Kristo ekɔ lo nɔmbɔla Etshumanelo kande
“Nyulungi, dimi leko la nyu nshi tshe, edja ndu ekumelu k’andja.”—Mateu 28:20.
1, 2. (a) Lam’akandasha ambeki ande didjango dia mbetɛ anto ambeki, kakɔna kakandalake na? (b) Ngande wakalɔmbɔla Yeso etshumanelo ka ntondo k’Akristo l’ɔlɔlɔ tshɛ?
LA NTONDO ka nde mbudɛ l’olongo, Yeso Kristo, Ɔnɔmbɔdi aso wakolwama, akɛnama le ambeki ande ndo akawatɛ ate: “Wakambisha wulu tshe ndu l’ulungu ndu la kete. Okone nyutshu, nyete wedja tshe ambeki, nyâbatiza lu lukumbu la Papa ndu l’Ona ndu la [nyuma k’ekila]. Nyuwaetshaki dia ntsha akambu tshe wamumunyutela. Nyulungi, dimi leko la nyu nshi tshe, edja ndu ekumelu k’andja.”—Mateu 23:10; 28:18-20.
2 Yeso kombisha tsho ambeki ande olimu washimbɛ nsɛnɔ y’anto wendana la mbetɛ ambeki efula, koko nde akalake nto dia nde ayonga kamɛ la wɔ. Ɔkɔndɔ w’Akristo wa ntondo, oko wɔkɔndwamiwɔ lo dibuku dia lo Bible di’Etsha, mɛnyaka aha la tâmu dia Yeso akakambe la lowandji lakawawosha dia nɔmbɔla etshumanelo kaki êke esadi wa kengama. Nde akatome ‘okimanyedi’ wakandalake, mbut’ate nyuma k’ekila dia tɔ keketsha ndo nɔmbɔla ambeki ande. (Joani 16:7; Etsha 2:4, 33; 13:2-4; 16:6-10) Yeso ɔnɛ lakolwama, akakambe la andjelo walɔmbɔlande dia sukɛ ambeki ande. (Etsha 5:19; 8:26; 10:3-8, 22; 12:7-11; 27:23, 24; 1 Petero 3:22) Ndo nto, Ɔnɔmbɔdi aso akakimɔ tɛdikɔ di’apami wakoka kenga olui-walɔmbɔla l’etshumanelo.—Etsha 1:20, 24-26; 6:1-6; 8:5, 14-17.
3. Wembola akɔna wayotɔsɛdingola lo sawo nɛ?
3 Kayotota dikambo di’etena kaso kɛnɛ, mbut’ate etena k’‘ekomelo ka dikongɛ di’akambo’ nɛ na? Ngande walɔmbɔla Yeso Kristo etshumanelo k’Akristo ɛlɔ kɛnɛ? Ndo ngande wakokaso mɛnya dia sho mbetawɔka ɛlɔmbwɛlɔ kande?
Nkumi ekɔ l’ɔhɔmbɔ wa kɔlamelo
4. (a) Waa na wakenga ‘ɔhɔmbɔ wa kɔlamelo ndo wa kɛsɔ’? (b) Kakɔna kakakimɔ Nkumi l’anya w’ɔhɔmbɔ ɔsɔ?
4 Lam’akandasha prɔfɛsiya kendana la djembetelo ya wôngelo ande, Yeso akate ate: “Ukambi akona weli la kolamelu la yimba, wakakitsha khumendi ladiku dia antu wa luudu landi, dia mbashaka mbu ya nde yawo lu tena diayo? Lam’ayuya khumendi, lam’ayundûtana atsha osoku, ukambi oso ayuyala la otshoko. Mete kanyutelami nti: Ndi ayûkitsha ladiku dia diango diandi tshe.” (Mateu 24:45-47) ‘Nkumi’ ekɔ Ɔnɔmbɔdi aso Yeso Kristo, ndo nde akasɔnɛ ‘ɔhɔmbɔ wa kɔlamelo ndo wa kɛsɔ,’ mbut’ate olui w’Akristo w’akitami w’esɔ wele lanɛ la nkɛtɛ dia vɔ monga lâdiko wa diangɔ diande tshɛ diele la nkɛtɛ.
