Onde Kristo ekɔ lo nɔmbɔla mɛtɛ lɔsɛnɔ layɛ?
“Tanyetamake ‘ɛnɔmbɔdi,’ nɛ dia nyekɔ l’Ɔnɔmbɔdi ɔtɔi, Kristo.”—MATEO 23:10, NW.
1. Naa onto lamɛ lele Ɔnɔmbɔdi w’Akristo wa mɛtɛ?
AKI Lushi la Hende, Ngɔndɔ ka Nisana 11. L’ɔkɔngɔ wa nshi shato, Yeso Kristo ayodiakema. Ɔsɔ aki mbala kande ka komelo ka mbɔtɔ lo tɛmpɛlɔ. Lushi lɔsɔ, Yeso akasha lemba l’anto lakatshumana lo dihole sɔ kâmɛ ndo ambeki ande wetshelo w’ohomba efula. Nde akate ate: “Tanyetamake Rabbi, nɛ dia nyekɔ l’ombetsha ɔtɔi, ko nyu tshɛ nyekɔ anto l’ɔnango. Ndo nto, tanyetake onto la la nkɛtɛ nyate, Shɛso, nɛ dia nyekɔ la Shɛnyu ɔtɔi, nde ekɔ l’olongo. Tanyetamake ‘ɛnɔmbɔdi,’ nɛ dia nyekɔ l’Ɔnɔmbɔdi ɔtɔi, Kristo.” (Mateo 23:8-10, NW) Lo mɛtɛ, Yeso Kristo mbele Ɔnɔmbɔdi w’Akristo wa mɛtɛ.
2, 3. Mpokamɛ Jehowa ndo mbetawɔ Ɔnɔmbɔdi wakandatosha ayonga la shɛngiya yakɔna lo lɔsɛnɔ laso?
2 Ekɔ ɔlɔlɔ efula sho mbetawɔ dia Yeso tɔlɔmbɔla. Oma lo tshimbo y’omvutshi Isaya, Jehowa Nzambi akate dikambo di’oyelo w’Ɔnɔmbɔdi ɔsɔ ate: “Nyulungi, nyu tshe weli la pusa, nyuyi lu ashi. Ndu nyu wane waha la falanga, nyuyi, nyuyose, nyono. Nyuyi, nyuyose wanu la awele wososa, aha l’ushinga. . . . Nyumbukeli, nyolekaki kene keli ololo. Nyuhuke atui, nyuyi le mi. Nyumbukeli, ku etema anyu wayuyala la lumu. . . . Enda, lakûkitsha omenyi le wedja, [“ɔnɔmbɔdi ndo owandji,” NW] le antu.”—Isaya 55:1-4.
3 Isaya akakambe la diangɔ di’ɔkɛlɛngɔ dieyama le anto tshɛ, oko ashi, awɛlɛ, ndo wanu dia mɛnya shɛngiya yonga la lɔsɛnɔ laso etena kahokamɛso Jehowa ndo kayelaso Ɔnɔmbɔdi ndo Owandji wakandatosha. Etombelo wakondjaso lo sala ngasɔ ko ekeketshelo. Ekɔ oko watokeketshamaka onto naka nde ambɔnɔ dikɔhɔ di’ashi wa ntshitshi lushi la yanyi ya tɛɛ. Mposa kaso k’akambo wa mɛtɛ ndo w’ɔlɔlɔ mondɔka. Oko wele awɛlɛ keketshaka ana w’ashashi ndo mbakimanyiyaka dia vɔ pama, mbele ‘awɛlɛ w’ɔtɛkɛta’ tokeketshaka ndo tokimanyiyaka dia sho pama lo nyuma lo diɔtɔnganelo di’asaso la Nzambi. (1 Petero 2:1-3) Ndo nto, onto akɔna ahetawɔ dia wanu mbishaka anto ɔngɛnɔngɛnɔ lo nshi ya fɛtɛ na? Lo yoho yakɔ yamɛ mbele, tɛmɔla Nzambi ka mɛtɛ ndo ndjela wanya w’Ɔnɔmbɔdi wakandasɔnɛ toshaka “ongenongeno” lo lɔsɛnɔ. (Euhwelu k’Elembe 16:15) Lâsɔ, ekɔ ohomba dia sho tshɛ, akɛnda kana epalanga, apami kana wamato mɛnya dia Kristo mbalɔmbɔla mɛtɛ lɔsɛnɔ laso. Ko ngande wakokaso mɛnya lo lɔsɛnɔ laso la lushi la lushi dia Mɛsiya mbele Ɔnɔmbɔdi aso na?
