi ati: Etena kami kambukuka ka dimi mumo uma la kete nye utsha le Papa, uku akandalangi antu andi la kete, osoku mbakandâlangi edja ndu l’ekumelu.”—Joani 13:1.
8. (a) Kakɔna kɛnya ɔnɛ owanu wa l’asa apɔstɔlɔ wakatetemala? (b) Ngande wakasha Yeso ambeki ande wetshelo wa ndjâkitshakitsha?
8 Yeso akoke apɔstɔlɔ ande ngandji kânga mbakandatshaka tshɛ dia mbakimanyiya woho wa vɔ minya mposa ka tshambandeko ka lowandji ndo ka monga lo dihole dia la diko koko akɛnamaka di’oko vɔ kombohokamɛ. Ngɔndɔ mɔtshi la ntondo ka vɔ koma la Jerusalɛma, ‘vɔ wakawane l’asawɔ dia mbeya ɔnɛ loleki woke.’ Yema la ntondo ka vɔ ndja l’osomba ɔsɔ lo difɛstɔ dia Pasaka, wakayowanaka nto l’ɔtɛ wa ɔnɛ loleki woke l’atei awɔ. (Mako 9:33-37; 10:35-45) Kɛnɛ kakasalema yema l’ɔkɔngɔ w’apɔstɔlɔ mbɔtɔ lo luudu la la diko dia ndɛ Pasaka kâmɛ mbala ka komelo akɛnya ɔnɛ okakatanu ɔsɔ wakatetemala. Etena kɛsɔ, ndoko ɔmɔtshi a l’atei awɔ laketawɔ mbɔtsha ekolo w’akina, mbekelo kakawasalɛka angɛndangɛnda. Dia nde mbasha wetshelo wa ndjâkitshakitsha, Yeso ndamɛ akɔtsha ekolo awɔ.—Joani 13:2-15; 1 Timote 5:9, 10.
9. Yeso akandayotshaka lo dikambo diakayotomba l’ɔkɔngɔ wa Pasaka ka komelo?
9 Kânga mbakandawasha wetshelo ɔsɔ, enda kɛnɛ kakayotomba nto l’ɔkɔngɔ wa vɔ ndɛ Pasaka ndo wa Yeso mpɔhɔla Eohwelo ka nyɔi kande kaki suke. Ɔkɔndɔ wa l’Evanjiliyɔ wa Luka mbutaka ɔnɛ: “Tamu takatumbi l’atei awo vati: Akona uleki wuki l’atei asu?” Lo dihole dia nde mboka apɔstɔlɔ nkɛlɛ ko mbahangwɛ la wolo w’efula, Yeso akawasha dako la wɔlamu tshɛ dia mbaɛnya ohomba wa vɔ ndjâtshikitanya l’emboledi w’andja ɔnɛ wele la mposa ka wolo ka lowandji. (Luka 22:24-27) Oma lâsɔ ko nde ndjowasha kɛnɛ kakoka mbelamɛ ɔnɛ etshina k’ɛlɛmbɛ wa Kristo, ata ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji.”—Joani 13:34.
10. Naa ɔlɛmbɛ wakasha Yeso ambeki ande, ndo kakɔna kalɔmbama l’ɔlɛmbɛ akɔ?
10 L’ɔkɔngɔ diko, la dikɔlɔ diakɔ diamɛ, Yeso akɛnya polo ndo lɛnɛ ahomba koma ngandji kele oko ka Kristo. Nde akate ate: “One eli olembe ami: nyukani ngandji, uku akamanyuki ngandji. Nduku untu la ngandji kuleki kene ka mvwela engenyi andi.” (Joani 15:12, 13) Onde Yeso akataka ɔnɛ ambeki pombaka mbetawɔ mvwɛ asekawɔ ambetawudi naka aya paka ntsha ngasɔ? Eokelo kɛsɔ mbaki la Joani, ɔnɛ laki laawɔ la tshondo yande l’etena kɛsɔ, nɛ dia nde akayofundaka l’ɔkɔngɔ diko ate: “Dia dikambu ne, mbeyasu ngandji, ne dia ndi [Yeso Kristo] akatukimwela lumu. Ku dieli la su dia nkimwela anyasu lumu.”—1 Joani 3:16.