5, 6. (a) Lo ɛnɛlɔ kakɛnyi ɔpɔstɔlɔ Joani, “dikitshelu esambeli di’atala” ndo “toto esambeli” aki didjidji dia na? (b) Yoho yele “toto esambeli” tekɔ lo lonya l’omi la Yeso ɛnyande?
5 Dibuku dia lo Bible di’Enyelo mɛnyaka dia ɔhɔmbɔ wa kɔlamelo ndo wa kɛsɔ ekɔ lo nɔmbwama mbala kakɔ ɔtɔi oma le Yeso. Lo ɛnɛlɔ ka ‘lushi la Nkumadiɔndjɔ,’ ɔpɔstɔlɔ Joani akɛnyi “dikitshelu dia paunyi esambeli di’atala. L’atei a dikitshelu diako kaki untu omotshi lufanyi la On’a untu” laki la “toto esambeli lu lunya landi la pami.” Dia nembetshiya Joani ɛnɛlɔ kɛsɔ, Yeso akate ate: “Akambu wushami wa toto esambeli takayenyi lu lunya lami la pami, ndu wa dikitshelu dia paunyi esambeli di’atala. Toto esambeli teli andjelo wa ekelizia esambeli. Dikitshelu dia fesa esambeli dieli ekelizia esambeli.”—Enyelo 1:1, 10-20.
6 “Dikitshelu dia fesa esambeli” diekɔ didjidji dia tshumanelo tshɛ di’Akristo wa mɛtɛ diele lo ‘lushi la Nkumadiɔndjɔ,’ lakamɛ l’ɔnɔnyi wa 1914. Ko kayotota dikambo dia “toto esambeli” na? Ntondotondo, tɔ tekɔ didjidji dia wanɛ tshɛ wakotɔ le nyuma, mbut’ate emendji w’akitami w’esɔ wakalamaka tshumanelo dia lo ntambe ka ntondo.a Emendji ɛsɔ waki lo lonya l’omi laki Yeso, mbut’ate wakendamaka ndo wakalɔmbɔmaka oma le nde. Eelo, Yeso Kristo akalɔmbɔlaka anto wakakengaka olui w’ɔhɔmbɔ. Koko kakianɛ, emendji w’akitami w’esɔ waya yema tshitshɛ. Ngande walɔmbɔla Kristo tshumanelo ndekana 93 000 di’Ɛmɛnyi wa Jehowa dia l’andja w’otondo na?
7. (a) Ngande wakamba Yeso l’Olui-Walɔmbɔla dia nɔmbɔla tshumanelo dia lo nkɛtɛ k’otondo? (b) Bonde kakokaso mbuta di’emendji w’Akristo sɔnamaka oma le nyuma k’ekila?
7 Oko wakidiɔ lo ntambe ka ntondo, djui ya tshitshɛ y’apami wakoka y’oma l’atei w’emendji w’akitami w’esɔ wekɔ lo kamba kakianɛ oko Olui-Walɔmbɔla, wele atomami wa wanɛ wakenga ɔhɔmbɔ wa kɔlamelo ndo wa kɛsɔ. Ɔnɔmbɔdi aso kambaka l’Olui-Walɔmbɔla dia sɔna apami wakoka, oyadi akitami w’esɔ mbewɔ kana kema dia vɔ kamba oko dikumanyi lo tshumanelo. Lo dikambo sɔ, nyuma k’ekila, kele Jehowa akasha Yeso lotshungɔ la kamba latɔ, kekɔ lo kamba olimu w’ohomba efula. (Etsha 2:32, 33) Ntondotondo, emendji ɛsɔ pombaka kotsha akambo walɔmbama l’Ɔtɛkɛta wa Nzambi wakafundama lo wolo wa nyuma k’ekila. (1 Timote 3:1-7; Tito 1:5-9; 2 Petero 1:20, 21) Okimwelo wa nkombo ndo ɔsɔnwɛlɔ w’emendji ɛsɔ salemaka l’ɔkɔngɔ wa dɔmbɛlɔ ndo lo ɛlɔmbwɛlɔ ka nyuma k’ekila. Ndo nto, anto wasɔnama mɛnyaka dia vɔ wekɔ lo ntɔ elowa wa nyuma. (Ngalatiya 5:22, 23) Ɔnkɔnɛ, dako nɛ diaki Paulo, mbɔtɔnɛka lo yoho yakoka la dikumanyi tshɛ, oyadi akitami w’esɔ mbewɔ kana kema: “Nyuyalami ololo, ndu nyulami limba tshe ololo, wako wakanyukitsha [nyuma k’ekila] alami.” (Etsha 20:28) Apami asɔ wakasɔnama nongolaka ɛlɔmbwɛlɔ oma le Olui-Walɔmbɔla ndo namaka etshumanelo la lolango tshɛ. Lo yoho shɔ, Kristo ekɔ laso ɛlɔ kɛnɛ ndo ekɔ lo nɔmbɔla etshumanelo l’ɔlɔlɔ tshɛ.