Akɛnda le, nyotetemale ‘pama lo lomba’
4. (a) Kakɔna kakatombe lam’aki Yeso l’ɛnɔnyi 12 lam’akawatshu la Jerusalɛma lo fɛtɛ ka Pasaka? (b) Ewo ka ngande kaki la Yeso lam’akinde eke l’ɛnɔnyi 12 eto?
4 Tende ɛnyɛlɔ kakatshikɛ Ɔnɔmbɔdi aso akɛnda. Kânga mbele hateye awui efula wendana la yoho ya lɔsɛnɔ yaki la Yeso lam’akinde êke dikɛnda, dui dimɔtshi diakatombe kɛnɛmɔlaka yoho ya lɔsɛnɔ yaki lande. Lam’akinde l’ɛnɔnyi 12, ambutshi ande wakawɔshi ko wakande lɔkɛndɔ lakawandaka ɔnɔnyi tshɛ otsha la Jerusalɛma dia tosala fɛtɛ ka Pasaka. Lo diaaso sɔ nde akatoyakimɔka tshɛ l’ɔkɛtshanyelo w’Afundelo, ndo nkumbo kande wakotshike lam’akawakawola aha la vɔ mbeya. L’ɔkɔngɔ wa vɔ ndjakiyanya nshi shato y’etondo dikambo dia Yeso, Yɔsɛfu nde la Mariya, wakatotana lo tɛmpɛlɔ, “udjashi l’atei w’embetsha, uka aui awo la awambula embula.” Ndo nto, “wane [tshɛ] wakuki awui andi, wakambi dia yimba yandi la ekadimwelu kandi ka embula.” Ohokanyiya yema, lam’akinde eke paka l’ɛnɔnyi 12 eto, Yeso akakokaka aha tsho mboka wembola watshutshuya onto dia kana yimba wendana l’awui wa lo nyuma, koko nde akashaka nto ndo ekadimwelo w’eshika! Aha la tâmu, wetshelo wakawosha ambutshi ande wakokimanyiya efula.—Luka 2:41-50.
5. Ngande wakoka akɛnda mbɛdikola woho wɔsawɔ wekelo wa Bible wa lo nkumbo?
5 Onde wɛ êke dikɛnda? Naka ambutshi ayɛ wekɔ ekambi wamboyakimɔka le Nzambi, kete ondo wekelo wa Bible wa mbala la mbala salemaka lo nkumbo kanyu. Ngande wɔsayɛ wekelo ɔsɔ wa lo nkumbo na? Lande na kahayakane lomba la wembola wele oko wɛnɛ: ‘Onde dimi sukɛka tɛdikɔ takɔsama lo dikambo dia wekelo wa Bible lo nkumbo kaso l’otema ɔtɔi? Onde dimi kambaka kamɛ latɔ, lo mbewɔ dia sala kɛnɛ kakoka fukutanya ekongelo kɛsɔ?’ (Filipi 3:16) ‘Onde dimi mbishaka kɔmatɛrɛ dimɛna lo wekelo? Onde dimi mbokaka wembola wendana l’awui wekama ndo mbishaka kɔmatɛrɛ yendana la woho wa kamba l’awui akɔ etena konga dikambo sɔ ohomba? Oko watamahame lo nyuma, onde dimi mbekaka dia nanga ‘mbo ya wolo y’anto wambotshunda’?’—Heberu 5:13, 14.
6, 7. Naa ohomba wele la wadielo wa Bible wa lushi la lushi le akɛnda na?