11. (a) Ngande wakotshaso ɛlɛmbɛ wa Kristo? (b) Ɛnyɛlɔ kakɔna kakatotshikɛ Yeso?
11 Ɔnkɔnɛ, hatokotsha ɛlɛmbɛ wa Kristo paka lo ndakanya anto akina akambo ande ato ko pe. Sho pombaka nto nsɛna oko Yeso ndo monga la woho wa dionga diaki la nde. Mɛtɛ, Yeso akatondjaka ɛtɛkɛta w’amɛna ndo wa lɔsɔna lo alako ande. Koko nde akalakanyaka ndo oma l’ɛnyɛlɔ. Kânga mbaki Yeso etongami ka nkudu ka lo nyuma l’olongo, nde akɔsɛ diaaso dia ndjokambɛ wahɔ wa She lanɛ laa nkɛtɛ ndo ndjɛnya woho wahombaso sɛnaka. Nde aki la ndjâkitshakitsha, la wɔlamu, akakanɛka anto ndo akakimanyiyaka wanɛ wakɛnaka pâ la wetsho ndo wakasɔkishamaka. (Mateu 11:28-30; 20:28; Filipi 2:5-8; 1 Joani 3:8) Ndo nto, Yeso akakɔkɔmiya ambeki ande dia vɔ mbokana ngandji onto la onyande oko wakandawaoke ngandji.
12. Lande na kakokaso mbuta ɔnɛ ɛlɛmbɛ wa Kristo mɛnyaka ohomba wa mboka Jehowa ngandji?
12 Ngandji ka Jehowa, dui dioleki woke l’Ɛlɛmbɛ, kekɔ la dihole diakɔna l’atei w’ɛlɛmbɛ wa Kristo na? (Mateu 22:37, 38; Ngalatiya 6:2) Onde dihole dia hende? Ndoko yema tshitshɛ! Ngandji ka Jehowa ndo k’asekaso Akristo kakatana ma ma. Ndoko onto lakoka nanga Jehowa mɛtɛ aha la nde mboka ndo ɔnango ngandji, nɛ dia ɔpɔstɔlɔ Joani akafunde ate: “Naka untu ayuta ati: Dimi latulangaka [Nzambi], ku ndi mpetshaka unyandi, keti kanga kashi kendi. Ne dia untu lahalangi unyandi lenandi, ndi heyi nanga [Nzambi] lahandenyi.”—1 Joani 4:20; enda ndo lo 1 Joani 3:17, 18.
13. Etombelo akɔna wakayala oma lo woho wakakitanyiyaka ambeki ɔlɛmbɛ w’oyoyo wakawasha Yeso?
13 Lam’akasha Yeso ambeki ande ɔlɛmbɛ w’oyoyo wa mbokana ngandji onto la onyande oko akandawaoke ngandji, nde akalembetshiya ndo kɛnɛ kakahombe ndjotomba oma lo dikambo sɔ. Nde akate ate: “Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joani 13:35) Lo ndjela Tertullien, ɔnɛ laki la lɔsɛnɔ ɛnɔnyi ndekana lokama l’ɔkɔngɔ wa nyɔi ka Yeso, ngandji k’onto l’ɔnango kaki l’ambeki wa ntondo kakayala l’etombelo ɛsɔ. Lo ndjela Tertullien, wanɛ waki komonga Akristo wakataka ɔnkɔnɛ lo dikambo di’ambeki wa Kristo: ‘Ohonyenda woho wokanawɔ ngandji onto la onyande ndo wetawɔwɔ kânga di’onto mvwela onyande.’ Sho pombaka ndjambola ɔnɛ: ‘Onde dimi mɛnyaka ngandji ka ngasɔ otsha le asekami Akristo, ngandji kɛnya ɔnɛ lekɔ mɛtɛ ombeki wa Yeso?’
