‘Akambo wa weke waki Nzambi’ tokeketshaka
‘Sho mbaokaka wata akambo wa weke waki Nzambi l’ɛtɛkɛta aso.’—ETSHA 2:11.
1, 2. Naa dikambo dimɔtshi dia diambo diakatombe la Jerusalɛma lo Pɛntɛkɔsta ka l’ɔnɔnyi 33 T.D.?
LA PINDJU ka Lushi lɔmɔtshi la Lomingu la l’ɔnɔnyi 33 T.D., dikambo dimɔtshi dia diambo diakakomɛ olui w’apami ndo wa wamato w’ambeki waki Yeso Kristo wakatshumana lo luudu lɔmɔtshi la Jerusalɛma. “Luhilu lakayi shashimuya uma l’ulungu uku atopepaka lopepe la wulu, ku lakaluli lu luudu tshe lene akawadjashi. Nimi yakenama le wo, yakate uku nimi ya dja, ku yakahema ladiku diawo . . . Vo tshe wakaluli la [nyuma k’ekila ndo], wakatatela nteketa eteketa ekina.”—Etsha 2:2-4, 15.
2 Lemba l’antu lakatshumana la ntondo ka luudu lɔsɔ. L’atei awɔ mbaki ndo ase Juda wakatotɔ lo wedja ekina waki ‘apami woka Nzambi wɔma’ wakaye la Jerusalɛma dia ndjosala difɛstɔ dia Pɛntɛkɔsta. Vɔ wakambe nɛ dia ɔm’ɔmɔ l’atei awɔ akoke ambeki watɛkɛta ‘akambo wa weke waki Nzambi’ l’ɛtɛkɛta awɔ wa lôtɔ. Ngande wakakoke salema dikambo sɔ etena kɛnɛ kele wanɛ wakatɛkɛtaka l’ɛtɛkɛta ɛsɔ waki vɔ tshɛ ase Ngalileya na?—Etsha 2:5-8, 11.
3. Losango lakɔna lakewoya ɔpɔstɔlɔ Petero lemba l’anto lakatshumana lo Pɛntɛkɔsta?
3 Ɔpɔstɔlɔ Petero aki ɔtɔi ɔmɔtshi l’atei w’ase Ngalileya asɔ. Nde akalembetshiya dia mingu mɔtshi ngana la ntondo, anto wa kɔlɔ wakadiake Yeso. Koko, Nzambi akolola Ɔnande. L’ɔkɔngɔ diko, Yeso akɛnɛ le ambeki ande efula, le Petero ndo le anto akina waki lawɔ. Ndo nshi dikumi tsho mbakete l’ɔkɔngɔ wa Yeso mbudɛ otsha l’olongo. Nde mbakatshulwɛ ambeki ande nyuma k’ekila. Onde dikambo sɔ diakonge la kitshimudi mɔtshi le wanɛ waki lo difɛstɔ dia Pɛntɛkɔsta sɔ? Eelo. Nyɔi ka Yeso kakawasha diaaso dia kondja edimanyielo ka pɛkato yawɔ ndo nongola ‘woshasha wa nyuma k’ekila’ naka vɔ monga la mbetawɔ le nde. (Etsha 2:22-24, 32, 33, 38) Lâsɔ, ngande wakatshe anto wakɛnaka dikambo sɔ lam’akawoke ‘akambo wa weke waki Nzambi’ na? Ndo ngande wakoka ɔkɔndɔ ɔnɛ tokimanyiya dia mbɛdikola olimu wakambɛso Jehowa?
Tɔshi yɛdikɔ!