6 Ekɔ nto ohomba mbadiaka Bible lushi tshɛ. Omembi w’esambo akembe ate: “Untu lahayeli kanyi y’antu wa kolo, . . . eli la otshoko. Keli ndi atongenangenaka lu elembe wa [Jehowa]; atukanaka yimba dia elembe ako ndu la yanyi ndu l’utshu.” (Osambu 1:1, 2) Jashua, okitɔ wa Mɔsɛ, ‘akadiaka awui wa lo dibuku di’ɛlɛmbɛ la dui dia l’ɛse la yanyi ndo l’otsho.’ Dui sɔ diakokimanyiya dia sala akambo la lomba ndo dia mbeya mɛmba ɔkɛndɛ wakawosha Nzambi. (Jashua 1:8) Ɔnɔmbɔdi aso Yeso Kristo, akate ate: “Akafundama ati: Untu hayala la lumu ne dia ma tu, Keli ayuyala la lo ne dia aui tshe Watumba uma l’unyo wa [Nzambi].” (Mateu 4:4) Naka tekɔ l’ohomba wa mbo ya ndɛ ya lo demba lushi tshɛ, kete lâsɔ tekɔ l’ohomba woleki wa mbo ya ndɛ ya lo nyuma mbala la mbala!
7 Lo mbeya ehomba ande wa lo nyuma, Nicole, osekaseka w’ɛnɔnyi 13 akatatɛ mbadia Bible lushi tshɛ.a Wony’ɔnɛ wayande l’ɛnɔnyi 16, nde ambadia Bible k’otondo mbala ɔtɔi ndo mbala ka hende kondotadia kɛnɛ, nde aya oko l’atei atei. Nde ekɔ lo kamba la yoho ya wɔdu efula. Nde ate: “Lakɔshi yɛdikɔ ya mbadiaka tshapita ɔtɔi lo lushi.” Wahɔ akɔna wakondjande oma lo wadielo ande wa Bible wa lushi la lushi na? Nde kadimolaka ate: “Lo nshi yaso nyɛ, tɔsɛngiya ta kɔlɔ tekɔ efula. Dimi pomanaka la tɔsɛngiya tadja mbetawɔ kami l’ohemba, oyadi la kalasa kana l’ahole akina. Ɔnkɔnɛ, lo mbadiaka Bible lushi tshɛ, dimi mbohɔka esadi eto adjango ndo atɔndɔ wa lo Bible watshutshuya dia shika tanga la ntondo ka tɔsɛngiya tɔsɔ. Omalɔkɔ, lekɔ lo mboka dia lamboleka ndjasukanya la Jehowa nde la Yeso.”
8. Mbekelo kakɔna kaki la Yeso lo shinangɔnga, ndo ngande wakoka akɛnda mbokoya?
8 Yeso aki la mbekelo ka mpokamɛka ndo ka mbadiaka Afundelo lo shinangɔnga. (Luka 4:16; Etsha 15:21) Lâsɔ, ekɔ dimɛna efula le akɛnda dia vɔ ndjela ɛnyɛlɔ kɛsɔ lo mbɔtɔka mbala la mbala lo nsanganya y’Akristo, lɛnɛ adiema ndo ekama Bible! Dia mɛnya lowando lande lo nsanganya shɔ, Richard, dikɛnda dia pami di’aya l’ɛnɔnyi 14 mbutaka ate: “Nsanganya yekɔ ohomba efula le mi. Yɔ mboholakami mbala tshɛ kɛnɛ kele ɔlɔlɔ la kɔlɔ, lɔkɛwɔ lele ɔlɔlɔ ndo lɔnɛ lele mindo, dionga diafɔna kana diahafɔnɛ la diaki Kristo. Dimi hadiɛnɛ la ntondo ka ndjeya tshikitanya akambo asɔ, mbut’ate hakondja wetshelo paka l’ɔkɔngɔ wa mpomɔ mpokoso.” Eelo, ‘waohwelo wa Jehowa wekɔ ɔlɔlɔ, vɔ mbishaka kanga enginya ewo.’ (Osambu 19:7) Nicole nde lawɔ salaka tshɛ dia mbɔtɔka lo nsanganya yakɔ tshanu ya l’etshumanelo yasalema lomingu tshɛ. Nde mbɔsaka nto wenya ehende polo ndo l’esato dia ndjilɔngɔsɔla.—Efeso 5:15-16.