Woho wɛnyaso ngandji kaso
14, 15. Kakɔna kakoka mbetɛ okitanyiyelo w’ɛlɛmbɛ wa Kristo dui dia wolo, ko kakɔna kakoka tokimanyiya dia mbakitanyiya?
14 Ekɔ ohomba efula di’ekambi wa Jehowa kɛnɛmɔla ngandji kele oko ka Kristo. Ko onde wɛ mɛnaka wolo nanga asekayɛ Akristo wele la dionga dia ndjayangɛka paka wahɔ awɔ vamɛ? Oko wakatadiɛnyi, kânga apɔstɔlɔ wakawanaka ndo wakahembaka di’onto l’onto sukɛ wahɔ wakinde. (Mateu 20:20-24) Ase Ngalatiya nto wakawanaka efula l’asawɔ lo tokambokambo t’anyanya. L’ɔkɔngɔ wa nde mɛnya ɔnɛ ngandji k’osekaso onto kakakotsha Ɛlɛmbɛ, Paulo akawaewola ate: “Keli naka nyayulumatana, nyayolena, kanyewo, nyatukushilana.” L’ɔkɔngɔ wa nde mɛnya otshikitanu wa l’asa etsha wa demba la elowa wa nyuma, Paulo akayokotsha dako nɛ ate: ‘Tatoyalake akanga wa lotamanya, totshike esolanyi lam’asaso la ɔkɔmiya.’ Oma lâsɔ, Paulo akayâkɔkɔmɛ ate: “Nyembaneli wetshu anyu, dia nyu nshidiya elembe wa Kristu.”—Ngalatiya 5:14–6:2.
15 Onde Jehowa ekɔ lo tɔlɔmba dui dia wolo efula lam’atande dia sho kitanyiyaka ɛlɛmbɛ wa Kristo? Kânga mbele mbeyaka monga wolo dia sho monga ɔlɔlɔ otsha le wanɛ wakatotondjɛ ɛtɛkɛta wa lɔlɛngɔ ndo wakatohumuya l’asolo, tekɔ l’ɔkɛndɛ wa ‘mbokoya Nzambi, oko ana wa ngandji, ndo tetemala kɛndakɛnda lo ngandji.’ (Efeso 5:1, 2) Sho pombaka tetemala mendaka ɛnyɛlɔ ka Nzambi, ɔnɛ ‘latolembetshiya ngandji katokande lo woho wakatovwɛ Kristo lâsɔ ko teeke akanga wa pɛkato.’ (Romo 5:8) Naka sho mbɔsa tɛdikɔ dia kimanyiya anto akina, oyadi kânga wanɛ wakatosalɛ kɔlɔ, kete sho kokaka mboka ɔlɔ wa mbeya ɔnɛ tekɔ lo mbokoya Nzambi ndo tekɔ lo kitanyiya ɛlɛmbɛ wa Kristo.
16. Ngande wɛnyaso ngandji kokaso Nzambi la Kristo?
16 Sho pombaka mbohɔka ɔnɛ sho mɛnyaka ngandji kaso lo kɛnɛ katshaso, aha paka l’ɛtɛkɛta eto. Kânga Yeso mbala kɛmɔtshi akɛnyi wolo mbetawɔ dui dimɔtshi diendana la lolango la Nzambi lo menda kɛnɛ tshɛ kakalɔmbamaka lo dikambo sɔ. Yeso akalɔmbɛ ate: “Papa, naka we nangaka, uminyiya dikoho ne.” Koko esadi eto, nde akayota ate: “Kuku aha uku alangami, keli uku alangaye.” (Luka 22:42) Yeso akasalaka lolango la Nzambi oyadi pâ yakɔna tshɛ yakandɛnaka. (Heberu 5:7, 8) Okitanyiya ekɔ djembetelo ya ngandji kaso ndo mɛnyaka ɔnɛ sho mbetawɔka dia mboka ka Nzambi koleki dimɛna tshɛ. Bible mbutaka ɔnɛ: “Ngandji ka [Nzambi] kene, dia shu nama elembe andi.” (1 Joani 5:3) Yeso akatɛ apɔstɔlɔ ande ate: “Naka nyu nangakami, nyayukitanyia elembe ami.”—Joani 14:15.