8. Ngande wakamba Kristo l’andjelo dia nɔmbɔla ambeki ande?
8 Yeso kambaka nto l’andjelo wa mɛtɛ mɛtɛ dia nɔmbɔla ambeki ande ɛlɔ kɛnɛ. Lo ndjela wɛ̂la wa woho w’ɔlɔlɔ la kangaka, etena ka dinela kayonga lo ‘ekomelo ka dikongɛ nɛ di’akambo.’ Waa na wayɔsɔnama oma le Nkumɛso dia sala dinela sɔ na? Kristo akate ate: “Amunyi weli andjelo.” Nde akate nto ate: “On’a untu ayutuma andjelo andi, wayosonola diango tshe diatakanya antu la tshe watutshaka kolo uma lu diulelu diandi.” (Mateu 13:37-41) Lâdiko dia lâsɔ, oko wakalɔmbɔla ondjelo ɔmɔtshi Filipɛ otsha le ɔlɛnga w’ose Etiyɔpiya, mbele ekɔ tolembetelo efula tɛnya ɛlɔ kɛnɛ dia Kristo ekɔ lo kamba l’andjelo ande dia nɔmbɔla olimu w’Akristo wa mɛtɛ lo mbatoma le anto wele l’etema w’ɔlɔlɔ.—Etsha 8:26, 27; Enyelo 14:6.
9. (a) Oma lo tshimbo yakɔna yalɔmbɔla Kristo etshumanelo k’Akristo ɛlɔ kɛnɛ? (b) Wombola akɔna wahombaso sɛdingola naka sho nangaka kondja wahɔ oma l’ɛlɔmbwɛlɔ ka Kristo?
9 Ekɔ mɛtɛ ekeketshelo mbeya dia Yeso Kristo nɔmbɔlaka ambeki ɛlɔ kɛnɛ oma lo tshimbo y’Olui-Walɔmbɔla, ya nyuma k’ekila, ndo y’andjelo! Oyadi kânga lo tshanda mɔtshi atɛmɔdi amɔtshi wa Jehowa koka pomba akoka wa monga la diɔtɔnganelo l’Olui-Walɔmbɔla l’ɔtɛ w’ɛhɛnyɔhɛnyɔ kana w’ɛkɔkɔ ɛmɔtshi wa woho ɔsɔ, Kristo ayotetemala mbisha ɛlɔmbwɛlɔ kande l’ekimanyielo ka nyuma k’ekila ndo k’andjelo. Koko, dia sho kondja wahɔ oma l’ɛlɔmbwɛlɔ kande, paka sho mbokietawe. Ngande wakokaso mɛnya dia sho mbetawɔka ɛlɔmbwɛlɔ ka Kristo na?
‘Towakitanyiyake . . . talɛmbɛke’
10. Ngande wakokaso mɛnya dilɛmiyɛlɔ otsha le dikumanyi dia l’etshumanelo?
10 Ɔnɔmbɔdi aso akasha tshumanelo ‘apami wele oko weshasha,’ ‘amɔtshi oko esambisha, akina oko anami ndo oko embetsha.’ (Efeso 4:8, 11, 12) Dionga ndo ditshelo diaso otsha le wɔ mɛnyaka dimɛna dia kana sho mbetawɔka ɛlɔmbwɛlɔ ka Kristo kana bu. Sunganaka dia sho ‘mɛnya lowando laso’ dikambo di’apami asɔ wakoka lo nyuma wakatosha Kristo. (Kolosai 3:15) Vɔ sunganaka nto dia nɛmiyama oma le so. Ɔpɔstɔlɔ Paulo akafunde ate: “Dikumanyi diatolombolaka ololo, dialeki nemiama.” (1 Timote 5:17) Ngande wakokaso mɛnya lowando ndo dilɛmiyɛlɔ diaso otsha le apami asɔ, mbut’ate dikumanyi, kana emendji wa l’etshumanelo na? Paulo kadimolaka ate: “Nyukitanyia aui w’elombodi anyu, nyuyali l’okongo awo.” (Heberu 13:17) Eelo, sho la dia mbakitanyiya ndo monga l’ɔkɔngɔ awɔ.