4. Naa prɔfɛsiya kaki Jɔɛlɛ kakakotshama lushi la Pɛntɛkɔsta ka l’ɔnɔnyi 33 T.D.?
4 L’ɔkɔngɔ wa vɔ nongola nyuma k’ekila, ambeki wa la Jerusalɛma kotshimbatshimba dia tatɛ mbewoya anto akina lokumu l’ɔlɔlɔ la panda, ndo wakatatɛ sambisha anto wakatshumana la pindju ka lushi lɔsɔ la Pɛntɛkɔsta. Esambishelo kawɔ kakakotsha prɔfɛsiya kɛmɔtshi ka woke kakafundama ɛnɔnyi nkama enanɛi la ntondo oma le Jɔɛlɛ y’ɔnaki Petuɛlɛ. Nde akafunde ate: “Dimi layahe antu tshe nyuma kami, ku an’anyu w’apami la w’amantu wayuta akambu wahatayi, esumbi anyu wayena alo, la elongo anyu w’apami wayena waenelo. Lu nshi yako, dimi layahe ndu ekambi w’apami la ekambi w’amantu nyuma kami . . . la ntundu ka lushi la [Jehowa] latayi, lushi la wuki ndu la woma.”—Joele 1:1; 2:28, 29, 31; Etsha 2:17, 18, 20.
5. Lo yoho yakɔna yakate Akristo wa lo ntambe ka ntondo akambo wahataye? (Enda lo nɔtɛ ka l’ɛse ka dikatshi.)
5 Onde dikambo sɔ nembetshiyaka dia Nzambi akayange tonga etshumanelo k’otondo k’amvutshi w’apami ndo wa wamato wele oko Davidi, Jɔɛlɛ, la Dɛbɔra, ndo kamba la wɔ dia mbuta akambo wa lo nshi yayaye? Kema. ‘Ana w’apami ndo wa wamato, ekambi w’apami ndo wa wamato,’ waki Akristo wakahombe mbuta akambo wahataye lo yoho nyɛ yele vɔ wakahombe tshutshuyama la nyuma ka Jehowa dia mbewoya ‘akambo wa weke’ wakasale Jehowa ndo wayondosala nto. Ɔnkɔnɛ, vɔ wakahombe monga oko tɛmba awui taki Nkum’Olongo.a Lâsɔ, ngande wakasale lemba l’anto lɔsɔ na?—Heberu 1:1, 2.
6. L’ɔkɔngɔ wa vɔ pokamɛ dako diaki Petero, efula l’atei wa lemba l’anto lɔsɔ wakatshutshuyama dia sala dikambo diakɔna?
6 L’ɔkɔngɔ wa lemba l’anto mboka awui wakalembetshiya Petero, efula l’atei awɔ wakatshutshuyama dia mbɔsa yɛdikɔ. Vɔ “waketawo diui diandi” ndo “wakabatizama. Lushi lako, antu uku nunu satu wakasanganyema.” (Etsha 2:41) Oko wakiwɔ ase Juda wa lôtɔ ndo ambetawudi w’ase wedja, vɔ waki la ewo kakahombamaka k’oma l’Afundelo. Ewo ndo mbetawɔ kaki lawɔ lo kɛnɛ kakawoke oma le Petero, akawasha akoka wa batizama “lu lukumbu la Papa ndu l’Ona ndu la Nyuma k’[Ekila].” (Mateu 28:19) L’ɔkɔngɔ wa batismu kawɔ, vɔ ‘wakatetemala ndjasha tshɛ lo wetshelo w’apɔstɔlɔ.’ L’etena kakɔ kamɛ, vɔ wakatatɛ mbewoya anto akina akambo wendana la mbetawɔ kawɔ k’oyoyo. Lo mɛtɛ, ‘vɔ wakatetemalaka nsangana kâmɛ lushi la lushi lo tɛmpɛlɔ, . . . vɔ wakatombolaka Nzambi ndo wakahomɔ lokolo l’ɔlɔ lo washo w’anto tshɛ.’ Etombelo wakonge l’olimu ɔsɔ w’esambishelo ele, “Khumadiondjo akasanganyaka wane wakashimbamelaka kame la wo.” (Etsha 2:42, 46, 47) Tshumanelo di’Akristo diakatema esadi esadi lo wedja efula wakadjasɛka ambetawudi asɔ w’eyoyo. Aha la tâmu, ohamelo ɔsɔ wakaye lo yɛdikɔ mɔtshi diɛsɛ oma lo welo wakawadjaka dia sambisha ‘lokumu l’ɔlɔlɔ’ lam’akawakawola lawakawɔ.—Kolosai 1:23.
Ɔtɛkɛta wa Nzambi wekɔ la nkudu
7. (a) Kakɔna kakotola anto w’oma lo wedja tshɛ oya l’ɔlɔngɔswamelo waki Jehowa ɛlɔ kɛnɛ? (b) Kakɔna kɛnya di’olimu wakambema l’andja w’otondo ndo l’etshumanelo kanyu wayotetemala pama? (Enda lo nɔtɛ ka l’ɛse ka dikatshi.)