9. Ngande wakoka akɛnda tetemala ‘pama lo lomba’?
9 Nshi ya dikɛnda mbele etena k’ɔlɔlɔ k’onto mbeka dia ‘mbeya Nzambi ɔtɔi ka mɛtɛ, ndo ɔnɛ lakandatome, Yeso Kristo.’ (Joani 17:3) Ondo wɛ mbeyaka akɛnda amɔtshi wetsha wenya awɔ efula paka lo mbadiaka abuku wa toshimu, lo mendaka televiziɔ, lo kɛnyaka damɛ kana longanda, kana lo mendaka awui wa l’Internet. Onde wɛ pombaka mbaokoya naka wɛ nangaka ndjela ɛnyɛlɔ ka kokele k’Ɔnɔmbɔdi aso? Lo dikɛnda diande, nde akangɛnangɛnaka mbeka awui wendana la Jehowa. Wahɔ akɔna wakandakondja na? Oko wakandalangaka awui wa lo nyuma, ‘Yeso akatetemala pama lo lomba.’ (Luka 2:52) Wɛ lawɔ koka pama lo lomba.
‘Nyonge l’okitanyiya lam’asanyu’
10. Kakɔna kayokimanyiya nkumbo dia monga la wɔladi ndo la lɔsɛnɔ l’ɔngɛnɔngɛnɔ?
10 Nkumbo koka monga dihole dia wɔladi ndo di’ɔngɛnɔngɛnɔ kana dihole di’ata ndo di’ewanu. (Tukedi 21:19; 26:21) Nkumbo yetawɔ dia Kristo ndjilɔmbɔla mongaka la wɔladi ndo l’ɔngɛnɔngɛnɔ. Lo mɛtɛ, Yeso ekɔ ɛnyɛlɔ lo kɛnɛ kendana la diɔtɔnganelo dia lo nkumbo. Afundelo mbutaka ɔnɛ: “Nyuyakitshakitsha la tshina di’anyanyu lu woma wa Kristu. Nyu wadi, nyuyakitshakitsha la tshina dia waumenyu, uku le Khumadiondjo. Ne dia omi keli ote a wadi, uku eli Kristu ote w’ekelizia, ndame keli Ushimbedi a dimba. . . . Nyu waumi, nyulangi wadienyu, uku akalangi Kristu ekelizia, akandayakimo dikambu diato.” (Efeso 5:21-25) Ɔpɔstɔlɔ Paulo akafundɛ etshumanelo ka la Kɔlɔsai ate: “Ana, nyukitanyia ambutshi anyu lu akambu tshe; dikambu so mbatongenyangenyaka Khumadiondjo.”—Kolosai 3:18-20.
11. Ngande wɛnya omi dia Kristo mbalɔmbɔla mɛtɛ lɔsɛnɔ lande?
11 Lo nkumbo yayela alako asɔ, omi mbalɔmbɔla, wadɛnde mbosukɛka la kɔlamelo tshɛ ndo ana kitanyiyaka ambutshi awɔ. Naka pami hakambe dimɛna la lowandji lande, kete nkumbo hatonga l’ɔngɛnɔngɛnɔ. Omi la lomba la dia mbeka dia mbokoya Owandji ndo Ɔnɔmbɔdi ande, Yeso Kristo. (1 Koreto 11:3) Kânga mbele l’ɔkɔngɔ diko Yeso akayokomaka “ote w’akambu tshe w’ekelizia,” nde kondja la nkɛtɛ “dia antu mbukambela ulimu, keli akayi dia mbakambela ulimu.” (Efeso 1:22; Mateu 20:28) Woho akɔ wamɛ mbele, omi l’Okristo kambaka la lowandji lande, aha la lokaki, koko dia kotsha wahɔ wa wadɛnde l’anande, eelo, wahɔ wa nkumbo k’otondo. (1 Koreto 13:4, 5) Nde nyangaka dia monga la waonga w’ɔlɔlɔ w’owandji ande, Yeso Kristo. L’ɛnyɛlɔ ka Yeso, nde mongaka l’otema wa memakana ndo wa ndjakitshakitsha. (Mateu 11:28-30) Nde hoke wolo mbuta ɔnɛ “okimwe” kana ɔnɛ “wɛ mbɔswɛ” naka nde mbotshe kɔlɔ. Ɛnyɛlɔ kande k’ɔlɔlɔ tshutshuyaka wadɛnde dia monga “okimanyedi,” “okotsha,” kana “olonganyi” le nde, lo mbekaka oma l’ɛnyɛlɔ kande ndo lo kambaka la nde dihɛka lo dihɛka.—Etatelu 2:20; Malaki 2:14.