11. Bonde kele dilɛmiyɛlɔ dia tɛdikɔ tɔsa dikumanyi mɛnyaka dia sho ndjaɔtɔnganyiyaka la batismu kaso?
11 Ɔnɔmbɔdi aso ekɔ onto la kokele. Koko, apami watoshande oko weshasha kema kokele. Ɔnkɔnɛ, tena dimɔtshi vɔ koka sala munga. Koko, ekɔ ohomba efula dia sho tshikala la kɔlamelo lo yɛdikɔ yakɔshi Kristo shɔ. Diakɔ diele, dia mbɔtɔnganyiya lɔsɛnɔ laso la ndjâkimɔ ndo la batismu kaso, sho la dia mbetawɔ lowandji lakalongola wanɛ wakasɔnama l’etshumanelo oma l’ekimanyielo ka nyuma ndo monga suke dia likitanyiya. Woho wakatabatizama ‘lo lokombo la nyuma k’ekila’ akɛnya lo sɛkɛ dia sho mbeyaka ele nyuma k’ekila ndo olimu atɔ lo asangwelo waki Jehowa. (Mateu 28:19) Woho wa batismu kɛsɔ mɛnyaka dia sho kambaka kamɛ la nyuma ndo hatotshe ndoko dikambo diakoka kishimba dia tɔ kamba olimu l’atei w’ambeki waki Kristo. Lam’ele nyuma k’ekila kekɔ l’ɔkɛndɛ w’ohomba l’okimwelo wa nkombo ndo l’ɔsɔnwɛlɔ wa dikumanyi, onde sho kokaka mɛtɛ monga la kɔlamelo lo ndjâkimɔ kaso naka hatokambe kamɛ la tɛdikɔ tɔsa dikumanyi l’etshumanelo?
12. Bɛnyɛlɔ diakɔna diendana la diɔnyɔ dia lowandji diakashile Judɛ, ndo wetshelo akɔna wakondjaso oma lo bɛnyɛlɔ diakɔ?
12 Afundelo wekɔ la bɛnyɛlɔ efula diatɛnya ohomba w’okitanyiya ndo wa monga la dietawɔ. Lam’akandatɛkɛta dikambo dia wanɛ wakatɛkɛtaka kɔlɔ lo dikambo di’apami wakasɔnama, ombeki Judɛ akasha bɛnyɛlɔ sato diatewola, lo mbuta ate: “Fono kayayi le wo! Ne dia vo wakatshu lu mbuka ka Kena, wakayakimo lu akambu wa kolo wa Balama ne dia nkundja waho, wakashisho l’uhedia wa Kora.” (Jude 11) Kɛna akatone dako dioludi la ngandji diakawosha Jehowa ndo la lolango lande nde akayele mboka ka kɔlɔ ka lohetsho. (Etatelu 4:4-8) Kânga l’ɔkɔngɔ wa Nzambi mbêwola mbala efula, Balama akahembe dia mbidja ekambi wa Nzambi mananu l’ɔtɛ w’akuta wakawolake. (Walelu 22:5-28, 32-34; Euhwelu k’Elembe 23:5) Kɔra aki l’ɔkɛndɛ ande w’oshika l’Isariyɛlɛ, koko le nde ɔkɛndɛ ɔsɔ kokoka. Nde akatshutshuya anto dia tɔmbɔkwɛ Mɔsɛ, okambi wa Nzambi waki la memakana koleki lo nkɛtɛ k’otondo. (Walelu 12:3; 16:1-3, 32, 33) Mpokoso kakakomɛ Kɛna, Balama, ndo Kɔra. Bɛnyɛlɔ sɔ tetshaka l’ɔlɔlɔ tshɛ dia sho pombaka mpokamɛ dako di’anto wakalongola ɛkɛndɛ oma le Jehowa ndo mbalɛmiya!