7 Ko kayotota dikambo dia wanɛ wakombola koma ekambi waki Nzambi ɛlɔ kɛnɛ na? Vɔ lawɔ pombaka mbeka Ɔtɛkɛta wa Nzambi dimɛna. Naka vɔ sala ngasɔ, kete wayokoma lo mbeya dia Jehowa mbele Nzambi ka “ketshi ndu ngandji ka mamba, lahuki kele esadi, luludi too la ngandji ka shikaa la [mɛtɛ].” (Etumbelu 34:6; Etsha 13:48) Vɔ mbekaka dia mbeya yɛdikɔ yoludi la ngandji yakɔshi Jehowa ya mbisha anto tshungo oma lo tshimbo ya Yeso Kristo, lele dikila diakandatshola kokaka mbaɛdia oma lo pɛkato tshɛ. (1 Joani 1:7) Vɔ komaka nto lo ngɛnangɛna sangwelo diaki Nzambi diendana “l’eulwelu k’antu w’ololo la antu wa kolo uma lu nyoi.” (Etsha 24:15) Etema awɔ woludi la ngandji otsha le ɔnɛ lele Kiɔkɔ y’‘akambo wa weke’ asɔ, mbâtshutshuya dia sambisha akambo wa mɛtɛ w’oshinga wolo asɔ. L’ɔkɔngɔ diko, vɔ ndjoyakimɔka le Nzambi, mbut’ate komaka ekambi ande wambobatizama ndo tetemalaka la ‘pamia ewo kawɔ k’oshika kaki Nzambi.’b—Kolosai 1:10b; 2 Koreto 5:14.
8-10. (a) Ngande watɛnya ɛnyɛlɔ k’Okristo ɔmɔtshi wa womoto di’Ɔtɛkɛta wa Nzambi ‘wekɔ la nkudu’? (b) Kakɔna kamboketsha ɛnyɛlɔ kɛnɛ lo dikambo dia Jehowa ndo dia kɛnɛ katshɛnde ekambi ande? (Etumbelu 4:12)
8 Ewo kakondja ekambi waki Nzambi oma lo wekelo awɔ wa Bible kema ka ladiko ladiko. Ewo kɛsɔ minandaka etema awɔ, tshikitanyaka yoho yawɔ ya kanyiya ndo tɔ tshikalaka l’etema awɔ. (Heberu 4:12) Ɛnyɛlɔ, wakɔshi womoto ɔmɔtshi lelɛwɔ Camille l’olimu wa kokɛka esombe w’anto. L’atei w’esombe wakandakokɛka mbaki Marta laki Ɔmɛnyi wa Jehowa. Lam’ele hemɔ kakokaka Marta ka l’ɔtɛ kele oko dadi kakoheke efula, lâsɔ wakahombaka mbôlama wonya tshɛ. Wakahombaka mbohola dia ndɛ ndo kânga dia mɛna kɛnɛ kakandalɛka. Koko, ekɔ dikambo dimɔtshi diaki kombohamɛ lo yimba yaki Marta, oko wayangaso diɛna.
9 Lushi lɔmɔtshi, Marta akɛnyi Camille alela l’ɔtɛ w’ekakatanu ɛmɔtshi waki lande wakawoshaka okiyanu efula. Marta akadinge Camille anya ndo akɔlɔmbɛ dia vɔ mbeka Bible. Onde onto lele la hemɔ ka woho wakokaka Marta akakoke nɔmbɔla wekelo wa Bible? Eelo, nde akakoke! Kânga mbele wɔɔngɔ ande wakohɛka akambo efula, Marta kombohɛ Nzambi kande ka diambo ndo nde kombohɛ akambo wa mɛtɛ w’ohomba efula wakandeke oma lo Bible. Lam’akawekaka, Marta akalɔmbaka Camille dia mbadia odingɔ tshɛ, avɛsa woshilami ndo wombola wa l’ɛse ka dikatshi, oma lâsɔ ko ndamɛ kadimola wombola akɔ. Wakatetemala sala dikambo sɔ lo tshanda mɔtshi, ndo kânga mbaki Marta la pâ, Camille akahame l’ewo ka Bible. Marta akɛnyi dia Camille akahombe nsanganaka kamɛ l’anto akina waki la nsaki ka kambɛ Nzambi. Ɔnkɔnɛ, nde akasha Camille k’ombeki ande wa Bible ɔsɔ ahɔndɔ ndo sabata ya nde ndɔta lam’ayondotshɔ lo losanganya mbala ka ntondo lo Mbalasa ka Diolelo.