12. Kakɔna kayokimanyiya wadi dia mbetawɔ tɔndɔ diendana la lowandji?
12 Wadi lo wedi ande, la dia monga l’okitanyiya le omɛnde. Koko, naka nde ambonga la yimba ya l’andja ɔnɛ, kete nde koka ndjomɛ mɔnyɔla tɔndɔ diendana la lowandji, ndo hatonga l’okitanyiya le pami. Afundelo hawote dia pami la dia mbahemɛ wadɛnde la ngala, koko vɔ nɔmbaka wadi dia kitanyiya waomɛwɔ. (Efeso 5:24) Bible nɔmbaka waomi ndo ambutshi dia mɛmba ɛkɛndɛ awɔ, ndo lam’akambawɔ l’alako wa lɔkɔ, dikambo sɔ mbelaka wɔladi lo nkumbo ndo mbidjaka akambo l’ɔnɔngɔ.—Filipi 2:5.
13. Naa ɛnyɛlɔ kendana l’okitanyiya kakasha Yeso ana?
13 Ana pombaka monga l’okitanyiya le ambutshi awɔ. Lo dikambo sɔ, Yeso akasha ɛnyɛlɔ ka dimɛna efula. L’ɔkɔngɔ wa kɛnɛ kakatombe lo tɛmpɛlɔ lam’akatshikala Yeso nshi shato lâsɔ ko nde ele l’ɛnɔnyi 12, Bible mbutaka dia “nde akatshu [l’ambutshi ande], akakumi la Nazareta; akakitanyiaka aui awo.” (Luka 2:51) Okitanyiya wele l’ana le ambutshi awɔ kimanyiyaka dia wɔladi w’efula ndo diokanelo monga lo nkumbo. Nkumbo mongaka l’ɔngɛnɔngɛnɔ etena kakitanyiya ose nkumbo tshɛ ɛlɔmbwɛlɔ kaki Kristo.
14, 15. Kakɔna kakoka tokimanyiya lam’ahomanaso l’okakatanu lo nkumbo? Sha ɛnyɛlɔ.
14 Lam’atomba ekakatanu la ngelo, yoho ya mbakandola ele mbokoya Yeso ndo mbetawɔ alako ande. Tɔshi ɛnyɛlɔ kaki Jerry laki l’ɛnɔnyi 35 lam’akandatshuke Lana. Lana aki l’ɔna la womoto l’ɛnɔnyi dikumi l’ɛmɔtshi. Diwala diawɔ sɔ diakonge l’okakatanu ɔmɔtshi wele vɔ tshɛ kokanyiyaka ndo kanyiya. Jerry ekɔ lo nembetshiya ate: “Dimi lakeyaka nte dia monga owandji w’ɔlɔlɔ wa lo nkumbo, dimi pombaka kamba l’atɔndɔ akɔ wamɛ wa Bible wakimanyiya nkumbo kina dia monga l’ɔngɛnɔngɛnɔ. Koko lakɛnyi esadi eto dia lakahombe kamba la wɔ la lomba ndo la shɛnɔdi y’efula.” Ɔna womoto lakatotshi wadɛnde la pami kekina ɔsɔ akawɔsaka oko onto ɔmɔtshi lamboyowanganya la nyango ndo akohetshaka efula. Jerry akahombe monga la shɛnɔdi y’efula dia mɛna dia dionga sɔ diaki la shɛngiya lo kɛnɛ kakataka ndo kakatshaka ɔna womoto ɔsɔ. Akandasale na na? Jerry kadimolaka ate: “Dimi la Lana takɔshi yɛdikɔ dia lo tshanda mɔtshi Lana tokendaka dikambo di’ohokwelo ande, etena kemi lo nyanga dia ndowanya diɔtɔnganelo diele lam’asami l’ɔna la womoto akɔ lakandatotshi dihole dikina. L’edjedja ka wonya, vɔ wakayokondjaka etombelo w’ɔlɔlɔ lo yoho yakawasale shɔ.”