13. Ɛtshɔkɔ akɔna wakate omvutshi Isaya ɔnɛ wanɛ wakitanyiya dikumanyi wayowalongola na?
13 Akɔna ahatolanga kondja wahɔ oma l’ɔlɔngɔswɛlɔ wa woke wendana l’olamelo wakakongɛ Ɔnɔmbɔdi aso l’atei w’etshumanelo na? Omvutshi Isaya akatatshi dikambo di’ɛlɔlɔ w’ɔlɔngɔswɛlɔ ɔsɔ ate: “Enda, khum’ekanga ayulela la sambu k’ololo, la ewandji wayolombola antu lu akambu w’usimbwi. Ku untu l’untu ayuyala uku eshamelu uma lu lopepe, uku ukumbo uma lu ngimbi, uku ekedi w’ashi lu kete ya wumu, ndu uku dedi dia dive dia wuki l’usui watuhekuyaka antu.” (Isaya 32:1, 2) Ekumanyi tshɛ la dia monga oko ‘dihole’ di’ekokelo ndo di’eshamelo. Kânga mbele nɛnya lowandji ekɔ dikambo dia wolo le so, nyɛsɔ toyaketembole l’ekimanyielo ka dɔmbɛlɔ dia monga l’okitanyiya ndo la dietawɔ otsha le anto wakalongola lowandji oma le Nzambi l’atei w’etshumanelo.
Woho wakitanyiya dikumanyi ɛlɔmbwɛlɔ ka Kristo
14, 15. Ngande wɛnya wanɛ walɔmbɔla l’etshumanelo dia vɔ kitanyiyaka ɛlɔmbwɛlɔ ka Kristo?
14 Okristo tshɛ, djekoleko dikumanyi pombaka ndjela ɛlɔmbwɛlɔ ka Kristo. Emendji, kana dikumanyi wekɔ la yɛdikɔ mɔtshi ya lowandji l’etshumanelo. Koko vɔ hawoyange dia ‘mbahemɛ mbetawɔ k’anyawɔ ambetawudi’ lo nyanga dia nɔmbɔla nsɛnɔ yawɔ. (2 Koreto 1:24) Dikumanyi kitanyiyaka ɛtɛkɛta ɛnɛ waki Yeso wata ɔnɛ: “Embuledi w’asi wedja watuwâhamelaka. Antu awo a waki watuwaulelaka. Keli l’atei anyu tayalaki osoku.” (Mateu 20:25-27) Lam’akotsha dikumanyi ɔkɛndɛ awɔ, vɔ salaka la wolo dia kambɛ anto akina l’otema ɔtɔi.
15 Vɔ keketshaka Akristo ɔnɛ: “Nyuhoki elombodi anyu, . . . Nyukani yimba ya ditshelu diawo, nyukuya mbetawo kawo.” (Heberu 13:7) Aha nɛ dia dikumanyi diekɔ lo mbalɔmbɔla mbalɔmbawɔ Akristo dia mbaokoya. Yeso akate ate: “Nyeko la [Ɔnɔmbɔdi] otoi, Kristu ndame.” (Mateu 23:10) Mbetawɔ ka dikumanyi mbahombawɔ mbokoya nɛ dia vɔ wekɔ lo mbokoya Kristo lele Ɔnɔmbɔdi aso w’oshika. (1 Koreto 11:1) Tɔsɛdingole toho tɔmɔtshi tasala dikumanyi la wolo dia monga oko Kristo lo diɔtɔnganelo diasawɔ l’ase etshumanelo akina.