10 Otema waki Camille wakanandema efula lo menda woho wakayashaka Marta le nde la ngandji tshɛ. Nde akanandema nto oma l’ɛnyɛlɔ ndo oma lo dietawɔ diaki la Marta. Nde akɛnyi dia kɛnɛ kakasalaka Marta la wolo dia mbêtsha oma lo Bible aki akambo w’ohomba efula, nɛ dia Marta akohɛ suke l’akambo tshɛ onyake kɛnɛ kakandeke oma l’Afundelo. L’ɔkɔngɔ diko, lam’akawayotomaka Camille dia tokamba lo dihole dikina diakokɛwɔ esombe w’anto, nde akɛnyi di’etena kakakoke ka nde mbɔsa yɛdikɔ. Mbala ka ntondo kakandatshu lo Mbalasa ka Diolelo, nde akalɔtɛ dihɔndɔ ndo sabata yakawosha Marta, ndo akalɔmbɛ dia mbeka Bible. Camille akahame dimɛna ndo akabatizama.
Tambokeketshama dia ndjela ɛlɛmbɛ wa Jehowa
11. Lâdiko wa monga l’ohetoheto l’olimu w’esambishelo, ngande wakokaso mɛnya dia tambokeketshama la losango la Diolelo?
11 Ɛlɔ kɛnɛ, lofulo l’Ɛmɛnyi wa Jehowa wasambisha ‘lokumu l’ɔlɔlɔ la Diolelo’ l’andja w’otondo l’ɛnyɛlɔ kaki Marta ndo kaki Camille lambolekana miliyɔ shamalo. (Mateu 24:14; 28:19, 20) L’ɛnyɛlɔ k’Akristo wa lo ntambe ka ntondo, ‘akambo wa weke waki Nzambi’ mbâtshutshuya dia sala dikambo sɔ. Vɔ ngɛnangɛnaka diɛsɛ diele lawɔ dia mɛmba lokombo la Jehowa ndo woho wakandatshulwɛ nyuma kande. Ɔnkɔnɛ, vɔ salaka la wolo tshɛ ‘dia nkɛndakɛnda oko walanga Jehowa dia mbɔngɛnyangɛnya lo tshɛ,’ lo kitanyiya ɛlɛmbɛ ande l’akambo tshɛ wendana la nsɛnɔ yawɔ. Ndo nto l’atei w’ɛlɛmbɛ ɛsɔ mbele ndo okitanyiya l’atɔndɔ waki Nzambi wendana l’ɔlɔtɔ ndo l’ɔlɛngɛlɔ wa demba.—Kolosai 1:10a; Tito 2:10.
12. Naa dako diendana l’ɔlɔtɔ ndo l’ɔlɛngɛlɔ wa demba diatanaso lo 1 Timote 2:9, 10?
12 Eelo, Jehowa akadje ɛlɛmbɛ wendana l’ɛnamelo kaso hita. Ɔpɔstɔlɔ Paulo akɛnya akambo amɔtshi watɔlɔmba Nzambi. “Okone ndu amantu walote ahondo k’ahondo, la wolamu la memakana. Vo tawelaki divu, tawolotaki paunyi kana mboko y’akeso kana ahondo w’ushinga a wulu, Keli vo wayali amantu watsha elimu wa Nzambi uma lu elimu w’ololo.”c Wetshelo akɔna wakondjaso oma l’ɛtɛkɛta ɛsɔ?—1 Timote 2:9, 10.
13. (a) ‘Ndɔta dimɛna’ kɛdikɛdi na? (b) Bonde kakokaso mbuta di’ɛlɛmbɛ waki Jehowa kema wolo kitanyiya?