15 Lam’ahomanaso l’ekakatanu wa wolo lo nkumbo, sho la dia monga la shɛnɔdi dia mbeya bonde kele ase nkumbo wekɔ lo tɛkɛta kana sala akambo lo yoho yewɔ lo mbasala. Tekɔ nto l’ohomba wa lomba dia mbeya kamba dimɛna l’atɔndɔ waki Nzambi. Ɛnyɛlɔ, Yeso akashihodia dimɛna bonde kakawonanda womoto laki l’ɛkɛlɛlɔ ka dikila, ɔnkɔnɛ, nde akosalɛ akambo la lomba ndo la kɛtshi tshɛ. (Akambu w’Asi Lewi 15:25-27; Mako 5:30-34) Ɔnɔmbɔdi aso ekɔ la lomba ndo la shɛnɔdi. (Tukedi 8:12) Tayonga l’ɔngɛnɔngɛnɔ naka sho sala akambo yoho yalangande.
‘Nyotetemale la nyanga ntondotondo Diolelo’
16. Kakɔna kahomba monga la dihole dioleki ohomba lo nsɛnɔ yaso, ndo ngande wakɛnya Yeso dikambo sɔ oma l’ɛnyɛlɔ kande?
16 Yeso akɛnya hwe kɛnɛ kahomba monga lo dihole dia ntondo lo nsɛnɔ ya wanɛ wetawɔ nde mbalɔmbɔla. Nde akate ate: “Keli ntundu nyutayangi diulelu la ololo wa [Nzambi].” (Mateu 6:33) Oma l’ɛnyɛlɔ kande, nde akatɛnya woho wa sala dikambo sɔ. L’ɔkɔngɔ wa nshi 40 yakandakile mbo ya ndɛ, yakandakanaka yimba ndo yakandalɔmbaka oma l’ɔkɔngɔ wa batismu kande, Yeso akahomana l’ohemba. Satana Diabolo akawosha lowandji lâdiko wa “waulelu tshe wa l’andja.” Ohokanyiya yoho ya lɔsɛnɔ yohonga la Yeso otondetawɔ kɛnɛ kakawosha Diabolo kɛsɔ! Koko, Kristo akayashikikɛ dia sala lolango la She. Nde akeyaka nto dia lɔsɛnɔ la l’andja ɔnɛ waki Satana lakahombe monga lɔsɛnɔ la lo tshanda mɔtshi tsho. Ɔnkɔnɛ, nde akatone mbala kakɔ ɔtɔi kɛnɛ kakawosha Diabolo, lo mbuta ate: “Akafundama ati: Kotemolaki Khumadiondjo, [Nzambi k]aye, Kûkambelaki ndame ulimu [w’ekila].” Yema tshitshɛ oma lâsɔ, Yeso akatatɛ “nsambisha, ata ati: Nyukadimuli etema, ne dia diulelu dia l’ulungu diaya suki.” (Mateu 4:2, 8-10, 17) Lo lɔsɛnɔ lande l’otondo lanɛ la nkɛtɛ, Kristo aki osambisha wa lo tena tshɛ wa Diolelo diaki Nzambi.
17. Ngande wakokaso mɛnya dia wahɔ wa Diolelo wekɔ lo mbɔsa dihole dia ntondo lo nsɛnɔ yaso?
17 Lo wahɔ aso, tokoya Ɔnɔmbɔdi aso. Tatokesamake l’andja ɔnɛ waki Satana. Oyango aso wa ntondo watongake wa monga l’olimu wa lokumu kana wa falanga efula. (Mako 1:17-21) Ayonga enginya ka mamba le so naka sho mbetsha akambo wa l’andja ɔnɛ la ntondo ko tshindja wahɔ wa Diolelo l’ɔkɔngɔ! Yeso akatosha olimu wa sambisha Diolelo ndo wa mbetɛ anto ambeki. (Mateu 24:14; 28:19, 20) Oyadi kânga tekɔ la nkumbo kana l’ɛkɛndɛ ekina wa kotsha, onde kema dui di’ɔngɛnɔngɛnɔ kamba la wenya w’akɔlɔ ndo la nshi ya wikɛndɛ dia kotsha ɔkɛndɛ aso w’Okristo wa sambisha ndo wa mbetsha anto? Ekɔ mɛtɛ dui di’ekeketshelo dia mbeya ɔnɛ l’ɔnɔnyi w’olimu wa 2001, yɛdikɔ y’anto 780 000 wakakambe oko ekambi wa lo tena tshɛ, kana ambatshi mboka!