17. Naa didjango dia lânde diakadjɛ Yeso ambeki ande, ndo ngande weyaso ɔnɛ diɔ mendanaka la so ɛlɔ kɛnɛ?
17 Lâdiko dia mbutɛ ambeki ande dia vɔ mbokana ngandji, naa didjango dia lânde diakawadjɛ Kristo na? Nde akawadjangɛ dia ntsha olimu w’esambishelo wakandâlakanya. Petero akate ate: ‘Nde akatotomɛ dui dia sambisha anto ndo mbalembetshiya akambo dimɛna dimɛna.’ (Etsha 10:42) Yeso akawadjɛ didjango sɔ l’ɛtɛkɛta ɛnɛ ate: “Okone nyutshu, nyete wedja tshe ambeki, nyâbatiza lu lukumbu la Papa ndu l’Ona ndu la [nyuma k’ekila]. Nyuwaetshaki dia ntsha akambu tshe wamumunyutela.” (Mateu 28:19, 20; Etsha 1:8) Yeso akɛnya ɔnɛ awui asɔ wayendana ndo l’ambeki ande wasɛna nshi nyɛ lo “etena k’ekumelu,” nɛ dia nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. Lokongo diku, ekumelu kayuya.” (Danyele 12:4; Mateu 24:14) Mɛtɛ, lolango la Nzambi ele dia sho sambisha. Koko amɔtshi mbeyaka ndjɔfɔnya ɔnɛ Nzambi ekɔ lo tɔlɔmba dui dia wolo tɛkɔya lam’atotɛnde dia ntsha olimu ɔsɔ. Ko onde ngasɔ mbediɔ mɛtɛ?
Ɔkɔkɔ wakokawɔ mɛnama oko wolo
18. Kakɔna kahombaso mbohɔka lam’asowaso l’ɔtɛ wa ntsha kɛnɛ kalɔmba Jehowa?
18 Oko wakatadiɛnyi, tatɛ oma lam’akatongama onto laa nkɛtɛ, Jehowa akalɔmbɛ anto dia vɔ ntsha awui wa weho la weho wawadjangɛnde. Oko wakatshikitanaka kɛnɛ kakandâlɔmbaka, ndo ehemba wakahomanaka la wɔ wakatshikitanaka. Ɔna Nzambi la ngandji akahomana l’ehemba woleki wolo tshɛ, akayodiakemaka ndo ndjakema lo yoho yoleki tshɛ kɔlɔ l’ɔtɛ wa ntsha kɛnɛ kakɔ̂lɔmbɛ Nzambi. Koko lam’asowaso l’ɔtɛ watshaso kɛnɛ katɔlɔmba Jehowa, sho pombaka mbohɔka ɔnɛ aha nde mbatela ehemba ɛsɔ. (Joani 15:18-20; Jakoba 1:13-15) Ɔtɔmbɔkwɛlɔ wa Satana akayelaka pɛkato, fɔnu la nyɔi. Nde mbatonga akambo wahedja ekambi wa Jehowa ɛtɛ dia vɔ ntsha kɛnɛ kâlɔmbande.—Jobo 1:6-19; 2:1-8.