13 Ɛtɛkɛta waki Paulo mɛnyaka di’Akristo pombaka ‘ndjalɛngaka l’ɔlɔtɔ wa dimɛna.’ Vɔ hawohombe monga mindo kana epakapaka. Ɔnkɔnɛ, onto tshɛ, oyadi kânga wanɛ wele bu l’ekondjelo k’efula kokaka kitanyiya dako sɔ lo ndjashikikɛ di’ahɔndɔ awɔ wekɔ tɔkɔmba, pudipudi, ndo amɛna. Ɛnyɛlɔ, ɔnɔnyi tshɛ, Ɛmɛnyi wa Jehowa wa lo wodja ɔmɔtshi wa l’Amérique du Sud kɛndakɛndaka kilɔmɛtɛlɛ efula l’ekolo lo ngamba k’okonda, oma lâsɔ ko vɔ tosala nto wenya efula lo waato l’oyango wa ntɔtɔ lo losanganya lawɔ la distrikɛ. Mbala efula, amɔtshi l’atei awɔ tambɛka l’ashi kana ahɔndɔ awɔ tɔtɔka mindo lo menda otale wa lɔkɛndɔ. Ɔnkɔnɛ, lam’akomawɔ lo dihole diayosalema losanganya, vɔ mongaka yema epakapaka. Koko vɔ mbɔsaka etena ka mbidja butɔ l’ahɔndɔ, tɛla ahole wakatɛ ndo mbasola la mbakɔma la ntondo ka vɔ ndjâlɔta otsha lo losanganya. Vɔ ngɛnangɛnaka leeta lakawalongola la toleshama lo mɛsa wa Jehowa, diɔ diakɔ dialangawɔ ndjâlɔtshiya dimɛna.
14. (a) Ndjâlɔtshiya la ‘ndjakitshakitsha ndo la yimba y’ɔlɔlɔ’ kɛdikɛdi na? (b) Ndɔta ‘oko anto wata dia vɔ mbokaka Nzambi wɔma’ alembetshiyande le so?
14 Paulo akɛnya nto dia sho pombaka ndjâlɔtshiyaka ‘la ndjakitshakitsha ndo la yimba y’ɔlɔlɔ.’ Dui sɔ nembetshiyaka dia hatohombe ndɔta lo yoho y’epakapaka, lo yoho y’emula nsaki ya dieyanelo, lo yoho ya tshika tenyi dimɔtshi dia demba diahomba kombama l’andja kana lo yoho ya kawotake. Ndo nto, sho pombaka ndɔta lo yoho yɛnya dia sho ‘mbokaka Nzambi wɔma.’ Kema ɔsɔ ekɔ dikambo dia kana yimba? Dikambo diele lanɛ ele aha otsha lo nsanganya ya l’etshumanelo tsho mbahombaso ndɔtaka yoho ya dimɛna ko minya yimba lo dikambo sɔ lo tena dikina. Ɛnamelo kaso pombaka mɛnyaka wonya tshɛ dia tekɔ anto woka Nzambi wɔma ndo wayasha nɛmɔ nɛ dia tekɔ ekambi waki Nzambi wenya akɔ 24 tshɛ wa lo lushi. Mbokɛmaka hwe di’ahɔndɔ wa wonya w’olimu kana w’otsha la kalasa pombaka mbɔtɔnɛ la yoho y’olimu yasalaso. Koko, sho pombaka ndɔtaka la kɔmba ndo la kɛnɛmɔ. Naka ɔlɔtɔ aso kɛnɛmɔlaka mbetawɔ kele laso le Nzambi wonya tshɛ, kete hatokaki sɔnyi pondjo dia sambisha lo tshakitudi, l’ɔtɛ w’ɔnɛ ɛnamelo kaso bu dimɛna.—1 Petero 3:15.
‘Tatolangake andja ɔnɛ’
15, 16. (a) Lande na kele ekɔ ohomba sho mbewɔ dia mbokoya as’andja ɔnɛ lo kɛnɛ kendana l’ɔlɔtɔ ndo l’ɔlɛngɛlɔ wa demba? (1 Joani 5:19) (b) L’ɔkɔkɔ akɔna wahombaso tona mɔdɛlɛ ya kɔlɔ yendana l’ɔlɔtɔ ndo l’ɔlɛngɛlɔ wa demba?