18. Kakɔna katokimanyiya dia tana ɔngɛnɔngɛnɔ l’esambishelo?
18 Ɛkɔndɔ wa l’Evanjiliɔ mɛnyaka dia Yeso aki pami kakeyaka mbɔsa tɛdikɔ ndo nde akakanɛka anto. Lam’akandɛnaka ehomba wa lo nyuma waki l’anto wakodinge, nde akawaokaka kɛtshi ndo akâkimanyiyaka aha la tshimbatshimba. (Mako 6:31-34) Olimu aso wayotosha ɔngɛnɔngɛnɔ naka sho mbokamba oma lo ngandji kokaso anto akina ndo oma lo nsaki kele laso ka mbakimanyiya. Ko ngande wakokaso monga la nsaki ka ngasɔ na? Ɔlɔngɔ a pami welɛwɔ Jayson, akate ate: “Lam’akimi l’ɛnɔnyi dikumi l’ɛmɔtshi, dimi kondekaka ngɛnangɛna esambishelo kânga mbakamatombaka l’olimu akɔ.” Kakɔna kakayokimanyiya dia nde nanga olimu ɔsɔ? Jayson kadimolaka ate: “Lo nkumbo kaso, pindju ka Lushi la Samalo tshɛ kaki dikambo di’esambishelo. Ɔsɔ aki dui di’ɔlɔlɔ le mi nɛ dia lo yɛdikɔ yakamalekaka sambisha, mbakamalekaka mɛna etombelo w’ɔlɔlɔ w’oma lɔkɔ ndo mbakamatalekaka nanga olimu akɔ.” Sho lawɔ pombaka sambishaka mbala la mbala ndo l’etete.
19. Kakɔna kahombaso ndjashikikɛ lo kɛnɛ kendana l’ɛlɔmbwɛlɔ ka Kristo?
19 Tayokeketshama ndo kondja ɛlɔlɔ efula naka sho mbetawɔ ɛlɔmbwɛlɔ ka Kristo. Naka sho sala ngasɔ, kete nshi yaso y’ɔlɔngɔlɔngɔ yayonga etena ka pama lo ewo ndo lo lomba. Lɔsɛnɔ la nkumbo mongaka kiɔkɔ ya wɔladi ndo y’ɔngɛnɔngɛnɔ, ndo esambishelo komaka olimu washa ɔngɛnɔngɛnɔ. Ɔnkɔnɛ, lo weho akɔ tshɛ, toyashikikɛ dia mɛnya oma lo lɔsɛnɔ laso la lushi la lushi ndo oma lo tɛdikɔ tɔsaso dia Kristo mbalɔmbɔla lɔsɛnɔ laso. (Kolosai 3:23, 24) Koko Yeso ekɔ lo tɔlɔmbɔla nto lo yoho kina, yoho yakɔ ko, etshumanelo k’Akristo. Sawo diayela diayotɛnya woho wakokaso kondja wahɔ oma lo yɛdikɔ shɔ.
[Nɔtɛ ka l’ɛse ka dikatshi]
a Nkombo mɔtshi yakatshikitanyema.
Onde wɛ akohɔ?
• Ngande wakondjaso wahɔ lo ndjela Ɔnɔmbɔdi wakatɔsɔnɛ Nzambi?
• Ngande wakoka akɛnda mɛnya dia vɔ nangaka ndjela ɛlɔmbwɛlɔ ka Yeso?
• Wahɔ akɔna wakondja nkumbo lo mbetawɔ nɔmbɔma oma le Kristo?
• Ngande wɛnya olimu aso dia Kristo mbalɔmbɔla lɔsɛnɔ laso?
[Esato wa lo lɛkɛ 10]
Lo dikɛnda mbele etena k’ɔlɔlɔ ka kondja ewo ka Nzambi ndo k’Ɔnɔmbɔdi wakandasɔnɛ
[Osato wa lo lɛkɛ 11]
Ndjela ɛlɔmbwɛlɔ ka Kristo mbishaka nkumbo ɔngɛnɔngɛnɔ
[Osato wa lo lɛkɛ 13]
Yeso akayange ntondotondo Diolelo. Onde ndo wɛ salaka ngasɔ?