16. Kânga mbaki Yeso la lowandji loleki tshɛ, ngande wakandasɛnaka l’ambeki ande?
16 Kânga mbele Yeso akaleke anto wele kema kokele l’akambo tshɛ ndo akalongola lowandji loleki tshɛ oma le She, nde aki la ndjakitshakitsha lo yoho yande ya kɛndakɛnda l’ambeki ande. Nde kondakanyaka ampokami ande akambo efula mbala kakɔ ɔtɔi dia mbaɛnya ɔnɛ lekɔ l’ewo k’efula. Yeso aki la eokelo ndo la kɛtshi otsha le ambeki ande, ndo akadjaka yimba l’ehomba awɔ. (Mateu 15:32; 26:40, 41; Mako 6:31) Ndoko lushi lakandalɔmbɛ ambeki ande dia sala kɛnɛ kewɔ bu l’akoka wa sala kana mbasha ɛkɛndɛ wakiwɔ kokoka mɛmba. (Joani 16:12) Yeso aki la ‘yimba ya ndjakitshakitsha ndo l’otema wa memakana.’ Ɔnkɔnɛ, kema dikambo dia diambo dia mɛna dia anto efula wakatanaka ekeketshelo oma le nde.—Mateu 11:28-30.
17. Ngande wahomba dikumanyi monga la woho wa ndjakitshakitsha kaki la Kristo lo diɔtɔnganelo diasawɔ l’ase etshumanelo akina?
17 Naka Kristo Ɔnɔmbɔdi aki la ndjakitshakitsha, kete lâsɔ wanɛ walɔmbɔla etshumanelo la dia monga la ndjakitshakitsha kamboleka! Eelo, vɔ pombaka sɛna dimɛna di’aha kamba la lowandji lakawawasha lo yoho ya kɔlɔ. Ndo vɔ ‘hawoye l’ɛtɛkɛta wa wolo wolo,’ dia mambiya anto akina. (1 Koreto 2:1, 2) Koko, vɔ salaka la wolo dia kamba l’ɛtɛkɛta wa wɔdu ndo w’oma k’ɛse otema etena katɛkɛtawɔ akambo wa mɛtɛ w’oma l’Afundelo. Ndo nto, dikumanyi salaka la wolo dia monga l’ekanelo k’ɔlɔlɔ ka yimba lo dikambo dia kɛnɛ kalongamɛwɔ oma le anto akina ndo vɔ pombaka mbidjaka yimba l’ehomba awɔ. (Filipi 4:5) Oko weyawɔ di’onto tshɛ ekɔ l’elelo, vɔ tshɛka anangɛwɔ akambo la ngandji aha la vɔ mbohɛ dikambo sɔ. (1 Petero 4:8) Kema dikumanyi diele la ndjakitshakitsha ndo la dionga dia memakana wekɔ mɛtɛ tshondo y’ekeketshelo? Eelo ngasɔ mbediɔ.
18. Naa wetshelo wakoka dikumanyi kondja oma lo yoho yakatshɛka Yeso ana akambo na?
18 Yeso akadjaka anto lo demba, oyadi kânga ana wa totshitshɛ. Tende woho wakandatshe etena kakahangwɛ ambeki ande anto “wakayi la tokendakenda le [nde].” Yeso akate ate: “Nyete tokendakenda wayi lemi, tanyâsikeki, ne dia diulelu dia [Nzambi] dieli dia antu uku vo.” Oma lâsɔ “ndi akâlele l’anya andi, akâtshokola, akawahe anya.” (Mako 10:13-16) Yeso aki la wangasanu ndo la ngandji, ndo anto akina wakakotwama oya le nde. Anto kombokaka Yeso wɔma. Kânga ana wakangɛnangɛnaka dia monga lalende. Dikumanyi lawɔ la dia mbidjaka anto lo demba, ndo naka vɔ monga la ngandji ndo la kɛtshi, kete anto akina, kânga ndo ana wayoyaoka dimɛna dia monga lam’ewɔ.