15 Dako diatanaso lo 1 Joani 2:15, 16 toshaka ɛlɔmbwɛlɔ lo kɛnɛ kendana l’ɔsɔnwɛlɔ wa kɛnɛ ka sho ndɔta kana ka ndjalɛnga. Sho mbadiaka lo divɛsa sɔ ɔnɛ: “Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema l’utema andi. Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete.”
16 Dako nɛ diamboya mɛtɛ lo wonya wakoka! L’etena kɛnɛ kele tɔsɛngiya t’asekaso tamboleka monga wolo, hatohombe mbetawɔ di’andja ɔnɛ tofundɛ kɛnɛ kahombaso ndɔta. Toho ta ndɔta ndo ta nɔngɔsɔla demba tambolana lo ɛnɔnyi weke kambeta ɛnɛ. Kânga weoho w’ɛlɔtɔ walɔta amundji w’okanda ndo akambi w’olimu haleke sungana le Akristo. Ɔsɔ ekɔ ɔkɔkɔ okina wɛnya dia sho pombaka nshi tshɛ ndjalamaka di’aha ‘ndjafɔnya l’akambo wa l’andja ɔnɛ’ naka sho nangaka ndjaɔtɔnganyiya l’ɛlɛmbɛ waki Nzambi ndo ‘nɛnga wetshelo w’Oshimbedi aso, Nzambi, l’akambo tshɛ.’—Romo 12:2; Tito 2:10.
17. (a) Wembola akɔna wahombaso kana la wɔ yimba etena kasombaso ahɔndɔ kana kasɔnaso mɔdɛlɛ? (b) Bonde kahomba ewandji wa nkumbo mbidja yimba lo ɛnamelo k’ase nkumbo?
17 La ntondo ka somba dihɔndɔ, ekɔ ohomba ndjambola wate: ‘Lande na kangɛnangɛnami mɔdɛlɛ ɔnɛ? Onde vɔ fɔnaka la woho watɔlɔtaka ɔkɛnyi ɔmɔtshi wa tɔkɛnyɔ wa lokumu, kana onto ɔmɔtshi lalangami? Onde dengalenga dia lo ngelo kana djui mɔtshi y’anto yele la yimba y’ɔtɔmbɔkwɛlɔ mbalɔta yoho ya mɔdɛlɛ akɔ?’ Sho pombaka nto sɛdingola dihɔndɔ diakɔ dimɛna. Naka ekɔ dibaya kana kifunga, otale wa ngande wele la dihɔndɔ diakɔ? Onde diekɔ mondo? Onde diekɔ kɔmba, sunganaka, ndo mbishaka kɛnɛmɔ, kana onde diɔ diekɔ ohombo kana mwɛ, onde diɔ koka memula nsaki ya dieyanelo, kana hadieyama ɔtɛ l’ekolo? Yambola wate: ‘Onde layonga kiɔkɔ y’otakanya le anto akina naka dimi ndɔta dihɔndɔ nɛ?’ (2 Koreto 6:3, 4) Bonde kahombaso ndjakiyanya lo dikambo sɔ? Nɛ dia Bible mbutaka ɔnɛ: ‘Kânga Kristo kondjangɛnyangɛnya ndamɛ.’ (Romo 15:3) Ewandji wa nkumbo w’Akristo pombaka mbidja yimba lo woho wayalɔtshiya ase nkumbo yawɔ. L’ɔtɛ wa dilɛmiyɛlɔ diele lawɔ otsha le Nzambi ka lotombo katɛmɔlawɔ, ewandji wa nkumbo hawohombe mengenga dia mbisha alako wa shikaa ndo woludi la ngandji etena kele dikambo sɔ ohomba.—Jakoba 3:13.
18. Kakɔna kakotshutshuya dia mbidja yimba l’ɔlɔtɔ ndo l’ɔlɛngɛlɔ ayɛ wa demba?
18 Losango lewoyaso ndja oma le Jehowa, lele ekila ndo layasha nɛmɔ dioleki. (Isaya 6:3) Bible tokeketshaka dia mbôkoya “uku an’andi wa ngandji.” (Efeso 5:1) Ɔlɔtɔ ndo ɔlɛngɛlɔ aso wa demba kokaka mbisha anto kanyi ya dimɛna kana ya kɔlɔ lo kɛnɛ kendana la Shɛso lele l’olongo. Lo mɛtɛ, sho nangaka ngɛnyangɛnya otema ande!—Tukedi 27:11.