19. Lande na kele ntsha kɛnɛ katɔlɔmba Nzambi lo tshimbo y’Ɔnande ekɔ tshondo ya diɛsɛ?
19 Lo tshimbo y’Ɔnande, Jehowa akate ɔnɛ l’etena kɛnɛ k’ekomelo, ekambi Ande pombaka sambisha lo nkɛtɛ k’otondo ɔnɛ Diolelo diande mbayoyonya fɔnu tshɛ yɛna anto. Lowandji lɔsɔ laki Nzambi layoyoshidiya ekakatanu tshɛ laa nkɛtɛ: ata, awui wa ngala, wola, lotshundju l’osombe, hemɔ, la nyɔi. Diolelo sɔ diayotela ndo paradiso ka lotombo laa nkɛtɛ, lɛnɛ ele kânga wanɛ wakavu wayolɔ. (Mateu 6:9, 10; Luka 23:43; Etsha 24:15; Enyelo 21:3, 4) Ande diɛsɛ dia mbewoya lokumu l’ɔlɔlɔ l’awui wa ngasɔ lee! Lâsɔ mɛtɛ, mbokɛmaka hwe dia kɛnɛ katɔlɔmba Jehowa dia sho ntsha ndoko wolo wetɔ. Wekamu la ekakatanu wahomana la so ndjâka oma le Satana la andja wakinde.
20. Ngande wakokaso shidiya tɔfwɛfwɛ tshɛ takadje Diabolo?
20 Ngande wakokaso shidiya tɔfwɛfwɛ tshɛ takadje Satana na? Ele lo nama ɛtɛkɛta wayela ɛnɛ lo yimba: “Onami, uyali kanga [lo]mba, ongenyangenya utema ami. Ku dimi layeya nkaluya diui le one latomonyolaka.” (Tukedi 27:11) Yeso akasha Jehowa okadimwelo wa nde mbisha Satana, ɔnɛ lawɔnyɔla, lam’akandatshike ekokelo ka lo lɔsɛnɔ la l’olongo dia ndjosala lolango la She laa nkɛtɛ. (Isaya 53:12; Heberu 10:7) Lam’akinde oko onto, Yeso akakikɛ weho w’ehemba tshɛ wakôkomɛka, oyadi kânga nyɔi kal’otamba w’asui. Naka sho mboyela oko Ɛnyɛlɔ kaso, kete ndo sho lawɔ kokaka mbikikɛ asui ndo ntsha kɛnɛ katɔlɔmba Jehowa.—Heberu 12:1-3.
21. Kakɔna kokayɛ l’otema ayɛ lo menda ngandji kakatɛnya Jehowa nde l’Ɔnande?
21 Nde ngandji kakatɛnya Nzambi nde l’Ɔnande lee! L’ɔtɛ w’olambo wa Yeso, anto wele l’okitanyiya wekɔ l’elongamelo ka sɛna pondjo pondjo lo Paradiso. Lâsɔ aha sho mbetawɔ ndoko ema ɔtɔi fukutanya elongamelo kaso, koko onto l’onto adje kɛnɛ kakayosala Yeso l’atei w’otema ande, oko akakidje Paulo, ɔnɛ lakate ate: ‘Ɔna Nzambi akamboke ngandji . . . ndo akayâkimɔ dikambo diami.’ (Ngalatiya 2:20) Nyɛsɔ tɛnya lowando l’oma k’ɛse otema lele laso otsha le Jehowa, Nzambi ka ngandji, ɔnɛ lahatɔlɔmbaka pondjo kɛnɛ kele wolo efula.—Heberu 12:1-3.
[Caption]
Ngande wayoyokadimola?
◻ Kakɔna katɔlɔmba Jehowa ɛlɔ kɛnɛ?
◻ La dikɔlɔ di’otsho dia komelo diakinde l’apɔstɔlɔ ande, ngande wakake Yeso epole ɔsɛkɛ dia mɛnya ohomba wa ngandji?
◻ Ngande wakokaso mɛnya ɔnɛ tekɔ lo mboka Nzambi ngandji?
◻ Lande na kele ntsha kɛnɛ katɔlɔmba Nzambi ekɔ diɛsɛ dia mamba?
[Caption]
[Study Questions]
[Caption on page 13]
[Picture on page 13]
Naa wetshelo wakasha Yeso lo mbɔtsha ekolo w’apɔstɔlɔ ande na?
[Caption on page 15]
[Picture on page 15]
Oyadi wekamu wekɔ, sambisha lokumu l’ɔlɔlɔ ekɔ diɛsɛ di’ɔlɔ efula