19. Kakɔna kalɔmbama dia monga la “yimba ya Kristu,” ndo dikambo sɔ nɔmbaka dia mbidja welo akɔna?
19 Dikumanyi wayokoka mbokoya Yeso dimɛna, naka vɔ mboweyaka dimɛna efula. Paulo akambola ate: “Akona akeyi yimba ya Khumadiondjo, dia ndi mbulakanya? Keli shu teli la yimba ya Kristu.” (1 Koreto 2:16) Monga la yimba ya Kristo nembetshiyaka mbeya yoho yande y’ekanelo ka yimba ndo akambo tshɛ wendana la lonto lande woho wa sho mbeya kɛnɛ kakokande sala la ntondo ka dikambo dimɔtshi dia lânde. Ohokanyiya kɛnɛ kokoki mbeta naka sho mbeya Ɔnɔmbɔdi aso dimɛna! Eelo, dikambo sɔ nɔmbaka dia mbidja yambalo y’efula l’ɛkɔndɔ wa l’Evanjiliɔ ndo ndodjaka yimba yaso mbala la mbala la eokelo ka lɔsɛnɔ ndo ɛnyɛlɔ ka Yeso. Naka dikumanyi sala la wolo dia ndjela ɛlɔmbwɛlɔ ka Kristo polo lo yɛdikɔ shɔ, kete wanɛ wele l’etshumanelo wayoleka tshutshuyama dia mbokoya mbetawɔ kawɔ. Ndo dikumanyi ngɛnangɛnaka dia mɛna woho wayela anto akina wanya waki Ɔnɔmbɔdi l’ɔngɛnɔngɛnɔ tshɛ.
Totetemale ndjela ɛlɔmbwɛlɔ ka Kristo
20, 21. Lam’okaso washo otsha l’andja w’oyoyo wele la ntondo, eshikikelo kakɔna kahomba monga laso?
20 Ekɔ ohomba efula dia sho tshɛ ndjelaka ɛlɔmbwɛlɔ ka Kristo. Oko watatasukana otsha l’ekomelo ka dikongɛ di’akambo nɛ, lɔsɛnɔ laso fɔnaka la lɔnɛ laki l’ase Isariyɛlɛ l’Oswe wa Mɔaba l’ɔnɔnyi wa 1473 N.T.D. Vɔ waki kasuke la mbɔtɔ lo Nkɛtɛ ya Daka, ndo oma lo tshimbo y’omvutshi Mɔsɛ, Nzambi akate ate: “We [Jashua] kayutsho la wudja one utsha lu kete yakatshibela [Jehowa] washewo dia mbasha.” (Euhwelu k’Elembe 31:7, 8) Jashua mbaki ɔnɔmbɔdi wakasɔnama. Dia mbɔtɔ lo Nkɛtɛ ya Daka, as’Isariyɛlɛ wakahombe ndjela ɛlɔmbwɛlɔ kaki Jashua.
21 Bible totɛka ɔnɛ: ‘Kristo ndamɛ mbele Ɔnɔmbɔdi anyu.’ Paka Kristo ndamɛ mbayotɔlɔmbɔla otsha l’andja w’oyoyo wakawatolake lɛnɛ ayonga akambo wa losembwe. (2 Petero 3:13) Ɔnkɔnɛ, nyɛsɔ toyashikikɛ dia ndjela ɛlɔmbwɛlɔ kande l’akambo tshɛ wa lo lɔsɛnɔ.
[Nɔtɛ ka l’ɛse ka dikatshi]
a Lanɛ “toto” halembetshiya andjelo wa mɛtɛ mɛtɛ nɛ dia Yeso totondokoka kamba l’onto dia fundɛ ditongami dia lo nyuma diahɛnama. Ɔnkɔnɛ, “toto” pombaka monga didjidji di’emendji kana dikumanyi dia lo tshumanelo diɔsama oko akɛndji waki Yeso. Yoho yele lofulo lawɔ lekɔ esambele mɛnyaka dia lɔ lekɔ kokele lo washo wa Nzambi.
Onde wɛ akohɔ?
• Ngande wakalɔmbɔla Kristo etshumanelo ka lo ntambe ka ntondo?
• Ngande walɔmbɔla Kristo etshumanelo kande ɛlɔ kɛnɛ?
• Bonde kahombaso monga l’okitanyiya otsha le wanɛ walɔmbɔla l’etshumanelo?
• Lo toho takɔna takoka dikumanyi mɛnya dia Kristo mbele Ɔnɔmbɔdi awɔ?
[Osato wa lo lɛkɛ 15]
Kristo mbalɔmbɔla etshumanelo kande ndo emendji wekɔ lo lonya lande l’omi
[Esato wa lo lɛkɛ 16]
“Nyukitanyia aui w’elombodi anyu, nyuyali l’okongo awo”
[Osato wa lo lɛkɛ 19]
Yeso aki la wangasanu ndo anto wakakokaka mbɔ̂tɔ lo demba. Dikumanyi di’Akristo la dia sala la wolo dia monga oko nde