19. Ɛlɔlɔ akɔna wakondjaso lo mbewoya anto akina ‘akambo wa weke waki Nzambi’ na?
19 Ngande wayaokayɛ lo kɛnɛ kendana ‘l’akambo wa weke waki Nzambi’ wamboyeka? Lo mɛtɛ, tekɔ la diɛsɛ dia woke dia mbeka akambo wa mɛtɛ! Lam’ele tekɔ la mbetawɔ lo dikila diakatshola Yeso Kristo, pɛkato yaso yayodimanyiyama. (Etsha 2:38) Ɔnkɔnɛ, tekɔ la dihonga dia tɛkɛta la ntondo ka Nzambi. Sho hatohombe mboka nyɔi wɔma oko anto waha l’elongamelo nɛ dia Yeso toshikikɛka dia lushi lɔmɔtshi ‘wanɛ tshɛ wele lo waombo wohɔma wayoka dui diande ko wayotomba.’ (Joani 5:28, 29) Jehowa akatɛnya ngandji kande k’efula lo tosholɛ akambo anɛ tshɛ. Ndo nto, nde akatotshulwɛ nyuma kande. Ɔnkɔnɛ, lowando lele laso lo weshasha ɛsɔ tshɛ pombaka totshutshuya dia nɛmiya ɛlɛmbɛ ande wa lâdiko ndo mbotombola l’ohetoheto tshɛ, lo mbewoya anto akina ‘akambo wa weke’ asɔ.
[Nɔtɛ ya l’ɛse ka dikatshi]
a Lam’akasɔnɛ Jehowa Mɔsɛ nde l’Arɔna dia tɔtɛkɛta la Farawɔ lo wahɔ w’anto ande, Nde akatɛ Mɔsɛ ate: “Dimi lambukete uku [Nzambi] le Farawɔ. Ku onanyo Arona ayuyala umvutshi aye.” (Etumbelu 7:1, sho mbɛnganyisha alɛta ango.) Arɔna akakambe oko omvutshi, aha lo yoho ya mbuta akambo wa lo nshi yayaye, koko lo koma ɔtɛkɛtshi waki Mɔsɛ kana yɛmb’awui yande.
b L’atei wa nyemba y’anto yaki lo Dambo dia Dikɔlɔ dia Nkumadiɔndjɔ diakasalema Ngɔndɔ ka Sato 28, 2002, miliyɔ ya l’atei awɔ watakome ekambi waki Jehowa. Tekɔ lo nɔmba di’etema w’anto asɔ minandema woho wa vɔ kondja diɛsɛ dia koma apandjudi wa lokumu l’ɔlɔlɔ.
c Kânga mbele ɛtɛkɛta wa Paulo wakendanaka l’Akristo wa wamato, ɛtɛkɛta akɔ wamɛ ɛsɔ mendanaka l’Akristo w’apami ndo l’akɛnda.
Ngande wayoyokadimola?
• Naa ‘akambo wa weke’ wakoke anto lo Pɛntɛkɔsta ka l’ɔnɔnyi 33 T.D., ndo akawasale?
• Ngande wakoma onto ombeki waki Yeso Kristo, ndo kakɔna kalɔmbama di’onto koma ombeki?
• Lande na ekɔ ohomba le so dia mbidja yimba l’ɔlɔtɔ ndo l’ɔlɛngɛlɔ aso wa demba?
• Akambo akɔna wahombaso sɛdingola etena kasɔnaso dihɔndɔ kana mɔdɛlɛ wasungana?
[Osato wa lo lɛkɛ 29]
Petero akasambisha dia Yeso akolwama oma l’edo
[Esato wa lo lɛkɛ 31]
Onde ɛnamelo kayɛ mbishaka Nzambi katɛmɔlayɛ nɛmɔ?
[Esato wa lo lɛkɛ 32]
Ambutshi w’Akristo pombaka mbidja yimba lo ɛnamelo k’ase nkumbo